Na pasi foe kon-boen-baka di Gado opo
Na lésiman ben sa doe boen, bifo a loekoe den dri artikel di e kon now, foe kon sabi fosi na materiaal, di den artikel disi abi leki fondamenti, namkoe den kapitel 58, nanga 59 foe na profétitori foe Jesaja.
„Eri esi kon-boen-baka ben sa sproiti kon gi joe.” — Jes. 58:8.
1. Foe sanede na libisma-famiri abi kon-boen-baka fanowdoe te joe loekoe na algemeen gosontoetoestand foe den?
NA ERI libisma-famiri abi fanowdoe foe kon-boen-baka — kon gosontoe? Sma di e tan sabi sani nanga jepi foe ala disten wroko-sani foe tjari sabi konmakandra foe fara nanga krosibé, no sa draidrai foe piki Ja! Ma na aksi de: Soema foe wi libisma kan tjari na so fanowdoe kon-boen-baka? Sma di lobi tra libisma nanga foeroe owpoe e tan proeberi, ma ala den opregti moeiti foe den no ben kan meki, dati na gosontoe-toestand foe na libisma-famiri na maatschappelek, moreel nanga economia fasi, sosrefi toe foe na osolibi, no ben kon moro ogri alaten. Na kragibabari foe na siki libisma-famiri e kon de moro tranga!
2, 3. (a) Soema abi moro rede foe kragi dati na libisma-famiri ben fadon komoto so fara foe na volmaakti fasi? (b) Fa Romeini 3:9-18 e skrifi foe na fadon toestand foe na libisma-famiri?
2 Efoe wi, gewoon mekisani, abi rede foe kragi, omeni moro na Mekiman foe na universum di é moro leki libisma sa abi rede foe kragi! A no meki wi no foertrow en makti foe meki sani kwetkweti, foedi a meki den libisma mekisani foe en bigin ini so wan pinalibi leki fa den de now. A de taki nanga krin-ati, dati ala disi ben kon, foedi na sondoe ben kon. Tina-négi-ondro-jari pasa kaba a ben tjari kon na krin o fara na libisma-famiri ben fadon komoto foe na fosi volmaakti fasi, di a ben meki wan foe den bijbelskrifiman ben skrifi den wortoe disi nanga jepi foe en santa jeje:
3 „O fa? Wi de ini wan moro betre positie? Kwetkweti! Bikasi dja na tapoe mi ben gi na kragi, dati djoe nanga Griki alamala de ondro na sondoe, soleki ben skrifi: ’Nowan regtvaardiki wan de, nowan srefi; nowan sma di e si sani krin, no wan sma di e soekoe Gado. Alamala ben drifi komoto, alamala makandra no abi waarde; nowan sma de di e doe boen, nowan srefi de.’ ’Na gorogoro foe den de leki wan opo grebi, nanga den tongo den ben bidrigi.’ ’Èn den mofo de foeroe nanga floekoe nanga bita wortoe’. ’Sneki-bita de na baka den mofoboeba.’ ’Den foeroe foe den de esi foe trowe broedoe.’ ’Na frede foe Gado no de na den fesi.’” — Rom. 3:9-18.
4. (a) Pe Paulus ben teki poeroe wortoe? (b) Baka 1900 na baka, dan sortoe toestand de now ini disi ten?
4 Ini na pisi foe en brifi dja na tapoesé di ben skrifi gi na kristen gemeente ini na owroeten Rome, na apostel Paulus ben teki pisi foe den Hebrew Boekoe di ben skrifi ondro santa jeje krakti moro leki 450 jari bifo a ben skrifi en brifi ini na jari 56 G.T. Paulus foe eksempre ben teki na pisi foe Jesaja 59:7-20. Disi e sori dati na situwasi ini na ten dati ini den dé foe en ben de boen takroe kaba, no wawan gi a libisma-famiri, ma spesroetoe gi den sma, di ben taki dati den de na pipel foe Jehovah Gado, namkoe den djoe ofoe Israëlsma. We, dan, ini disi ten, moro leki 1900 jari pasa kaba baka di Paulus ben skrifi den sortoe sani disi gi na kristen gemeente ini na keizer mamafoto Rome, dan san wi moe froewakti dati na moreel nanga kerki toestand foe na grontapoe sa de, sondro dati wi frigiti foe kari a pisi di e kari na kristenheid? San den foeroe koranti nanga tijdschrift e tjari kon gi wi nanga krin wortoe foe en, de seki sma srefisrefi, ja e gi frede.
5, 6. (a) Fa den naatsi di de wan pisi foe na kristenheid ben sa moe tjari densrefi akroederi na bigin foe na nen kristenheid? (b) Sortoe kon-troe moro bigi foe Jesaja profétitori gi Israël wi moe ori ini prakseri?
5 Te joe loekoe na bigin foe en nen dan na kristenheid ben sa moe waka baka Kristus Jezus èn libi akroederi nanga en leri. Den naatsi di de wan pisi foe na kristenheid ben moesoe sabi fa den moe doe disi. Na mindri den sma foe den sortoe naatsi disi, di e kari densrefi kristelek, hondro-hondro miljoen bijbel de na den mindri èn spesroetoe den pisi foe na „Njoen Testament”, ini ala bekenti tongo di e taki ini den kondre foe den. Na moro bigi pisi foe den sma di de ini den naatsi disi kan lési den Santa Boekoe dati, sodati den kan sabi san a wani taki foe de wan kristen. Foedi na kristenheid e taki dati a de foe Kristus èn de en gemeente, dan foedi a no de waka baka na eksempre foe Kristus, dan dati e marki en leki wan falsi sma. En maatschappelek, moreel nanga religieus toestand gersi a di foe na fositen „pipel” foe Jehovah Gado ini den dé foe na proféti Jesaja, aiti-ondro jari bifo na kristendom ben sori en srefi na grontapoe.
6 Troetroe, na sari fasi pe na kristenheid de na ini e akroederi nanga di foe na Israël ini na ten foe Jesaja, bikasi a de taki dati a ben teki na presi foe Israël leki na pipel foe Gado. Soboen, te wi lési bepaalde kapitel foe Jesaja profétitori, dan wi kan abi na prakseri na kon troe moro bigi tapoe na kristenheid. Na Gado foe Jesaja ben si na Israël foe na ten foe na proféti leki wan falsi naatsi di ben abi fanowdoe foe kon-boen-baka na jeje fasi? Meki Jehovah Gado meki bekenti san en de feni!
San Gado feni foe kerki falsi fasi
7. Akroederi Jesaja 58:1, dan san na proféti ben meki bekenti san Jehovah ben feni?
7 Na komando foe Jesaja ben de: „Bari tranga; no hori na inisé. Opo joe sten leki wan toetoe, èn ferteri na pipel foe na oproeroe foe den èn na oso foe Juda na sondoe foe den.” — Jes. 58:1.
8. O tranga Jesaja ben moe meki bekenti san Jehovah ben feni, èn foe sanede a ben sa firi ensrefi tranga foe taki profétitori?
8 Akroederi na komando dati, dan Jehovah Gado ben feni na fowtoe foe oproeroe ofoe oproeroe fasi ini Israël nanga tra „sondoe” di no kari nanga nen. A ben gebroiki Jesaja leki en takiman foe meki bekenti san a ben feni, èn na proféti disi ben moe taki foe den kragi foe Gado nanga na tranga babari foe wan „toetoe” ofoe tronpeti. Di Jesaja ben kisi na komando foe „no ori na inisé, dan a ben kan firi ensrefi leki Amos, di na fositen proféti dati ben taki: „Wan lew de di ben bari! Soema no sa frede? Na (Soeverein) Masra Jehovah ben taki! Soema no sa taki profétitori?” — Amos 3:8, herziene uitgave foe 1971.
9. O fara na tranga boskopoe foe Jehovah moe meki bekenti ini disi ten, èn foe doe san disi moe gi den arkiman tranga?
9 Na dopoe pipel foe na Soeverein Masra Jehovah ini disi ten moesoe prakseri a srefi fasi foe disi. Den moe firi na tranga foe teki na boskopoe foe Gado foe disi ten èn bro en tranga tapoe wan boen bigi gebied. Meki den meki bekenti leki Jehovah Kotoigi dati wan grontapoe oproeroe e feni presi tegen na Soeverein Masra foe na universum, di e aksi foe en dienstknegti dati den de loyaal èn tan farawe foe grontapoe sondoe. Disi e verklari foe sanede a tranga boskopoe disi moe ferteri tapoe na eri grontapoe. Te den poti prakseri a tapoe, dan den arkiman sa kisi jepi foe kon-boen-baka.
10, 11. Aladi a ben gersi leki den ben abi prisiri ini Jehovah nanga ori vaste, dan san den Israëlsma ben doe na a srefi ten toe, sondro foe dwengi densrefi ini disi?
10 Ini san Jesaja ben kisi na komando foe bari tranga gi „na oso foe Jakob”, a ben tjari na falsi fasi foe en kon na krin, di a ben taki:
11 „Ete mi ben de Na Sma di den ben tan soekoe dé na dé èn ini na sabi foe mi pasi den ben sori prisiri, leki wan naatsi, di ben sori soso regtvaardiki fasi, èn di no ben poti na wan sé srefi na geregtigheid foe na Gado foe den, foedi den ben tan aksi foe regtvaardiki kroetoe, aladi den ben go na Gado, di den ben abi prisiri ini en, taki: ’Foe sanede wi ben ori vaste èn joe no ben si, èn wi ben boigi wi sili ini sari èn joe no ben poti prakseri na tapoe?’ Foe troe, ini den dé di joe ben ori vaste, oenoe ben abi prisiri, te ala den tranga wrokoman foe oenoe ben de, di oenoe ben tan gi faja foe wroko. Foe troe, foe trobi nanga stré ede joe ben gwenti foe ori vaste, èn foe naki nanga na kofoe foe ogridoe.
12. Na vaste-dé di ben de boen ini Jehovah ai, ben sa de wan ten foe toemsi vroomfasi nanga pina foe wan sma égi srefi?
12 Oenoe no ben tan ori vaste soleki tapoe na dé, di oenoe ben meki oen sten go na tapoe? Na vaste di mi teki foe ori moe de leki disi, leki wan dé di wan grontapoesma e boigi en sili ini sari? Foe boigi en ede leki wan walimbo, èn sodati a ben sa poti soso saka nanga asisi leki en rostoebedi? A disi oenoe e kari wan ori vaste, di e prisiri Jehovah?” — Jes. 58:2-5.
13. San Jezus ben taki ini na bergi-préki, sondro foe sori falsi fasi, foe na vaste foe na sé foe Gado pipel?
13 A de troe, dati Jezus Kristus ben vaste 40 dé baka di a ben kisi salfoe nanga Jehovah jeje, ma sma no ben si disi èn a ben pasa ini na sabana foe Judéa. Foe dat’ede meki a ben kan taki bakaten ini en bergi-préki: „Te oenoe e ori vaste, no poti wan sari fesi, soleki den falsi sma, bikasi den e meki den fesi so, sodati a kan gersi gi den sma dati den e vaste. Foe troe, mi taki gi oenoe: den abi den paiman kaba dorodoro. Ma te oenoe e vaste, wrifi oenoe ede nanga oli èn wasi oenoe fesi, sodati a no gersi gi den sma, dati oenoe e vaste, ma oenoe Tata, di e de ini kibri presi; dan oen Tata di e loekoe ini kibri presi, sa pai oenoe foe dati.” — Matt. 6:16-18.
14. (a) Tap sortoe seti den kerki vaste-dé ini na kristenheid ben didon, èn foe sanede? (b) Foe sortoe tra doe formeel vaste-dé nanga pina foe densrefi ini na owroe Israël no ben kan gebroiki leki wan djakti?
14 Discipel foe Kristus no kisi wan vaste-dé; vaste de wan friwani sani, wan sani di joe kan verkisi. Na kristenheid abi en verplekti vaste-dé ma den disi ben abi den fondamenti ini sani di sma seti. Efoe baka na vaste-ten di „na oso foe Jakob” ben verkisi ini den dé foe na proféti Jesaja ben abi na joisti denki, motivatie, dan kande no wan bezwaar no ben sa de. Ma meki wi ori ini prakseri san ben pasa ini na ten foe na vaste ofoe bifo ofoe baka den vaste-dé: den ben e meki trobi, den ben stré, den ben bari makandra nanga tranga sten èn den ben naki makandra nanga na „kofoe foe ogridoe”. Na formeel vaste nanga pina foe densrefi no ben kan de noiti leki wan djakti foe ala den ogridoe disi gi den ai foe Jehovah di e loekoe go ini ala sani. Foe dat’ede meki a ben gersi dati a no ben si ofoe poti prakseri tapoe na vaste foe den!
15. (a) Sortoe behandeling foe na klasse foe den tranga wrokoman, ben meki na dorosé sori foe vroom-fasi nanga pina ensrefi ini Israël no ben abi waarde? (b) Nanga soema ini disi ten a de a srefi fasi, èn foe sanede a no de joisti?
15 Foe sori na dorosé vroomfasi, meki den formalistische djoe ben anga den ede leki wan walimbo ofoe ken ofoe den bradi wan saka nanga asisi na ondro den leki den de ini dipi low. Ma so wan sori na dorosé no ben de wan marki foe dipi berouw foe den sondoe nanga oproeroe na Gado èn den takroe waka nanga libi. Efoe den e vaste tapoe wan joisti fasi — foe ori densrefi fara foe normaal joisti sani — foe sanede den ben poti den „tranga wrokoman” foe den, den égi brada, na a srefi ten foe wroko sondro sari foe den, sodati den ben kwinsi èn pina den? Basi di tapoe wrokodé ben ori densrefi farawe foe njanjan, aladi na a srefi ten den ben de leki srafoe-basja gi den sma di ben wroko tranga gi den, ben handri troetroe leki falsi soema. Na ori vaste foe den no ben meki den kisi na boen-ati foe Gado, èn sosrefi toe a no ben gi en prisiri. Na srefi de so toe gi na kristenheid di e ori ini na ten disi vaste-dé, bikasi a de taki dati a de aanbegi na srefi Gado di ben gi Jesaja tranga nanga en santa jeje foe tjari na oproeroe nanga sondoe foe Gado pipel kon na krin.
16. Sortoe sani di ben sa tjari lekti kon, efoe den Israëlsma ben sa doe den, ben sa wroko moro boen tapoe Gado leki den formeel vaste-ten di den ben ori?
16 Sortoe doe foe vaste, sortoe doe foe tan farawe foe sani, na Gado foe Jesaja e teki, na Gado di na kristenheid nanga foeroe pranpran e taki den e aanbegi? Wi kan lési den wortoe foe Jehovah di Jesaja ben skrifi foe kon sabi disi. Gi den sma di e froestan dati den abi fanowdoe foe jeje kon-boen-baka ofoe di wani na matifasi foe den nanga na Gado foe na bijbel kon moro boen, a de taki: „A no disi de na vaste di mi wani? Loesoe den boei foe na ogridoe, loesoe den banti foe na oedoe foe na tjatjari, èn seni den wan di masi gowe fri, èn dati oenoe ben sa broko ibri oedoe foe na tjatjari ini toe pisi? A no de foe prati oen brede gi na wan di abi angri èn dati oen sa tjari kon ini oen oso den wan di kisi kwinsi èn di no abi oso? Dati efoe joe si wan sma sondro krosi moe tapoe en dati joe no moe ben sa kibri joesrefi gi joe égi skin?” — Jes. 58:6, 7.
17. Leki den wortoe dati ini Jesaja 58:6, 7 sortoe sani ben feni presi ini Israël, èn foe sortoe sani kon-boen-baka ben de fanowdoe?
17 Den wortoe disi foe Jehovah e sori dati Israëlsma na wan onregtvaardiki fasi ben poti ini boei. Trawan nanga tranga ben moe tjari wan oedoe foe wan tjatjari leki den ben de meti di e tjari lai. Dan trawan ben kon masi nanga na someni wroko di ben poti tapoe den skowroe. Den ben gi pasi dati ongolokoe Israëlsma ben pina nanga angri ofoe no ben abi joisti oso foe tan. Den sma di ben abi sani foe tjari verlekti, ben taki dati den no ben sabi na mofina fasi foe den kompe-Israëlsma foe den. O ja, leki wan prekti den ben ori den formaliteit foe wan nationaal vaste, ma den no ben abi nofo brada lobi foe loesoe den égi skin nanga broedoe foe kroektoedoe èn dwengi. Den sortoe doe disi sondro ati no ben poeroe na pasi nanga soso ori vaste, èn sosrefi toe den no ben doro na komando foe Gado nanga dati: „Joe moe lobi joe naaste leki joesrefi. Mi na Jehovah” (Lev. 19:18). Den Israël-sma dati ben abi tranga fanowdoe foe wan kon-boen-baka foe wan jeje siki di ben sa tjari dede kon foe na matifasi foe den nanga Gado.
18. Foe sanede meki wi no e taki en pasa marki, dati na kerki siki foe Israël ben sa wani tyari dede gi na matifasi nanga Jehovah, efoe a no ben dresi?
18 Disi no de wan sani di wi taki moro bigi, bikasi ini na eeuw foe Jesaja proféti-tori na naatsi Israël ben lasi en égi kondre èn — foe 607 te 537 bifo G.T. — a ben beri ini Babylon, sodati a no ben de foe si (Ezech. 37:1-11). Aladi nanga na no-verdini boen-ati foe Jehovah na naatsi ben tjari kon baka ini den égi kondre, tog 569 jari na baka, ini na jari 33 G.T. na verbontoe di den ben de nanga Jehovah Gado ben lasi gowe. Ini 70 G.T. na oproeroe Jeruzalem ben kisi pori foe den Romeinsma ondro generaal Titus, aladi den djoe ben panja leki wan sjen sani tapoe na eri grontapoe. Ala disi de wan warskow gi na kristenheid di e siki te foe dede.
Den sma di go ini na pasi foe kon-boen-baka
19. Jesaja ben abi na jeje siki foe en kompe-Israëlsma èn san den wortoe foe en di tanapoe ini Hebreeër e sori?
19 Meki nowan sma denki taki na proféti Jesaja ben siki na jeje fasi nanga na kerki falsifasi di ben tergi na naatsi foe en. Na man di Jehovah ben sa gebroiki foe tjari so wan falsi fasi kon na krin, ben moesoe de ini wan gosontoe matifasi nanga en. Jesaja ben sori tapoe na jeje gosontoe foe ensrefi nanga en osofamiri, di a ben taki: „Loekoe! Mi nanga den pikin di Jehovah ben gi mi de leki marki nanga wondroe ini Israël foe Jehovah foe den fetiman ede, di e ori tanpresi tapoe a bergi Sion” (Jes. 8:18). Na apostel Paulus e gebroiki den wortoe disi ini en brifi gi den Hebrew sma èn e tjari den kon so tapoe Jezus Kristus nanga en salfoe discipel di kon njoen gebore nanga jeje: „A de taki: ’Mi sa meki joe nen bekenti na mi brada, ini na mindri foe na gemeente mi sa prijse joe nanga wan singi.’ Èn ete wantron: ’Mi sa poti mi foertrow tapoe en.’ Èn ete wantron: ’Loekoe! Mi nanga den jongoe pikin di Jehovah ben gi mi.’” — Hebr. 2:12, 13.
20. Soema ben de den pikin di Jehovah ben gi na a bigin na a moro bigi Jesaja, Jezus Kristus?
20 Den „jongoe pikin” foe Jehovah Gado, di a ben gi na Pinksteren ini na jari 33 G.T. na Jezus Kristus ben de man nanga oema di ben de wan pisi foe na djoe organisatie nanga na mamafoto foe en ini Jeruzalem. Bifo den ben kisi salfoe tapoe Pinksteren nanga Gado jeje, den ben tai foe dat’ede nanga na siki seti foe sani dati, di den sma di Jezus ben kari „den lasi skapoe foe na oso Israël” ben de sosrefi toe wan pisi foe en (Matt. 10:6; 15:24). Ma sensi Pinksteren den no de moro langa wan pisi foe na kerki organisatie di ben moe jere Jehovah wortoe foe feni fowtoe, soleki Jesaja ben meki dati bekenti. Ondro na tiri foe Jezus Kristus den ben go ini na pasi pe ini Jesaja 58:8 Jehovah e pramisi kon-boen-baka. Den ben libi na organisatie di den regtvaardiki Farisésma ben de wan pisi, makandra nanga na Farisésma di ini wan begi ben meki bigi: „Mi e ori vaste toetron ini wan wiki.” — Luk. 18:11, 12.
21. Sortoe winimarki ben pramisi ini Jesaja 58:8 na profétis fasi na den discipel foe Kristus efoe den ben sa loesoe densrefi poeroe foe na disiten model foe na ontrow Israël?
21 Na a srefi fasi den dopoe kotoigi foe Jehovah di gi densrefi abra ini disi ten, foe na moro bigi pisi komoto foe den sekte nanga kerki groepoe foe na kristenheid, na disiten eksempre foe na Israël naatsi foe Jesaja ten èn na ten foe Kristus. Leki wan paiman foe na troe tori dati den ben ari densrefi loesoe foe na kristenheid di siki na jeje fasi èn di de ini doengroe, na kon troe foe na proféti pramisi di tanapoe ini Jesaja 58:8, ben kon tapoe den: „Ini na tori disi na leti foe joe sa broko pasa doro leki moesoedé; èn eri esi kon-boen-baka sa sproiti kon gi joe. Èn na joe fesi foe troe joe regtvaardiki fasi sa go; ja na glori foe Jehovah sa de na a bakalin foe joe.”
22. Oten na pramisi kon-boen-baka ben bigin broko kon gi den discipel di ben loesoe densrefi poeroe?
22 Ini na baka jari 1919 G.T. na profétitori dati ben bigin foe kon troe tapoe den kristen kotoigi foe Jehovah, di ben loesoe densrefi poeroe krinkrin foe na kristenheid, di kerki leri nanga gwenti tai èn di kerki fesiman e tiri. Gi den sma disi di ben kon fri na leti tapoe bijbel waarheid nanga bijbel profétitori ben bigin broko kon na doro „leki na moesoedé”. Na „kon-boen-baka” foe den ini wan boen jeje gosontoe, wan boen matifasi nanga Jehovah Gado nanga jepi foe den wroko foe Jezus Kristus, ben bigin esesi. Soleki Jesaja ben kon krin nanga wan faja krofaja foe na tempel-altari, na so den toe ben kon krin foe doe dienst leki Jehovah Kotoigi. — Jes. 6:1-10; 43:10-12.
23. Sortoe fesilin èn bakalin den ben abi, srefi ini a Tweede Grontapoe-feti?
23 „Regtvaardiki fasi” èn no bedrigi fasi foe na kristenheid ben go na den fesi foe tjari den tapoe den pasi di de joisti ini na ai foe Jehovah. Foe kibri den, dan te nanga now a ben kon na den baka leki wan bakalin”. Leki wan bakapisi foe disi, dan den ben tan ini na boen-ati foe en èn kisi kibri foe na pori di den feanti foe den ini na Tweede Grontapoefeti foe 1919-1945 ben skreki den. — Matt. 24:9-14.