Libi leki soema di de foe Jehovah
„Efoe wi e libi, ofoe efoe wi e dede, wi de foe Jehovah”. — Rom. 14:8.
1. Tapoe soortoe afersi wanfasi foe de ini na kristen gemeente?
TROE kristen habi belangstelling foe libi ini vreede nanga tra soema (Rom. 12:18). Dem memre foe na kristen gemeente e doe disi foedi dem e poti prakseri tapoe dem moro prenspari sani, aladi dem e poeroe poti na wan see dem sani di no de fanoodoe foe meki bribi go na fesi (1 Tim. 1:4). Na mindri dem prenspari sani de na soekoe foe habi wanfasi foe bribi nanga doe. Foe agersi na wanfasi disi, na apostel Paulus e sori tapoe na libisoema skin. Soleki dem memre foe wan gosontoe skin e wroko makandra foe na tan boen foe na heri skin, sodati na skin man foe doe boen wroko, na so a de toe ini na kristen gemeente. Pratifasi no moe de ini na „skin” disi, ma „dem memre moe sorgoe gi makandra tapoe na srefi fasi.” — 1 Kor. 12:25.
2. Foe sainde kristen soema no de si en doe ala sani a srefi, alwasi wanfasi de?
2 Ma, na wanfasi disi, no wani taki uniformiteit. Dati kristen soema e poti bribi ini na wan Almakti Gado nanga ini hem Manpikin Jezus Kristus, di de na Ede foe na gemeente, no e meki dem de a srefi, en a no e tjari dem so fara toe foe taki leki wan machine, soleki robot ben sa doe dati. Nono, ibriwan habi hem eegi fasi nanga maniri, hem eegi fasi foe loekoe sani di no de fanoodoe foe kisi jepi foe libi. Ibriwan soema e kenki foe na trawan pikinso, ini hem fasi fa a de seti afersi, en doe sani, srefi ini gewoon ala dee wroko, ini ontspanning en prisiritem. Disi doe kon moro foeroe foedi dem omstandigheden nanga fositem libi foe aparti soema kenki bigi.
3, 4. Fa wi kan taki dati wan troe kristen soema e libi foe Jehovah?
3 Ma ete, san kristen soema e doe toe, dem moe doe ala sani nanga dem heri ati leki gi Jehovah. Na wan kristen soema kande no sa verstan krin krin foe sainde wan tra kristen soema de si en doe sani tapoe wan bepaalde fasi. Ma a e verstan dati Gado de na kroetoeman foe hem knegti. En, net soleki hem de proberi foe doe ala sani nanga hem heri verstan nanga koni foe prisiri Jehovah, so a de bribi dati hem brada e doe dati toe nanga hem heri konsensi. Na apostel e taki foe disi:
„Bikasi no wan foe wi de libi foe hemsrefi wawan, en no wan de dede foe hemsrefi wawan. Bikasi efoe wi de libi, dan wi de libi foe Jehovah, en efoe wi de dede, dan wi de dede foe Jehovah. Foe datede efoe wi e libi, ofoe efoe wi e dede, wi de foe Jehovah.” — Rom. 14:7, 8.
4 Srefi na moro opregti soema, di e doe sani nanga hem heri konsensi habi onvolmaakti fasi nanga fowtoe en no de alatem fri foe gridi fasi. Ma, a no de na moro bigi marki ini hem libi foe kon goedoe ofoe foe gi hemsrefi abra na a prisiri nanga gemak. A no de libi foe hemsrefi wawan ofoe soso gi hemsrefi. Na moro prenspari marki ini hem libi na foe prisiri Gado foe doe hem wani. A de klari foe dede ibri momenti efoe hem dede kan dini na prakseri foe Gado. En soleki a ben libi leki a de foe Jehovah, na so ini dede Jehovah e si hem leki hem goedoe. We, te a tanapoe na fesi dede, a de seker foe wan opobaka, foedi Jehovah de si dem wan di teki hem leki dem Gado, leki dem de na libi, no leki dem dede. — Matt. 22:31, 32; Rom. 4:17.
GI IBRIWAN SOEMA NA OKASI FOE SETI HEM EEGI AFERSI
5. (a) San na en moro prenspari wroko? (b) Fa wan kristen soema moe si na fasi fa wan tra soema de gebroiki hem tem nanga krakti?
5 Na moro prenspari wroko di wan soema kan doe, de foe jepi tra soema foe kisi en hori wan boen presi na fesi foe Gado nanga Kristus. Ma tra sani moe doe toe. Wan soema di e gi tem na a preeki foe na „boen njoensoe”, ben sa kan teki na bosroiti foe bow wan njoen oso ofoe foe meki hem oso kon moro bigi. Foe di a de gi tem nanga moni na dati, dan tra kristen soema no moe prakseri dati dati wani taki dati a lobi goedoe. Dem e kroetoe hem efoe dem de taki dati a de „kon kowroe” ini hem lobi gi na waarheid. Kande a de doe disi, foedi a feni dati wan kristen habi na plekti foe sorgoe dati hem habi ini na ai foe na gemeenschap wan boen oso di e dwengi respeki. Kande a ben sa wani gebroiki na oso dati leki wan konmakandra-presi gi wan groepoe foe kristen soema.
6. Fa wan soema ben kan si dati a no de handri joisti foe kroetoe hem brada tapoe na tori foe ontspanning?
6 Wan tra kristen nanga hem heri konsensi kande e teki wan soortoe prisiri sani di no de verkeerti. A de hori disi ondro na meki foe dem koonoekondre-afersi go na fesi. Trawan no ben sa teki na spesroetoe soortoe prisiri kande leki wan sani di e gi joe troe troe prisiri, ma dem ben sa si disi leki lasi-tem. Dem ben sa kroetoe na kristen te dem ben sa taki dati a de libi gi hemsrefi en no gi Jehovah, ofoe dati a prati hemsrefi ini na „dini foe Gado nanga Mammon”. — Lukas 16:13.
7. Foe sainde wan kristen no kan verteri wan trawan san de moro boen gi hem tapoe na tori foe goedoe na skin fasi?
7 Ibriwan foe wi habi hem eegi loekoe tapoe san a habi fanoodoe na skinfasi, aladi a de tan poti tapoe na fosi presi dem Koonoekondre-afersi en teki faja prati na a tranga fanoodoe wroko, di de ini na meki bekenti foe na boen njoensoe gi trawan (Matt. 6:33; Mark. 13:10). Wan soema kan habi foeroe grontapoe goedoe en tokoe habi makti na tapoe, aladi a de gebroiki dem foe prijse Jehovah. Wan trawan kande no habi na fasi dati a kan hori goedoe ondro hem makti, sodati ai meki dem kori hem poeroe foe jeje sani. A moe de „Tranga gi hem skin” en leri foe dwengi hemsrefi, aladi ai habi na prakseri, dati na a fosi presi a habi na verplekti foe meki na „boen njoensoe” bekenti (1 Kor. 9:16, 27). Ma wan tra kristen no moe teki na fri foe kroetoe na soema disi ofoe wani de „wan konsensi” gi hem, aladi a de gi switi jepi nanga rai na wan soema di e fadon gi na lobi foe moni. — 1 Tim. 6:17.
NO LOEKOE NO WAN SOEMA NA „SAN A DE NA SKIN FASI”
8. Fa wan pôtiman soleki wan goedoeman kan prisiri tapoe dem difrenti presi ini na waarheid?
8 Jezus afoe brada Jakobus e taki foe disi: „Ma wan brada, disi no habi nem na kondre, meki hem prisiri foe da heefasi foe hem. En wan goedoeman moe soekoe hem prisiri na ini na lagifasi foe hem, bikasi leki wan bromki foe dem bon a sa pasa gwe” (Jak. 1:9, 10). Na mofinawan di no habi goedoe ini na seti foe sani disi ofoe di no habi wan prenspari positie, kan prisiri, foedi dem de loekoe hem now ini na kroetoe foe Gado nanga foe hem kompe-kristen a srefi leki wan goedoeman, aladi grontapoe ben loekoe hem leki wan soso sani. Hem de wan „kompe-borgoe foe dem santawan nanga wan memre foe na oso-famiri foe Gado” (Ef. 2:19). Hem habi na toemsi bigi goedoe foe na dini foe Gado, aladi na paiman foe libi de na hem fesi. Na goedoeman kan prisiri foe di dem jepi hem foe si dati a de sososani foe gi hem krakti ini na tjari kon makandra foe goedoe. Foe na njoen, kristen, sakafasi presi pe a de now, a kan verstan na „bedrigi krakti foe goedoe” nanga si fa a de wan law sani foe poti vertrouw tapoe dati (Mark. 4:19). A sabi dati „dem sani di de foe si, de foe wan pisi tem, ma dem sani di no de foe si, . . . teego”. A de loekoe foe kisi na srefi paiman leki na mofinawan. — 2 Kor. 4:18.
9. Foe sainde wi no moe sabi „no wan soema na skin fasi”?
9 Tapoe na gron foe dem moi waarheid disi na apostel de verklari na troe troe boen regel gi ala kristen: „Kristus ben dede gi ala soema, foe dem di de libi, no ben sa libi moro langa gi demsrefi, ma gi hem di ben dede gi dem en di ben opo komoto foe dede. Foe datede, bigin foe now wi no sabi no wan soema moro na skinfasi” (2 Kor. 5:15, 16). San wan soema de na jeje fasi, en no san a gersi a de na skin fasi, e teri na Gado. Wi moe hori wi srefi na a waardebepaling disi.
10. Foe sainde wi moe hori ini prakseri dati Kristus de Masra foe dem dedewan nanga dem libiwan?
10 Dati wan troe kristen kan si dem sani disi moeilijk wan tra fasi, de kon na krin ooktoe foe dem woortoe foe Paulus. Baka di a taki: „Wi de foe Jehovah”, a de go moro fara foe taki: „Bikasi na foe datede Kristus ben dede en ben kon baka na dede, foe a ben kan de Masra gi dem dedewan, so toe dem libiwan” (Rom. 14:9). Foedi a de wi Masra, a kan jepi kristen soema tapoe wan boen fasi foe libi gi dem sani foe Jehovah. Leki fa hem „ben wini grontapoe”, na so dem toe wini kan wini na grontapoe (Joh. 16:33; Hebr. 7:25). Leki Masra tapoe dem dedewan, Kristus habi na krakti nanga makti foe tjari dem kon baka na libi. A de wan troostoe gi dem foe sabi, dati nooiti dem sa libi hem ini dem heri libi foe diniwroko gi Gado en srefi ini dede. — Rom. 8:31-34, 38, 39.
11. Foe sainde a no de wan sani di fiti gi kristen soema foe kroetoe dem brada?
11 Paulus no de taki dem sani disi soso foe taki ete wan tron foe na hoopoe di wan kristen soema ben moe habi kaba. A de gebroiki na argument disi leki wan bewijsi dati a no de fiti wan kristen soema foe kroetoe hem brada, bikasi na brada dati de krin krin foe Jehovah. Ini dem tra vers di e kon a de kon na a mama foe hem argument:
„Ma foe sainde joe de kroetoe joe brada? Ofoe foe sainde joe de veragti joe brada? Bikasi wi alamala sa tanapoe fesi na kroetoe-stoeroe foe Gado; bikasi a skrifi taki: ’So troe leki mi de libi’ so Jehovah taki, „ibri kindi sa boigi gi mi en ibri tongo sa taki na publiki foe Gado.”’ Na so ibriwan foe wi sa gi frantwoortoe na Gado. Foe datede, meki wi no kroetoe makandra moro langa.” — Rom. 14:10-13.
NA A FOSI PRESI, PROBERI FOE NO MEKI TRAWAN NAKI FOETOE
12, 13. Fa na apostel Paulus soleki Jezus Kristus de verteri san ibriwan moe doe na presi foe de wan kroetoeman?
12 Ini na gemeente Rome son wan ben kroetoe dem doe nanga beweegi foe ati foe soema di ben habi difrenti prakseri nanga difrenti konsensi problema. Disi no ben boen en a ben gevaarlijk gi ala soema di ben de ini na tori. A no ben prisiri na bigi Kroetoeman, di no de poti no wan soema fesi wan trawan. A de taki now gi dem wan di habi na firi foe kroetoe wan trawan: „Teki moro boen na bosroiti disi, no poti no wan sani na pasi foe wan brada naki foetoe fadon, no wan sani di kan meki a fadon.” — Rom. 14:13.
13 Dem ben kan gebroiki na firi foe kroetoe trawan moro boen, en na presi foe dati kroetoe demsrefi nanga foe bosroiti foe loekoe moro fini tapoe dem eegi waka nanga libi. Jezus ben gi na warskow: „Kaba nanga na kroetoe foe trawan, foe dem no kroetoe joe; bikasi nanga na kroetoe di joe e kroetoe, dem sa kroetoe joe . . . Fa joe kan taigi joe brada: ’Meki mi poeroe na pikin splintri ini joe ai’, kaba loekoe! wan barki de ini joe eegi ai? Oen falsi soema! poeroe fosi na barki foe joe ai en dan joe sa si krin fa joe moe poeroe na pikin splintri ini na ai foe joe brada.” — Matt. 7:15; loekoe toe 1 Kor. 11:31; 2 Kor. 13:5.
14. San a wani taki foe meki wan brada „naki foetoe”? Gi wan eksempel.
14 Efoe wi meki wan soema naki foetoe, den wi e gi hem tranga foe doe sondoe, bikasi ini na bijbel sondoe de leki wan fadon (1 Kor. 10:12; 1 Tim. 6:9; Loekoe Matt. 5:27-30). Wan kristen ben kan meki wan brada naki foetoe na a fasi disi: A ben kan doe wan sani, di a habi na kristen fri foe doe, sondro foe loekoe fosi ofoe disi e trobi na konsensi foe hem brada. Na brada disi foe eksempel ben kan habi konsensi problema tapoe na dringi foe sopi. Tokoe na kristen soema ben sa kan dringi na fesi foe na brada ofoe pristeri hem wan sani foe dringi. Na brada ben sa kan prakseri: ’We, hem na wan lepi kristen, soboen mi ben sa kan waka baka na eksempel foe hem.’ Soboen, disi e gi hem tranga en ai bigin dringi. Ma na srefi tem, hem konsensi e taigi hem dati a no joisti. Hem konsensi e kroetoe hem. A no de handri moro nanga bribi ofoe leki gi Gado. Foe datede, dem meki a naki foetoe. Hem konsensi kisi soro en habi brokoskin, foedi a habi na firi, dati a ben sondoe. A kan de moeiliki gi hem foe kon boen baka. — 1 Kor. 8:12, 13; Rom. 14:23.
15. Wan kristen kan meki wan kompe-kristen doe soortoe sondoe, foedi a de tanapoe na tapoe foe doe wan sani di a habi na reti foe doe?
15 Na a tra see, na fasi foe libi nanga waka foe wan kristen di e tanapoe tapoe hem reti foe doe wan sani, di ondro normaal omstandigheden a habi na reti, ben sa kan tjari wan soema nanga wan zwaki konsensi foe de wan kroetoeman foe hem. Foedi, sondro foe a gebroiki hem verstan, ai gebroiki so wan fri, na swakiwan ben sa kan prakseri sani di no de joisti nanga djaroesoe. Disi kan tjari na vreede nanga na wanfasi foe na gemeente ini gevaar.
16. Foe sainde na wan kristen no sa doe bepaalde sani, aladi wan trawan no e feni hem wan ogri sani foe doe?
16 Paulus e verteri fa a doe kon dati na wan kristen soema de teki na bosroiti foe no doe sani, aladi na trawan no habi konsensi fonfon foe dati: „Mi sabi en mi de bribi dati ini Masra Jezus, noti no de onrein (no krin); soso te wan soema si wan sani leki a no krin, dan a no krin gi hem.” — Rom. 14:14.
17, 18. (a) Soortoe bigi fri wan kristen habi soleki na apostel Paulus e sori? (b) Foe sainde son wan foe dem fositem kristen no ben man doe nanga na fri fasi disi soleki dem ben wani?
17 Na apostel e sori soortoe bigi fri kristen soema habi troe troe foe taki foe njanjan, di leki fa a taki: „Gado ben meki foe gebroiki nanga taki tangi gi dem di habi bribi en di sabi fini fini na waarheid”. „Na foe datede”, so a de go moro fara, „dati ibri meki sani foe Gado boen troe troe, en noti moe trowe, efoe wi e teki hem nanga taki tangi, bikasi a de kon santa nanga jepi foe Gado woortoe (di e keur hem boen) nanga begi na tapoe.” — 1 Tim. 4:3-5.
18 San Gado ben meki nanga wan bepaalde prakseri, soleki njanjan, de troe troe boen, en wan kristen soema kan njan foe dati sondro foe sondoe — a de krin. Ma son wan, spesroetoe ondro dem djoe memre foe na fosi kristen gemeente, ben habi wan swaki konsensi tapoe na punt foe njanjan, di ondro na Wet foe Mozes no ben moe njan (Tori foe 10:14, 15). Winsi tra kristen soema ben leg dem na afersi uit, tokoe dem ben habi moeiti foe si dem soortoe njanjan disi nanga dem heri konsensi leki krin, foe gwenti nanga na langa gebroiki foe hem ede. Dem no ben de verplekti foe njan hem. Wan tra soema ben sa kan verstan dati Gado ben verklari dati na Wet ben komoto na pasi nanga jepi foe Kristus slagti-ofrandi en dati ala njanjan foe datede ben de „wettelijk” nanga krin. A ben kan njan nanga hem heri ati en taki Gado tangi foe hem seti foe sani.
19, 20. (a) Sori na difrenti foe sani di wan kristen moe doe nanga sani di a moe teki na bosroiti efoe a sa doe dem? (b) Fa a kan de dati wan kristen di teki na vaste bosroiti foe gebroiki hem kristen fri „no de waka akroederi nanga lobi”?
19 Ma a ben joisti gi wan kristen di ben habi na sabi disi foe njan na fesi foe wan djoe kristen? Paulus e piki: „Efoe foe njanjan ede joe brada e sari, dan joe no de waka moro langa akroederi nanga lobi. No brokosaka nanga njanjan na soema di Kristus ben dede gi hem.” — Rom. 14:15.
20 Aladi njanjan de kari dja ini na eksempel, na gronprakseri habi krakti tapoe ala sani, tapoe san wi habi na reti, ma di wan soema moe teki hem eegi bosroiti. Joe habi sani di Gado de gi wi na komando foe doe en di habi foe doe nanga getrouwfasi, retidoe nanga gi jesi. Disi de dem „prenspari sani” (Fil. 1:10). No wan enkri kristen nanga reti kan schipper (skeki) nanga dem punt disi ofoe foe libi dem. Wan soema no de handri nanga lobi, te ini hem eegi afersi a de go doro nanga tranga jesi foe hori na hem prakseri nanga san hem e feni boen, sondro foe hori dem firi foe tra kristen na prakseri. Wan sani di joe no de doe nanga lobi, no habi no wan waarde gi joe. — 1 Kor. 13:1-3.
21. Soortoe krakti a kan habi tapoe trawan te joe no de hori dem na prakseri?
21 Moro fara, wan tranga-ede fasi foe doe ben sa de toemsi don. Joe kan meki wan tra brada kisi pen, winsi na prakseri foe na brada dati, dati na doe no boen, no habi wan boen fundamenti. A kan kisi brokoskin, kisi atibron en srefi tegoe. Na ogri ben kan de so bigi, dati srefi hem bribi srefi kan ruieneer. Kristus di ben gi hem libi abra gi na libisoema-famiri, de hem eeginari (Judas 4). A de si na brada, di a bai nanga hem broedoe, leki wan diri sani ini hem ai, en a no sa lobi wan soema, di, foedi a tan tanapoe tapoe hem eegi prakseri, ofoe e kroetoe hem brada ofoe e meki a fadon. — Loekoe Matt. 8:6, 14.
22. San, foe datede sa de wi vaste bosroiti foe doe?
22 Te wi de libi foe Jehovah, dan wi sabi soboen dati „ala sani (di Gado ben gi foe wi ben sa gebroiki ofoe doe hem) . . . de boen, ma no ala sani boen (disi de doe kon foe na tem, dem omstandigheden nanga san di de foe na boen foe trawan). Ala sani pasi opo foe doe, ma no ala sani de bow trawan. Ibriwan soema no moe soekoe na boen foe hem, ma di foe na trawan.” — 1 Kor. 10:23, 24.