Fu san ede yu musu tan leri moro fu Yehovah?

1. Sortu wini yu o kisi te yu e tan studeri Bijbel?

A no de fu taki dati den prenspari Bijbel leri di yu kon sabi, meki taki yu kisi moro lobi gi Yehovah. Wi musu tan meki muiti fu meki a lobi disi kon moro tranga (1 Petrus 2:2). Fu kan abi a howpu fu libi fu têgo, dan yu musu tan studeri Gado Wortu fu kon moro krosibei na en.​—Leisi Yohanes 17:3; Yudas 21.

O moro yu e kon sabi sani fu Gado, o moro a bribi fu yu o kon tranga. A bribi fu yu o yepi yu fu libi na wan fasi di e plisi Gado (Hebrewsma 11:1, 6). A o meki yu sori berow èn a o meki yu tyari den kenki kon di de fanowdu.​—Leisi Tori fu den apostel 3:19.

2. Fa trawan kan kisi wini fu den sani di yu kon sabi fu Gado?

A no de fu taki dati yu o wani fruteri trawan den sani di yu leri. Wi alamala lobi fruteri trawan bun nyunsu. Te yu e tan studeri Bijbel, dan yu o leri fa fu gebroiki a buku disi fu fruteri trawan fu san ede yu e bribi na ini Yehovah èn na ini a bun nyunsu.​—Leisi Romesma 10:13-15.

Furu sma e bigin fosi fu fruteri den mati noso famiri a bun nyunsu. Ma sorgu taki yu hori den firi fu den na prakseri. Na presi fu taigi den taki a bribi fu den no bun, fruteri den san Gado pramisi. No frigiti taki nofo tron, a no den sani di yu e taki e hari sma prakseri, ma na a fasi fa yu e tyari yusrefi.​—Leisi 2 Timoteyus 2:24, 25.

3. Sortu grani yu kan kisi?

Te yu e studeri Gado Wortu, dan a bribi fu yu o kon moro tranga. Te fu kaba yu kan tron wan memre fu en osofamiri èn dati na wan bigi grani trutru.​—Leisi 2 Korentesma 6:18.

4. Fa yu kan sorgu taki yu e tan go na fesi?

Yu kan go na fesi na ini a tru anbegi te yu e tan studeri Gado Wortu (Hebrewsma 5:13, 14). Aksi wan Yehovah Kotoigi fu studeri Bijbel nanga yu nanga yepi fu a buku San Bijbel kan leri wi? O moro yu o leri fu Gado Wortu, o moro yu libi o waka bun.​—Leisi Psalm 1:1-3; 73:27, 28.

A bun nyunsu e kon fu Yehovah, a koloku Gado. O moro yu abi demakandra nanga a pipel fu Gado, o moro yu sa kon krosibei na en (Hebrewsma 10:24, 25). Te yu e tan du muiti fu plisi Yehovah, dan yu e suku fu kisi a trutru libi, iya, têgo libi. Fu tru, a moro bun sani di yu kan du na fu kon moro krosibei na Gado.​—Leisi 1 Timoteyus 1:11; 6:19.