Yesus e preiki a Kownukondre boskopu

Syatu baka di Yesus dopu, a bigin preiki a boskopu disi: ’A Kownukondre fu Gado kon krosibei.’ Den disipel go makandra nanga en di a go preiki na Galilea nanga Yudea. Di Yesus drai go baka na Nasaret, a foto pe a ben tan, a go na ini na snoga. A opo a bukulolo fu Yesaya èn a leisi nanga wan tranga sten: ’A santa yeye fu Yehovah de na mi tapu so taki mi kan preiki a bun nyunsu.’ San dati ben wani taki? Den sma ben wani si taki Yesus du wondru, ma a moro prenspari reide fu san ede a ben kisi santa yeye na fu preiki a bun nyunsu. Yesus taigi den arkiman: ’Tide a profeititori disi kon tru.’

Baka dati Yesus go na a Se fu Galilea pe a miti fo fisiman di tron bakaman fu en. A taigi den: ’Kon nanga mi èn mi o meki unu tron fisiman di e fanga libisma.’ Den man disi ben nen Petrus, Andreas, Yakobus nanga Yohanes. Wantewante den gowe libi a fisi wroko fu den èn den waka na en baka. Na ini a heri kontren Galilea den ben e preiki fu Yehovah Kownukondre. Den ben preiki na ini snoga, na wowoyo èn na strati. Ibri presi pe den ben go, wan bigi grupu sma ben waka na den baka. A nyunsu fu Yesus ben panya go na ala sei, srefi te na Siria.

Bakaten Yesus gi wan tu fu den bakaman fu en a krakti fu dresi sma èn fu puru ogri yeye na sma tapu. Tra disipel ben go makandra nanga en di a go preiki na den foto nanga den dorpu. Yu ben abi uma tu di ben abi wan tranga bribi èn di ben e sorgu gi Yesus nanga den bakaman fu en. Wan tu fu den na Maria Makdalena, Yohana nanga Susana.

Baka di Yesus leri den disipel fu en fa fu preiki, a seni den go preiki. Den ben e preiki na ala sei fu Galilea. Furu sma ben tron disipel èn den ben dopu. Den sma di ben wani tron disipel ben furu so te, taki Yesus ben agersi den nanga nyanyan na wan gron di lepi fu koti. A taki: ’Begi Yehovah fu seni moro wrokoman kon fu koti a nyanyan.’ Bakaten a teki 70 fu den disipel fu en èn a seni den tu na tu fu preiki na ini heri Yudea. Den ben leri ala sortu sma fu a Kownukondre. Di den disipel drai kon baka fu a preikiwroko, den no ben man wakti fu fruteri Yesus san ben pasa. Didibri no ben man du noti fu tapu a preikiwroko.

Yesus ben seti sani, so taki den disipel ben o tan du a prenspari wroko disi, baka te a drai go na hemel. A taigi den: ’Preiki a bun nyunsu na heri grontapu. Leri sma a Wortu fu Gado èn dopu den.’