San Jehovah e aksi foe joe?
„A ben verteri joe, o grontapoe soema, san boen. En san Jehovah e aksi baka foe joe, dan foe doe reti, en lobi boenfasi, en waka safri nanga joe Gado?” — Micha 6:8.
1. Soema dem ben aksi na aksi di de ini Micha 6:8 en foe sainde?
OPREGTI soema sa aksi demsrefi kande: ’San wi moe doe foe prisiri Gado?’ Ma na profeeti foe Gado no ben habi dem soortoe reti-ati soema dati, di ben soekoe Gado, na prakseri, di a ben aksi na aksi ini Micha 6:8. Na aksi dati moro foeroe ben poti gi wan pipel di na Almakti Gado ben habi wan kroetoe nanga hem (Micha 6:1, 2). Na pipel disi, Israël, no ben doe hem verplekti foe na verbontoe gi na Moro Heewan, en disi ben tjari leki bakapisi wan sari fadon komoto foe moreel wetti. Bidrigi-fasi, kwinsi trawan, kroetoedoe, afkodree nanga trowe broedoe ben de moro foeroe foe si. Na situatie ben de so ogri dati wan soema no ben kan vertrouw hem moro boen mati nanga famiri. — Micha 1:5; 2:1, 3:1-3; 6:12; 7:2-6.
2. Soortoe okasi dem woortoe foe Jehovah, dati a ben sa habi wan kroetoe nanga dem Israël soema, ben opo gi dem?
2 Dem woortoe dati Jehovah ben sa hori wan kroetoe nanga hem pipel, di no ben de getrouw, ben de leki wan kari gi dem foe sori berouw. Dem Israël soema ben kisi foe jere, dati dem ben kan lon komoto foe wan ogri kroetoe, te dem ben sa doe positief sani foe kon ini wan boen fasi na fesi foe Gado. San ben de fanowdoe foe dati? Na sori na dorosee, dati wan soema e dini Gado, nanga na tjari foe dem moro boen slagti-ofrandi, no ben nofo (Micha 6:6, 7). Ini na profeeti-tori Micha ben verteri: „A ben verteri joe, o grontapoe soema, san boen. En san Jehovah e aksi baka foe joe, dan foe doe reti, en lobi boenfasi, en waka safri nanga joe Gado?” — Micha 6:8.
’A BEN VERTERI SAN BOEN’
3. San dem Israël soema ben leri nanga mofo foe Mozes foe san ben boen?
3 Jehovah Gado no ben libi hem pipel sondro foe verteri dem san boen. Hondro hondro jari na fesi Mozes ben taki gi dem Israël soema: „Soortoe tra sani Jehovah, joe Gado, e aksi foe joe, dan foe frede Jehovah, joe Gado, en waka ala dem pasi foe hem en lobi hem en foe dini Jehovah, joe Gado, nanga joe heri ati nanga joe heri sili, foe hori dem komando foe Jehovah nanga hem weti, di mi e komanderi joe, foe na boen foe joe?” — Deut. 10:12, 13.
4. Soortoe winimarki dem Israël soema ben sa kisi te dem ben sa lobi Jehovah en gi jesi na hem komando?
4 Na ala fasi, disi ben sa dini dem moro boen afersi foe Israël te dem ben sori wan dipi lobi gi Jehovah Gado en ben hori loyaal hem komando. Gi jesi na a wet foe Gado ben gi dem na djaranti foe na kibri di Jehovah ben sa kibri dem en gi dem alatem hem blesi ini ala san dem ben sa doe (Deut. 28:1-13). Na a tra see, te dem sa veragti na wet foe Gado, dan disi ben sa tjari onsekerfasi nanga pori kon. — Deut. 28:15-68.
5. Foe sainde te wi e gi jesi na Jehovah, disi de foe na tanboen foe wi?
5 Na a srefi fasi ini disi tem a de toe, dem soema, di habi troe troe lobi gi Gado en di e proberi foe libi akroederi dem wetti foe hem, e proberi foe waka wan fasi, di e dini dem moro boen afersi foe dem. Foe sainde disi de so? Foedi Jehovah de wan koni en lobi-ati Gado, a ben gi soso komando, di ben sa meki na tanboen foe libisoema go na fesi (Rom. 16:27; 1 Joh. 4:8; 5:3). Lobi de na troe troe fundamenti foe ala dem wetti foe Gado fa libisoema moe de nanga makandra. Na apostel Paulus ben poti krakti tapoe disi, di a ben taki: „No habi no wan paiman na makandra dan foe lobi makandra; bikasi na soema di lobi tra soema, ben doe na wet. Bikasi na wet: ’Joe no moe doe soetadoe, joe no moe kiri, joe no moe foefoeroe, joe no moe lostoe’ ofoe soortoe tra gebod de toe, de kon wan ini na woortoe disi, foe taki: ’Joe moe lobi tra soema leki joe srefi’. Na lobi no de doe tra soema ogri; foe datede na lobi de na kon troe foe na wet” (Rom. 13:8-10). A de krin dati te libisoema alape na grontapoe ben sa sori troe lobi gi tra soema, disi ben sa tjari kolokoe, vreede nanga sekerfasi kon.
6. Foe sainde a de joisti nomo foe lobi Jehovah en jere hem komando?
6 Moro fara, a de joisti nomo, dati wi sori wi lobi gi Gado te wi e gi jesi na hem komando (2 Joh. 6). „Nanga jepi foe hem wi habi na libi en wi e beweegi wisrefi en wi de” (Tori foe dem Apostel 17:28). Foe datede na fasi foe wi moe de leki dem 24 owroeman di na apostel Johannes ben si ini wan visioen. Dem ben bari tranga: „Joe, Jehovah, ja wi Gado, de waarti foe kisi na glori, nanga na grani nanga na krakti, bikasi joe ben meki ala sani, en foedi joe ben wani dem ben de en joe ben meki dem.” — Openb. 4:11.
„DOE RETI”
7. (a) San na wet foe Gado ben aksi foe dem Israël soema tapoe na tori foe retifasi? (b) Fa na doe foe reti ben sa tjari wini kon gi na pipel ini dem dee foe Micha?
7 Foedi Jehovah Gado „lobi retidoe nanga retifasi”, a ben aksi foe dem lsraël soema dati dem waka ini disi na hem baka (Ps. 33:5). Na wet foe hem ben poti na wan see foe bai trawan kon na joe see nanga wan tjoekoe, en a ben aksi dati goedoeman nanga pôtiman sondro foe teki wan see ben moe kisi dem reti. Wi e leesi: „Joe no moe boigi na reti. Joe no moe teki wan see, so toe joe no moe teki tjoekoe, bikasi tjoekoe e breni na ai foe dem koniwan en a de drai dem woortoe foe dem reti doe-wan. Retifasi — retifasi, joe moe feti na hem baka, foe joe kan tan na libi” (Deut. 16:19, 20). „No teki wan see, ini na taki foe reti: no poti dem pôtiman na fesi en no loekoe dem goedoeman ini dem ai. Taki nanga retidoe reti gi joe kondreman” (Lev. 19:15, Willibrordvertaling). Te Israël ben teki nanga boen na tranga foe Micha foe „doe reti” dan dem kondisi ben sa kenki. Na kwinsi foe trawan no ben sa kon foeroe. Orde nanga wet ben sa kon na hee, en disi ben sa tjari vreede, sekerfasi nanga tan-vaste-fasi kon.
8. (a) Otem dem e aksi foe kristen owroeman dati dem doe reti en fa dem kan doe disi? (b) Fa na vermane ini 2 Thessalonika 3:11-15 habi foe doe nanga retifasi?
8 Ooktoe kristen soema de ondro na komando foe „doe reti”. Owroeman kande moe teki na bosroiti ofoe wan bepaalde kristen brada boen foe de wan dinari ini na diniwroko ofoe wan owroeman. Dem kan handri na afersi disi sondro teki wan see te dem hori demsrefi loyaal na a Woortoe foe Gado en poti vetrouw tapoe na tiri foe hem jeje. Ooktoe dem kan aksi foe hem foe teki bosroiti tapoe na tori foe kompe-bribiman di doe bigi sondoe (1 Kor. 6:1-6; 1 Tim. 5:20-22, 24, 25). Na net so toe aparti kristen soema kande moe teki bosroiti ofoe na takroe fasi foe doe foe bepaalde soema ini na gemeente, de meki dem de soema di joe no kan hori matifasi nanga dem. Ooktoe ini na pisi tori disi, a wani teki dati na joisti doe foe reti sa de, dati na bosroiti moe habi hem gron tapoe Gado Woortoe en no tapoe wan eegi prakseri na fesi ofoe tapoe prakseri di no de akroederi nanga na bijbel. Dati wan soema tapoe foe habi switi demakandra nanga bepaalde kompe-bribiman, moe kon foe na lostoe foe meki dem firi, dati dem moe kenki dem fasi foe libi en waka. A no wani taki dati wan soema no e sori switi-fasi gi dem soortoe soema dati en dati „joe e handri dem leki feejanti”. Dem soema disi wi moe tan „vermane leki brada” (2 Thess. 3:11-15). Dem soema di e waka baka na rai disi foe na bijbel, e kisi kibri foe no kon ondro wan ongosontoe krakti. — 2 Tim. 2:20-22.
9. Fa wan kristen soema, leki fa Jakobus 4:11, 12 taki, no ben sa doe reti na wan kompe-bribiman?
9 Ma efoe kristen soema ben sa kroetoe foe kompe bribiman dem fasi foe libi nanga waka, dem beweegi foe ati nanga dem eegi wetti en prefoeroe foe bepaal na waarde di wan soema habi, sondro foe dem kisi na makti foe doe dati, dan dem no ben sa sori retifasi. Loekoe san na discipel Jakobus ben skrifi: „No taki moro langa ogri foe makandra, brada. Na soema di taki ogri foe wan brada ofoe di e kroetoe hem brada, e taki ogri foe na wet en e kroetoe na wet. We now dan, efoe joe de kroetoe na wet, dan joe no de wan doeman foe na wet, ma wan kroetoebakra. Wàn de na soema di e gi wet en di de kroetoebakra, hem di man foe jepi en foe pori sani. Ma joe, soema na joe, dati joe de kroetoe tra soema?” (Jak. 4:11, 12). Te soema e kroetoe sani na so wan fasi, dan dem e poti demsrefi moro hee leki na wet foe lobi di Gado ben gi, foedi dem e prakseri dati na wet foe lobi no de foe dem moe hori (Matt. 22:36-39; loekoe toe 1 Johannes 3:16). Na sofasi dem ben sa trapoe nanga foetoe Jehovah wet foe retifasi, di habi leki fundamenti lobi.
10. Foe sainde a no reti foe habi na prakseri dati wan bepaalde groepoe soema e verdini moro na „boen njoensoe” leki wan tra groepoe soema?
10 Boiti dati, wan kristen soema no ben sa doe reti te a ben sa prakseri dati wan bepaalde groepoe soema verdini na „boen njoensoe” moro leki wan tra groepoe. Jezus Kristus ben dede gi na heri libisoema-famiri en a de na wani foe Gado dati na boskopoe foe redding meki bekenti sondro partij-fasi (1 Tim. 2:3-6). Foe datede a de akroederi troe troe nanga na geest foe onpartijdigfasi foe visiti ibri oso ini kondre pe a kan foe visiti dem soema na dem oso. Aladi bepaalde groepoe soema sa habi na gwenti foe arki moro, tokoe wi moe loekoe boen foe no gi wisrefi abra na a firi foe loekoe wan soema moro betre leki na trawan. — Loekoe Jakobus 2:1-9.
„LOBI BOENFASI”
11. San na woortoe „lobi boenfasi” wani taki?
11 Boiti dati Jehovah ben aksi foe dem Israël soema dati dem ben moe doe reti, dem ben kisi na komando „foe lobi boenfasi”. Dem woortoe „lobi boenfasi” wi kan kari dem toe leki „lobi lobi-boenfasi” ofoe „lobi loyale lobi”. So wan „lobi-boenfasi” de wan actief, sarihatti brok-ede ofoe consideratie gi tra soema. A de wan boenfasi di e sori hemsrefi ini doe foe sani. (Loekoe Ruth 2:8-20; 3:10.) „Lobi boenfasi” wani taki habi prisiri ini boenfasi ofoe sori switifasi, sodati wan soema nanga prisiri e jepi tra soema.
12. San e sori dati Jezus troe troe ben lobi „boenfasi”?
12 Jezus Kristus ben poti ini disi wan toemsi moi eksempel. Srefi di a ben weri en dem ben trobi hem ini hem rostoe, a ben jepi dem soema nanga prisiri nanga dem fanowdoe foe dem. Foe wan foe dem okasi disi na bijbel e taigi wi: „Baka dati a ben teki (dem apostel) nanga hem en a ben go ini wan foto di ben nem Bethsaïda foe ben kan de hem wawan. Ma dem hipi soema ben kon sabi dati en dem waka go na hem baka. En a ben ontvange dem nanga switifasi en a ben taki nanga dem foe na kownoekondre foe Gado, en dem di ben habi fanowdoe foe ben kon gosontoe, a ben meki dem kon gosontoe” (Luk. 9:10, 11). A ben gi Jezus toemsi foeroe prisiri foe sori so wan boenfasi nanga switifasi.
13. Fa wi ben kan sori ini disi tem dati wi „lobi boenfasi”?
13 Efoe joe de wan discipel foe Jezus Kristus, joe „lobi boenfasi” dan? Joe de poti eegi gerief nanga lostoe na baka, sodati joe kan jepi na jeje en na skin-fasi dem soema di habi dati fanowdoe? Net soleki a ben de nanga Jezus, joe de firi sarihatti te joe de si dem sari jeje fasi foe dem soema di no habi joisti sabi? (Mark. 6:34). Joe de gi trawan, ooktoe joe sabiman nanga famiri jeje troostoe nanga ala prisiri? Ibri moen joe de poti ooktoe tem na wan see foe habi wan redelijk pisi ini na publiki preekiwroko? (Loekoe Openbaring 22:1, 2, 17). Te joe e si dati kompe-bribiman ofoe trawan e de ini troe troe nowtoe na skinfasi, joe de firi ini joe ati foe go jepi dem? (Spr. 3:27, 28; 2 Kor. 8:1-4; 9:6-12). Efoe wi „lobi boenfasi” troe troe, dan disi moe de troe troe so nanga wi.
„WAKA SAFRI NANGA JOE GADO”
14. San na a betekenis foe na Djoe woortoe di vertaal nanga „safri”?
14 Na profeeti-tori foe Micha ben gi dem Israël soema tranga foe waka „safri nanga joe Gado”. Foedi na Djoe woortoe, di vertaal ini Micha 6:8 nanga „safri”, soso dja ini Spreuken 11:2 joe e feni hem, wi no kan si so makriki san na woortoe disi wani taki troe troe. Bakatem djoe skrifi e verteri dati na djoe woortoe habi na prakseri foe soifrifasi nanga wan fasi di fiti. Na Septuagintavertaling nanga na Syrische Petjitta e gi na prakseri foe „sreka” ofoe „klari” foe waka nanga Gado. Na presi dati weka safri nanga Jehovah soboen soso de wan afersi foe sakafasi, a de krin dati a wani taki dati wan soema e teki wan presi di fiti na fesi foe hem sondro foe taki dati a habi reti na tapoe en sondro foe vertrouw na hemsrefi tapoe.
15. Soleki wi kan si ini na eksempel foe Henoch nanga Noach, san dem woortoe „waka nanga Gado” wani taki?
15 Dem woortoe „waka nanga Gado” e kon na a bigin foe na bijbel tori kaba. Foe na profeeti Henoch nanga na famiri-edeman Noach foe eksempel na bijbel e taki dati dem ben waka nanga Gado. Foe Noach wi e leesi: „Noach ben de wan man foe retidoe. A ben sori hemsrefi sondro fowtoe na mindri foe dem soema foe hem tem. Noach ben waka nanga na troe Gado” (Gen. 5:24; 6:9). Ooktoe Henoch ben „prisiri Gado” (Hebreeër 11:5). Waka nanga Gado foe datede wani taki foe tjari wisrefi tapoe so wan fasi leki wi de pe Gado de; a wani taki dati skeki wi wisrefi na a wani foe hem. Henoch soleki Noach ben prisiri demsrefi ini wan spesroetoe krosbee matifasi nanga Jehovah en disi ben kon foe dem bribi nanga getrouw-fasi.
16. (a) Efoe wi e waka safri nanga Gado, fa wi waka nanga libi moe de dan? (b) Soortoe boen krakti a kan habi te na eksempel di wan kristen e gi ini hem libi, de foe prijse?
16 Efoe kristen soema wani de ini wan joisti fasi, pe dem kan tan prisiri demsrefi ini wan krosbee matifasi nanga Jehovah Gado, dan dem moe de so safri dati dem e waka nanga hem en tan ini hem ai sondro foe feti gi wi reti, santa nanga wan fasi di fiti. Na bijbel habi na rai: „En meki na libi en waka foe oen de opregti na mindri dem naatsi, foe dem soema, disi de pori oen nem taki, oen de doe ogri, moe si dem boen wroko foe oenoe en foe dem prijse Gado na a dee, disi sa meki alasani kon na krin” (1 Petr. 2:12). Ja, wan toemsi moi eksempel tapoe na kristen waka nanga libi e gi krakti na a publiki preeki foe na „boen njoensoe”. A de sori dati na troe aanbegi e wroko boen tapoe na libi foe sma en kan tapoe na mofo foe sma di e taki ogri foe dem troe discipel foe Kristus (1 Petr. 2:13-16). Dem soortoe soema di e taki ogri foe kristen soema, kan go si na fowtoe foe dem fasi foe doe, aladi baka wan pisi tem dem srefi kan tron soema di e prijse Jehovah Gado.
17, 18. (a) San Jehovah e aksi foe ala soema, di feni boen-ati ini hem ai soleki Micha profeeti-tori nanga Jakobus 1:22-25 e sori? (b) Fa a srefi punt disi e kon na fesi ini na fasi fa Henoch nanga Noach ben waka nanga Gado?
17 Dem woortoe foe na profeeti Micha no e meki wi degedege dati foe na see foe ala soema, di wani prisiri Gado, dem moe doe wan sani. Na punt disi na discipel Jakobus e tjari ooktoe krin kon na fesi: „De doeman foe na woortoe en no wawan jereman foe na woortoe, kori joesrefi nanga falsi prakseri. Bikasi efoe wan soema de wan jereman foe na woortoe en no wan doeman, dan a gersi wan man di e loekoe hem fesi ini wan spriki. Bikasi a de loekoe hemsrefi en a de gwe en a de frigiti soortoe man a ben de. Na soema di na a tra see, de tan loekoe ini na volmaakti wet, di de foe na fri en a de tan na dati, hem sa de kolokoe efoe a doe hem, bikasi a no de jereman di e frigiti ma wan doeman foe na wroko.” — Jak. 1:22-25.
18 A no nofo te wi de begi wawan, e leesi na bijbel en e visiti kristen konmakandra, aladi wi de arki drape nanpa respeki san e taki drape. Wi moe sori ini wi libi dati wi de opregti, lobi boenfasi en waka safri nanga Jehovah. Na waka foe Henoch nanga Noach nanga na Moro Heewan tapoe wan fasi sondro fowtoe ben habi na ini foe wroko faja faja. Sondro frede Henoch ben taki profeeti-tori, di a ben verteri dem ogri soema ini hem tem, dati Jehovah ben sa tjari strafoe kon nanga jepi foe myriaden engel (Judas 14, 15). Noach no ben jepi wawan foe bow na ark foe kibri hem osofamiri nanga dem basissortoe foe dem meti, ma a ben de ooktoe wan „preekiman foe retidoe”, di ben meki bekenti na warskow foe na pori di ben sa kon tapoe dem soema foe hem tem. — 2 Petr. 2:5
19. San wi ben sa kan aksi wisrefi foe bepaal ofoe wi e libi akroederi Micha 6:8?
19 Discipel foe Jezus Kristus no moe bidrigi demsrefi foe prakseri dati na habi foe wan switi eegifasi nanga na teki prati na a publiki aanbegi de nofo foe kisi na boen-ati foe Jehovah Gado. Na actief sori foe broko-ede nanga sari-ati gi tra soema moe kon na fesi. Dem kan taki dati foe joe? Joe de klari en joe de nanga na lostoe, sondro foe joe sori partijfasi, foe jepi soema lekti dem nowtoe di dem habi na skin en jeje fasi? Joe de doe leki fa na komando taki foe preeki en meki discipel faja faja? (Matt. 28:19, 20). Na libi en waka foe joe de wan sani di trawan kan waka na hem baka? Efoe a de so, dan joe de libi akroederi dem woortoe ini Micha 6:8, di skrifi nanga jepi foe santa jeje.