Waktitoren LIBRARY TAPU INTERNET
Waktitoren
LIBRARY TAPU INTERNET
Sranantongo
  • BIJBEL
  • BUKU
  • KONMAKANDRA
  • w78 1/11 blz. 5-10
  • Kweki na geest foe offer joesrefi

Felem no de na a pisi disi.

Sorry, wan sani no go bun di wi pruberi fu drai a felem.

  • Kweki na geest foe offer joesrefi
  • A Waktitoren—A e taki fu Yehovah Kownukondre 1978
  • Edeprakseri
  • A srefi sortu tori
  • OFRANDI TAPOE DEM KONTREN FOE WI TEM
  • ONDROSOEKOE JOESREFI
  • Joe lobi prisiri ofoe joe lobi foe gi joesrefi?
    A Waktitoren—A e taki fu Yehovah Kownukondre 1978
  • Meki den Kownoekondre-afersi go na fesi nanga wan geest foe offer joe srefi
    Wi Kownukondre diniwroko 1985
  • Yu de klariklari fu du ala san yu man gi a Kownukondre?
    A Waktitoren—A e taki fu Yehovah Kownukondre 2013
  • Wi musu tyari ofrandi di e plisi Gado
    A Waktitoren—A e taki fu Yehovah Kownukondre 2007
Moro sani
A Waktitoren—A e taki fu Yehovah Kownukondre 1978
w78 1/11 blz. 5-10

Kweki na geest foe offer joesrefi

„Mi e begi joe tranga, brada, na dem sari-ati foe Gado, foe pristeri joe skin leki wan slagti-ofrandi di de na libi, santa en di switi na Gado, wan santa diniwroko nanga joe verstan.” — Rom. 12:1.

1. Foe sainde Jehovah de waarti foe dem ofrandi di wi e tjari gi hem?

EFOE libisoema wani de klari foe tjari offer, dan na sani di dem e tjari na offer gi, moe de waarti foe kisi hem en sma moe habi bigi respeki gi hem. Jehovah Gado na ala fasi de waarti dati wi tjari offer gi hem. Hem de na Mekiman foe na bigi en moi universum en na bron foe ala sani di e libi. Hem de toe na Mekiman foe wan njoen seti foe retidoe, pe ala problema foe na libisoema-famiri sa loesoe. Nanga reti na bijbel e taki: „Joe, Jehovah, ja wi Gado, de waarti foe kisi na glori nanga na grani nanga na krakti, bikasi joe ben meki ala sani, en foedi joe ben wani meki dem ben de en dem ben meki” (Openb. 4:11). Foedi Jehovah de so waarti wi de kisi tranga foe „pristeri wi skin leki wan libi slagti-ofrandi gi hem”. — Rom. 12:1.

2. San na woortoe „offer joesrefi” wani taki? (Leesi Hebr. 13:15, 16)

2 San de alamala ini na tori foe offer wisrefi gi Jehovah ofoe foe de wan libi slagti-ofrandi gi Jehovah? Wan definitie foe na woortoe „offer joesrefi” de „Libi wan diri sani ofoe wan sani di ala sma wani en gi dati na wan sani di joe e si moro prenspari”. Ete wan betekenis foe „offer joesrefi” de, „Gi joesrefi ofoe joe libi na wan gado”. Foedi Jehovah no e aksi foe oenoe dati dem kiri wi letterlijk tapoe wan altari leki wan slagti-ofrandi, wi de offer wisrefi ini na diniwroko foe hem. Di na apostel Petrus ben taki foe na kon foe na pori foe na seti disi, a ben gi tranga dati kristen soema moe de soema di „santafasi foe libi nanga doe foe gadolibi” e meki dem tra fasi (2 Petr. 3:11). Soboen, positieve doe de ini wan slagti-ofrandi di Gado e teki, aladi wan soema moe libi sani toe, di Gado no e feni boen ofoe di sa kan tapoe pikinso a diniwroko foe hem.

3. Jehovah e feni ala ofrandi boen di soema e tjari ini aanbegi?

3 A de so dati Gado e aksi foe wan soema di e libi wan libi foe offer hemsrefi, dati dem de fanatici, di e doe onredelijk sani? Son soema foe eksempel e kroipi tapoe broedoe kiendi langa pasi go na kerki santapresi, nanga na prakseri dati dem ofrandi disi e prisiri Gado. Trawan e teki na bosroiti kande foe libi wan libi foe pina ofoe foe wan begiman. Son wan e weegri foe njan bepaalde soortoe njanjan leki wan pisi foe na dini foe dem. Ma Jehovah Gado no wani foe hem dienstknegti dati foe espresi dem e poti pina tapoe demsrefi. Hem no de prisiri nanga wet di libisoema ben meki, di „habi wan skijn foe koni ini wan fasi foe aanbegi nanga agersi sakafasi, di a ben gi hemsrefi, wan tranga behandeling foe na skin.” — Kol. 2:23.

4. San a wani taki ini disi tem foe offer wisrefi gi dem afersi foe Jehovah?

4 Na redelijk soortoe foe offer wisrefi di Jehovah wani foe wi, wani taki dati wi moe tapoe wi eegi lostoe pikinso foe kan dini hem afersi. Dem afersi dati bow lontoe Gado rigeri foe grontapoe di e kon, hem hemel koonoekondre ini na anoe foe Kristus. Foedi na rigeri dati djonsro sa de na wan enkri makti tapoe grontapoe, dan ala soema, di wani libi ondro hem retidoe tiri, moe leri sabi hem wet, nanga gronprakseri nanga prakseri. Dem moe meki ooktoe dem afersi foe na rigeri disi go na fesi nanga na preeki ini disi tem foe „na boen njoensoe disi foe na Koonoekondre” ondro na libisoema-famiri. Foe offer wisrefi foe Jehovah afersi ede, wani taki foe datede foe jere hem wet en poti hem Koonoekondre ini na fosi presi ini wi libi. „Tan soekoe fosi na koonoekondre nanga hem retidoe” Jezus ben taki. — Matt. 6:33.

5. Wi moe si wan libi foe offer wisrefi leki wan sani di moeilijk?

5 Na wan makriki sani foe libi wan libi foe offer joesrefi? Nono, kwet-kweti. Ma Jehovah Gado nanga Kristus Jezus e kari wi foe libi na libi disi, san wani taki dati na fasi foe libi disi na wan sani di kan. Na lobi Tata nanga hem manpikin, di ben meki libisoema, sabi san libisoema man foe doe. En foedi Jehovah Gado nanga hem manpikin habi so wan bigi lobi gi libisoema, boiti dati wi kan de seker dati dem no sa aksi wan sani foe wi, di no sa tjari boen kon gi wi, na a tra see te wi loekoe dem moro bigi paiman di de na wi fesi, dan wi kan taki nanga vertrouw, dati na tjari foe offer foe dini Jehovah, de now now na wan enkri fasi foe libi di waarti. Ala dem tra fasi foe libi tide ofoe tamara no sa tjari kon san wi ben froewakti. — Matt. 19:26; Rom. 9:33; 1 Joh. 4:16.

6, 7. (a) Soortoe offer Noach ben moesoe tjari? (b) Noach ben lasi ati baka wan pisi tem?

6 Ini wi libi foe offer wisrefi wi sa kisi boen trangaskin te wi ondrosoekoe en si na bijbel historia fa tra soema ben libi so wan libi nanga boen bakapisi, en soortoe blesi dem ben kisi nanga dati. Jehovah ben aksi Noach foe eksempel foe offer bepaalde sani, foe a kan doe wan wroko, di na grontapoe foe hem tem ben loekoe leki wan law sani. A ben kisi na komando foe meki wan boen bigi ark. Tog nooiti ete alen ben fadon ofoe nooiti wan watra ben soengoe wan kondre. Boiti dati, Noach no ben de wan man di ben meki sipi en a ben moe sorgoe ete foe dem frantwoortoe foe hem oso-famiri.

7 Foe bow so wan bigi ark, Noach ben moesoe teki tem foe sani di kande a ben lobi foe doe. Ja, efoe a ben gebroiki na srefi tem nanga krakti foe meki hem goedoe kon moro foeroe, seker a ben kan habi hem moro switi. Ooktoe a ben moe offer wan pisi foe na boen nem di a ben habi na dem birti soema foe hem, foedi na wroko na a ark ben meki sma spoetoe hem. A ben lasi ati ofoe a ben tapoe foe wroko, foedi a ben teki foeroe jari, aladi a ben wakti tapoe na kaba foe na seti foe sani dati? A ben de joisti tra fasi, Noach ben go doro nanga pasensi foe libi wan libi foe offer hemsrefi. Disi wani taki ooktoe, dati hem ben de „wan preekiman foe retidoe” (2 Petr. 2:5). A ben verstan dati a no ben libi ini wan „normale” grontapoe, ma ini wan grontapoe „di ben pori ini na ai foe na troe Gado en . . . di ben foeroe nanga ogridoe”, wan grontapoe di te foe kaba ben sa moe pori. Na bijbel e taki ooktoe dan: „Noach ben doe na ala sani di Gado ben gi hem komando foe doe. Joisti so a ben doe”. — Gen. 6:11, 22.

8. Fa na gi jesi di Noach gi jesi habi krakti tapoe wi alamala?

8 A moe meki wi breeti dati Noach weegri foe tanapoe na see foe dem soema di lobi prisiri. Foedi wi de bakaten pikin foe Noach, wi moe taki tangi foe na gi jesi di a ben gi jesi, dati wi de ini libi. Dem soema di ben lobi prisiri ben lasi ala sani — dem oso, dem goedoe en na sokari „normale” libi foe dem. Dem ben lasi srefi dem libi nanga na libi foe dem pikin, foedi „na grontapoe foe na tem dati ben pori, di watra ben soengoe hem”. — 2 Petr. 3:6.

9. Fa Gado ben blesi Abraham foe di a ben de klari foe tjari ofrandi?

9 Abraham ben de ete wan soema, di ben verstan dati a de fanowdoe foe tjari offer gi Jehovah. Jehovah ben gi hem na komando: „Hari komoto foe joe kondre en foe joe famiri en foe na oso foe joe papa, en go na a kondre di mi sa sori joe” (Gen. 12:1). Abraham no ben drai drai foedi Jehovah ben aksi foe tapoe nanga na fasi foe libi di ben de leki wan kibripresi gi hem en teki wan sani di ben de so onseker. A ben habi na vertrouw, dati san Jehovah e aksi foe hem alatem de joisti en gi hem eegi boen. „Tapoe dati Abraham ben go, joisti soleki Jehovah ben taki nanga hem” (Gen. 12:4). A troe dati disi ben wani taki, dati jari baka makandra a ben moe tjari bigi offer. Ma Jehovah ben blesi hem di a ben de klari foe dini: Abraham ben si dati Jehovah ben doe foeroe wondroewroko gi hem nanga hem osofamiri; a no ben habi mankeri foe fanowdoe sani na skinfasi; A ben kon de bekenti leki „Jehovah mati” (Jak. 2:23). Ooktoe Jehovah Gado ben pramisi Abraham, dati wan heri naatsi ben sa komoto kon foe hem. A de prenspari dati na bijbel e taki foe disi: „So Abraham, baka di a ben sori pasensi, ben kisi na pramisi disi” (Hebr. 6:15). Boiti dati a ben kisi na grani foe de wan fositen papa foe Jezus.

10. Soortoe tegenstelling ben de ini na fosi eeuw ini na fasi fa soema ben si sani en nanga soortoe bakapisi?

10 Ini na fosi eeuw foe wi gewoon teri, foeroe gewoon man nanga oema ben offer wan sani foe dem eegi afersi foe dini dem afersi foe Jehovah. Ja, dem ben wroko tranga en ben ondrofeni moeilijkheid, ma na tevreedenfasi foe dem ben bigi, foedi dem ben sabi dati dem ben doe san de joisti en dem ben prisiri Gado. Ooktoe dem ben habi na vertrouw, dati Jehovah ben sa memre dem bribi nanga wroko di dem ben sori gi hem en dati Jehovah no ben sa frigiti ini na tem di e kon foe gi dem wan moi paiman. En fa a ben de nanga dem soema di ben lobi prisiri, di ben wani libi dem „normale” libi go doro en di ben trowe Jezus foedi dem ben frede „dati dem Romein soema ben sa kon en ben sa poeroe gwe dem presi nanga dem naatsi?” (Joh. 11:48). Ini na srefi geslacht dati wan kaba ben kon na dem fasi foe libi. Dem Romein sroedati ben pori na kondre, san meki foeroe libi nanga goedoe lasi gwe. Na a tra see, dem kristen soema di ben offer demsrefi ben poti prakseri tapoe dem leri foe Jezus, dem ben lon komoto foe na gebied en dem ben tan na libi, aladi dem ben libi na dem baka dem oso nanga bijna ala dem goedoe. Dem ben de troe troe dem wan di joe ben kan taki „kolokoe”. — Luk. 21:20-24; 22:28-30; Openb. 20:4-6.

OFRANDI TAPOE DEM KONTREN FOE WI TEM

11. (a) Gado e aksi ini disi tem dati kristen soema gi ala sani di dem habi? (b) Fa a jepi foe trawan habi foe doe nanga na tjari foe offer?

11 Disi wani taki dati ala dienstknegti foe Gado ini na tem disi moe libi dem oso nanga tra goedoe na skinfasi leki wan pisi foe dem ofrandi na Gado? Nono, a no dati na a tori, aladi na de klari foe doe disi, efoe a de fanowdoe, ben de wel ini na geval foe dem eksempel foe Noach, Abraham nanga dem fosi-eeuw kristen soema di wi ben kari djonsro de. A tori de dati wan soema de klari foe poti ini hem libi dem afersi foe Gado tapoe na fosi presi en dati wan soema wani foe tjari ibri offer di de fanowdoe foe doe dati. Soboen, na tori no de so foeroe san wan soema habi ofoe no habi ma pe hem ati de. Na dem afersi foe Jehovah e kon tapoe na fosi presi ini wan soema libi, ofoe a de hem eegi afersi? En wan soema e doe dem afersi foe Jehovah ooktoe te a de doe sani gi tra soema, foedi Gado Woortoe e taki, dati „wi no moe hori ai wawan foe na boen foe wi tapoe wi eegi afersi, ma foe na boen foe trawan tapoe dem afersi toe.” Foe datede, meki wi no „prisiri . . . wisrefi”, ma meki „ibriwan foe wi prisiri hem naaste ini dem sani di sa de boen foe na bow foe hem.” — Fil. 2:4; Rom. 15:1, 2.

12. Foe sainde wi moe waarderi na fasi di trawan habi foe offer demsrefi ini disi tem?

12 Wi de si so wan geest foe offer joesrefi? Seker. Dem difrenti miljoen soema, di e prisiri demsrefi now ini bijbel waarheid nanga kristen demakandra nanga dem moro leki 40 doesoen gemeente foe Jehovah Kotoigi tapoe heri grontapoe, e njan boen foe dem ofrandi di loyaal dienstknegti foe Gado ben tjari na fesi ini na tem disi. Ini na tem dati, na a kaba foe dem jari 1800 en na a bigin foe dem jari 1900, foeroe soema, di ben offer demsrefi, ben wroko tranga foe leri trawan bijbel waarheid en foe poti na fundamenti foe na organisaatsi foe Jehovah di wi kan si, en nanga na jepi foe na organisaatsi disi wi de kisi now na waarheid nanga someni moro tra winimarki.

13. Soortoe offer foeroe soema e tjari foe dini Jehovah moro boen?

13 Tapoe na momenti disi, foeroe man nanga oema tapoe heri grontapoe e tjari ongewoon offer foe dini Gado. Son wan foe dem letterlijk ben libi dem oso nanga goedoe foe go ini na zendingwroko, foe libi ini Bethel-oso ofoe foe dini gemeente leki opziener di e waka lontoe, foe gi ala dem tem na a doe foe dem afersi foe Jehovah. Trawan e tjari offer te dem e wroko leki spesroetoe, gewone ofoe jepi-pionier, foe kan man moro boen foe leri trawan foe na kon krosbee foe Jehovah njoen seti.

14. Fa Jehovah e si soema, di a diniwroko foe dem no de so foeroe, leki wan bakapisi foe dem omstandigheden?

14 A no ala sma di e dini Jehovah nanga dem heri ati, de na so wan fasi fri foe frantwoortoe, dati dem kan doe so wan pionierwroko. Foeroe moe wroko tranga ini wan moeiliki economia sistema foe gi dem osofamiri san de fanowdoe, nanga na verstan dati efoe dem no ben sa doe hem, dem ben sa „moro takroe leki wan soema di no habi bribi” (1 Tim. 5:8). Kristen papa nanga mama habi na frantwoortoe toe, di e go makandra nanga na habi foe pikin. Dem e verstan dati dem moe offer wan foe dem sani di dem ben sa wani doe nanga ala prisiri foe dem kan gi tem foe kweki dem pikin „ini na tranga leri nanga makti rai foe Jehovah” (Ef. 6:4). Boiti dati, son soema foe na takroe gosontoe foe dem, dem jari foe dem di e kon moro foeroe nanga tra sani di e tapoe, ben kan doe pikinso ini na rechtstreekse diniwroko gi Jehovah. Ini na fasi disi dem de leki na pôti weduwe ben kan offer soso „toe pikin moni foe weiniki waarde” ini na tempel foe Gado (Luk. 21:1-4). Tog, ala dem soema disi e tjari offer di e prisiri hem, foedi dem e doe san dem kan foe jepi trawan foe kon sabi moro foe Jehovah. A lobi dem foedi dem de klari foe hori doro ondro moeiliki kondisi en ete, so fara dem situatie e gi dem pasi, foe offer wan sani na hem ini na vorm foe diniwroko gi hem. — Jak. 5:11.

ONDROSOEKOE JOESREFI

15. Soortoe aksi wi moe aksi wisrefi nanga reti?

15 Joe habi na geest foe offer joesrefi? Ofoe joe habi na firi foe lobi prisiri? Joe e dini Jehovah ini na fasi dati joe omstandigheden e gi joe pasi foe dati? Foe sainde joe no ben sa ondrosoekoe joesrefi foe si ofoe na kristen diniwroko foe joe gi Gado no ben sa kan kon moro boen?

16. Fa wi kan bai na boen tem? (Leesi Romeini 10:9, 10)

16 Foe eksempel, joe ben kan gi moro tem na a leesi foe na bijbel? Efoe joe habi wan osofamiri, joe de taki foe na bijbel geregeld nanga dem? Joe ben sa kan gebroiki moro foe joe fri tem foe soekoe soema ini joe birti foe joe kan verteri dem foe na „boen njoensoe”? Ofoe joe ben sa kan gebroiki wan pisi tem foe jepi sikiman, dem owroewan ofoe trawan foe doe kristen wroko foe switifasi nanga lobi gi dem? Kan de joe ben kan vergelijk na tem di joe e gi foe eksempel na ontspanning soleki na loekoe foe televisie, nanga na tem di joe e gi na wan ofoe tra kontren foe hem wroko foe dini hem. Na fasi fa joe seti joe tem de tapoe wan balans fasi?

17. Foe sainde a de prenspari gi papa nanga mama foe ondrosoekoe san dem e aksi dem pikin foe doe?

17 Joe de wan papa ofoe mama? Ondrosoekoe na fasi fa joe de nanga joe pikin. Prakseri dati dem jongoe jari foe joe pikin de na moro boen tem foe bigin foe kweki dem ini wan libi foe offer demsrefi. Gi joe pikin wan boen sani foe doe ini en lontoe na oso. Meki dem si dati na libi no de wawan pree, ma dati a habi foe doe nanga wroko nanga offer. Kande joe no ben habi ini joe jongoe jari moi krosi, weiniki ontspanning en no nofo boen njanjan. Joe no wani dati joe pikin kande moe habi dem srefi pina disi leki joe. Ma efoe joe gi joe pikin ala sani san a wani habi, a kan kostoe hem hem libi. Nanga disi a ben kan go prakseri dati na libi a wan makriki sani, dati makriki joe kan kisi ala sani, en dati na doe foe na wani foe Jehovah na wan makriki sani, nanga na bakapisi, dati bakaten a no sa de klari foe tjari offer gi Jehovah. Soleki joe sabi kaba leki bigisma, na libi no makriki, wan soema no e kisi dem sani makriki en dati na doe foe na wani foe Jehovah no de wan makriki sani. Jepi joe pikin foe datede foe kisi wan balans loekoe tapoe na libi. Meki a verstan dati aladi tem moe poeroe poti na wan see gi ontspanning, tem moe de toe foe wroko, foe studeer bijbel, foe na tjari foe offer. Jepi joe manpikin nanga oemapikin nanga jepi foe tranga leri foe waka wan pasi foe redelijk offer foe demsrefi. Na bakapisi foe na tranga leri disi ben sa kan de heri boen wan foe dem moro waarti sani di dem sa kisi foe joe (Ef. 6:4; Hebr. 12:11). En nanga na eegi boen eksempel foe joe, joe sa kan poti krakti tapoe na leri foe joe nanga mofo.

18. Efoe wi no kan gi moro tem ini na dini foe Jehovah, soortoe kenki wi kan tjari kon?

18 Efoe joe trow ofoe joe no trow, wan eerlijk ondrosoekoe foe joesrefi kan tjari kon heri boen na krin dati joe e gi someni tem ini na dini foe dem koonoekondre-afersi, soleki redelijk joe man foe gi. Joe kan doe kande moro ete? Ja, foe troe. Joe kan wroko foe tron wan moro boen kristen te joe e leri fa joe kan sori moro boen dem froktoe foe na jeje, leki „lobi, prisiri, vreede, pasensi, switifasi, boenfasi, bribi, safrifasi, dwengi joesrefi” (Gal. 5:22, 23). Moro fara joe kan wroko foe meki na kwaliteit foe joe diniwroko gi Gado kon moro boen.

19. Foe sainde wi moe de klari foe kweki na geest foe offer wisrefi? (Leesi Hebreeër 6:11; 1 Korinte 15:58)

19 Fa a sa gi joe satisfaksi ini na tem di e kon, ini Gado njoen seti, te joe loekoe na joe baka en joe sabi, dati, di a ben de troe troe fanowdoe ini na tranga fanowdoe tem disi, joe no ben sidon tiri ma joe ben tjari dem fanowdoe offer en joe ben doe na porsi foe joe ini na dini foe Jehovah. Ja, de klari foe poti eegi afersi na ondro dem afersi foe Jehovah, en joe no e frigiti foe loekoe dem moi paiman di de na joe fesi ini na tem di e kon. Kweki na geest di na psalmsingiman ben habi, di a ben taki: „Ini prisiri mi wani tjari slagti-ofrandi gi joe. Mi sa prijse joe nem, o Jehovah, bikasi a de boen.” — Ps. 54:6.

    Sranantongo buku (1978-2025)
    Log Out
    Log In
    • Sranantongo
    • Seni en gi wan sma
    • Settings
    • Copyright © 2025 Watch Tower Bible and Tract Society of Pennsylvania
    • Gebruiksvoorwaarden
    • Privacybeleid
    • Privacyinstellingen
    • JW.ORG
    • Log In
    Seni en gi wan sma