A leti di e kon moro krin ini disi ten

„Na pasi foe den regtvaardikiwan de leki na brenki leti di e kon moro krin, te leki na dé kon de faste.” — Odo 4:18.

1. Sortoe bewijsi-materiaal wi ben loekoe kaba foe a kontroe foe Odo 4:18?

NA BIJBEL tori foe Genesis go miti Openbaring e sori dati na pasi foe Jehovah dienstknekti ben de troetroe leki wan brenki leti di e kon moro krin (Odo 4:18). Ini den dé foe Jezus èn en apostel foeroe profétitori foe na Messias ben kon krin, soleki Mattéus nanga tra evangelium-skrifiman ben kotoigi. Èn nanga na kanti foe Gado jeje tapoe Pinksteren èn na préki foe na „boen njoensoe” gi den heiden, dan moro leti ben kon tapoe a Wortoe foe Gado. — Tori foe den Apostel 2:14-36; 10:34-43; 15:6-21.

2. (a) Fa a ben kon dati den sma di taki dati den de bakaman foe Jezus Kristus ben go ini wan pisi ten foe doengroe? (b) San de wan prenspari sani ini na pratiwroko ini a kotiten?

² Ma baka na dede foe den apostel dan den sma di ben taki dati den de bakaman foe Jezus Kristus, ben kon safri-safri ini wan pisi ten foe doengroe. „Krasi tigri” ben teki abra (Tori foe den Apostel 20:29, 30). A ben go precies soleki Jezus ben taki na fesi ini wan foe den agersitori foe en. A ben agersi na kownoekondre foe hemel nanga „wan sma di ben sai toemsi boen siri tapoe en gron”. Ne wan „feanti ben kon èn ben sai takroe wiwiri, reti mindri na alési”. Leki wan bakapisi foe disi, dan na takroe wiwiri ben gro tapoe na kerki gron foeroe, foeroe hondro jari langa. Ma nanga na kotiten wan prati e kon. Wi e libi now ini na kotiten dati, bikasi na „kotiten de wan bosroiti foe wan seti foe sani”. Kolokoe dati wan „alési”-klasse foe troe kristen ben tjari kon makandra. Den troe tori e sori dati wan leti di e skijn moro krin tapoe a pasi foe den kristen disi de wan prenspari sani, di e poti den aparti foe na kroektoedoe „takroe wiwiri”, den sma di a kaba foe den de pori. — Matt. 13:24-30, 36-43.

LETI TAPOE JEHOVAH GADO NANGA EN WORTOE

3, 4. Sortoe troe tori foe na Mekiman, Jehovah Gado den fosi bijbelondrosoekoeman ben bigin foe froestan?

³ Ini a bigin foe den jari 1870, wan groepoe opregti, ernstig bijbelondrosoekoeman ben konmakandra foe wan stoeka foe a Wortoe foe Gado sondro foe den ben kroetoe sani na fesi. Na presi foe den ben waka baka den kerki leri foe na kristenheid, den ben meki den Santa Boekoe tjari den. Na koni, redelijkheid, harmonie nanga krakti foe na bijbel boskopoe ben skijn ini den ati. Kontrari den atheïstisch nanga evolutionair leri di foeroe sma ben bribi, na boskopoe disi ben gi den na overtoigi foe na fundamenti troe tori dati troetroe wan Mekiman nanga froestan de. Den ben kan si dati „bakapisi no kan de sondro wan sani meki a kon” èn dati na „bigi di den mekisani bigi” nanga „na moifasi orde, harmonie nanga evenredigheid foe den” e kotoigi dati wan Bigi Ontwerper de (Rom. 1:20). Den ben kisi ooktoe wan krin froestan foe den égi fasi foe a Mekiman, dati a abi 4 kardinaal fasi ofoe fundamenti égi fasi, namkoe, tego koni, makti sondro skotoe, volmaakti geregtigheid nanga lobi di no abi en speri. — Deut. 32:4; Ps. 62:11; Odo 2:6, 7; 1 Joh. 4:8.

⁴ Boiti dati, den ben bigin foe froestan dati Gado de „foe ten di no abi marki te ten di no abi marki” èn dati en nen de Johovah (Ps. 83:18; 90:2). Den ben kon si dati na moro prenspari dogma foe na kristenheid — na leri foe na Dri-wanfasi de onredelek èn no foe a bijbel. Na leti foe na bijbel waarheid ben sori den dati Gado „de wán Jehovah”, dati Jezus de na Manpikin foe Gado (di en srefi ben kotoigi dati en Tata „de moro bigi leki en”) èn dati Gado santa jeje, na presi foe disi ben sa de na di foe 3 persoon foe na Dri-wanfasi, de ’Gado energie (krakti) di a de gebroiki foe meki difrenti sani doe kon’. — Mark. 12:29; Joh. 14:28; Tori foe den Apostel 2:17.

5. Fa den lobiman disi foe waarheid ben si na bijbel?

⁵ Den ben préki fri èn sondro frede èn nanga overtoigi dati na bijbel de Gado Wortoe di skrifi ondro krakti foe santa jeje èn dati te joe loekoe den égi fasi foe Gado a de redelek foe froewakti dati na Mekiman ben sa gi wan openbaring foe tiri libisma. Den ben skrifi foe a bijbel dati a de „leki na frambo foe na beschaving (boen maniri) èn foe fri”. Na bijbel de „na moro owroe boekoe di de; a ben pasa den bigi winti foe 30 eeuw (3000 jari)”. Boiti dati, ala „boekoe makandra . . . no ben kan tjari na prisiri nanga na vréde nanga na ségi dati gi na soktoe mekisani, leki na bijbel ben tjari”. Den opregti ondrosoekoeman disi ben si ini na sondro gridifasi libi foe den bijbelskrifiman di ben offer densrefi na krin bewijsi dati a bewégi foe ati foe den ben de soifri. Foe taki en sjatoe, den ben kon froestan dati ’na bijbel e gi wan redelek èn harmonieus ferklari foe den oorzaak foe ogri èn dati a de ferteri foe na dresi èn na bakapisi te foe kaba; boiti dati, na bijbel ben skrifi foe tiri èn tranga den dienstknekti foe Jehovah Gado’.

JEZUS KRISTUS NANGA NA KOWNOEKONDRE

6. Sortoe waarheid tapoe a tori foe Jezus Kristus den bijbelondrosoekoeman disi ben bigin foe froestan?

⁶ Foe sensi a bigin, den opregti bijbelondrosoekoeman disi, soleki den ben kari densrefi, ben froestan krin den fundamenti waarheid tapoe a tori foe Jezus Kristus. A de Gado „wan enkri gebore Manpikin”. A ben libi kaba bifo a ben tron libisma. A ben gi en libi leki wan „ferloesoeprijs gi ala sma”. A ben kisi wan opobaka leki wan jeje meki-sani èn a ben opo go na hemel leki wan jeje mekisani èn a ben sa drai kon baka leki wan jeje mekisani — leki na Messias Kownoe foe Gado kownoekondre di joe no kan si nanga ai. Ja, na tori foe na kon baka foe Kristus de foe troe prenspari: Foe san-ede, fa èn oten? — Joh. 3:16; 17:5; 1 Tim. 2:5, 6; 1 Petr. 3:18.

7. San na leti di ben kon moro krin ben sori foe Gado kownoekondre èn den blesi foe en?

⁷ A leti di e kon moro krin ben meki a kon krin gi den kristen disi o prenspari Jehovah kownoekondre de leki na wan enkri dresi gi den siki foe na libisma-famiri. Na kownoekondre dati abi na ini en Jezus Kristus nanga en 144.000 kompe, di ben bai poeroe na mindri den libisma èn di makandra nanga en sa tiri leki kownoe nanga priester doesoen jari langa. Tapoe na gron foe na ferloesoe-ofrandi foe Kristus, na Kownoe e wiki ala sma di kisi ferloesoe komoto foe den memre-grebi, nanga na den fesi tego libi tapoe wan paradijs-grontapoe. Na bijbel e poti soboen toe presi na a fesi foe den sma di kisi ferloesoe — wan hemel presi gi wan „pikin ipi” Kownoekondre-erfgenaam èn libi na grontapoe gi Jezus „tra skapoe”, di de na ini den ooktoe „wan bigi ipi” sma di tan a libi foe na moro „bigi benawtoe” dja na grontapoe, èn ooktoe den foeroe, foeroe miljoen di de ini den memregrebi èn di sa komoto foe drape foe njan boen foe a libi na grontapoe. — Luk. 12:32; Joh. 5:28, 29; 10:16; Openb. 7:9, 14; 14:1, 4; 20:6.

8. San den ben go froestan foe na libisma sili èn na toestand foe den dedesma?

⁸ Na leti di e skijn moro krin ben sori den bijbelondrosoekoeman disi ooktoe dati den leri foe na kristenheid foe na fasi foe na libisma sili èn na toestand foe den dedesma de fowtoe dorodoro! Den ben si krin dati Adam na a ten di a ben meki „ben tron wan libi sili” èn dati, di a ben drai go baka na a grontapoe foe en trangajesi ede, a ben dede leki wan sili èn eenvoudig ben stop foe de. Ja, a ben drai baka go na a doti, pe na a bigin a ben teki poeroe na ini. Ini na toestand foe dede, prakseri, wroko no de moro (Gen. 2:7; 3:19; Pred. 9:5, 10). Na „paiman di na sondoe e pai, na dede”, no tego pina. Wan hel foe faja èn wan vagevuur foe pina de soso ini na froestan foe sma ini bribi di kisi fowtoe bodoi. Foedi na libisma e stop foe de troetroe te a dede, dan wan opobaka de fanowdoe, sodati a kan njan boen foe na slakti-ofrandi foe Kristus. — Rom. 6:21.

KRISTEN VERPREKTI

9. Fa den kristen disi di kisi leti e si santafasi?

⁹ Den kristen disi e teki tranga na ati toe san na bijbel e taki foe troe santafasi. Disi wi no moe broeja nanga vroomfasi èn santafasi di wan sma e meki leki a abi. Den ben froestan dati den ben moe libi akroederi bijbel gronprakseri soleki „a trowlibi moe de krin na mindri ala sma, èn na trowbedi sondro flaka, bikasi Gado sa kroetoe hoeroedoe nanga soetadoe sma” (Hebr. 13:4). Den ben froestan dati den no ben kan loekoe psa ofoe hori ini den mindri sani leki hoeroedoe, soetadoe nanga homoseksualiteit, di a bijbel e kroetoe (1 Kor. 6:9, 10). So toe den moe tan farawe foe ala pasa foe wèt foedi no wawan „den e pai caesar san de foe caesar”, ma foedi den e pai „Gado san de foe Gado”. Ini ala den libi nanga tra sma den moe de eerlijk èn opregti èn libi akroederi na kristen wèt: „Soleki joe wani dati den sma doe nanga joe, doe a srefi nanga den.” — Matt. 22:21; Luk. 6:31.

10. Sortoe waarheid foe na komando foe waka go préki di den kristen disi ben kisi, den ben froestan biten kaba?

¹⁰ A de krin dati a prenspari broko-ede foe den bijbelondrosoekoeman disi ben de foe kweki wan égifasi leki di foe Kristus. Ooktoe den ben froestan dati a de fanowdoe foe gi kotoigi foe Gado nanga Jezus. Den ben froestan dati ibri kristen, di ben kisi na leti foe na waarheid, ben de verprekti foe skijn en gi tra sma toe. Den ben froestan dati a de fanowdoe foe de bedinari foe Gado èn meki na leti foe den skijn nanga wan toemsi moi libi èn waka èn nanga wan meki bekenti nanga mofo (Matt. 5:14-16). Boen biten kaba na kari ben kon toe na fesi: „Wi de aksi doesoen prékiman.” A ben de wan spesroetoe kari foe sma sondro osofamiri-verprekti di ben kan gi afoe ofoe moro foe a ten foe den na a panja foe na „boen njoensoe” nanga jepi foe bladzijde di druk.

11. Sortoe stap wan sma ben moe doe foe tron wan kristen bedinari foe na evangelium, èn foe san-ede den ben trowe na difrenti na mindri den kerkifesiman nanga den leek?

¹¹ Foe tron wan kristen bedinari, dan ibriwan sma ben moe bribi a Wortoe foe Gado, ben moe drai en libi èn sori bribi ini Gado èn ini Jezus Kristus leki na Ferloesoeman foe libisma. A sma ben moe „wije” na Gado foe doe En wani èn nanga jepi foe wan krinkrin dipi go ini watra ben moe dopoe (Tori foe den Apostel 3:19; Matt. 28:19, 20). Foedi alamala ben de bedinari foe na evangelium, meki den kristen disi ben poti na wan sé na difrenti di de normaal a mindri kerkifesiman nanga leek. Na tapoe a gron foe a Wortoe foe Gado, den ben froestan wel dati a ben de fanowdoe foe poti bekwaam man na wroko leki „owroeman” nanga „diaken”, sodati den disi ben kan sorgoe foe den fanowdoe foe ibri gemeente. — Fil. 1:1; 1 Tim. 3:1-10, 12, 13.

12. Sortoe waarheid tapoe a tori foe organisatie den ben go froestan èn san disi ben wani taki?

¹² O moro na leti ben kon moro krin, o moro foeroe den froestan o prenspari a de foe meki bekenti Jehovah nen èn en kownoekondre leki a wan enkri howpoe foe libisma. Den ben froestan ooktoe dati soso 2 organisatie de ini na universum èn dati ibriwan sma de foe Gado organisatie ofoe foe Satan organisatie, di na grontapoe abi na ini en den bigi zaak, den bigi politiek nanga den bigi bribi. Na grontapoe den georganiseerde kotoigi e teki presi gi Gado hemel organisatie foe loyaal jeje mekisani (Gal. 4:26; 2 Kor. 4:4). Disi wani taki dati kristensma no mag moksi densrefi ini politiek èn no mag de ooktoe . . . ini a gebroiki foe tranga na mindri den naatsi; den no mag teki prati srefi na nationalistisch plechtigheid. Den dienstknekti foe Jehovah Gado ben hori baka èn feti gi en kownoekondre, aladi disi no ben de nanga fetisani na skinfasi. — Matt. 26:52; Joh. 15:19; 18:36; 2 Kor. 10:4; Jak. 1:27; 4:4.

13. Di den bijbelondrosoekoeman disi ben go froestan sortoe aparti stré-aksi, meki den ben teki na nen „Jehovah Kotoigi”, èn foe san-ede na nen disi ben fiti so?

¹³ Baka wan pisi ten, dan den getrow dienstknekti disi foe Jehovah ben kan froestan dati na kon poti reti foe Jehovah nen de na bigi stré-aksi di libisma tanapoe na en fesi èn dati na stré-aksi disi de moro prenspari leki na ferloesoe foe libisma. Disi ben de troetroe wan moi koti foe faja, di ben skijn moro krin leki ala sani di a pipel foe Gado ben froestan a fesi. Na aparti waarheid disi ben meki na difrenti na mindri troe nanga falsi bribi ben kon moro krin ete. Di den ben froestan na prenspari waarheid disi kaba, dan a no teki langa ofoe den kristen disi ben froestan dati na nen di sma ben kari den (Bijbelondrosoekoeman) no ben de joisti, no ben de aparti nofo. Bikasi na moro prenspari wroko èn prakseri foe den no ben de soso foe ondrosoekoe na bijbel, ma foe de ooktoe kotoigi foe Jehovah. Na nen bijbelondrosoekoeman no ben poti den ooktoe aparti foe den miljoen-miljoen sma di ben taki dati den e ondrosoekoe na bjbel, ma di ben agri ete nanga falsi leri. Nanga na leti krakti foe Gado santa jeje den froestan foe datede dati den wortoe di joe e feni ini Jesaja 43:10-12, nanga reti ben abi foe doe nanga den wawan, namkoe „Jehovah Kotoigi”. Ini 1931 nanga prisiri den ben teki na nen disi.

LETI TAPOE PROFÉTITORI NANGA AGERSITORI

14. San na leti di ben skijn moro krin ben sori foe den profétitori di moe kon boen?

¹⁴ Te nanga now foeroe sma abi na prakseri dati na drai go baka foe den djoe na den tatakondre de wan kontroe foe bijbel profétitori. Ma nono, den moi profétitori di e gi dekati èn e taki foe a kon boen baka foe sani, ben kon troe foe a fosi tron ini na di foe siksi eeuw bifo G.T., di den djoe ben drai komoto foe Babylon èn di e kon troe na bigi ini wi ten ini na jeje Israël. Wan bewijsi foe na kontroe foe den wi e si ini na jeje paradijs pe na „Israël foe Gado” foe disi ten nanga den loyaal kompe foe den de na ini. — 2 Kor. 12:4; Gal. 6:16.

15, 16. Sortoe leti ben skijn tapoe 2 foe den agersitori foe Jezus?

¹⁵ Na froestan moro soifri foe den agersitori foe Jezus ben kon toe. Wan aparti wan de foe eksempre na agersitori foe den skapoe èn den bokoboko, di skrifi ini Mattéus 25:31-46. Langa ten sma ben prakseri dati na agersitori disi ben sa kon troe ini na ten foe Kristus 1000-jari tiri. Ne Jehovah Kotoigi ben froestan dati na agersitori no ben abi foe doe kwetkweti nanga na ten dati. Wan foe den foeroe réde ben de dati Kristus „brada” no ben sa de de na a ten foe Kristus 1000-jari tiri na grontapoe, èn dan no foe taki dati den ben sa abi mankeri foe sani foedi den ben siki ofoe foedi den e ferfolgoe den. Soboen, na agersitori moe kon troe ini wi ten, now di na Jezus di poti tapoe na hemel troon e tjari den naatsi kon makandra. Disi de so ini den troe tori di wi kan si.

¹⁶ Ooktoe leti ben kon tapoe na agersitori foe na goedoe man nanga Lazarus. A ben de krin dati na goedoe man no ben de wan agersi fasi foe na heri djoe naatsi, ma foe den falsi, goedoe tiriman ini Jezus ten, èn foe datede foe den kerki fesiman foe na kristenheid ini wi ten. — Luk. 16:19-31.

17. Sortoe aparti froestan den ben kisi foe na boekoe Openbaring?

¹⁷ Ooktoe na leti di e skijn moro krin ben abi leki bakapisi dati Jehovah dienstknekti ben froestan dati na boekoe Openbaring ben kon troe srefsrefi foe sensi „na dé foe Masra”, dati wani taki foe sensi 1914, èn no ini na ten foe na heri historia foe na kristen gemeente foe sensi na den ten foe den apostel te leki now, soleki sma ben prakseri wan dé (Openb. 1:10). Den ben go froestan dati na „dé foe Masra” ben marki nanga na feti ini hemel, pe Mikaël (Jezus Kristus di Gado ben poti tapoe a troon) nanga en engel ben iti poeroe foe hemel, Satan nanga en engel (Openb. 12:1-12). Na pipel foe Jehovah ben prisiri toemsi di den ben kon froestan dati a Kownoekondre-wroko foe den ben taki a fesi, spesroetoe ini den kapitel 2, 3, 6-11 foe Openbaring.

THEOCRATISCH ORDE

18. San Gado pipel ben leri foe theocratisch orde ini den kristen gemeente, èn fa disi ben wroko ini praktijk?

¹⁸ Foeroe moro eksempre ben kan gi foe a skijn moro krin foe a leti ini disi ten, ma foedi presi no de meki wi e kari soso wán moro. Disi abi foe doe nanga na theocratisch wèt ofoe na fasi foe wroko di Gado e tiri. Ini na laatste pisi foe na di foe 19 eeuw den bijbelondrosoekoeman ben wroko akroederi wan democratisch fasi foe tiri gi den gemeente foe den; den ben wani drai densrefi poeroe foe wan autocratisch hiërarcisch seti. Ma ini na jari 1938 den ben froestan dati wan gron no ben de ini bijbel foe na democratisch seti disi. A no ben de akroederi na theocratisch orde, ofoe foe taki en tra fasi, tiri di e komoto foe tapoesé, foe Gado go na ondrosé, na presi foe dati a komoto foe ondrosé, foe den libisma go na tapoesé (Jes. 60:1, 17-19). No langa psa kaba na „getrow èn koni srafoe”a ondro na tiri foe santa jeje, e poti foe datede ini den gemeente man, di e doe dienst leki owroeman èn dinari ini na diniwroko (Tori foe den Apostel 20:28). Den disi moe hori densrefi na den marki foe a bijbel ini 1 Timotéus 3:1-13 èn Titus 1:5-9.

19. Foe san-ede wi no ben kan froewakti dati na wantronso na leti ben sa skijn ini ala en krakti?

¹⁹ Ala sani di wi taki a fesi e sori foe troe dati na pasi foe Jehovah pipel te nanga na momenti disi, alaten ben de leki na brenki leti di e kon moro krin (Odo 4:18). Foedi den komoto foe na bigi doengroe foe „Babylon na Bigiwan”, na grontapoe makti foe falsi bribi, dan wi no kan froewakti dati wantronso den ben sa si ala sani ini a troe leti foe den (Openb. 17:5). Na brenkifasi foe na geopenbaarde waarheid na ini jeje fasi ben sa breni èn srefi broeja den. Disi wi ben sa kan agersi nanga na ondrofeni foe wan sma di komoto ini wan kamra di doengroe pikapika èn di e kon ini krin sonleti. Ten de fanowdoe bifo en ai gwenti na a wantewante krin brenki brenki son-leti.

20. (a) Sortoe bigi kontren na waarheid-leti di e go na fesi e taki foe en? (b) Sortoe aksi wi moe loekoe ete?

²⁰ Soleki wi ben si, dan na leti di e go na fesi foe a waarheid e go foe foeroe kontren. A pipel foe Gado ben kisi wan moro soifri froestan foe leri, profétitori, kristen waka nanga libi èn na zendingkomando foe kristensma, san den agersitori foe Jezus wani taki, wan joisti gemeente-organisatie, nanga so moro fara. Disi de alamala krin nofo. Ma son sma ben sa kan aksi: Foe san-ede a gersi leki a pasi foe troe kristen no e go alaten letopoe? Sortoe ferklari wi abi foe disi? Foe wan piki tapoe den aksi disi, wi e sori na lésiman na a tra artikel.

[Sani di skrifi na den marki ondrosé foe a bladzijde]

[Faki na tapoe bladzijde 103]

Den disiten dienstknekti foe Jehovah ben froestan biten kaba:

Dati Jehovah de na wan enkri troe Gado èn Jezus Kristus en wan enkri gebore Manpikin.

Dati na santa jeje de Gado wroko krakti.

Dati na sili e dede èn a howpoe foe den dedewan de ini wan opobaka

Dati Kristus sa abi ini hemel 144.000 medeërfgenaam, aladi na tra pisi foe den libisma di gi jesi sa kisi tego libi tapoe wan paradijsgrontapoe.

BAKA wan pisiten den ben bigin foe froestan toe:

Dati Gado ben gi pasi foe ogri de foe na stré-aksi foe universele soevereiniteit ede.

Dati den profétitori foe a kon boen baka foe sani ben abi foe doe nanga na jeje Israël.

Dati na Openbaring e kon troe ini na „dé foe Masra.”

[Prenki na tapoe bladzijde 101]

Na froestan foe den prakseri foe Jehovah soleki ben meki bekenti ini „Na Wachttoren” ben kon moro krin ini den jari di pasa