„Na vréde foe Gado di e pasa ala prakseri”
„Na vréde foe Gado di e pasa ala prakseri, sa kibri joe ati nanga joe jeje koni nanga jepi foe Jezus Kristus.” — Fil. 4:7.
1. Foe sanede na apostel Paulus ben sabi dati sma di frede Gado no abi reden foe abi broko-ede pasa marki?
NA KRISTEN apostel Paulus ben sabi dati sma di e frede Gado no abi reden foe abi broko-ede pasa marki, foedi Jehovah de nanga den. Paulus ben de ini strafoe-oso, a ben kisi fonfon, èn ston ben iti tapoe en; foeroe tron a ben de krosibé foe dede èn a ben ondrofeni foeroe gevaar, srefi na mindri falsi brada. Ma Gado no ben libi en noiti. Na apostel ben go alaten nanga wan opregti begi na en hemel Tata, pe a ben poti en broko-ede na en tapoe èn noiti en froetrow no ben kon troe. — 2 Kor. 4:7-9; 11:23-27.
2. San ben sa de na bakapisi te kompe-kristensma ben sa teki na rai foe Paulus ini Filippenzen 4:6?
2 Paulus ben gi kompe-kristen soboen tranga nanga na moro bigi froetrow foe no broko-ede foe noti, ma foe meki den tranga-begi foe den bekenti na Gado, èn den e poti na fesi foe Gado ala sani ini begi nanga tranga-begi, makandra nanga taki tangi. San sa de na bakapisi te den sa doe disi? Na apostel e go moro fara foe taki: „Èn na vréde foe Gado, di pasa ala prakseri, sa kibri joe ati nanga joe jeje koni nanga jepi foe Kristus Jezus.” — Fil. 4:6, 7.
Wan vréde di pasa „ala prakseri”
3. (a) San de na „vréde foe Gado”? (b) Efoe wi abi na vréde di Gado e gi, dan foe sanede wi no abi reden foe broko-ede teki wi abra?
3 Na „vréde foe Gado” de wan kowroe-ati nanga wan rostoe di kotoigi foe Jehovah abi, srefi na mindri den moro moeiliki omstandigheden. A de kon foe wan krosibé, persoonlek matifasi nanga wi Tata ini hemel. Leki sma di abi na vréde foe Jehovah, dan wi e meki na jeje foe Gado bewégi wi ati èn wi de firi esi na tiri foe en. Ja, wi e begi foe na santa jeje dati, èn sosrefi toe foe na froktoe foe en, vréde (Luk. 11:13; Gal. 5:22, 23; Ef. 4:30). Foe dat’ede wi no abi reden foe broko-ede teki wi abra, bikasi wi sabi dati dorosé foe na seti foe Gado noti kan pasa nanga wi (Tori foe den Apostel 11:26). Jehovah e sorgoe troetroe dati en dienstknegti „e libi ini sekerfasi”. — Ps. 4:8.
4, 5. (a) Sortoe vréde tra sma abi te joe teki den gersi nanga Jehovah Kotoigi? (b) Fa na „vréde foe Gado” kenki foe na vréde, di sma di no e dini Jehovah getrouw, no e ondrofeni?
4 Te joe teki den agersi nanga Jehovah Kotoigi, dan foeroe sma kisi kande wan moro betre grontapoe leri ofoe den abi tapoe bepaalde kontren foe na libisma doe kande wan moro bigi bekwaamheid. A no de foe taki, dati den abi problema, ma den e froetrow a tapoe dati den sa kan kon na wan joisti loesoe nanga den égi prakseri. Den e firi densrefi foe dat’ede seker èn den no e broko-ede spesroetoe nanga na ten di e kon gi den. A gersi leki den e libi ini vréde èn den abi wan séker rostoe. Den Santa Boekoe e taki srefi foe „na vréde foe den ogrisma”! — Ps. 73:3.
5 Ma a „vréde foe Gado” de wan heri tra sani. A no abi leki fundamenti froetrow tapoe joesrefi èn tapoe na fasi foe loekoe sani dati libisma prakseri sa abi alaten winimarki. Paulus ben taki dati na vréde disi di Gado e gi „e pasa ala prakseri” ofoe „ala froestan”. Den e kari en sosrefi toe „na vréde foe Gado, di de moro hé leki ala san na froestan kan teki” (Fil. 4:9, Nieuwe Wereldvertaling foe den Santa Boekoe; Willibrordvertaling, Vertaling door H. Ogilvie). Ja, den sma di e dini Jehovah getrouw abi wan kowroe-ati di sma ini algemeen no abi èn di den no kan froestan toe.
6. (a) Oten a de kon spesroetoe na krin dati wi abi na „vréde foe Gado”? (b) Wi e abi jepi ini na pisi ten di wi e wakti te leki Jehovah doe wan sani ini wan afersi di wi ben begi foe en? (c) A de tranga wi na jeje fasi foe poti „wi lai tapoe Jehovah”, èn foe sanede joe e piki so?
6 Efoe sma di ben gi densrefi abra na Jehovah abi troetroe na „vréde foe Gado”, dan ai kon spesroetoe na krin te sani e pasa di e seki den dipi, ma di den no abi ini den anoe. Te joe taki en na libisma fasi, dan den no man foe kakafoetoe na den sortoe broko-ede disi. Wi de wawan tron ini den srefi omstandigheden disi? Fa a de wan sani di fiti foe begi dan fajafaja èn de specifiek ini wi tranga-begi èn aksi krin foe kisi jepi ofoe tiri foe Gado! (Teki gersi Rechters 6:36-40.) Baka dati wi moe wakti te leki Jehovah opo doe wan sani. Efoe wi abi na „vréde foe Gado”, dan wi sa si ini na pisi ten dati na jepi foe Jehovah santa jeje èn wi sa tan bedari èn wakti nanga pasensi foe si fa na Moro Héwan sa loesoe na problema. Na fasi disi no de wan mi-no-ke fasi, bikasi na psalmsingiman ben taki: „Poti joe lai tapoe Jehovah, èn ensrefi sa jepi joe. Noiti a sa gi pasi foe a regtvaardiki sma sekseki” (Ps. 55:22). Te na problema kon loesoe tapoe na fasi disi èn na tesi pasa, dan wi sa sabi boiti dati, taki „na Gado di e gi vréde” ben jere wi begi. — Rom. 15:33.
A de kibri ati nanga jeje koni
7. (a) San ati wani taki foeroe tron ini den Santa Boekoe? (b) Efoe wi abi na „vréde foe Gado”, dan foe sanede wi no sa „kisi atibron tapoe den ogri sma”?
7 Paulus ben taki dati „na vréde foe Gado” „sa kibri wi ati nanga jeje koni” (Fil. 4:7). Wán bijbelvertaling e kari na vréde disi „Wan garnizoen (wan afdeling foe wan legre ini wan foto) foe kibri joe ati nanga froestan” (Weymouth). Ini den Santa Boekoe foeroetron ati abi foe doe nanga na presi foe lobi nanga motivatie (Ex. 35:21, 26; Ps. 119:11). Efoe toemsi foeroe broko-ede e pina wi, dan disi kan abi wan takroe bakapisi tapoe wi lobi nanga motivatie èn wi kan tjari wisrefi tapoe wan sondro-balans èn onjoisti fasi. Foe eksempre, wi ben sa „kan kisi atibron tapoe den ogrisma”, sodati wi lasi wi kowroe-ati. Ma disi no sa pasa efoe wi abi na „vréde foe Gado”, bikasi dan wi sa sabi dati Jehovah e si ala sani èn na a reti ten sa pai na paiman (Ps. 37:1-11). Wi ati sa tan korostoe èn no sa tja wi so fara foe handri sondro froestan. Disi no de boen wawan gi wi firi nanga jeje fasi, ma srefi gi wi skin, bikasi „wan korostoe ati de na libi foe na skin”. — Spr. 14:30.
8. (a) San de ini Filippenzen 4:7 na difrenti na mindri „ati” nanga „jeje koni”? (b) Efoe wi abi na „vréde foe Gado”, dan foe sanede a no de wan sani di sori so dati wi sa lasi wi jeje balans? (c) Wi hemel Tata sa gi pasi na wan sani di sa doe wi ogri alaten?
8 Nanga „jeje koni” no a srefi e bedoel leki nanga „ati”, aladi wan kenki-wroko de a mindri den toe. Na froestan e prakseri-go-prakseri-kon tapoe bodoi aladi na ati e gi wan sma reden. Te foe dat’ede wi wani sabi seker dati wi e waka baka wan joisti fasi foe doe, dan wi moe abi sabi foe Gado Wortoe èn wi moe bow tapoe en nanga jepi foe begi. Efoe wi froestan de ini toemsi broeja — efoe wi sa broko wi ede toemsi — dan wi no kan teki wan boen bosroiti. Wi ben sa kan lasi wi jeje balans. Ma disi no sa miti wi makriki efoe wi abi na „vréde foe Gado”, foedi wi ati de basi foe na situwasi èn na froestan foe wi abi rostoe. Wi e bribi troetroe dati „na anoe foe Jehovah de nanga wi” èn dati noti san wi hemel Tata ben sa gi pasi foe kon, sa doe wi ogri foe alaten (Matt. 10:28; Tori foe den Apostel 11:21). Na presi dati wi e broko-ede èn skreki prakseri e ros wi, dan wi e froetrow ini Jehovah, sodati wi „jeje koni” e kisi kibri. Fa? „Nanga jepi foe Kristus Jezus”, di nanga jepi foe en wi kan abi wan krosibé, persoonlek matifasi nanga na hemel Tata. — Gal. 1:3-5.
9. Aladi Paulus ben abi „na vréde foe Gado”, dan a ben de sondro broko-ede di a ben firi dipi?
9 A no de foe taki dati Paulus ben sabi dati Kristensma no de sondro broko-ede di den firi dipi. A ben erken dati na fasi foe kompe-djoe, di no ben de klari foe teki na „boen njoensoe”, ben gi en „bigi sari nanga wan sondro-foe-stop ati-pen”. Tog broko-ede no ben teki na apostel abra èn a ben de tevréde foe poti na afersi ini den anoe foe Gado, di e handri regtvaardiki ini na teki foe sma di a abi sari-ati-fasi gi (Rom. 9:1-18). Foe dat’ede, winsi tranga firi ben de, Paulus soboen ben gi pasi dati na „vréde foe Gado” kibri en ati nanga jeje koni.
10. Na sortoe fasi na vréde di Gado e gi wi sa kibri wi ati nanga jeje koni?
10 Soleki Paulus di ben abi opregti firi foe broko-ede, na so wi kan prisiri ini na „vréde foe Gado” — na inisé rostoe nanga kowroe-ati, di e kon foe na diri matifasi nanga Jehovah. Na vréde disi kan kibri wi ati nanga wi jeje koni foe no broko-ede toemsi foe den fanowdoe foe wi. Wi kan abi na froetrow èn de seker dati Jehovah e sorgoe gi en dienst-knegti èn e jere den begi foe den. Na presi dati wi ati nanga froestan de alaten ini broeja, dan den sa de bedari, foedi sondro kroederi wi e froetrow tapoe wi hemel Tata. — Ps. 33:20-22.
Djaranti foe den fanowdoe sani foe libi
11. Foe sanede wi no moe broko wi ede toemsi foe den sani foe libi, foedi wi abi na „vréde foe Gado”?
11 Te wi abi troetroe na „vréde foe Gado” èn wi abi na overtoigi dati a de „na Sma di e jere begi”, dan wi sa kan kakafoetoe gi broko-ede (Ps. 65:2). Wi sa hori alaten ini prakseri na jepi foe Gado èn disi sa foeroe wi ati nanga wi froestan nanga bigi vréde. Foe eksempre, wi no sa broko-ede toemsi nanga den fanowdoe sani foe libi. Jezus ben taki gi en foetoeboi: „No broko-ede moro langa foe joe sili (ofoe „libi”), foe san joe sa njan, ofoe foe joe skin, foe san joe sa weri.” Foe sanede wi no moe broko-ede foe dati? Foedi Jehovah, di e sorgoe pasa marki gi den fowroe nanga léli, kan èn sa gi njanjan nanga krosi na en getrow dienstknegti. „Kaba foe dat-ede” Jezus ben taki „foe soekoe san joe sa njan èn san joe sa dringi, èn no de moro langa nanga skreki-ati. . . . Soekoe alaten Gado kownoekondre èn den sani disi joe sa kisi na tapoe” (Luk. 12:22-31). Ja, efoe wi poti jeje afersi na a fosi presi ini wi libi, dan wi kan abi na froetrow, dati wi hemel Tata sa sorgoe gi wi.
12. Sortoe eksempre ini na bijbel e sori foe sanede srefi den sma di e dini Jehovah fajafaja no moe poti foeroe krakti tapoe goedoe?
12 Srefi sma di e dini Jehovah nanga faja, no moe poti toemsi krakti tapoe sani na skinfasi. Abraham foe eksempre ben gi en brada-pikin na okasi foe teki pe a ben wani go libi, foedi na kondre no ben man sorgoe den ala toe èn foe meki wan kaba ben kon na a trobi mindri den skapoeman foe den. Lot ben teki na moro boen pisi foe na kondre, ma dati ben wani taki dati a ben moe libi na mindri ogrisma. Te foe wan pisi ten den ben teki en gwe leki strafoeman èn a ben moe kon fri (Gen. 13:1-14:16). Bakaten, Lot ben feni en fanowdoe foe libi en goedoe, sodati en libi ben kan tan, te Jehovah ben pori Sodom. Bakaten ete, Lot ben firi en fanowdoe foe libi na foto Zoar èn go libi ini wan bergi-olo (Gen. 19:1-26, 30-38). Aladi bijbel e kari en na „regtvaardiki Lot”, tog a ben moe leri nanga bita ondrofeni fa a de wan law sani te wan sma di e dini Gado fajafaja e poti foeroe krakti tapoe winimarki foe goedoe (2 Petr. 2:7, 8). Omeni moro boen a de te wi e begi foe specifiek tiri èn poti ini wi libi alaten na a fosi presi den jeje afersi!
13. Foe sanede kristen no moe de ini skreki nanga onsekerfasi foe den fanowdoe sani foe libi?
13 Efoe troetroe wi e poti jeje afersi na a moro prenspari presi foe wi libi, dan disi sa meki wi vréde foe ati nanga froestan kon moro foeroe. Wi kan abi troetroe na froetrow, dati na Sma di abi ala na gowtoe nanga na solfroe, sa man dorodoro foe sorgoe foe den fanowdoe sani foe libi gi en dienstknegti (Hag. 2:8). A no de foe taki, dati a de joisti foe aksi Gado ini begi foe gi „wi tide wi brede foe na dé”, aladi a fiti foe wroko nanga faja foe sorgoe foe troetroe fanowdoe sani (Spr. 6:6-11; 31:10, 13-24; Matt. 6:11). Ma „foedi wi no tjari noti kon na grontapoe èn wi no kan tjari noti go nanga wi, wi moe de tevréde nanga njanjan èn krosi” (1 Tim. 6:6-12). Foe sanede wi ben sa de ini skreki nanga onsekerfasi? Na psalmsingiman ben abi reti di a ben taki: „Wan dé mi ben de wan jongoe man, sosrefi toe mi ben kon grani, èn tog mi no ben si wan regtvaardiki sma di ben libi na wan sé krinkrin, ofoe en bakapikin di e soekoe brede.” — Ps. 37:25.
Na pasi di e go na troetroe winimarki
14. Foe sanede a de gi wi, leki kristen kotoigi, wan onjoisti sani foe poti foeroe krakti tapoe libisma doe nanga sokari winimarki di abi foe doe nanga dati?
14 A no de wan ongewoon sani te grontapoe sma e tjari broko-ede kon na den tapoe foedi den e poti foeroe krakti tapoe libisma doe. A no de foe taki dati na bijbel e gi wi tranga foe lobi foe wroko èn kisi koni ini wi wroko (Spr. 22:29). Ma wan sma noiti kan abi na „vréde foe Gado” te a meki na lostoe foe bigi nen tjari en, èn a de broko-ede foe a kisi foe sokari winimarki. Na lostoe foe de basi foe tra sma kan meki ambisi sma gebroiki srefi methode di e meki aksi kon, aladi den e soso den moeiti foe kompe-wroko kande èn e waka baka wan falsi fasi, di e tjari na atibron foe Gado kon (Spr. 3:32; 2 Kor. 4:1, 2). Toemsi ambisi sma kande sa kisi troetroe den grani foe sma, soleki falsi kerki fesiman 1900 jari pasa kaba ben seti en so foe tjari den presenti foe den so èn foe begi èn vaste so, dati den ben kisi grani foe sma. Jezus Kristus ben kroetoe den fasi foe den èn a ben taki dati den falsi sma disi di ben prakseri densrefi nomo „ben abi den paiman foe den kaba” (Matt. 6:1-13). Fa a de wan law sani te sma na mindri Jehovah Kotoigi ben sa teki broko-ede kon na den tapoe, foedi den e proeberi foe de „bigi” èn dan foe ondrofeni soso dati den lasi tego blesi nanga dati! — Teki gersi Jeremia 45:5.
15. San wan sma di e dini Gado getrow kan leri foe Prediker 9:11 nanga 10:5-7 foe winimarki di a de froewakti?
15 Gi wan sma di abi troetroe na „vréde foe Gado”, na pasi foe troetroe winimarki no e tjari go na falsi methode nanga feti foe soso baka sani. A ben leri foe den Santa Boekoe, dati ini na disiten maatschappij, leki fa disi foeroe nanga soso onvolmaakti nanga sondoe sma, „no den sma di gaw e wini na strélon èn no den trangawan na stré èn no den koniwan sosrefi toe abi na njanjan, èn no den sma nanga froestan abi na goedoe, èn no srefi den sma di abi sabi abi na boen-ede” (Pred. 9:11). Ja. „lawfasi ben poti ini foeroe hé posities” èn wan sma kan „si knegti na tapoe asi, ma granman di leki knegti e waka tapoe na grontapoe” (Pred. 10:5-7). Granman ofoe hé sma kande no e kisi troetroe na waarti fasi di den verdini, aladi knegti — man di no abi someni koni — „e de tapoe asi” leki hé sma.
16. Foe san winimarki nanga doe di e teri na Gado e anga?
16 Joe ben poti a wan sé, sondro foe joe ben kisi na winimarki di joe ben froewakti foe kisi wan dé? Foe sanede joe ben sa broko joe ede foe dati? Meki na „vréde foe Gado” libi ini joe ati èn ondrofeni na trowstoe kowroe-ati, di e kon foe dati. Tan doe na wani foe Gado èn loekoe na joe hemel Tata, sodati a kan blesi joe moeiti ini en dienst. Disi na san e teri troetroe ini na libi. Winimarki nanga doe, di e teri na Gado, anga foe jeje marki èn fasi foe si sani. Na psalmsingiman ben taki nanga reti: „Kolokoe na man di no e waka ini na rai foe den ogri sma. Ma en lostoe de ini na wet foe Jehovah, èn ini na wet disi a de lési dé nanga neti nanga wan safri sten. Èn a sa tron troetroe leki wan bon, di prani na kriki foe watra, e gi en égi froktoe te a de na joisti ten foe dati èn di den wiwiri foe en no e dré, èn ala san a de doe, sa waka boen.” — Ps. 1:1-3.
17. (a) San wi moe doe foe kisi na moro bigi winimarki? (b) San joe kan doe foe jepi tra sma foe prisiri densrefi ini „na vréde foe Gado, di pasa ala prakseri”?
17 Wi no ben sa kan abi wan moro bigi winimarki ini na libi leki foe kon ini wan krosbé matifasi nanga Jehovah Gado èn tan ini na blesi situwasi dati. Wan tranga lostoe foe prisiri en, sa tjari wi so fara foe gi en grani nanga wi wortoe nanga doe, doe boen na tra sma èn foe prati na „glori boen njoensoe foe na libi Gado” gi den (1 Tim. 1:11). A prisiri foe wi sa de bigi, te wi nanga na blesi foe wi hemel Tata, kan jepi tra sma foe leri en wondroe prakseri èn foe den kon sosrefi toe ini wan diri matifasi nanga en pe den gi den srefi abra. Dan leki wi, den sa leri fa foe kakafoetoe gi den broko-ede foe na libi. Den sosrefi toe sa prisiri densrefi ini „na vréde foe Gado, di e pasa ala prakseri”.