Joe lobi prisiri ofoe joe lobi foe gi joesrefi?
„Dan Jezus ben taigi hem discipel: ’Efoe wan soema wani kon na mi baka, dan a no moe ke foe hemsrefi, a moe teki hem pina-oedoe en tan waka alatem na mi baka.’” — Matteus 16:24.
1. Soortoe fasi foe libi moro moro soema e teki ini na tem disi?
GI FOEROE soema ini na grontapoe foe now, na prakseri foe tjari eegi ofrandi gi wan tra soema ofoe foe wan boen doel, no habi foer krakti tapoe dem. Moro foeroe soema e sori joisti nanga dem fasi pe dem no e sori foeroe respeki gi Gado ofoe gi libisoema, dati dem wani moro goedoe, moro prisiri nanga moro fri foe doe san dem habi na prakseri. Srefi foe de klari foe gi demsrefi foe dem eegi oso-famiri ede, kon de moro pikinso ini dem jari di pasa, soleki wi kan si dem osofamiri di broko nanga broko-trow ini na wan naatsi go miti na tra naatsi, di e gro kon miti hee marki.
2. Foe sainde na fasi disi foe lobi prisiri no de kon leki wan froewondroe sani gi bijbel-ondrosoekoeman?
2 Na fasi disi foe lobi prisiri no e kon leki wan froewondroe sani gi dem soema, di ben de nanga opo ai tapoe san Gado Woortoe, na bijbel ben taki. Na profeeti Woortoe ben taki soifri na fesi, dati foeroe soema ini dem „laatste dee” disi ben „sa lobi demsrefi” en „ben sa lobi na moni”, ja, dati dem ben „sa lobi prisiri moro leki dem lobi Gado”. Son soema poti na dem ede, dati dem wani feti baka dem pasi foe lobi prisiri dati na bijbel taki dati dem de „sondro na krakti foe dwengi demsrefi”. Disi wi kan si krin toe ini na dringi foe moro sopi, na gebroiki foe drug nanga seks libi-makandra ini dem jari di pasa. — 2 Tim. 3:1-4.
3. Soortoe tra fasi foe libi de en soema e verteri wi dati disi boen foe wi waka na hem baka?
3 Ma na tra see, ooktoe na fasi foe gi hemsrefi, de toe. Dati de wan fasi foe libi, di no wan tra soema moro leki na Almakti Mekiman foe na universum, Jehovah Gado srefi, e teki dati wi moe waka na hem baka. Ma so wan fasi foe libi foe gi joesrefi ini na tem disi no de wan sani owroe en no de foe disi tem? Foe sainde wi ben moe habi belangstelling gi hem efoe moro moro foeroe soema e drai baka gi hem?
SAN DE INI NA TORI
4, 5. Fa Jezus ben taki foe fasi foe libi foe gi joesrefi en san a ben meene nanga dem woortoe foe hem?
4 A de toemsi prenspari dati na afersi disi foe gi hemsrefi, di de a tra see foe lobi foe prisiri, wi si hem tapoe wan joisti fasi. Jezus Kristus ben taki foe dati: „Efoe wan soema wani kon na mi baka, dan a no moe ke foe hemsrefi, a moe teki hem pina-oedoe en tan waka alatem na mi baka. Bikasi soema wani feni hem sili, sa lasi hem, ma soema lasi hem sili foe mi nem ede, sa feni hem. Soortoe wini a habi tog gi wan libisoema efoe a wini na heri grontapoe, ma a lasi hemsrefi ofoe habi lasi?” — Lukas 9:23-25.
5 Jezus ben verteri dja foe wan fasi foe libi foe gi joesrefi. En a ben sori ini hem eegi libi san disi wan taki. A ben taki: „Mi no de soekoe mi eegi wani, ma na wani foe hem di ben seni mi kon” (Joh. 5:30). Na reden foe sainde Jezus ben libi wan libi foe gi hemsrefi, ben de foe datede, dati a ben kan doe na wani foe hemel Tata, Jehovah, volmaakti. Na fasi foe libi disi Jezus ben sori hem discipel ooktoe foe libi so. A ben taki dati dem ben moe de klari „foe no ke foe demsrefi”, san wani taki, dati dem ben moe dwengi dem eegi lostoe en na doe foe na wani foe Gado dem ben moe meki leki na moro prenspari sani ini dem libi.
6. (a) San wan fasi foe libi foe gi joesrefi e aksi? (b) Fa wan soema kan feni hem sili te a de doe Gado wani?
6 A troe dati so wan libi foe gi joesrefi no makriki. A de aksi wan sani foe joe see, foe taki tem nanga moeiti. Son tron a kan wani taki srefi, dati wan soema kan lasi hem libi nanga na anoe foe dem soema di e vervolgoe Gado dienstknegti. Ma soleki Jezus ben sori, na soema di doe Gado wani, „sa feni hem sili” ofoe libi. Na soortoe fasi? Foedi a de kisi Gado boen-ati en kisi na paiman di Gado pramisi na ala soema di e dini hem, bikasi a „de na Soema di e pai dem di e soekoe hem ernstig” (Hebr. 11:6). Gi na moro bigi pisi foe Gado loyaal dienstknegti na paiman de ini teego libi ini wan retidoe njoen seti dja tapoe grontapoe: „Dem retidoe soema, dem sa habi grontapoe leki wan goedoe, en dem sa tan libi drape foe teego” (Ps. 37:29). EN „dem sa habi troe troe switi prisiri ini vreede pasa marki” (Ps. 37:11). Srefi dede no kan meki dati Gado dienstknegti kisi na paiman disi, foedi Jehovah e gi na djaranti dati wan „opobaka sa de foe libi”. — Joh. 5:29.
7. Foe sainde na tem di e kon en di Jehovah pramisi waarti ala sani?
7 Ja, ini na afersi disi foe gi joesrefi, leki na tra see foe lobi prisiri, libi de foe lasi! En fa disi de wan moi libi — teego libi na mindri paradijs kondisi di e meki ibri dee de man „switi prisiri”! Dati sa de na troe troe libi. No wan fasi foe libi di joe ben sa kan teki ini na grontapoe disi, no wan moeiti di joe kan meki gi wan bedrijf (wan wenkri) ofoe wroko en no wan enkri doe foe loyaliteit gi wan libisoema ofoe gi wan organisaatsi foe disi grontapoe, ben sa kan tjari wan tem di e kon, soleki Jehovah e pramisi disi na dem soema di e dini hem. Na tem disi di e kon, seker ooktoe waarti foe tjari ala offer di joe kan.
NA FANOWDOE FOE TEN NA AI
8, 9. Foe sainde wi moe span wisrefi tapoe wan moro krakti fasi foe tan nanga opo ai na jeje fasi en tjari now ofrandi?
8 O moro wi de kon na a kaba foe „dem laatste dee”, a de kon ooktoe moro fanowdoe foe tan nanga opo ai na jeje fasi en foe sori moro foeroe dati wi de klari foe tjari ofrandi foe kan dini Gado tapoe wan fasi di e prisiri hem. Wan reden foe dati de, dati Satan Didibri sabi dati soso „wan sjatoe tem” libi ete bifo dem poeroe hem na pasi (Openb. 12:12; 20:1-3). Foedi hem tem kon de boen sjatoe, wi kan verwakti dati a sa proberi tapoe wan moro krakti fasi leki wan lawman foe pori en broko sani. Wan moro boen sani a no ben sa wani dan dati a ben kan kisi Jehovah dienstknegti so fara, dati dem meki dem jeje fasi foe si sani ben kon slap en dati dem lasi na firi foe na fanowdoe foe na moeiliki tem disi. A ben sa feni hem toemsi prisiri efoe dem ben sa gi moro pikinso tem ofoe dem no ben gi tem srefi srefi moro foe meki na „boen njoensoe foe na Koonoekondre” bekenti gi trawan. — Matt. 24:14.
9 Wi no moe tjari dor-ai na a krakti foe Satan foe kori soema en doe ogri. Na Woortoe foe Jehovah di santa jeje skrifi e warskow wi: „Hori joe prakseri na wan, de na opo ai. Na feejantiman foe joe, Didibri, e go lontoe leki wan krasi leeuw, foe soekoe foe swali wan soema. Ma kaka foetoe gi hem, vaste ini bribi” (1 Petr. 5:8, 9). Efoe wan verstan soema ben sa sabi dati ini hem birti wan krasi leeuw ben e waka lontoe, a ben sa seti ala soortoe sani na fesi foe kibri hemsrefi nanga hem oso-famiri, a no so?
10, 11. (a) Soortoe warskow Jezus ben gi te wan soema e gi hemsrefi toemsi foeroe na prisiri? (b) Foe sainde dem woortoe foe Jezus ini disi tem de kon troe srefi tapoe son wan ini Jehovah organisaatsi?
10 Jezus ben taki foe na fanowdoe foe de nanga opo ai, di a ben taki foe na kon foe na pori foe na ogri seti foe sani foe disi tem: „Poti prakseri na joesrefi tapoe, dati joe ati no kon hebi nanga njan pasa marki en dringi pasa marki en sorgoe foe na libi en na dee dati kon onverwakti, ini wan momenti tapoe joe leki wan trapoe. Bikasi a sa kon tapoe ala soema di e libi tapoe grontapoe. Tan nanga opo ai, begi alatem, dati joe sa man lon komoto foe ala dem sani di seker sa pasa en dati joe sa man foe tanapoe na fesi foe Soemapikin.” — Luk. 21:34-36.
11 Nanga soema Jezus ben taki? Ini na tori disi a ben taki nanga hem foetoeboi. Tog a ben warskow dem, dati efoe dem no ben tan nanga opo ai, srefi son wan foe dem sondro dem ben verwakti, Jehovah dee foe pori sani sa ben fadon tapoe dem. San ben sa meki dati sondro foe verwakti na dee ben sa fadon kon na dem tapoe? Dem ben sa meki na sorgoe foe na aladee libi teki toemsi foeroe foe dem tem ofoe dem ben gi demsrefi pasa marki na ala soortoe prisiri. Dem vermane disi foe Jezus ben de wan troe troe warskow gi wi ini disi tem. Foedi na kaba foe na seti foe sani no kon ete, kande sani e kori son wan di e dini Jehovah foe kon slap ini na lostoe foe dem foe tjari offer. Dem e prakseri kande dati hem njoen seti foe sani de toemsi fara ini na tem di e kon, di joe no kan bepaal foe kan si na situatie foe wi tem leki wan tranga fanowdoe sani. Dem e prakseri kande, dati dem moe broko dem ede moro foe libi wan sokari „normaal” libi.
12. A habi waarde foe proberi foe libi wan normaal libi ini na seti foe sani disi?
12 Ma efoe joe loekoe hem foe na see foe Jehovah, a kan foe si soortoe fasi foe libi ini na seti foe sani disi leki „normaal”? Na grontapoe disi de ondro na makti foe Satan nanga hem demoon en politiek seti di no habi sari-ati e rigeri hem en gridi handel afersi nanga gridi falsi religie e makti hem. A foeroe nanga frede, ogri-ati, doe ogri na trawan, hoeroedoe, bidrigi, economia moeilijkheid, siki nanga dede. Dem sani disi no de na normaal libi, di Jehovah ben wani na libisoemafamiri habi, nanga ini hem volmaakti gosontoe, troe troe sekerfasi nanga kolokoe, sotoe teego libi en ala disi tapoe wan paradijs-grontapoe. Na libi foe now de farawe foe normaal. A de troe troe abnormaal, en a sa tan so te leki Jehovah figi poeroe na ogri seti foe sani, sodati na pasi de opo foe hem glori njoen seti. Wan soema e kori hemsrefi soboen te ai hoopoe foe feni wan normaal sani ini wan abnormaal grontapoe.
13. San de wan toe eksempel foe soema, di foe lobi foe prisiri ede, ben fadon ini anoe foe Satan?
13 A ben sa tjari gi wan kristen soema ini na lati tem disi wan ogri bakapisi te a no ben sa poti prakseri tapoe na warskow foe Jezus, te a ben sa meki a tan nanga opo ai foe hem kon slap en te a ben sa tjari hem matifasi nanga Jehovah kon ini gevaar. So wan soema sa ben opo pasi foe fadon go ini „na trapoe foe Didibri”, „foedi a kisi dem libi libi foe doe hem wani” (2 Tim. 2:26). Disi ben pasa troe troe ini na fosi eeuw nanga Demas, di ben de wan tron wan kristen. Na apostel Paulus ben taki foe hem: „Demas ben libi mi, bikasi a ben kon lobi na seti foe sani foe disi tem” (2 Tim. 4:10). Ooktoe na oema foe Lot ben waka go ini na trapoe foe Satan. Nanga tranga jesi a ben drai loekoe na Sodom, di na foto disi ben e broko poeroe en a „ben lasi hem sili”. Nanga leti Jezus ben taki: „Prakseri na wefi foe Lot” (Luk. 17:32). Dan joe ben habi Esau di ben gi hem fosi geboortoe-reti abra foe winimarki foe wan pisitem. Fa disi no ben wan verstan fasi! (Gen. 25:29-34) Dan joe ben habi Achan, di ben prakseri moro na moni nanga moi krosi dan a ben prakseri na prakseri foe Jehovah (Joz. 7:1, 20-25). A dem soortoe soema dati nanga sari wi moe taki ben moe pai hebi dati dem ben habi na geest foe lobi prisiri na presi dem ben habi na geest foe gi demsrefi. Nono, foeroe tron a de kon dati lobi foe prisiri e teki abra foe soema. A pasa nanga foeroe foe dem dienstknegti foe Gado na owroetem en a pasa ooktoe nanga foeroe ini disi tem. A kan pasa ooktoe nanga wi.
„LEKI WAN TRAPOE”
14. Fa na bijbel e agersi na grontapoe-pori di e kon nanga wan trapoe?
14 Di Jezus ben taki foe na kon foe na dee foe Jehovah foe pori sani, a ben taki dati disi sa kon „leki wan trapoe” (Luk. 21:35). Wan trapoe e graboe hori wan meti di no e verwakti ogri te ai waka sondro broko-ede tapoe na pasi foe na ogri. Na so toe na kaba foe na seti foe sani disi sa kon wantron wantron, te na moro bigi pisi foe libisoema no e verwakti. Mindri dem soema disi son wan ben sa de toe di ben go „waka na pasi di e go na libi”, ma di gi pasi dati grontapoe afersi teki na tem foe dem en di go toemsi fara ini na verkeerti pasi. — Matt. 7:14.
15. Wan grontapoe-situatie di no e sori so ogri, e sori dati na kaba foe na seti foe sani disi, de farawe ete?
15 Ma wan grontapoe-situatie di no e sori so ogri ofoe na dorosee go na fesi na difrenti presi no e gi no wan enkri reden foe na firi dati na kaba de krosbee? Te joe loek hem fa a de dan a meene precies na tra see. Loekoe boen dem woortoe foe Jezus: „Bikasi soleki a ben de ini dem dee foe Noach, na so na de-noja foe Soemapikin sa de. Bikasi soleki dem ben de bifo na froedoe, dem ben njan en dem ben dringi, mansma ben trow en dem ben gi oemasma foe trow, te leki na dee di Noach ben go ini na ark, en dem no ben poti prakseri tapoe dati, te leki na froedoe ben kon en ben figi dem alamala poeroe, na so na de-noja foe Soemapikin sa de.” Foe datede Jezus ben warskow toe: „Sori ooktoe dati joe de klari, bikasi Soemapikin e kon tapoe wan joeroe di joe no ben prakseri.” — Matt. 24:37-39, 44.
16. San Paulus nanga Petrus ben taki foe na onverwakti kon foe na kaba foe na seti foe sani disi?
16 Ooktoe na apostel Paulus ben verteri dati na seti foe sani disi sa kon wantron wantron na wan kaba, gi na moro bigi pisi foe libisoema leki wan onverwakti sani. A ben taki: „Bikasi joesrefi sabi heri boen dati na dee foe Jehovah e kon precies zo leki wan foefoeroeman na neti. Te dem e taki: ’Vreede nanga sekerfasi!’ dan wan onverwakti pori sa kon wantron wantron tapoe dem” (1 Thess. 5:2, 3). Na apostel Petrus ben taki toe foe na feit, dati „na dee foe Jehovah sa kon leki wan foefoeroeman” onverwakti gi dem soema di no de nanga opo ai na jeje fasi (2 Petr. 3:10). Foe datede Paulus ben gi na rai: „Meki . . . wi no sribi doro, leki dem trawan. ma meki wi de nanga ai en hori wi prakseri na wan.” — 1 Thes. 5:6.
17. Foe sainde wi no moe prakseri dati Jehovah poti wan tra tem foe na dee foe hem atibron?
17 Na dee foe na atibron foe Jehovah sa kon precies tapoe na tem di a ben poti na fesi. A no sa poti wan tra tem gi na dee disi. No wan soema di lobi Jehovah, no moe kon foe datede ini wan jejefasi ofoe fasi foe libi, di e sori dati wan soema no habi bribi ini na prakseri foe Jehovah foe fri na grontapoe disi foe ogridoe en opo wan retidoe njoen seti foe sani. Efoe wan soema ben sa teki so wan negatieve fasi, dan wan soema ben sa gersi dem soema di 2 Petrus 3:3, 4 e skrifi foe dem: „Ini dem laatste dee . . . spotoeman sa kon nanga na spotoe foe dem, di e wroko leki dem eegi lostoe taigi dem en dem e taki: ’Pe na pramisi de-noja foe hem de no? Ai, foe sensi na dee di dem fositem papa foe wi ben dede, ala sani e tan precies so leki sensi na bigin di sani ben meki.’”
18. (a) San e sori dati na tem foe wi kenki foeroe nanga na bigin di sani ben meki? (b) Foe sainde dem moeiti foe wi na a fosi presi moe de foe doe na wani foe Jehovah?
18 A de troe dati dem oorspronkelijke libiproces e go doro ete. Ma ini na eeuw disi wi kan si ala bewijsi, dati wi e libi ini dem „laatste dee”. Dem moro bigi ongolokoe ini na historia moro foeroe ben pasa ini na eeuw disi. En now libi soema habi na makti foe pori ala libi na grontapoe. Ala bewijsi leki wan kon troe foe bijbel profeeti-tori e sori seker dati na grontapoe disi e go sondro foe joe tapoe hem na hem kaba. En te na kaba disi kon, dan wan pisi tem foe bigi moeilijkheid sa kon gi libisoema. Jezus ben kari hem „wan bigi benawtoe . . . di sensi na bigin foe grontapoe te leki now no ben kon, en no sa kon moro toe” (Matt. 24:21). Ini na pisi tem dati, dan ala politiek, economia nanga falsi-kerki seti sa pori. Na so fasi a sa kon na krin, dati ala tem, moeiti nanga kostoe, di soema ben gi foe meki dem seti disi tan, ben de foe soso. Kristen soema no moe span dem srefi gi sani di no sa tan. Na getrouwfasi nanga ofrandi foe dem na a fosi presi sa moe de tapoe sani di de foe teego. „Na grontapoe e pasa . . . en ooktoe hem lostoe, ma soema doe na wani foe Gado, e tan foe teego.” — 1 Joh. 2:17.
19. Soortoe fanowdoe foe tjari offer sa de ini na tem foe na „bigi benawtoe”, en soema kande no sa habi foeroe moeiti nanga dati?
19 Ini na tem foe na „bigi benawtoe”, Jehovah dienstknegti sa habi foeroe okasi foe sori na geest foe gi joesrefi. Dem sa moe jepi kompe-kristen tapoe foeroe fasi, san wani taki dati dem sa moe prati fanowdoe sani nanga dem (Hebr. 13:16). Nanga dem bigi kenki di sa kon ini dem politiek, maatschappelijk nanga economia seti, Gado dienstknegti kan lasi son ofoe srefi ala dem goedoe. Dem soema di e gi now dem afersi foe Jehovah na fosi presi ini dem libi, en di habi kaba na geest foe gi joesrefi, kande foe datede no sa habi foeroe moeiti foe tjari ofrandi di de fanowdoe.
20. O ernstig na afersi foe lobi gi joesrefi de?
20 Wi no kan lon komoto foe na feit, dati na aksi „Joe lobi prisiri ofoe joe foe gi joesrefi?” de wan afersi foe libi nanga dede efoe joe loekoe hem foe na see foe Jehovah. Efoe wi lobi na libi en wi wani njan switi foe na libi ini Gado njoen seti, dan wi habi now na geest foe lobi gi joesrefi fanowdoe foe dini Jehovah tapoe wan fasi di hem e feni boen.