Sreka joesrefi gi den gemeente konmakandra èn njan boen foe den
1 Leki wan libimakandra foe brada, wi e handri tapoe wan koni fasi te wi e kon makandra doronomo na den ala wiki konmakandra foe wi (1 Tim. 4:15, 16). Fa wi kan njan boen èn kisi a moro boen winimarki foe den konmakandra?
2 Doronomo wi moesoe poti ten na wan sei foe sreka wisrefi gi den konmakandra. Son sma kande, man foe gebroiki moro ten foe sreka densrefi leki trawan. Tokoe, awinsi wi abi foeroe foe doe, na wan koni sani foe meki ten foe sreka wisrefi gi den konmakandra. A sa tjari spesroetoe winimarki te wi e sreka wisrefi leki osofamiri.—Ef. 5:15, 16.
3 Gi a theokrasia diniwroko-skoro: Meki moeiti foe de skinskin nanga na ala wiki bijbel-leisi schema (Jos. 1:8). Loekoe a materiaal foe san den sa taki, baka èn tjari den poeblikâsi di de fanowdoe so taki joe kan si pe den takiman de. Prakseri foe den fasi fa joe kan gebroiki a bodoi disi na ini joe diniwroko.
4 Gi a diniwroko konmakandra: Loekoe a programa di skrifi na ini Wi Kownoekondre Dienst. Leisi den artikel di den o taki foe den. Efoe wi sa taki foe materiaal foe wan Waktitoren-artikel noso foe wan tra poeblikâsi, soekoe en èn leisi en so srefi. Efoe den sa demo pristeri gi a velddienst, loekoe den na fesi baka, so taki joe sa de srekasreka foe gebroiki den na ini joe diniwroko.
5 Gi a Waktitoren-studie: Leisi na artikel na fesi, èn marki den piki na tapoe den aksi. Te joe e soekoe den tekst di de na ini na artikel, dan dati sa jepi joe foe froestan en moro boen. A denki di joe e denki dipi foe a fasi fa na artikel e fiti nanga san joe sabi kaba, sa meki a sabi foe joe kon moro bradi. Teki sreka na fesi foe abi wan prati na a studie, foe di joe e sreka joesrefi foe gi sjatoe komentaar tapoe awinsi wán noso toe paragraaf. Disi na wan prenspari fasi fa wi e meki „a howpoe foe wi bekènti na poebliki”.—Hebr. 10:23.
6 Gi a gemeente boekoestudie: A fosi sani, loekoe a materiaal; loekoe a nen foe a kapitel nanga den ondro-ede prakseri. Baka dati, te joe e leisi, poti prakseri boen na tapoe den prenspari penti. Loekoe den bijbel tekst baka di e horibaka gi den sani di skrifi. Proeberi foe gi piki tapoe den aksi nanga joe eigi wortoe. Baka te joe sreka na artikel, prakseri foe en baka. Proeberi foe memre den ede prakseri baka èn proeberi foe froestan a fasi fa den e tjari den prenspari penti kon na fesi na ini na artikel.—2 Tim. 2:15.
7 Njan boen foe den konmakandra: Foe njan boen foe den konmakandra dorodoro, a de prenspari foe doro biten so taki joe kan de drape na a fosi begi, te wi e aksi foe a jeje foe Gado. Joe e njan boen so srefi foe den Kownoekondre singi di e gi kowroe-ati. Efoe joe no abi jongoe pikin noso wan toe tra reide no de foe sidon na baka sei foe a zaal, a kan de so dati joe sa feni taki efoe joe e sidon moro na fesisei, dan foeroe sani no sa de di sa meki joe lasi prakseri, èn joe sa kisi moro winimarki foe a programa. Papa nanga mama di abi pikin-nengre di kande moesoe tjari den pikin disi go na dorosei, ala di a konmakandra de ete, kan meki moro mindri sma lasi prakseri te den e sidon krosibei foe a gang èn moro na bakasei.
8 Doe tranga moeiti foe soekoe den tekst di den e leisi. Disi sa jepi joe foe memre san joe e jere. Te joe e taki nanga joe famiri èn nanga joe mati foe den sani di joe e leri, dan dati sa jepi joe foe hori den bodoi na prakseri. Te wi e fiti den rai disi, dan dati sa meki taki den konmakandra wani taki moro gi wi èn a sa meki taki den switi gi wi èn troetroe den sa „gi wi tranga foe sori lobi èn foe doe toemoesi boen wroko”.—Hebr. 10:24, 25.