„Leti ben opo gi den regtvaardikiwan”
„LETI srefi ben opo kon gi na regtvaardikiwan, èn prisiri srefi gi den wan di de opregti ini ati.” — Psalm 97:11.
1. San na wan foe den sani di e poti den regtvaardiwan aparti foe den ogriwan?
SAN na wan foe den sani di e poti den regtvaardikiwan aparti foe den ogriwan èn den troe dienstknekti foe Jehovah Gado foe den wan di de ini katibo na Gado feanti, Satan na Didibri? A moro prenspari difrenti de sondro degedege dati den regtvaardikiwan, den troe dienstknekti foe Jehovah Gado, e prisiri densrefi ini leti. Gi den, „leti ben opo kon” troetroe (Ps. 97:11). Foe a sé foe den ogriwan, den e waka ini doengroe. Ja, „a pasi foe den regtvaardikiwan de leki na brenki mamanten leti, di e skijn moro krin te leki na dé kon bigi. Na pasi foe den ogriwan de leki doengroe; den no e sabi san e meki den naki foetoe.” — Odo 4:18, 19, Nieuwe Vertaling foe a Nederlands Bijbelgenootschap.
2. Fa wi ben sa kan agersi a leti di e kon moro krin tapoe a pasi foe den regtvaardikiwan?
2 Prakseri dati na leti di e skijn tapoe na pasi foe den regtvaardikiwan de go na fesi. A de tan „skijn moro krin”. Wi ben sa kan agersi disi nanga wan man di e opo bifo débroko foe meki wan koiri na wan boiti-presi. Kande a de si farawe den lontoe foe wan oso, ma na a bigin a no kan taki ofoe a de wan maksin ofoe wan oso. Safri-safri, te a dé e broko èn a de kon moro krosbé, a kan si dati a de wan oso. Baka wan pisi ten a kan si dati a de wan oedoe oso èn no wan ston wan. Dan bakaten, a kan si den kloroe foe na oso, èn so moro fara.
3. Sortoe sani abi krakti tapoe a kon moro krin foe a leti?
3 Na ondrofeni foe Gado dienstknekti ben de precies leki disi. Foedi wi ben si bepaalde sani farawe foe ten ede èn nanga pikinso leti a tapoe, meki dati wi ben si sani no so soifri èn joisti. Fasi fa wi ben si sani fositen ben sa kan abi krakti tapoe den sortoe situwasi disi. Ma o moro a leti e kon krin èn wi e kon moro krosbé foe den sani di moe psa, o moro wi e kisi wan moro krin froestan foe a fasi fa Gado e meki en prakseri kon troe. Profétitori e kon moro krin foe froestan te Jehovah santa jeje poti leti a tapoe èn te den kon troe ini den sani di e psa na grontapoe ofoe ini den ondrofeni foe a pipel foe Gado. Disi no de precies na fasi fa Jehovah Gado ben handri nanga en dienstknekti ini owroeten? Ja, foe troe!
NA EKSEMPRE FOE ABRAHAM
4, 5. Fa Gado ben meki safri-safri en prakseri kon na krin gi Abraham?
4 Loekoe Abraham pikinso. Gado ben kari a man disi foe bribi en mati (Jes. 41:8; Jak. 2:23). Aladi a ben de ini wan krosbé matifasi nanga Jehovah Gado, tokoe a no ben abi wan krin froestan dorodoro foe a prakseri foe Gado ini a bigin. Ini wantoe sani di psa ini a libi fo Abraham wi kan si dati safri-safri a ben froestan sani. Gado ben kari en èn komanderi en foe gwe libi en tata-kondre, èn a ben ferteri en dati a ben sa tron wan bigi naatsi èn dati ala famiri foe grontapoe ben sa blesi densrefi nanga jepi foe en. Ma Abraham no ben sabi ala tori finifini; wi e lési dati a ben gi jesi „sondro foe sabi pe a ben de e go” (Hebr. 11:8). Èn ala di Gado ben pramisi en dati a kondre ben sa gi na a siri foe en, tokoe Abraham no ben sabi fa disi ben sa feni presi. A ben taki dati a ben broko en ede srefi dati kande en dienstknekti Eliëzer ben sa tron na erfgenaam foe en oso. Ne Jehovah tjari a tori kon na krin èn a ben taki gi Abraham: „Wan sma di sa komoto foe joe égi inisé pisi, sa teki joe presi leki erfenaam” (Gen. 12:1-3, 7; 15:2-4). Foedi a oema foe Abraham Sara, bere ben tapoe, meki Sara ben aksi Abraham foe go didon na en oema-foetoeboi Hagar, èn foe en Abraham manpikin Ismaël ben gebore. Bakaten Gado ben ferteri na Abraham. dati na erfgenaam foe na pramisi ben sa komoto foe Sara. — Gen. 17:15-17.
5 Soboen, wi kan si dati, aladi Jehovah ben tjari ala sani kon na krin gi Abraham direkt, ben de troe, Abraham, tokoe no ben froestan soifri fa Gado ben sa meki na prakseri disi kon troe. Tokoe a ben tan sori bribi èn tan wakti tapoe Jehovah, èn a ben kisi moro bodoi te a ten ben lon psa. Ooktoe di Jehovah ben komanderi en foe offer en manpikin leki wan slakti-ofrandi tapoe a bergi Moria, dan Abraham no ben sabi precies fa na afersi disi ben sa waka. Ma a ben bribi troetroe dati Gado ben sa meki wan siri kon nanga jepi foe Isaäk, alwasi Gado ben sa moe wiki Isaäk komoto foe dede. — Hebr. 11:17-19.
DANIËL NANGA TRA PROFÉTI
6, 7. (a) Foe sortoe wortoe foe Daniël e kon na krin dati Gado e tjari sani kon a krin tapoe en spesroetoe ten? (b) Sortoe kotoigi Petrus e gi ini disi?
6 Na mindri den foeroe proféti di ben abi na boen ede foe kisi direkte openbaring foe Jehovah, ben de Daniël, „wan toemsi warti man” gi Gado (Dan. 10:11, 19). Jehovah ben gi en foeroe aparti bodoi foe en égi ten èn foe a ten di o kon; tokoe Daniël no ben froestan ala sani di ben de ini a tori. Foe son wan foe den visioen a ben taki: „Mi ben jere, ma mi no ben kon froestan en.” Di a ben aksi foe moro bodoi, a ben kisi foe jere: „Go, Daniël, bikasi den wortoe e hori kibri èn e kisi wan ségel te a ten foe na kaba” (Dan. 12:8, 9). Tapoe a srefi fasi Jehovah Gado ben tan tjari kon na krin foeroe waarheid gi en dienstknekti den proféti. Tokoe foeroe sani ben de di den no ben froestan.
7 Foe datede meki na apostel Petrus ben kan skrifi: „Foe a tori foe a ferloesoe disi, den proféti ben go ondrosoekoe finifini, di ben taki a fesi foe a no-ferdini-boen-ati gi joe. Den ben tan ondrosoekoe sortoe spesroetoe pisi ten ofoe sortoe ten na jeje ini den ben sori foe na Kristus, di den dati ben gi kotoigi a fesi foe a pina foe Kristus èn foe den glori di ben sa waka a baka. A ben tjari kon na krin gi den, dati den no ben e dini densrefi, ma ben e dini joe nanga den sani di joe ben kisi foe jere now nanga jepi foe den di ben meki na boen njoensoe bekenti gi joe.” Srefi engel no ben abi wan krin froestan dorodoro foe a fasi fa Gado prakseri ben sa kon troe. — 1 Petr. 1:10-12.
8. Fa e kon na krin foe wan aksi foe Johannos na Dopoeman dati en froestan foe sani no ben de boen dorodoro?
8 Na laatste wan foe den proféti disi ben de Johannes na Dopoeman. Gado ben gebroiki en foe sreka na pasi gi na Kristus, Jezus (Luk. 1:16, 17, 76-79). Johannes ben abi na boen ede foe di a ben kisi foe Gado na marki foe kon sabi na Messias èn foe presenteri en na Israël (Joh. 1:26-36). Ma tokoe Johannes no ben froestan ala tori finifini foe na fosi kon foe Jezus. Disi e kon na krin, di Johannes ben de ini doengroe-oso, dati a ben seni en discipel go na Jezus nanga na aksi: „Joe de na Sma di moe kon, ofoe wi abi wan trawan foe froewakti?” Na aksi foe Johannes no ben de wan sori foe mankeri foe bribi, ma a de sori a tapoe dati a ben wani abi wan moro aparti bewijsi. A piki foe Jezus, pe a ben poti prakseri tapoe den wroko di a ben doe, séker ben moe gi Johannes trowstoe. — Matt. 11:2-6.
JEZUS NANGA EN APOSTEL
9. San e sori dati Jezus no ben abi wan boen froestan dorodoro foe den prakseri foe en Tata?
9 Gado ben tjari en wani kon na krin gi en dienstknekti pas na en faste ten, èn disi ben de srefi so ini a tori foe Jezus Kristus. Di Jezus ben de na en Tata ini hemel, sondro degedege a ben kisi direkte bodoi. Tokoe a no ben sabi oten na kaba foe na disi ten seti foe sani ben sa kon. Foe datede meki a ben èrkèn: „Foe na dé dati èn na joeroe dati nowan sma no sabi wan sani, no den engel foe hemel, no na Manpikin, leki na Tata wawan.” — Matt. 24:36.
10, 11. (a) Sortoe fowtoe bosroiti foe a kownoekondre Jezus discipel ben meki? (b) Foe san-ede Jezus no ben ferteri en apostel ala sani foe a ten di e kon èn ooktoe no foe tra afersi?
10 Jezus srefi ben handri akroederi na gronprakseri di ben skrifi ini Odo 4:18 ini a fasi fa a ben tjari ensrefi nanga en discipel. A ben ferteri den foeroe foe na Kownoekondre: dati a ben sa gwe èn dati baka wan langa ten a ben sa kon baka foe ben teki den na oso ini hemel. Ma nanga ala a sabi foe den sani disi, tokoe en discipel ben e hori faste na a prakseri dati na Messias Kownoekondre ben sa de na Kownoekondre foe David di sa opo njoen baka ini Jeruzalem. Foe datede den ben aksi na Jezus di ben opo baka foe dede: „Masra, joe e opo baka ini disi ten na kownoekondre gi Israël?” Jezus ben ferteri den dati son sani ben de di den no ben kan froestan, di a taki: „A no de gi joe foe kisi sabi foe den ten ofoe pisi ten di a Tata ben poti ondro en égi makti.” — Tori foe den Apostel 1:6, 7.
11 Dati wan faste ten de foe a kisi foe wan froestan foe bepaalde aparti sani foe den prakseri foe Gado, e kon na krin foe den wortoe foe Jezus gi en apostel: „Foeroe sani mi abi ete foe taki gi oen, ma oenoe no man foe tjari den tapoe na momenti” (Joh. 16:12). Nanga disi Gado e sori dati a de meki en dienstknekti froestan sani akroederi na man di den man foe froestan den èn meki gebroiki foe den. A de troe dati Jezus ben taigi en discipel dati Gado jeje ben sa tjari den ini „ala waarheid” (Joh. 16:12). Ma Jezus ben wani méne dati foe sensi na dé di den ben kisi santa jeje den ben sa froestan ala waarheid, sondro dati bakaten den ben abi wan moro betre froestan foe sani fanowdoe? Den troe tori e sori dati disi no de so.
HEIDENSMA KISI PASI
12, 13. (a) Sortoe moro krin froestan den bakaman foe Jezus ben kisi nanga Pinksteren èn sortoe krakti disi ben abi tapoe den? (b) Oten den ben bigin foe waka baka na komando disi, ala di Jezus ben gi den na komando foe meki discipel foe ala naatsi, èn foe san-ede na a ten dati fosi?
12 Tapoe na pinksterdé ini 33 G.T. den discipel foe troe ben kisi santa jeje èn den ben kisi nanga dati wan moro krin froestan foe na waarheid foe na opobaka foe Jezus, en opo go na hemel èn na prensparifasi foe a kownoekondre foe Gado. Na sabi disi ben gi den faja foe meki na „boen njoensoe” bekenti gi trawan. Alwasi Jezus ben taigi den dati den ben moe meki discipel foe sma foe ala naatsi, tokoe den ben doe den prékiwroko ini a bigin soso gi den djoe èn den no-djoe proselietsma èn dan, baka wan pisi ten, gi den Samariasma. Den no ben froestan dati den ben moe go na den heiden di no ben besnij (Matt. 28:19, 20). Sondro degedege a ben de so dati Jehovah ben meki den no ben kisi na froestan disi, bikasi ini na profétitori foe Daniël ben tanapoe, dati na Messias ben sa meki na froebontoe nanga den djoe ini na tra pisi foe na di foe 70 wiki tan abi krakti. — Dan. 9:24-27.
13 Di na wiki dati ben kon na wan kaba ini 36 G.T., dan Jehovah ben doe stap di ben de fanowdoe foe opo na pasi foe na „boen njoensoe” kon gi den naatsi. Petrus ben moe kisi troetroe jepi foe kenki en denki bifo a ben go ini a oso foe wan heiden di no ben besnij èn di no ben de krin akroederi a Wèt. A ten di a ben de leki ini wan dren, a ben moe kisi leri: „Den sani di Gado meki kon krin, joe no moe kari moro langa no krin.” Foe datede meki Petrus nanga den tra apostel ben moe kenki a loekoe foe den ini na afersi disi. Petrus ben doe disi èn Gado ben gebroiki en foe meki bekenti gi den heiden dati na pasi foe go na a hemel kownoekondre foe Gado ben opo. — Tori foe den Apostel 10:9-43.
14. Sortoe leti den fosi kristen ben kisi jari a baka foe den marki foe a wèt foe Mozes?
14 Tokoe ete na tori foe besnijdenis ben de baka 13 jari wan strépunt na mindri wantoe kristen. Paulus nanga tra discipel ben moesoe go na Jeruzalem foe poti na afersi disi na fesi den apostel nanga tra owroeman di ben de ini na ten dati na tiri skin foe na kristen gemeente. Den ben arki na san Petrus ben abi foe taki foe na bekering foe Cornelius èn na a bewijsi-materiaal foe Paulus foe den makti wroko di Gado ben doe ini na diniwroko foe Panlus na mindri den heiden. Baka dati, den ben loekoe san Gado Wortoe foe santa jeje ben abi foe taki foe na tiri. Nanga jepi foe santa jeje den ben kon na a joisti bosroiti, namkoe dati aladi den sma di ben wani tron kristen ben moe hori bepaalde markitiki foe den libi èn waka, a no ben de fanowdoe gi den heiden foe ben besnij, èn foe hori na wèt foe Mozes. — Tori foe den Apostel 15:1-16:5.
15, 16. (a) Foe sortoe wortoe foe Paulus e sori dati na waarheid e kon na krin safrisafri? (b) Sortoe srefi kotoigi na apostel Petrus ben gi?
15 So wan 6 jari baka na konmakandra disi, Paulus ben skrifi en fosi brifi gi den Korintesma, pe a ben ferklari foe den kristen ini en ten di ben kon gebore nanga jeje: „Bikasi na sabi foe wi de wan afoe sani nomo, èn na profétitaki foe wi de wan afoe sani nomo; ma te na heri sani sa kon, dan na sani di de afoe sa poeroe na pasi. Bikasi na a momenti disi wi e si nanga jepi foe wan spikri foe metaal den lontoe foe sani fra-fra, ma dan wi sa si sani fesi na fesi. Na a momenti disi mi sabi sani afoe, ma dan mi sa sabi sani soifri, soleki den ben sabi mi soifri.” Soboen, srefi tapoe a momenti dati den kristen di ben gebore nanga jepi foe na jeje, èn srefi Paulus toe, no ben tjari go nanga jepi foe na santa jeje foe kisi wan dorodoro sabi foe ala waarheid. A sabi foe den ben de ete soso wan afoe sani, ini a marki di Gado ben gi den foe froestan sani ini na ten dati. Ma a ben de nofo gi a fanowdoe foe a momenti dati. — 1 Kor. 13:9, 10, 12.
16 San Petrus ben skrifi so wan 9 jari baka di Paulus ben skrifi na sani di taki dja na fesi, ofoe ini na jari 64 G.T. gi en kompe-kristen? Baka di a taki foe na transfiguratie-ondrofeni, di ben sori dati Jezus ben de na Manpikin foe Gado, a ben taki moro fara: „Foe dat-ede meki na proféti wortoe kon de moro faste èn oen e doe boen foe poti prakseri a tapoe leki tapoe wan lampoe di e skijn ini wan doengroe presi, te leki na dé opo kon èn wan dé-stari opo kon ini oen ati” (2 Petr. 1:16-21). Soboen, den kristen ben moe ondrosoekoe alaten ete den Santa Boekoe èn poti foeroe prakseri na a proféti wortoe, di ben sa de leki wan lampoe di e skijn ini wan doengroe presi. Den ben moe tan go doro nanga dati te leki na ten ben doro dati salfoe kristen ben sa kisi den paiman na a openbaring foe na glori Jezus Kristus.
17. (a) Sortoe njoen waarheid kristensma ben leri di na boekoe Openbaring ben gi? (b) Oten moro leti ben sa kon tapoe a boekoe dati?
17 So wan 32 jari baka di Petrus ben skrifi en di foe toe brifi, ofoe so wan 63 jari baka Pinksteren ini na jari 33 G.T., na apostel Johannes ben skrifi den lo visioen di a ben kisi èn di de now na boekoe Openbaring. Ini den visioen disi wantoe waarheid foe den prakseri foe Gado foe na fosi tron ben tjari kon na krin gi den kristen di ben kon gebore nanga jeje. Na so den ben leri foe eksempre dati 144.000 man nanga oema foe ala naatsi ben sa bai fri foe de leki den medeërfgenaam foe Jezus Kristus ini hemel èn foe tiri leki kownoe, priester èn kroetoeman ini na doesoen jari Messias kownoekondre (Openb., kap. 7, 14 nanga 20). Srefi den kristen ini na fositen dati no ben abi wan dorodoro sabi ete. Ondrosoekoeman foe Gado Wortoe ini disi ten e froestan dati aladi den visioen foe Openbaring ben sa gi leri èn dekati na kristen ini Johannes ten, den ben abi spesroetoe waarde gi den sma di e libi ini na „dé foe Masra”, pe wi de now na ini (Openb. 1:10). Na so wi e lési ini Openbaring 5:1-14, foe wan lolo nanga ségelmarki, di ben moe loesoe, sodati na lolo ben kan opo. Disi e sori dati na a ten foe na kontroe foe den profétitaki foe Openbaring safri-safri, te ibri ségel ben sa opo, moro sabi nanga froestan ben sa kon na krin.
18. Foe datede, fa Jehovah Gado ben tjari kon na krin waarheid gi en dienstknekti ini owroeten èn ini na fosi eeuw?
18 Soboen, wi kan si, dati, èn ini na tori foe Jehovah getrow dienstknekti ini den ten bifo Kristus leki ini a tori foe na gemeente foe salfoe kristen ini na fosi eeuw foe wi gewoon teri, ala sma sondro foe poeroe wan na ini ben abi wan sabi nanga froestan foe sani di no ben boen dorodoro. Den ben moe tan go na fesi èn tjari kenki kon ini na froestan di den ben sa froestan sani te den ben sa ondrofeni fa Jehovah prakseri safri-safri ben sa kon troe. Na pasi foe den regtvaardikiwan de gi den troetroe leki „wan brenki leti di e skijn moro krin” (Odo 4:18). O moro na leti e skijn moro krin, o moro den ben kisi sabi èn den ben si moro boen den toemsi bigi waarheid di Jehovah ben tan tjari kon na krin gi den.
19. San Gado ben taki gi na proféti Daniël foe na sabi èn froestan ini na „ten foe na kaba”?
19 Ma fa a de nanga Jehovah dienstknekti ini disi ten foe na kaba? Wan engel ben taigi Daniël: „O, Daniël, kibri den wortoe èn poti wan ségel gi na boekoe, te na ten foe na kaba. Foeroe sma sa go èn kon (ini Gado Wortoe), èn na troe sabi sa kon de pasa marki (leki wan bakapisi foe dati)” (Dan. 12:4). Ini vers 10 den e taki moro fara foe Gado dienstknekti: „Foeroe sma sa krin densrefi èn meki densrefi kon weti èn sa kon soifri. Èn den ogriwan séker sa handri ogri, èn nowan foe den ogriwan sa froestan en; ma den di abi froestan sa froestan en.” Na leti disi, na dipi froestan disi foe sani ben sa kon alamala wanslag? Gado dienstknekti, foe sma kan kon sabi den leki sma „di abi froestan foe sani”, ben sa moe abi wan dorodoro, finifini sabi èn wan dorodoro froestan, sodati, te na ten ben sa pasa, kwetkweti den no ben abi foe tjari kenki kon ini a fasi fa den e si bepaalde leri ofoe tra afersi? Den aki disi nanga trawan moro wi sa loekoe ini den tra artikel.
[Faki na tapoe bladzijde 97]
A fasi fa Jehovah ben handri nanga en dienstknekti ini owroeten e sori dati wan froestan foe en prakseri foeroe tron e kon safri-safri.
Abraham no ben sabi precies fa Gado pramisi foe a „siri” ben sa kon troe.
Daniël no ben froestan na kontroe foe en profétitori.
Johannes na Dopoeman, di ben presenteri na Messias, ben aksi bakaten foe froestan ofoe wan tra sma ben sa kon.
Jezus srefi no ben sabi na dé èn a joeroe foe a „bigi benawtoe”.
Den apostel ben moe leri safri safri dati na kownoekondre de foe hemel èn dati heiden srefi kan kisi en.
Pas ini a boekoe Openbaring den fosi kristen ben leri dati Kristus tiri ben sa de 1000 jari èn abi 144.000 sma
[Prenki na tapoe bladzijde 93]
Ini wan froekoe mamanten koiri, wan sma kan si den sani moro krin te a de kon moro krosibé èn na doengroe safri-safri e kenki kon tron leti.