Moi na leri foe Gado ini ala sani
„Na koonoekondre foe Gado no wani taki njan nanga dringi, ma a wani taki retidoe nanga vreede nanga prisiri nanga santa jeje.” — Rom. 14:17
1. Soortoe sani di ben sa kan meki moeilijkheid kon de ini ibri kristen gemeente?
DIFRENTI ini prakseri, smaak nanga inisee firi de na mindri ibri groepoe foe soema. Disi de ooktoe troe na mindri opregti kristen soema. Dem difrenti disi kan broeja na vreede nanga wanfasi foe na gemeente, efoe dem memre foe na gemeente de si dem prakseri moro hee ofoe leki na prakseri di ala trawan moe fiti hemsrefi na hem.
2, 3. (a) Soortoe difrenti ben de ini na gemeente ini Rome? (b) San ben de na edeprakseri foe na rai di Paulus ben gi na dem soema ini na gemeente, di tapoe bepaalde sani ben habi difrenti prakseri?
2 Ini Kapitel 14 foe Romeini, na apostel Paulus e poti prakseri tapoe difrenti ini prakseri ini na kristen gemeente ini Rome. Disi ben habi foe doe nanga sani di habi krakti tapoe na konsensi — difrenti di son wan ben firi dati a moe seti definitief tapoe wan ofoe tra fasi, foe kan go doro nanga na aanbegi foe na troe Gado. Dem fundament leri foe na bijbel no ben de ini na tori. Dem afersi di dem no ben agri nanga makandra ben de uitleg foe na konsensi tapoe aladee afersi foe na libi. Na apostel e verklari, dati lepi kristen habi wan bigi fri ini dem sani disi. Ma hem ooktoe e warskow foe na gebroiki foe na fri disi sondro marki ofoe sani di wan kristen e doe foe tapoe na fri foe wan trawan.
3 Wan kristen soema kan firi fri foe doe wan bepaalde reti nanga hem heri konsensi. Ma, Paulus e gi so wan soema dekati foe temper hemsrefi efoe a ben sabi dati nanga dati a ben sa doe ogri na a konsensi foe wan brada. Na a tra see, na soema di ben habi wan konsensi di ini son sani e firi sani pasa marki, ben kisi na rai foe no kroetoe hem brada foe wan doe di na bijbel e gi pasi foe doe, winsi hem nanga hem heri konsensi no kan handri na so wan fasi.
WI KAN WROKO KONTRA WI EEGI AFERSI
4. Soortoe boen wan kristen e proberi foe doe?
4 Na apostel e taki moro fara: „Foe datede, no meki dem taki ogri foe joe, foe na boen di joe e doe” (Rom. 14:16). Wan kristen e span hemsrefi foe handri boen en „foe moi na leri foe wi Jepiman, Gado, ini ala sani” na fesi foe ibri soema, foe ala soema ben sa si na kristen leri nanga na moro bigi respeki di de (Tit. 2:10). Hem wani dati hem libi de wan libi kotoigi foe san hem nanga na kristen gemeente de leri san e akroederi nanga na rai foe na apostel Petrus: „Hori wan boen konsensi, foe dem di de soso oen boen waka nanga libi ini Kristus, kan kisi sjen, joisti ini na sani di dem e taki ogri foe oen.” — 1 Petr. 3:16.
5. Fa dem kan taki ogri foe wan kristen foe wan sani di boen?
5 Fa a ben sa de wan sari sani, te wan soema, baka di a ben de so soifri ini wan kristen waka nanga libi, ben sa pori na boen krakti disi foe doe persee wan sani di te joe loekoe hem boen de joisti doro doro — ja „boen”, ma di ini na ai foe wan brada di hem konsensi e firi sani pasa marki de verkeerti. Na brada kande habi na firi foe taki nanga trawan foe dati tapoe wan wis wasi fasi. Ooktoe wan bepaalde fasi foe doe foe wan kristen soema wan heri gemeenschap kan kroetoe tapoe wan verkeerti fasi. Ma foedi trawan e kroetoe disi, dem ben sa doe ogri na a boen nen foe na kristen soema. Disi ben sa kan tjari sjen kon tapoe na boskopoe foe na „boen njoensoe”, di na gemeente de proberi foe preeki so faja faja. Foe na reden disi wan kristen soema ben sa doe moro boen foe hori hem refi en no prisiri hemsrefi ofoe gebroiki bepaalde fri, winsi dem ben sa de joisti, efoe na konsensi foe trawan de swaki tapoe na punt disi.
6. Soortoe rai e gi na wan kristen di habi wan konsensi di e firi sani pasa marki?
6 Na a tra see, a de ooktoe wan prenspari sani, dati wan kristen soema hori hemsrefi foe no kroetoe wan soema di de meki gebroiki foe hem fri en di no de handri fowtoe. A de kroetoe hem brada. A moe kenki hem fasi foe doe. (Loekoe 2 Korinte 13:11). Noso a ben sa go doro foe broeja na vreede foe na gemeente. Foedi a de kroetoe hem brada, wan bigi pisi foe na fowtoe foe dem moeilijkheid di hem kritiek ben tjari, de kon tapoe hèm. Moro foeroe a moe proberi foe kon troe troe lepi en kon tanapoe krakti en vaste ini hem bribi, en a moe proberi foe meki hem bribi kon tranga tapoe ala punt, sodati a no sa habi na firi foe meki trawan naki foetoe ofoe kroetoe dem. Efoe a no e go na fesi tapoe dem kontren disi, dan alatem a kan de wan fontein foe moeilijkheid en a kan tjari sjen kon tapoe na boen njoensoe. — Hebr. 5:12-14; Ps. 119:165.
NA KOONOEKONDRE FOE GADO HABI MORO PRENSPARI SANI
7, 8. San Paulus e bedoel nanga hem verklaring: „Na koonoekondre no wani taki njan nanga dringi”?
7 Na apostel de kon na a mama foe na tori foe hem te a de taki: „Bikasi na koonoekondre foe Gado no wani taki njan nanga dringi, ma a wani taki retidoe nanga vreede nanga prisiri nanga santa jeje” (Rom. 14:17). Na troe aanbegi nanga san di habi foe doe nanga na koonoekondre foe Gado nanga hem gemeente, no bow lontoe dem sani disi na skin fasi. Jezus ben taki ini na pisi tori disi: „Noti kan doti wan soema foe san e kon foe dorosee ini hem, ma dem sani di de komoto inisee foe na soema, dati de doti na soema.” — Markus 7:15.
8 Disi wi kan taki foe foeroe tra sani ini na libi. Weri krosi, nanga edewiwiri, ontspanning (prisiritem), wrokopresi nanga tra eegi afersi no de prenspari foe „na go na fesi foe boen njoensoe” (Fil. 1:12). Efoe joe no kan taki foe wan troe troe pasa foe bijbel gronprakseri en efoe wi no de doe sani pasa marki, ma wi de matig en wi no de gi wi abra na grontapoe ogri, dan dem afersi disi foe na aladee libi no de kon inisee na kontren pe wi brada ben sa kan kroetoe wi. — Loekoe Spreuken 11:2.
9. Fa na koonoekondre de retidoe nanga vreede nanga prisiri nanga santa jeje?
9 A de moro foeroe na leri foe na koonoekondre foe Gado, di sa meki na troe troe boen froktoe foe retidoe kon ini dem preekiman foe hem nanga dem soema di e jere hem (Tit. 2:12; 1 Petr. 2:11). Ibriwan soema moe de klari foe poti hem eegi wani nanga lostoe nanga hem eegi prisiri na wan see foe na vreede foe na gemeente ede. Efoe wan kristen gi troe troe pasi dati na santa jeje wroko ini hem en tjari hem, a sa habi prisiri, foedi a habi na vertrouw dati a de prisiri Gado. Na koonoekondre foe Gado habi dem moro prenspari sani disi foe na jeje na prakseri foe dem kon na fesi. — Rom. 8:6, 13.
10. Te wi hori na prakseri san na koonoekondre foe Gado wani taki, na soortoe fasi wan kristen soema di e dini Kristus leki srafoe, ini na fasi disi Gado e teki en libisoema de feni hem boen?
10 Foedi wan kristen soema habi dem bigi marki disi na hem fesi, a de poti hem prakseri troe troe tapoe afersi di habi foe doe nanga gronprakseri foe na koonoekondre. „Bikasi hem di e dini Kristus leki srafoe ini disi, de boen na Gado ai en soema de feni hem boen” (Rom. 14:18). Te a de dini Kristus leki srafoe foe meki dem prenspari sani disi kon na fesi, a sa kisi troe troe na boen ati foe Gado, aladi tra kristen soema sa lobi hem foe hem redelijkheid nanga gosontoe verstan ede. Hem fasi foe libi sa pristeri hem na soema di de na doro na wan boen fasi. Winsi son wan no sa wani teki demsrefi na Kristendom, dan tokoe hem fasi foe waka nanga libi sa taki nanga dem konsensi. — 2 Kor. 6:2.
SOEKOE NA VREEDE FOE NA GEMEENTE
11. Gi san dem memre foe na gemeente moe gebroiki ala dem krakti na presi foe soekoe foe feni fowtoe na makandra?
11 „Soboen” na apostel Paulus e taki „meki wi feti baka dem sani di e meki na vreede go na fesi en dini dem sani di de bow makandra” (Rom. 14:19). Na so fasi a de gi na gemeente rai foe poti ala sani di e meki trobi kon na wan see en libi wanfasi nanga makandra. A de taki tranga nanga dem foe doe dem sani di sa meki dem bow makandra, na presi foe dem feni fowtoe na makandra ofoe na a tra see hori tranga na wan eegi reti — dem sani di de broko trawan saka. Paulus e gi na rai foe dem wroko dati dem ala „kon ini na wanfasi ini na bribi nanga ini na joisti sabi foe na Manpikin foe Gado, te wan bigi man, te na gro di de foe Kristus” en „foe gro ini lobi ini ala sani ini hem di de na ede, Kristus”. Dan nanga wanfasi dem kan miti nanga makandra en tjari na boskopoe foe redding nanga troe troe krakti nanga doeltreffendheid. — Ef. 4:13, 15.
12. Fa wan kristen soema kan doe foe no „broko na wroko foe Gado”?
12 Dem soema di kon kisi wan sabi foe na waarheid, de na wroko foe Gado. Ooktoe dem knegti foe Gado ben teki foeroe tem nanga moeiti foe leri en jepi dem disi nanga bigi sorgoe nanga safoefasi. Dem de „na gron foe Gado, di Gado e wroko, na oso foe Gado” (1 Kor. 3:9). Wan kristen soema ben sa wani de wan soema di no de sori respeki en di habi na lostoe foe pori sani, dati a ben sa wani broko na wroko disi? Na apostel e gi na vermane: „Kaba foe broko na wroko foe Gado foe njanjan ede. Ala sani de kande krin (Foedi na Wet foe Mozes di ben taki foe krin nanga meti di no krin nanga jepi foe Kristus ben komoto na pasi), ma a de wan ogri sani gi wan soema di e njan ma di ben naki hem foetoe. A boen foe no njan meti ofoe no dringi win ofoe no doe wan sani, di joe brada e naki foetoe foe hem” (Rom. 14:20, 21). Te wi e tjari wan trawan go so fara nanga na eksempel foe wi foe handri kontra hem konsensi ofoe te nanga tranga san wi lobi wi de moesoe trawan, dan wi kan broko ala na boen wroko di Gado geest ben meki na soema doe, winsi wi no de verstan soortoe ogri wi e doe. — Loekoe 1 Kor. 3:17.
SOEKOE GADO GLORI EN NO PRISIRI WISREFI
13. Fa wan soema moe habi hem bribi „akroederi hemsrefi na fesi foe Gado”?
13 Wi moe kon foe datede na a bosroiti disi: „Habi na bribi di joe habi, akroederi joesrefi na a fesi foe Gado” (Rom. 14:22). Na bribi di kari djaso habi foe doe nanga na tori di e taki dja. A no habi foe doe nanga na koonoekondre nanga dem prenspari sani di habi foe doe nanga dati, bikasi na bribi dati moe meki bekenti na publiki (Matt. 28:19, 20). Paulus e taki dja foe na bribi foe wan kristen soema di Kristus slagti ofrandi ben fri hem foe fositem sani di ben de leki wan skotoe, soleki na njan foe bepaalde njanjan en na hori foe bepaalde dee — sani di no de dem troe troe gronprakseri foe na koonoekondre, ma di de now soso afersi foe san wani soema de lobi en prakseri (Gal. 4:4-11). Na rai de foe datede: „No dwengi wan soema foe teki na prakseri foe joe”. Efoe joe sabi dati ini na prakseri foe son wan onsekerfasi de tapoe na joistifasi foe wan sani, di joe sabi dati a de joisti, dan joe no moe proberi foe masra dem ofoe foe sori krin o fri joe de. Gado sa respeki na fasi disi foe joe pe joe de hori trawan na prakseri. A sa verstan foe sainde joe e hori joesrefi foe no doe na sani, di joe habi na kristen reti foe doe. Ma efoe joe ben sa sabi dati joe fasi foe doe no ben sa tjari konsensi problema gi trawan, dan joe kan doe san joe ben wani doe. Gado sa verstan dati joe habi wan konsensi di oefen boen en dati joe de sori dati joe de gebroiki gosontoe oordeel te joe de doe wan sani. Ini ala toe fasi Gado sa si na opregti fasi foe joe bribi. Na kroetoe foe hem e teri. Hem e si dati ini na sori foe joe bribi joe de handri nanga joe heri konsensi en nanga lobi.
14. Foe sainde wan soema de kolokoe di no de hari wan kroetoe kon na tapoe hem nanga san hem de feni boen?
14 Gi na trawan di hem konsensi e degedege foe doe wan bepaalde stap, na apostel e taki moro fara: „Blesi foe na soema di no e tjari wan kroetoe kon tapoe hem, nanga san hem e feni boen” (Rom. 14:22). Te wan kristen soema nooiti handri kontra hem konsensi, a sa habi vreede na ati. Efoe a de degedege tapoe wan bepaalde doe, dan sondro drai drai a moe trowe ofoe libi hem. San wan soema ooktoe kan feni boen, hem konsensi a no moe doe ogri, winsi na sani de so moi ofoe winsi wan soema kan tjari so boen krakti argument kon na fesi. Efoe na a tra see a habi na prakseri dati na argument habi hem roetoe tapoe na bijbel en a kisi boen na overtoigi dati a joisti, dan a kan tjari hem konsensi kon fiti akroederi nanga dati. — Rom. 14:5.
15. (a) Fa wan soema e kroetoe hemsrefi efoe a go doro foe doe wan sani di ai degedege na tapoe efoe a de joisti? (b) Fa a kan meki na fasi foe hem konsensi kon moro boen? (Ef. 3:14-19; 1 Thess. 5:11)
15 „Ma efoe a de degedege, dan a kroetoe hemsrefi kaba, foedi a no de njan nanga bribi. Ja, Ala sani di no de nanga bribi, na sondoe” (Rom. 14:23). Na apostel e taki na sani disi nanga soema di e taki dati dem de kristen soema, a no de taki gi dem soema di no e bribi. Winsi san wan soema e doe, na no wan fasi a moe trobi hem konsensi. Efoe hem konsensi de trobi hem, dan a kroetoe hemsrefi. En alatem a moe feti foe habi wan krin prenki foe na kristen bribi, foe a kan kweki wan balans konsensi. Aladi a no ala sani di wan kristen e doe habi wantron wantron foe doe nanga na meki bekenti foe na „boen njoensoe”, a de doe san a moe doe nanga na bow foe hem eegi nanga trawan na prakseri, srefi tapoe na tori foe prisiri en ontspanning.
16. Te wan kristen soema wani „doe ala sani foe na glori foe Gado”, san a moe doe, bifo a doe wan stap?
16 Ala nanga ala na koni rai foe na apostel de: „Doe ala sani foe na glori foe Gado” (1 Kor. 10:31). Fosi joe doe wan bepaalde stap, foe datede joe moe aksi joesrefi: ’Disi sa meki na vreede foe na gemeente kon na fesi, sodati Gado jeje kan wroko fri ondro alamala?’ ’Mi fasi foe doe sa de so, dati a no sa tjari sjen kon tapoe na nem foe Gado nanga Kristus?’ ’Mi fasi foe doe ini na gemeente sa bow trawan ofoe broko dem saka?’ Na kristen soema di kan hori hem libi boen akroederi wan joisti, balans nanga krin konsensi na fesi foe Gado, de troe troe kolokoe. So wan kristen soema de wan blesi gi na gemeente.