San na Koonoe doe gi wi
„Hem nem dem sa kari Wondroe Raiman, Makti Gado, Teego Tata, Koonoe foe vreede.” — Jesaja 9:6.
1, 2. Soortoe broeja firi soema habi, te dem de si dem ogri fasi foe libi ini grontapoe?
GI ONVOLMAAKTI libisoema, a moeiliki foe verstan foe sainde Gado ben gi pasi dati dem srefi onvolmaakti fasi foe libi go doro, moro leki 1900 jari sensi Jezus Kristus ben de na grontapoe. Dem de taki: ’Foe sainde wan sani no doe moro esi?’ En te dem si dem problema di na grontapoe de na ini, dem de taki foeroe tron: ’Mi no de si fa disi oiti sa kon boen baka’. Te wi de ondrosoekoe na programma foe na koonoe foe Gado rigeri, dan wi kan verstan foe sainde a gersi leki a drai drai en wi sa verwondroe srefi, san a sa kan doe ini wan sjatoe tem.
2 Ini na artikel na fesi wi ben si, dati Jezus hemel jeje libi ben tjari go abra tron libisoema libi, foe gi na libisoema libi dati leki wan slagti-ofrandi, di ben meki a de wan boen soema foe de na heepriester foe libisma. Foe di a ben gi jesi ini hem heri fasi foe libi nanga waka, a ben de wan boen soema toe foe de koonoe. Fa a sa meki dem wroko disi kon foe na boen foe na libisoema-ras?
3. Ini soortoe matifasi Jezus ben kon nanga na libisoema-famiri nanga jepi foe hem slagti-ofrandi? (1 Tim. 2:5, 6; 1 Joh. 2:1, 2)
3 Nanga hem verloesoe slagti-ofrandi, di a pai na Jehovah Gado, na Eeginari foe ala sani, Jezus Kristus habi na libisoema-ras leki hem goedoe, foe doe nanga ibriwan foe dem akroederi nanga na regvaardiki prakseri foe Gado, te leki a meki ala soema di de gi jesi kon boen baka, kon de troe troe boen nanga Gado baka (Joh. 5:22). A de na seti foe Gado, so dati na libisoema-ras ben kan hefti komoto foe sondoe en tjari go baka ini hem regvaardiki oso-famiri. Na so fasi Gado ben hori hem regvaardiki fasi, aladi a ben de jepi libisoema. — Rom. 3:23-26.
4. (a) San Jezus ben doe baka hem opobaka, en san a de tron gi soema di de gi jesi? (b) Fa na skrifiman foe na boekoe Hebreer de sori dati na tesi foe Jezus de wan garanti dati a sa jepi wi nanga safrifasi en verstan?
4 Kristus ben opo go na hemel baka hem opobaka, foe pristeri na Gado na waarde foe hem slagti-ofrandi, soleki na heepriester foe Israël, ibri jari tapoe na Verzoendee, ben dropoe pikinso foe na broedoe foe dem meti ini na Moro Santa Presi foe na tempel, pe Gado ben de libi na agersi fasi. Kristus ben kon tron gi dem wan di de gi jesi „a laatste Adam”, na „Teego Tata”, di kan gi dem njoen libi baka (1 Kor. 15:45; Jes. 9:6). Na tesi di a ben ondrofeni na grontapoe, de gi wi na garanti, dati a sa jepi wi tapoe na moro safrifasi, nanga verstan, soleki a skrifi:
„Foe di wi habi so wan bigi heepriester, di waka pasa dem hemel, Jezus, na Manpikin foe Gado, wi moe hori na bekenti foe hem. Bika wi no habi leki heepriester wa soema di no kan habi firi nanga dem swakifasi foe wi, ma wan soema di ini ala fasi kisi tesi, ma sondro sondoe. Meki wi go foe dati ede na da troon foe genade nanga fri foe taki, foe wi kan kisi sarihatti en feni genade foe wi moe sa kisi jepi na a joisti tem.” — Hebr. 4:14-16.
WI SA KAN MITI NA MARKI FOE LIBISOEMA VOLMAAKTI FASI?
5. (a) San na volmaakti sondro sondoe libi foe Kristus de bewijsi wi? (b) San hem slagti-ofrandi en priesterwroko de doe gi hem 144000 kompe?
5 Na retidoe libi foe Kristus ben meki a kisi na boen ati foe Gado, foe di a ben gi jesi tapoe wan volmaakti fasi, fri doro doro foe sondoe, fri foe habi srefi wan fowtoe prakseri. Disi de gi wi na bewijsi, dati nanga hem jepi, ibriwan soema kan hori hem getrouwfasi en kisi boen-ati lafoe foe Gado (Rom. 5:18, 19). Te wan soema miti na marki foe volmaakti fasi, dan hemsrefi kan gi jesi tapoe wan volmaakti fasi sondro foe doe sondoe. A de wan bigi wroko di Kristus de doe nanga hem libi, hem slagti-ofrandi nanga hem priesterwroko! A de jepi 144000 trawan foe de koonoe nanga priester makandra nanga hem, en a de blesi libisoema nanga jepi foe na wroko foe dem ondro na tiri foe Kristus te dem sa meki dem winimarki foe hem zoen-ofrandi kon gi libisoema.
6. (a) San de na dede, di leki na laatste feejanti, sa tjari kon tron noti? (b) Fa en otem dede sa pori gwe?
6 Na Koonoekondre nanga hem priesterwroko te foe kaba sa meki dede, di ben pina ala libisoema, kon na wan kaba, wan dede di dem kisi foe na sondoe foe dem tata Adam (Rom. 5:12). Na a kaba foe na doesoen-jari Koonoekondre rigeri, te ala soema di gi jesi sa kisi na libi ini volmaakti fasi, dan sa meki bekenti dati na dede di komoto foe Adam gwe krin krin. Na bijbel de verteri wi, dati ala sani di de na pasi foe tapoe na kolokoe foe libisoema, — ogri rigeri, ala oproeroeman foe na retidoe soevereiniteit foe Gado, ala sani di de contrari a tan-boen foe libisoema — sa pori gwe. Dan, „leki laatste feejanti, dede sa tron noti.” — 1 Kor. 15:25, 26.
FOE SAINDE GADO BEN LIBI OGRI
7. Foe soortoe sani dem koonoekondre pramisi de wan garanti, en soortoe aksi ini na pisi tori disi wi moe piki?
7 Dem pramisi, foe san na koonoekondre sa doe foe na boen foe libisoema, de wan garanti gi wi, dati Gado no de tapoe hem ai gi ogri, onvolmaakti fasi nanga dem baka-pisi foe hem di de tjari dede en dati a sa poeroe dem na pasi foe teego. Na aksi disi, foe sainde Gado ben libi ogri foe wan langa pisi tem, ben meki opregti soema di lobi ondrosoekoe sani, kon ini broeja. En disi de troe wan toemsi prenspari stree-aksi, di de fesi ala sani de meki. Foe verstan Gado prakseri nanga na wroko foe na Koonoekondre, dan a de toemsi prenspari foe verstan na stree-aksi disi fosi.
8. San na a bigi stree-aksi di de gi hemel nanga grontapoe?
8 Na stree-aksi de go foe na tori foe soevereiniteit — na soevereiniteit foe rigerimakti foe Gado — no foe na aksi efoe Gado de soeverein. Dati na wan sani di de so (Ps. 90:2; Tori foe dem Apostel 4:24). Ma wan tjalansi ben meki tapoe na joisti fasi nanga regvaardiki fasi foe na soevereiniteit foe Jehovah en efoe a verdini hem. A de foe na stree-aksi disi dati Gado ben libi ogri foe de foe wan pisi tem.
9. Nanga soortoe eegifasi Gado ben meki na fosi libisoema en na eegifasi disi ben meki a de onvolmaakti?
9 Na libi di Gado libi ogri habi wantron te make nanga na meki di Gado meki libisoema na a prenki foe hem en foe gersi hem (Gen. 1:26, 27). Libisoema habi wan fri wani. Dem kan teki na mindri boen nanga ogri. Dem no de leki robot nanga wan programma foe doe soso boen. Adam nanga Eva, leki soema nanga verstan, ben de volmaakti ini na pisi tori disi. Efoe dem ben meki sondro foe dem kan teki san dem wani en teki bosroiti, dan dati ben sa meki dem de onvolmaakti, nanga wan sani di dem mankeri. Gado no ben sa tapoe na fri di wan soema, di habi verstan en di ben meki na a prenki foe hem, foe teki wan bosroiti na mindri boen nanga ogri. Na foe dati ede a ben gi dem wan konsiënsi. — Rom. 2:15.
10. Fa na fasi foe doe foe Adam nanga Eva ben de wan tjalansi foe na soevereiniteit foe Gado?
10 Na bosroiti foe Adam nanga Eva foe tranga-jesi na komando foe Gado ben de wan tjalansi foe hem soevereiniteit. Eva ben wani „sabi” ala sani, dati wani foe kroetoe en bepaal ala sani; a ben wani de „leki Gado”. Adam ben teki na see foe hem ini na doe disi, pe a sori tapoe wan bigimemrefasi dati a ben de tevreede nanga hemsrefi en de onafhankelijk (Gen. 3:5, 6, 22). Ala toe ben weegri foe ben piki dati dem de soema di Gado ben meki. Dem no ben sori lobi ofoe waarderi foe san Gado ben doe gi dem en dem ben teki na reti foe habi grani, di soso Gado habi leki Mekiman nanga Eeginari foe grontapoe, Na Wan di de hori na libi en di de na Soeverein foe hemel nanga grontapoe.
11. Soema ben de troe troe baka Adam nanga Eva ini na tjalansi foe na soevereiniteit foe Gado, en fa disi de kon na krin gi wi ini na boekoe Job?
11 Wan jeje manpikin foe Gado ben gi Adam nanga Eva tranga ini na heememre-doe disi foe dem. A ben de wan engel di ben meki oproeroe nanga Gado (Gen. 3:1-5; Joh. 8:44). A tjalansi Jehovah rigerimakti, foe di a taki, dati na fundamenti foe hem rigerimakti nanga na gi jesi foe soema di a meki de tapoe gridi ofoe frede en no tapoe lobi. Bakatem en dati ben de ini na pisi tori foe na getrouw foetoeboi foe Gado, di ben nem Job, na tjalansi ben kon na krin ini woortoe. Na skrifiman (Mozes), di na jeje foe Gado ben tjari, de poeroe na garden di de tapoe foe si sani en de tjari kon na krin wan sani di ben pasa ini hemel:
„Bakatem na dee ben doro, di dem manpikin foe na troe ben kon foe de na fesi Jehovah, en Satan toe ben kon drape na den mindri foe de na fesi Jehovah . . . En Jehovah ben taki moro fara gi Satan: ’Joe ben poti joe ati tapoe mi knegti Job . . .?’ Ma Satan ben piki Jehovah en ben taki: ’Boeba foe skin gi na boen foe boeba foe skin, en ala san wan soema habi, a sa gi foe na boen foe hem sili. Langa joe anoe grantangi leki wan kenki en fasi hem te go doro hem bonjo en hem meti en loekoe efoe a no sa vloekoe joe reti na mindri joe fesi.’” — Job 2:1-5.
12. (a) Fa na getrouwfasi foe libisoema de tron wan moro lagi stree-aksi, en foe sainde Gado gi Satan pasi foe wroko doro foe wan pisi tem? (b) San na skrifiman foe Hebreer de sori Kristus de doe nanga Satan en hem wroko?
12 Satan (san wani taki „haswaman”, „streeman”) tjalansi na soevereiniteit foe Gado tapoe na punt efoe a verdini hem en ooktoe a opo wan lagi stree-aksi di habi te make nanga na getrouwfasi foe libisoema na Gado. Na rigeri-makti foe Gado no de wan dictatuur, pe na rigeriman de doe san dem wani. Foe na boen foe libisoema, foe di a gi libisoema na okasi foe sori dem getrouwfasi, en ooktoe foe na boen foe hem sroedatihipi foe engel sodati so wan stree-aksi foe teego ben sa kon krin ini dem prakseri, Gado ben gi Satan pasi foe go doro nanga hem ogridoe foe wan pisi tem di ben marki. Foe di dem baka-pikin foe Adam ben habi sondoe, na ogriwan disi ben kan wroko tapoe dem, sodati Satan ben tron na „gado foe na seti foe sani disi” (2 Kor. 4:4). Gado kroetoe de dati a moe dede en djonsro a sa pori, en ala hem wroko sa tjari kon de noti (Gen. 3:15, 16). Foe Jezus, na soema di sa pori hem, wi de leesi:
„Foe di now dem jongoe pikin (Kristus discipel) habi prati ini broedoe en skin, hem srefi toe ben habi prati ini dem srefi sani disi, dati nanga hem dede a ben kan tjari kon de noti na wan di ben habi na wrokosani foe meki dede kon, dati de, Didibri (San wan taki „gongosaman”); en fri ala soema, di foe frede foe dede, dem heri libi langa, ben de ondro katibo.” — Hebr. 2:14, 15.
Ooktoe tanapoe: „Foe dati na Manpikin foe Gado ben kon na krin, foe broko dem wroko foe Didibri.” — 1 Joh. 3:8.
13. Fa Jezus ben sori nanga hem fasi foe libi dati a ben seti na stree-aksi di de go foe getrouwfasi? (Joh. 12:31)
13 Nanga na volmaakti fasi fa Jezus ben gi jesi na Gado, na stree-aksi tapoe getrouwfasi foe teego ben loesoe, sondro foe tra soema ben habi foe jepi. Bifo hem dede Jezus ben taki: „Na rigeriman foe disi grontapoe de kon. En a no habi krakti tapoe mi” (Joh. 14:30). Jezus ben „wini na grontapoe”, di de ondro hem gado Satan. Tra getrouw soema na fesi en bakatem ben teki prati foe dini foe na boen foe na stree-aksi nanga na jepi foe Gado en hem Pikin. Kristus sa gebroiki dem disi foe jepi trawan ini na tem foe hem doesoen jari rigeri tapoe grontapoe. — Joh. 16:33.
14, 15. Fa dem woortoe foe apostel Petrus ini 2 Petrus 3:9 de sori, dati Gado no de drai drai ofoe no de broko-ede nanga libisoema?
14 Son soema sa feni kande taki Gado „de libi sani go fa a go” ofoe a de drai drai nanga a no de broko-ede. Na apostel Petrus de bewijsi, dati na prakseri no de joisti, te a de taki: „Jehovah no de drai drai nanga hem pramisi, soleki son soema de prakseri dati a de drai drai, ma a habi pasensi nanga joe, bikasi a no wani no wan soema go pori, ma a wani foe ala soema kon habi berouw.” — 2 Petrus 3:9.
15 Wi kan si foe dem woortoe foe Petrus dati Gado de broko-ede nanga libisoema. Foe di a de gi tem, a de gi wi ala na okasi foe jere na waarheid. Ma, a no wan sani foe taki, dati ibri moen foeroe miljoen pikin de gebore en foeroe soema de dede. Foe dati ede dem woortoe foe Petrus de sori, dati Gado sabi san de moro boen gi wi, no wawan gi na libisoema-lo di de libi now, ma gi ala, dem libiwan soleki dem wan di sa kisi opobaka. En hem sabi na soifri tem dati a moe djompo kon na mindri dem afersi foe libisoema en tjari na seti foe sani foe now kon na wan kaba foe opo na pasi gi wan doesoen jari rigeri foe Kristus. Ini na tem dati na heri grontapoe sa kroetoe ini „retidoe” (Tori foe dem Apostel 17:31; Openb. 20:11-15). Soboen wan bigi nomroe soema — foe taki reti, ala soema, di wani doe reti — kan kisi jepi en teego libi. — Openb. 20:7-10, 15.
SAN DE KON NA A KABA FOE NA DOESOEN JARI KOONOEKONDRERIGERI?
16. Na soortoe presi na Koonoekondre de tjari soema kon? (Openb. 21:3)
16 Na doesoen jari rigeri foe na Koonoekondre tapoe ala dem afersi foe grontapoe sa de wan toemsi kolokoe tem gi na libisoema-ras. Na a kaba foe dem doesoen jari, dan na Koonoekondre sa kon na hem kaba, foe di a ben meki Gado wani kon „ini hemel, soleki grontapoe” (Matt. 6:10). Na sondoe foe Adam nanga na dede di komoto foe dati, sa figi poeroe en ala libisoema sa habi wan volmaakti presi en dem no sa habi moro langa fanoodoe foe dem priester-diniwroko foe na Koonoekondre. Gado kan teki dem krin krin leki „pikin foe Gado” ini hem krin en volmaakti oso-famiri. — Rom. 8:21.
17. San Jezus Kristus de doe na a kaba foe dem doesoen jari en foe sainde?
17 Na a kaba foe dem doesoen jari Kristus, di ini lobi nanga getrouwfasi na hem tata Jehovah de „esrede nanga tide nanga teego na srefi”, sa erken na fesi ala sani di meki na teego soevereiniteit foe Jehovah Gado, so leki na bijbel de sori: „Dan na a kaba, te a de gi na Koonoekondre abra na hem Gado en Tata, te a tjari kon noti ala rigeri nanga makti nanga krakti . . . Te ala sani sa de na hem ondro kaba, dan na Manpikin sa saka hemsrefi na a Wan ondro di ben poti ala sani na hem ondro, foe Gado moe de ala sani gi ibri soema.” No wan soema sa tjalansi na soevereiniteit foe Gado moro, na moro makti wan, a kon poti reti, en a de wantron wantron tapoe ala sani di ben meki. — Hebr. 13:8; 1 Kor. 15:24-28.
18. Jehovah habi moro wondroe sani gi Kristus nanga dem 144000 kompe foe hem baka na kaba foe na doesoen jari rigeri?
18 A no de foe taki, dati Kristus foe alatem sa kisi grani en respeki foe na bigi wroko foe hem en hem sa de Grani-heepriester en Grani-koonoe. Foe di Jehovah di de pai bigi, na fasi fa a sa de baka dati nanga Kristus nanga dem 144000 hemel kompe foe hem en dem wroko di a sa gi dem, de wan bewijsi foe hem bigi lobi gi dem (Hebr. 6:10). Na bijbel de sori soortoe sani a habi gi dem, ma san a doe gi dem kaba, bigi foe troe.
„Gado di foeroe nanga sarihatti, ben meki wi kon na libi, foe hem bigi lobi, di a ben lobi wi makandra nanga Kristus, . . . en a ben wiki wi makandra en a ben meki wi teki presi makandra ini dem hemel kontren makandra nanga Kristus Jezus, foe, ini dem seti foe sani di de kon, na toemsi bigi goedoe foe hem boenhatti di wi no verdini, sa kan sori ini hem boenfasi gi wi makandra nanga Kristus Jezus”. — Efese 2:4-7.
19. Foe sainde wan soema moe verstan dem sani, di wi studeri djonsro de?
19 Ala dem sani disi de ini na boen njoensoe, en efoe wan soema wani dini Gado tapoe wan fasi di a de feni boen en verteri na boen njoensoe na trawan, dan a de toemsi prenspari, dati a verstan en waarderi dem sani disi.