Bribi ini Gado pikin — Sortoe krakti a moe abi tapoe joe?
„Tjari joesrefi tapoe wan fasi di de warti gi na boen njoensoe foe Kristus . . . Dati joe tanapoe fasti ini wàn geest, wàn foe sili, feti sé na sé gi na bribi foe na boen njoensoe.” — Filippi 1:27.
1. (a) Sortoe wroko e doro na hémarki foe hen now? (b) San e sori dati nownow bribi de troe troe na grontapoe?
DEN profétitori di kon troe e sori dati wi de fara ini na „bosroiti foe na seti foe sani” (Matt. 28:20). A de now moro leki 64 jari di pasa kaba sensi na „Libisoema Pikin”, Jezus Kristus, nanga ala hen engel ben kon foe „teki presi tapoe hen glori hemel troon”. Na kroetoe nanga na prati „foe den soema ini getrouw „skapoe” en ontrouw „boko” e doro hen hémarki (Matt. 25:31-33). Foe datede wi e aksi wisrefi: Na „Libisoema Pikin” ben feni troe troe bribi na grontapoe? Na tjari konmakandra foe na internationaal gemeente foe Jehovah Kotoigi — moro leki 2 miljoen kaba — e bewijsi krin dati disi de so kaba.
2. Foe sainde nanga reti den ben skrifi foe kongres foe Jehovah Kotoigi dati den no de „foe disi grontapoe”?
2 Koranti ben skrifi foe den kongres foe Jehovah Kotoigi, dati den „no de foe disi grontapoe”. En den moesoe de wan aparti sani ooktoe! Bikasi Gado pipel e soekoe foe kon boen dorodoro. Na kefarliki bigi gemeente disi, te joe loekoe hen boen, de na pasi foe na onvolmaakti grontapoe foe disiten foe go na wan glori „njoen seti” pe siki, dede nanga sari no sa de moro. Jehovah Wortoe e gi wi na djaranti foe disi! (Openb. 21:1-4) Foe wi kan doro na marki disi, dan wi moe hori fasti na a wini foe wi nanga jepi foe bribi. Fa wi de doe disi?
NA KROETOE FOE NA GRONTAPOE E BIGIN
3. Sortoe kenki ben kon sensi 1914 en san disi wani taki?
3 Di na „bosroiti foe na seti foe sani” ben bigin ini na jari 1914 dan bigi kenki ben bigin foe kon na grontapoe. A ben de soleki Jezus srefi ben taki na fesi — internationaal oorlog, aardbéfi, pestsiki, mankeri foe njanjan, kon moro foeroe foe kroektoedoe en wan mankeri foe lobi (Matt. 24:3-12; Luk. 21:10, 11). Wan ten foe kroetoe ben bigin gi na grontapoe.
4, 5. (a) Fa den religie foe na kristenheid ben sori dati den no abi bribi? (b) Fa den de tra fasi leki Jehovah Kotoigi na a sé for grontapoe? (c) Fa wi e sori na bribi foe wi di noti kan wini hen?
4 Fa den religie foe na kristenheid ben sa doe nanga na situatie? Den ben sa bewijsi foe de winiman nanga jepi foe bribi? Kwetkweti! Na presi foe bribi na „marki”, dati Gado kownoekondre kon krosibé, den kerki fesiman foe na kristenheid ben jepi na seti foe sani di e dede gwe. Di na grontapoefeti ben kon tapoe Europa, dan den kerki gi kristensma na ala toe sé tranga foe kiri makandra en nanga disi den ben poti wan bigi broedoe-paiman na den tapoe. Èn di na oorlog ben kaba, den kerki foe na kristenheid no ben teki na sé foe na kownoe di ben rigeri now, Jezus Kristus, ma den ben teki na sé foe wan politiek skin di libisoema ben meki en di den kari nanga wan nen foe kosi Gado, foe taki na „politiek nen foe na kownoekondre foe Gado tapoe grontapoe”. Disi ben de na Volkenbond, di den ben meki ini 1919 foe djaranti na marki foe grontapoe vréde nanga sekerfasi. Na bijbelboekoe Openbaring e skrifi foe na bond disi leki „wan redi wilder meti di foeroe nanga nen foe kosi Gado”. — Openb. 17:3.
5 Den kerki foe na kristenheid ben sori krin san den de nanga na gi di den gi jepi na a heri oorlog en moro fara na a wrokosani disi di libisoema meki den de wan pisi foe na grontapoe disi. Na a tra sé, Jehovah Kotoigi ben bewijsi, dati „den no de wan pisi foe na grontapoe”, nanga na neutraal sé di den ben teki ini internationaal ogri nanga politiek (Joh. 15:19). Na bribi foe wi no abi leki fundamenti na anoe foe skin ofoe den oorlogwrokosani foe libisoema di e dede. Ma na bribi foe wi di noti kan wini e erken „Gado leki rigeriman moro leki libisoema”. En foedi wi „den gi jesi na Gado . . . leki rigeriman” nanga na gi kotoigi foe na kownoekondreprakseri foe hen, wi de sori dati wi abi Gado jeje (Tori foe den Apostel 5:29-32). Tapoe na fasi disi wi kisi tranga foe doe den wroko, di Jezus ben taki foe den: „Na soema di sori bribi ini mi, hensrefi sa doe ooktoe den wroko di mi e doe; en a sa doe moro bigi wroko leki disi” — nanga na préki foe na kownoekondre di ben opo tapoe na heri grontapoe. — Joh. 14:12.
6. Fa sensi 1919 santa jeje ben de na den mindri?
6 Na santa jeje disi foe Jehovah ben de krin foe si tapoe den internationaal kongres foe Jehovah Kotoigi, di ben hori ini 1919 en ini 1922 na Cedar Point, ini na Amerkan district Ohio. Na geest disi ben tranga na bribi foe na pikin fika-pisi foe salfoe kristen en a ben gi den na krakti foe gi jesi na a kari: „Préki, préki, préki na kownoe nanga hen kownoekondre.” Nanga foeroe faja den ben bigin foe meki na boen njoensoe bekenti ala sé. Na a ten di na ogri Tweede grontapoefeti ben bigin, dan foe wan toe doesoen den ben kon tron moro leki 67.000, di ben préki ini difrenti kondre tapoe grontapoe.
BRIBI E WINI VERVOLGOE
7. Sortoe eksempel e sori dati bribi e wini vervolgoe?
7 Na kon moro foeroe foe soema no ben kon sondro hebi vervolgoe. Foedi foe eksempel den kotoigi foe Jehovah di ben hori na den getrouwfasi ben wégri foe aanbegi na nazi-staat, den ben kisi en tjari den konmakandra ini fisti strafoe-oso-kampoe. Ooktoe 635 foe den dede ini doengroe-oso. Ma na bribi foe den no ben kan broko. Wan soema ben skrifi foe den aparti Kotoigi taki den de leki „wan fortresi, di joe kan pori, ma di joe no kan teki noiti abra”. Wan ai-kotoigi ben taki foe hen égi brada, di nazi-SS-waktiman ben soetoe kiri tapoe wan ogri-ati fasi na publiki: „Ibri soema ben froewondroe foe na rostoe fasi foe hen, soleki wan soema di wini na stré kaba.”
8. (a) Fa kristen bribi ini den moeiliki jari foe na Tweede Grontapoefeti ben go na fesi? (b) Ma san kerki fesiman ben blesi en prijse?
8 Soleki wi ben taki kaba, Jehovah Kotoigi ben go ini den moeiliki jari foe na Tweede Grontapoefeti nanga so wan 67.000 soema, ma den ben komoto ini na feti disi nanga moro leki 141.000 soema. Lantiwet, kisi den poti na droengoe-oso nanga tra tesi tapoe den getrouwfasi no ben meki den drai baka gi den bribi. Ma den religie foe na kristenheid ben gi den blesi na a vervolgoe en kiri poeroe na pasi foe den. En wans fa na „redi wilder meti” no ben meki den kerki fesiman si san den verwakti, tog den ben de esi baka foe ben bari odi gi hen, di a ben kon baka leki na Verenigde Naties. Den ben poti ala den howpoe na tapoe (Openb. 17:3-8). Di Paus Paulus VI ben tjari wan fisiti na a edekantoro foe na VN ini New York ini 1965, a ben prijse na skin disi leki na „moro bigi wan foe ala internationaal organisatie” en „na laatste howpoe tapoe wanfasi nanga vréde”.
NA WINI NANGA JEPI FOE BRIBI DI E GO DORO
9. Sortoe actueel sani Jehovah Kotoigi ben meki bekenti ini 1942? (b) Fa na pipel foe Gado ben hari go na fesi ini na wini foe den?
9 Di foe na fosi tron den geallieerden ben taki foe na opo foe na Verenigde Naties ini 1942, Jehovah Kotoigi tapoe na internationaal congres foe den ben meki bekenti, dati disi de soso na kon baka foe na Bond. Den ben sori nanga jepi foe na bijbel, dati na V.N. te foe kaba sa go ini pori ini na laatste toeka ini Har-mágeddon, makandra nanga ala tra politiek organisatie. Nanga bewijsi di ben lontoe den foe na „ten foe na kaba”, Jehovah pipel ben hari go na fesi ini na wini foe den nanga jepi foe bribi (Dan. 11:35). Ini 1943 na Wachttoren-Bijbelskoro Gilead ben orga en den ben seni zendeling go te na den hoekoe foe grontapoe. Nanga sortoe bakapisi? Aladi ini 1945 141.606 kownoekondreprékiman ben wroko ini 66 kondre, ini 1978 2.182.341 ben gi rapport ini 205 kondre. Na wini nanga jepi foe bribi ben de krin foe si, spesroetoe ini den 40 ofoe moro kondre pe Jehovah Kotoigi e dini now ondro wetti foe lanti di e tapoe den foe doe den prékiwroko.
10. Fa na tesi fasi foe bribi ben sori ini Malawi nanga tra kondre kondre pe lanti wet ben de di tapoe na prékiwroko?
10 Na pikin afrikan kondre malawi mindri den kondre pe tesi tapoe bribi ben hebi, e teki wan spesroetoe presi. Te nanga na jari 1962 Jehovah Kotoigi ini na kondre dati ben gro esesi. Ma dan ini 1964 wan hebi vervolgoe ben kon. Foedi Jehovah Kotoigi no ben wani aanbegi na Malawi-pisi foe na „wilder meti di komoto foe na se” (Openb. 13:1, 4) nanga na bai foe politiek karta, den ben jagi den poeroe foe den oso en foeroe foe den den verkracht nanga kiri den. Te foe kaba na moro bigi pisi foe den den ben jagi poeroe ini den gebortoe kondre. Ma na tesi fasi foe den bribi, di kisi tesi leki nanga faja, ben de wan reden foe prisiri, no wawan gi den srefi, ma gi den kristen brada tapoe na heri grontapoe (1 Petr. 1:7). Ini ala kondre pe den ben dwengi Jehovah Kotoigi foe wroko na kibrifasi, na srefi toemsi moifasi foe bribi de foe si. Ala den Kotoigi disi — en joe abi moro leki 200.000 ini den sortoe kondre disi — de meki na wini foe den nanga jepi foe bribi de wan bigi winimarki.
11. San e sori dati wi moe horidoro ini na wini foe wi nanga jepi foe bribi?
11 Ma san de foe taki foe Jehovah Kotoigi ini kondre pe a de moro makriki, pe wi no de alaten ini na gevaar foe den kisi oenoe ofoe poti oenoe ini strafoe-oso, ofoe pe wi kan lasi wi libi? Na wan sari sani foe wi moe taki dati ini wan toe foe den kondre disi a no de go so boen. Foeroe foe den welvarende kondre de ini den, pe kori foe fadon go ini prisiri nanga hoeroedoe de foeroe pasamarki. Ma noiti wi moe lasi na prakseri: Wi moe horidoro ini na wini foe wi nanga jepi foe bribi te leki wi kon fri foe na seti foe sani disi, ofoe dati pasa now nanga dede ofoe dati wi psa a „bigi benawtoe” en tan na libi.
12. Sortoe wortoe foe Jezus profétitori wi moe prakseri tranga now, èn foe sainde?
12 Fa a de wan tranga fanowdoe sani dati wi alamala verstan disi krin! Alape a de krin foe si, dati na grontapoe e degedege tapoe na lanki foe go na pori. Den „laatste dé” bijna doro na kaba foe den. Dati meki dem laatste wortoe foe Jezus profétitori foe na bosroiti foe na seti foe sani moe de krin ini na jesi foe na heri pipel foe Jehovah ini disi ten leki wan warskow: „Poti . . . prakseri na joe srefi, dati joe ati noiti kon hebi nanga njan pasa marki èn dringi pasa marki èn sorgoe foe na libi, èn na dé dati, ini wan momenti, kon wantron wantron na joe tapoe leki wan trapoe. Bikasi a sa kon tapoe ala soema di de libi tapoe na heri grontapoe. Tan nanga ai, alaten begi, dati joe sa man foe lon komoto foe ala den sani disi, di sa pasa troe troe, èn foe tanapoe na fesi foe Soemapikin.” — Luk. 21:34-36.
NA „FASTI TEN” DE KON KROSBÉ
13. Foe sainde a de wan tranga fanowdoe sani dati wi tan verwakti na kroetoe foe Jehovah?
13 Aladi na „bigi benawtoe” kande no ben kon so esi leki foeroe foe wi ben verwakti, tog dati no de wan reden foe lasi ati. Gado no de kenki (Mal. 3:6). En na so toe hen toemsi bigi prakseri no kenki. Jehovah e taki foe na „boen njoensoe”: „So mi wortoe di e komoto foe mi mofo, sa de. A no sa drai kon na mi sondro winimarki, ma a sa doe troe troe a sani di mi ben abi prisiri nanga hen en a sa abi troe troe winimarki ini na sani di mi ben seni hen” (Jes. 55:11). Na ten dati Gado sa tjari hen kroetoe kon, no poeroe poti na wan tra ten. Ala dé a de kon moro krosibé. Soboen, meki wi prakseri den wortoe foe Jesaja 30:18: „Jehovah de wan Gado foe kroetoe. Kolokoe ala den de di e verwakti hen.”
14. (a) Te wi hori na sortoe vertrouw, wi sa kan meki te foe kaba Jozua wortoe de di foe wi? (b) Sortoe tranga wi e kisi ini Habakuk profétitori?
14 No na afhankelijkheid foe wi foe wan pisi ten, ma na opregti vertrouw foe wi ini Jehovah leki na Gado di „no kan lé”, e meki wi wini nanga jepi foe bribi (Tit. 1:2). Te foe kaba na vertrouw disi sa tjari wi go na punt, pe wi, soleki Jozua ini owroeten, sa kan taki gi wi kompe ini na wini nanga jepi foe bribi: „Oen sabi heri boen nanga oen heri ati èn nanga oen heri sili, dati no wàn wortoe foe ala den boen wortoe di Jehovah, joe Gado, ben taki gi oen, no ben kon troe. Ala sani ben kon troe. No wan wortoe foe den ben tan en no ben kon troe” (Joz. 23:14; 21:45). Wi kan abi vertrouw dorodoro ini den wortoe foe Habakuk: „Na visoen de ete foe na fasti ten, en a de tan nanga hen bro na tapoe go na a kaba.” Meki wi tan nanga na visioen dati nanga wi bro na tapoe te leki na wini foe wi kon boen dorodoro! Na profétitori e gi wi na djaranti: „A no sa verteri wan lé. Srefi wans a sa meki joe wakti tapoe hen, tan loekoe nanga foeroe verwakti foe a kon; bikasi sondro mankeri a sa kon troe. A no sa kon lati.” — Hab. 2:3.
„JEHOVAH NO E DRAI DRAI”
15. (a) Foe sainde wi kan taki dati Jehovah no e drai drai? (b) Fa hen dé e kon te foe kaba?
15 Tina négi hondro jari pasa kaba sensi den dé foe den apostel. Ma ini Gado ai disi no de toe dé. A de soleki na apostel Petrus taki: „No meki na wan sani disi . . . komoto na oen prakseri, lobiwan, dati na Jehovah wan dé de leki doesoen jari èn doesoen jari leki wan dé. Jehovah no e drai drai nanga hen pramisi, soleki son soema e prakseri, ma a abi pasensi nanga oen, bikasi a no wani dati wan soema go lasi, ma a wani dati ala soema kon kisi berouw. Tog Jehovah dé sa kon leki wan foefoeroeman.” — 2 Petr. 3:8-10.
16. Foe sainde Jehovah dé no kon ete, èn fa wi moe doe nanga na situatie?
16 Sortoe difrenti dati e meki efoe Jehovah dé tan naki moro langa tapoe hen oloisi? Wi no bréti dati disi gi ete wan toe hondro doesoen moro foe hen „skapoe” kisi na okasi foe tjari kon makandra? Aladi a oloisi dati e tan naki doro, foeroe tin doesoen lomsoe soema ini zuid-europese kondre e lon go na a kownoekondre, foeroe hondro hondro soema tapoe den farawe eilanti foe se e drai baka gi den afkodré en foeroe doesoen doesoen Aziaat soema e loesoe den srefi poeroe foe Oostsé bijgelovigheden en den e teki na „boen njoensoe”. Na reden foe sainde na dé foe Jehovah di de leki wan foefoeroeman no ben kon ete, de foedi a abi te now ete wroko gi wi foe doe tapoe na tori foe tjari den „tra skapoe” kon makandra. Jehovah no e drai drai. Meki wi no drai drai foe teki ibri okasi foe teki prati dorodoro ini hen wroko.
17. (a) Sortoe actuele rai Petrus e gi foe disi ten? (b) San e meki Jehovah pipel difrenti foe trawan, èn fa den e sori na bribi dati?
17 Na apostel Petrus e gi na rai: „Na kaba foe alsani de kon krosibé. De foe datede gosontoe foe verstan en de nanga ai tapoe na tori foe begi. Moro foeroe abi faja lobi gi makandra” (1 Petr. 4:7, 8). Te safri safri na ogri „seti foe sani” e tjari hen krakti kon makandra foe wan laatste moeiti foe pori na pipel foe Gado, dan wi moe tan sondro degedege, nanga ai en ini begi, nanga na overtoigi foe na wini foe wi nanga jepi foe bribi. Wi moe tan wàn ini na faja lobi, di de ooktoe wan aparti marki foe Jehovah égi pipel alape na grontapoe. Oten joe ben abi ini na heri libisoema historia wan pipel soleki Jehovah Kotoigi foe now? Disi de na wan enkri bradafasi di pasa go doro te na ala oekoe foe na grontapoe pe libisoema e libi. Sortoe tra krakti dan leki na geest foe Jehovah ben sa kan tjari kon wan toe miljoen soema „foe ala naatsi en lo èn volkoe èn tongo” ini so wan wondroe wanfasi foe bribi, doel nanga activiteit? Makandra wi ben wini na wini nanga jepi foe bribi en makandra wi de panja na bribi dati nanga na gi foe kotoigi foe Jehovah kownoekondre nanga jepi foe hen Pikin. — Openb. 7:9.
TE SAFRI SAFRI NA KABA E KON KROSIBÉ
18, 19. (a) Fa den sani ben pasa ini den dé foe den apostel leki wan kon troe foe den bijbel profétitori? (b) Sortoe sari fowtoe son wan kande ben meki?
18 Jehovah pipel foe now de leki den getrouw kristen soema ini na Jeruzalem foe na ten foe den apostel, di ben loekoe nanga loestoe na a fosi kon troe foe na „marki”. Den ben loekoe na a kon foe „na tegoe sani”, di ben sa tanapoe ini na „santa presi”. Te foe kaba a ben pasa! Na Romein sroedatimakti ben fadon kon en hari go doro srefi te na a westsé skotoe foe na tempelkontren. San den kristen ben moe doe now? Jezus ben taki dati den „ben moe lon go na den bergi”. Di na sroedatimakti dati ben hari gwe onverwakti, den ben teki na okasi. Den ben lon gwe! Den hari go na den bergi foe Peréa. Ma den ben kibri kaba den libi? Na wini foe den nanga jepi foe bribi ben boen dorodoro? No ete! — Matt. 24:15, 16.
19 Nanga ala den prakseri den kristen dati ben wakti tapoe den tra sani di ben moe kon — Na kroetoe di Jehovah ben sa tjari kon tapoe Jeruzalem. Den ben wakti wan jari. Noti ben pasa. Toe jari en noti ben pasa. Dri jari en ete noti ben pasa. Son wan foe den kristen kande ben kon weri foe wakti. Den ben kan taki kande: Meki wi drai go baka na a foto en doe zaak en abi hen makriki.” Wan sari fowtoe dati ben sa de!
20. Fa bribi ini na ten dati ben tjari redding kon?
20 Bikasi wantron wantron, ini na di foe fo jari, den Romein sroedatimakti ben drai kon baka. Na foto nanga hen tempel ben pori krin krin èn no wan ston ben tan tapoe wan trawan. A ben de precies soleki Jezus ben taki na fesi (Luk. 19:41-44; 21:20-24). Ma na pipel foe Gado dorosé foe Judéa ben de actief en ben tan nanga. ai. Den ben wakti tapoe Jehovah. Na bribi foe den ben meki den kisi libi.
21. Sortoe kon troe foe bijbel profétitori tapoe wan aparti fasi ben de ini 1945?
21 Ini na ten disi wi de ini net so wan situatie. Na kristenheid de na agersi ontrouw foto Jeruzalem foe owroeten. Na „tegoe sani” ini na profétitori foe Jezus na bijbel e meki wi kon sabi dati krin leki na organisatie foe na Verenigde Naties ini disi ten, ofoe nanga tra wortoe na „redi wilder meti” foe Openbaring kapitel 17. Di na „meti” dati ini 1945 ben opo komoto foe na peti di no abi gron, na grontapoemakti foe falsi religie, „na Bigi Babylon”, di na kristenheid de na moro prenspari pisi foe hen, ben kan go rij hen en abi pikinso makti tapoe hen.
22. Sortoe kenki de now foe si ini na V.N. en tapoe san disi e sori?
22 Now disi de tra fasi. Naatsi di e si religie leki „opjon gi na pipel”, e kisi bigi makti ini na V.N. Den de leki wan troe troe bedreiging gi na wrokokontren foe na kristenheid en efoe joe loekoe hen boen gi ala religie. Heresi wi kan verwakti foe si dati „den tin toetoe” foe na „wilder meti” sa drai hensrefi go tapoe grontapoe religie èn srefi sa pori na kerki kondre foe na kristenheid. Na „bigi benawtoe” sa bigin dan en doro hen hémarki esesi ini Har-mágeddon. — Openb. 17:12-18; 19:19-21.
23. (a) San wi moe doe now te wi loekoe na kritiek situatie tapoe grontapoe? (b) Fa joe kan man foe kon na fesi leki winiman foe na grontapoe?
23 San Jehovah Kotoigi moe doe now, di den e si na kritiek situatie disi tapoe grontapoe? Wi moe ondrosoekoe en sabi seker dati na lon foe wi go na a „bergi” foe Gado kownoekondre foe kibri wi moe de boen dorodoro. Wi moe go doro sondro degedege nanga na wini nanga jepi foe bribi. Wi moe abi na fasti bosroiti foe de winiman nanga jepi foe wi Gado di lobi wi. Solanga ten de ete, wi moe tan teki nanga faja prati na a préki foe na boen njoensoe disi foe na kownoekondre tapoe na heri grontapoe en na meki foe discipel. Joe sa tan tanapoe fasti, nanga ala Kotoigi foe Jehovah alape na grontapoe, „ini wàn geest, foe feti leki wàn sili sé na sé gi na bribi foe na boen njoensoe”? (Fil. 1:27) Joe sa gi grani tapoe na fasi disi na a nen foe Jehovah nanga na kownoekondre foe hen Pikin, Jezus Kristus? Te joe doe disi, joe sa kan abi ooktoe na verwakti nanga jepi foe bribi dati joe sa man tapoe wan glori fasi foe kon na fesi leki winiman foe na grontapoe.