„No broko-ede foe noti”
„No broko-ede foe noti, ma meki ini ala sani nanga jepi foe begi nanga djeme makandra nanga taki tangi joe tranga begi kon de bekenti na Gado.” — Fil. 4:6.
1. Nanga sortoe reden foe bijbel wi kan taki dati Jehovah de na „Gado foe vréde”?
JEHOVAH de a „Gado foe vréde” (Fil. 4:9). A no sabi nowan broko-ede di e tergi joe, nowan firi foe djompo-ati ofoe frede. Noti — srefi no den tegoe doe foe den ogri sma — kan poeroe Gado ini en rostoe ofoe meki a lasi en balans. Den égifasi foe en de alaten volmaakti ini balans nanga makandra. Na so Jehovah ben handri foe eksempre ini lobi „foe meki en son kon tapoe den ogrisma nanga den boensma” (Matt. 5:44, 45; 1 Joh. 4:8). Noiti a de drai na reti (Gen. 18:25). Na koni foe Gado di no abi en speri e meki dati „foe sensi na bigin a de si a kaba” èn kan kakafoetoe gi ibri sortoe sani di kan pasa. En makti di no abi marki, èn di noiti a ben gebroiki tapoe wan fasi di no de frantwortoe, alaten ben abi winimarki, dati en regtvaardiki wani ben doe. — Job 12:13; Jes. 40:26; 46:9, 10.
2. Fa den aanbegiman foe Jehovah moe si en?
2 Fa den memre foe na universele Famiri foe Jehovah aanbegiman moe si na „Gado disi foe vréde” di joe no kan teki gersi nanga noti? (Teki gersi Efese 3:14, 15). Foedi a hemel Tata foe den kan kakafoetoe gi ibri situwasi, dan sma di e prijse Jehovah abi ala reden foe de bedari. Den kan abi wan firi foe troetroe sekerfasi ini wan matifasi nanga en.
Krinkrin sondro broko-ede?
3. Foe sanede a no moe de wan froewondroe sani, dati pikinso broko-ede no de wan vreemde sani gi Jehovah dienstknegti?
3 A no de foe taki, dati disi no wani taki dati „den sma di lobi Jehovah” no sabi broko-ede srefi-srefi (Ps. 9:10). Den ben kisi abra foe Adam onvolmaakti fasi èn den moe libi na mindri foe tra sondoe bakapikin foe na fosi libisma (1 Kon. 8:46; Rom. 5:12). „Den dé foe den jari foe den” foeroe nanga moeilijkheid, èn ala onvolmaakti libisma „e libi wan sjatoe ten èn den bere foeroe nanga broeja” (Job 14:1; Ps. 90:10). Foe datede meki a no moe de wan froewondroe sani, dati pikinso broko-ede no de wan vreemde sani gi Jehovah dienstknegti.
4. Sortoe tekst e sori dati sma di frede Gado no kan de fri krinkrin foe broko-ede?
4 Pen foe na firi kan de, foe eksempre, soleki den Hethiet oema foe Esau ben de „wan fonten foe bita foe ati” gi en papa nanga mama Isaak nanga Rebekka di ben frede Gado (Gen. 26:34, 35). Siki e foeroe na libi foe Gado disiten dienstknegti nanga wan seker broko-ede, soleki Timoteus nanga Trofimus leki getrow kristen ben abi foe doe nanga dati (1 Tim. 5:23; 2 Tim. 4:20). Soleki na „regtvaardiki Lot”, na so disiten prijseman foe Jehovah e kisi pina foe na hoeroedoe fasi foe libisma di e kakafoetoe gi na wet (2 Petr. 2:7). A de pasa sosrefi toe dati sma di dini Gado getrow, moe hori densrefi ini libi nanga pikinso sani — troetroe wan oorzaak foe moro leki normaal broko-ede (Fil. 4:12). Èn soleki na apostel Paulus, na so foeroe kristen man ini wi ten e sorgoe gi kompe-bribiman (2 Kor. 11:28). Poti na tapoe disi den difrenti moeilekheid, di sma nanga frede foe Gado e kisi densrefi, èn a de krin dati den no de now krinkrin fri foe broko-ede.
5. (a) Sortoe spesroetoe jepi Jehovah dienstknegti abi foe kakafoetoe gi broko-ede? (b) San na wortoe „vréde” wani taki, soleki a de gebroiki ini den Santa Boekoe?
5 Tog Jehovah dienstknegti abi jepi foe Gado, di e meki den kakafoetoe gi ala den broko-ede foe den — warti jepi di sma di no lobi jeje sani, no abi. (Teki gersi Judas 17-21) Jehovah no de wawan na „Gado foe vréde”, ma kolokoe meki a de sosrefi toe „na Gado di e gi vréde” (Rom. 15:33). Na wortoe vréde ini den Santa Boekoe wani taki moro leki taki stré no de. A de sori foe eksempre tapoe „tanboen, kolokoe, go na fesi nanga ala sortoe boen sani” (Gen. 41:16 Authorized Version; Mark. 5:34; Luk. 1:79). Na abi foe so wan vréde di abi ala sani na ini sa poeroe ofoe lekti den sorgoe foe na libi.
6. San wi moe doe efoe wi wani kisi èn hori na vréde di Gado e gi?
6 Ma efoe wi wani kisi na vréde disi di Gado e gi èn hori en, dan wi moe abi wan dipi lobi gi Jehovah nanga en Wortoe. Disi wani taki dati wi lobi Gado, wi e hori en komando, wi abi bribi ini na nen foe en Manpikin Jezus Kristus, èn wi e sori lobi gi tra sma (1 Joh. 3:19-24; 5:2-4). Te wi wani hori den komando foe Gado, dan a no de foe taki dati wi moe sabi den. Disi wani taki dati wi moe meki na studeri foe den Santa Boekoe de wan aladé afersi (Joz. 1:8). Èn te wi gi moro ten na a Wortoe foe Jehovah, dan wi sa meki wan moro bigi „lostoe” gro kon. Disi baka, sa gi wi wan moro bigi vréde foe ati nanga froestan. — 1 Petr. 2:1-3.
Wan lobifasi Tata, di e doe makti wroko
7. Sortoe krakti moro sabi foe Gado Wortoe abi tapoe wi matifasi nanga en, èn fa disi e fri wi foe broko-ede?
7 Moro sabi foe a Wortoe foe Gado sa hari wi kon moro krosibé na a Moro Héwan, efoe wi go na en nanga na sakafasi foe pikin èn nanga na opregti lostoe foe kisi „koni foe tapoesé” (Jak. 3:17, 18). Disi sa meki wi froestan dati Jehovah de „wan Gado nanga sari-ati èn boenfasi, a no e kisi atibron esi èn a abi foeroe pasa marki lobi boen-ati èn waarheid” (Ex. 34:6). Wi sa froestan moro boen dati a de „boen èn e gi pardon” (Ps. 86:5). Foe di wi de onvolmaakti èn nanga sondoe, dan wi sa naki foetoe na pasi, ma wi abi na djaranti disi: „Soleki wan tata e sori sari-ati gi en manpikin, a so Jehovah ben sori sari-ati gi den di e frede en. Bikasi en srefi sabi heri boen fa wi ben meki, ini prakseri dati wi de stof” (Ps. 103:13, 14). Fa wi ati nanga wi froestan e kon fri foe na broko-ede, di ben sa kan masi wi! Èn wan lobifasi doe di wi froestan no kan teki, de Jehovah seti foe na verloesoe-paiman, di ben sreka nanga jepi foe en lobi Manpikin, sodati „ibri sma di e sori bribi ini en, no moe go ini pori, ma ben sa abi tego libi”. — Joh. 3:16; 1 Tim. 2:5, 6.
8, 9. (a) Sortoe tekst e ferteri fa Jehovah de na Doeman foe „Makti wroko”? (b) Foe san-ede joe ben sa taki dati Gado fositen doe e bewijsi dati en pipel kan froetrow dati Gado e jepi foe kakafoetoe gi broko-ede?
8 Wi hemel Tata de sosrefi toe wan Doeman foe „makti wroko” (Ps. 106:1, 2; 145:11, 12). Di Mozes ben aksi Gado foe en boen-ati, a ben kan taki: „O (Soeverein) Masra Jehovah, joesrefi ben bigin foe meki joe knegti si joe granfasi èn joe tranga anoe, bikasi soema de wan gado ini hemel ofoe grontapoe di e doe leki joe èn makti wroko leki joe?” (Deut. 3:23, 24, herziene Engelse uitgave van 1971) Mozes ben kan memre fa Jehovah ben fri En pipel na wan makti fasi foe katibo ini Egypte èn ben tjari den psa na Redi Se nanga dré foetoe (Ex. 12:29-42; 14:5-31). Sosrefi toe na proféti ben si san Jehovah ben doe foe meki Israël wini den Amorietsma, di ben tanapoe ondro na tiri foe den kownoe Sihon nanga Og. Èn foedi Jehovah ben stré gi den Israël sma, dan Mozes boiti dati, ben abi na froetrow dati Gado ben sa poti tra feanti kownoekondre na den ondro èn ben sa gi en pipel na pramisi kondre (Deut. 3:1-22). Ja, èn dati Gado ben doe troetroe, foedi a de doe san a taki (Joz. 23:1-5). Fa „den sma di lobi Jehovah moe firi densrefi te den e si Gado betrouwbaarheid èn en doe foe fri sma? A pipel foe en ini disi ten abi wan gron foe wan tanteri broko-ede? Kwet-kweti, bikasi Jehovah de getrow, èn a „sabi foe fri sma di e frede Gado komoto foe tesi”. — 2 Petr. 2:5-9.
9 Gado doe foe na boen foe den sma di e dini en dorodoro, no de soso tapoe na tori foe den wroko foe fri sma. Ma ete den sortoe wroko disi e bewijsi dati „Jehovah no sa trowe en pipel” (Ps. 94:14). Wi kan abi soboen na froetrow, dati a sa jepi den foe kakafoetoe gi den broko-ede foe libi.
„Meki joe tranga begi kon de bekenti na Gado”
10. Leki fa den wortoe foe Filippenzen 4:6, 7 taki, dan fa wi kan tranga na banti nanga na „Gado foe vréde”?
10 Wan geregeld studi foe Gado Wortoe sa hari wan opregti sma kon moro krosibé na Jehovah. A srefi de so foe na teki foe dipi prakseri foe den lobifasi pasi foe na hemel Tata nanga en makti wroko foe na boen foe den sma di e dini en getrow. Tog wan tra fasi de foe tranga na banti foe wi nanga na „Gado foe vréde”. Na kristen apostel Paulus ben meki disi krin di a ben gi kompe-bribiman na dekati: „No broko-ede foe noti, ma meki ini ala sani nanga jepi foe begi nanga djeme makandra nanga taki tangi joe tranga begi kon de bekenti na Gado.” Disi e tjari wan rostoe kon di Gado e gi èn di na libisma froestan no kan teki. — Fil. 4:6, 7.
11. Sortoe bijbel eksempre joe kan gi foe bewijsi dati Jehovah de „na Sma di e jere begi”?
11 Langaten bifo Paulus ben skrifi den wortoe dati, dan Jehovah ben bewijsi dati a de wan lobifasi, betrouwbaar „Sma di e jere begi” (Ps. 65:2). Den aanbegiman foe en ben kan trowe den difrenti broko-ede foe den na tapoe en, nanga na froetrow dati a sa jere den tranga begi foe den. Foe eksempre: Gado ben jere na begi foe Abraham dienstknegti Eliëzer, di a ben kisi jepi foe feni wan oema gi Isaak, na manpikin foe en masra. (Gen. 15:2; 24:10-27, 62-67). Hanna di no ben kisi pikin ben „begi foeroe”, nanga watra-ai, èn a ben kisi wan manpikin Samuël, di nanga wan grantangi firi a „ben leni na Jehovah en heri libi langa” (1 Sam. 1:4-28). Aladi kownoe Hizkia di ben siki tranga ben kré hebi, a ben seni tranga begi na Jehovah, èn a ben kon gosontoe (2 Kon. 20:1-11). Someni dé langa Nehemia ben vaste èn begi, aladi ini wan moeiliki momenti ini ensrefi a ben seni tranga begi go na a Gado foe hemel”, nanga na prisiri bakapisi dati a ben kisi foe na kownoe makti foe bow Jeruzalem baka di ben pori (Neh. 1:1-2, 8). Ini na tempel na getrow Anna ben doe dé nanga neti santa dienst „nanga vaste èn tranga begi”, nanga na paiman dati a ben de drape di na pikin Jezus ben tjari kon drape na inisé (Luk. 2:36-38). Ini na ten foe na laatste neti foe en grontapoe libi, Kristus ben begi Jehovah jepi èn a ben kisi foe en hemel Tata someni tranga dati a ben kan dringi na „beker” di ben de spesroetoe gi en. — Matt. 26:26-47.
12. Foe sanede Jehovah dienstknegti kan de nanga foeroe froetrow na en te den e broko-ede foe wan sani?
12 Loekoe sosrefi toe den foeroe tra okasi di tanapoe ini den Santa Boekoe — pe wan sma e ferteri foe en sondoe, ofoe pe prijse nanga tangi e gi. Aksi joesrefi dan: Jehovah disiten dienstknegti no moe go ini begi na en, ofoe den de now kolokoe, nanga tangi, ofoe sari ofoe nanga broko-ede? Disi den moe doe troetroe, nanga na froetrow, dati den hemel Tata e jere den sakafasi tranga, opregti begi foe den.
13. Foe sanede na apostel Paulus ben kan gi kompe-kristensma tranga foe „no broko-ede foe noti”?
13 Let bifo na apostel Paulus ben gi en kompe-kristen-brada na rai foe meki Gado kon de bekenti nanga den tranga begi foe den, a ben taki nanga tranga: „No broko-ede foe noti” (Fil. 4:5). Nanga den wortoe disi, a ben taki ete wantron na rai foe Jezus, di a ben taki: „No broko-ede moro langa foe joe sili” èn „no broko-ede a fesi foe san joe sa taki” (Matt. 6:25; Mark. 13:11). Na apostel ben sabi dati na hemel Tata ben sa sorgoe gi En aanbegiman èn dati den ben sa abi na jepi foe Jehovah santa jeje te den ben sa hori densrefi bézig nanga den sani di Gado ben feni boen.
14. Sortoe begi tranga-begi de?
14 Foedi wi sabi dati Jehovah de „na Sma di e jere begi”, dan wi, di e feti baka wan sondro-froktoe libi ini disi ten, kan poti nanga froetrow prakseri tapoe Paulus vermane: „Ma meki ini ala sani nanga jepi foe begi nanga djeme makandra nanga taki tangi joe tranga-begi kon de bekenti na Gado.” Den begi foe wi foeroe tron de „tranga begi”. Dati wani taki, dati den abi ini den, dati wi e aksi foe aparti sani ofoe sani di kari spesroetoe na nen. Eliëzer nanga Hanna ben de den getrowwan, di Gado ben jere den spesroetoe sani di den ben aksi, èn Jezus ben taki dati a de joisti foe ben begi Gado tranga foe bepaalde sani tapoe wan specifieke fasi. Kristus ben taki foe eksempre gi en discipel dati den ben moe aksi en Tata: „Gi wi brede foe na dé soleki na dé e aksi foe en.” — Luk. 11:2, 3.
15. (a) Tapoe san „djeme” e sori ini a tori foe begi? (b) San Hebr. 5:7 e leri wi foe den begi foe Jezus Kristus?
15 Foeroe afersi kan meki bigi broko-ede kon, èn wawan tron a de fanowdoe ini disi foe „djeme” gi Gado. Na wortoe disi e poti krakti a wan tranga fanowdoe èn wan sakafasi èn opregti tranga fanowdoe begi. A no de go, soboen, soso foe taki nanga Gado nanga respeki ini wan algemeen begi. Wawan tron dan tranga-begi nanga djeme de fanowdoe. „Ini den dé di a ben de ini skin” so wi e lési; „dan Kristus ben seni go, nanga babari èn watra-ai, djeme èn sosrefi toe tranga begi na a sma di ben kan loesoe en foe dede èn Gado ben jere en foe na Gadofasi frede foe en” (Hebr. 5:7). Foedi Jezus ben froestan na fanowdoe foe hemel jepi, dati meki a ben go na en Tata nanga en heri ati nanga tranga fanowdoe begi èn opregti djeme. Boiti dati, Kristus ben seni tranga-begi gi Jehovah, pe a ben aksi foe sani di ben de krin. — Joh. 17:9, 10, 15-21.
16. Sortoe krakti a kan abi tapoe wan kristen te Gado jere den begi foe en?
16 Te Gado doe den specifiek aksi foe wan kristen èn te Gado jere en opregti tranga fanowdoe aksi, dan a sabi dati Gado de nanga en. Na froestan disi foe jepi foe Gado, kan meki a sma doe a srefi leki Job, di baka a ben horidoro ini tesi ben bari taki: „Nanga jere taki mi ben kon sabi foe joe (Jehovah Gado), ma now mi égi ai ben si joe” (Job 42:5). Soleki Job, na so wi nanga na ai foe froestan, bribi, nanga waarderi kan loekoe èn „si” en soleki wi no ben si en noiti ete. Fa wan vréde foe ati nanga froestan e kon foe na matifasi nanga wi hemel Tata!
„Makandra nanga taki tangi”
17. Foe sanede wi moe taki Gado tangi ini begi?
17 Paulus ben gi kompe-bribiman tranga foe meki den tranga-begi foe den bekenti na Gado nanga jepi foe begi èn djeme „makandra nanga taki tangi” (Fil. 4:6). Foe troe foeroe reden de foe taki tangi èn prijse na Moro Héwan (1 Kron. 29:10-13). Jezus ben gi en foetoeboi wan eksempre di a ben taki tangi foe na njanjan èn foe na brede nanga na win di ben gebroiki na a Avondmaal foe Masra (Matt. 15:36; 26:27; Luk. 22:19, 20). Boiti dati wi moe sori Gado tangi foe den sortoe sani disi, wi moe „taki Jehovah tangi foe en wondroewroko na den libisma-pikin”, foe „en regtvaardiki kroetoe bosroiti” èn foe foeroe moro (Ps. 33:2-5; 92:1, 2; 100:4, 5; 107:1, 8, 15, 21, 31; 119:62). Fa a de wan sani di fiti foe taki Gado tangi foe en Wortoe foe waarheid di no abi en speri! Èn fa wi moe de nanga tangi foe na ofrandi foe en Manpikin, sodati verzoening nanga Jehovah kan kon! — Rom. 5:6-11.
18. Foe sanede wi no abi rede foe broko-ede teki wi abra te wi e doe getrow na wani foe Gado?
18 „Den sma di lobi Jehovah” kan taki en sosrefi toe tangi, foedi a de broko-ede nanga den. Na apostel Petrus ben skrifi: „Saka foe dat’ede joesrefi ondro na makti anoe foe Gado, sodati a kan hé joe na a reti ten, aladi joe e poti ala joe broko-ede na en tapoe, bikasi a de sorgoe gi joe” (1 Petrus 5:5, 6). Petrus èn Paulus ben gi soboen kompe-bribiman tranga foe no broko-ede foe noti, ma foe libi ala joe broko-ede na Jehovah. Èn fa na rai dati de wan di fiti! Troetroe noti de, di na Moro Héwan no ben sa kan doe ofoe no ben sa kan tjari go ini wan joisti sé foe na boen foe den sma di e dini en nanga den heri ati (Mark. 10:27; 12:29, 30). Foe sán Gado e gi pasi toe, den getrowwan kan tjari ala disi, foedi a de gi „tranga foe ala sani” (Fil. 4:13; 1 Kor. 10:13). Na psalmsingiman David nanga reti ben taki: „Drai joe pasi poti tapoe Jehovah, èn froetrow tapoe en, èn ensrefi sa handri” (Ps. 37:5). Ja, doe getrow na wani foe Gado èn no wan foe broeja nanga toemsi broko-ede de. Na presi foe dati, gosontoe reden de foe abi inisé vréde, srefi na mindri foe benawtoe nanga broeja. Ma o bigi na vréde dati de?