Jezus libi nanga diniwroko

Na moro barinen lezing di oiti ben hori

NA TAFEREEL de a wan di fiti foe memre moro na ini na bijbel historia: Jezus e sidon tapoe na skoinsi sé foe wan bergi èn e taki en barinen Bergipréki. A presi de krosibé foe na se foe Galiléa, séker kande krosbé foe Kapernaüm. Na heri neti Jezus ben psa na ini begi na Gado èn na tra mamanten a ben piki twarfoe foe en discipel tron apostel. Dan a ben saka nanga den alamala go na a plata presi disi tapoe na bergi.

Joe ben sa denki dati Jezus weri now srefsrefi èn ben sa wani sribi. Ma bigi ipi sma kon, sonwan te foe Judéa nanga Jeruzalem so wan 100 te 110 kilometer foe drape. Trawan e kon te foe na se sjoro foe Tirus nanga Sidon ini noordsé. Den kon foe arki Jezus èn foe kon betre foe den siki foe den. Joe abi srefi sma di ogri jeje e moeileki den.

Te Jezus e saka kon dan sikisma e poesoe lontoe en foe fasi en, èn ai dresi den alamala. Bakadati Jezus e kren, èn dati de krin, go na wan moro hé presi. Drape ai go sdon èn ai bigin foe gi leri na den ipi sma di de panjapanja tapoe a plata presi a fesi en. Go prakseri disi pikinso! Now a de so dati amindri ala den sma di de drape srefi no wán de moro di abi pina foe wan takroe siki!

Den sma e arki srefsrefi na a leriman di ben doe den froewondroe wondroewroko disi. Ma Jezus e taki en lezing moro foeroe foe na boen foe en discipel, di kan de séker ben sdon moro krosbé foe en. Ma sodati wi ooktoe kan njan boen foe en meki Mattéus èn Lukas ben skrifi na lezing disi.

Na verslag foe Mattéus foe na lezing de so wan fo tron moro langa leki di foe Lukas. Boiti dati, akroederi a tori foe Lukas, dan bepaalde pisi foe san Mattéus ben skrifi, Jezus ben taki tapoe wan tra ten na ini en diniwroko, soleki wi kan teki Mattéus 6:9-13 gersi nanga Lukas 11:1-4 èn Mattéus 6:25-34 nanga Lukas 12:22-31. Tokoe disi no a foe ferwondroe joe. Jezus séker ben taki asrefi sani moro leki wantron, èn Lukas ben feni en boen foe skrifi sonwan foe den leri disi ini wan tra verband.

A sani di e meki na lezing foe Jezus abi someni waarde no de wawan na dipi foe na jeje inhoud, ma ooktoe na eenvoudig èn krinfasi tapoe san a ben presenteri den waarheid disi. A ben meki gebroiki foe gewoon ondrofeni èn ben gebroiki sani nanga san den sma ben de bekenti sodati a ben meki den prakseri foe en de makriki foe ferstan gi ala sma di e feti foe libi wan moro boen libi akroederi a wani foe Gado. Na ini den tra uitgave foe wi wi sa go ondrosoekoe wantoe foe den sani di a ben taki. Lukas 6:12-20; Mattéus 5:1, 2.

◆ Pe na lezing di de moro foe memre ben taki, soema ben de drape èn san ben psa leti bifo dati?

◆ Foe san-ede a no ben de wan ferwondroe sani dati Lukas ben skrifi foe wantoe foe den leri foe na lezing na ini wan tra verband?

◆ San e meki na lezing foe Jezus de so wan warti sani?