A saka di wan sma moesoe saka ensrefi na Gado ondro — Foe san ede èn soema moesoe doe dati?
„Mi sabi heri boen o Jehovah, taki a no de na wan sma foe grontapoe foe a bepaal a pasi foe en. A no de na wan man di e waka srefi foe fiti en foetoe stapoe.” — JEREMIA 10:23.
1. Sortoe fasi foe srefidensi sma e warderi srefisrefi?
WAN foe den moro prenspari sani di sma skrifi tapoe papira na a Froeklari foe Srefidensi, di nanga jepi foe dati 13 kolonie na Noord-Amerkankondre ben froeklari a srefidensi foe den, foe a mamakondre, Ingrisikondre, ini a di foe 18 jarihondro. Den ben wani fri, èn srefidensi foe wan freimde tirimakti èn fri ben e go anoe nanga anoe. Srefidensi na politiek èn ekonomia sei kan tjari foeroe wini. No so langa pasa, wan toe kondre na Owstoe-Europa ben orga sani foe kisi srefidensi na politiek sei. Ma sma moesoe erken taki na den kondre dati so wan srefidensi ben tjari foeroe serjoesoe problema kon.
2, 3. (a) Baka sortoe fasi foe srefidensi sma no moesoe feti? (b) Fa a sani disi ben tjari kon na krin na wan kraktifasi?
2 Awansi o boen kande difrenti fasi foe srefidensi de, tokoe wan fasi foe srefidensi de di no boen. San na dati? Srefidensi foe a Mekiman foe libisma, Jehovah Gado. Dati a no wan blesi ma wan floekoe. Foe san ede? Foe di a no ben de a prakseri taki libisma ben moesoe handri na wan srefidensi fasi foe en Mekiman, so leki fa den wortoe, di skrifi na tapoesei, foe a profeiti Jeremia e sori so moi. Nanga tra wortoe, libisma ben moesoe saka ensrefi na en Mekiman ondro. Foe saka wisrefi na wi Mekiman ondro wani taki, dati wi moesoe gi jesi na en.
3 Taki sma moesoe doe dati ben tjari kon na krin na wan kraktifasi gi a fosi libismapaar ini a komando di Jehovah ben gi den, so leki dati skrifi na Genesis 2:16, 17: „Foe ibri bon foe a djari oenoe mag njan te oen bere foeroe. Ma foe a sei foe a bon foe sabi boen nanga ogri, oenoe no moesoe njan foe dati, bika na a dei di oenoe sa njan foe dati, oenoe sa dede seiker.” Foe di Adam ben weigri foe saka ensrefi na en Mekiman ondro, dati ben tjari gi en nanga ala den bakapikin foe en, pina nanga dede. — Genesis 3:19; Romesma 5:12.
4, 5. (a) San ben de a bakapisi foe a weigri di sma ben weigri foe saka densrefi na Gado ondro? (b) Gi sortoe moreel wet wi no kan lon?
4 A weigri di libisma weigri foe saka densrefi na Gado ondro na wan sani di no koni, èn di fowtoe so srefi na moreel sei. Ini grontapoe, disi abi leki bakapisi kroektoedoe, ogridoe, takroedoe nanga seks hoeroedoe, nanga en froktoe foe siki di sma kisi foe seks di de foe si na ala sei. Boiti dati, a no de so taki na ogri di jongoesma e doe na ala sei, panja na a heri grontapoe, foe di jongoesma e weigri foe saka densrefi na Jehovah ondro, so boen leki na a papa nanga a mama foe den èn na ondro den wet foe a kondre? A jeje disi foe srefidensi de foe si na a freimde èn morsoe fasi fa foeroe sma e weri den krosi èn na den doti taki di den e gebroiki.
5 Ma no wan sma kan lon gi a fasti moreel wet foe a Mekiman: „No kori oensrefi: Gado no e meki sma spotoe en. San wan sma e sai, na dati a sa koti toe; bika a sma di e sai nanga en skin na prakseri, a sa koti porifasi foe en skin.” — Galasiasma 6:7, 8.
6, 7. San na a roetoe foe a weigri di sma e weigri foe saka densrefi na trawan ondro, èn sortoe eksempel e sori dati?
6 San na a roetoe foe ala a weigri disi di sma e weigri foe saka densrefi na wan trawan ondro? Te wi e taki en na wan eenvoudig fasi, dan a de a prakseri di sma e prakseri densrefi nomo nanga a heimemrefasi. Dati na foe san ede Eva, a fosi oema, ben meki a sneki kori en èn a ben teki foe a froktoe di a no ben mag njan. Efoe a ben abi bescheidenfasi nanga sakafasi, a tesi foe de leki Gado — foe bosroiti gi ensrefi san boen nanga san ogri — no ben sa sori gi en leki wan moi sani. Èn efoe a no ben prakseri ensrefi nomo, a no ben sa wani wan sani di en Mekiman, Jehovah Gado, ben taki spesroetoe taki a no mag njan en. — Genesis 2:16, 17.
7 No langa na baka di Adam nanga Eva ben fadon, heimemrefasi nanga a prakseri di Kain ben prakseri ensrefi nomo, ben meki a kiri en brada Abel. So srefi, a prakseri di son engel ben prakseri densrefi nomo ben meki den handri na wan srefidensifasi, foe di den ben libi a fosi posisi foe den èn ben teki libisma skin so taki den ben kan njanboen foe prisiri na skin fasi. Heimemrefasi nanga a prakseri di Nimrod ben prakseri ensrefi nomo ben boeweigi na ati foe en èn sensi a ten foe en, disi ben de na eigifasi foe moro foeroe foe den grontapoe tiriman. —Genesis 3:6, 7; 4:6-8; 1 Johanes 3:12; Judas 6.
Foe san ede wi moesoe saka wisrefi na Jehovah Gado ondro
8-11. San na fo krakti reide foe sori taki wi e saka wisrefi na Gado ondro?
8 Foe san ede wi moesoe saka wisrefi na wi Mekiman, Jehovah Gado, ondro? Na a fosi presi, foe di a de na Universeel Soeverein. Nanga reti ala tirimakti de na en. En na wi Kroetoeman, Giman foe wet nanga Kownoe (Jesaja 33:22). Heri boen den ben skrifi foe en: „Ala sani de krin foe si èn poti, sondro foe kibri wan sani, na fesi den ai foe a sma di wi moesoe gi frantiwortoe na en.” — Hebrewsma 4:13.
9 Boiti dati, foe di wi Mekiman de almakti, no wan sma kan gens en èn abi boen bakapisi; no wan sma kan weigri foe si a froeplekti foe en, foe saka ensrefi na a Mekiman ondro. Wan ten sa kon taki den sma di e weigri dati, sa kisi pori so leki ben pasa nanga Farao foe owroeten èn so leki sa pasa nanga Satan Didibri na a reti ten foe Gado. — Psalm 136:1, 11-15; Openbaring 11:17; 20:10, 14.
10 A de a plekti foe ala mekisani di abi froestan foe saka densrefi na den Mekiman ondro, foe di den e libi nanga a marki foe dini en. Openbaring 4:11 e froeklari: „Joe Jehovah, ija wi Gado, de warti foe kisi a glori èn a grani èn a krakti, bika joe meki ala sani èn foe joe ede meki den de èn den ben meki.” En na a Gran Patoebakriman èn a e meki libisma patoe foe dini a prakseri foe en. — Jesaja 29:16; 64:8.
11 Wi no moesoe frigiti taki wi Mekiman koni moro ala sma, foe dati ede a sabi san moro boen gi wi (Romesma 11:33). Den wet foe en de ’foe a boen foe wi’ (Deuteronomium 10:12, 13). Ma san moro prenspari, „Gado na lobi”, so boen a wani soso san boen gi wi. Omeni krakti reide wi abi foe saka wisrefi na wi Mekiman, Jehovah Gado ondro! — 1 Johanes 4:8.
Jesus Krestes, a volmaakti eksempel foe wan sma di saka ensrefi na Gado ondro
12, 13. (a) Fa Jesus Krestes ben sori taki a ben saka ensrefi na Gado ondro? (b) Sortoe wortoe foe Jesus e sori taki a ben de nanga sakafasi?
12 Foe troe, Jesus Krestes, Jehovah en wan enkri gebore Manpikin, e gi wi a volmaakti eksempel foe wan sma di saka ensrefi na Gado ondro. Na apostel Paulus e tjari disi kon na krin na Filipisma 2:6-8: „Ala di [Jesus] ben de na a fasi foe Gado, a no ben prakseri foe teki dati na wan ogri-atifasi, dati wani taki, foe de leki Gado. Nôno, ma a ben libi en glori èn teki a skin foe wan srafoe èn a ben tron leki libisma. Moro leki dati, di a ben de leki libisma, a ben saka ensrefi èn a ben gi jesi te na dede, ija, a dede na wan pina-oedoe.” Di Jesus ben de na grontapoe, ibritron baka a ben taki dati a no ben doe no wan sani foe di ensrefi wani dati; a no ben handri na wan srefidensifasi, ma ala ten a ben tan saka ensrefi na en hemel Tata ondro.
13 Wi e leisi na Johanes 5:19, 30: „Jesus ben go doro foe taigi den: ’Foe troe, foe troe, mi e taigi oenoe: a Manpikin no kan doe wan sani foe di ensrefi wani dati, ma soso a sani san a e si a Tata e doe. Bika ala sani di a Sma dati e doe, na dati a Manpikin e doe toe na a srefi fasi. Mi no kan doe noti foe di misrefi wani dati; leki fa mi e jere, mi e kroetoe; èn a kroetoe di mi e tjari kon, de regtfardiki, bika mi no e soekoe mi eigi wani, ma a wani foe en di ben seni mi kon.’” Na a srefi fasi, a ben begi ibritron baka na a neti di den tori en: „No so leki mi wani, ma so leki joe wani.” — Mateus 26:39, 42, 44; loekoe so srefi Johanes 7:28; 8:28, 42.
Eksempel foe owroeten foe sma di saka densrefi na Gado ondro
14. Na sortoe fasi Noa ben sori taki a ben saka ensrefi na Gado ondro?
14 Noa ben de na mindri den fosi eksempel foe libisma di saka densrefi na Gado ondro. Na dri fasi a ben sori taki a ben saka ensrefi na Gado ondro. Na a fosi presi, foe di a ben de wan regtfardiki man, di ben de sondro fowtoe na mindri den sma foe en ten, ala di a ben waka nanga a troe Gado (Genesis 6:9). Na a di foe toe presi, foe di a ben bow na ark. A „ben doe akroederi ala sani di Gado ben komanderi en foe doe. Joisti so a ben doe” (Genesis 6:22). Na a di foe dri presi, foe di a ben warkskow foe a Froedoe di ben o kon, leki „wan preikiman foe regtfardikifasi.” — 2 Petrus 2:5.
15, 16. (a) Sortoe moi eksempel Abraham ben gi ini a saka di wan sma moesoe saka ensrefi na Gado ondro? (b) Fa Sara ben sori taki a ben saka ensrefi na trawan ondro?
15 Abraham ben de wan tra toemoesi moi eksempel foe a saka di wan sma moesoe saka ensrefi na Gado ondro. A ben sori taki a ben saka ensrefi, foe di a ben gi jesi na a komando foe Gado: „Hari komoto na joe kondre” (Genesis 12:1). Dati ben wani taki, dati a ben moesoe libi den switi sani di ben de lontoe en na Ur (Ur no ben de wan foto di no ben de prenspari, so leki fa archeologis sani di den feni, e sori), foe e wakawaka wan hondro jari foe a wan presi go na a trawan leki wan sma di no abi wan fasti tanpresi na ini wan freimde kondre. Na wan spesroetoe fasi Abraham ben sori taki a ben saka ensrefi na Gado ondro, di a ben tanapoe na fesi a bigi tesi foe de klariklari foe òfer en manpikin Isak. — Genesis 22:1-12.
16 Sara, a wefi foe Abraham, e gi wi wan tra moi eksempel foe a saka di wan sma moesoe saka ensrefi na Gado ondro. A waka di a ben wakawaka lontoe na ini wan freimde kondre, seiker ben tjari foeroe hebi kon, ma na no wan presi wi e leisi taki a ben kragi. A ben gi wan boen eksempel foe a saka di wan sma moesoe saka ensrefi na Gado ondro ini den toe kefal pe Abraham ben pristeri en leki en sisa na fesi foe heiden tiriman. Ala toe leisi a ben wroko nanga en makandra, srefi ala di a ben abi leki bakapisi taki pikinmoro a ben tron wan memre foe wan heri titei wefi foe den heiden tiriman. A sani di e kotoigi taki a ben saka ensrefi na Gado ondro, na a fasi fa na ini en ati a ben sori tapoe en masra, Abraham, leki „mi masra” èn na so fasi a ben sori taki, dati ben de na opregti fasi foe en ati. — Genesis 12:11-20; 18:12; 20:2-18; 1 Petrus 3:6.
17. Foe san ede wi kan taki, dati Isak ben sori taki a ben saka ensrefi na Gado ondro?
17 No meki wi frigiti na eksempel di Isak, a manpikin foe Abraham gi wi, foe a saka di wan sma moesoe saka ensrefi na Gado ondro. Den gwenti foe den djoe, e sori taki Isak ben de so wan 25 jari di Jehovah ben komanderi en tata, Abraham, foe òfer en leki wan ofrandi. Efoe Isak ben wani, dan makriki a ben kan kakafoetoe gi en tata, di ben de wanhondro jari owroe moro en. Ma nôno. Ala di Isak ben aksi ensrefi foe san ede no wan meti ben de gi na ofrandi, tokoe na wan safoefasi a ben saka ensrefi na en tata ondro, di a ben poti en na tapoe na altari èn baka dati ben e tai en anoe nanga en foetoe foe sorgoe taki Isak no ben man meki wan boeweigi di ensrefi no ben wani noso taki a ben man hori ai na tapoe dati, te a ben gebroiki a sraktinefi. — Genesis 22:7-9.
18. Fa Moses ben sori wan boen eksempel foe a saka di wan sma moesoe saka ensrefi na Gado ondro?
18 Jari na baka dati, Moses ben gi wi wan boen eksempel foe a saka di wan sma moesoe saka ensrefi na Gado ondro. Dati seiker e kon a krin, te den e taki foe en leki „a moro safri-ati man di ben de na grontapoe” (Numbers 12:3). A doe di a ben doe den komando foe Jehovah 40 jari langa ini a sabana, foe di a ben gi jesi, srefi di a ben abi a tiri tapoe wan oproeroe pipel di ben teri toe noso dri miljoen, e kotoigi moro fara taki a ben saka ensrefi na Gado ondro. Na so a tori e taki „Moses ben doe ala san Jehovah ben taigi en. Joisti so a ben doe.” — Exodus 40:16.
19. Nanga sortoe wortoe Job ben sori taki a ben saka ensrefi na Jehovah ondro?
19 Job na wan tra aparti sma di ben gi wi wan toemoesi moi eksempel foe a saka di wan sma moesoe saka ensrefi na Gado ondro. Baka di Jehovah ben gi Satan primisi foe wai ala Job en goedoe poeroe, foe kiri den pikin foe en èn baka dati foe naki en nanga „wan ogri boet-sweri foe en ondrofoetoe te go miti en edekrabasi”, Job en wefi taigi en: „Joe e hori joe soifri retidoe ete? Floekoe Gado èn dede!” Ma tokoe Job ben sori taki a ben saka ensrefi na Gado ondro di a ben taigi en: „Neleki fa den lasi-ede oema e taki, na so joe e taki toe. Wi sa teki soso boen sani foe a troe Gado èn no teki takroe sani toe?” (Job 2:7-10). Den wortoe foe en di skrifi na Job 13:15, e sori a srefi fasi, fa a ben prakseri: „Srefi efoe a ben o kiri mi, mi no ben sa wakti?” Ala di Job, foe taki en leti, ben broko en ede srefisrefi nanga en eigi retidoe, wi no moesoe frigiti taki te foe kaba Jehovah ben taigi wán foe den sokari trowstoeman foe en: „Mi ati kon bron nanga joe èn den toe kompe foe joe, bika oen man, oen no ben taki san de troe, so leki mi foetoeboi Job.” Sondro degedege Job e gi wi wan moi eksempel foe a saka di wan sma moesoe saka ensrefi na Gado ondro. — Job 42:7.
20. Na sortoe fasi David ben sori taki a ben saka ensrefi na Gado ondro?
20 Meki wi kari ete wán eksempel foe den Hebrew Boekoe, dati na David. Di kownoe Saul ben onti David neleki a ben de wan meti, David ben abi toe okasi foe tapoe den problema foe en nanga a kiri di a ben kan kiri Saul. Tokoe a saka di David ben saka ensrefi na Gado ondro, ben tapoe en foe doe so wan sani. Wi e leisi den wortoe foe en na 1 Samuèl 24:6: „A no de wan sani di e kon na prakseri, foe mi sei, foe a fasi fa Jehovah e si sani, taki mi ben sa doe so wan sani nanga mi masra, a salfoewan foe Jehovah, foe langa mi anoe go kontrari en, foe di en na a salfoewan foe Jehovah”. (Loekoe toe 1 Samuèl 26:9-11.) Na a srefi fasi a ben sori taki a ben saka ensrefi na Gado ondro, di a ben teki piri-ai di a ben meki fowtoe noso di a ben sondoe. — 2 Samuèl 12:13; 24:17; 1 Kroniki 15:13.
Paulus eksempel foe wan sma di saka ensrefi na trawan ondro
21-23. Ini sortoe difrenti eksempel na apostel Paulus ben sori taki a ben saka ensrefi na Gado ondro?
21 Ini den kresten Griki Boekoe wi abi wan toemoesi aparti eksempel foe a saka di na apostel Paulus ben saka ensrefi na Gado ondro. A ben waka baka en Masra, Jesus Krestes, ini a tori disi so leki a ben doe ini ala tra tori foe en apostel diniwroko (1 Korentesma 11:1). Ala di Jehovah Gado ben gebroiki en moro leki iniwan foe den tra apostel, Paulus noiti ben handri na wan srefidensifasi. Lukas e froeteri wi taki di na aksi ben de taki te wan heiden ben drai en libi, efoe a ben de fanowdoe foe a besnij, „den [den brada na Antiokia] ben sreka sani dati Paulus nanga Barnabas nanga wan toe trawan foe den, go na den apostel nanga owroe man na Jerusalem foe a kesekese disi ede.” — Tori foe den Apostel 15:2.
22 Foe a zending wroko foe Paulus den e froeteri wi na Galasiasma 2:9: „Di den ben kon sabi a no-froedini boen-atifasi di mi ben kisi, dan Jakobus nanga Cefas nanga Johanes, den sma di ben sori foe de stonfoetoe, ben gi mi nanga Barnabas a reti anoe foe teki prati makandra, taki wi ben sa go na den nâsi, ma den na den sma di besnij.” Na presi foe doe sani na wan srefidensifasi, Paulus ben soekoe tiri.
23 Na a srefi fasi, a lasti leisi di Paulus ben de na Jerusalem a ben teki a rai di den owroeman drape ben gi ini a tori foe a go di wan sma ben kan go na a tempel èn doe den sani foe a Wet so taki ala sma ben kan si taki a no ben de wan sma di ben fadon komoto na bribi, so langa dati ben abi foe doe nanga a Wet foe Moses. Foe di a ben e doe so, a sori leki a kaba pisi foe en ben de wan rampoe, foe di den ben soetoe faja gi wan groepoe oproeroe sma kontrari en, a saka di a ben saka ensrefi na den owroeman ondro ben de wan fowtoe sani? Nôno, kwetikweti, so leki wi kan si krin foe san wi e leisi na ini Tori foe den Apostel 23:11: „A tamara neti foe en Masra ben kon na en èn ben taki: ’Abi deki-ati! Bika so leki joe ben gi wan boen kotoigi, di abi foe doe nanga mi na Jerusalem, na so joe moesoe gi kotoigi toe na Rome.’”
24. Foe sortoe tra sani, ini a tori foe a saka di wi moesoe saka wisrefi na trawan ondro, wi sa taki ini a tra artikel?
24 Foetroe den Boekoe e gi wi krakti reide foe saka wisrefi na trawan ondro èn den moi eksempel foe den sma di ben sori so wan saka di wan sma moesoe saka ensrefi na trawan ondro. Ini na artikel di e kon now, wi sa go loekoe den difrenti kontren di wi kan saka wisrefi na Jehovah Gado ondro, den sani di kan jepi wi foe doe dati èn den paiman di dati abi leki bakapisi.
Fa joe ben sa piki?
◻ Baka sortoe fasi foe srefidensi sma no moesoe feti?
◻ San na a roetoe foe a weigri di sma e weigri foe saka densrefi na tra sma ondro?
◻ Foe sortoe reide wi moesoe saka wisrefi na Jehovah ondro?
◻ Sortoe toemoesi moi eksempel den Boekoe e gi foe a saka di wi moesoe saka wisrefi na Gado ondro?
[Prenki na tapoe bladzijde 10]
Nimrod, a fosi grontapoe tiriman di ben opo ensrefi kontrari a saka di wan sma ben moesoe saka ensrefi na Gado ondro
[Prenki na tapoe bladzijde 13]
Noa, wan eksempel, sondro fowtoe, foe a saka di wan sma moesoe saka ensrefi na Gado ondro. — Genesis 6:14, 22.