Fundamenti foe wan libi nanga wan marki na wi fesi
„Loekoe soortoe lobi na Tata ben gi wi, sodati dem kan kari wi pikin foe Gado.” — 1 Joh. 3:1
1-3. Soortoe sani e tapoe dem soema foe njan boen foe na libi? (Pred. 1:15; 2:11-21; 4:1-3; 9:11, 12)
IBRI normaal soema wani meki wan sani foe hem libi. Foeroe sma e kragi, dati na seti foe sani, pe wi e libi na ini, e gi wi pikinso sani di de wan tranga foe feti troe troe baka wan marki ini na libi.
2 Dem soema disi e sori na tapoe dati kande na a bigin wan soema habi wan marki na hem fesi, e teki jari foe kisi moro koni foe san dem teki foe doe en dan e kon si, dati dem no kan feni wroko. So meni soema di kisi leri na wan universiteit no e feni wroko.
3 Na a tra see, dem soema di sani waka dem boen na moni see sabi, dati wan oorlog ofoe wan tra bigi ongolokoe kan pori esesi ala sani di dem ben kisi. En na dede foe wan lobiwan kan meki dem kon ini wan libi pe dem wawan de.
4. (a) Foe sainde son soema e taki dati ’Gado dede? (b) Fa Jehovah e prakseri foe na libisoema-famiri? (Job 14:14, 15; Klaagl. 3:34-36; Jona 4:10, 11)
4 Ini na leti foe dem sani disi, meki son soema e taki: ’Gado dede.’ Dati wani taki, dati Gado no de broko-ede nanga dem afersi foe libisoema. Foedi Gado meki na universum, a de hori hem na prakseri en broko hem ede toemsi nanga hem. A de srefi so, dati ini na prakseri foe Gado wan tem di e kon de gi libisoema en wan prakseri de gi ibriwan di e libi en ben libi. Boiti dati, ini na prakseri dati a de hori rekening nanga wi firi, sodati te wi doro na marki foe na libi, wi kan njan boen ooktoe foe kolokoe nanga prisiri. En dati wi wani tog, a no so?
NA KONDISI FOE WI PE WI NO HABI JEPI GI WISREFI
5. Fa Mozes ben skrifi foe na kondisi foe na libisoema-famiri?
5 Wi moe taki, dati na libisoema-famiri no man foe kenki na afersi. Na psalmskrifiman Mozes ben skrifi foe na kondisi foe wi pe wi no habi jepi gi wisrefi: „Dem dee foe wi jari de seebi tenti, en efoe wi tranga aiti tenti; tokoe dem de troesoe wi go tapoe moeiti nanga ogri sani, bikasi dem moe go esi, en wi e free go.” — Psalm 90:10.
6. Foe sainde dem soema no ben man foe fri demsrefi poeroe foe dede?
6 Na kondisi pe soema no habi makti foe fri dem srefi poeroe foe dede, de kon na krin ini na di foe fo-tenti-na-neegi Psalm, dem vers siksi te nanga neegi: „Dem di e vertrouw tapoe dem sani di den habi foe libi en di e gafa foe dem foeroe goedoe, no wan foe dem kan bai wan brada kon fri na no wan fasi, no wan kan gi Gado wan verloesoe-paiman gi hem, (en na verloesoe-paiman gi dem sili de so bigi, dati disi no de foe feni foe teego), dati a ben sa libi foe teego en no ben sa si na olo.” Na skrifiman foe na Psalm ben sabi. dati na prijs ben bigi toemsi, ben de toemsi hee, en a ben de dorosee na makti foe na libisoema-famiri. Te joe loekoe na makti foe onvolmaakti soema, dan verlegti ben de so farawe, dati foe teego a no ben de foe si en joe kan taki dati hoopoe no ben de.
7. Fa Adam ben seri hem bakaten-pikin, en san a ben kisi foe na „seri” disi?
7 Ini na sari kondisi disi pe wi no habi makti, wi alamala de, foedi wi fositen-papa Adam ben seri hem bakaten-pikin di ben sa kon ini katibo foe sondoe nanga dede, sondro dati dem ben wani. Na prijs di a ben kisi foe na „seri dati, ben de foe doe nanga gridi san hem ben wani, meki hemsrefi onafhankelijk, ini oproeroe na Gado. Ibri soema foe datede, precies leki fa na apostel Paulus ben taki hem, na skinfasi, ben seri ondro sondoe.” — Rom. 7:14.
8. Soortoe begi opregti soema ben kan seni go na Gado, leki wan bakapisi foe dem katibo?
8 Soboen, efoe ooiti libisoema ben wani kon fri, dan Gado ben moe doe wan sani foe wan jepi kon. Opregti soema e bari tranga: „Jepi wi, o Gado foe wi jepi, foe na glori foe joe nem ede; en fri wi en tapoe wi sondoe foe na nem foe joe ede.” — Ps. 79:9.
GADO NO KAN LOEKOE PASA SONDOE
9. Ini soortoe kondisi na libisoema-famiri ben kon tanapoe nanga Gado?
9 Jehovah Gado e jere na begi disi? Efoe a de so, a kan doe san wi ben begi dan? Na habi di libisoema no habi makti de wan problema di Gado no kan loesoe? Ja, wi habi dja foe doe nanga wan troe troe problema. A ben bigin so wan siksi doesoen jari pasa kaba. Na fosi libisoema, Adam, ben teki na see foe Gado feejanti, Satan, en na so ogri ben kon na grontapoe. A ben meki hemsrefi de wan feejanti foe Gado en dem pikin foe hem, di ben kisi foe hem sondoe nanga onvolmaakti fasi, e doe onregvaardiki wroko. Soleki na apostel Paulus e verteri wi, Adam ben tjari na libisoema-famiri kon de feejanti foe Gado. — Rom. 5:10.
10, 11. (a) Foe sainde Jehovah no ben kan loekoe pasa na sondoe di ben tjari kon ini na universum? (b) San e sori dati na si foe ogridoe leki wan sani di no de so ogri, de tjari ernstig problema?
10 Ma ete Gado ben lobi hem mekisani, foedi a ben sabi dati dem no ben kan jepi demsrefi. A ben kan taki, foedi a ben lobi na libisoema-famiri, dati, na ogri di Satan, makandra nanga Adam, ben tjari kon ini na universum, no ben de noti? Gado ben kan taki gi wan soema di ben sondoe: „We, mi lobi joe en mi wan sori joe sari-ati, soboen, mi sa loekoe pasa ma sondoe foe joe”? Akroederi nanga hem geregtigheid nanga regvaardiki fasi a no ben kan tapoe hem ai gi sondoe en sondro foe doe wan sani libi hem so. Efoe a ben doe so, dan a ben sa swaki na fundamenti foe hem rigeri, bikasi na bijbel e taki: „Geregtigheid nanga reti de na fundamenti foe hem troon.” — Ps. 89:15, Nieuwe vertaling van het Nederlands Bijbelgenootschap.
11 San de dem bakapisi te soema e feti safri nanga ogridoe en e doe leki dem no e si ogridoe, wi e si ini disi tem krin ini son naatsi. Someni tron dem soema de slak en dem no de doe troe troe wan sani nanga dem ogriwan. Ogriman e waka lontoe fri. Na bakapisi de, dati dem soema lasi dem vertrouw ini dem rigeri en te foe kaba ala sani e broko saka. Na Universeel Rigeriman no sa gi pasi dati disi pasa nanga dem wetti di a ben meki.
NA LOESOE NANGA JEPI FOE WAN „SIRI”
12. Fa Gado ben tjari kon na krin, baka di Adam ben sondoe, na soortoe fasi a ben sa jepi na libisoema-famiri?
12 Te joe loekoe hem foe na see foe libisoema, dan wan loesoe no ben de gi na problema. Ma, Jehovah man foe tjari wan loesoe kon gi problema gi gersi leki noti kan doe, aladi a de hori na waarti-fasi foe hem universeel rigerimakti hee en na a srefi tem a de sori sari-ati. Te wi de si dem boen bakapisi, dan wi moesoe taki: ’A no ben kan tapoe waan tra fasi en tokoe a ben de so soifri, regvaardiki en troe troe boen.’ Soleki na bijbel e sori, dan Gado ben tjari kon na krin na a tem di a ben kroetoe Adam foe hem sondoe, dati a ben sa jepi na libisoema-famiri, di a ben taki: „Hem (na siri) sa masi joe (Satan) ede” (Gen. 3:15). Te a tem ben e pasa, dan a ben sa meki dem soema si na kon troe foe hem prakseri safri safri.
13. Soema ben de na „siri” foe na oema, en foe sainde Gado ben teki hem?
13 Soema spesroetoe Gado ben sa meki de na „siri”, di te foe kaba ben sa masi Satan ede? Na wan-enkri-gebore Manpikin foe Gado! Gado ben teki hem leki na moro prenspari wrokosani foe tjari kon na wan kaba na stree-aksi di e go foe na waartifasi nanga regvaardikifasi foe na rigerimakti ofoe soevereiniteit foe Jehovah, fasi di Satan ben tjalansi. Foe sainde Jehovah ben teki na soema disi, di a ben lobi sote? We, nanga na tjalansi foe Satan, dan a tjalansi na loyaliteit foe ala mekisani na hemel nanga gronatapoe, srefi foe disi Manpikin foe Gado. Tapoe dati e kon ete, dati na afersi foe loyaliteit ben sa de moro tapoe hem dan leki soortoe trawan foe Gado mekisani, foedi a de na moro prenspari Manpikin foe Gado di de ini na universum wantron wantron ondro hem.
14. Fa na pikin foe Gado ben prakseri foe na libisoema-famiri?
14 Boiti dati, na Manpikin disi, di de wan agersi fasi foe koni, e taki ini Spreuken aiti foe Gado mekiwroko: „Dem sani di mi ben lobi sref-srefi, ben de na dem manpikin foe libisoema” (vers 31). A ben habi wan tranga lobi gi libisoema. Na wroko disi foe meki hem Tata kisi reti, a ben teki nanga prisiri, ini na fosi presi foedi a ben de loyaal na hem en na see foe disi foe di a lobi libisoema.
15. Foe sainde Gado ben meki na ogri tan go doro?
15 Foe na universeel stree-aksi ede, meki na Universeel Regiman Jehovah meki na sondoe tan foe wan pisi tem foe kroetoe na afersi foe hem soevereiniteit nanga na loyaliteit foe hem bigi oso-famiri foe mekisani di habi verstan. Ooktoe a ben moe teki na tem foe poti wan fundamenti foe na poeroe foe sondoe en dan gi sondoe libisoema na okasi foe leri sabi hem rigeri en njan boen foe hem. A ben de troe troe foe wan boen marki nanga foe wan sjatoe tem ini na universeel tem, dati Gado ben gi pasi dati ogri de. Ja, na pasi di Gado ben teki, de na wan enkri pasi, pe a kan jepi na libisoema-famiri troe troe boen.
WAN WETTELIJK FUNDAMENTI FOE BEN HANDRI NANGA NA LIBISOEMA-FAMIRI
16. Foe sainde Gado ben habi wan wettelijk fundamenti fanoodoe foe ben handri nanga libisoema?
16 Now, foe ben kan handri nanga dem di ben gebore ini sondoe — aladi a no ben kon foe dem eegi fowtoe — Gado ben moe habi wan wettelijk fundamenti foe handri nanga dem. Noso ala soema ben sa moe dede foe teego, foedi Gado wet ben poti dati sondari ben moesoe poeroe komoto foe na universum. Soso nanga na ofrandi foe wan tra soema, wan volmaakti soema, leki na ’bigi’ prijs di ben de dorosee na makti foe na libisoema-famiri, na sani di Adam ben lasi, ben kan bai baka, sodati na strafoe di Gado regvaardiki kroetoe di ben kroetoe libisoema, ben kan komoto na pasi. Foe disi Jezus ben taki: „Soemapikin . . . no ben kon foe soema dini hem, ma foe hem dini soema en foe gi hem sili leki wan verloesoe-paiman ini na presi foe foeroe soema. — Matt. 20:28.
17, 18. San Gado ben sa bewijsi nanga na poti foe na wettelijk fundamenti disi?
17 Nanga na poti foe na wettelijk fundamenti disi, Jehovah ben sa bewijsi na joistifasi foe hem universeel rigeri. Na a srefi tem a ben kan sori libisoema sari-ati. Na apostel Paulus e tjari disi kon so ini woortoe:
18 „Bikasi dja wi no kan poeroe no wan na ini; dem alamala ben doe sondoe, dem no habi da fosi Gado glori moro; en vo presenti dem kon regvaardiki foe hem gnade ede nanga na verloesoe, disi Kristus Jezus ben verloesoe wi; na hem Gado ben teki poti foe wan verzoenofrandi nanga na bribi na hem broedoe . . . Foe na disi tem now a meki wi kon si na geregtigheid foe hem, fa hem wawan de regvaardiki, en fa hem meki da soema kon regvaardiki toe, disi de bribi na Jezus.” — Rom. 3:23-26.
19. Fa soema e kisi wan joisti positie na fesi Gado?
19 Gado e handri soboen nanga na libisoema-famiri nanga hem pikin, Jezus Kristus, di ini na afersi disi e wroko leki Jehovah boskopoeman. Nanga na libi foe di a gi leki wan ofrandi na strafoe ben poeroe na pasi en na so fasi a ben bai na libisoema-famiri. So dem wan di e hori na a seti foe Gado, kan kon ini wan wettelijk matifasi nanga hem. Na apostel Paulus ben taki foe na sari-ati doe disi foe na see foe Gado nanga hem Manpikin: „Bikasi wan Gado nanga wan mindriman de mindri Gado nanga libisoema, wan libisoema, Jezus Kristus, di gi hem srefi abra leki wan verloesoe paiman gi ala soema.” — 1 Tim. 2:5, 6.
20. San na pikin foe Gado ben moe doe di a ben de na grontapoe?
20 Ini hem koni Gado ben prakseri na wan-enkri fasi fa a ben kan jepi na libisoema-famiri kon ini wan regvaardiki positie en kisi hoopoe tapoe teego libi leki memre foe hem onberispelijk, regvaardiki, volmaakti universele oso-famiri. Tapoe na soifri joisti momenti ini hem tem-schema Gado ben doe hem bigi boen-ati. A ben seni hem Manpikin komoto foe hemel go na grontapoe foe tron wan libisoema. Dja na grontapoe na Manpikin disi foe na fosi tron en spesroetoe ben kan bewijsi, dati volmaakti libisoema di lobi Gado, kan de loyaal na Gado nanga hem rigeri ondro letterlijk ibri tesi nanga omstandigheid. Hem libi ben kan de ooktoe na verloesoe-paiman gi libisoema, bikasi wan volmaakti libisoema no ben de mindri dem, di ben kan gi na prijs disi. Foe disi a ben sa de natuurlijk fanoodoe, dati a ben dede. — Tit. 2:11-14.
JEZUS KRISTUS, WI JEPIMAN
21. San Jezus ben boen foe tron foe na getrouw waka nanga libi foe hem soleki tanapoe ini 1 Johannes 2:1, 2?
21 Nanga hem getrouw waka nanga libi, Jezus ben boen foe tron na Jepiman foe ala soema di ben wani dini Gado. Na apostel Johannes ben skrifi: „Efoe wan soema ben doe sondoe, dan wi habi wan soema na wi Tata see, disi e begi gi wi, dati na Jezus Kristus, da regvaardikiwan. Hem de wan verzoening (wan ofrandi di e tapoe sondoe) foe wi sondoe.” — 1 Joh. 2:1, 2.
22. Foe sainde dem getrouw foetoeboi foe Gado no e lasi na boen positie foe dem te dem misi tapoe wan ofoe tra fasi?
22 Didibri now sensi na tem foe Abel, na manpikin foe Adam, a de soekoe fowtoe tapoe dem foetoeboi foe Gado. Satan dem e kari toe „na kragiman foe wi brada, di e kragi dem dee nanga neti na fesi foe wi Gado” (Openb. 12:10). Na a joisti tem ini na stree foe getrouwfasi soboen Jezus Kristus ben go na Gado fesi leki Jepiman. Foe wi ede a habi pasi foe go na Gado troon. Te getrouw foetoeboi foe Gado meki wan fowtoe, doe wan sondoe en dem habi opregti berouw en verteri foe dem sondoe, dan Jezus e pristeri na boen foe hem slagti-ofrandi, foe dem no moe kiri dem — bikasi hem zoen-ofrandi kan tapoe dem sondoe nanga fowtoe.
23. Soortoe firi nanga prakseri wi moe tan habi foe na sondoe kondisi foe wi?
23 Na apostel Paulus e skrifi foe na stree di a ben moe stree en di ala kristen soema moe stree, en fa dem sa meki fowtoe sondro espresi, sondro sjen, aladi dem e doe moeiti. A ben taki: „Na boen di mi wani, mi no e doe, ma na ogri di mi no wani, dati mi e doe. Efoe now mi e doe san mi no wani, dan mi no e doe hem moro, ma na sondoe di e libi ini mi” (Rom. 7:19, 20). Na waarde foe Kristus verzoen-ofrandi di e gebroiki foe na boen foe dem sondoe, di dem habi berouw foe dem en di dem e verteri, de na fundamenti foe verteri dati dem de regvaardiki. — 1 Joh. 1:9.
24. Fa Jezus kan bewijsi ini hem positie leki Jepiman, dati dem kragi foe Satan falsi?
24 Ini hem wroko leki jepiman, Jezus e bewijsi toe na Gado, dati dem kragi di Didibri habi tapoe kristen soema, de lee. A de poti prakseri tapoe dem doe foe bribi nanga tapoe na sani dati dem de kari Gado nanga dem heri ati na ini berouw te dem ben doe sondoe. Bikasi a sabi taki, dati ini Hebreeer 6:10 tanapoe: „Gado no de onregvaardiki, dati a sa frigiti joe wroko nanga na lobi, di joe ben sori gi hem nem, foedi joe ben dini dem santawan en joe de tan dini dem.” Jezus e sori toe na a hemel kroetoe, dati dem foetoeboi foe Gado na grontapoe e verstan dem eegi fowtoe nanga mankeri foe regvaardiki fasi en dati dem e aksi sari-ati tapoe na gron foe Kristus ofrandi — Na pasi di Gado sori.
25. Foe sainde wan verdoem no de gi dem wan di de na ini Kristus?
25 En Jehovah Gado e teki Jezus begi foe na boen foe dem. Ibri kon foe Didibri foe feti e naki poeroe. So Jezus e doe hem wroko leki heepriester en ai kibri dem foe ala kroetoe, soleki na bijbel e taki: „We, na so no wan sani kan verdoem dem soema moro, disi de na ini Kristus Jezus, disi no de waka soleki fa dem skin wani, ma leki fa na geest wani. Bikasi da wet foe na geest, disi e gi wi libi na ini Kristus Jezus, ben meki wi kon fri foe na wet foe sondoe en foe dede.” — Rom. 8:1, 2.
26, 27. Fa soema di e teki wan krin positie na fesi foe Gado, kan tron pikin foe Kristus?
26 Na profeeti Jesaja e jepi wi moro fara foe si fa Kristus e gi troe troe libi na ala soema di e bribi na ini hem. Jesaja ben skrifi na profeetifasi foe na pina foe Kristus en a ben taki, te a ben e taki nanga Jehovah: „Efoe joe poti hem sili leki sondoe-ofrandi, dan a sa si bakapikin” (Jesaja 53:10). Kristus no de kisi tapoe wan natuurliki fasi bakapikin. Di a ben de na grontapoe a ben habi na makti foe habi wan eegi oso-famiri. A no doe disi. Na presi foe dati a no ben gebroiki na makti dati, foedi a gi hem sili leki wan verloesoe-paiman ini na presi foe foeroe soema”. — Matteus 20:28.
27 Jezus foe datede ben tron na „laatste Adam”. Na fosi Adam ben meki wan osofamiri, wan onvolmaakti osofamiri, nanga ogri eegi fasi. Jezus Kristus e kisi wan osofamiri, di e kisi regvaardiki fasi. Soema kan libi Adam osofamiri en tangi foe na ofrandi libi foe Jezus Kristus dem kan gebore njoen baka, en te dem weri na njoen soema, dan dem kan kon „gersi hem”. Dem kan krin dem libi en tron na so fasi pikin foe na „teego Tata”, na „Laatste Adam”. Jehovah „ben poti hem sili leki wan sondoe-ofrandi”, en a teki na ofrandi disi foe doe verzoening foe na fowtoe foe ala soema di de sori bribi. — 1 Kor. 15:45; Jes. 9:6.
28. Gi soema Jezus Kristus e meki wan volmaakti osofamiri foe volmaakti soema kon?
28 Ja, foe san Jehovah Gado nanga Jezus Kristus ben doe gi libisoema, wi libi kan habi troe troe wan marki. Ala soema di de gebroiki ini na tem foe na rigeri foe Jezus leki Koonoe-Heepriester dem winimarki foe hem slagti-ofrandi, kan tron volmaakti libisoema pikin foe Gado Pikin. Disi habi toe leki bakapisi, dati te foe teego dem de teki dem leki pikin foe na Moro Heewan en dem sa libi ondro regvaardiki kondisi. Fa so? Foe di Jezus no de kisi wan oso-famiri foe hori dati gi hem srefi. Baka te a tjari dem kon de volmaakti, a de gi na libisoema-famiri di a ben bai en meki dem kon boen baka abra na Jehovah Gado, „na Tata, di ala famiri ini hemel nanga grontapoe habi foe taki tangi foe na nem foe dem”, foe Gado kan bewijsi, dati foe dem loyaliteit di no de foe broko dem de waarti foe de teego hem pikin. — Ef. 3:14, 15; 1 Kor. 15:26, 28.