Erken na boen bigi prenspari presi foe Kristus
„Mi ben kisi ala tranga ini hemel nanga grontapoe”. — Matteus 28:18.
1. Soortoe aksi wan soema di taki a de wan discipel foe Kristus ben kan aksi hem srefi? (Joh. 15:8-10).
JOE de wan discipel foe Masra Jezus Kristus? Joe de erken hem boen bigi prenspari presi ini Gado seti? Efoe dati de so, joe de sori ini joe ala dee libi waarderi gi na Manpikin foe Gado en san a ben doe foe joe ede?
NA MORO PRENSPARIWAN MINDRI DEM MEKISANI FOE GADO DI HABI VERSTAN
2, 3. (a) Na soortoe fasi Jezus Kristus de na „prenki foe na Gado di wi no kan si”? (Hebr. 1:3). (b) Fa Jehovah Gado ben gebroiki hem fosigebore Manpikin, en foe datede soortoe presi na Manpikin disi e teki na mindri ala mekisani di habi verstan? (Joh. 1:1-3).
2 Na apostel Paulus e jepi wi foe si o prenspari na positsi foe Jezus Kristus de. Ini hem brifi gi dem soema foe Kolosse, Paulus ben skrifi: „Hem de na prenki foe na Gado, disi soema ai no kan si; hem de da fosiwan, a ben de bifo ala sani, disi Gado ben meki. Bikasi nanga jepi foe hem Gado ben meki ala sani, disi de na ini hemel en na grontapoe, disi wi kan si nanga disi wi no kan si; dem troon srefi nanga dem granwan nanga heewan nanga trangawan, ala sani ben meki nanga jepi foe hem en foe hem ede. Hem ben de bifo ala sani en nanga jepi foe hem ala tra sani ben kon foe de.” — Kol. 1:15-17.
3 Akroederi nanga dem woortoe disi di santa jeje ben meki dem skrifi, dan na fosigebore Manpikin, na bigin foe dem mekisani foe Gado, de na moro prenspariwan mindri ala mekisani di habi verstan. Hem de na prenki foe hem hemel Tata ini na fasi disi, dati a de wan jeje soema, di tapoe wan volmaakti fasi de sori dem froewondroe Gado fasi leki lobi, koni, retidoe, sarihatti, boen-ati-fasi nanga pasensi (Ex. 34:6, 7; Ps. 33:5; Rom. 16:27; 1 Joh. 4:8). Nanga jepi foe hem, Jehovah ben meki kon de foeroe miljoen engel-manpikin, na bigi universum nanga hem foeroe miljard melkwegstelsels en na grontapoe nanga hem foeroe difrenti soortoe bon nanga meti. Boiti dati, „troon”, „granwan”, „heewan”, ofoe „trangawan” ben kon foe de nanga jepi foe na Manpikin. Soema na dem disi?
4. Foe sainde dem „troon”, „granwan”, „heewan” ofoe „trangawan” no kan de grontapoe rigeri positsi nanga wroko en san moe de na ini dem?
4 Dem no kan de grontapoe rigeri-positsi nanga wroko, bikasi na Bijbel de kari dem disi libisoema mekisani en no mekisani foe Gado (1 Petr. 2:13, 14). Foe datede, dem „troon”, „granwan”, „heewan” ofoe „trangawan” moesoe de ini dem soortoe tiri di Jehovah Gado de frantwoortoe foe dem nanga jepi foe hem Manpikin, nanga na koonoekondre foe Melchizedek nanga di foe koonoe David ini Jeruzalem na ini.
5. Leki fa Kolossensen 1:18 e taki, dan na ini soortoe fasi Jezus Kristus tanapoe nanga na gemeente? (b) Soortoe krakti na fasi disi moe habi tapoe memre foe na gemeente? (Matt. 23:8-10).
5 Foe na presi di Jezus Kristus e teki ini na gemeente, na apostel Paulus e taki: „Hem de na ede foe na skin, na gemeente.” (Kol. 1:18). Foe datede na gemeente nanga reti e loekoe na hem en no na wan enkri tra libisoema leki na moro prenspariwan, na ede.
6. (a) San pasa efoe kristen soema e bigin foe feni soema ini na gemeente toemsi prenspari? (Mark. 9:33, 34). (b) Fa wi kan si disi ini san pasa ini na gemeente Korinte?
6 Efoe wan soema no erken na sani disi, dan disi e tjari prati fasi kon. Disi wi kan si boen ini san ben pasa ini owroetem Korinte. Na apostel Paulus ben moesoe skrifi gi dem brada drape: „Bikasi, oen brada foe mi, dem soema foe Kloë oso ben meki mi kon sabi taki, stree-fasi de na oen mindri. Mi meene disi, ibriwan foe oen de taki: Mi de foe Paulus, mi foe Apollo, mi na foe Kefas en mi de foe Kristus. Kristus prati ini pisi?” (1 Kor. 1:11-13). Foe di dem memre foe na gemeente foe Korinte ben poti toemsi foeroe prakseri tapoe libisoema, dem ben kon prati ini groepoe. Dem no ben waarderi, dati man di e teki fesi na mindri kristen soema de soso knegti foe Gado nanga Kristus, srafoe foe na boen foe dem brada ede. — 1 Kor. 3:5-9.
7. (a) Paulus, Apollo ofoe Petrus ben de frantwoortoe foe na verkeerti prakseri di ben de ini na gemeente Korinte? (b) Fa owroeman kan de leki na apostel Paulus, en foe datede foe san dem moe kibri dem srefi?
7 Kolokoe, dati Paulus, Apollo nanga Kefas ofoe Petrus no ben de frantwoortoe foe na situatie di ben gro kon ini na gemeente Korinte. Dem alamala ben gi na eksempel foe loekoe na Jezus Kristus leki na ede. Na apostel Paulus foe eksempel ben man foe taki: „Waka na mi baka soleki mi de waka na Kristus baka.” (1 Kor. 11:1). En owroeman ini na tem disi sa ben wani de seker leki Paulus. Disi de aksi foe dem foe dem taki akroederi nanga makandra (1 Kor. 1:10). Te owroeman na publiki de taki foe prakseri foe dem di no de agri nanga makandra, dan dem memre foe na gemeente sa habi na firi foe loekoe na dem owroeman di dem prakseri de agri moro nanga dem prakseri. Na situatie de kon spesroetoe moro ernstig efoe wan owroeman de broko saka hem kompe-owroeman, kande foedi ai meki kon na fesi dati hem de moro faja en moro getrouw leki dem ofoe ai si sani moro boen en ai verstan en firi trawan moro boen (Loekoe 2 Sam. 15:2-6). Disi kan habi leki bakapisi dati ai meki soema waka na hem baka ini na gemeente en ai broko saka dem moeiti foe na skin foe owroeman foe sorgoe foe dem jeje afersi foe na ipi.
8. Fa na gemeente e njan boen te owroeman e gi wan eksempel ini na saka foe demsrefi na ondro na Kristus leki edeman? (Ef. 4:11-16)
8 Na a tra see, te owroeman e proberi foe taki nanga doe sani nanga wanfasi, meki na bijbel tjari dem troe troe ini dem bosroiti, dan wanfasi sa de ini na gemeente. Na heri gemeente sa kisi tranga foe no loekoe na libisoema, ma foe loekoe na Kristus leki na ede foe na gemeente.
9. Boiti dati Jezus Kristus de na ede foe na gemeente, soortoe tra reden Kolossensen 1:18 e gi foe na prenspari fasi foe na Manpikin foe Gado, en san disi wani taki gi wi?
9 Te ai go moro fara nanga na takimakandra foe hem foe na boen bigi prenspari presi foe Jezus Kristus, na apostel Paulus e tjari ete wan reden kon foe na prensparifasi foe na Manpikin foe Gado. Wi e leesi: „Hem de na bigin, na fosigeborewan na mindri foe dem dedewan, foe na alafasi hem moesoe de na fosiwan” (Kol. 1:18). No wan soema bifo Jezus Kristus ben opobaka na dede foe kisi libi na hemel sondro foe dede moro. Bikasi hem ben de na fosiwan foe ondrofeni wan opobaka foe na moro hee libi, hem de na „fosigeborewan na mindri dem dedewan.” A ben sreka na pasi gi hem mede-erfgenaam foe teki prati nanga hem ini wan hemel goedoe te dem sa opobaka leki hem foe kisi libi pe dem no sa dede moro (Hebr. 6:19, 20; Openb. 20:6). Foe wan soema teki prati ini na opobaka dati, a moe erken na Jezus Kristus leki edeman foe na gemeente. Troe troe, ibriwan soema di wani kisi gado blesi moe doe so. — Fil. 2:9-11.
„ALA GLORI DE LIBI INI HEM”
10. Fa „Gado ben plisi dati ala glori ben libi ini na Manpikin”?
10 Ma na erken foe Kristus leki edeman, no de wawan wan afersi foe erken na prenspari presi foe hem ini na gemeente. Loekoe dati na apostel Paulus de go moro fara foe taki: „Bikasi so da Tata ben plisi, foe na hem ini ala glori e libi” (Kol. 1:19). Foe di a ben plisiri Gado, meki Jezus Kristus ben kisi na fosi presi ini na gemeente, no wawan foe habi prensparifasi nanga tranga, ma ooktoe foe habi „glori” foe ala sani di kristen soema habi fanoodoe. Ini na Manpikin foe Gado de libi dem Gado fasi, nanga koni toe. Foe datede hem, en no wan enkri libisoema na grontapoe, de na wan di troe kristen soema de loekoe leki dem eksempel en na bron di moe tiri dem en gi dem leri.
11. Foe di ala „glori” e libi ini Kristus, san wi kan taki foe na fanoodoe foe libisoema filosofie nanga gwenti?
11 Na volmaakti eksempel nanga leri foe Jezus Kristus no habi fanoodoe foe a kon moro boen nanga libisoema filosofie nanga gwenti. Ini hem brifi di a skrifi gi dem Kolossensen, Paulus e go moro fara nanga a pisi tori disi, di a ben skrifi: „Loekoe boen, foe no wan soema no foeroe oen ati nanga na kondrekoni (filosofie) en nanga sani, disi libisoema ben poti, soleki fa da fosi biginfasi foe kondre ben de, en no leki fa na fasi foe Kristus de. Bikasi na hem ini na heri glori foe na Gadofasi de libi leki na ini wan skin. Oen srefi toe habi ala sani nofo na hem ini; bikasi hem de na ede foe ala dem heewan nanga trangawan.” — Kol. 2:8-10.
12. (a) San na dem „fosi biginfasi foe grontapoe”? (b) Foe sainde Paulus ben kan sori tapoe redenatie nanga leri di e pori soema bribi leki „soso korifasi”?
12 Ini na fosi eeuw dati, kristen soema ben de ini gevaar foe dem „fosi biginfasi foe kondre”, dati na dem fosi ofoe gronprakseri foe na grontapoe, di ben poeroe hemsrefi na Gado see, ben tjari dem gwe. Ini dem fosi biginfasi disi ben de toe dem leri foe dem Griki nanga tra pipel di no ben de djoe, so toe dem leri foe dem djoe en gwenti di no ben de ini bijbel. Te joe ben loekoe hem fra-fra, dan son wan foe dem filosofie nanga leri ben gersi leki joe ben kan teki dem. Kande dem ben de nanga redenatie nanga bewijsi di ben taki nanga na verstan foe libisoema. Ma dem ben mankeri wan boen fundamenti. Dem leri disi sondro gron — ofoe dem ben de kerkileri ofoe fa libisoema moe tjari demsrefi ofoe fa sani moe doe ini na gemeente — ben de troe troe „soso korifasi”. Soboen, wan boen reden ben de gi kristen soema foe de nanga ai foe falsi leriman no ben kisi ofoe drai dem poeroe foe na pasi foe waarheid. — Loekoe 1 Joh. 2:26, 27.
13. Akroederi nanga Kolossensen 2:16-19, soortoe falsi leri son soema ben meki panja, en foe sainde dem leri disi ben de gevaarliki?
13 Te ai taki ete foe tra verkeerti prakseri di ben na a tem dati, Paulus e go moro fara foe taki: „We now, meki no wan soema verdoem oen moro foe njanjan ofoe dringi ede, ofoe foe dem feestidee ofoe njoenmoen ofoe foe Sabadee ede; bikasi dati ben de na prenki nomo foe da sani, disi ben de foe kon ete; ma na skin srefi dati na Kristus. No meki wan soema kori oen, teki poeroe oen kroon, ala di a de sori sakafasi, di a respeki en dini engel, di a bemoei nanga sani, disi hem ben si, di a de meki hemsrefi bigi foe soso, prodo nanga hem libisoema verstan. En a no hori hemsrefi na a ede, disi de hori en fasi na heri skin nanga dem skroefoe en titee, disi de fiti en fasi makandra, meki a gro, tee a kon gersi Gado srefi.” — Kol. 2:16-19.
14. (a) Fa wan kristen soema ben kan meki dem kroetoe hem verkeerti tapoe njanjan en dringi ofoe na hori foe bepaalde dee? (b) Foe sainde dem wan di ben kroetoe dem kroetoe disi ben e verdwaal?
14 Kristen soema na Kolosse ben kisi tranga foe no gi pasi na trawan foe kroetoe dem bribi nanga retidoe, taki dati dem no kan kisi jepi solanga dem no besnij en waka baka dem wet foe Mozes. Soema di ben kroetoe na a fasi disi ben go baka na dem „fosi biginfasi”, na ABC foe troe aanbegi, taki dati Gado no de meki sani gro moro fara, en a no e teki na „glori” di e libi ini Kristus. Foe datede, dem soema dati no ben de hori demsrefi na a ede, Kristus en dem ben hari soema poeroe foe dem gosontoe leri di ben de fanoodoe foe dem gro na jeje fasi.
15. San dem kristen soema ini Kolosse ben kan lasi te dem ben teki dem bewijsi foe falsi leriman?
15 Te dem kristen foe Kolosse ben gi demsrefi abra na dem overtoigi redenatie foe wan soema di e meki falsi leri kon na fesi, ben kan meki a lasi na „prijs” di ben poti na hem fesi. En san ben de na prijs disi? A ben de na glori paiman foe hemel libi sondro foe kan dede moro. — 1 Kor. 9:24-27; Fil. 3:14; 2 Tim. 4:7, 8; Openb. 2:7.
16. Akroederi nanga dem woortoe foe Paulus ini Kolossensen 1:18, fa wan leriman di e verdwaal ben kan sori hemsrefi?
16 Leki fa na apostel Paulus ben sori, dan wan man di ben sa meki wan kristen lasi na prijs foe libi, ben kan gersi leki a de onschuldig ini na tori foe doe ogri. Na apostel e skrifi foe hem leki wan soema di „a de sori sakafasi” (Kol. 2:18). Soboen, te joe ben sa loekoe hem na ala see, dan a ben de wan man foe bigi sakafasi. Ma na bigi sakafasi disi, ben de soso wan falsi skijn.
17. (a) San na apostel Paulus e meene te ai skrifi foe wan falsi leriman, di e „bemoei nanga dem sani di a ben si”? (b) Fa so wan falsi leriman e meki hem srefi bigi foe soso nanga hem libisoema verstan?
17 San a de troe troe de krin te Paulus e sori na so wan soema, „di e bemoei nanga sani, disi hem ben si, en di hem meki hemsrefi bigi foe soso, prodo nanga hem libisoema verstan” (Kol. 2:12,). San na apostel e meene, te a de taki disi foe wan leriman foe falsi leri? Dem woortoe „bemoei nanga sani” ben gebroiki ini owroetem ini na tori foe initiatie-riten foe heiden mysteries. Foe di a no de tevreede nanga na volledige nanga eenvoudig waarheid di Jezus Kristus ben tjari kon na krin, a ben meki bigi, dati a ben kisi koni nanga santafasi di ben moro hee leki na koni nanga santafasi di hem kristen brada ben habi. Foe di a de proberi foe meki kristen waarheid kon moro boen nanga falsi, speculatieve redenering, a de drifi komoto foe na bribi. Leki fa hem de prakseri, dan na Manpikin foe Gado no ben kan de na wan enkri maksien foe sabi nanga koni. So wan soema no e poti bribi ini dem woortoe di santa jeje meki dem skrifi: „Kibri boen ini hem (Kristus) de ala goedoe foe koni nanga sabi” (Kol. 2:3). Nanga krakti a de taki dati doro-see foe Gado Manpikin maksien foe sabi nanga koni ben de, pe na gemeente ben kan go foe kisi tiri.
NA POSITSI FOE WAN KRISTEN INI DISI TEM
18. Foe soortoe sani ala kristen en spesroetoe owroeman, moe loekoe boen tapoe na tori foe prakseri nanga filosofie di no tanapoe ini bijbel?
18 Ini disi tem dem knegti foe Gado no tanapoe fesi dem srefi situatie di ben de ini na fosi eeuw. Ma ete wi kan leri toemsi prenspari sani ini san Paulus ben skrifi gi dem soema foe Kolosse. Na so ala kristen soema en spesroetoe dem owroeman, moe loekoe boen, dati dem no bemoei nanga dem eegi afersi foe trawan en no poti eegi prakseri nanga filosofie di no de ini bijbel gelijk nanga na waarheid, di e kon na krin ini dem leri nanga eksempel foe Jezus Kristus. — Loekoe 1 Tim. 1:3, 4; 2 Tim. 4:1, 2.
19. (a) San moe de alatem na fundamenti foe jeje rai en foe sainde? (b) San wan kristen ben sa taki a no de teki efoe a no ben tan hori hemsrefi na san bijbel taki, ma ben gi trawan tranga foe teki hem eegi filosofie leki wan tjariman?
19 Winsi soortoe jeje rai wan kristen kan gi trawan, a no sa habi leki fundamenti san hem lobi, vooroordeel nanga grontapoe gronprakseri, ma na eksempel nanga leri foe Jezus Kristus. Foedi ala sani di na Manpikin foe Gado ben leri e akroederi doro doro nanga na bijbel, na heri bijbel nanga reti moe kan gebroiki foe gi jeje jepi. (2 Tim. 3:16, 17). Te wan soema no de hori hemsrefi na a bijbel, dan a de kon de so, dati a no de sori respeki gi na Edeman foe na gemeente (Loekoe Matteus 7:24-27; 15:3-9; Joh. 17:17). Dan a ben sa wani taki toe, dati „ala glori” no de libi ini na Kristus, ma dati san Kristus mankeri moe kon meki boen nanga eegi prakseri nanga libisoema filosofie.
20. Fa a de kon na krin ini Hebreer 5:14 dati a de gevaarlijk foe meki dem eegi prakseri foe trawan de wi tjariman?
20 Fa a de nanga kristen soema di e teki dem filosofie nanga eegi prakseri foe trawan leki wan tjariman foe bepaal na joisti fasi foe wan bepaalde fasi foe doe? Foeroe kans de dati dem doe dem konsensi ogri en dem tapoe na gro foe dem na jeje fasi. Foe sainde? Foedi na bijbel e sori dati „nanga gebroiki (joe de) oefen joe waarnemengsvermogen (na koni foe si sani boen)”. Te trawan habi toemsi foeroe krakti tapoe dem bosroiti foe wan soema ofoe habi disi ondro hem makti, dan na soema disi no sa gro na jeje fasi, ma sa tan wan baby, di no man foe si san na boen en san na ogri. — Hebr. 5:14.
21. Fa, te wan soema wani proberi foe fiti hemsrefi na dem eegi prakseri foe trawan, dati ben kan gi konsensi-fonfon foe sani di, te joe loekoe hem boen, de joisti?
21 Boiti dati, son soema di e teki tem gi eegi afersi, gosontoe prisiri, ontspanning, nanga dem soortoe sani dati, ben kan kisi foe soso konsens-fonfon, foedi dem de proberi foe fiti demsrefi na soso na prakseri foe wan tra kristen soema di no tanapoe ini bijbel. So wan memre foe na gemeente di dem habi respeki gi hem foe eksempel ben kan taki na publiki, dati dem „laatste dee” no de srefi srefi na tem gi dem knegti foe Gado foe tjari prenspari kenki kon na ofoe ini na oso. Aladi foeroe brada sa verstan dati disi de wan eegi prakseri en dem no sa meki a habi krakti tapoe dem, tokoe son wan ben kan firi leki dem meki wan fowtoe nanga dem plan foe dem. Dem wan di ben meki dem eegi prakseri foe wan tra soema habi toemsi krakti tapoe dem, kan kisi bakatem problema nanga ferferi firi di dem no ben hafoe kisi efoe dem ben go doro nanga dem redelijke plan foe dem. Ooktoe tapoe tra pisi foe na libi a de so toe dati alatem te na fasi fa onvolmaakti soema de si sani de teki na presi foe Gado Woortoe leki wan tjariman, bigi problema kan kon foe dati. Ma wi de alatem veilig te wi de teki bosroiti, di habi na eksempel nanga dem leri foe na volmaakti Manpikin Foe Gado leki fundamenti.
SAKA JOESREFI ONDRO KRISTUS LEKI EDEMAN
22. (a) Te wi loekoe na hee positsi foe Jezus Kristus, dan fa wi moe si dem komando foe hem? (b) San wi ben sa kan aksi wi srefi foe dem komando foe Jezus Kristus ini Matt. 28:19, 20; Lukas 21:34-36; Lukas 22:19, 20 nanga Johannes 13:34, 35?
22 Te wi loekoe na hee presi di Jesus Kristus e teki, dan wi moe teki troe troe ernstig en nanga wi heri sili hem komando. Joe de doe moeiti foe habi wan troe troe pisi ini na gi foe kotoigi nanga na meki foe discipel? (Matt. 28:19, 20). Joe de tan na ai na jeje fasi, en joe no de gi pasi dati joe ati kon hebi nanga dem aladee sorgoe foe na libi ofoe nanga njan en dringi pasa marki? (Luk. 21:34-36). Na de makandra foe joe nanga trawan e sori dati joe habi na lobi foe gi joesrefi abra leki wan ofrandi, wan lobi di de leki wan marki foe troe discipel foe Jezus Kristus? (Joh. 13:34, 35) Te gehoorzaam joe e konmakandra nanga kompe-bribiwan foe hori na Avondmaal foe Masra, joe de prakseri ernstig foe dem winimarki, di na ofrandi foe Jezus tjari gi joe? (Luk. 22:19, 20; 1 Kor. 11:23-32) Disi de gi joe krakti foe loekoe boen fa joe e waka en libi, foe joe kan hori na krin positsi, di e kon foe di joe ben teki nanga bribi verzoen winimarki foe na broedoe foe Jezus di ben trowe? — 1 Petr. 1:14-19.
23. Fa wi ben kon verzoen nanga Gado en san wi moe doe foe datede?
23 Wi no moe frigiti nooiti dati solanga verzoening no ben doe foe wi sondoe, wi ben de leki wan vreemde soema gi Gado. Ma nanga na broedoe foe Jezus, di ben trowe na gron na wan pina-oedoe, wi kon de verzoen nanga na Moro Almakti Wan en wi de now ini vreede nanga hem (Kol. 1:20). Ma ete wi moe doe moeiti foe tan ini wan kondisi sondro vlaka na fesi foe Jehovah Gado, baka di wi ben kon krin foe sondoe na a bigin, foedi wi ben teki na ofrandi di Jezus Kristus ben tjari foe wi ede. Ini hem brifi gi dem soema foe Kolosse na apostel Paulus foe eksempel e sori krin san Gado de aksi foe wan kristen ini na fasi fa a moe waka nanga libi.
HORI VERKEERTI LOSTOE ONDRO DWENGI
24. (a) Fa wan soema ben gebroiki kande dem leden foe hem skin nanga hem mofo bifo a ben tron wan doopoe discipel? (b) San a moe doe now (. . .)?
24 Paulus foe eksempel e skrifi: „We, kiri dan dem leden foe oen, disi de foe grontapoe, da foe taki: da hoeroelibi nanga takroedoe nanga sjemhangri nanga ogri lostoe nanga da gridi fasi, disi de net so boen leki afkodree” (Kol. 3:5). Bifo wan soema ben tron wan doopoe discipel foe Jezus Kristus, a ben kan gebroiki kande dem leden foe hem skin tapoe wan fasi di ben de tegen na prakseri foe Gado. Na apostel e taki srefi: „Oen srefi toe ben waka na ini dem srefi sani fositem, di oen ben libi na ini sosani. Ma now oen moesoe poeroe ala dem sani disi toe, da foe taki: da bitafasi nanga hattibronfasi nanga ogrihatti nanga koskosi nanga ala sjem taktaki, disi de komoto na ini oen mofo. No lee gi makandra.” (Kol. 3:7-9). Ja, verkeerti gebroiki foe dem leden foe na skin nanga na taki nanga mofo, no de fiti wan soema, di e teki wan krin positsi na fesi foe Gado. A moe kiri verkeerti skin lostoe en a no mag gi pasi foe dem tjari dem leden foe hem skin foe doe sondoe. A moe waka baka na eksempel foe na apostel Paulus, di ben taki foe hem srefi: „Mi de dwengi mi skin, en mi e tjari hem leki wan srafoe, meki ala di mi de preeki gi trawan, mi srefi no moe de wan soema, disi Masra moesoe teki trowe”. — 1 Kor. 9:27.
25. (a) Foe sainde gridifasi de afkodree? (b) Te wi e erken disi, fa disi sa jepi wi foe de basi foe verkeerti skin lostoe?
25 Wan sani di kan jepi wi foe de basi tapoe dem verkeerti lostoe de foe erken na ernst foe gridifasi — wan toemsi bigi lostoe foe sani di wi no habi reti na tapoe. Soleki Paulus ben taki, dan gridifasi de afkodree. Disi de so foe di na sani di wan soema de lostoe foe kisi de bigin foe kisi wan toemsi prenspari presi ini hem libi. A de tron wan afkodree-gado gi hem en disi de tapoe hem foe dini Jehovah Gado wawan. A de tapoe hem toe foe lobi Gado nanga hem heri ati foedi na gridi lostoe foe hem e meki a poti Gado wet na wan see. Na bijbel de sori dati wi de sori wi lobi gi Jehovah te wi de loyaal gehoorzaam na dem komando foe hem (1 Joh. 5:2, 3). Te wan kristen foe datede e verstan dati wan verkeerti lostoe e bigin foe gro ini hem ati, a de doe boen foe tjari kon na prakseri o diri na matifasi foe hem nanga Jehovah de en fa a de wan law sani foe lasi disi foe meki hemsrefi de wan afkodree-man.
HANDRI POSITIEF NANGA KOMPE BRIBIMAN
26. (a) Wi moe hori wisrefi farawe foe verkeerti fasi foe libi wawan, te wi wani hori wisrefi sondro vlaka fesi Jehovah Gado? (b) Fa disi de kon na krin ini Kolossensen 3:12, 13?
26 Foe hori joesrefi sondro vlaka na fesi foe Jehovah Gado, habi moro na ini dan leki no gi joesrefi abra na verkeerti fasi foe libi nanga takroe taktaki. A de aksi foe joe ooktoe wan positief sani. Na apostel Paulus e gi dem brada foe hem ini Kolosse na tranga disi: „Teki en weri na reti sarihattifasi nanga boenhattifasi nanga sakafasi nanga safrihattifasi nanga pasensi. En verdrage makandra, gi makandra pardon, efoe wan soema feni taki, wan trawan fowtoe hem, soleki Jehovah gi oenoe pardon, so srefi oenoe moesoe doe toe.” — Kol. 3:12, 13.
27. Foe sainde wi moe handri nanga kompe-kristen tapoe wan bradafasi en sori dem sarihattifasi?
27 Loekoe pikinso san Paulus e taki djaso. Leki kristen wi ben kon krin nanga na broedoe foe Kristus Jezus en wi tron jeje brada nanga sisa foe makandra. Wi moe handri nanga makandra tapoe wan brada fasi. Foedi wi de onvolmaakti, foeroe tron wi e misi foe sori dem troe troe boen eegifasi foe wi hemel Tata nanga foe hem Manpikin. Foe datede wi no moe de toemsi tranga gi kompe bribiman, foe handri nanga dem sondro ati. A ben sa de fowtoe te wan kristen ben poti hemsrefi leki wan kroetoeman foe hem brada en tapoe wan heememre fasi gebroiki hem zogenaamde reti foe strafoe dem foe dem fowtoe. Nono, a moe de klari foe verdrage dem fowtoe en no drai foe sori gi dem sarihattifasi, switifasi, sakafasi, safrifasi nanga pasensi. A kan de dati wan troe troe kragi foe wan brada kon. A de doe boen foe aksi aksi hem srefi: Na fowtoe foe mi brada de so ernstig dati mi no kan gi hem pardon? Te na soema di habi na kragi loekoe hem eegi fowtoe, a sa wani moro foeroe foe gi pardon, soleki Jehovah de gi hem pardon. — Matt. 18:21-35.
28. (a) San de na „vreede foe Kristus”? (b) Te na „vreede” disi e tiri wi ati, soortoe krakti disi habi dan tapoe wi matifasi nanga kompe bribiman?
28 Ma san joe moe doe efoe dem fowtoe foe trawan de trobi joe ati? Fa wi kan gi wi ati korostoe? Na apostel Paulus e gi wi na rai disi: „Meki na vreede foe Kristus ooktoe tiri joe ati” (Kol. 3:15). Na „vreede” disi wani taki rostoe, di wi de kisi te wi tron discipel foe na Manpikin foe Gado. Na vreede disi e kon foe di wi sabi dati Jehovah Gado nanga hem Manpikin lobi wi en e feni wi boen. Te na vreede disi e tiri wi ati, wi sa doe ala wi moeiti foe taki en handri tapoe so wan fasi dati na vreede disi e tan. Wi sa kibri wi diri matifasi nanga Jehovah Gado nanga hem Manpikin foe handri kompe bribiman tapoe wan switi en lobi fasi. Disi de meki na vreede ini na gemeente go na fesi en disi sa tapoe wi foe lasi wi pasensi en sondoe tegen wi brada. — Ef. 4:26, 27.
29. Soortoe boen sa kon te wi poti prakseri tapoe na rai: „En taki tangi foe dati”?
29 Moro fara na apostel Paulus e gi wi rai: „En taki tangi foe dati.” Ja, wan geest foe tangi e meki na vreede di wi habi leki kristen tan. Soema di de erken troe troe na boen-ati foe Gado di wi no verdini di a sori gi wi nanga wi kompe bribiman, de kolokoe nanga tevreede. Foedi dem de waarderi foeroe san Jehovah Gado nanga Jezus Kristus ben doe foe meki a kan foe kon krin foe sondoe, nanga teego libi na dem fesi, dem no de naki foetoe esesi te trawan misi, ma dem e gi pardon fri nanga dem heri ati. Fa a de tra fasi nanga soema di no sabi tangi! Foeroe tron dem e kragi, dem no de tevreede nooiti en dem de toemsi ongolokoe. Na gridifasi foe dem pe dem no de sori lobi no de gi dem wan dekati di e leri sabi dem, en disi de meki trobi nanga feti kon. Wi e doe boen foe meki wan geest foe tangi gro.
30. San a wani taki „Na Woortoe foe Kristus moe libi foeroe ini joe nanga ala koni”?
30 Baka di Paulus gi kristen soema dekati foe sori tangi, a de skrifi: „Na woortoe foe Kristus moe libi foeroe ini joe ini ala koni” (Kol. 3:16). San disi wani taki? „Na woortoe foe Kristus”, ofoe na boskopoe foe Kristus, na heri goedoe foe na kristen-leri, moe tron wan pisi foe wi (Willibrordervertaling; Het Nieuwe Testament in de omgangstaal). A moe de so, leki ala sani san Jezus Kristus ben leri go libi ini wi. Te disi wani de so, dan wi moe meki na boskopoe foe na kristen leri teki wi krin krin abra en wi moe go mediteer na tapoe. Te na „woortoe foe na Kristus” troe troe ini ala hem goedoe tron troe troe wan pisi foe wi, dan a sa de leki wan tjariman gi wi en a sa jepi wi foe sani waka boen. Na woortoe disi sa gi wi tranga foe handri verstanfasi. Te na „woortoe foe Kristus” foeroe wi, dan wi sa gi wi brada dekati en bow dem op.
WI HERI LIBI DE INI NA TORI
31. San wi moe doe nanga ala pisi foe wi libi volgens Kol. 3:17?
31 Den sani di e meki wi hori vreede nanga kompe bribiman, de prenspari ooktoe ini ala tra pisi foe na libi foe feni prisiri nanga tevreedefasi. Nooiti wi moe lasi na prakseri, dati ibri dee, ja, ibri joeroe wi de wan discipel foe Jezus Kristus. Na apostel Paulus e skrifi: „San joe e doe ooktoe, doe ala sani ini na nem foe Masra Jezus Kristus, taki Gado, na Tata, tangi nanga jepi foe hem” (Kol. 3:17). Ini ala afersi foe na libi soboen ini na nem foe na Manpikin foe Gado, dati wani taki, leki soema di e teki hem presi, wi moe taki en handri, aladi wi moe de Jehovah Gado tangi dati a ben gi wi na makti foe taki en wroko.
32. (a) Na tapoe soortoe rai man nanga wefi, papa nanga pikin moe poti prakseri efoe dem wani sori joisti respeki gi Kristus? (b) Fa kristen wrokoman moe doe dem wroko en foe sainde? (c) Fa kristen basi moe handri (. . .)?
32 A moe de troe troe so, dati respeki gi Jezus Kristus leki Masra, soboen moe meki kristen de troe troe boen man, nanga papa, boen wefi nanga mama, manpikin nanga oemapikin di e gi jesi nanga boen wrokoman nanga basi. Dati wi osolibi nanga wi grontapoe wrokope moe kan kotoigi dati wi de kristen, e kon na krin ini na rai foe Paulus: „Oen oema, saka na oen man ondro, soleki a fiti na ini Masra. Oen man, lobi oen wefi; oen no moe sori wan bitafasi gi dem. Oen pikin, saka na ondro oen tata nanga mama na alafasi; bikasi dati de switi na Masra. Oen tata no strafoe oen pikin toemsi foe dem no lasi ati. Oen srafoe (ini na tem disi wrokoman), arki dem masra foe oen skin na alafasi (ini na tem disi basi), no dini dem na dem ai nomo, leki taki, oen de soekoe boen nem na libisoema, ma nanga opregti ati en nanga frede foe Gado. En ala sani disi oen de doe, oen moe doe nanga oen heri sili leki gi Jehovah srefi en no leki gi libisoema. Bikasi oen sabi taki, na Jehovah srefi oen sa kisi da paiman, da erfenis, bikasi da Masra Kristus oen moe dini leki srafoe. Ma da soema disi doe kroektoe hem sa kisi paiman foe da kroektoe disi a ben doe. Gado no de loekoe na soema persoon. Oen masra (ini disi tem basi), oen moesoe gi dem srafoe foe oenoe (ini disi tem dem wrokoman), san disi de reti en disi de fiti, en oen moe sabi taki, oen srefi habi wan Masra ooktoe na ini hemel.” — Kol. 3:18-4:1.
33. (a) Na erken foe na rol foe soema moe de krin foe si ini na libi foe kristen soema, en fa na erkenning disi de kon na fesi? (b) Soortoe vertrouw wi kan habi efoe wi de hori dem komando foe Jezus Kristus?
33 Soboen, efoe wi de taki dati wi de discipel foe Kristus, dan ini wi libi moe kon na krin dati wi de erken na bigi prenspari rol foe hem ini na prakseri foe Gado. Disi wani taki dati wi moe gehoorzaam dem komando foe hem en wi moe loekoe na dem leri foe hem nanga hem eksempel foe tiri wi. Efoe wi doe disi, dan wi kan de seker foe na lobi foe hem en di foe hem Tata. Jezus srefi ben taki: „Efoe joe de hori mi komando, joe sa tan ini mi lobi, soleki mi de hori dem komando foe na Tata en mi tan ini hem lobi.” (Joh. 15:10). Leki soema di Jehovah Gado nanga Jezus Kristus de lobi en e feni boen, wi kan habi vertrouw, dati wi sa kisi na paiman foe teego libi. — 1 Joh. 2:25.