Dini Jehovah nanga wan jeje foe òfer wisrefi
„Efoe wan sma wani waka na mi baka, a moesoe drai en baka gi ensrefi èn a moesoe teki en pina-oedoe èn tan waka doronomo na mi baka.” — MATEUS 16:24.
1. San Jesus ben taigi den disipel foe en foe a dede foe en di ben de krosibei?
INI a skaduw foe a bergi Hermon di abi wan bergi-ede nanga sneeuw, Jesus Krestes e doro wan bigi heimarki ini en libi. A abi moro mendri leki wan jari foe libi. A sabi disi; den disipel foe en no sabi. A ten doro now foe den kon sabi disi. A troe taki moro na fesi Jesus ben taki kaba pikinso foe a dede foe en di ben de krosibei, ma disi na a fosi leisi taki a e taki so krin foe dati (Mateus 9:15; 12:40). A tori foe Mateus e froeteri wi: „Sensi a ten dati Jesus Krestes ben bigin tjari kon na krin gi den disipel foe en taki a ben moesoe go na Jerusalem èn taki a ben sa njan pina foe foeroe sani di den owroe man nanga den ede-priester èn den sabiman foe Boekoe ben e doe nanga en èn taki den ben sa kiri en èn taki a ben sa kisi wan opobaka na a di foe dri dei.” — Mateus 16:21; Markus 8:31, 32.
2. San Petrus ben doe tapoe den wortoe foe Jesus foe a pina di A ben sa kisi èn fa Jesus ben piki?
2 Soso wan sjatoe pisi ten de ete bifo Jesus dede. Ma Petrus en ati e faja foe so wan sani di sori wan takroe prakseri. A no man teki en taki den sa kiri a Mesias troetroe. Foe dati ede Petrus e prefoeroe foe piri-ai gi en Masra. Den moro boen prakseri di a abi gi Masra e poesoe en sondro foe a denki moro fara foe gi en a deki-ati: „De boen gi joesrefi, Masra; a sani disi no sa pasa nanga joe kwetikweti.” Ma wantewante Jesus e weigri foe arki Petrus en switifasi di no de joisti, neso seiker leki te wan sma ben sa masi na ede foe wan vergiftig sneki. „Komoto na mi fesi, Satan! Joe de wan ston gi mi foe naki foetoe fadon, bika joe no e denki den prakseri foe Gado, ma di foe libisma.” — Mateus 16:22, 23.
3. (a) Fa Petrus, sondro foe a ben sabi, ben meki ensrefi kon tron wan wrokoman foe Satan? (b) Fa Petrus ben de wan ston foe naki foetoe fadon gi wan libi foe na òfer di wan sma e òfer ensrefi?
3 Sondro foe Petrus sabi a ben meki ensrefi kon tron wan wrokoman foe Satan. A krasi piki di Jesus gi, e sori taki a de seiker foe ensrefi neleki di a ben piki Satan ini a sabana. Drape Didibri ben proeberi foe kori Jesus foe teki wan makriki libi, wan kownoewroko sondro foe njan pina (Mateus 4:1-10). Now Petrus e gi en deki-ati foe no de tranga gi ensrefi. Jesus sabi taki disi no de a wani foe en Tata. A libi foe en moesoe de wan foe òfer ensrefi, no wan foe satisferi ensrefi (Mateus 20:28). Petrus e tron wan ston foe naki foetoe fadon, foe Jesus no man waka èn libi na so wan fasi; nanga a moro boen prakseri, a firi di a abi gi Jesus e tron wan trapoe.a Ma Jesus e si krin taki efoe a ben tan abi so wan prakseri foe wan libi di de fri foe òfer ensrefi, a ben sa lasi a boen-ati foe Gado, foe di a ben sa go ini Satan en trapoe di e jokro sma kiri.
4. Foe san ede wan libifasi foe lobi prisiri nanga switilibi no de wan sani gi Jesus nanga den bakaman foe en?
4 A denki foe Petrus, foe dati ede, ben moesoe kenki. Den wortoe di a ben taigi Jesus ben sori a prakseri foe wan libisma, no di foe Gado. Wan switilibi nanga a lobi di wan sma lobi prisiri, wan makriki fasi foe lowe gi a pina di a ben sa kisi, no ben de wan sani gi Jesus; èn so wan libi a no ben wani toe gi den bakaman foe en, bika baka dati Jesus ben taigi Petrus nanga den tra disipel: „Efoe wan sma wani waka na mi baka, a moesoe drai en baka gi ensrefi èn a moesoe teki en pina-oedoe èn tan waka doronomo na mi baka.” — Mateus 16:24.
5. (a) San na a tjalensi foe libi wan kresten libi? (b) Gi sortoe dri sani di de fanowdoe wan kresten moesoe de srekasreka?
5 Ibri tron baka, Jesus e drai go baka na a moro prenspari sani disi di a ben taki foe en: a tjalensi foe libi a libi foe wan kresten. Foe de bakaman foe Jesus, kresten moesoe dini Jehovah nanga a jeje foe òfer densrefi, neleki a Tiriman foe den (Mateus 10:37-39). So boen, a e kari dri fanowdoe sani di wan kresten moesoe de srekasreka foe doe: (1) drai en baka gi ensrefi, (2) teki a pina-oedoe foe en èn (3) waka doronomo na En baka.
„Efoe wan sma wani waka na mi baka”
6. (a) Fa wan sma e drai en baka gi ensrefi? (b) Soema wi moesoe plisi moro leki wisrefi?
6 San a wani taki foe wan sma drai en baka gi ensrefi? A wani taki dati wan sma moesoe weigri krinkrin foe prakseri foe ensrefi, neleki a dede gi ensrefi. A gronprakseri foe a Griki wortoe „drai en baka” de, „foe taki nôno”; a wani taki „a weigri di wan sma e weigri krinkrin”. Foe dati ede, efoe joe e teki a tjalensi foe a kresten libi, dan joe e gi joe eigi winsi, switi libi, lostoe, kolokoe nanga prisiri, abra foe di joe wani. Foe taki en leti, joe e gi joe heri libi èn ala sani di abi foe doe nanga dati, na Jehovah Gado foe ala ten. A drai di wan sma e drai en baka gi ensrefi, wani taki moro leki foe weigri foe abi wan toe spesroetoe prisiri wanwan leisi. Na presi foe dati, a wani taki dati wan sma moesoe gi a reti di a abi foe de eiginari foe ensrefi, na Jehovah (1 Korentesma 6:19, 20). Wan sma di e drai en baka gi ensrefi no e libi foe plisi ensrefi, ma Gado (Romesma 14:8; 15:3). Disi wani taki dati ibri momenti foe en libi, a e taigi a gridi lostoe di ensrefi abi nôno èn Jehovah a e taigi ija.
7. San na a pina-oedoe foe wan kresten èn fa a e tjari en?
7 Foe teki joe pina-oedoe, foe dati ede, wani taki serjoesoe sani di e kon foe dati. A tjari foe wan oedoe na wan hebi èn a de wan agersi sani foe dede. A kresten wani foe njan pina efoe dati de fanowdoe noso foe kisi sjen noso foe kisi skin-ati noso srefi foe den kiri en, foe di a de wan bakaman foe Jesus Krestes. Jesus ben taki: „Efoe wan sma no teki en pina-oedoe èn no waka na mi baka a no de warti gi mi” (Mateus 10:38). A no alasma di e njan pina e tjari a pina-oedoe. Den ogrisma abi foeroe „skin-ati”, ma den no abi wan pina-oedoe (Psalm 32:10). Ma a libi foe wan kresten de wan libi foe tjari a pina-oedoe foe òfer ensrefi na a dini foe Jehovah.
8. Sortoe model foe libi, Jesus ben poti gi den bakaman foe en?
8 A lasti kondisi di Jesus ben kari de taki wi moesoe waka doronomo na en baka. Jesus e aksi no wawan foe wi e teki san a ben leri èn bribi na ini dati, ma taki wi e waka wi heri libi doronomo na baka a model di a ben gi. Èn san na wan toe foe den moro prenspari sani di wi e si ini Jesus model foe libi? Di a ben gi den bakaman foe en a lasti komando, a ben taki: „Go foe dati ede èn meki disipel . . . , leri den foe ondrow ala sani di mi ben komanderi oenoe” (Mateus 28:19, 20). Jesus ben preiki èn ben leri a boen njoensoe foe a Kownoekondre. Na so den krosibei disipel foe en ben doe toe èn a no de foe taki, dati a heri fosi kresten gemeente ben doe dati toe. A fajafaja wroko disi, boiti taki den no de wan pisi foe grontapoe, ben meki taki sma no wani si den na ai èn taki den kisi gens foe grontapoe, san abi leki bakapisi taki a pina-oedoe foe den kon moro hebi srefi foe tjari. — Johanes 15:19, 20; Tori foe den Apostel 8:4.
9. Fa Jesus ben handri nanga tra sma?
9 Wan tra prenspari model di wi kan si ini Jesus en libi, ben de a fasi fa a ben handri nanga tra sma. A ben abi switifasi èn „safrifasi èn sakafasi foe ati”. So boen, den arkiman foe en ben abi a firi taki a jeje foe den ben kon njoen baka èn den ben kisi deki-ati foe di a ben de drape (Mateus 11:29). A no ben basi den nanga a fasi fa a ben taki, foe den waka na so fasi na en baka noso ben poti wet tapoe wet di ben taigi den fa den ben moesoe waka na en baka; èn a no ben meki sma kisi a firi taki den ben fowtoe, foe dwengi den na so fasi foe de en disipel. Ala di den ben libi wan libi foe òfer densrefi, troetroe prisiri ben de foe si na den. Fa dati de heri tra fasi leki den sma di abi a jeje foe grontapoe foe lobi prisiri nomo, di de wan marki „foe den lasti dei”! — 2 Timoteus 3:1-4.
Kweki èn tan abi a jeje di Jesus ben abi foe òfer ensrefi
10. (a) Fa Krestes ben drai en baka gi ensrefi so leki fa skrifi na Filipisma 2:5-8? (b) Sortoe fasi na froestan sei wi moesoe sori efoe wi na bakaman foe Krestes?
10 Jesus ben gi na eksempre foe drai en baka gi ensrefi. A ben teki a pina-oedoe foe en èn ben tjari en doronomo, foe di a ben doe a wani foe en Tata. Paulus ben skrifi gi den kresten na Filipi: „Tan hori a fasi disi ini joe na froestan sei, di ben de ini Krestes Jesus toe, di ala di a ben de ini a skin leki di foe Gado, a no ben prakseri foe teki wan sani gi ensrefi nanga tranga, dati wani taki, foe de a srefi leki Gado. Nôno, ma a ben libi en glori èn teki a skin foe wan srafoe èn a ben tron leki libisma. Moro srefi, di a ben de ini a fasi foe libisma, a ben saka ensrefi èn a ben gi jesi srefi te na dede, ija, dede na wan pina-oedoe” (Filipisma 2:5-8). Soema ben kan drai en baka dorodoro gi ensrefi moro leki Jesus? Efoe joe de foe Krestes Jesus èn joe na wan foe en bakaman, joe moesoe tan hori a srefi fasi disi na froestan sei.
11. Libi wan libi foe òfer wisrefi wani taki foe libi gi a wani foe soema?
11 Wan tra apostel, Petrus, e froeteri wi taki, foe di Jesus ben njan pina èn ben dede gi wi, kresten moesoe weri gi densrefi, neleki sroedati di sreka boen, a srefi jeje di Krestes ben abi. A skrifi: „Foe di Krestes njan pina ini a skin, na so oenoe moesoe de toe nanga a srefi fasi foe firi na froestan sei; bikasi a sma di njan pina ini a skin, tapoe foe doe sondoe, so taki foe a tra pisi foe en ten ini a skin, a no libi moro gi den lostoe foe libisma, ma gi a wani foe Gado” (1 Petrus 3:18; 4:1, 2). Jesus en waka nanga libi foe òfer ensrefi ben sori krin fa a ben firi foe doe a wani foe Gado. A ben abi a faste bosroiti foe gi ensrefi na Gado, foe di ala ten a ben poti a wani foe en Tata moro hei moro di foe ensrefi, srefi di a momenti ben doro foe a dede na wan sjen fasi. — Mateus 6:10; Lukas 22:42.
12. A ben de wan tegoe sani gi Jesus foe libi wan libi foe òfer ensrefi? Tjari disi kon na krin.
12 Ala di Jesus en libi foe òfer ensrefi ben de wan moeilek pasi di a ben moesoe waka èn di ben lai nanga foeroe problema, a no ben feni en wan tegoe sani. Na presi foe dati, Jesus ben abi prisiri foe saka ensrefi na ondro a wani foe Gado. Gi en, a doe foe a wroko foe en Tata, ben de neleki njanjan. A ben kisi troetroe satisfaksi foe a wroko disi, neleki te wan sma ben sa njan boen foe switi njanjan (Mateus 4:4; Johanes 4:34). So boen, efoe joe wani foe firi troetroe satisfaksi ini joe libi, dan no wan sani de di joe ben sa kan doe moro boen leki foe waka na baka na eksempre foe Jesus, foe di joe e kweki en fasi foe firi na froestan sei.
13. Fa lobi na a krakti di e poesoe wan sma foe abi a jeje foe òfer ensrefi?
13 Foe troe, san de a krakti di e poesoe wan sma foe abi a jeje foe òfer ensrefi? Nanga wan wortoe, lobi. Jesus ben taki: „’Oenoe moesoe lobi Jehovah, oen Gado nanga heri oen ati èn nanga heri oen sili èn nanga heri oen froestan.’ Disi na a moro bigi èn a fosi komando. A di foe toe, san de a srefi, na disi: ’Oenoe moesoe lobi den sma na oen sei leki oensrefi’” (Mateus 22:37-39). Wan kresten no kan soekoe en eigi belang èn, na a srefi joeroe, e gi jesi na den wortoe dati. En eigi kolokoe nanga belangstelling moesoe kisi tiri fosi èn na a fosi presi foe di a lobi Jehovah èn baka dati foe di a lobi den sma na en sei. Dati na fa Jesus ben libi a libi foe en èn dati na san a e froewakti foe den bakaman foe en.
14. (a) Sortoe frantiwortoe den e tjari kon na krin ini Hebrewsma 13:15, 16? (b) San e poesoe wi foe preiki a boen njoensoe nanga faja?
14 Na apostel Paulus ben froestan a wet disi foe lobi. A ben skrifi: „Meki wi tjari nanga jepi foe en ala ten wan srakti-ofrandi foe prèise gi Gado, dati wani taki den froktoe foe wi mofoboeba di e meki en nen bekènti na poebliki. Boiti dati, no frigiti foe doe boen èn prati sani nanga trawan, foe di den sortoe ofrandi dati e plisi Gado” (Hebrewsma 13:15, 16). Kresten no e tjari ofrandi foe meti gi Jehovah noso so wan sortoe sani; foe dati ede den no abi priester di de libisma, fanowdoe ini wan troetroe tempel foe doe dienst gi na anbegi foe den. A de nanga jepi foe Krestes Jesus taki wi e tjari wan ofrandi foe prèise dati. Èn a de moro foeroe nanga jepi foe na ofrandi foe prèise, a meki bekènti dati foe en nen na poebliki, taki wi e sori wi lobi gi Gado. Spesroetoe a jeje foe wi foe no prakseri wisrefi wawan, di abi en roetoe ini lobi, e gi wi a deki-ati foe preiki a boen njoensoe nanga faja, foe di wi e doe moeiti ala ten foe de nanga a faja lostoe foe òfer a froktoe foe wi mofoboeba gi Gado. Na a fasi disi wi e sori lobi gi den sma na wi sei toe.
Na òfer di wi òfer wisrefi e tjari foeroe blesi kon
15. Sortoe aksi wi kan aksi wisrefi, foe ondrosoekoe sani ini a tori foe na òfer di wi moesoe òfer wisrefi?
15 Prakseri foe wan momenti foe den aksi di e kon now èn poti prakseri na den tapoe: A model foe mi libi now e sori wan fasi foe waka nanga libi taki mi e òfer misrefi? Den sani di mi abi leki marki e boeweisi taki mi e libi so wan libi? Den memre foe mi osofamiri abi jeje wini foe na eksempre foe mi? (Teki gersi 1 Timoteus 5:8.) San de foe taki foe den pikin di no abi papa nanga mama nanga den weduwe? Den toe abi wini foe a jeje foe mi foe òfer misrefi? (Jakobus 1:27) Mi kan gi moro ten ini mi ofrandi foe prèise Gado na poebliki? Mi man foe soekoe a grani foe go pionier, foe go na Bethel noso a zending-wroko noso mi man foe dini ini kontren pe a fanowdoe gi Kownoekondre preikiman de moro bigi?
16. Fa konifasi ben sa kan jepi wi foe abi wan libi foe òfer wisrefi?
16 Sontron a e teki soso wan pikinso koni foe doe ala san wi man, foe dini Jehovah nanga wan jeje foe òfer wisrefi. Janet, foe eksempre, wan gewoon pionier na Ecuador, ben abi wan foeroeten grontapoe-wroko. Heri esi a schema foe en ben meki a no ben man foe doro den gewoon pionier joeroe moro nanga prisiri. A ben teki a bosroiti foe tjari a problema disi kon na krin gi a wroko basi foe en èn ben aksi foe saka den wroko joeroe foe en pikinso. Foe di a basi no ben wani foe saka den wroko joeroe foe en, ne Janet ben tjari Maria nanga en, di ben soekoe wan afoe dei wroko, so taki a ben kan pionier. Ibriwan foe den ben pristeri foe wroko wan afoe dei èn prati wan heri dei wroko nanga makandra. A wroko basi ben agri nanga a pristeri dati. Now ala toe sisa de gewoon pionier. Di Kafa ben si a toemoesi moi bakapisi disi, ala di a ben weri toe foe wroko a heri dei gi a srefi wrokopresi èn ben feti foe doro den pionier joeroe foe en, a ben teki Magali nanga en èn ben doe a srefi pristeri. A basi ben teki a pristeri dati toe. So boen, fo sisa man foe pionier, na presi foe toe di ben de foe libi a foeroeten diniwroko. Koni èn foe di den fosi ben doe wan sani, ben abi boen bakapisi.
17-21. Fa wan trowpaar ben go loekoe a marki ini den libi baka èn nanga sortoe bakapisi?
17 Moro fara, poti prakseri na tapoe a pasi foe òfer ensrefi di Evonne ben waka, ini den tin jari di pasa. Ini mei 1991 a ben skrifi a Waktitoren Genootschap a brifi di e kon now:
18 „Ini oktober 1982, mi nanga mi famiri ben go teki wan koiri na Brooklyn Bethel. Di mi ben si dati, mi ben wani doe friwani wroko drape. Mi ben leisi wan aksi-formulier èn wan aksi ben de di ben naki mi ati: ’San na joe gemiddelde joeroe ini a velddienst gi den siksi moen di pasa? Efoe a gemiddelde joeroe de moro mendri leki tin joeroe, tjari kon na krin foe san ede disi de so.’ Mi no ben man feni wan boen reide gi den lagi joeroe foe mi, so boen mi ben poti wan marki foe doro en feifi moen langa.
19 Srefi ala di mi ben kan denki foe wan toe reide foe no go pionier, di mi ben leisi a Jariboekoe foe Jehovah Kotoigi 1983, mi ben abi na overtoigi taki trawan ben wini moro bigi problema leki di foe mi, so taki den ben man pionier. So boen, 1 april 1983, mi ben tapoe nanga mi foeroeten grontapoe-wroko pe mi ben wroko foeroe moni èn mi ben tron wan jepipionier èn 1 september 1983 mi ben go ini a gewoon pionierwroko.
20 Mi ben prisiri foe trow nanga wan boen dinari ini a diniwroko ini april 1985. Dri jari baka dati, wan lezing tapoe a distriktkongres di ben taki foe a pionierwroko, ben meki a masra foe mi sjoesjoe ini mi jesi èn aksi mi: ’Joe e si wan reide foe san ede mi no ben sa bigin pionier 1 september?’ Makandra nanga mi a ben doe a wroko disi den toe jari baka dati.
21 A masra foe mi ben gi ensrefi foe doe friwani wroko na a bow-wroko na Brooklyn Bethel toe wiki langa èn a ben aksi foe kon ini na Internationaal Bowprograma. So boen ini mei 1989 wi ben go na Nigeria foe wan moen foe jepi bow a bijkantoro. Tamara wi sa rèis go na Doisrikondre pe den sa regel visum gi oenoe foe go na Polen. Wi breiti foe abi foe doe nanga so wan spesroetoe bow-wroko drape, di sma no sa frigiti èn foe abi wan prati na a njoen fasi disi foe doe foeroeten diniwroko.”
22. (a) Fa wi, neleki Petrus, sondro foe wi sabi kan tron wan ston foe naki foetoe fadon? (b) Foe san a dini foe Jehovah nanga wan jeje foe òfer wisrefi no e anga?
22 Efoe joesrefi no man pionier, joe kan gi denwan di de ini a foeroeten diniwroko a deki-ati foe hori tranga na a grani foe den èn kande jepi den srefi foe doe dati? Noso joe sa de leki son wan foe den famiri memre noso mati di abi den moro boen prakseri neleki Petrus di sa taigi wan sma ini a foeroeten diniwroko foe go bro joe skin pikinso èn foe libi wan switi libi, foe abi switifasi gi ensrefi, ala di den no e froestan fa dati kan de wan ston foe naki foetoe fadon? A troe, taki efoe a gosontoe foe wan pionier de serjoesoe ini kefar noso efoe a no e doe en kresten plekti, a kan de taki a sa moesoe tapoe foe wan pisi ten nanga a foeroeten diniwroko. Foe dini Jehovah nanga wan jeje foe òfer wisrefi no e anga foe wan nen, so leki pionier, Bethel wrokoman, noso wan trawan. Na presi foe dati, a e anga foe san wi de leki sma — fa wi e prakseri, san wi e doe, fa wi e handri nanga trawan, fa wi e libi a libi foe wi.
23. (a) Fa wi kan go doro foe abi a prisiri foe de kompe wrokoman nanga Gado? (b) Sortoe djaranti wi e feni ini Hebrewsma 6:10-12?
23 Efoe troetroe wi abi wan jeje foe òfer wisrefi, dan wi sa abi a prisiri foe de kompe wrokoman nanga Gado (1 Korentesma 3:9). Wi sa abi a satisfaksi foe sabi taki wi e plisi na ati foe Jehovah (Odo 27:11). Èn wi abi a djaranti taki Jehovah no sa frigiti wi noiti noso libi wi so langa wi e tan getrow na en. — Hebrewsma 6:10-12.
[Foetoewortoe]
a Ini a Grikitongo „ston foe naki foetoe fadon” (σκάνδαλον, skanʹda·lon) ben de biginbigin „a nen foe wan pisi foe wan trapoe di a beti ben fasi na en èn di ben de foe dati ede a trapoe srefi.” — Vine’s Expository Dictionary of Old and New Testament Words.
San na den prakseri foe joe?
◻ Fa Petrus, sondro foe a sabi, ben tron wan ston foe naki foetoe fadon ini wan waka nanga libi foe na òfer di wan sma e òfer ensrefi?
◻ San a wani taki foe drai joe baka gi
joesrefi?
◻ Fa wan kresten e tjari a pina-oedoe foe en?
◻ Fa wi kan kweki èn tan abi wan jeje foe òfer wisrefi?
◻ San na a krakti di e poesoe wan sma foe abi a jeje foe òfer ensrefi?
[Prenki na tapoe bladzijde 15]
Joe wani drai joe baka gi joesrefi, teki joe pina-oedoe èn waka doronomo na Jesus baka?