Na fasi fa Jehovah e tjari hen pipel
„Bikasi disi de wi Gado te ten di no abi marki, ja, foe tégo. Hen srefi sa tjari wi te leki wi dede.” — Ps. 48:14.
1. Fa na bijbel e sori dati Jehovah e tjari den soema di lobi hen?
INI ala den hondro hondro jari, Jehovah ben tjari den soema di lobi hen en di wani dini hen. Na psalm-singiman ben de wan foe den, bikasi a ben aksi Gado: „Seni joe leti nanga joe waarheid kon, foe den tiri en tjari mi” (Ps. 43:3). Na proféti Daniël ben sabi, dati „wan Gado de ini hemel, di e tjari kibri-tori kon na krin” en a ben taki na fesi, dati ini wi ten, ini disi „ten foe na kaba”, “na troe sabi ben sa de pasa marki” (Dan. 2:28; 12:4). Ooktoe Jesaja ben taki na fesi dati na troe aanbegi „ben sa de stéfi ini den laatste dé” en dati Jehovah ben sa tjari hen pipel: „A sa leri wi foe den pasi foe hen en seker wi sa waka tapoe den foetoepasi foe hen.” Now den sma e kisi na kari: „Kon en meki wi waka ini na leti foe Jehovah.” — Jes. 2:2-5.
2. San Jehovah e hori ini prakseri te ai tjari hen pipel ini na waarheid foe hen?
2 Na sortoe fasi Jehovah e tjari na pipel foe hen ini den waarheid foe hen? Na a fosi presi a de hori na prakseri dati a ben meki libisoema nanga wan fri wani. Na apostel Paulus foe eksempel e sori dati Filémon ben abi wan fri wani (Fil. 14). Foedi Gado ben meki na fri wani disi, a no e poeroe disi en dwengi soema foe bribi den waarheid foe hen ofoe — soleki robot — handri tapoe wan bepaalde fasi. Ini na pisiten disi foe kristen soema, foe datede a no e dwengi ooktoe, ma a de kari tapoe wan lobifasi reti-ati soema foe go moksi densrefi nanga na organisaatsi foe hen, di a ben feni boen, en baka dati tjari den safri nanga jepi foe santa jeje, hen Wortoe di santa jeje skrifi en nanga hen organisaatsi di e panja na heri grontapoe na waarheid.
3. San wi moe hori ini prakseri foe na fasi fa Jehovah e tjari hen pipel?
3 Ooktoe wi moe hori ini prakseri foe na fasi fa Gado e tjari hen pipel, dati Gado e meki wi verstan den waarheid foe hen tapoe hen ten en tapoe hen fasi (Dan. 12:9). Boiti dati, Jehovah e tjari hen pipel alaten moro go na fesi ini na waarheid. Leki na Mekiman foe na libisoema verstan, Jehovah sabi dati toemsi pikinso jeje „njanjan” no sa meki na verstan kon tranga, ma dati toemsi na wan tron, kan de moro leki libisoema kan verdrage. Ini Johannes 16:12 Jezus ben taki gi hen getrouw apostel: „Mi abi foeroe sani ete foe taki gi oenoe, ma so leki oen de, a sa moro oen.” Leki wan eksempel: Efoe den ben sroto wan soema foe langa ten ini wan doengroe kamra, dan a sa de moro boen efoe safri safri a kon gwenti na leti. Efoe so wan soema den poti hen esesi ini foeroe leti, dan disi kan seki hen en kande srefi doe hen ogri. Na a srefi a de nanga na safri safri go na fesi foe na waarheid foe Gado. Disi e akroederi nanga san na koniman ben taki: „Na pasi foe wan regvaardiki soema de leki na krin leti, di e kon moro krin te leki na dé kon de fasti.” — Spr. 4:18.
4. San Jezus ben sori foe na fanowdoe foe meki na waarheid kon na krin tapoe wan progressief fasi? (b) San Jehovah dienstknegti moe de klari foe de, foedi den waarheid e kon safri safri na krin?
4 Jezus ben sabi heri boen dati a ben de Jehovah pasi foe meki hen waarheid kon na krin tapoe wan progressief fasi. A ben taigi hen apostel, dati bakaten Gado santa jeje ben sa tjari den ini ala waarheid (Joh. 16:12, 13). En, foedi den fositen waarheid ben sa kon na krin foetoe foe foetoe, dan disi ben sa tjari gi den dienstknegti foe Gado, dati te na ten ben sa pasa den ben sa moe kenki den prakseri tapoe difrenti bijbel afersi.
TIRI TAPOE NA TORI FOE KOWNOEKONDRE-WAARHEID
5, 6. San e sori dati Jezus discipel no ben si sani tapoe wan joisti fasi?
5 Di Jehovah ben tjari den fosi-eeuw kristen, a no ben meki ala den waarheid foe hen na a wantron bekenti. Loekoe foe eksempel, na moro prenspari leri foe na bijbel, na kownoekondre foe Gado. Jezus ben leri hen foetoeboi foe begi: „Joe kownoekondre moe kon” (Mat. 6:10). Nanga krakti a ben taki: „Tan soekoe fosi na kownoekondre nanga hen retidoe” (Mat. 6:33). Ma den foetoeboi foe hen ben verstan ini na ten, di a ben de tapoe grontapoe ala den fini pisi foe na kownoekondre-rigerimakti? Den ben kan gi wan soifri piki tapoe aksi leki: San na a kownoekondre foe Gado? Soema sa de rigeri-man na ini en omeni den sa de? Oten a sa kon? San a sa doe gi na grontapoe nanga gi den soema?
6 Dati den soema di ben taki nanga Jezus no ben verstan den sani disi, wi de si ini na aksi di den ben aksi hen baka di a opobaka foe dede: „Masra, joe e meki kon baka ini disi ten na kownoekondre gi Israël?” (Tori foe 1:6) Na presi foe gi den wan piki tapoe disi en verteri den ala sani foe na kownoekondre-rigerimakti, Jezus ben taki: „Joe no abi pasi foe kisi sabi foe den ten nanga pisiten di a Tata ben poti ini hen égi makti” (Tori foe 1:7). Foe sainde Jezus ben behandel na afersi disi tapoe na fasi disi? Foedi den discipel ben abi boen dipi verkeerti prakseri foe na Kownoekondre. Den ben bribi dati na kownoekondre ben sa de wan grontapoe rigeri, di ben sa trowe na Romein rigerimakti. Ma na waarheid ben de dati na Kownoekondre ben sa de foe hemel en dati den wan di Gado ben verkisi foe rigeri nanga Kristus ben sa teki poeroe foe grontapoe foe go na hemel (Openb. 5:9, 10; 14:3; 20:4). Moro fara, na aksi foe den e sori, dati den ben verwakti dati na Kownoekondre ben sa opo wantron wantron. Ma dati no ben de so; na presi foe dati, foeroe hondro hondro jari ben sa pasa fosi.
7. Aladi den ben si na Kownoekondre tapoe wan verkeerti fasi, fa na fasi foe Jezus ben de nanga den? (b) Wi e ferstan ala sani foe na rigerimakti foe na Kownoekondre?
7 Aladi Jezus discipel ben verstan sani verkeerti, a no ben kroetoe en trowe den. A ben sabi dati safri safri den sa go verstan den waarheid foe Gado en dati santa jeje ben sa tjari hen foetoeboi tapoe progressief fasi, sodati den ben sa abi tapoe na joisti ten wan krin verstan foe sani. Te foe kaba den ben sa abi wan krin sabi foe na Kownoekondre-rigerimakti. Ma ini ala den ten a ben meki den fositen foetoeboi foe hen abi dipi belangstelling nanga faja gi na kownoekondre dati, sodati den kan poti hen tapoe na fosi presi en ben sa de klari foe kenki den prakseri di den ben abi foe na Kownoekondre. Soboen, alwasi na sabi foe den foe den kownoekondre-waarheid no ben de so bigi, tog a ben de so, dati san den ben sabi foe hen, ben jepi den ini na ten di den ben wakti „foe hori na de noja foe na dé foe Jehovah boen ini prakseri” (2 Petr. 3:12). Ini na ten disi na sabi foe wi foe Gado Kownoe-rigerimakti kon moro foeroe, aladi a no kaba de boen doro-doro ete.
DEN WAARHEID DI E GO FOE DEN HEIDEN
8. Sortoe problema ben de nanga na tori foe den heiden en na problema disi ben kon srefi tapoe Pinksteren foe taki foe hen?
8 Ete wan afersi di e sori fa na verstan foe na waarheid foe Gado de progressief, ben abi foe doe nanga na fasi fa den djoe di ben tron kristen, ben si den soema di no ben de djoe ofoe heiden soema, di ben teki na bribi sensi 36 G.T. Den ben moe besnij soleki den djoe na skin fasi? Den ben taki foe na afersi ini 33 G.T. di santa jeje ben kanti trowe tapoe Pinksteren? (Tori foe 2:1-4). Nono, bikasi aladi na kanti trowe dati foe santa jeje ben bewijsi, dati Gado ben de nanga den discipel en ben sa tjari den now, tog den no ben kisi tapoe wan wondroefasi sabi foe ibri fini pisi foe den waarheid foe Gado. Disi e kon na krin ini disi, dati na afersi foe na besnijdenis, tina-siksi jari baka Pinksteren, ini 49 G.T. ben skrifi poti ini den bosroiti di den apostel nanga owroeman ini Jeruzalem ben teki. — Tori foe 16:4.
9-11. (a) Foe sainde den dienstknegti foe Jehovah ben man foe handri wan problema foe na besnijdenis moro boen, baka di den ben waka ini ala den jari baka na tiri foe hen? (b) Fa Petrus ben kisi jepi foe fiti hensrefi na a joisti ferstan foe na waarheid nanga na visioen di a ben kisi?
9 Ini ala den jari dati, Jehovah ben meki hen pipel ondrofeni fa a de handri nanga den heiden. Na so fasi den ben verstan en si moro betre na afersi. Di foe datede wan afersi ben kon pe wan bosroiti ben moe teki, dan den dienstknegti ben sreka dorodoro foe handri disi nanga koni en verstan. Teki foe eksempel na kenki di Petrus ben moe tjari kon ini na fasi fa a ben si sani. So wan dri jari baka Pinksteren na apostel Petrus ben meki santa jeje kenki hen prakseri tapoe na tori foe den heiden, di a ben si leki wan morsoe en doti sani.
10 Ini wan visioen Petrus ben kisi na komando foe na njanjan di na wet foe Mozes ben si leki no krin. Di nanga froewondroe a ben piki dati a no ben njan den sortoe njanjan dati, dan wan sten ini hemel ben taigi hen, dati den sani di Gado e kari krin, no moe kari moro no krin. En precies tapoe na momenti dati boskopoeman foe na heiden Cornelius ben kon. Cornelius ben seni den foe aksi Petrus foe kon na hen oso foe verteri hen foe na prakseri foe Gado. Ma djonsrode Petrus ben veragti na njan foe njanjan di no ben de krin, en now den e aksi hen foe go na a oso foe wan heiden, di hensrefi ben e si leki wan soema di no krin! San a moe doe? Santa jeje ben gi na piki: „Opo . . . go no ondrosé en go sondro degedege nanga den, bikasi mi ben seni den.” — Tori foe. 10:9-20.
11 Petrus ben verstan na tori. Na visioen pe Gado ben taki dati wan sani de krin di fositen den ben si no krin, no ben abi wawan foe doe nanga njanjan, ma san ben de moro prenspari, a ben abi foe doe nanga na fasi fa Petrus ben e si den heiden. Dati Petrus ben verstan disi so, e kon na krin ini san a ben taigi Cornelius bakaten nanga hen osofamiri: „Foe datede mi ben kon sondro kragi di Gado ben seni mi. Moro fara santa jeje ben kanti trowe tapoe na heiden osofamiri dati en den ben kisi dopoe. Santa jeje ben sori now, dati Gado ben sa sori den heiden boen-ati sondro dati den ben besnij. — Tori foe. 10:21-48.
12. (a) Sortoe tra problema ben kon foe den heiden en oten? (b) Tapoe sortoe gron na centraal skin ben kan teki wan bosroiti en gi wan piki?
12 Ma disi ben gi ala den djoe di ben tron kristen satisfaksi? Nono, bikasi baka wan pisiten foe ete tina-dri jari, son djoe di ben besnij en di ben kon na Antiokia, Siria, ben aksi ofoe den heiden ben moe besnij (Tori foe 15:1, 2). Ini na jari 49 G.T. na centraal skin foe apostel nanga owroeman ben kon foe datede makandra ini Jeruzalem. Tapoe na konmakandra dati, Petrus, Paulus nanga Barnabas ben verteri san Gado ben doe na mindri den heiden di no ben besnij en di den ben préki gi. Baka di den ben ondrosoekoe fa foeroe jari baka makandra Jehovah ben handri nanga den heiden, leki wàn man den piki nanga na kotoigi foe den Santa Boekoe en gi krakti na a waarheid, dati den heiden nafoe besnij.
13. Fa son wan ben sori dati den no abi warderi foe na fasi fa Jehovah e tiri hen pipel, kande nanga sortoe bakapisi?
13 No ala foetoeboi foe Kristus ben de klari foe kenki fasi foe si sani di ben owroe. Son wan ben teki den verklaring foe meki den tori kon krin, leki wan reden foe libi na waarheid, na presi dati den ben si den leki wan bewijsi foe na progressieffasi fa Jehovah e tiri hen pipel. Di Jezus foe eksempel ben taki foe na agersi njan foe hen skin nanga dringi foe hen broedoe, na bijbel tori e taigi wi, dati „Foe na sani disi ede, foeroe foe hen discipel ben drai go na den sani, di den ben libi na den baka en den no ben waka moro langa na hen baka” (Joh. 6:53-66). Fa disi ben de wan sjatoe loekoe foe sani! Fa disi no ben de wan sori foe warderi foe na fasi fa Jehovah e tiri hen pipel! Dritentina-aiti jari na baka kande son wan foe den ben moe pai wan bigi paiman, foedi den wan di no ben tan waka go na fesi nanga na krin verstan foe na waarheid, ben sa trowe ooktoe den rai foe Jezus foe lon gwe libi Jeruzalem, bifo na foto ben pori. Dati kostoe den den libi, ma den soema di ben teki Jehovah tiri ben lon gwe en den ben tan na libi. — Lukas 21:20-24.
TIRI INI NA TEN FOE WI
14. O fara ini den hondro jari di pasa na fasi fa wi de loekoe den fundament waarheid ben kenki?
14 Te wi loekoe san Jehovah organisaatsi ben tja kon na doro tapoe den bladzijde foe na Wachttoren nanga tra boekoe ini den hondro jari di pasa, dan wi e feni jeje njanjan pasa marki. Na a bigin foe na ten disi fundament bijbel waarheid ben kon krin en te leki na dé foe tide den tan de krin ete. Na fasi fa wi e si hel, na Dri-wan-gado, Vagevuur, na sili, pe den dede de, na verloesoe paiman, na opo-baka, san sa psa nanga grontapoe, na Kownoekondre nanga tra fundament leri, no kenki foeroe ini den hondro jari. Na waarheid ben de alaten na waarheid, aladi wawan tron a ben de fanowdoe dati na verstan foe den ben kenki pikinso. — Loekoe Johannes 16:13.
15. Den Kotoigi foe Jehovah ini disi ten ben moe tjari kenki kon ini na fasi fa den ben loekoe sani?
15 Jehovah ben go doro foe tjari hen pipel foetoe foe foetoe foe verstan moro krin den waarheid foe hen, en disi tapoe hen ten en tapoe hen égi fasi. Foe datede Jehovah Kotoigi ben verstan foe sensi na bigin foe den hondro jari di pasa, dati den ben moe de klari foe kenki en poti reti na fasi fa den ben loekoe leerstelling, den doe foe bribi nanga organisaatsi procedures, efoe a ben de krin dati Jehovah jeje ben tiri den foe tjari den sortoe kenki dati kon. Soleki Bryan Wilson ini na tijdschrift NEW SOCIETY e erken, dan Jehovah Kotoigi „alaten ben prakseri dati na tan doro foe studeri na bijbel e tjari wan moro krin sabi foe na bijbel en na den okasi na fesi den ben taki dati den ben meki fowtoe ini na tjari kon na krin foe profétitori.”
16. (a) Foe sainde bijbel profétitori de wan kontren pe wan sma spesroetoe moe de klari foe tjari kenki kon na bepaalde fasi fa a de si sani? (b) Fa den dienstknegti foe Jehovah ben teki den bodoi foe den „laatste dé” en fa den kisi jepi ini disi?
16 Na kontren foe bijbel profétitori de na kontren kande pe wan soema moe de klari moro foe kenki hen prakseri. Na moro bigi pisi foe den profétitori e gi soso wan algemeen schema. Foe datede bribi de fanowdoe foe wakti foe si fa den fini pisi sa kon troe (Hebr. 11:1). Wan eksempel foe disi abi foe doe nanga den bijbel profétitori di e sori dati na disiten ogri seti foe sani sa pori en dati „njoen hemel nanga wan njoen grontapoe” sa kon na hen presi (2 Petr. 3:13). Ma a bijbel e gi nofo tra sani foe na totaal „marki” foe na kon moro krosibé foe na kaba, di e sori tapoe na ten disi leki den „laatste dé”, na ten foe na kaba” (2 Tim. 3:1; Dan. 12:4). Disi ben gi den dienstknegti foe Gado moro tranga foe meki den wortoe foe Jezus kon troe: „Na boen njoensoe disi foe na kownoekondre sa préki tapoe na heri grontapoe pe libisoema e libi leki wan kotoigi gi den naatsi en dan na kaba sa kon” (Matt. 24:14). Di den ben doe disi, den ben si fa a ben waka boen en fa na organisaatsi ben tan en ooktoe fa den ben go na fesi wans vervolgoe ben de en fa den ben kan weri en sori na njoen persoonlijkheid (égifasi). Ala disi e sori troe troe dati Jehovah ben jepi den. — Jes. 54:17.
17. Dati wi égi verwakti di ben de toemsi esi en no ben kon troe, dati wani taki dati Jehovah ben kenki hen prakseri?
17 Ma son foe den dienstknegti foe Jehovah ini den „laatste dé disi”, ben abi fowtoe prakseri foe na kaba (ofoe telos, Griki) foe na seti disi? Ja, foe troe. Son wan foe den prakseri disi, ben abi foe doe nanga na langa foe na ten di ben sa pasa bifo na kaba ben sa kon. Foedi den ben abi faja nanga enthousiasme gi na poti reti foe Jehovah nen, wortoe nanga prakseri nanga na lostoe foe den foe na kon fo wan njoen seti foe sani, meki dati wawan tron son wan foe hen foetoeboi ben de toemsi esi nanga na verwakti foe den. Disi de a srefi loekoe foe den discipel foe na kon krosibé foe na kownoekondre ini den ten (Tori foe. 1:6). Ma disi wani taki, dati di den verwakti foe den ben de toemsi esi wawan tron en foe datede no ben kon troe, dati Gado ben kenki hen prakseri tapoe wan ofoe tra fasi? Kwet-kweti. „A rai foe mi sa kon troe en ala mi prisiri mi sa doe” (Jes. 46:10). Foe datede Jehovah poti fasti, hen prakseri nanga ten foe tjari wan retidoe njoen seti foe sani kon.
18. Foe sainde a de prenspari foe tan na „den sani di ben skrifi”?
18 Disi e meki wi verstan boen, na fanowdoe foe wegi ala bijbel-prakseri fini fini en no poti someni krakti tapoe wan, sodati den trawan e poti go na baka. A de soleki Jezus srefi ben taki krin: „Foe na dé dati nanga na joeroe dati no wan soema no sabi wan sani” (Matt. 24:36). Alaten a de fanowdoe foe poti boen prakseri tapoe na rai foe na Apostel Paulus: „No go dorosé foe den sani di ben skrifi.” — 1 Kor. 4:6.
19. Fa den bewijsi e sori dati na kaba foe na seti foe sani de krosibé, aladi wan soema ben moe kenki hen prakseri?
19 Ma aladi foeroe foe Jehovah Kotoigi ben moe kenki den prakseri foe den ini disi, tog wi no kan taki dati a no de so dati wi e libi ini na „ten foe na kaba”? Den bewijsi foe na kon krosibé foe na kaba foe na seti foe sani ala dé e kon moro foeroe, foedi wi de si dati sani leki na trow-libi, na osofamiri, rigeri nanga grontapoe religie moro nanga moro e go na baka, aladi na a tra sé ogridoe nanga takroedoe e kon moro foeroe en den soema moro nanga moro no e abi respeki gi Gado. — 2 Tim. 3:1-5.
20, 21. Fa den soema di e tan waka ini Jehovah leti di e kon krin dé na dé, sa kisi pai?
20 Aladi wan pisi ten foe den „laatste dé” disi tan abra sondro wi sabi o langa a de, tog wan sani de seker. Den wan di e tan go doro foe waka ini a leti foe Jehovah di e kon moro krin dé foe dé en di de klari foe kenki den prakseri, sa de wan pisi foe na salfoe fika-pisi nanga na „bigi ipi” di „e komoto foe na bigi benawtoe” en e go ini Gado retidoe njoen ordening. „Na Lam di de ini na mindri foe na troon, sa tjari den (na bigi ipi) go a sabana en sa tjari den go na fonten foe libiwatra. En Gado sa figi poeroe ala watra na den ai.” — 2 Petr. 3:14; Openb. 7:9-17.
21 Soboen, den wan di e loekoe foe Jehovah tjari den, ben kan loekoe na fesi foe na kon foe wan njoen seti foe sani, pe „den regvaardiki soema sa abi grontapoe leki den goedoe, en den sa libi drape foe tégo”. „Den ogri soema no sa de drape moro.” Den safri-ati soema nanga den wan di abi gridi foe leri, den dati „sa feni switi prisiri ini vréde di sa de pasa marki”. — Ps. 37:10, 11, 29.
22. Sortoe vertrouw Jehovah dienstknegti kan abi now en ini na ten di e kon?
22 Wi abi foe datede na vertrouw, dati, soleki a ben de nanga na disiten organisaatsi foe Jehovah pipel ini den hondro jari di pasa, ooktoe so a sa de ini na laatste pisi foe den laatste dé disi, dati, „Gado de wi Gado foe ten di no abi marki, ja foe tégo. Hensrefi sa tjari wi te leki wi dede” (Ps. 48:14). En dan, ini hen njoen ordening, nanga na srefi vertrouw wi kan loekoe fa Jehovah sa tan go doro foe tjari hen dienstknegti tégo alaten, sondro dati a de fanowdoe dati den dede, bikasi „soema doe na wani foe Gado, e tan foe tégo”. — 1 Joh. 2:17.