Na rigeri foe Gado — Na wan enkri howpoe foe libisoema
1-3. (a) O bigi den problema de di libisoema tanapoe na den fesi? (b) Fa wi kan sabi san na ten di e kon sa tjari kon?
TAPOE wan conferentie foe natuur-sabiman, di ben hori na dréten foe na jari di pasa ini na Massachusetts Institute of Technology (Amerkankondre), den ben taki foe den problema di grontapoe abi foe doe nanga den leki „bijna apocalyptisch”. „No wan blauwdruk de foe tan na libi”, Jerome R. Ravetz, leriman ini filosofie foe na universiteit foe Leeds (Engeland), ben warskow. „Den problema de so bigi nanga moeiliki, dati a no soso libisoema verstan kan wini den.”
2 San wi kan verwakti foe datede foe na ten di e kon? Wan leriman foe na Verenigde Kerki foe Canada ben verklari: „No wan soema kan taki na fesi nanga vertrouw, dati wan moro betre dé sa kon. Ofoe na libimakandra sa komoto na pasi en ofoe te foe kaba wan njoen maatschappij nanga moro betre libi-omstandigheid gi ala soema sa kon, no wan soema no kan taki nanga sekerfasi.”
3 Ma disi de so? Nono! Tog Wan Soema de di sabi san na ten di e kon sa tjari kon, bikasi a abi na makti nanga na koni foe seti na ten di e kon akroederi na wani foe hen. Na Soema disi de na Mekiman foe wi, Jehovah Gado. Te joe loekoe na makti di libisoema no abi foe tjari wan boen rigeri kon, dan joe no e agri nanga wi, dati a de na ten now foe arki na hen? Gado e taki foe ensrefi: „Na Soema di e verteri foe sensi na bigin fa sani sa waka, èn foe owroeten den sani di no ben doe; Na Soema di e taki: ’Mi rai sa kon èn ala mi prisiri mi sa doe’” (Jes. 46:10). En Gado abi prisiri foe gi libisoema wan boen rigeri.
NA THEMA FOE NA BIJBEL
4, 5. (a) San de na moro prenspari thema foe na bijbel? (b) Fa a de meki bekenti?
4 Efoe wan soema ben sa aksi joe: „San de na moro prenspari thema foe na bijbel?” san joe ben sa taki dan? A de wan moi sani san taki ini na kerki tijdschrift Modern Churchman (disiten kerki-man): „Na moro prenspari boen wroko foe theologen ini na hondro jari di pasa ben de, dati den ben feni agen na Kownoekondre foe Gado leki na moro prenspari thema foe na Njoen Testamenti.” Ini na Bijbelse Encyclopedie, di J. H. Kok Kampen ben gi fri, wi e lési: „Na ’Kownoekondre foe Gado, Kownoekondre foe hemel’ de na centrale begrip foe na prékiwroko foe Jezus akroederi den synoptische evangelie.” Ma theologen nanga kerki fesiman ben meki na prenspari bijbel leri disi bekenti gi den soema? Loekoe sortoe piki wan prenspari kerkiman foe na presbyteriaanse kerki ben gi ini wan artikel ini Christianity and Crisis:
„Efoe no langa pasa kaba wan faja takimakandra ben de mindri theologen foe san na Kownoekondre wani taki ofoe na praktische waarde di a abi gi na grontapoe foe wi, dan mi no kisi disi foe jere. Èn foe taki foe préki, a de seker moro leki dri-tenti jari pasa kaba sensi mi ben jere fa wan dominé ben proeberi foe tjari kon na krin gi den soema foe hen, dati na Kownoekondre de wan troe troe sani gi den . . . Leki wan kerkiman mi e begi den theoloog nanga kerki fesiman foe wi: Verteri oenoe foe na Kownoekondre foe Gado; Tjari kon na krin gi wi san a de èn fa wi moe tjari hen kon akroederi nanga na grontapo foe wi ten.”
5 Tog den kerki tiriman disi no ben doe dati! Te ondrosoekoe e meki, dan bijna no wan kerkiman ben kan taki san Gado Kownoekondre de, èn fa a sa kon ofoe san a sa doe gi libisoema. Na tijdschrift di joe abi ini joe anoe, na a tra sé ben gi hen titel, Na Wachttoren — A de meki na Kownoekondre foe Jehovah bekenti, grani. Den bladzijde foe hen ben poti geregeld krakti tapoe na kownoekondreboskopoe. Na rigeri foe Gado de troe troe na moro prenspari thema foe na bijbel.
NA THEMA E WAKA PASA NA HERI BIJBEL
6-9. (a) Di san ben pasa meki Jehovah seti sani foe tjari wan njoen rigeri kon? (b) Foe sortoe sani Genesis 3:15 e taki na fesi en fa Openbaring 12 e jepi wi foe verstan na kon troe foe hen?
6 Na bijbel e bigin foe skrifi fa Gado ben meki na grontapoe klari gi libisoema foe libi na tapoe en ben poti na fosi libisoema-paar ini wan moi paradijs-oso. Ma bifo na trowpaar ben kisi pikin, dan wan foe den engel foe Gado ben gebroiki wan sneki foe taki nanga na oema Eva en foe kori hen foe meki oproeroe tegen na rigerimakti foe Gado. Na oema foe hen sé taki nanga na man foe hen, Adam en tjari hen so fara foe teki hen sé ini na trowe foe na tiri foe Gado (Gen. 3:1-6; Openb. 12:9). Di disi ben pasa dan Jehovah ben si na fesi kaba na fanowdoe foe wan njoen rigeri di Gado poti tapoe libisoema. Datede Gado ben taki gi na, soema di ben meki na oproeroe kon, na engel di ben meki hensrefi tron Satan na Didibri: „Mi sa poti féjantifasi mindri joe nanga na oema en mindri joe siri en, hen siri. A sa masi joe ini joe ede en joe sa masi hen ini hen baka-iri.” — Gen. 3:15.
7 Kande joe e aksi joesrefi: „Pe na profétitori disi’e taki now foe wan njoen rigeri?” Meki wi go loekoe na tekst disi finifini, dan a sa kon krin gi wi. Na tekst e taki dati féjantifasi ofoe ogri-ati ben sa de mindri Satan nanga na „oema” en na „siri” ofoe pikin foe Satan nanga na „Siri” ofoe pikin foe na oema. Na a fosi presi wi moe kon sabi soema na a „oema”.
8 A no de wan grontapoe oema — Satan no ben abi wan spesroetoe ogri-ati gi wan bepaalde oema na mindri den libisoema. Ini na laatste boekoe foe na bijbel Openbaring, a skrifi dati na oema „weri, na son, en na moen de na ondro hen foetoe en tapoe hen ede wan kroon foe twarfoe stari ben de”. Meki wi, leki wan jepi foe leri sabi soema na a oema, loekoe pikinso san Openbaring e taki moro fara, foe na pikin foe hen: „A meki wan manpikin, di sa tiri ala naatsi nanga wan isri tiki. En na pikin foe hen ben hari poeroe go na Gado en na hen troon.” — Openb. 12:15.
9 Soema de na „manpikin” disi nanga makti foe tiri, na „manpikin” disi di leki Gado vertegenwoordiger „sa tiri ala naatsi” ofoe „sa rigeri ala den volkoe”? (Vertaling foe prof. Brouwer) A de na kownoekondre foe Gado ini anoe foe Kristus Jezus, soleki wi sa sori bakaten. En na hemel oema de foe datede na organisatie foe Gado foe getrouw engel, foedi na Messiaans kownoekondre ben komoto foe na organisatie dati. Di ini na ten di pasa Adam nanga Eva ben meki oproeroe tegen na rigerimakti foe Gado, dan Jehovah ben meki wan, bigin foe doe wan sani en ben poti wan Kownoekondre rigeri di ben sa de wan fonten foe dekati nanga howpoe gi ala soema di ben lobi regtvaardiki fasi.
NA LETI FOE NA KOWNOEKONDRE E KON MORO BIGI
10, 11. (a) Ini sortoe kownoekondre foe owroeten den dienstknegti foe Gado no ben poti vertrouw na ini en foe san ede? (b) Sortoe foto Gado ben meki klari gi den?
10 Jehovah Gado ben verteri, hen dienstknegti tapoe wan progressief fasi foe na rigeri disi en a ben sori na tapoe leki na wan enkri rigeri, di libisoema ben kan bribi na tapoe nanga foeroe vertrouw. Foedi nanga na krakti foe na Moro Héwan a sa abi seker succes, meki getrouw dienstknegti foe Gado no ben poti vertrouw tapoe kownoekondre di libisoema ben meki. Den ben taki dati den e verwakti na hemel, kownoekondre rigeri foe Gado. Na apostel Paulus e skrifi dja foe disi foe eksempel:
„Ini bribi ala den disi (den getrouw-bifo-Kristus dienstknegti foe Gado) ben dede, aladi den no ben kisi na kon troe foe den pramisi, ma den ben si den foe farawe en ben gi den odi en den ben meki bekenti na publiki dati den de vreemde soema nanga wakaman ini na kondre . . . Den e proeberi foe, kisi wan moro boen presi, da foe taki wan di de foe hemel. Datede Gado no e sjen gi den, foe den kari hen leki na Gado foe den, bikasi a ben meki wan foto klari gi den.” — Hebr. 11:13-16.
11 San na a „foto” disi, di Gado ben meki klari gi den fositen dienstknegti foe hen? A de na hemel kownoekondre foe Gado, na rigeri foe hen. Meki wi go loekoe pikinso sortoe sreka ben moe meki foe opo na kownoekondre rigeri. Soleki wi ben si dja na tapoesé ini na brifi foe Paulus gi den Hebrew-soema, dan den dienstknegti foe Gado „no ben kisi na kon troe foe den pramisi (foe na kownoekondre).” Sortoe pramisi?
12-14. Sortoe pramisi foe na rigeri foe Gado ben gi na Abraham, Isaäk, Jakob nanga David?
12 Ini Genesis 22:18 Jehovah ben pramisi Abraham: „Nanga jepi foe joe Siri ala naatsi foe grontapoe sa blesi densrefi troe troe.” Na apostel Paulus ini hen brifi di a ben skrifi gi den soema foe Galatia e meki wi kon sabi Jezus Kristus leki na siri foe Abraham, di nanga jepi foe hen den naatsi ben sa blesi densrefi (Gal. 3:16). Den srefi pramisi disi foe wan „siri” di ben sa kon ben gi na Abraham pikin Isaak nanga hen granpikin Jakob (Gen. 26:3-5; 23:13, 14). Soleki den pramisi disi ben sori, dan na „siri” foe na oema foe Gado ben sa kon soboen foe na famiri-lin foe Isaak nanga Jakob.
13 Loekoe sortoe pramisi e gi moro fara na a manpikin foe Jakob Juda: „Na rigeri-tiki no sa komoto foe Juda, ooktoe na komanderi-tiki a mindri hen foetoe, te leki Silo kon; en na hen den naatsi sa gi jesi” (Gen. 49:10). Jezus Kristus di komoto foe „juda”, ben de na „Silo” disi „di ala naatsi sa gi jesi”. En loekoe fa bewijsi foe disi de moro fara ini bijbel. — Hebr. 7:14.
14 Bijna sébihondro jari baka na pramisi di ben gi na Juda, Jehovah ben taki foe David, foe na lo foe Juda: „Mi ben feni mi knegti David; Nanga mi santa oli mi ben salfoe hen, en nanga hen mi égi anoe sa de fasti, di mi égi anoe sa gi tranga toe. En mi sa poti na siri foe hen fasti foe tégo, en hen troon sa de leki den dé foe hemel” (Ps. 89:20, 21, 29). Te Gado e taki dati a poti na „siri” foe David fasti „foe tégo” en dati „na troon foe hen” so langa „leki den dé foe hemel”, dan disi e sori tapoe na tan alaten foe na Kownoekondre-rigeri ini anoe foe na rigeriman di a poti Jezus Kristus. Fa wi sabi disi?
NA KOWNOE FOE NA RIGERI FOE GADO E KON NA FESI
15, 16. (a) Fa wi doe sabi dati Jezus Kristus de na „siri” foe David? (b) Foe san ede Johannes ben kan meki bekenti: „Na kownoekondre foe hemel kon krosibé”?
15 We, loekoe now san ben pasa ini na fosi eeuw foe wi gewoon teri. Jehovah ben seni hen engel Gabriël foe verteri na wendje Maria foe na pikin di ben sa gebore nanga jepi foe wan wondroe. „Joe moe gi hen na nen Jezus” Gabriël ben taki. „En disi sa de bigi en den sa kari hen na Manpikin foe na Moro Héwan, en Jehovah Gado sa gi hen na troon foe hen papa David, en a sa tiri foe tégo tapoe na oso foe Jakob en wan kaba no sa kon na a kownoekondre foe hen” (Luk. 1:31-33). Na a ten di Jezus gebore, dan „Jehovah engel” ben verteri den herder dati disi ben de na pramisi messias, na jepiman en Masra. — Luk. 2:8-12.
16 Ini na fosi eeuw na rigeri foe Gado ben bigin foe de wan sani. Baka wan pisi ten Johannes na Dopoeman ben bigin foe préki: „Abi berouw, bikasi na kownoekondre foe hemel kon krosibé” (Matt. 3:1, 2). Foe san ede Johannes ben kan taki disi? Foedi na kownoe foe na rigeri dati di ben poti, ma no ben tiri ete na den mindri. Baka di Johannes ben dopoe Jezus, Gado ben kanti trowe hen santa jeje foe salfoe Jezus leki Na Soema di ben sa tron na kownoe foe na hemel rigeri. Moro fara Kristus ben bewijsi, dati a ben abi den fanowdoe fasi foe, de kownoe ini den dri nanga afoe jari foe hen diniwroko, foedi te na a dede foe hen, di na Sneki ben masi na baka-iri foe hen, a ben tan getrouw na Gado (Gen. 3:15). Foedi Kristus ben opobaka en e libi now ini hemel, a de now ini na positie, akroederi nanga na wani foe hen Tata, „foe masi ala den libisoema kownoekondre en meki wan kaba kon na den”, foe kan meki presi na so fasi gi na grontapoe-rigeri foe Gado di e kon moro krosibé. — Dan. 2:44; Matt. 6:9, 10.
17. Sortoe tra openbaring ben de moro fara foe na fasi fa na rigeri foe Gado seti?
17 Wan kon na krin moro fara foe na Rigeri disi de, dati trawan di teki komoto foe na mindri foe libisoema, sa abi na grani foe tiri makandra nanga Kristus leki kownoe. Nanga mofo foe hen proféti Daniël Gado ben sori dati soema di den e kari „santawan”, sa abi makandra nanga hen Manpikin makti foe tiri (Dan. 7:13, 14, 27). Ooktoe Kristus ben gi so wan pramisi na hen getrouw apostel (Luk. 22:28-30). Na apostel, Paulus ben verklari gi salfoe kristen ini hen brifi gi den Galatia-soema: „Efoe joe de foe Kristus, dan joe de troe troe na siri foe Abraham.” Paulus ben sori nanga disi, dati aladi Kristus ini na fosi presi de na pramisi siri, Gado ben sa teki trawan foe de „erfgenaam foe na kownoekondre” nanga hen ini na kownoekondre-rigerimakti (Gal. 3:16, 29; Jak. 2:5). Akroederi nanga disi Paulus ben skrifi gi Timoteus: „Efoe wi e tan horidoro, dan wi sa rigeri makandra ooktoe leki kownoe” (2 Tim. 2:12). Bakaten na apostel Johannes ben skrifi foe den soema „di sa tiri leki kownoe tapoe na grontapoe” makandra nanga Jezus Kristus, aladi a de verteri dati na nomroe foe den de 144.000. — Openb. 5:10; 14:1-3.
WAN HOWPOE DI E SKIJN PASA NA DOENGROE
18-20. (a) Fa wan electriciën ben gi wan moi samenvatting foe na thema foe na bijbel? (b) Soema de den enkriwan di e meki na kownoekondreboskopoe bekenti?
18 A no de wan wondroe sani fa Gado ben tjari hen moro bigi prakseri kon na krin foe opo wan regtvaardiki rigeri foe na tégo boen foe den soema di lobi en vertrouw hen? Ma fa a de wan sari sani dati den kerki fesiman nanga theologen foe na kristenheid no ben meki na prakseri disi bekenti na den ipi foe den! Leki wan bakapisi foe disi meki den libisoema di de ini doengroe en no sabi foe na Kownoekondre, ben poti den vertrouw tapoe na wan libisoema rigeri go na a tra libisoema rigeri en disi ben tjari ogri nanga sjen gi den. Ma joe e verstan na bijbel boskopoe krin krin? San joe ben sa piki efoe wan soema ben sa aksi joe: „San de na moro prenspari thema foe na bijbel?”
19 Wan toe jari pasa kaba wan electriciën ini wan bigi wenkri ini Dayton (Amerkankondre), ben abi wan okasi foe gi piki tapoe disi leki wan kotoigi foe Jehovah. Na skrifiman foe na koranti foe na bigi wenkri, ben aksi hen foe skrifi wan sjatoe commentaar foe na moro moi boekoe di a ben lési no langa pasa kaba. A ben skrifi:
„Mi heri libi langa noiti mi sa stop foe lési na boekoe disi. A de bigin foe verteri fa wan moi oso ben pori nanga oproeroe. Disi e tjari leki, bakapisi nowtoe, rampoe, sari, kiri nanga dede. O moro na famiri e kon moro bigi o moro na sondro howpoe toestand nanga doengroe e kon moro bigi. Hondrohondro jari e pasa, naatsi e kon en e go, doesoendoesoen sma e pasa na a jeje ai, ibri libisoema firi — foe hebi bita ogri-ati te go miti na lobi foe wan soema di dede wan pina — dede — e kon na ini. Howpoe di e bigin leki wan swaki leti, e gro kon de wan absolute sekerfasi. Wan volmaakti rigeri sa meki na moi oso kon baka. Na Rigeriman foe hen de na Kownoe, Kristus Jezus. Na rigeri, na Kownoekondre foe Gado. Na famiri, na libisoemafamiri. Na boekoe de na bijbel!”
20 Fa na electriciën ben gi wan toemoesi moi kotoigi foe Gado kownoekondre en san a sa doe gi libisoema! Na rigeri foe Gado de foe troe na wan enkri howpoe, bikasi soso na Kownoekondre disi e meki dati wan soema njan boen foe na libi en kan de troe troe kolokoe! Disi de na boskopoe di Jehovah Kotoigi e meki bekenti ini na heri grontapoe. Den e doe disi akroederi nanga na profétitori foe Jezus: „Na boen njoensoe disi foe na kownoekondre sa préki tapoe na heri grontapoe pe soema e libi leki wan kotoigi gi ala naatsi en dan na kaba sa kon” (Matt. 24:14). Ja, heri esi ala libisoema rigeri sa poeroe na pasi — foedi den ben tan na baka foe sorgoe foe den fanowdoe foe libisoema. Disi sa marki na bigin foe wan regtvaardiki njoen seti ondro na tiri nanga ai foe na hemel Kownoe Jezus Kristus nanga hen kompe-rigeriman. O, fa a de wan bigi sani foe kan de wan borgroe foe na rigeri dati foe Gado! Go loekoe pikinso foe wan momenti tapoe sortoe fasi leki fa na bijbel taki a sa tjari blesi pasa marki kon tapoe libisoema.
WAN RIGERI DI SA SORGOE FOE DEN FANOWDOE SANI FOE LIBISMA
21, 22. (a) Tra fasi leki den moeiti foe libisoema, sortoe winimarki na Kownoekondre sa abi te a de handri nanga oorlog, ogridoe, nanga frede? (b) Sortoe krakti na rigerimakti foe Gado sa abi tapoe meti?
21 Ini Psalm 46:8, 9 wi e kisi na kari foe ondrosoekoe den wroko foe Jehovah: „Kon, loekoe den activiteit foe Jehovah, fa a ben doe froewondroe sani tapoe na grontapoe.” Libisoema rigeri ben tan na baka foe ben tjari wan kaba kon na oorlog. Tog Gado no sa tan na baka foe tjari wan vréde kon di e tan foe tégo, bikasi na psalmsingiman e taki: „Den ogrisoema srefi sa koti poeroe, . . . den ogri-soema no sa de moro” (Ps. 37:9, 10). Na libisoema-maatschappij sa de sondro strafoe-oso, sondro skowtoe, sondro sroto tapoe doro, ja, sondro frede. Na pramisi foe Gado de dan ooktoe, dati den soema di e libi ondro hen Kownoekondre-rigerimakti, sa njan boen foe na libi, aladi „no wan soema sa de di sa meki den béfi”. — Micha 4:4.
22 Foedi soema di abi meti fasi e poti na Wortoe foe Gado ini na libi foe den, den e leri now ini na ten disi kaba fa den moe libi ini vréde nanga tra soema. „Na wolf sa tan wan pisi ten na a pikin manskapoe”, na bijbel e taki, „en sé a pikin bokoboko na tigri srefi sa kanti didon, en na pikin kaw nanga na jongoe lew nanga neki-wiwiri nanga na fatoe meti alamala makandra; en wan pikin boi ete sa de tiriman tapoe den.” No wan enkri libisoema rigeri kan abi srefi na howpoe foe meki so wan sani doe kon! — Jes. 11:6.
23. Sortoe makti na njoen rigeriman sa gebroiki tapoe na grontapoe, sodati ala borgroe foe na Kownoekondre sa kan abi nofo njanjan?
23 Ete wan prenspari marki gi na sortoe grontapoe di wi ala nanga prisiri ben sa wani libi sote a ini, de, dati nofo njanjan de gi ala soema. Libisoema rigeri no ben man foe poeroe mankeri foe njanjan nanga angriten, ma na Kownoekondre-rigeri no sa mankeri foe doe dati. Di Jezus ben de na grontapoe, a ben sori nanga jepi foe Gado jeje, dati a ben abi krin krin ondro hen makti na winti, nanga na, se, den bon nanga den fisi (Mark. 4:39; Matt. 21:19; Joh. 21:6). Prakseri san disi sa wani taki gi na Kownoekondre! Tapoe na heri grontapoe na klimaat sa de volmaakti ini balansi, en disi sa wani taki dati a no sa de so dati njanjan di prani no sa meki nofo. Leki wan bakapisi foe disi njanjan sa de gi ibri soema pasa marki. Na bijbel e taki: „Karoe sa de foeroe pasa marki tapoe grontapoe; tapoe na ede foe den bergi bogobogo sa de.” — Ps. 72:16.
24-26. San na Kownoekondre sa doe gi den sikiwan, den lanwan den dofoewan en srefi gi den graniwan?
24 Libisoema rigeri no ben kan foe verloesoe na libisoema famiri foe mankeri nanga siki aladi disi de tog wan toemoesi prenspari marki foe de troe troe kolokoe. Ma di Jezus ben de tapoe grontapoe a ben dresi, ibri sortoe foe siki nanga mankeri, en nanga disi a ben sori san a sa doe tapoe na heri grontapoe foe gi ala hen borgroe gosontoe nanga libi. Ondro na Kownoekondre-rigerimakti den pramisi di e kon now sa kon troe letterlijk: „No wan soema di e libi drape sa taki: ’Mi siki’” (Jes. 33:24). Foe troe, no wan pai foe datra nanga tifi-datra! No wan kliniek, atoso nanga rekening foe atoso moro!
25 Srefi na kon grani kan de now wan sari ondrofeni. Wan oema ben skrifi foe eksempel: „Mi no de wan soema di e firi esesi brokosaka, ma na a momenti mi de nanga brokoskin en mi sabi foe san ede: mi e kon grani . . . Den gewoon siki nanga pen no de so hebi gi mi leki mi skin di e go na baka. Mi ben de foe troe knapoe di mi ben de jongoe, ma dati mi no de moro. Mi kisi marki nanga ploiploi di no wan operatie foe datra no kan tjari wan kenki kon na ini en mi ede-wiwiri kon weti . . . Fa mi kan kon fri foe na brokoskin foe mi?” — New York Post, 23 maart 1979.
26 Na waarheid de dati na kownoekondre foe Gado de na wan enkri dresi gi den sortoe problema disi. Ondro na rigerimakti foe na kownoekondre disi na kon grani disi sa komoto na pasi nanga jepi foe na Gado krakti, sodati skin nanga verstan sa kon jongoe agen en sa de srefi volmaakti! Den libisoema sa de volmaakti gosontoe, sodati na skin foe den sa de moro fris leki ini den jongoe jari (Job 33:25). Den toestand sa de soleki tanapoe ini Jesaja 35:5, 6: „Den ai foe den breniwan sa opo, en den jesi foe den dofoewan sa opo. Ini na ten dati wan malengriman sa kren leki wan dia, en na tongo foe wan babawman sa bari wan prisiribabari.”
27. Sortoe bewijsi de dati srefi dede den sa wini?
27 Wan soema sa taki kande: „Efoe libisoema no ben sa siki ofoe grani, dan den no ben sa dede.” Ini disi a abi leti. Dati na precies san sa pasa. Drageman sa moe go soekoe tra wroko, bikasi Gado e pramisi: „Na dede no sa de moro, no wan sari, no wan kré, no wan pen no sa de moro” (Openb. 21:4; Jes. 25:8). Na psalmsingiman ben taki foe Jehovah: „Joe e opo joe anoe en e tevréde na lostoe foe ala sani di e libi.” (Ps. 145:16). Loekoe pikinso san dati wani taki! Na reti fanowdoe nanga lostoe foe ibri soema sa de tevréde, en disi tapoe wan fasi di wi onvolmaakti soema no man verstan.
28, 29. (a) Sortoe blesi, di soema e lostoe tranga, na Kownoekondre sa gi? (b) Sortoe bewijsi de dati den dedewan sa opobaka? (Luk. 7:11-15; 8:49-56)
28 Fa a sa de wan prisiri! Ondro den regtvaardiki toestand foe na Kownoekondre-rigerimakti den pikin sa kisi na okasi foe kisi wan boen kweki en foe gro kon volmaakti sondro foe sabi, den onseker fasi foe disi grontapoe nanga na bedreiging foe den strati foe hen. Frede no sa de moro, dati wan soema sa kon de wan srafoe foe drug ofoe na pori krakti foe takroe kompe! Ibri libisoema sa kisi na okasi foe meki den koni nanga talent foe hen gro kon volmaakti en gi ibri soema switi wroko sa de. Na proféti Jesaja ben gi wan agersi fasi san na Kownoekondre-rigerimakti sa tjari kon, di a ben taki: „Den sa bow foe troe oso en libi na ini en den sa prani foe troe froktoe-djari en njan na froktoe foe den . . . Bikasi leki den dé foe wan bon den dé foe mi pipel sa de, en na wroko foe den égi anoe den wan di mi ben verkisi sa njan krin krin.”. — Jes. 65:17-25
29 Djaso wan pramisi de foe wan waarti en boen libi gi ibri man, ibri oema nanga ibri pikin. Na fositen libi ini na owroe seti foe sani sa komoto krin krin foe na prakseri. Libisoema sa bow, prani nanga koti den sani di sa tan foe hensrefi. Pikin sa kweki kon bigi ini wan tiri, boen presi! (Joh. 5:28, 29). Papa nanga mama, brada nanga sisa, omoe nanga tanta, mati nanga birti foe sensi na ten foe Abel te nanga wi ten, alamala sa tjari kon baka makandra dja na tapoe grontapoe. Fa dati sa de wan switi ten!
30. (a) Nanga jepi foe san Gado sa meki hen fosi prakseri kon troe? (b) Foe doe sàn na howpoe foe na kownoekondre e gi joe tranga?
30 No wan enkri libisoema rigeri ben sa prefoeroe foe dren foe doe so wan sani gi den borgroe foe hen. Soso Gado kan gi na djaranti foe na kon troe foe den sortoe pramisi disi. Moro ete, ondro na kownoekondre-rigerimakti na heri libisoema famiri sa de wàn ini na aanbegi foe Jehovah. Ondro na hemel tiri foe hen na grontapoe safri safri sa kenki kon tron wan paradijs, sodati na heri grontapoe de wan djari foe Eden. En ala soema di e libi sa prisiri ondro na kownoekondre foe Gado foedi den abi wan volmaakti gosontoe, en e libi foe tégo. Troe troe wan wondroe howpoe, wan howpoe di abi na moro betrouwbaar fonten, Jehovah Gado srefi!