Winiman foe na grontapoe nanga jepi foe bribi
„Disi de na wini di ben wini na grontapoe, na bribi foe wi.” — 1 Joh. 5:4.
1, 2. (a) San den sokari winiman foe grontapoe ben ondrofeni? (b) Fa wàn winiman foe grontapoe ben de wan uitzondering tapoe disi? (c) Foe sainde na wini foe na Soema disi nanga hen foetoeboi no de foe agersi nanga trawan?
NA HISTORIA e verteri foe someni sokari winiman foe grontapoe. Ma den alamala te foe kaba ben kon de lasiman. Na makti Farao foe Egipti, na bigimofo Nebukadnezar foe Babylon, Alexander de Grote, den caesar foe Rome, Napoleon nanga Hitler — na barinen foe dem ben de foe wan sjatoe ten! Ma joe habi wan winiman foe grontapoe di na barinen foe hen noiti sa kon moro swaki. A no ben gafa foe den bigi groepoe feti-man nanga fetisani ofoe foe den bigi ipi fetisipi. Ma tog na wini foe hen ben de na ala see en gi na teego tanboen foe den soema di e teki hen leki kownoe.
2 Foeroe soema naki foetoe na a makti winiman disi, foedi den ben prakseri dati a no de noti moro leki wan sakafasi temreman-pikin. Hen égi kondreman ben veragti hen. Di na Romein keizer makti ben kiri hen dan den wan toe foetoeboi di a ben abi, ben panja. Tog joe no kan agersi na man disi — Jezus Kristus — leki winiman foe grontapoe nanga no wan tra soema. Tapoe na neti di den ben sa kiri hen, a ben kan taki gi hen discipel: „Abi dekati! mi ben wini grontapoe” (Joh. 16:33; Mark. 6:3; Jes. 53:3). Boiti dati, a ben taki dati den toe ben sa wini grontapoe. Ma fa? Wan foe hen lobi foetoeboi bakaten ben taki hen nanga den wortoe disi: „Disi de na wini di ben wini na grontapoe, na bribi foe wi.” — 1 Joh. 5:4.
NA WINI NANGA JEPI FOE BRIBI
3. San de na bribi disi di e wini grontapoe?
3 Sortoe wini na wini disi nanga jepi foe bribi de? We, abi bribi, wani taki, bribi so fasti ini sani di no de foe si ofoe sani ini na ten di e kon, dati den sani disi de leki wan troe sani gi na bribiman. Troe kristen bribi, di bow tapoe na seker fundamenti foe Jezus Kristus, de wan heri tra sani leki lichtgelovigheid, di bow tapoe na dribi-santi foe firi nanga bijgeloof. Leki „gowtoe, solfroe nanga diri ston”, faja no kan bron hen (1 Kor. 3:11-14). A abi na fasti bribi dati na wan enkri libi Gado Jehovah de en dati a sa poti hen positie leki Soeverein Masra foe na universum reti. Na bribi disi ankra na den pramisi foe na Gado „di no kan lé”. A de hori hen ai boen tapoe Jezus leki na Fesiman foe wi bribi en leki Gado Moro Prenspari Wrokoman foe na kon troe foe ala Hen toemsi bigi prakseri di a abi nanga hen kownoekondre. — Titus 1:2; Hebr. 11:1, 6; 12:2.
4. Oten nanga fa wi kan wini nanga jepi foe bribi?
4 Solanga wi de hori sondro foe seki fasti na a bribi disi, dan wi kan taki, dati wi ben wini na grontapoe. Nono, wi no abi foe wakti te Har-mágeddon foe wini na wini dati. Wi e bigin nanga na wini foe na grontapoe efoe wi drai foe waka baka den pasi foe na grontapoe en gi wi srefi abra na Jehovah, tapoe na gron foe na bribi foe wi ini Masra Jezus Kristus en meki den dopoe wi ini watra. Ma a de wan wini di wi moe go doro nanga hen winsi san e kon, foedi wi abi warderi foe na lobi di Jehovah nanga hen Pikin ben sori wi.
5. (a) Fa wi kan de „moro leki winiman”? (b) Sortoe overtoigi de wan prenspari pisi foe wi bribi?
5 Te na apostel Paulus e taki ini na nem foe ala den sortoe winiman disi, a de taki: „Soema sa prati wi foe na lobi foe Kristus? Pina ofoe benawtoe, ofoe vervolgoe ofoe angri ofoe sososkin ofoe gevaar ofoe na feti-owroe? . . . Ini ala den sani disi, wi de moro leki winiman nanga jepi foe Hen, di ben lobi wi.” Moro fara a de verteri foe na overtoigi foe wi di no e seki tapoe na tori foe na lobi foe Jehovah gi wi di no de foe prati, en di de so wan prenspari pisi foe wi bribi en e taki: „Bikasi mi sabi seker, dati no dede, no libi, no engel, no makti, no disiten, no na ten di e kon, no krakti, no hé, no dipi, no (no wan tra mekisani) sa kan prati wi foe na lobi foe Gado, di de ini Kristus Jezus, wi Masra.” — Rom. 8:35, 37-39, Nieuwe Vertaling foe na Nederlands Bijbelgenootschap.
NA WINIMAN DI BEN DE WAN EKSEMPEL
6. San ben de na fundamenti foe na wini foe Jezus?
6 Jezus srefi, di a ben de dja na grontapoe, ben sori fa wi kan meki na wini disi boen dorodoro. A ben sabi Gado Wortoe. A ben abi prisiri ini na Wortoe dati en a ben kon de bekwaam ini na gebroiki foe hen leki „na fet’owroe foe na geest” (Ef. 6:17). Di Satan ben kon tesi hen ini na sabana, a ben poeroe na stré-man dri tron na hen tapoe nanga den wortoe: „Boekoe skrifi”. Na wini foe hen ben abi leki fundamenti na tai di a ben tai hori na a Wortoe foe Gado. Ooktoe na wi, dati moe de so toe. — Matt. 4:3-11.
7. Fa Jezus ben bigin nanga hen wini-waka?
7 Di wan kaba ben kon na a wroko foe Johannes na Dopoeman, dan Jezus ben bigin nanga hen bigi wini-waka. „Foe na ten dati, Jezus ben bigin foe préki en taki: ’Abi berouw, bikasi na kownoekondre foe hemel kon krosibé’” (Matt. 4:17). Disi ben de wan krakti boskopoe! Gado kownoekondre ben kon troe troe krosibé, ini na soema foe na salfoe Jezus srefi. Ini heri Galiléa, ini na Romein provincie Peréa en ini Jeruzalem srefi, Jezus ben préki na prisiri boskopoe leki winiman foe na grontapoe en leki Messias. Doesoen doesoen soema ben arki. Foeroe ben tron hen foetoeboi. Ma na groepoe di ben tiri en spesroetoe den kerki tiriman ben tron hen bita-ati stréman.
8. San e sori dati Jezus noiti ben degedege ini hen wini?
8 Jezus no ben degedege ini hen getrouwfasi, bikasi a ben sabi dati te na a kaba a ben moe de wan winiman. Di te foe kaba a ben tanapoe fesi na fesi na a dede na wan pina-oedoe en na Romein tiriman ben aksi hen foe hen kownoefasi, a ben kan piki: „Joe srefi de taki, dati mi de wan kownoe. Foe disi mi ben gebore en foe disi mi ben kon na grontapoe foe gi kotoigi foe na waarheid. Ibri soema di tanapoe na a sé foe na waarheid, e arki na mi sten” (Joh. 18:37). Getrouw a ben tan gi kotoigi foe na waarheid foe na kownoekondre. Te na a laatste momenti a no drai drai noiti foe meki na nen foe hen Tata bekenti, en a ben santa na diri nen dati, winsi Satan ben poti ibri sortoe sjen na tapoe. Foe datede, leki winiman foe grontapoe, Jezus nanga hen laatste bro ben kan bari taki: „A kon na wan kaba (Gado wroko gi hen na grontapoe)!” — Joh. 19:30; 17:6, 20.
BRIBI DI KAN POEROE BERGI NA DEN PRESI
9. Sortoe bribi den discipel foe Jezus ben kan abi, en fa den ben ondrofeni disi?
9 Jezus ben taki gi hen discipel: „Foe troe, mi taki gi oen: efoe oen sa abi bribi leki a bigi foe wan mostard-siri, oen sa taki gi na bergi disi: ’Poeroe joe srefi foe dja go drape’, en a sa poeroe hen srefi en noti sa de di no kan gi oen” (Matt. 17:20). Den discipel foe hen ben sa ondrofeni disi troe troe? Jaseker! En spesroetoe foe sensi na pinksterdé ini 33 G.T. Bikasi na a ten dati, tapoe na di foe féfi tenti dé baka di Jezus ben opo go na jeje libi, wan wondroe ben pasa na mindri foe so wan 120 foe hen discipel di ben konmakandra ini wan oso ini Jeruzalem. Jehovah geest ben kanti trowe tapoe den en a ben gi den makti foe taki ini foeroe tongo foe „den bigi wroko foe Gado”. — Tori foe den Apostel 2:1-11.
10, 11. (a) Fa den discipel foe Jezus ben bigin foe teki prati ini na wini foe hen? (b) Foe sainde den ben abi wan bribi di e wini alasani?
10 Ooktoe na geest ben meki Petrus verteri nanga jepi foe Gado Wortoe san ala disi ben wani taki. Na wini foe Jezus ben kisi pai, foedi a ben opo poti hé te na a reti-anoe foe Gado ini hemel. Now den ben abi na grani foe teki prati ini hen wini. Disi den ben bigin foe doe foe gi kotoigi finifini na a ipi soema di ben lon kon makandra en di ben taki foeroe tongo, en foe gi den tranga foe abi berouw, foe dopoe en foe teki na toemsi bigi kownoekondre-pramisi di na Wortoe foe Gado ben poti na den fesi foe kisi. „En so wan dri doesoen sili ben kon moro tapoe na dé dati”, en nanga jepi foe na aladé leri di ben gi tapoe na bigi tempeldjari, so toe ini oso, den disi ben kon tranga alaten ini na bribi. — Tori foe den Apostel 2:14-47.
11 Den kerki tiriman ben prisiri nanga na sori disi foe bribi? Kontrari foe dati! Den ben kisi Petrus nanga Johannes en den aksi foe den foe tapoe foe préki ini na nen foe Jezus. Nanga foeroe bribi den apostel ben piki tapoe dati: „Kroetoe gi oen srefi ofoe a de reti ini Gado ai foe arki moro na oen leki na Gado. Ma foe wi sé, wi no kan tapoe foe taki foe den sani di wi ben si en jere.” Den no ben gi pasi, dati ooktoe wan sani ben tapoe na bribi foe den di ben wini alasani. Di den ben loesoe, den ben tan gi kotoigi nanga bigi krakti! — Tori foe den Apostel 4:18-21, 33.
12. (a) Fa den discipel ben kisi jepi na a wini foe den? (b) Foe san disi ben o kon efoe den ben sa abi santa jeje?
12 Nanga foeroe djaroesoe na hépriester nanga hen bakaman now meki den poti ala apostel ini doengroe-oso. Disi ben aksi foe na sé foe Gado foe doe wan sani. Wan engel foe Jehovah na neti ben tjari den go na dorosé en a ben taki gi den: „Tan taki ala den wortoe foe a libi disi gi na pipel.” Di dé broko den ben drape agen foe leri tapoe na tempeldjari! Ete wan tron den ben kisi den en tjari den go na a Sanhedrinzaal, pe na hépriester si foe taki: „Wi ben taki nanga tranga gi oen foe oen no go doro foe leri ini na nen (foe Jezus), en loekoe! en ete oen ben foeroe Jeruzalem nanga na leri foe oen.” Nanga trangastem na dekati piki foe den apostel ben de foe jere: „Wi moe jere Gado leki rigeriman moro leki libisoema . . . wi de kotoigi foe den sani disi, soleki na santa jeje, di Gado ben gi na den di e jere hen leki rigeriman” (Tori foe den Apostel 5:17-32). Ja, ofoe den ben abi santa jeje, ben sa kon ofoe den ben sa go doro nanga faja foe gi kotoigi foe Jehovah soevereiniteit!
13. Fa na victori bribi ini den fosi dé foe na kristendom ben wini?
13 Den kerki tiriman dati ben wani poeroe den apostel na pasi, ma na Soema di e gi santa jeje ben meki sani waka tra fasi. Na respeki leriman foe na Wet Gamaliël ben taki den wortoe disi: „No bemoei nanga den soema disi, ma meki den doe den sani; (bikasi efoe na plan disi ofoe na wroko disi komoto foe libisoema, a sa kon na wan kaba; ma efoe a komoto foe Gado, oen no sa kan tjari hen kon na wan kaba;) noso kande a ben sa kon na krin, dati oen de feti troe troe nanga Gado.” Den krawasi den apostel nomo, komanderi den foe no préki moro en meki den go. Na victori bribi ben wini? Krin krin! bikasi na tori e go moro fara foe taki: „En sondro foe tapoe den tan leri ibri dé ini na tempel en oso foe oso èn meki na boen njoensoe foe Kristus, Jezus, bekenti.” — Tori foe den Apostel 5:33-42.
NA WINI NANGA JEPI FOE BRIBI DI E GO DORO
14. Wans vervolgoe ben kon, fa na profétitori foe Jezus ini Tori foe den Apostel 1:8 ben kon troe?
14 Na gi foe na kotoigi dati finifini, no ben de foe hori tanapoe. A ben moe gi so bigi leki Jezus srefi ben taki na fesi — „ini Jeruzalem, so toe ini heri Judea nanga Samaria en te na a moro farawe kondre foe grontapoe” (Tori foe den Apostel 1:8). Vervolgoe ben de soso foe panja na kotoigiwroko, bika „den . . . di ben panja, ben waka lontoe na kondre en ben meki na boen njoensoe foe na wortoe bekenti” (Tori foe den Apostel 8:1, 4). A no ben de so langa ofoe na vervolgoeman Saulus ben tron na apostel Paulus, en den fosi heiden soema ben kisi na presenti foe na santa jeje. Na boen njoensoe ben panja hensrefi leki wan faja ini moro moro njoen gebied. Di Paulus nanga hen kompe ben kon ini Europa dan soema di ben gensi ben bari nanga tranga sten: „Den soema disi, di drai grontapoe ondrosé kon na tapoe, de dja now ooktoe” (Tori foe den Apostel 17:6). Di foe datede so wan 30 jari ben pasa ini na gi foe na kownoekondre-kotoigi, den ben taki foe na njoensoe, dati „a ben préki ini na heri mekisani di de ondro hemel”. — Kol. 1:23.
15. Sortoe jepi nanga tranga ben gi na den wan di ben degedege ini den bribi?
15 Di na kaba foe na djoe seti foe sani ben kon krosibé, agersi dati wan toe foe den kristen soema dati ben kon weri. Den ben loesoe na de di den ben de na ai na jejefasi en den ben bigin foe degedege ini na wini foe den nanga jepi foe bribi. Ma den no ben de sondro jepi. Getrouw owroeman ini na kristen gemeente ben gi den na fanowdoe dekati. Wan foe den disi, na apostel Paulus, ben gi den alaten tranga foe horidoro ini na bribi. A ben gi den tranga foe meki na kristen bribi foe den „seker en fasti, leki wan ankra foe na sili” (Hebr. 6:19). A ben taki: „Wi no de foe na sortoe di e draibaka, san e tjari pori kon, ma wi de foe na sortoe di abi bribi, san e tjari na tan ini libi foe na sili” (Hebr. 10:39). Den ben moe meki na kristen wini foe den kon volmaakti nanga na lasi foe alasani! Den di ben hori na a bribi foe den, ben tan na libi di na djoe „seti foe sani” ben kon na wan kaba. ini 70 G.T.
MORO TESI FOE NA BRIBI
16. O langa na apostel Johannes be hori doro ini hen wini nanga jepi foe bribi? (b) Foe san a ben warskow?
16 Ma moro tesi e wakti loyaal kristen soema ete. Johannes, di hen diniwroko leki wan apostel foe Jezus Kristus ben de so wan 68 jari, e taki foe disi. Ini toe foe hen brifi Johannes e warskow foe na „anti-krist” di ben sa kon ini na „laatste joeroe” en a de meki wi kon sabi disi leki „na wan di e stré taki na Tata en na Pikin no de”. Dan Johannes e tai na „antikrist” disi nanga den „foeroe falsi proféti di ben go ini grontapoe” (1 Joh. 2:18, 22; 4:1-3). Na antikrist dati ben stré taki na „boen njoensoe” no de tranga fanowdoe en ben proberi foe drai kristen soema poti tapoe den gwenti foe grontapoe foe soekoe goedoe nanga prisiri.
17. Fa èn foe sainde kristen soema moe horidoro ini na wini foe den?
17 Kristen soema di ben kibri den getrouwfasi ben „wini na ogriwan” ma now, srefi tapoe na lati joeroe disi, ogri ben e kon tapoe den bribi foe wan tra sé. Na apostel ben sori disi krin, taki: „No lobi na grontapoe, en no den sani ini na grontapoe. Efoe wan soema lobi na grontapoe, dan na lobi foe na Tata no de na hen ini; bikasi alasani di de ini grontapoe — na lostoe foe skin en na lostoe foe ai en na meki bigi nanga den sani foe tan na libi di wan soema abi, no komoto foe na Tata, ma foe na grontapoe. Boiti dati, grontapoe de pasa gwe en ooktoe ala hen lostoe, ma na soema di doe Gado wani, hen de tan foe teego” (1 Joh. 2:13, 15-17). Troe troe noiti a ben de na wani foe Gado, dati kristen soema ben fadon go moksi densrefi ini den gwenti foe Satan grontapoe foe hoeroedoe nanga soekoe goedoe. Moro foeroe, den moe horidoro ini na wini nanga jepi foe bribi.
18. Fa wi e meki na wini foe wi kon nanga jepi foe bribi?
18 Ini na srefi brifi dati, Johannes e skrifi foe na banti di e tai ala kristen tapoe na heri grontapoe ini wan wanfasi di no kan broko. A de taki: „Na soema di bekenti taki, dati Jezus Kristus de na Pikin foe Gado, nanga so wan soema Gado de tan ini wanfasi, en hen ini wanfasi nanga Gado. En wi, wi ben leri sabi en bribi na lobi di Gado abi gi wi. Gado na lobi, èn soema e tan ini na lobi, e tan ini wanfasi nanga Gado èn Gado ini wanfasi nanga hen.” (1 Joh. 4:15, 16). Fa a de wan toemsi bigi grani foe de ini wanfasi nanga na Soeverein foe na universum nanga jepi foe hen Manpikin, Jezus Kristus, Na Wan di na broedoe foe hen „de krin wi . . . foe ala sondoe”! (1 Joh. 1:7). Ini disi na wini foe wi de nanga jepi foe bribi: foe tan lobi Gado nanga Kristus en de kompewrokoman foe den ini na grontapoe kotiwroko di e kon now esesi na wan kaba. — 1 Kor. 3:9.
19. San e meki wi kon sabi den soema di ben wini na grontapoe nanga jepi foe bribi?
19 Johannes e taki moro fara: „Disi de na lobi gi Gado, dati wi hori hen komando” (1 Joh. 5:3). Jezus ben taki foe hen foetoeboi: „Mi de gi oen wan njoen komando, dati oen lobi makandra, soleki mi ben lobi oenoe, dati oen lobi makandra ooktoe” (Joh. 13:34). Fa disi ben de nanga reti wan marki foe sabi kristen ini Johannes ten, en fa disi de wan toemsi moi marki foe sabi kristen ini wi ten! Bikasi sensi na fosi eeuw no wan tra pipel ben de na grontapoe soleki Jehovah kristen kotoigi di de ini wanfasi ini wan banti foe lobi, di de farawe tapoesé foe ala skotoe foe tongo, lo nanga ras.
20. Fa joe kan sori na a kaba foe na grontapoe disi, dati joe ben wini na grontapoe?
20 Na a kaba foe na seti foe sani disi na order de toe ini na profétitori foe Jezus: „Na boen njoensoe disi foe na kownoekondre sa préki tapoe na heri grontapoe pe libisoema de libi, leki wan kotoigi gi ala naatsi, en dan na kaba sa kon” (Matt. 24:14). Na toemsi bigi kotoigiwroko disi, di e doro hen hémarki now tapoe na heri grontapoe, e de leki wan marki foe sabi den soema di ben wini grontapoe. Foe taki foe ala den knegti disi foe Gado di e hori kibri den getrouwfasi, na apostel ben skrifi: „En disi ben de na wini, di ben wini na grontapoe, na bribi foe wi. Soema de na soema di e wini grontapoe leki hen di abi bribi, dati Jezus de na Pikin foe Gado?” Na bribi disi ini Jezus leki na Pikin foe Gado te leki na dé foe tide, joe kan bewijsi te joe gi jesi na Jezus komando na hen foetoeboi di a ben gwe: „Go foe datede en meki discipel foe soema foe ala naatsi” (1 Joh. 5:4, 5; Matt. 28:19). Joe e sori tapoe na fasi disi dati joe ben wini na grontapoe?