Foe sanede den boen verwakti foe wi moesoe kon troe
„Gado e meki ala hen wroko . . . wroko makandra foe na boen foe den di lobi Gado”. — Rom. 8:28
1. San moro nanga moro sma foe na soktoe mekisani ben kon sabi ini wi twintigste eeuw en fa a de nanga na howpoe foe den baka ala den tin-tron jari en foe sanede?
INI wi twintigste eeuw moro nanga moro sma foe na libisma mekisani kisi foe sabi foe na kon moro krosbé foe na „kon na krin foe den pikin foe Gado” en den sabi now kaba san den kan verwakti heri esi. A wans na libisma mekisani te nanga now ben de ondro ala „soktoe nanga na njan foe pina”, tog den sma disi di kon sabi en e loekoe na fesi nanga verwakti e prisiri. Aladi someni tintron jari di psa sensi „na bigi ipi” disi ben bigin kon makandra foe na fosi tron, tog dèn howpoe de wan libi howpoe. Leki wan „bon foe libi” na howpoe disi e libi ini den ati, bika a ben abi hen fundamenti tapoe Gado pramisi di skrifi tapoe den bladzijde foe na bijbel. — Spr. 13:12; Openb. 7:9; 21:5; Rom. 8:19-22.
2. (a) Foe na kon reti foe san tapoe na tori foe na reti positie di Jehovah Gado e teki, na „bigi ipi” e begi? (b) Foe opo foe doe san den e aksi te den e begi „Joe nen moe de santa”, en oten Gado sa jere na begi disi?
2 Moro foeroe den e howpoe tapoe na kon reti esesi foe na universele soevereiniteit foe na Mekiman, Jehovah. Den e verstan dati a de regtvaardiki ini na sori foe hen soevereiniteit tapoe na universum di a meki. Foe datede den de sondro joe kan beni den, tegen na „fosi sneki”, Satan na Didibri, di no kroetoe Jehovah soevereiniteit joisti en di drai na moro bigi pisi foe na libisma mekisani tegen na soevereiniteit foe Gado. Den e begi na Wi Tata na Jehovah en den e taki: „Joe nen moe kon santa” (Matt. 6:9, 10). Den e begi foe datede efoe Jehovah srefi sa santa hen nen. A sa jere na begi disi ini na „bigi benawtoe” di e kon en di sa doro hen hémarki ini na „feti foe na bigi dé foe Gado na Almakti Wan” ini Har-mâgeddon, di na tai nanga iti go ini na peti foe na „fosi sneki” sa waka na hen baka nanga ala den sma di de wan pisi foe hen demonen-„siri”. — Ezech. 36:23; 38:16, 23; 39:27; Openb. 16:14, 16; 20:1, 2.
3. Foe san na „bigi ipi” sma di abi howpoe sa de kotoigi baka te den tan na libi?
3 Na „bigi ipi” sma di abi howpoe sa tan ini libi foe de kotoigi foe na kon reti foe Jehovah universele soevereiniteit nanga na santa foe hen nen. Foe datede a de wan sani di fiti dati Openbaring 7:9, 10 na proféti fasi e skrifi foe den, soleki baka dati den sa tnapoe fesi na Gado di kisi reti nanga hen Manpikin Jezus Kristus di offer hensrefi en nanga bigi tangi na ati e taki: „Jepi wi abi foe taki tangi na wi Gado, di sdon tapoe na troon en na a Lam.”
4. San den memre foe na „bigi ipi” e doe foedi den no abi na frede foe grontapoe sma, nanga sarifasi en dipi respeki na fesi grontapoe rigeri?
4 Ini na disiten situatie bifo na broko kon foe na „bigi benawtoe”, aladi na grontapoe lan nanga frede, na „bigi ipi” no abi frede foe san den sma foe na grontapoe e frede. Nanga dekati den e doe san na apostel Petrus ben skrifi: „Santa na Kristus leki Masra ini joe ati, alaten de klari foe verdedig joesrefi na fesi ibrisma di e aksi joe wan reden foe na howpoe di de ini joe, ma doe disi nanga safrifasi en nanga dipi respeki.” — 1 Petr. 3:15.
5. Fa den e teki prati na a kon troe foe Jezus profétitori ini Matteus 24:14, en . . . fa den de tapoe na tori foe Jezus komando ini Matteus 28:19, 20?
5 Sondro gridi den e prati den glori howpoe nanga ibrisma di den man miti. Tapoe na fasi disi den e teki prati na a kon troe foe na profétitori foe Jezus: „Na boen njoensoe disi foe na kownoekondre sa préki tapoe na heri grontapoe pe libisma e libi leki wan kotoigi gi ala naatsi”. Now a de moro tranga fanowdoe gi den leki ooiti na fesi foe poti prakseri tapoe Jezus komando: „Go foe datede en meki discipel foe sma foe ala naatsi, dopoe den . . . leri den foe hori ala den sani di mi ben komanderi joe.” — Matt. 24:14; 28:19, 20.
6. Foe sanede wi sa abi boen ede moro bigi leki den kristen bifo wi ten nanga na srefi howpoe?
6 No wan tra sma abi so wan howpoe di abi hen fundamenti tapoe na bijbel leki wi. A de na moro boen sani di wi kan prati nanga trawan. Na howpoe foe wi de wan goedoe di wi kan prisiri foe hen: „Prisiri ini na howpoe”, na bijbel e taki gi wi (Rom. 12:12). Nanga vertrouw wi kan verwakti na kon troe esesi foe hen. No foe soso wi e wakti nanga horidoro tapoe na kon troe foe hen. Kristensma bifo na ten foe wi ben loekoe soso na san wi kan kon si troe ibri momenti. Fa wi sa abi boen ede te wi sa si na bigi kon troe foe hen!
DEN WROKO FOE GADO SA WROKO FOE BOEN EDE FOE TROE
7, 8. Foe san-ede wi verwakti no hé toemsi? (b) Foe san wi e bribi tranga, soleki na apostel Paulus na a anoe foe Romeini 8:28-30?
7 Wi verwakti no de toemsi hé efoe wi e howpoe tapoe na kon troe foe san skrifi ini Gado Woortoe. Noti san skrifi, sa de gi hen wan sani di no kan! A no kan misi foe meki hen glori pramisi kon troe, foedi hen de na Almakti Gado. Efoe wi lobi hen en sori disi nanga na gi di wi e gi jesi, dan hen no sa misi foe meki ala hen boen pramisi kon troe tapoe wan glori fasi. Wi sabi disi, leki na apostel Paulus ini na fosi eeuw G.T. ben bribi disi. Ini Romeini 8:28-30, wan pisi foe bijbel di ben skrifi na a ten foe 56 G.T., na apostel Paulus e taki disi:
8 „Now wi sabi dati Gado e meki ala hen wroko wroko makandra foe na boen foe den di lobi Gado, den di akroederi hen prakseri de den wan di a kari; bikasi den di a ben erken fosi, ooktoe a ben poti kaba na fesi foe meki den na a prenki foe hen Manpikin, sodati a ben sa de na fosigebore wan na mindri foeroe brada. Den di a ben poti kaba na fesi, de boiti dati den wan di a ben kari toe; en den di a ben kari, de den wan di a ben verklari regtvaardiki toe. Te foe kaba, dan den wan di a ben verklari regtvaardiki, de den wan di a ben meki kisi glori toe.”
9. Fa na Statenvertaling en ooktoe wan toe tra bijbelvertaling e tjari Romeini 8:28 kon na fesi, ma fa difrenti modern vertaling e akroederi nanga na Nieuwe-Wereldvertaling?
9 Ini na Statenvertaling Romeini 8:28 de so: „En wi sabi dati den wan, di lobi Gado, ala sani e wroko makandra foe boen ede, foe taki den wan di ben kari akroederi hen prakseri.” Someni vertaling foe na bijbelvers disi e gi na srefi prakseri. Ma na Petrus-Canisiusvertaling e taki: „Wi sabi toe, dati Gado e tjari ala sani foe na boen foe den, di lobi hen, di ben kari akroederi san a ben poti na fesi.” Na Nieuwe Vertaling foe na Nederlands Bijbelgenootschap e taki: „Wi sabi dati Gado e meki ala sani wroko makandra foe na boen foe den, di lobi Gado, di ben kari akroederi hen prakseri.” Na Willibrordvertaling e taki: „Now wi sabi, dati ini ala sani Gado e meki na boen kon na fesi foe den di lobi Hen.”
10, 11. (a) San den wroko di Gado e meki wroko foe na boen foe na wan di a kari? (b) Sortoe égi doe wi no moe poti ini „ala sani” di Romeini 8:28 e kari?
10 Ala sani di e kari ini Romeini 8:28-30, de den wroko foe Gado, no den wroko foe libisma. A de Gado wroko, di leki fa skrifi ini bijbel, e wroko makandra foe na boen foe den wan di kari en di lobi hen, foedi a wani dati den kisi na kownoekondre, di a ben kari den foe dati. Efoe wan dopoe kristen di taki a boen foe de ini na hemel kownoekondre e tjari hen srefi tapoe wan fasi di de kontrari hen hemel kari, dan wi no kan verwakti dati Gado sa meki so wan fasi foe doe wroko foe na boen foe na sondari ofoe dati na fasi foe doe foe hen sa wroko automatisch foe na boen foe hen. Efoe wan sma di taki a de wan kristen nanga na hemel kari leki wan ontspanning foe eksempre nanga faja e teki prati na wan bepaalde sport en e broko wan foetoe ofoe ai broko wan ai-foetoe, dan Gado sa meki na mankeri disi wroko foe na boen foe na sport-lobiman? Ofoe efoe wan kristen di Gado kari ini wan pisi ten foe swaki fasi nanga verkeerti firi e teki na bosroiti foe waka ini wan takroe birti foedi a wani prisiri hen lostoe ofoe wani foe si fa tra man e kori go ini hoeroedoelibi nanga montjo, en hensrefi e fadon go ini na kori fasi foe wan hoeroe-oema en e doe hoeroedoe, wi kan verwakti foe Gado dati a sa meki na ondrofeni dati wroko foe boen gi na sondari? A abi wan boen wroko te wi e tesi Gado na so fasi?
11 San so wan skin ofoe moreel mankeri o tjari kon, didon krin krin foe na fasi fa na sma e doe nanga den bakapisi foe hen don fasi foe doe. Kande a de leri wan les foe so wan tranga ondrofeni. Ma dati a leri wan sani na ini, e meki dati na afersi de wan foe den wroko foe Gado, spesroetoe foedi Gado e sori kande sari-ati ini na afersi disi? Kwet-kweti! So wan ondrofeni wi no moe poti ini „ala sani” di Paulus e taki foe hen ini Romeini 8:22.
12. Foe sortoe fasi ala Gado wroko de di e kari ini Romeini 8:29, 30, en ini sortoe volgorde Paulus e kari den?
12 Te moro fara wi e lési den vers 29 nanga 30 en e loekoe sortoe wroko foe Gado e kari drape, dan wi e si dati ala Gado wroko tapoe na tori foe den kristen di ben kari, de boen. Ooktoe den e wroko ini ibri stadium pe Gado de bezig nanga na tori, foe na boen foe na Kownoekondre-erfgenaam. Paulus e kari den stadium foe baka kon na fesi te a de taki: „Bikasi den di a ben erken fosi, ooktoe a ben poti kaba na fesi foe meki den na a prenki foe hen Manpikin, sodati a ben sa de na fosigebore wan na mindri foeroe brada. Den di a ben poti kaba na fesi, de boiti dati den wan di a ben kari toe; en den di a ben kari de den wan di a ben verklari regtvaardiki toe. Te foe kaba, dan den wan di a ben verklari regtvaardiki, de den wan di a ben meki kisi glori toe.”
13. (a) Oten Gado e meki den sma kisi glori di a ben verklari regtvaardiki? (b) Tapoe na gron foe san sma e verklari regtvaardiki?
13 Oten Gado e meki den sma disi di abi boen-ede kisi glori? Te a gi den na glori sabi foe hen fosigebore Manpikin, di poti now hé na Hen reti-anoe-sé. A so fasi Gado e poti den tapoe na pasi, di e tjari den go na hemel glori. Baka na fosi wroko disi foe Gado, dan a kan verklari den moro fara regtvaardiki, ma soso efoe na bribi foe den ini na glori Kristus de so krakti, dati den e gi den abra na Gado sondro foe hori wan sani na baka.
14. (a) Fa wan sma e kon tron wan foe den sma di „den kari”? (b) Leki wan bakapisi foe san, a de go de wan pisi foe den sma di Gado ben poti na fesi kaba?
14 Fa Gado e kari now wan discipel foe hen glori Manpikin di gi den srefi abra en dopoe sodati a kan „poti abra ini na kownoekondre foe na Manpikin foe hen lobi”? (Kol. 1:13). Gado e doe disi, foedi a de meki a kon njoen gebore nanga hen jeje, sodati a tron wan pikin foe Gado di gebore njoen nanga jeje. Dan na momenti doro, dati Gado kan kari so wan jeje manpikin foe tron wan pisi foe na hemel kownoekondre, wan grani di soso den sma kan kisi di te foe kaba e kisi opobaka foe jeje-libi ini hemel (1 Kor. 15:43-50). Akroederi nanga san Gado ben poti na fesi, dan ben sa tai nanga hen manpikin wan skin foe brada di ben sa abi na srefi gado natuur leki hen fosigebore Manpikin, Jezus Kristus en di ben sa meki na a prenki foe hen. Baka te Gado ben kari hen, dan na pikin foe Gado di kon gebore njoen nanga jeje foe datede e tron wan memre foe na klasse di Gado ben poti baka na fesi, en a moe hori te na hen dede getrouw na grontapoe na a de foe wan memre foe na klasse dati). Gado ben poti na klasse disi na fesi, no sma di kari aparti nanga nen, di e go de wan pisi foe na klasse dati. Akroederi nanga san Gado ben poti na fesi, dan na nomroe foe Kristus hemel brada ben sa de 144.000 sma, sondro dati ini disi aparti sma nen kari. — Openb. 14:1-5.
15. Oten en fa Gado ben „erken fosi” den wan di a ben poti na fesi kaba?
15 Ini Romeini 8:29, 30 na apostel Paulus e tjari kon na krin, dati Gado e „erken fosi” na klasse foe kristen di a de gi glori ofoe grani nanga wartifasi, di a de verklari regtvaardiki, di a de kari en di a de poti na fesi. Disi Gado ben doe kaba ini na djari foe Eden, di a ben taki hen profétitori foe na „Siri” foe hen égi „oema” en a ben taki na fesi na victori wroko foe na „Siri” dati (Gen. 3:15). Millennium bifo na „Siri” disi ben doe kon na libi, dan Gado ben de na fosiwan di ben erken na fanowdoe foe hen en ben verstan sortoe spesroetoe wroko na „Siri” disi ben sa kisi. Foe sensi na ten dati, Gado ben erken hen verplekti foe meki so wan „Siri”. Na verplekti disi ben de teki na fosi presi ini Gado programma. San Gado foe datede si waarti hen „fosi erkenning” a ben hori doro ini hen verstan nanga ati te leki a ben meki na „Siri” dati — hen Manpikin Jezus Kristus en den getrouw, kon njoen gebore nanga jeje discipel foe na Manpikin disi. Ini na heri ten te leki na „siri” disi ben kon, Gado ben sabi hen na fesi en a ben gi hen spesroetoe boen-ati erkenning.
16. (a) Fa „ala hen wroko”, soleki den e kari ini Romeini 8:28-30, wan-froe-wan e doe den prati? (b) Foe san ala den di „a ben kari akroederi nanga hen prakseri” foe datede kan de seker?
16 Na wroko foe soema soboen, foe na bigin te na a kaba e kari gi wi ini Romeini 8:28-30? A de den „wroko” foe Gado. En foedi a de wan consequente Gado, di de akroederi nanga hen srefi ini ala hen doe, a de meki „ala hen wroko . . . wroko makandra foe na boen foe den, di lobi Gado”. No wan foe „ala hen wroko” de kontrari ofoe e stré nanga ala hen tra boen wroko. Den wroko disi e waka wan baka makandra tapoe wan ordelijk fasi, en na wàn wroko e tjari joe go na a trawan en a de leki wan sreka na fesi foe hen. Na prakseri foe Gado de toemsi moi, en hen sabi precies fa a moe doe nanga winimarki. Den „di akroederi nanga hen prakseri de den di kari”, kan de seker foe datede dati a no sa misi nooiti. Te den de getrouw e wroko makandra nanga hen, dan den sa abi foe troe wan prati na a kon troe foe hen prakseri, foedi den sa abi wan actief prati nanga Jezus Kristus na hen hemel kownoekondre.
ETE WAN KLASSE BEN SABI NA FESI
17. Sortoe lobi prakseri Gado ben abi nanga den di ben kari, en di ben poti kaba na fesi, en sensi oten?
17 Nanga jepi foe den „di kari”, en di „Gado erken fosi”, a wani doe wan lobifasi prakseri. Disi ben meki bekenti 2083 jari baka na meki f oe Adam, da foe taki ini na jari 1943 bifo G.T. Na a ten dati Gado ben taigi na getrouw famiri-edeman: „Ala famiri foe grontapoe sa blesi densrefi troe troe nanga jepi foe joe.” Na blesi disi ben abi foe doe nanga na heri grontapoe en joe ben kan kisi hen nanga jepi foe wan „siri” foe Abraham (Gen. 12:1-3; 22:17, 18). Na „siri” disi di ben poti kaba na fesi ben sa de Jezus Kristus nanga hen 144.000 discipel „di kari” (Openb. 7:1-8; 14:1-3; Gal. 3:16, 29). Ini na sempel pramisi di ben gi a Abraham na sabi foe Gado na fesi foe wan „siri”-klasse, ben kon na krin sondro dati a ben kari wan definitief nomroe. Soso ini na laatste bijbelboekoe na nomroe e gi.
18. Fa Gado ben gebroiki sma nanga groepoe ini owroeten bifo Kristus leki eksempel nanga proféti agersifasi?
18 Ini owroeten bifo Kristus sma nanga groepoe ben de di ben jepi den bakatenpikin foe Abraham na skinfasi leki mati. Gado ben gebroiki den leki eksempel ofoe proféti agersifasi foe sma ini wi égi ten, di leki mati ben sa jepi en tai den srefi na a fikapisi foe den „di kari” en di de ete na grontapoe.
19. Fa Openbaring 7:9-14 e agersi den actief mati dati foe na fikapisi foe discipel foe Kristus di „kari”, en sortoe grani den sa kisi ini na ten di e kon?
19 Ini na laatste boekoe foe na bijbel di na kristen apostel Johannes ben skrifi ini na jari 96 G.T., den actief mati disi foe na fikapisi foe den di „kari” ben taki na fesi leki wan „bigi ipi” di no wan sma no kan teri. Den memre foe na „bigi ipi” disi sa tjari psa libilibi- na „bigi benawtoe” di e kon krosbé, ja, psa na „feti foe na bigi dé foe Gado na Almakti Wan” na Harmageddon en ondro na doesoenjari rigeri foe Jezus Kristus nanga hen 144.000 den di „kari”, den sa go ini wan njoen ordening tapoe wan grontapoe di kon krin. Na proféti prenki foe na „bigi ipi” disi, soleki skrifi ini Openbaring 7:9-14, ben verklari ini na jari 1935 nanga jepi foe wortoe di taki en skrifi. — Openb. 16:14, 16.
20. Omeni eksempre nanga profétitori di e sori tapoe na „bigi ipi” ben kon na krin ini wi boekoe sensi 1935, en foe sanede na howpoe foe den de aparti, ma sa kon troe ete?
20 Ini den 45 jari di sensi na tin dati psa, dan ben tjari kon na krin ini den boekoe foe na Wachttorengenootschap no moro pikinso leki 42 eksempre nanga proféti prenki foe na „bigi ipi” sma di sa psa libilibi Harmá-geddon. (Loekoe na boekoe Joe kan pasa libilibi Armageddon en go ini Gado njoen grontapoe, ini Bakratongo ini 1959, en den bladzijde 368, 369). Ala den eksempre nanga profétitori disi e sori dati Gado abi soso boen sani ini prakseri gi na „bigi ipi” disi di a ben sabi na fesi. Disi doe kon foedi den toe lobi hen. Foeroe foe den ben de klari foe bewijsi na lobi foe den di no kan broko gi hen te ini wan pinadede. Na howpoe di na „bigi ipi” abi na hen fesi, no gi na a moro bigi pisi foe na libisma mekisani. Aladi den abi wan aparti en wondroe howpoe, nanga foeroe vertrouw den e loekoe na a kon troe foe hen. Na libi howpoe disi foe den nooiti sa meki den fesi fadon, foedi na Gado di e gi howpoe, de getrouw. Hen pramisi na den de getrouw en sa kon troe nomonomo, da foe taki: „Hen di sidon tapoe na troon sa panja hen tenti tapoe den. Den no sa abi angri nanga dréwatra moro, ooktoe son no sa skijn tranga tapoe den, no wan enkri hati faja, bikasi na Lam di de na a mindri foe na troon, sa tjari den go na wé en tjari den go na fonten foe watra foe libi. En Gado sa figi poeroe ala watra na den ai.” — Openb. 7:15-17.