Na ede-prakseri foe na boen njoensoe — na koonoekondre foe Gado
„Tan soekoe na koonoekondre nanga hem retidoe en ala dem tra sani disi joe sa kisi na tapoe”. — Matteus 6:33, „Authorized Version”.
1. Lontoe san na boen njoensoe de en foe sainde?
NA BOEN njoensoe foe na bijbel de lontoe na koonoekondre foe Gado. Foe sainde? Foe di ala prakseri foe Gado nanga libisoema de kon na wan ini na Koonoekondre. San libisoema habi ini disi tem fanoodoe de wan boen rigeri — wan rigeri di de tiri tapoe wan joisti fasi, sondro a poeroe na fri nanga dekati foe doe sani tapoe wi eegi fasi.
2. Foe sainde wan rigeri foe na Mekiman moro boen leki wan rigeri foe libisoema?
2 Wan rigeri foe Gado de tranga fanoodoe foe na libi nanga kolokoe foe na libisma-lo. Libisoema sori krin kaba, dati dem no man tiri demsrefi boen, winsi sortoe fasi foe rigeri dem tjari kon. Na profeeti di ben habi Gado jeje ben skrifi: „Mi sabi heri boen, o Jehovah, dati a no de na wan libisoema foe taki soortoe pasi a sa go. A no didon na wan man di de waka foe poti hem foetoe na pasi.” (Jer. 10:23) Ma na Mekiman sabi reti san libisoema, na mekisani foe hem, habi fanoodoe. A sabi dem firi nanga dem fanoodoe nanga dem lostoe foe libisoema, en a sabi san dem lobi (Matteus 6:7, 8, 32). Hem wawan kan gi dem troe troe satisfaksi ini dem libi. „Joe (Gado) de opo joe anoe en joe de meki na lostoe foe ala sani di de libi kon troe” na bijbel de taki. A sa doe disi nanga jepi foe hem koonoekondre. — Ps. 145:16.
3. (a) Soortoe banti de mindri na Koonoekondre nanga na soevereiniteit foe Gado? (b) Soema de wan pisi foe na Koonoekondre en fa dem de piki dem poti na wan?
3 Na Messias koonoekondre foe Gado de wan rigeri di Jehovah Gado, na wan enkri Soeverein foe hemel nanga grontapoe, hemsrefi tjari kon makandra en opo. Na koonoekondre de ondro hem soevereiniteit en a de saka na hem ondro (1 Kor. 15:27, 28). A de na wrokosani di Jehovah de gebroiki foe tjari hem soeverein makti kon na heri grontapoe. Na a ede foe na koonoekondre disi joe habi Jezus Kristus, na Manpikin foe Gado, na Messias, di de now wan jeje na ini hemel en di no man dede moro. A de na „prenki foe na glori (foe Gado) en wan krin marki foe hem fasi” (Hebr. 1:3). Ondro hem leki Edeman joe sa habi 144.000 kompe-koonoe, di „bai” komoto na mindri libisoema en ini wan pisi tem foe 1900 jari dem ben piki poeroe na wan see na a joisti fasi. Foe Kristus, na bijbel de taki: „Nanga joe broedoe joe bai foe ala lo nanga ala tongo nanga ala pipel nanga ibri naatsi, soema gi Gado en joe ben meki dem kon tron wan koonoekondre foe priester gi wi Gado en dem sa rigeri leki koonoe na grontapoe” (Openbaring 5:9, 10). Na koonoekondre disi sa rigeri doesoen jari tapoe grontapoe foe tjari libisoema kon ini wan boen mati-fasi nanga Jehovah. — Openb. 20:4-6.
SAN GADO KOONOEKONDRE SA DOE GI LIBISOEMA
4. Fa na Koonoekondre sa jepi dem borgoe foe hem?
4 Na profeeti foe Gado de taki: „Te kroetoe de komoto foe joe (Jehovah) gi grontapoe, dan dem soema foe na fatoe gron di de meki froktoe sa leri retidoe.” (Jes. 26:9). Nanga jepi foe na seti foe na koonoekondre, dan sani sa seti dati ibri soema tapoe grontapoe sa kisi spesroetoe jepi foe leri libi tapoe wan joisti fasi. Na koonoe sa tjari ala soema di de gi jesi go na „dem bron foe libi watra”. — Openb. 7:17.
5. Na soortoe fasi dem rigeri de misi foe gi dem soema na fanoodoe jepi disi?
5 Dem soema foe na tem disi de kisi na sorgoe nanga tiri disi? Nono, dem soema no de kisi foeroe jepi foe dem rigeri. Wetti de di de foe kibri en tiri libisoema en di libisoema srefi meki en di demsrefi de gebroiki. Ma, dem no de kisi kweki foe gi jesi nanga dem heri ati, foe di wan wetti de joisti. Foe di a no alatem wan soema de kisi hem reti en foe di partij fasi nanga bedrigi fasi de na a see foe soema di habi wan hee-presi, dan dati de meki soema no habi respeki gi dem rigeri en dati de meki na pipel no de hori demsrefi na dem boen wetti nanga gwenti.
6. Soortoe tra tranga fanoodoe sani na koonoekondre de seti?
6 Ooktoe, wan bigi fanoodoe de foe hoopoe, hoopoe di de tapoe wan boen fundamenti. Na apostel Paulus ben taki foe na hoopoe di a ben poti tapoe Gado, wan hoopoe di dem djoe srefi ben habi, dati wan opobaka sa de gi dem regvaardiki nanga dem onregvaardiki soema (Tori foe dem Apostel 24:15). Hoopoe de wan prisiri verwakti, dati dem sani di wi de hoopoe sa kon troe (. . .). Na grontapoe no habi foeroe hoopoe gi dem libiwan, en a no habi kwetikweti hoopoe gi dem dedewan. Na opobaka de na wan enkri troe hoopoe gi dem dedewan. A de na seti, dati dem wan di pori dem libi, de kisi na okasi foe kenki dem libi en kisi teego libi. Miljoen miljoen soema sa kisi opobaka ondro na tiri foe Gado koonoekondre, foe dem kan leri retidoe en kisi libi. Jezus ben taki: „Na joeroe de kon ini san dem dedewan sa jere na stem foe na Manpikin foe Gado en dem wan di sa jere sa kisi libi”. — Joh. 5:25; Authorized Version; Openb. 20:11-13.
7. Fa dem woortoe foe Jezus foe na Paradijs sa kon troe?
7 Na ogriman di ben dede na see Jezus na a pina-oedoe, ben de so wan man en hem ben kisi so wan pramisi: „Joe sa de nanga mi ini Paradijs” (Lukas 23:43). „Paradijs” wani taki „djari” ofoe „park”, soleki wi kan taki foe na moi kontren di Gado ben meki leki wan oso di ben fiti Adam, na volmaakti man (Gen. 2:8, 9). Na ondro na koonoekondre-rigeri, na grontapoe sa de wan moi „foetoebangi” gi Gado nanga wan presi foe prisiri gi libisoema (Jes. 66:1; 60:13). Te Jehovah sa rigeri hem grontapoe nanga jepi foe hem koonoekondre, a sa loekoe dati na balans di de na mindri dem meki-sani foe grontapoe sa kon boen baka, en dati na bakapisi foe 6000 jari footoe moeiti en takroe rigeri foe libisoema di no tjari boen kon, sa komoto na pasi. Ala sani tapoe na grontapoe — na weer, dem bon nanga grasi, na libi foe dem meti nanga libisoema — sa poti boen baka foe gi grani nanga bigi nem na da Mekiman.
JEPI INI SKINFASI, INI BOEN GWENTI EN INI FIRI
8. (a) Boiti wroko leki koonoe, soortoe tra diniwroko dem 144000 kompe foe Kristus sa doe? (b) Soortoe priester dem sa de? (Hebr. 4:15)
8 Disi de sori wi krin dati Gado koonoekondre habi moro foe gi, leki wi kan verwakti foe wan grontapoe rigeri. Gado koonoekondre sa tjari dem wondroe boen sani disi kon, foe di dem koonoe foe hem sa de toe ini wan priesterwroko ini hemel, ma dati no sa de wan rigeri foe priester na grontapoe, pe soema moesoe go verteri dem sondoe en di nanga tranga en nanga bijgeloof sa rigeri, san de tjari wan bigi hebi kon na a pipel foe gi foeroe moni. Dem koonoe disi, di dem de kari wan „koonoe priester-famiri” de 144000 makandra en dem sa rigeri ondro na heepriester Jezus Kristus (1 Petr. 2:9). Dem priester disi no sa prakseri soso dem eegi afersi ofoe soekoe goedoe, foe di dem sa de priester ini hemel en dem sa waka baka dem sari-hatti heepriester. Dem sa de verantwoortoe dati na pipel kisi jeje leri. Falsi leri di de kori soema no sa de moro na grontapoe, no wan politiek organisaatsi di de dwengi soema en no wan seti foe handel di de poeroe sani na soema skin. Dem soortoe organisaatsi disi sa go pori. — Openb. 11:18.
9. San dem wroko foe na „koonoe priesterfamiri” sa habi leki winimarki?
9 Te soema sa go na fesi na jejefasi en dem de poti ini dem aladee libi dem joisti gronprakseri, dan dem sa kon volmaakti nanga na krakti foe na hemelgroepoe foe koonoepriester. Baka dati, dan no wan soema no habi foe taki moro: „Na boen di mi wani, mi no de doe, ma na ogri di mi no wani, dati mi de doe” (Rom. 7:19). Ala soema sa habi makti tapoe hem krakti nanga (wa)ni ini volmaakti fasi en foetroe dem sa man de wan prenki en agersi foe Gado en sori hem glori. — Gen. 1:26, 27; Rom. 3:23.
10. Na „koonoe priesterfamiri” disi sa pori te foe kaba, soleki dati ben pasa nanga priesterfamiri foe fositem? Foe sainde?
10 Fa wi kan de seker, dati wi kan vertrouw tapoe na koonoekondre disi foe priester? Na koonoekondre disi sa kon takroe te wan pisi tem, leki fa pasa nanga rigeri en priesterfamiri foe fosi tem? Nono, Gado no de doe wan sani, bifo a habi fosi hem fundamenti ini retidoe tapoe wan joisti fasi. „Retidoe nanga reti de na vaste pisi foe joe troon”, na psalmskrifiman ben skrifi (Ps. 89:14 American Standard Version; Ex. 34:6, 7). Di a ben seti na „koonoe priesterfamiri”, a ben teki hondro hondro jari foe soekoe dem aparti memre, leri dem, tesi dem en meki dem kon volmaakti.
NA HEMEL MANPIKIN FOE GADO DI TRON SKIN
11. Fa na libi foe na koonoe foe na Koonoekondre ben waka te leki a ben tron wa volmaakti bigiman?
11 Na Koonoe, na Edeman foe na „koonoe priesterfamiri” de kon tapoe na fosi presi. A de Gado fosi mekisani, na wan „enkri gebore Manpikin” foe Gado (1 Joh. 4:9; Openb. 3:14). Na bijbel no de taki na no wan enkri presi dati a de wan pisi foe wan sokari „Dri-wan-fasi” ofoe dati a de speri foe Jehovah Gado. A ben kari Jehovah „mi Tata en mi Gado” (Joh. 20:17). Di na Manpikin disi, Jezus Kristus ben de na grontapoe, a ben sabi taki a ben habi libi kaba na hem Tata na ini hemel, bifo a ben tron wan libisoema. Gi Jehovah, na Mekiman, a no ben de wan tranga wroko foe meki na libi foe hem Manpikin kom ini na bere foe wan jongoe wendje di ben nem Maria. Foe dati ede Jezus ben kan kon gebore foe wan oema leki wan volmaakti libisoema-pikin, alwasi a ben habi wan hemel Tata en a no ben de moro leki fositem, wan hemel jeje mekisani (Gal. 4:4; Luk. 1:35). A ben gro kon tron wan bigisoema, wan volmaakti man, na prenki foe na volmaakti Adam, di bakatem ben sondoe en ben tron na tata foe ala libisoema. — Joh. 1:14; 1 Kor. 15:45.
12. Fa na sakafasi foe Kristus nanga na lobi foe Jehovah ben de foe si ini na fasi fa Jezus ben waka en libi?
12 Foe na saka foe na Manpikin foe Gado, komoto foe na hee jeje libi kon ini na libisoemafasi, foe di nanga sakafasi a ben gi jesi na hem Tata en foe di a ben lobi libisoema, na bijbel de taki so: „A ben libi hem glori en teki na skin foe srafoe en a ben tron leki libisoema. Moro leki dati, di a ben de ini na fasi foe libisoema, a ben saka hemsrefi en a ben gi jesi te na dede, ja, na dede na wan pina-oedoe.” (Fil. 2:7, 8). Foe di a ben gi hem Manpikin na so wan fasi leki ofrandi, na Tata ben sori bigi lobi. Na apostel Johannes ben skrifi: „Gado ben lobi na grontapoe foe libisoema sote, dati a ben gi hem wan enkri gebore Manpikin, sodati ala soema di de sori bribi ini hem, no ben sa kisi pori, ma ben sa habi teego libi”. — Joh. 3:16.
FA NA PINA FOE JEZUS BEN JEPI LIBISOEMA
13. Foe sainde Kristus ben moe pina en ondrofeni dede?
13 Foe sainde a ben de fanoodoe, dati Gado Manpikin moesoe ondrofeni ala dem pina disi, srefi dede toe? Na a fosi presi disi ben de fanoodoe foe di Gado ben habi na prakseri foe habi wan retidoe Koonoekondre-rigeri en nanga jepi foe dati a ben sa sori hem soevereiniteit. Na a srefi tem na dede foe Jezus ben de toemsi fanoodoe gi na jepi en libi foe na heri libisoema-lo. Fa so?
14. Soortoe garanti de gi wi foe na fasi fa Jezus waka en libi na grontapoe? (b) Fa na apostel Paulus de skrifi foe na libi foe Jezus en dem bakapisi foe dati?
14 Tapoe na fosi presi, na fasi di Jezus Kristus ben waka akroederi nanga Gado wani ben gi grani na Gado foe doe sani fini fini en a de wan garanti foe wan rigeri di no man pori gi na grontapoe di no kan seki. A de gi wa srefi fundamenti foe wi bribi. Foe feni na wroko foe wa hemel-koonoe en heepriester, Jezus ben moesoe ondrofeni na moro hebi en moro dipi tesi. Na apostel Paulus skrifi foe disi:
„Na ini dem dee foe hem libisoemafasi, Kristus ben kari nanga tranga stem en nanga watra-ai en nanga begi na da soema di ben kan foe jepi hem na dede en a ben jere hem, foe di a ben habi frede foe Gado. We, hem, alwasi hem ben de na Manpikin srefi, tokoe na ini na pina foe hem a ben leri foe gehoorzaam. En dan, di a doro ala sani a ben tron na soema, di kan meki ala dem, di de gi jesi na hem, kon kisi da boen foe libi foe teego. En Gado de kari hem wan heepriester na a fasi foe Melkisedek (wan priester ini na tem foe Abraham tem, bifo na Wetverbontoe ben sroto en di ben kisi hem wroko leki priester wantron wantron foe Gado).” — Hebr. 5:7-10.
15. (a) Foe soortoe sani Kristus ben kari Gado nanga tranga stem en watra-ai? (b) Fa a leri foe gi jesi en nanga soortoe bakapisi?
15 Jezus ben hori hem retidoefasi tapoe wan volmaakti fasi. Nanga hem „kari foe Gado nanga tranga stem”, a no ben wani komoto ondro na dede foe hem leki wan ofrandi, ma a ben wani komoto ondro wan dede pe a ben sa (. . .) na hattibron foe Gado, foe di a no ben de getrouw ofoe foe di a doe wan footoe foe hem see. A ben wani dati hem fasi foe doe, ben moesoe ko(. . .) nanga boen. A ben leri „foe gi jesi”. Ini hemel a ben gi jesi na ondro toemsi boen fasi foe libi. Ma na grontapoe na gi jesi na Gado ben tjari vervolgoe, pina nanga srefi hebi kwinsi kon gi hem. Jezus ben de volmaakti en regvaardiki en foe sensi hem geboortoe sondro mankeri, ma na a kaba foe hem grontapoe libi, a ben kon volmaakti tapoe wan toemsi bigi fasi leki wan troe troe koni, waarheid koonoe-priester, di ben pasa tesi.
16. Fa na tesi foe Jezus tapoe grontapoe ben tjari jepi gi libisoema?
16 Fa Jezus grontapoe tesi nanga pina dede ben tjari jepi kon gi na libisoema-famiri? Na apostel de piki baka:
„Na ala fasi a ben moesoe agersi hem ’brada’, foe di a ben sa man tron wa sarihatti en getrouw hee-priester na ini dem sani di de foe Gado, foe tjari wan zoen-ofrandi gi dem zondoe foe na pipel! Foe di hemsrefi ben tjari pina di a ben kisi tesi, a man jepi dem soema di de kisi tesi”. — Hebr. 2:17, 18.
KRISTUS BEN BAI LIBISOEMA FRI
17-19. (a) Ini soortoe takroe fasi foe libi libisoema-ras ben de? (b) Fa Jezus ben de na piki tapoe na ongolokoe fasi foe libi foe libisoema-famiri? (Rom. 7:14; Ps. 46:6-9).
17 Di Adam ben meki oproeroe nanga Gado, a be tron na feejanti foe Gado, en dati meki a trowe hem libi en dati meki dem bakapikin foe hem ben kon gebore ini sondoe — dem ben seri ini katibo foe sondoe nanga dede (Gen. 3:17-19; Ps. 51:5). Foe dati ede hem pikin no ben de espresi sondari. Dem ben kan bai kon fri (Rom. 8:20). Jezus Kristus ben moesoe tjari wan verloesoe-ofrandi leki priester, wan ofrandi di ben sa meki wi sondoe kon krin foe na waarde di a habi. No wan enkri soema, di ben komoto foe Adam ben man foe doe disi nanga monie ofoe nanga wan ofrandi foe hem eegi libi — na prijs ben hee toemsi, bika a srefi libi leki Adam, wan volmaakti libi ben de fanoodoe. Kristus ben gi na srefi verloesoe-paiman gi ala soema (1 Tim. 2:5, 6). A ben kon foe gi na sani di na Wet nanga hem lagi ofrandi foe meti ben de wan agersi fasi.
18 Di Jezus ben kon na Gado ini na tem foe hem doopoe, a tori de verteri oenoe dati a ben taki: „Slagti-ofrandi nanga ofrandi joe no ben wani, ma joe ben sreka gi mi wan skin (wan volmaakti libisoema-skin). Boen bron-ofrandi nanga sondoe-ofrandi joe no ben feni foe boen. Dan mi ben taki: ’Loekoe!, mi ben kon (na ini na lolo foe na boekoe [na lolo foe na wet, spesroetoe na pisi di de go foe dem koonoe, leki fa a de ini Deut. 4:19, 20] den skrifi foe mi), foe doe joe wani, o Gado.’” — Hebr. 10:5-7; Ps. 40:7, 8.
19 Gado meki ala sani di wi sa kisi — ala wi verwakti — didon na ini anoe foe Jezus Kristus. San na bigi koonoe disi doe gi na boen foe wi en san a sa doe, sa taki moro fara ini na tra artikel di de kon.