Moksi tra egifasi na a bribi foe joe
„Moksi na a bribi foe joe boenfasi . . . na joe boenfasi sabi, na joe sabi dwengi joesrefi, na joe dwengi joesrefi oridoro, na joe oridoro frede foe Gado, na joe frede foe Gado, brada-lobi, na joe brada lobi lobi.” — 2 Petrus 1:5-7.
1. San e meki wan goedoe de troetroe wan warti sani, èn fa wi kan agersi disi?
WAN warti goedoe di tan kibri ini a gron, no e doe no wan boen. A no kenki foeroe foe wan pisi ston di doti tapoe. A goedoe abi wel den okasi ini ensrefi foe de foe a boen foe a sma di abi en èn srefi trawan toe. A ben sa kan gebroiki foe jepi den sikiwan nanga den mofinawan ofoe a ben sa kan poti tapoe wan froestan fasi foe wroko. Efi a de go foe wan bigi ipi moni, dan disi ben sa kan gebroiki foe opo wroko, sodati foeroe sma ben sa man foe sorgoe gi densrefi foe tan a libi. Ja, efi wan goedoe gebroiki tapoe wan boen fasi, dan troe troe a de kisi waarde.
2. Sortoe diri goedoe kristensma kisi soleki 2 Petrus 1:1 e taki?
2 A jeje goedoe di Gado dienstknegti abi, abi srefi moro okasi foe doe boen sani. Ini en tweede brifi gi kristensma na apostel Petrus e taki foe a diri goedoe disi, èn a de bigin nanga den wortoe: „Simon Petrus, wan srafoe nanga apostel foe Jezus Kristus, gi den di ben kisi wan bribi di de leki wan srefi bigi grani leki di foe wi, nanga a regtvaardegfasi foe wi Gado nanga a Verloesoeman Jezus Kristus” (2 Petr. 1:1). A toemsi bigi warti goedoe di ben kon de foe den sma di na apostel ben taki nanga den, ben de „bribi”, dati wani taki, a bribi di de fanowdoe foe tego libi.
Bribi — Wan goedoe
3. Foe sanede Petrus ben kan taki dati a bribi foe den sma di a ben skrifi „de leki wan srefi bigi grani leki di foe wi”?
3 A bribi disi no ben de spesroetoe wawan foe Petrus nanga den tra apostel ofoe foe ala sma, di leki en ben teki a kristen bribi leki djoesma. Makandra a ben prati nanga a eri skin foe bribisma, djoe leki sma di no de djoe. Na Moro Hé Gado ben opo a okasi gi den foe kisi a bribi disi. Nanga jepi foe a boskopoe foe a „boen njoensoe” di ben préki, Gado ben ari sma kon na en, èn dati ben de nanga en Manpikin (Joh. 6:44). A ben opo a ati foe sma gi en „wortoe” ofoe boskopoe. — Tori foe den apostel 16:14; Rom. 10:8.
4. Sortoe frantwortoe wi e tjari baka te wi kisi wan bribi, èn san de toemsi prenspari foe wi kan doe a frantwortoe dati?
4 Soleki na apostel Petrus ben taki, dan a bribi disi ben kisi „nanga a regtvaardegfasi foe wi Gado nanga a Verloesoeman Jezus Kristus”. Na Almakti Wan e opo a okasi gi sma foe ala lo, pipel, naatsi nanga ras foe kisi na toemsi diri goedoe disi. Foedi Gado tapoe so fasi no ari no wan sma poti a fesi trawan te a ben gi pardon foe sondoe tapoe a gron foe a slagti-ofrandi foe en Manpikin èn foe teki sma nanga berouw leki en pipel, dan Jehovah Gado ben sori en regtvaardegfasi, en opregtifasi, en onpartijdegfasi. Disi ben de a ede-prakseri foe na sani di Petrus ben tjari kon na krin di a ben meki a „boen njoensoe” bekenti na a Italiaan edeman foe ondro (sroedati) Cornelius nanga en famiri nanga krosbé mati. „Mi e si eri boen” na apostel ben taki, dati „Gado no e teki partij, ma ini ibri naatsi a de feni dem sma boen di e frede en èn di e wroko regtvaardegfasi” (Tori foe den Apostel 10:34, 35). Wi Verloesoeman, Jezus Kristus e sori a srefi onpartijdegfasi. A ben gi en libi foe ala sma, pe den de toe. — 1 Tim. 2:5, 6.
Go a fesi ini sabi foe Gado nanga Kristus
5. Sortoe frantwortoe wi e tjari baka te wi kisi wan bribi, èn san de toemsi prenspari foe kan doe a frantwortoe?
5 Baka te den discipel foe Jezus Kristus ben „kisi bribi”, dan e kon tapoe den a frantwortoe foe libi moro akroederi a wani foe Gado. Wan soifri sabi sa jepi wi ini disi. Na apostel Petrus ben poti krakti tapoe a prensparifasi foe soifri sabi ofoe sabi di boen dorodoro di a taki: „Meki boen-fasi di no verdini nanga vréde kon moro foeroe na joe nanga jepi foe wan soifri sabi foe Gado nanga Jezus, wi Masra.” — 2 Petr. 1:2.
6. (a) San a wani taki foe abi wan soifri sabi foe Gado nanga Jezus? (b) Fa wi kisi so wan sabi?
6 Abi wan „soifri sabi foe Gado nanga Jezus, wi Masra”, wani taki dati wi sabi den leki persoon — den égifasi, pasi nanga doe foe den — èn waka baka a sondro fowtoe eksempre foe den (Loekoe Jeremia 22:15, 16; Matt. 7:21-23; 1 Johannes 2:3-6; 3:5, 6). Nanga a go a fesi di wi e go a fesi ini a kisi foe sabi nanga a poti ini wi libi den gronprakseri foe Gado wortoe, dan wi e leri sabi moro betre a Tata nanga en Manpikin. Disi abi leki bakapisi, dati wi e prisiri wisrefi moro nanga moro ini boenfasi di no verdini nanga ini vréde.
7. Fa „boenfasi di no verdini” e kon moro foeroe „nanga wan soifri sabi foe Gado èn Jezus”?
7 Soso te wi doe san Jehovah Gado nanga Jezus Kristus e feni boen, wi sa tan kisi jepi nanga tiri foe Gado. Foedi wi de sondoe sma, dan wi srefi no abi no wan verdienste. Ala san wi Mekiman e doe gi wi, de soboen wan sori foe boenfasi di no verdini. Tokoe ete a kisi foe boenfasi di no verdini foe Gado e kon efi wi e doe moeiti foe de leki wi hemel Tata nanga en Manpikin. Te disi de troe tapoe wi, dan wi kan go a Jehovah Gado nanga wi eri froetrow dati a sa jere wi begi nanga djeme. A kristen apostel Johannes e verklari:
„Wans san wi e aksi toe, wi e kisi foe en, bika wi e ori en komando èn e doe den sani di de switi ini en ai. Ja, disi de en komando, dati wi abi bribi ini a nen foe en Manpikin, Jezus Kristus, èn lobi makandra, soleki a ben gi wi wan komando. Boiti dati, a sma di e ori en komando, e tan ini wanfasi nanga en, èn en ini wanfasi nanga so wan sma èn nanga disi wi e kon sabi taki a de tan ini wanfasi nanga wi, tangi foe a jeje di a ben gi wi.” — 1 Joh. 3:22-24.
8. Fa „vréde” e kon moro foeroe „nanga wan soifri sabi foe Gado nanga foe Jezus”?
8 Te wi no abi somaar pikinso sabi ma wi abi wan sabi foe wi hemel Tata nanga en Manpikin di boen dorodoro, dan wi sa sabi krin san de switi ini den ai. Wi e tan ini wanfasi èn ini vrede nanga den èn wi e prisiri wisrefi ini wan krosbé matifasi nanga den leki den mati foe den. O moro wi e go a fesi foe leri sabi Jehovah Gado nanga en Manpikin moro betre, dan o moro wi sa njan boen foe moro vréde toe. Disi de so foedi wi sa tan farawe foe wan fasi, ofoe taki ofoe doe di no de akroederi nanga a eksempre foe wi Gado nanga wi Masra Jezus Kristus.
9. Sortoe krakti a abi tapoe wi vréde nanga Gado, te wi doe sondoe?
9 Te wi sa sondoe, dan wi sa broeja na a tra sé a vréde foe wi nanga a Moro Hé Wan, foedi wi e handri kontra en wani. Soso a pardon foe Gado tapoe a gron foe wi opregti berouw nanga bribi ini den verzoen winimarki foe Kristus slagti-ofrandi, kan meki a vréde kon boen baka. — 1 Joh. 2:1, 2.
Meki „krakti foe Gado” gi joe tranga foe doe sani
10. (. . . ?)
10 A no de foe taki, dati Jehovah Gado nanga Jezus Kristus wani dati njan boen moro nanga moro foe boenfasi di no verdini nanga vrede. Foe dat’ede meki wi moe wroko nanga den makandra foe teki a fasti bosroiti foe doe moeiti foe leri sabi den moro betre. Disi wi kan doe te wi go prakseri nanga foeroe warderi foe san Jehovah Gado ben doe gi wi nanga jepi foe en Manpikin. Na apostel Petrus ben skrifi: „En Gadofasi krakti ben gi wi fri ala sani di de fanowdoe foe libi nanga frede foe Gado . . . nanga jepi foe a soifri sabi foe a sma di ben kari wi nanga glorifasi èn boenfasi. Nanga jepi foe den sani disi a ben gi wi fri a diri nanga toemsi bigi pramisi, sodati joe kan abi prati na a gadofasi natuur, baka di joe ben lon komoto foe a porifasi di kon de ini a grontapoe foe takroe lostoe ede.” — 2 Petr. 1:3, 4.
11, 12. (a) Foe sanede „Gadofasi krakti” abi foe doe nanga „soifri sabi”? (b) Fa disi e kon a krin ini a tori foe kristensma ini Thessalonika?
11 Loekoe dati Petrus e tjari „Gado krakti” kon akroederi nanga „soifri sabi”. Disi fiti toemsi, bikasi Gado wortoe, ofoe boskopoe tapoe a tori foe en Manpikin, a „boen njoensoe”, kan abi wan krakti wroko tapoe a libi foe libisma. Disi e kon de foe si boen ini san Paulus ben skrifi gi den Thessalonikasma: „A boen njoensoe di wi e préki, no kon wawan nanga wortoe a joe, ma nanga krakti toe” (1 Thess. 1:5). A préki foe a boen njoensoe ini Thessalonika ben abi boen winimarki. A no ben go dati sma ben jere wortoe èn no ben handri akroederi nanga dati, dati wani taki, a no ben de soso wan afersi foe ’soso wortoe’. Den sma foe Thessalonika di ben teki a kristendom ben kisi tranga foe doe wan sani èn disi ben sori dati a „boen njoensoe” sori en krakti. Den kristen disi ben tron wan eksempre gi tra bribiwan, foedi foe regtvaardegfasi ede den ben tan getrouw ondro vervolgoe èn ben go doro foe gi kotoigi foe a „boen njoensoe” na ibrisma.
12 Foedi Thessalonika ben de wan foto pe foeroe boto ben kon, dan so bribiwan ben kon ini kontakti nanga matrosi, seri-nanga baiman nanga tra sma foe farawe presi. Den kristen ini Thessalonika ben gebroiki den okasi boen di den ben abi foe prati a „boen njoensoe” nanga trawan. Leki wan bakapisi foe disi, meki sma ben taki foe a bribi foe den na alape. Di Paulus nanga den kompe foe en ben meki a waarheid bekenti ini tra foto, dan den sma ben ferteri den foe den kristen ini Thessalonika. Na apostel ben gi commentaar a tapoe disi di a ben skrifi:
„Komoto foe joe a wortoe foe Jehovah no ben bari a lontoe ini Macedonia nanga Akaja wawan, ma ini ibri presi a bribi foe joe tapoe Gado ben panja ensrefi, sodati wi no abi noti foe taki. Bikasi den e ferteri srefi tapoe sortoe fasi a ben kon fosi a joe èn fa joe ben drai baka gi den kroektoe-gado foe joe kon a Gado foe dini wan libi nanga troefasi Gado leki srafoe èn foe verwakti foe hemel en Manpikin, di a ben opobaka foe dede, namkoe, Jezus, di e verloesoe wi foe a atibron di e kon.” — 1 Thess. 1:8-10.
13. Fa wisrefi ben ondrofeni a wroko foe „gadofasi krakti” ini wi, èn san wi moe tan doe foe dat’ede?
13 Èn foedi wi, di ben tron bribiman ini disiten, ben teki Gado wortoe ofoe boskopoe, dan wi ben ondrofeni so srefi toe a wroko foe a „gadofasi krakti” ini wi. A „boen njoensoe” dati ben tjari wi go fara foe tjari kenki kon ini wi libi èn foe skeki wi srefi na a wani foe Gado. A ben troesoe wi so srefi toe foe meki a „boen njoensoe” bekenti gi trawan. A gadofasi krakti di e wroko nanga jepi foe a „soifri sabi” di de ini a „boen njoensoe”, ben gi wi ala sani di wi abi fanowdoe foe „a libi nanga a frede foe Gado”. Foe a gadofasi krakti ede wi kan abi wan soifri libi foe dat’ede, nanga tego libi na wi fesi. Èn wi moe gi pasi dati a gadofasi krakti jepi wi ini wi libi nanga waka nanga doe foe gersi Kristus moro.
14. Fa Jehovah Gado e kari nanga jepi foe „glorifasi” èn „boenfasi”?
14 A fasi fa Jehovah Gado e kari sma ofoe e ari den kon na en, moe de wan bigi tranga foe go a fesi ini a kristen fasi foe libi nanga waka. Na apostel Petrus ben sori tapoe a „soifri sabi foe a sma di ben kari wi nanga glorifasi èn boen-fasi”. Jehovah Gado e „kari” ofoe e „ari” nanga jepi foe en Manpikin. Libisma kan si spesroetoe krin ini Jezus Kristus „Glorifasi” nanga „boenfasi”. A kristen apostel Johannes ben skrifi foe a Manpikin: „A wortoe now ben tron skin èn ben libi a wi mindri, èn wi ben si en glorifasi, wan glorifasi soleki di foe wan enkrigebore Manpikin foe wan tata; èn a ben de foeroe nanga boenfasi di no verdini nanga waarheid” (Joh. 1:14). Johannes nanga tra apostel ben si ini a libi foe Masra Jezus Kristus wan glorifasi, wan moifasi, wan prodo di soso wan ben kan sori di tapoe wan volmaakti fasi ben kan tjari a prenki foe a hemel Tata kon a fesi. Boiti dati, na apostel Johannes, makandra nanga Jakobus nanga Petrus ben de kotoigi foe a transfiguratie foe Jezus Kristus. Na a okasi dati „(en fesi) ben skijn leki a son èn en tapoesé-krosi ben brenki leki leti” (Matt. 17:2). Soleki glorifasi e tjari kon akroederi nanga a Manpikin foe Gado, so srefi toe disi de so gi a égi-fasi boenfasi. Jezus Kristus ben de boen dorodoro, wan man di ben abi wan toemsi hé moreel fasi. Srefi a feradelek Judas Iskáriot ben erken: „Mi ben sondoe di mi ben tori regtvaardeg broedoe” (Matt. 27:4). Jehovah ben kari sma soboen nanga jepi foe a „glori-fasi” nanga „boen-fasi” di a Manpikin ben sori.
Gado pramisi — Wan tranga foe go a fesi
15. Foe sanede den pramisi di Gado ben gi de „diri nanga toemsi bigi”?
15 Den wondroe seti foe Gado foe verloesoe, soleki disi e kon a krin ini a „boen njoensoe”, ben gi den fosi-eeuw kristen „diri nanga toemsi bigi pramisi”. Den pramisi disi ben de diri ofoe abi waarde foedi den e gi trowstoe, dekati, nanga wan krakti foe kaka foetoe gi a bita-ati foe a grontapoe. Efi wi ori ini prakseri dati den bribisma di Petrus skrifi, ben e loekoe a fesi foe teki prati ini a glori foe Kristus, leki mede-erfgenaam ini en kownoekondre, dan wi moesoe agri nanga na apostel dati den ben kisi „toemsi bigi pramisi”. — 2 Petr. 1:4a.
16, 17. Sortoe wroko den gadofasi pramisi abi tapoe bribiwan?
16 San den pramisi disi ben doe gi fosi-eeuw bribi-sma? A piki foe Petrus ben de: „So dati (joe kan) teki prati na a gadofasi natuur . . . baka di joe lon komoto foe a pori-fasi di a takroe lostoe ini a grontapoe e meki kon” (2 Petr. 1:4b). Dati wani taki dati den pramisi foe Gado e gi a fundamenti foe den kan „teki prati na a gadofasi natuur”. Den fosi-eeuw kristen ben abi a howpoe foe tai makandra nanga Jezus Kristus ini a hemel kownoekondre èn foe de leki en (Rom. 8:17). Foedi a Manpikin de „a spikri foe (Gado) glori nanga a soifri prenki foe en persoon”, dan ala sma di sa de leki Jezus Kristus sa de so srefi toe leki a Tata (Hebr. 1:7). Na apostel Johannes ben skrifi: „Lobiwan, now wi de pikin foe Gado, ma san wi sa de no kon a krin ete. Wi sabi wel dati te a sa kon a krin, wi sa de leki en, bikasi wi sa si en soleki a de. Èn ibrisma di poti a howpoe disi tapoe en, e soifri ensrefi, soleki en de soifri.” — 1 Joh. 3:2, 3.
17 Soboen nanga a teki prati ini a glorifasi foe a Manpikin foe Gado, den kristen di kon njoen gebore nanga geest e tron sma di e teki prati na a „gadofasi natuur”. A toemsi bigi pramisi disi, di abi en fundamenti tapoe Gado seker pramisi ben gi den wan krakti dek-ati foe doe ala moeiti foe soifri densrefi foe ala grontapoe dotifasi. Na apostel Petrus ben sori so srefi toe tapoe a marki disi foe krinfasi, bikasi a ben sori dati „den sma di ben teki prati na a gadofasi natuur . . . ben lon komoto foe a pori-fasi di a takroe lostoe ini a grontapoe ben meki kon”. „Takroe lostoe”, wan tranga lostoe tapoe wan sani di wan sma no abi reti a tapoe, de a fonten foe a porifasi ofoe a dotifasi foe a grontapoe. Bribisma ben lon komoto foe a dotifasi disi di den ben meki gebroiki foe Gado wrokosani foe verloesoe èn ben doe moro fara moeiti foe libi akroederi Gado marki foe santafasi, krinfasi ofoe soifrifasi. Soleki a ben de nanga den fosi-eeuw bribisma, a so den pramisi di de ini den Santa Boekoe kan troesoe wi foe tan krin wisrefi.
Moro leki bribi de fanowdoe
18, 19. San wi moe doe akroederi 2 Petrus 1:5-7 baka te wi ben kisi wan bribi, èn foe sanede?
18 Ala troe dienstknegti foe Gado ini disi ten ben njan boen foe na Gado krakti di a „boen njoensoe” abi nanga foe den wondroe pramisi di abi foe doe nanga dati. Foe dat’ede wi abi boen réden foe bewijsi dati wi de sma di e sori wan kristen égifasi èn de actief foe jepi trawan spesroetoe na jeje fasi. Na apostel Petrus ben gi wi tranga na disi fasi: „Ja, joisti foe a réden disi, leki wan doe foe joe sé joe e poti ibri moeiti, joe moe moksi na joe bribi boenfasi, na joe boenfasi sabi, na joe sabi dwengi joesrefi, na joe dwengi joesrefi oridoro, na joe oridoro frede foe Gado, na joe frede foe Gado, brada lobi, na joe brada lobi lobi.” — 2 Petr. 1:5-7.
19 Wi no kan de tevréde te wi abi bribi soso. Leki wan doe ofoe reactie foe wi sé, foedi wi ben kisi foe wi hemel Tata na makti foe sori bribi, dan wi moe sori moro foeroe na lostoe foe meki moro boen égifasi gro, di moe sori a bribi foe wi.
20. San a wani taki foe moksi a wi bribi boenfasi?
20 Moksi na a bribi foe wi boenfasi, wani taki, dati wi e feti foe de moreel toemsi boen sma leki a eksempel foe wi, Kristus. So wan boenfasi ofoe hé moreel fasi, de wan positief fasi. A sma di abi a fasi disi no wawan e ori ensrefi farawe foe doe en naaste ogri, ma e proeberi foe doe boen èn doe sani foe a boen foe den jeje, den skin nanga den firi fanowdoe foe tra sma. Boenfasi de troetroe actief boen-ati. A libi foe wan boenfasi sma foe datede no abi leki marki wawan a no doe foe sani di no de joisti, soleki a tan farawe foe seksueel oeroedoe, doti-libi, kroeked nanga tra doe di Gado no e feni boen. Ini a fosi eeuw G.T. den Farisé sma ben meki bigi dati „den no ben de leki den tra sma: bidrigiman, onregtvaardeg sma, soetadoeman” (Luk. 18:11). Ma den no ben abi boenfasi, bikasi den ben wiswasi den gewoon sma èn den no ben sori sari-ati-fasi, sari ofoe boen-ati. — Mark. 3:1-6; Joh. 7:47-49.
21. Foe san’ede a de prenspari foe gro ini sabi?
21 Aparti foe sabi, dan boenfasi, soleki disi ben sori leki wan eksempre ini a libi foe Jezus Kristus, no kan de. Sabi de fanowdoe foe kan poeroe foe makandra boen nanga ogri (Hebr. 5:14). So srefi toe a de fanowdoe foe kan si fa ini wan bepaalde sitoewasi wan positief sani moe sori now precies (Fil. 1:9, 10). Tra fasi leki wan bribi foe sani esesi, dan wan bribi tapoe wan boen fundamenti foe sabi no sa seki. O moro wi e kisi moro moro sabi foe Jehovah Gado nanga en Manpikin, dan wan poti esesi ini wi libi san den Santa Boekoe e taki sa tranga wi bribi soboen.
22. (a) Foe san-ede sabi no kan misi ini a meki gro foe dwengi wisrefi? (b) Fa dwengi wisrefi nanga oridoro abi foe doe nanga makandra?
22 A sabi disi sa kibri wi foe gi wi srefi abra a sondoe lostoe leki wan bakapisi dati wi ben sa de sondro sjen ini wi waka nanga libi ofoe ben sa meki fowtoe tapoe tra fasi foe no sori a prenki foe Gado ini wi fasi foe libi, ini wi wortoe nanga doe. Ja, Sabi e meki wi abi dwengi wisrefi, a de meki wi abi a makti foe basi wisrefi, wi doe ofoe wi taki. Te wi e go a fesi foe sori a fasi dwengi wisrefi, dan disi sa meki a prenspari fasi oridoro kon moro bigi. Te wi kon ondro druk foe a sé foe a grontapoe, soleki aladé sorgoe vervolgoe ofoe den kori foe prisiri ofoe goedoe, dan wi no sa gi wisrefi abra a lostoe foe libi wi presi leki srafoe foe Gado nanga Kristus, ma wi sa sori dwengi wisrefi.
23. (a) Fa oridoro e doe kon? (b) San na a frede foe Gado, èn fa joe kan si disi?
23 A inisé krakti di oridoro e tjari kon, kan jepi wi so srefi toe foe kaka foetoe gi sondoe lostoe èn no degedege te wi e ondrofeni vervolgoe ofoe te aladé sorgoe, prisiri ofoe goedoe foe teki wi abra. Wi e kisi a oridoro disi te wi poti wi froetrow tapoe a Moro Héwan foe kisi krakti nanga tiri (Loekoe Filippi 4:12, 13; Jakobus 1:2-8). Wi moe moksi oridoro na frede foe Gado. A eri waka nanga libi foe wan opregti kristen abi a marki foe so wan respekifasi. A de sori ensrefi ini wan gosontoe respeki gi a Mekiman nanga wan joisti grani nanga broko-ede gi sma di ben meki na a prenki foe Gado. — 1 Tim. 5:4.
24. Foe sanede brada lobi no kan de aparti foe respekifasi?
24 Aparti foe brada lobi, frede foe Gado no kan de. Na apostel Johannes ben verklari: „Efoe wan sma taki: ’Mi lobi Gado’, èn tokoe e abi bita-ati gi en brada, a de wan léman. Bikasi a sma di no lobi en brada, di a ben si, no kan lobi Gado di a no ben si” (1 Joh. 4:20). Wi moe span wisrefi foe dat’ede foe kweki wan dipi lobi gi kompe-bribiman, sodati wi e moksi brada lobi na „wi frede foe Gado”.
25. Gi soema wi moe sori lobi èn foe sanede?
25 Lobi de wan égifasi di e kon moro a fesi èn di moe de spesroetoe wan marki foe wi libi. A sortoe foe lobi disi no de soso gi wi kristen brada nanga sisa. Aladi wi abi lobi gi wi jeje brada, lobi moe sori gi a eri libisma famiri. A lobi disi no didon na a moreel sitoewasi foe a sma. Soleki a lobi di Gado e sori go a libisma famiri, a so a de sori srefi gi feanti. Jezus ben taki ini en bergipréki:
„Oen ben jere, dati den ben taki: ’Joe moe lobi joe naaste èn abi bita-ati gi joe feanti.’ Ma mi e taigi joe: Tan lobi joe feanti èn tan begi gi den di e vervolgoe joe, sodati joe kan sori dati joe de manpikin foe joe Tata, di de ini hemel, bikasi a de meki en son opo tapoe den ogri nanga den boen sma èn a de meki alen kon tapoe den regtvaardeg nanga den onregtvaardeg sma. Bikasi efi joe lobi den di lobi joe, sortoe paiman joe abi dan? Den belastingman no e doe a srefi? Èn efi joe gi odi soso a joe brada, sortoe bigi sani joe doe dan? Den sma foe den naatsi no e doe a srefi toe? Oen moe de foe dat’ede volmaakti, soleki oen hemel Tata de volmaakti.” — Matt. 5:43-45.
26, 27. San sa psa te wi moksi den prenspari sani di Petrus e kari na a bribi foe wi?
26 Sortoe bakapisi a abi te boenfasi nanga sabi, dwengi wisrefi, brada lobi nanga lobi moksi na bribi? Na apostel Petrus e piki: „Efi den sani disi de na joe èn de psa marki, den sa tapoe joe foe de inactief ofoe sondro froktoe ini a tori foe soifri sabi foe wi Masra Jezus Kristus.” — 2 Petr. 1:8.
27 Ja, a bakapisi de activiteit nanga meki froktoe. Te wi moksi na a bribi foe wi den fanowdoe égifasi di na apostel kari èn meki den de foeroe leki wan pisi foe wi libi, dan wi no sa tan tanapoe tapoe wan presi èn de inactief ofoe dede a jeje fasi. A jeje go a fesi foe wi sa go doro. Wi sa sori den froktoe foe wan kristen égifasi èn taki nanga trawan foe a „boen njoensoe”. Te égifasi foe frede Gado e libi ini wi ati èn ben tron troetroe wan pisi foe wi libi, a sa troesoe wi foe denki, taki nanga doe tapoe wan fasi di Gado e feni boen. — Loekoe Lukas 6:43-45.
O prenspari a de foe go a fesi?
28. Ini sortoe sitoewasi wan sma di taki a de kristen de te a misi foe go a fesi a jeje fasi?
28 Efi wan sma leki wan kristen no e go a fesi, dan a de kon ini bigi jeje gefar. Na apostel Petrus ben taki foe so wan sma: „Na a sma (di den sani di ben kari joisti de) di den sani disi no de, en dati breni, a de tapoe en ai gi a leti èn a ben frigiti dati a ben krin den sondoe foe en di a ben doe langa ten kaba.” — 2 Petrus 1:9.
29. Foe sanede wan soema di mankeri den froktoe foe wan kristen égifasi, breni foe espresi?
29 A sma di misi foe go a fesi a jeje sé èn di ini a sori foe a bribi mankeri a froktoe foe wan kristen égifasi, breni a jeje fasi. A no e froestan san a wani taki foe de wan kristen. A brenifasi disi de foe espresi, bikasi nanga a teki foe a „boen njoensoe”, a ben kon ondro a verplekti foe tan wroko foe gersi moro en Masra, Kristus.
30. „A kon krin foe sondoe” moe gi wan kristen sortoe tranga?
30 So wan sma ben lasi so srefi toe ini prakseri dati a ben kon krin tapoe a gron foe a broedoe foe Jezus di ben trowe. Akroederi nanga a krinfasi di a ben kisi di a ben tron wan dopoe kristen, a ben moe tan wroko tranga foe tan krin, ja, foe doro srefi wan moro hé gadofasi marki foe santafasi. A mankeri ini disi makriki kan tjari en go foe fadon komoto foe bribi, foe trowe krinkrin a slagti-ofrandi foe a Manpikin foe Gado.
31, 32. Tapoe sortoe rai foe Petrus wi moe poti prakseri, efi wi loekoe a ernstig gefar di e poesoe kon te wi misi foe go a fesi leki kristen?
31 Foedi a jeje gefar e poesoe ede kon te wi misi foe go a fesi leki kristen, dan we doe boen foe span wisrefi foe sori alaten baka a prenki foe Gado moro betre ini wi libi. Petrus ben gi a kommentaar disi a tapoe: „Foe dat’ede brada, doe moro ete ala joe moeiti, foe meki a kari nanga verkisi foe joe kon fasti, bikasi efoe joe e tan doe den sani disi joe no sa fadon noiti. Efi wi taki reti, joe sa go eri boen ini a tego kownoekondre foe wi Masra nanga Verloesoeman Jezus Kristus.” — 2 Petr. 1:10, 11.
32 Ala sma di Gado ben „kari nanga verkisi” foe de en pipel, moe teki wan fasti bosroiti foe doe moeiti foe tan de disi. Ini Petrus brifi e kon a krin dati te den sa tan moksi kristen égifasi na a bribi foe den, den no sa misi foe tan doro a marki foe a bribi foe den — verloesoe. Noti sa tapoe den foe go ini a „tego kownoekondre” foe Jezus Kristus. A go ini a kownoekondre sa „de eri boen”.
33. San de na ini te den wortoe taki dati wan kristen „sa go heri boen” ini a kownoekondre?
33 A sa de wan glori boen waka èn den kristen égifasi sa sori ensrefi ini brenki moimoi. Den wortoe „eri boen” kan abi foe doe toe nanga wan toemsi hé blesifasi, di den sma sa njan boen foe en di ben span densrefi ini a stré foe libi. — Fil. 3:14.
34. Fa wi ben sa kan agersi wan toemsi hé blesifasi?
34 A difrenti mindri libi tapoe ensrefi nanga libi di e go nanga spesroetoe blesi, wi ben sa kan teki gersi nanga toe sipi-kapten. A wan e man foe tjari a sipi tapoe wan warti fasi psa wan bigi winti èn kon boen na sjoro. A sipi foe a tra kapten e songoe ini a srefi bigi winti, aladi a kapten wawan sabi foe tan a libi. Aladi ala toe kapten kibri den libi, a wan di sipi ben tan boen, sa kisi moro kolokoe nanga grani. — Loekoe 1 Korinte 3:12-15.
35. Wans a tego libi de wan presenti foe Gado, foe sanede wi moe doe moeiti wisrefi foe kisi en?
35 Aladi a libi de wan fri presenti foe Gado, tog (Gado) e aksi foe wi dati wi sori wi opregti lostoe na a presenti dati foe doe ala wi moeiti foe prisiri wi hemel Tata. A libi de wan presenti, bikasi wi, sondoe libisma, noiti ben sa kan kisi en nanga wi égi verdienste. Ma wi no sa kisi a presenti disi efi wi no sori ini wi waka nanga libi dati wi abi troetroe warderi gi a presenti disi èn ben sa wani disi sote. Meki wi foe dat’ede sori faja ini wi fasi, taki nanga doe foe handri leki Kristus. Nanga jepi foe Gado, wi kan de seker foe winimarki èn no lasi a libi, noso sortoe tra ekstra blesi toe di wi hemel Tata ben sa kan gi foedi wi e meki froktoe.
36. Leki wan bakapisi foe sortoe sani soleki Petrus e bewijsi, meki wi abi alaten vermane fanowdoe ete?
36 Wi e doe boen foe dat’ede foe poti ini wi prakseri boen a prensparifasi foe getrowfasi. Foe disi ede na apostel Petrus ben wani gi den lésiman foe a tweede brifi tranga leki wan memre nanga vermane. A ben skrifi:
„Foe a réden dati mi sa abi alaten a prakseri foe memre joe a den sani disi, aladi joe sabi den èn joe e tanapoe fasti ini a waarheid di de ini joe. Ma mi e feni en wan joisti sani, solanga mi de ini a tenti disi foe wiki joe nanga jepi foe memre, foedi mi sabi dati a poti a wan sé foe mi tenti de foe psa eri esi, soleki wi Masra Jezus Kristus ben meki mi kon sabi. Foe dat’ede meki mi sa doe alaten ala moeiti, sodati baka a gwe foe mi joe srefi kan taki foe den sani disi” (2 Petrus 1:12-15).
Soleki Petrus ben taki nanga den sma ini a fosi eeuw, a so wi sabi kande o prenspari a de foe préki a „boen njoensoe” èn ini a go a fesi foe sori foe wan kristen égifasi. Akroederi na foeroe sabi di wi abi wi de tanapoe kande fasti na ini. Ma spesroetoe te wi e kon tanapoe fesi tesi ofoe kande moe bewijsi dati den geraffineerde argumenten foe falsi leriman no boen, dan wi abi tranga fanowdoe san Petrus e memre wi.
37. Fa Petrus ben gi wan toemsi moi eksempre ini a gi foe vermane?
37 A de wan boen sani gi wi foe ori ini prakseri foe san-ede a ben skrifi den vermane disi. Na apostel ben sabi dati a ben sa dede eri esi, bikasi Jezus Kristus ben taigi en ensrefi taki wan pina-dede ben wakti en (Joh. 21:18, 19). Na sani disi na en fesi no ben meki sani de doengroe gi Petrus. Ma a ben teki a fasti bosroiti foe gebroiki a ten di ben libi abra foe tranga en brada èn foe gi den dekati foe de actief èn meki froktoe. A so fasi den ben kisi tranga foe en vermane baka di a ben sa gwe libi den, èn den ben kan gebroiki den vermane disi foe bow makandra.
38. San wi moe doe nanga den vermane di e kon a krin ini den brifi foe Petrus?
38 Meki wi sosrefi toe teki tranga foe Petrus brifi èn gi makandra tranga te wi sa poti prakseri tapoe en vermane. Aladi wi e loekoe nanga froetrow na a kon troe foe Jehovah pramisi, meki wi go doro foe meki a „boen njoensoe” bekenti èn tan go a fesi foe gersi leki wi hemel Tata nanga en Manpikin.