Wi jeje gosontoe nanga dem „niri”
1. Foe sainde wi de prisiri te wi niri de wroko boen?
WAN boen skin gosontoe foe wan bigi pisi de kon foe na kondisi foe dem niri foe wi. O moro langa wi de libi o moro wi de go verstan na sani disi. Niri kan meki wi sabi boen dati dem de ini wi skin foe dem hebi pen di dem de meki kon, te dem no de wroko boen moro foe difrenti sani ede. Wi de feni hem moeilijk foe opo tanapoe en foe waka letopoe. En tog wi no ben sa wani lasi sref-srefi wan foe dem niri foe wi foe habi wan boen gosontoe. Wan bigi mankeri na ala toe niri ofoe na lasi foe ala toe ben sa wani taki dede gi wi. Fa wi de nanga prisiri te wi habi ala toe foe dem en te dem de wroko boen!
2. Foe sainde a boen foe wi meki dem loekoe efoe wi niri de wroko boen en nanga soortoe gosontoe na bijbel de tjari na niri kon akroederi?
2 Foeroe tron na visiti di wi de tjari go na wan datra sa de wan fini ondrosoekoe foe na kondisi foe wi niri. Na rol foe dem ini na tan-boen foe wi skin de toemsi prenspari, foe datede wi moe loekoe boen tapoe na fasi fa dem de wroko. Disi de so kaba sensi dem datra ben leri sabi na anatomie foe na libisoema skin. Langa tem pasa kaba wan koonoe di ben habi wan koni verstan ben skrifi wan toe odo. A no habi foe taki, dati na a tem dati a ben habi wan sani foe taki foe na ati, na lefre, dem niri nanga dem bonjo. A ben taki dem koni woortoe: „Wan tiri ati de na libi foe na skin foe meti, ma djaroesoe de leki pori gi na bonjo” (Spr. 14:30). A de taki toe foe na prisiri firi, di wan soema kan firi ini hem niri (Spr. 23:16). Ini na fara tem di pasa dem ben tjari na niri kon akroederi nanga na tan-boen foe wi, no wawan ini skin fasi ma ooktoe ini jeje fasi. Na kondisi foe na jeje gesontoe foe wan soema de na moro prenspari wan. Disi wi moe kibri.
3. Soortoe wondroe foe na libisoema skin na psalmsingiman nanga foeroe waarderi de kari ini Psalm 139:12-14?
3 Dem niri de teki wan aparti presi ondro dem wondroe foe na libisoema skin. Dem de kari dem ini wan singi di koonoe David foe Jeruzalem ben meki. Nanga foeroe waarderi gi na Mekiman a ben taki: „Srefi na doengroe no ben sa de boen doengroe gi joe, ma na neti srefi ben sa skijn leki dee; na doengroe ben sa kan de net so boen leki na neti. Bikasi joe de na wan di ben meki mi niri; joe ben hori mi kibri ini na bere foe mi mama. Mi sa prijse joe, bikasi mi ben meki tapoe wan verwondroe fasi, di de gi frede. Dem wroko foe joe de verwondroe soleki mi sili sabi heri boen.” — Ps. 139:12-14.
4. Foe bewijsi soortoe sani di a taki, na psalmsingiman David ben verteri dja foe dem niri?
4 Foe sainde koonoe David ben verteri spesroetoe foe dem niri? A ben doe disi foe bewijsi san a ben taki. A ben gi grani na a krakti foe Gado di de go ini ala sani nanga na krakti foe si sani boen, di ben kan go so dipi, dati a doro te na Sjeool, na grebi foe na libisoema-famiri. Gado kan loekoe ooktoe dipi ini na skin foe libisoema, te go doro dem niri, di didon ondrosee foe na ati nanga na middenrif, na ala toe see foe na bakabonjo. En di Gado ben meki na embryo foe David en ben hori hem kibri ini na bere foe hem mama, a ben kan si nanga hem ai te go doro na a presi pe dem dipi pisi disi foe na skin didon. No wan sani ben kan tapoe dem ai foe hem ofoe pe na geest foe hem di kan meki sani kan doro. Na famiri-edeman Job di ben kisi pina ben verteri o dipi dem pisi disi foe na skin di de firi sani gaw, didon ini na skin, di a ben taki: „Mi niri ben firi hebi pen dipi inisee foe mi (ofoe, letterlijk, „ini mi borsoe”)”. — Job 19:27, NW; Leeser.
5. (a) Fa na dipi di dem niri didon, sodati libisoema ai no kan si te drape, de kon moro na fesi? (b) Foe sainde dem niri ben de wan prenspari pisi foe dem fositem slagti-ofrandi di ben tjari kon gi Gado?
5 Wi de hori toe na prakseri dati wan fatoe di deki bijna wan centimeter ofoe moro, dati de o bigi na soema de, lontoe dem niri. Disi de sori joe ete o moro dipi dem pisi disi foe na skin de, boen fara foe pe dem ai foe libisoema kan si. Foe di wan fatoe di didon dipi ben lontoe dem, ben meki dem niri de wan spesroetoe pisi foe dem slagti-ofrandi foe meti di na pipel foe Jehovah ini dem tem di pasa ben tjari gi hem. Foe dem fosi slagti-ofrandi foe meti, di wi de leesi dati dem ben tjari gi Gado, foe taki dem ofrandi di na pikin foe Adam Abel, na brada foe Kaïn, ben tjari, foe eksempel dem e taki dati a ben tjari „wan toe foe dem fosi-wan foe dem pikin meti foe hem, ja, dem fatoe pisi foe dem” (Gen. 4:4). Na sani disi dem niri ben de toe. En foe taki foe dem slagti-ofrandi di dem Israëlsoema ben moe tjari gi Jehovah, wi de leesi ala tron, dati „dem toe niri nanga na fatoe di de na dem” de foe Jehovah (Lev. 3:4, 10, 15; 4:9; 7:4; 8:16). Na fatoe foe niri ben de bron boen en a ben de gi wan switi smeri. Niri ben de soboen wan prenspari pisi foe dem slagti-ofrandi di ben moe tjari gi Gado.
6. Soortoe pisi foe na skin di wi taki dja foe dem, de ooktoe ini na slagti-ofrandi di Romeini 12:1 de taki foe hem?
6 Ini Romeini 12:1 na apostel Paulus de taki gi kristen-soema, di ben de soema foe na safri sari-ati foe Gado: „(Pristeri) joe skin . . . leki wan slagti-ofrandi, di de na libi, di de santa en di e prisiri Gado.” So wan ofrandi ben sa habi na hem ini dem niri soleki na ati. Dem soortoe kristen dati ben sa gebroiki dem ati nanga niri nanga reti ini na diniwroko foe Gado.
ATI NANGA NIRI DE TJARI KON AKROEDERI NANGA MAKANDRA INI NA BIJBEL
7, 8. Fa dem fasi fa dem niri de doe habi krakti tapoe na ati?
7 Ini na santa bijbel na ati nanga dem niri alatem de tjari kon akroederi nanga makandra. Disi de sori dati dem sani disi ini na skin foe libisoema habi te make nanga makandra.
8 Efoe na ati de wroko boen, wi kan si foe na fasi fa dem niri de wroko, foe di dem de sori efoe na waka foe na broedoe ini na skin no boen. Wi sabi dati dem niri habi wan prenspari pisi foe hori na broedoe soifri en krin, foe di dem de orgaan di de poeroe doti kon na doro. Te dem firi foe wi span, dan dem niri de bigin wroko foe meki hormoon kon di de meki dem broedoe-titee kon moro naw. Disi de meki na druk foe na broedoe kon moro hee en dati de meki na ati wroko moro tranga. Na bijbel ini jeje fasi de tjari na ati nanga dem niri kon akroederi nanga makandra.
9. Leki soortoe soema Jehovah de ondrosoekoe wi niri, en tapoe soortoe verwakti foe na libi na bakapisi foe na ondrosoekoe habi krakti?
9 Jeremia 17:10 de wa eksempel foe dati. Na vers de so: „Mi, Jehovah de ondrosoekoe na ati, de ondrosoekoe dem niri, ja, foe gi ibriwan akroederi hem pasi foe gi hem na dem froktoe foe hem doe.” Jehovah no de ondrosoekoe soleki wan datra ben sa doe, ma tapoe wan fasi foe wan soema di de wan kroeteman. A no de loekoe na a soifri skin kondisi foe dem orgaan disi foe na skin, ma a de loekoe na dem moreel en jeje kondisi di habi te make nanga dem orgaan disi. Disi de na prakseri di tanapoe ini Psalm 7:9, pe wi de leesi: „Gado leki wan regvaardiki wan de tesi ati nanga niri”. Soleki wi libi na skinfasi, foe wan bigi pisi, de kon foe na kondisi foe wi niri, na so wi teego libi ini na seti foe retidoe di de kon, pe vreede nanga skin gosontoe de, de kon foe san wi de ini na ai foe Gado, soleki wi ati nanga niri de sori. San a sa gi ibriwan foe wi akroederi nanga dem pasi di wi ben waka ini na libi? San a sa feni leki dem froktoe foe wi doe, di a teki leki wan marki foe gi san wi moe kisi, san wi verdini? A sa de pori ofoe teego libi?
10. Nanga soema Jeremia ben agersi Jehovah, di Jehovah ben tron wan feejanti foe Israël, en san na soro foe niri ben sa tjari kon?
10 Wi no wani dati Jehovah Gado de wi feejanti (Jak. 4:4; Jes. 63:10). Disi ben miti na Israël foe owroetem. Di Jeruzalem ben kisi pori na a anoe foe dem Babylon sroedati-hipi ini 607 bifo Wi Gewoon Teri, na profeeti Jeremia ben skrifi leki a de teki presi foe na heri naatsi en a ben agersi Jehovah leki wan soema di de soetoe bo ini feti, di a taki: „A ben waka tapoe hem bo (foe a gebroiki hem), en a de poti mi leki na sani pe a marki hem peeri na tapoe. A ben (foe di a soetoe now) meki den manpikin foe hem peeri-kokro boro go ini mi niri” (Klaagliederen 3:12, 13). Te peeri di habi aka ben soetoe go na wan soema di de lowe gwe en di de proeberi kon fri en dem peeri ben boro go te dipi ini hem niri, dan dati ben wani taki dede gi hem. So wan soro, di de tjari dede kon, gi na pipel di Jeremia ben de teki na presi foe dem, ben sa wani taki dede gi na koonoekondre foe Juda leki wan onafhankelijk naatsi nanga wan koonoe foe na famiri foe David na Jeruzalem. Fa a de wan sari sani!
11. Te, ini na „bigi benawtoe” di de kon, wi no wani kisi dem peeri foe Jehovah, wi moe si na ondrosoekoe foe ibri pisi foe wi leki wan prenspari sani?
11 Now now wi de libi ini dem „laatste dee” foe na kristenheid, di na koonoekondre foe Juda ini dem owroetem dati de agersi. Te wi no wani dem peeri foe Jehovah no kon na wi tapoe ini na „bigi benawtoe” di de kon, dan wi moe poti ai tapoe wi „niri”. Wi moe hori na ondrosoekoe di Jehovah, leki na ondrosoekoeman foe dem niri, de meki foe na kondisi foe na toemsi prenspari orgaan disi. Soortoe moreel, jeje kondisi a de miti dipi ini wi, leki ini wi niri? Disi de takroe ofoe a de meki wi de wan soema di kan kisi teego libi? Wi moe sorgoe, dati na agersi presi disi foe san wi de troe troe, wroko tapoe wan gosontoe fasi. Nanga disi ini prakseri wi de loekoe tapoe san wi de njan en dringi. Disi de so nanga dem letterlijk niri foe wi en a de so toe nanga dem ini jeje fasi.
12, 13. (a) San na kristen gemeente de dringi wawan, en nanga soortoe baka-pisi gi hem srefi? (b) Soortoe dringi dem kristen soema ini Klein-Azië ben moe lostoe, soleki na apostel Petrus de verteri?
12 Ini 1 Korinte 12:13 wi de leesi: „Bikasi troe troe, nanga wan geest wi alamala ben doopoe ini wan skin, efoe wi de Djoe ofoe Griki, en efoe wi de srafoe ofoe friman, en wi ben tjari kon so fara foe dringi foe na wan geest.”
13 Na wan „geest” dati de na geest foe Gado. Wi de kisi na tranga foe begi ofoe dem kan gi wi disi nofo (Lukas 11:13). Te ala dem memre foe na kristen gemeente de dringi na „wan geest” disi, dan na harmonie nanga wan-fasi foe na gemeente leki wan skin ondro na tiri foe Jezus Kristus leki edeman de hori kibri. Na geest disi de meki wi kisi kowroe-ati leki wan dringi (Rom. 12:11). Na apostel Petrus de skrifi gi dem kristen soema ini Klein-Azië: „Habi lostoe leki njoen gebore baby gi na merki di no falsi en di de foe na Woortoe, sodati joe nanga jepi foe dati kan gro foe kisi jepi” (1 Petr. 2:2). Te pikinnengre bakatem de kon bigi dem de poeroe na natuurlijk gwenti foe dringi soso merki en dem de bigin foe njan njanjan. — Hebr. 5:14.
14. Go miti san wi moe gro foe kisi teego libi en nanga jepi foe san?
14 Foe kisi teego jepi, wi moe gro kon lepi leki kristen, leki wan bigisma. Nanga na marki disi na prakseri wi moe gi wisrefi njanjan nanga na heri Woortoe foe Gado en no hori wisrefi soso na dem bijbel gronleri. Wi moe gi wisrefi njanjan nanga dem bijbel leri di go moro fara, en dem rai, vermane nanga wetti foe bijbel di de foe lepi kristen. Disi sa tjari boen gi wi te ini na moro dipi pisi foe na de foe wi leki kristen. Koonoe David ben sori tapoe dem Gado rai disi di a ben skrifi: „Dem marki-tiki ben fadon gi mi ini switi presi. Troe troe, mi eegi goedoe (di dem marki-tiki disi ben tapoe leki wan skotoe) mi ben feni boen. Mi sa blesi Jehovah, di ben gi mi rai. Troe troe, ini dem neti dem niri foe mi ben piri-ai gi mi.” — Ps. 16:6, 7.
15. O dipi na „rai” foe Jehovah ben go doro na David, en nanga san leki fa a ben taki „ini dem neti” a ben kisi piri ai?
15 Wi e si wantron wantron dati na psalmsingiman David no de taki foe a ati en a de kari wan sani di de moro dipi, dem niri. Efoe joe loekoe dati wawan, dan a no dem letterlijk niri di ben meki David kon moro boen. Na „rai” di Gado ben gi, ben doe dati. Ma na Gado rai disi ben boro go te dipi ini David srefi, te ini dem moro inisee oekoe foe hemsrefi leki wan aanbegiman foe Jehovah. Foe di na rai ben go so dipi ini David, disi ben sa tan drape. Na „rai” ben nesi hemsrefi so dipi ini David en a ben de so dipi leki wan roetoe, dati disi ben tron wan pisi foe David. Tra soema no ben kan figi ofoe poeroe na „rai” foe Gado.
16. Foe sainde so wan piri-ai ben kan pasa heri boen ini „dem neti”?
16 Foe di na rai ben poti hemsrefi so dipi ini David, a ben de na srefi leki dem niri. Te joe de loekoe hem so, dan dem niri ben kan meki David kon moro boen en piri ai gi hem en sori hem na moro boen pasi ofoe gi hem na joisti piki. So wan soortoe piri-ai, ben kan pasa na neti, ini dem joeroe dati David ben de nanga ai, foe di hem wawan ben de nanga hem prakseri en na geest foe Gado ben kan tjari kon ini hem memre na „rai” di Jehovah ben gi hem na dee tem. Na tapoe na fasi disi David ben kisi wan boen loekoe tapoe hemsrefi en a ben leri foe si hemsrefi soleki a ben de.
17. Foe san dem niri de teki presi, en san Jehovah de si foe dat ede te a de loekoe na dem?
17 Soboen, net soleki na „ati” de na presi foe dem beweegi foe wi ati en foe waarderi, na so dem niri teki na presi foe wan eegi sani foe wan soema. Foe san? Foe na troe troe eegi fasi foe wan soema. Na gron eegi fasi foe wan soema habi krakti tapoe hem beweegi foe ati. Te Gado de loekoe na a presi dati foe na eegi fasi, a de si wan soema de ini na fasi fa a de teki ofoe doe sani. Dem niri soboen, foe taki hem na agersi fasi, habi krakti tapoe na „ati”. Te wi de teki na rai foe Jehovah en poti disi na wroko tapoe wisrefi leki soema, wi de meki wi jeje gosontoe go na fesi. Net solanga wi de kisi wasi te leki wi de wan „troe troe sani”.
18, 19. (a) Foe sainde wi kan sori ini na ai foe libisoema tapoe wan bepaalde fasi, aladi ini Gado ai wi de tra fasi? (b) Fa Jehovah ben de farawe foe dem niri foe bepaalde soema ala di hem ben de krosibee ini dem mofo?
18 Ini dem ai foe libisoema wi kan sori wisrefi tapoe wan bepaald fasi, ala di wi de gi Gado, di dem ondrosoekoe ai foe hem de loekoe pasa na dorosee skijn nanga omstandigheid en te na dem moro dipi presi foe wi, troe troe tra fasi. Te wan soema tan boen na goedoe nanga maatschappelijk fasi, dan disi no de sori alatem tapoe wan boen matifasi nanga Gado, wan boen krosibee matifasi nanga hem. Efoe wi no loekoe boen, dan wi ben sa kan fadon kon ini dem srefi soortoe soema leki den Israël soema, di a ben gersi dati dem ben habi Gado boen-ati nanga jepi, ma di na inisee ben kon de wan vreemde soema gi hem. Jeremia 2:2 de taki foe dem soortoe soema disi: „Joe (Gado) ben prani dem; dem ben meki roetoe. Dem de tan go na fesi; dem ben tjari froktoe kon toe. Joe de krosibee foe dem mofo, ma farawe foe dem niri.”
19 Te ala sani de go boen gi dem soortoe soema dati, dem sa teki kande na Woortoe foe Gado ini dem mofo en taki foeroe foe hem. Ma dipi inisee foe dem — ini san dem de ondro san di de foe si — dem no habi wan krosibee matifasi nanga Gado. A no de pree wan troe troe rol ini dem inisee libi. A de „farawe foe dem niri”. Na „rai” foe hem no prani dipi ini dem. (Te dem) vervolgoe kristen soema, dem „niri” foe dem no sa piri-ai gi dem.
ONDROSOEKOE NANGA JOISTI DIAGNOSE
20. San wi moe meki wi niri doe, na presi dati wi meki wi ati kon bita nanga na organisaatsi foe Gado?
20 Meki foe dat ede ala kerkiman di habi falsi fasi ma di ini na see foe goedoe en foe taki foe popu fasi de go na fesi solanga Gado de gi pasi. A no de na wi srefi srefi foe djaroesoe nanga dem foe di ala sani de go dem boen en foe di dem de go na fesi na ini grontapoe. Wi de waarderi jeje sani moro, dem sani di de teri troe troe na Gado en di de sori tapoe hem boen-ati. Langa tem pasa kaba na psalmsingiman Asaf, wan tempel-pokoeman, ben prakseri verkeerti. A ben loekoe verkeerti tapoe sani di ben de na dorosee foe si en a ben kon ini wan takroe jeje kondisi. A ben taki: „Mi ati ben kon bita en ini mi niri mi ben de firi srapoe pen, en mi de leki mi no habi verstan en mi no ben kan sabi noti; mi ben de lek soso meti te mi loekoe hem foe na see foe joe” (Ps. 73:21, 22). Na presi foe wi firi srapoe pen ini wi niri, a moro boen foe wi meki wi niri piri ai gi wi. Wi no wani dati wi ati kon bita nanga na organisaatsi foe Jehovah, di wi de si. Wi no wani de leki meti sondro verstan te joe loekoe hem foe na see foe Gado.
21. Soema de ondrosoekoe wi leki kristen now leki fa 1 Petrus 4:17 nanga Openbaring 2:23 de sori?
21 Meki wi hori ini prakseri dati wi de ondrofeni wan spesroetoe ondrosoekoe. Sensi na geboortoe foe na kristen gemeente ini 33 foe wi gewoon teri, di na gemeente disi bigin foe dringi na „wan geest” (na geest foe Gado di ben trowe tapoe dem), soso Jehovah wawan de ondrosoekoe wi fini fini (1 Petr. 4:17). Na edeman foe na kristen gemeente Jezus Kristus de ondrosoekoe wi now ooktoe. Na mindri dem boskopoe di na glori Jezus Kristus ben seni gi dem seebi gemeente ini Klein Azië, ben de na warskow di de kon now: „Ala gemeente sa sabi dati mi de na soema, di de ondrosoekoe dem moro kibri prakseri (niri) nanga ati en mi sa gi na ibriwan foe oenoe akroederi dem doe foe oenoe.” — Openb. 2:23.
22. (a) San a de sori wi foe di dem ai foe Jezus de leki „wan fajavlam”? (b) Soortoe djaranti wi habi foe di Jehovah Gado nanga Jezus Kristus de ondrosoekoe wi ati nanga niri en disi de gi wi tranga foe doe san?
22 Meki wi no frigiti dati na Jezus Kristus di ben kon moro hee, de ondrosoekoe wi now, foe di a de go moro dipi leki na ati en a de boro go doro na dem niri. Ini Openbaring 2:18 a de taki, dati hem „ai de leki faja-vlam”, foe sori nanga dati, dati hem ai de toemsi krin en srapoe en kan go boen dipi. Ini na fasi disi a de leki Jehovah, „di de ondrosoekoe na ati nanga dem niri” (Jer. 17:10). Nanga disi ini prakseri, wi sabi dati ala soema di de tjari dem afersi kon na krin gi Jehovah Gado, sa kisi wan regvaardiki kroetoe: „Jehovah foe dem fetiman, de kroetoe ini retidoe; a de ondrosoekoe dem niri nanga na ati” (Jer. 11:20). Efoe wi ondrosoekoe dem beweegi foe ati opregti en ondrosoekoe san wi de troe troe leki kristen soema, dan wi kan teki dekati dati wi kan tjari wi „kroetoe” kon na krin gi Jehovah en wi sa wakti tapoe hen leki na Regvaardiki wan di sa meki wi kon regvaardiki.
23. Soema wi wani moe feni oenoe leki regvaardiki soema di no habi fowtoe en otem?
23 Wi no sa poti na kon regvaardiki foe wi eegi na fesi leki na moro prenspari sani. Na presi dati wi feni wisrefi regvaardiki, wi wani net leki Job, dati na regvaardiki Kroetoeman Jehovah feni taki wi de regvaardiki (Job 19:25-27). Ma efoe wi, baka wan fini ondrosoekoe foe wisrefi, tapoe na gron foe na Woortoe foe Gado habi na overtoigi dati wi no habi fowtoe, dan wi kan, sondro dati wi habi foe frede dati sani sa feni taki tapoe wi, tjari wi „kroetoe” kon na krin en wakti tapoe na kon foe na „dee foe revensi” foe hem. Te wi sa taki ala sani opregti, dan wi kan taki gi na Moro hee foe Kroetoeman: „Joe, o Jehovah foe dem fetiman, de ondrosoekoe dem regvaardiki wan; joe de si dem niri nanga na ati. Meki mi si na revensi foe joe tapoe dem (dem vervolgoeman foe wi), bikasi na joe mi ben tjari mi kroetoe kon na krin” (Jer. 20:11, 12). Ini na „dee foe revensi” dati Jehovah peeri no sa boro wi niri, ma wel di foe dem vervolgoeman foe wi en meki wan dipi soro di de tjari dede kon. — Jer. 46:10; Klaagl. 3:13.
24. Soortoe fasi dem soema, di ben waka ini dem getrouwfasi, de sori gi na ondrosoekoe foe Jehovah, soleki David ben gi na eksempel?
24 Kristen soema di de hori dem getrouwfasi na Jehovah, de prisiri te hem kon ondrosoekoe dem. Dem de begi foe a doe dati, net soleki na psalmsingiman David, di ben taki: „Kroetoe mi (ofoe meki mi kisi reti) o Jehovah, bikasi mi foe mi see ben waka ini mi eegi getrouwfasi en tapoe Jehovah mi ben poti mi vertrouw, foe mi no seki. Ondrosoekoe mi, o Jehovah, en tesi mi; soso mi niri nanga mi ati. Bikasi joe lobi boen-ati fasi de na fesi foe mi en mi ben waka ini joe waarheid.” — Ps. 26:1-3, NW; Willibrordvertaling.
25. San David ben aksi di a ben begi Jehovah foe soifri hem niri en nanga soortoe vertrouw?
25 Ini na tori foe David na waka ini hem eegi getrouwfasi nanga na waka ini na waarheid foe Gado ben de go anoe ini anoe. Ini na afersi foe wi na waarheid foe Gado de toe fanoodoe, te wi wani waka ini getrouwfasi na hem fesi. Boiti dati David ben wani ondrosoekoe en tesi hem, a ben wani toe dati hem niri ben kon soifri. A ben wani foe Gado ondrosoekoe hem leki wan persoon foe poti hem ini faja, net soleki wan soema di de gebroiki dati foe krin gowtoe nanga solfroe. David ben de seker, dati Jehovah, ala di a ben sa ondrosoekoe hem fini fini, no ben sa feni ini hem „dati”, no wan visti sani, no wan jeje siki kondisi. A no ben sa kon na krin dati a ben habi wan niri-ston.
26. San wi, leki soema di de hori dem getrouwfasi now, kan aksi Jehovah toe, en nanga soortoe vertrouw?
26 Leki opregti soema di de hori dem getrouwfasi ini na tem disi, wi toe kan aksi Gado foe ondrosoekoe wi fini, soleki nanga jepi foe na faja di wan soema di smelter metaal de gebroiki. Foe sainde? Foe di wi de vertrouw dati so wan ondrosoekoe no sa tjari sondoe „dati” kon na doro sodati dati ben sa sori dati dipi inisee foe wi wi pori, nanga vlaka en de leki grontapoe en mankeri kristen getrouwfasi.
27. Soortoe bakapisi foe na ondrosoekoe foe hem na wi sa gi Jehovah bigi prisiri?
27 San na fini ondrosoekoe di Jehovah de ondrosoekoe wi „niri” de tjari now kon na krin? Wi de hoopoe wan gosontoe jeje kondisi foe san wi de troe troe leki wan persoon. Te dati de so, dan wi sa bewijsi dati wi ben wroko nanga koni en dati wi prisiri ini soso Gado boen-ati. Foe wi ede Jehovah sa firi dipi ini hem prisiri. Jehovah de taki foe hem srefi leki wan papa di habi niri te a de taki gi wi: „Mi manpikin, efoe joe ati kon koni, dan mi ati sa prisiri, ja di foe mi. En mi niri sa bari prisiri te joe mofo-boeba de taki opregtifasi.” — Spr. 23:15, 16.
28. Te o fara wi sa loekoe tapoe na troe troe fasi foe wi leki aanbegiman en kotoigi foe Jehovah, nanga soortoe hoopoe dati wi sa pasa na ondrosoekoe boen?
28 Ja, efoe wi wani wi hemel Tata bari foe prisiri, dan wi sa poti wi ati nanga wi niri ini hem santa diniwroko. Foe di wi de hem aanbegiman nanga kotoigi, wi sa de te ini na moro dipi presi foe wi wan troe sani. Dan wi no sa kibri sondoe di wi ben doe na kibri fasi gi hem (Ps. 19:13, 14). Wi no sa frede na ondrosoekoe foe hem na a kaba, winsi o dipi a sa ondrosoekoe wi. A tapoe so wan gron foe getrouwfasi wi sa pasa na ondrosoekoe di Jehovah de ondrosoekoe wi niri en dati sa tjari teego prijse nanga wini gi wisrefi. „Nanga bigi prisiri” a sa taki dati wi de gosontoe doro doro.