A prenspari lezing di Yesus hori na tapu wan bergi

Baka di Yesus teki den 12 apostel, a saka fu a bergi kon na wan presi pe furu sma ben kon makandra. Den sma ben kon fu Galilea, Yudea, Tirus, Sidon, Siria nanga abrasei fu Yordan-liba. Den ben tyari sikisma kon nanga sma di ben abi ogri yeye na den tapu. Yesus dresi ala den sma disi. Baka dati a kren go sidon pikinso moro hei, dan a bigin taki. A fruteri san wi musu du efu wi wani tron Gado mati. Wi musu kon frustan taki wi abi Gado fanowdu èn wi musu leri fu lobi Gado. Ma wi no man lobi Gado efu wi no lobi tra sma. Wi musu sori switifasi gi ala sma, srefi gi den feanti fu wi.

Yesus ben taki: ’Yu no musu lobi den mati fu yu wawan. Yu musu lobi yu feanti tu èn yu musu gi sma pardon nanga yu heri ati. Efu wan sma mandi tapu yu, dan yu musu go na en wantewante èn aksi en fu gi yu pardon. San yu wani taki tra sma du gi yu, na dati yu musu du gi den tu.’

Yesus sori den sma tu fa den musu si gudu. A taki: ’A moro bun fu de wan mati fu Yehovah leki fu abi bun furu moni. Fufuruman kan fufuru yu moni, ma nowan sma kan fufuru a matifasi di yu abi nanga Yehovah. No broko yu ede moro nanga san yu o nyan, san yu o dringi noso san yu o weri. Luku den fowru. Ala ten Gado e sorgu taki den abi nofo nyanyan fu nyan. Broko-ede no o meki taki yu libi wán dei moro langa. No frigiti taki Yehovah sabi san yu abi fanowdu.’

Den sma ben lobi a fasi fa Yesus ben gi leri. Noiti ete den ben yere wan sma gi leri na a fasi disi. Den kerki fesiman fu den, soleki den Fariseiman, no ben leri den den sani disi. Fu san ede Yesus ben de so wan bun leriman? Fu di ala san a ben leri sma ben kon fu Yehovah.