Gi jesi na a boen njoensoe wan fasi foe libi
„San Jehovah de aksi baka foe joe, dan foe doe retidoe, en foe lobi switifasi en foe waka safri nanga joe Gado?” — Micha 6:8.
1. Fa ini na tem disi, foeroe soema de si dem kerki?
A DE wan sani, di joe de si ini na tem disi alape, dati soema de di de taki, dati dem de bribi dem leri foe wan kerki, ma dem no de poti dem leri disi ini dem aladee libi. Foeroe tron soema de si kerki leki wan sani foe „de na ini”, ma no foe meki a habi krakti tapoe na doe foe dem na ini oso-libi, ofoe na ini doe afersi ofoe na ini demakandra nanga tra soema.
2. Foe sainde dem ben kari na kristendom, ini dem fosi hondro jari na „Pasi”?
2 Ma, troe kristendom no de wan afersi foe san de na dorosee foe si. Ini dem fosi dee foe na kristendom, dem ben kari hem „na pasi”, bikasi a ben de moro leki wan fasi foe aanbegi (Tori foe dem Apostel 19:9, 23). A ben de wan FASI FOE LIBI, di na aanbegi foe Gado soigi go na ini, en di na jeje foe hem de tiri (Joh. 4:23, 24; 1 Kor. 2:11-13). Ini dem Kristen Skrifi wi de feni tranga warskow, di no de gi pasi foe dini Gado nanga wan afoe ati. Gi na soema, di wani de wan troe kristen, na bijbel de taki: „Kenki joe prakseri”, „Kon njoen ini na krakti di de troesoe joe prakseri” (Rom. 12:2; Ef. 4:22-24). Makandra nanga faja preeki, krakti de poti alatem tapoe wan boen fasi foe libi nanga waka. — 1 Petr. 1:15; 2:12; 3:16; 5:12.
3. O fara troe kristendom habi krakti tapoe na libi foe wan soema?
3 Soboen, troe kristendom de go ini ibri pisi foe na libi foe na soema nanga foe na oso-famiri. Na kristen moe lobi en dini Gado „nanga hem heri ati, nanga hem heri sili, nanga hem heri verstan en nanga hem heri krakti” (Markus 12:30). Disi no de libi no wan pisi foe hem skin, hem libi, ofoe hem eegifasi na doro. — Matt. 22:37-39.
NA DE FOE WAN KRISTEN DE MORO LEKI SAN WAN LIBISOEMA KAN?
4, 5. (a) Gado de aksi foe wan kristen toemsi moeiliki sani ofoe sani di de toemsi? (b) Na moeilijkheid foe de wan kristen de meki dem winimarki foe hem lasi hem waarde ini na grontapoe disi?
4 A de dan wan toemsi moeiliki sani foe de wan kristen? Gado de aksi moro leki de fanoodoe ofoe a de aksi wan sani di de „bigi” ofoe di de moro leki san wan libisoema kan? Nono. A ben taki gi hem pipel foe owroetem: „A ben verteri joe, o grontapoe soema, san boen. En san Jehovah de aksi baka foe joe, dan foe doe retidoe en foe lobi switifasi en foe waka safri nanga joe Gado?” — Micha 6:8.
5 Wan sani de troe troe moeiliki ofoe de aksi toemsi ini na marki disi? Foe troe, Gado habi prisiri efoe soema de libi, soleki dem ben meki foe libi — soleki dem ben moesoe foe libi — dati na ala sani. A de troe, dati te joe de libi na fasi disi ini wan grontapoe di fadom komoto foe dem marki di Gado poti, dan dati sa tjari stree nanga moeilijkheid kon (Joh. 16:33; 2 Tim. 3:12). Ma a de so toe, dati na soema di de libi nanga dem marki di Gado poti, de moro fri ini hem konsiënsi, a habi moro vreede ini hem prakseri, en moro ete, a habi wan marki ini libi en wan hoopoe na hem fesi. — 1 Tim. 4:8; 6:6-8.
6. Soortoe sani Gado seti, dati a kan waka boen gi wi ini na kristen fasi foe libi, aladi wi de onvolmaakti?
6 Te joe de loekoe wi onvolmaakti fasi, dan a kan gersi wan moeiliki sani gi wan soema foe libi nanga dem gronprakseri foe na bijbel en foe tjari dem boen froktoe foe dem kon ini hem libi. A troe, onvolmaakti soema de meki foeroe fowtoe en son wan foe dem de bigi, ma foe na rede disi na zoen-ofrandi foe Kristus ben gi. A de gi wan kristen di habi berouw foe kon na Gado foe kisi pardon, en Gado jeje de jepi na kristen foe kenki hem eegifasi — foe kenki hem pasi foe akroederi moro nanga moro nanga hem pasi (Hebr. 4:15, 16; 2 Kor. 3:17, 18). Na apostel Johannes ben skrifi gi kompe-kristen: „Mi jongoe pikin, mi de skrifi joe dem sani disi, foe joe no doe wan sondoe. En srefi, efoe wan soema doe wan sondoe, dan wi habi wan jepiman na a Tata, Jezus Kristus, wan regvaardiki-wan. En a de wan zoen-ofrandi foe wi sondoe, ma no wawan foe di foe wi (dem salfoe kristen), ma ooktoe foe na heri grontapoe (na sondoe foe ala tra libisoema)”. — 1 Joh. 2:1, 2.
O PRENSPARI NA BIJBEL DE LEKI WAN TJARIMAN INI LIBI?
7. Fa troe kristen de si en gebroiki na bijbel?
7 Kristen sa meki na studeri foe na bijbel de wan pisi foe dem libi alatem, foe di dem de waarderi na fanoodoe foe na tiri foe Gado foe waka akroederi hem retidoe gronprakseri. Dem de hori tranga san na apostel Paulus ben taki, dati „ala dem skrifi ben kon nanga Gado jeje, en dem ben de leri trawan, foe gi piri-ai, foe poti sani reti, foe gi tranga leri ini retidoe, dati na soema foe Gado kan koni doro doro, troe troe de sreka sreka foe doe ibri boen wroko.” — 2 Tim. 3:16, 17.
8. Efoe wi teki na bijbel leki Gado jeje skrifi hem, wi moe teki ala sani leki fa a tanapoe? Gi eksempre.
8 Soboen, na heri bijbel, ala toe, dem Djoe Skrifi ofoe „Owroe Testamenti”, nanga dem Griki Skrifi ofoe „Njoen Testamenti”, habi na heri Woortoe foe Gado, di alamala de troe en di ben kon foe na jeje foe Gado leki wan tjariman gi na kristen ini ala hem pasi. Ma disi no wani taki, soleki den Fundamentalist de bribi, dati joe moe teki alamala leki fa a tanapoe drape. A troe dati foeroe komando de di joe moe teki hem leki fa a tanapoe drape. Ma foeroe sani de historia en foeroe sani de toe leki wan marki en de na agersifasi. Foe eksempre, son tron meti de teki na presi foe grontapoe rigeri (Dan. 8:1-8, 20-22; Openb. 17:3, 9-12). En wan „dee” kan de wan dee foe twenti-na-fo joeroe ofoe a kan teki na presi foe wan pisi tem foe jari (Gen. 2:4; Joh. 8:56). Na context nanga tra sani di taki ini na bijbel de jepi na student (na soema di de teki leri) foe si soortoe tekst dem moe teki leki fa a tanapoe drape en soortoe wan de leki wan marki foe wan sani nanga de na profeetifasi.
9. Foe sainde na heri bijbel habi waarde gi na kristen?
9 Foe di kristen-soema de si na bijbel na a fasi disi, dem de studeri dem Kristen Griki Skrifi, di habi foeroe direct komando en wetti, nanga ook toe dem Djoe Skrifi, di de verteri foe foeroe gronprakseri, agersi-tori, profeeti-tori nanga wan tori foe troe historia sani di pasa, di de tjari Gado fasi foe si sani foe na libi kon na krin (1 Kor. 10:11). Ini na heri bijbel foeroe sani di pasa de, di de sori na fasi fa Gado ben doe nanga difrenti situatie nanga omstandigheid. Ala dem sani disi de meki wan soema kon sabi na eegifasi foe Gado en foe jepi na kristen foe „habi na prakseri foe Kristus”, di sabi Gado moro krosibee dan leki soortoe soema. — 1 Kor. 2:16; Matt. 11:27.
NA LIBI FOE NA KRISTEN DE LEKI DI FOE WAN ASCEET?
10. Fa na libi foe Jezus na grontapoe ben sori dati a no ben de wan asceet ofoe dati a ben libi nanga kerkigwenti?
10 Na libi foe na kristen, foe dati ede, no de wan afersi foe wan boekoe nanga wetti ofoe gwenti. A libi foe Kristus de skijn na geest nanga na lobi, di na kristen moe proberi foe kweki (Matt. 5:44; 1 Joh. 5:4). Jezus ben de wan man di ben prisiri Gado na ala fasi (Joh. 8:29). A no ben doe wan onregvaardiki sani. Ma ala di a ben de volmaakti, a no ben de wan asceet. A ben go na trow-oso nanga fesa, a ben waarderi dem boen sani ini libi (Joh. 2:1-10; Luk. 5:29; Matt. 11:18, 19). A ben sori balans ini ibri sani en a no ben aksi foe hemsrefi ofoe trawan moro dan leki ben de fanoodoe (Mark. 6:31; Joh. 4:6). A no ben de tan meki komparisi mindri hem retidoe nanga dem fowtoe foe trawan. A ben firi gi soema en a ben habi sarihatti gi dem (Matt. 9:36; Mark. 1:41). Ma, a ben kroetoe ogridoe en a ben tjari falsi fasi kon na krin. — Matt. 15:1-9; 23:23-32.
11. (a) Kotoigi foe Jehovah kan gebroiki dem onvolmaakti fasi leki wan pardon foe doe sondoe, ofoe hee demsrefi foe dem eegi retidoe? (b) Soortoe stree ibri kristen de ondrofeni, soleki na apostel Paulus de verteri?
11 Ini dem sani disi, Jezus ben poti wan eksempre gi kristen soema. A no de foe taki, dem erken, dati, tra fasi leki Jezus, dem no de volmaakti, ma dem de proberi tranga foe waka na a eksempre foe hem baka. Dem de proberi foe tan farawe foe ogridoe, ma dem de verstan dati soortoe retidoe, di dem kan habi, dati disi komoto foe na sarihatti foe Gado en a de wan bakapisi foe na libi akroederi bijbel gronprakseri. A no wan sani di dem kan gi demsrefi grani foe dati. Dem de erken leki na psalmsingiman: „Efoe joe ben sa loekoe kroekoetoedoe, o Jah, o Jehovah, soema ben sa kan tan?” (Ps. 130:3). Dem sabi dati dem de sondari en foeroe tron dem de doe fowtoe sani, soleki na apostel Paulus srefi ben taki:
„Mi de feni na mi na wetti disi: dati te mi wani doe san de joisti, dan san de ogri de na mi. Mi de feni prisiri ini na wetti foe Gado akroderi nanga na soema di mi de na inisee, ma ini dem pisi foe mi skin mi de si wan tra wetti, di de feti nanga na wet foe mi verstan en di de tjari mi go ini katibo foe na wetti foe sondoe, di de ini dem pisi foe mi skin. Ke, mi mofina soema di mi de! Soema sa verloesoe mi komoto foe na skin, di sa ondrofeni na dede disi? Grantangi foe Gado nanga jepi foe Jezus Kristus, wi Masra! So misrefi de dan nanga mi verstan wan srafoe foe na wetti foe Gado, ma nanga mi skin foe na wetti foe sondoe.” — Rom. 7:21-25.
12, 13. (a) Fa kristen soema de skoifi komoto foe de wan soema di „toemsi regvaardiki” ofoe „toemsi koni”? (b) Te sondoe teki abra foe wan kristen kotoigi, san a de doe nanga dati? (c) Foe sainde dem kotoigi de tjari na „boen njoensoe” gi trawan?
12 Foe dati ede, na soema di de waka „Na Pasi” de proberi foe skoifi komoto foe de wa soema di de „toemsi regvaardiki” ofoe „toemsi koni”, na a fasi dati a no teki wan bigimemrefasi foe de koni nanga de regvaardiki en no de soekoe dem fowtoe nanga kroetoe di no boen foe trawan (Prediker 7:16). Ma opregti a de feti baka retidoe. A no de gi hemsrefi abra na ogri lostoe tapoe wan swaki fasi, ofoe fadon gi druk di sa dwengi hem foe doe bigi sondoe en broko hem getrouwfasi na Gado. Tokoe, tem na tem a sa de so dati onvolmaakti fasi sa meki a meki fowtoe en doe sondoe. Efoe a doe wan sondoe, a de erken hem en sori berouw, aksi pardon na Jehovah nanga jepi foe begi ini na nem foe Jezus (Tori foe dem Apostel 10:43). A de poti vertrouw tapoe Kristus volmaakti ofrandi leki wan fundamenti foe pardon foe sondoe (1 Tim. 2:5, 6). Dan a de doe ala moeiti foe no doe na sondoe dati moro. A sabi dati foe teki wan libi foe doe sondoe, sa ben tjari na lasi foe na boen ati foe Gado. Na „boen njoensoe” di a ben feni a de gi trawan foe di a lobi dem. Leki wan faja preekiman foe na „boen njoensoe”, a de proberi foe jepi soema foe si na fanoodoe foe bribi en na prenspari foe tjari dem libi kon akroederi bijbel gronprakseri. A de hori leki wan eksempel Jezus Kristus nanga trawan di na libi foe bribi foe dem skrifi ini bijbel. — Hebr. 11:1-12:3.
13 Foe di na gi jesi na a „boen njoensoe” habi na ini hem toe na kristen fasi foe libi en waka ini ala sani, wi de taki dja foe wan toe foe dem gron marki, di Gado poti gi ala soema di sa wani de kristen.
NA PISI DI NA LOBI FOE NA WAARHEID DE PREE INI WAN KRISTEN LIBI
14, 15. (a) Foe sainde wi moe aanbegi Jehovah „nanga waarheid”? (b) San „waarheid” wani taki gi na oso-famiri?
14 Sensi na Jehovah Gado ben meki libisoema en a sabi dem fanoodoe, a de prenspari gi libisoema, foe hem eegi tan-boen, foe libi akroederi dem marki foe boen wetti nanga gwenti, di Gado ben verteri ini na bijbel. Na a fosi presi, Jehovah de „na Gado foe waarheid” (Ps. 31:5). Wi moesoe aanbegi hem „nanga geest en waarheid” (Joh. 4:24). Lobi foe waarheid de prenspari, no wawan foe habi vreede nanga Gado, ma ooktoe foe libi ini vreede nanga trawan. Na apostel Paulus de gi rai na kristen soema: „Now, di joe poti falsi fasi na wan see, taki waarheid ibriwan foe oenoe nanga hem naaste”. — Ef. 4:25.
15 Prakseri san „waarheid” wani taki ini na oso-famiri. Efoe „waarheid” de taki alatem, dan vertrouw e de na mindri memre foe na oso-famiri. Respeki nanga makandrafasi e de na mindri man nanga oema. Na „communicatie kloof” no sa de. Pikin de gridi foe taigi dem papa nanga mama san e pasa ini dem libi, bikasi dem habi vertrouw dati dem sa kisi na firi dati dem de verstan dem en dem de kisi tiri ini na loesoe foe dem problema. Dem sabi toe, dati dem papa nanga mama no de taki wan sani en dem de doe wan tra sani. Dem kan bribi tapoe dem papa nanga mama foe kisi jepi ini ibri situati.
16. Fa dem woortoe foe Jezus ini Joh. 14:6 de poti krakti tapoe na fanoodoe foe lobi waarheid na a see foe na kristen?
16 Jezus ben taki: „Mi de na pasi nanga da waarheid nanga na libi” (Joh. 14:6). Na „pasi” foe na kristen de foe prakseri, firi en doe leki Jezus. Disi wani taki gi hem foe waka baka na waarheid ini ala pisi foe hem, soleki Jezus ben meki ala sani kon troe, di Gado ben poti gi hem. Na tra artikel de taki foe wan toe tra sani di de fanoodoe foe na „pasi” dati.