Wi e kisi wini te wi e saka wisrefi ondro den wan di Gado poti leki edeman

EFU wi wani de sma di orga fu du a wani fu Yehovah, dan wi musu saka wisrefi na en ondro, fu di en na a Moro Heiwan fu hemel nanga grontapu. Wi e sori lespeki gi a frantwortu di a Manpikin fu en abi fu tiri a Kresten gemeente èn wi e saka wisrefi tu na ondro trawan di Gado poti leki edeman. Ibriwan sma di e saka ensrefi na ondro a seti fu Gado e kisi wini fu dati.

² A fosi leisi di libisma ben musu saka densrefi ondro wan edeman, ben de na ini a dyari fu Eden. Disi e kon na krin na ini den komando fu Gado di skrifi na Genesis 1:28 nanga Genesis 2:16, 17. Adam nanga Eva ben o basi den meti, ma den ben musu saka densrefi na ondro a tiri fu Gado fu du a wani fu en. Te den ben o du disi, dan den ben o abi freide èn ala sani ben o waka bun. Bakaten na apostel Paulus tyari kon na krin na ini 1 Korentesma 11:3 na ondro suma Gado wani taki sma musu saka densrefi. A ben skrifi: „Mi wani fu unu sabi taki Krestes na a ede fu ibri man. A man na a ede fu na uma, èn Gado na a ede fu Krestes.” Sobun, ala sma boiti Yehovah musu saka densrefi ondro wan edeman.

³ Furu sma na ini a ten disi no e lespeki a seti disi fu Gado. Fu san ede? A problema bigin na ini Eden di a papa nanga a mama fu libisma bosroiti fu no saka densrefi moro na ondro a tiri fu Gado di de a Moro Heiwan fu hemel nanga grontapu (Gen. 3:4, 5). Ma toku den no ben kon moro fri. Na presi fu dati, den ben kon de ondro a tiri fu wan ogri yeye, Satan Didibri. Na fu di Adam nanga Eva opo densrefi teige Gado, meki libisma no sabi Gado (Kol. 1:21). A bakapisi na taki furu sma na ini a ten disi de ete na ini a makti fu na ogriwan.​—1 Yoh. 5:19.

⁴ Fu di wi e leri san Gado Wortu e taki trutru èn fu di wi e du san a e taki, meki wi no de moro na ondro a makti fu Satan. Leki Kotoigi di gi wisrefi abra na Gado èn di dopu, wi e si Yehovah leki a Moro Heiwan di abi a reti fu tiri wi libi. Wi e agri nanga Kownu David di ben e si Yehovah leki na „edeman fu ala sma” (1 Kron. 29:11). Nanga sakafasi wi srefi e taki tu: „Sabi taki Yehovah na Gado. Na en meki wi. A no wi meki wisrefi. Wi na en pipel èn den skapu di de na a weigron fu en” (Ps. 100:3). Wi e agri taki Yehovah bigi trutru èn taki a warti fu wi saka wisrefi na en ondro na ini ala sani, fu di na en meki ala sani (Openb. 4:11). Leki dinari fu a tru Gado, wi e waka baka Yesus Krestes di de a moro bun eksempre fu wan sma di saka ensrefi na ondro Gado.

⁵ San Yesus leri fu den sani di miti en di a ben de na grontapu? Hebrewsma 5:8 e taki: „Aladi a ben de a Manpikin fu en [Gado], toku den pina di miti en, ben leri en fa fu gi yesi.” Iya, Yesus tan saka ensrefi ondro en hemel Tata, srefi di problema ben miti en. Boiti dati, Yesus no ben du noti fu ensrefi. Den leri di a gi no ben e kon fu ensrefi èn a no suku glori gi ensrefi tu (Yoh. 5:19, 30; 6:38; 7:16-18). Di a ben e du a diniwroko fu en a ben prisiri fu du a wani fu en Tata, aladi a wroko disi ben meki taki sma gens en èn taki den frufolgu en (Yoh. 15:20). Toku Yesus saka ensrefi na Gado ondro. Srefi di a ben o „dede na wan pina-postu”, a tan „saka ensrefi”. A tyari furu blesi kon di a saka ensrefi na ondro Yehovah. A libisma famiri kisi frulusu fu têgo, Yesus kisi wan moro hei posisi, èn a Tata fu en kisi glori.​—Fil. 2:5-11; Hebr. 5:9.

NA ONDRO SUMA GADO WANI TAKI WI MUSU SAKA WISREFI?

⁶ Te wi e saka wisrefi na Gado ondro èn wi e du a wani fu en, dan wi kan wai pasi gi furu broko-ede nanga problema di e miti den sma di no wani saka densrefi ondro a tiri fu Yehovah leki a Moro Heiwan. Wi gensman Didibri e tan suku fasi fu swari wi. Wi o kon fri fu na ogriwan dati efu wi kakafutu gi en èn efu wi saka wisrefi ondro Yehovah nanga wi heri ati.​—Mat. 6:10, 13; 1 Petr. 5:6-9.

⁷ Wi di de na ini a Kresten gemeente e lespeki Krestes leki edeman èn wi e lespeki a frantwortu di a gi „a koni srafu di de fu frutrow”. Disi abi krakti tapu a fasi fa wi e denki èn a fasi fa wi e libi nanga makandra. Efu wi e saka wisrefi na ondro den sani di Gado seti fu tiri a gemeente, dan wi o de klariklari fu du ala sani di Bijbel e taki fu na anbegi fu wi. Dati na sani di abi fu du nanga wi diniwroko, a go di wi e go na konmakandra èn e teki prati na den, a matifasi di wi abi nanga den owruman, èn a fasi fa wi e horibaka gi den sani di Gado organisâsi seti.​—Mat. 24:45-47; 28:19, 20; Hebr. 10:24, 25; 13:7, 17.

⁸ Te wi e saka wisrefi na Gado ondro, dan a Kresten gemeente o abi freide, a o kisi kibri, èn sani o waka bun. A fasi fa den sma di e saka densrefi ondro Gado e tyari densrefi e sori fa Gado de (1 Kor. 14:33, 40). Den sani di wi e ondrofeni na ini na organisâsi fu Yehovah e meki taki wi e agri nanga den wortu fu Kownu David. Baka di David kon si a difrenti na mindri den futuboi fu Yehovah nanga den ogrisma, dan nanga furu prisiri a taki: „Koloku fu den sma di abi Yehovah leki Gado!”​—Ps. 144:15.

⁹ Na ini a trowlibi èn na ini na osofamiri-libi „a man na a ede fu na uma”. Ma den mansma musu saka densrefi na ondro Krestes èn Gado na a edeman fu Krestes (1 Kor. 11:3). Wefi musu saka densrefi na ondro a masra fu den èn pikin musu saka densrefi na ondro a papa nanga mama fu den (Ef. 5:22-24; 6:1). Wan osofamiri kan libi na ini freide te ibri memre e saka densrefi na ondro den wan di Gado poti leki edeman fu den.

¹⁰ Wan masra musu tyari en frantwortu leki edeman nanga furu lobi, neleki fa Yesus ben du dati (Ef. 5:25-29). Te a no e gebroiki a makti fu en na wan fowtu fasi èn te a e tan tyari en frantwortu leki edeman, dan en wefi nanga den pikin o prisiri fu saka densrefi na en ondro. A wefi abi a frantwortu fu de wan yepi gi en masra. A musu de wan patna di fiti na en masra (Gen. 2:18). Te a e horibaka gi en masra nanga pasensi èn te a e lespeki en, dan a masra o lobi en moro nanga moro èn dati e gi Gado grani (1 Petr. 3:1-4). Te masra nanga wefi e du san Bijbel e leri èn den e saka densrefi na ondro den wan di Gado poti leki edeman fu den, dan den e leri den pikin fu saka densrefi na ondro Gado tu.

¹¹ A fasi fa wi e saka wisrefi na ondro Gado abi krakti sosrefi tapu a fasi fa wi e si „den tiriman” fu grontapu, fu di na „Gado gi den na okasi fu tiri na difrenti fasi” (Rom. 13:1-7). Leki sma di e hori densrefi na lantiwet, Kresten e pai belasting. Den e ’pai Grankownu san na fu Grankownu, ma den e pai Gado san na fu Gado’ (Mat. 22:21). Sosrefi, efu lantiwet de di e sori fa unu mag gebroiki den nen nanga adres fu sma, dan un musu hori unsrefi na den wet dati te unu e seti sani fu preiki na ini a kontren. Te wi e saka wisrefi ondro den tirimakti èn te wi e gi yesi na den solanga a no de teige den wet fu Yehovah, dan wi o man poti moro prakseri na a preikiwroko.​—Mark. 13:10; Tori 5:29.

¹² Te wi e saka wisrefi na ondro a seti fu Gado, dan dati abi krakti tapu wi heri libi. Fu di wi abi bribi, meki wi de seiker taki wan dei o kon pe ala libisma o saka densrefi na ondro Yehovah Gado (1 Kor. 15:27, 28). Den wan di e lespeki Yehovah leki a Moro Hei Tiriman o kisi bigi blesi te den tan saka densrefi na ondro a tiri fu Yehovah fu têgo!