San na a moro bun fasi fu sreka wisrefi gi den konmakandra?

Efu yu e studeri Bijbel nanga wan fu den Kotoigi fu Yehovah, dan yu e luku na fesi san yu o studeri. A bun fu du dati tu efu yu wani kisi wini fu den gemeente konmakandra. Wi e kisi wini trutru te wi abi a gwenti fu sreka wisrefi.

Luku o ten èn pe yu o studeri. O ten yu kan studeri moro bun? Fruku mamanten? Fosi yu bigin nanga yu wroko? Noso na neti te den pikin go sribi kaba? Srefi efu yu no kan studeri langa, toku yu kan luku omeni ten yu kan poti na wan sei fu du dati, èn pruberi fu no meki noti kon na mindri. Suku fu studeri na wan tiri presi èn kiri yu radio, telefisi, nanga cellulair so taki den no puru yu prakseri. Te yu e begi fosi yu studeri, dan dati o yepi yu fu no broko yu ede tumusi nanga den sani di miti yu a dei dati. Na so fasi yu o man poti ala yu prakseri na Gado Wortu.​—Filipisma 4:6, 7.

Suku den piki èn sreka yusrefi fu abi wan prati na den konmakandra. Te yu o bigin, dan pruberi fu luku a heri tori. Prakseri a nen fu na artikel noso a kapitel. Luku fa ibri ondro-edeprakseri abi fu du nanga a nen dati. Baka dati, luku den prenki èn luku den aksi na a kaba fu si san na den moro prenspari pisi. Leisi ibri paragraaf èn suku a piki tapu den aksi. Suku èn leisi den Bijbeltekst di kari èn prakseri san den abi fu du nanga a tori (Tori fu den apostel 17:11). Te yu feni a piki tapu na aksi, dan hari strepi na ondro den moro prenspari wortu so taki yu o man memre a piki te yu de na a konmakandra. Te yu de na a konmakandra, dan yu kan opo yu anu èn gi syatu piki nanga yu eigi wortu.

Te yu o ondrosuku den difrenti tori di wi e taki fu den ibri wiki na den konmakandra, dan yu o kon sabi moro fu Bijbel.​—Mateyus 13:51, 52.

• Sortu gwenti yu musu abi te yu e sreka yusrefi gi den konmakandra?

• Fa yu kan sreka yusrefi fu gi wan piki na a konmakandra?