Waka na Jesus baka doronomo
1 Na wan okasi Jesus ben taki: „Efoe wan sma wani kon na mi baka, meki a drai en baka gi ensrefi èn teki en pina-oedoe èn waka na mi baka doronomo” (Mat. 16:24). Seiker wi wani doe wan sani troetroe na tapoe den wortoe foe Jesus. Meki wi ondrosoekoe san ibri pisi foe a kari foe en wani taki.
2 „Meki a drai en baka gi ensrefi”: Te wi e gi wisrefi abra na Jehovah, dan wi e drai baka gi wisrefi. A moro prenspari sani di a Griki wortoe di ben vertaal nanga „drai en baka gi ensrefi” wani taki, na „foe taki no”. Dati wani taki dati wi moesoe wani gowe libi den ambisi foe wi, den winsi, lostoe, den sani di e meki a libi makriki, èn den prisiri pe wi e prakseri wisrefi nomo—foe di wi abi a fasti bosroiti foe plisi Jehovah foe têgo.—Rom. 14:8; 15:3.
3 „Teki en pina-oenoe”: A libi foe wan kresten na wan libi pe a e tjari a pina-oedoe foe a diniwroko gi Jehovah, di de leki wan ofrandi. Wán fasi fa wi kan sori taki wi abi a jeje foe òfer wisrefi, na te wi e doe tranga moeiti na ini a diniwroko. Te leki now na ini a jari disi, foeroe preikiman njanboen foe a jepi-pionierwroko. Kande joe de na den mindri èn joe kan taki troe, taki den blesi di joe kisi foe dati, de moro leki den òfer di joe e tjari. Den wan di no man foe dini leki jepi-pionier, foeroetron sreka sani foe man gebroiki moro ten na ini a preikiwroko leki gemeente preikiman. Nanga a marki dati na prakseri, wan toe gemeente e poti den velddienst konmakandra wan toe miniti moro froekoe na tapoe schema leki fa den ben doe dati fosi. Wan toe sma ben abi toemoesi moi bakapisi toe te den ben teki a bosroiti foe fisiti ’wán oso nomo ete’ noso foe wroko ’soso wan toe miniti moro langa’.
4 Wan tra fasi fa wi kan sori taki wi abi a jeje foe òfer wisrefi, na foe poti marki gi wisrefi. Foe di wan toe sma meki heri boen plan èn foe di den kenki a schema foe den, meki den tron gewoon pionier. Tra sma ben man foe sreka den afersi foe den na so wan fasi taki den ben kan meki densrefi fri gi Bethelwroko noso a zendelingwroko. Wan toe sma froisi go na wan kontren pe moro Kownoekondre preikiman de fanowdoe.
5 „Waka na mi baka doronomo”: Ala di den disipel foe Jesus ben ondrofeni foeroe tesi, tokoe den ben kisi deki-ati foe a faja foe en èn a horidoro foe en na ini a diniwroko (Joh. 4:34). Den ben firi taki a jeje foe den ben kon njoen baka te den ben de na en èn te den ben jere a boskopoe foe en. Dati na foe san ede den wan di ben waka na en baka ben skèin troetroe prisiri (Mat. 11:29). Meki wi so srefi gi makandra deki-ati foe horidoro na ini a toemoesi prenspari wroko foe preiki a Kownoekondre èn a wroko foe meki disipel.
6 Meki a de so, taki wi alamala e doe wan sani troetroe na tapoe a kari di Jesus e gi foe waka doronomo na en baka, foe di wi e kweki a jeje foe òfer wisrefi. Te wi e doe dati, dan wi sa abi foeroe prisiri nownow èn wi kan froewakti moro foeroe blesi srefi na ini a ten di e kon.