Joe de wan loyaal prékiman foe Gado kownoekondre?
„Ala joe wroko sa prijse joe, o Jehovah, èn joe loyaalwan sa blesi joe. Foe na glori foe joe kownoewroko den sa taki, èn foe joe makti den sa taki.” — Ps. 145:10, 11.
1. O fara Jezus ben meki Gado kownoekondre bekenti?
SENSI a ten foe Abel, Jehovah ben abi alaten loyaal dienstknegti na grontapoe di ben prijse en. Na loyaal sma foe Jehovah di e kon moro na fesi leki sortoe tra mekisani, en wan enkri gebore Manpikin, Jezus Kristus, ben teki fesi foe taki foe Jehovah makti nanga en kownoekondre di sa de foe a boen foe ala libisma. Jezus ben kon leki a Sma di a ben seni, na bakapikin foe Isaï nanga David, na wan di ben poti leki kownoe, ma di no ben tiri ete, èn a ben meki Gado kownoekondre de a moro prenspari leri di a ben leri sma (Jes. 11:1, 10; Matt. 21:1-17). A ben meki a boen njoensoe foe a kownoekondre bekenti. Foedi a ben de a mindri den sma, a ben kan taki taki a Kownoekondre ben de krosibé, leki a Kownoe di ben sa tiri ini a ten di ben kon, ben teki presi foe a Kownoekondre, èn a ben kan leri en foetoeboi foe soekoe a Kownoekondre fosi (Luk. 17:20, 21). Di a ben leri en discipel foe begi, a ben poti krakti tapoe a kon foe a Kownoekondre èn a ben tjari kon na krin dati Gado nen ben sa kon santa nanga dati èn dati Gado wani no wawan ben sa pasa ini hemel, ma sosrefi toe na grontapoe. — Matt. 4:23; 6:9, 10, 33.
2. Fa a ben tjari trawan so fara foe poti densrefi gi na stré-aksi foe Jehovah kownoewroko?
2 Jezus ben kari trawan foe moksi densrefi na en ini a taki foe a boen njoensoe foe a Kownoekondre di e kon (Luk. 9:1-6; 10:1-12). Jezus foetoeboi ben froestan taki en de-noja leki kownoe ben de ete ini a ten di e kon, soleki wi kan si ini na aksi di den ben aksi ini Matteus 24:3: „Taigi wi: Oten den sani disi sa pasa, èn san sa de a marki foe joe de-noja (ofoe parousia, Griki) èn foe na bosroiti foe a seti foe sani?” Jezus ben sori moro fara krin taki a ten foe en de-noja ben sa de wan spesroetoe ten, di sma ben sa taki foe a Kownoekondre, aladi a ben sori taki disi ben sa doe na a eri grontapoe pe libisma e libi. Foedi wi ben si „a marki”, meki wi sabi taki sensi 1914 Jezus de-noja leki wan kownoe di abi makti èn di e tiri a mindri foe en feanti. — Ps. 110:1; Hebr. 10:12, 13; Matt. 24:14.
3. Fa Paulus ben abi wan prati ini a meki bekenti foe Gado kownoewroko?
3 „Foe meki bekenti en makti wroko gi den libisma pikin, èn a glori foe a moifasi foe en kownoewroko. Joe kownoewroko de wan kownoewroko foe ala ten di no abi marki, èn joe tirimakti de ini ala famiri-lo di sa waka baka makandra” (Ps. 145:12, 13).
Den discipel foe Jezus ben sori trawan na wan spesroetoe fasi tapoe Gado kownoekondre ini anoe foe Jezus Kristus. Wan moi eksempre foe disi tanapoe ini Tori foe den Apostel 28:23, 30, 31, pe wi e lési fa Paulus e préki a kownoekondre di a ben de leki strafoeman ini Rome. A ben skrifi a fosi foe dati gi den korinte-sma taki kristensma „de boskopoeman di e doe wroko ini a presi foe Kristus” èn dati den e jepi sma „kon verzoen nanga Gado” (2 Kor. 5:20). Leki wan boskopoeman, den ben froewakti foe Paulus taki a ben sa taki foe a boen foe a kownoe-tiri èn a Kownoe di a ben teki presi foe en, èn dati a ben doe toe. Joe ben sa wani doe so wan kownoe dienst toe? Efoe a de so, joe e tan taki foe a boen foe a Kownoe nanga a Kownoekondre?
4. Sortoe sani Paulus nanga Johannes ben taki èn skrifi èn di wi kan meki bekenti now leki loyaal anbegiman foe Jehovah?
4 Te Paulus ben tjari leri foe Kownoekondre kon a krin, a ben sori ini sortoe fasi Jezus Kristus de nanga Jehovah Gado ini a seti foe a Kownoekondre èn a ben sori taki Jehovah de a bigi Soeverein foe a universum. „Gado de na ede foe Kristus” (1 Kor. 11:3). Paulus ferteri toe san sa pasa na a kaba foe a doesoen jari tiri foe Kristus (1 Kor. 15:24-29). Na a kaba foe a fosi eeuw G.T. na loyaal apostel Johannes skrifi sosrefitoe wortoe pe a sori tapoe makti wroko foe Jehovah ini a ten di e kon èn sori na moifasi foe en kownoewroko. (Loekoe Openbaring 12:9, 10; 19:6; 20:10, 14; 21:3, 4, 22-24.) Disi de sani di wi ini a ten disi kan meki bekenti a den libisma pikin leki loyaal anbegiman foe Jehovah, aladi wi de poti krakti tapoe a prensparifasi foe Gado Kownoekondre èn san a sa doe gi libisma leki wan grani foe Jehovah. A kownoekondre moe ferteri finifini èn tjari kon a krin gi den libisma pikin, sodati a sa de krin gi den, taki Gado kownoekondre de den wan enkri owpoe. A sa tan de so ini ala tra famiri-lo di sa waka baka makandra.
5. (a) San Jehovah dienstknegti moe ondrofeni foeroetron? (b) San Jehovah pipel ben kan doe sensi a Fosi Grontapoe-feti, aladi den ben ondrofeni gens?
5 Ondro na letter samech a di foe 15 letter foe a Hebrew Alfabet, Psalm 145:14 e go moro fara nanga den wortoe:
„Jehovah e gi jepi na ala sma di e fadon, èn e opo ala sma tanapoe di beni go na gron.”
Den sma di e anbegi Jehovah loyaal èn di e meki en kownoewroko bekenti, e miti leki wan bakapisi foe den loyaliteit na Jehovah foeroetron nanga gens èn moeilijkheid (Gen. 3:15). Ma ini a ten di pasa ben kon ala tron na krin fa Jehovah ben jepi den sma di ben anbegi en èn ben opo den tanapoe te den ben kisi kwinsi, soleki a ben pramisi (Gen. kapitel 15; Loekoe sosrefi toe foeroe eksempre ini a boekoe Kroetoeman). Ini a di foe 20 eeuw, te nanga a bakajari disi foe 1981, wi ben si fa Jehovah ben fri a salfoe fikapisi nanga den „tra skapoe” komoto foe kwinsi foe Babylon. Ini a ten foe a Fosi Grontapoefeti foeroe druk ben kon tapoe a salfoe fikapisi. Ma Jehovah ben opo den tanapoe nanga jepi foe en jeje nanga Wortoe foe na waarheid. Sjatoe baka dati, tapoe a congres di den ben ori ini 1922 ini Cedar Point (Ohio, Amerkankondre), den ben teki a bosroiti foe préki loyaal na Kownoe nanga a Kownoekondre. Sensi a ten dati, Jehovah ben tjari den, nanga na bakapisi dati en nen nanga kownoekondre ben kon de bekenti na a eri grontapoe.
6. Sortoe sorgoe foe njanjan Jehovah seti gi en pipel?
6 „Den ai foe ala sma e loekoe nanga owpoe na joe èn joe e gi den den njanjan na a reti ten” (Ps. 145:15).
Den loyaal anbegiman foe Jehovah abi spesroetoe ini disi ten fanowdoe foe a jeje njanjan foe den. Den e „froestan . . . a jeje nowtoe foe den” (Matt. 5:3). Nanga foeroe owpoe den ben loekoe na Jehovah seti foe kisi boen jeje njanjan (Matt. 24:45-47). Den owpoe foe Gado dienstknegti ini disi pasa marki ben kon troe èn den abi na foertrow taki Jehovah sa tan gi a jeje njanjan di den abi fanowdoe alaten „na a reti ten”.
7. Fa Jehovah de a Sorgoeman, spesroetoe tapoe a tori foe anbegi?
7 Akroederi nanga disi, Psalm 145:16 e go moro fara foe taki:
„Joe e opo joe anoe èn joe e meki ala sani di e libi njan den bere foeroe.”
Jehovah Gado de na wan enkri sma ini a eri universum di leki Sorgoeman de sondro marki. En de a hemel Tata èn A Sma di ben gi libi. En boen-atifasi nanga lobi boenfasi de foe si ini en mekiwroko èn ini den boen sorgoe di a ben seti gi libisma nanga ala tra mekisani na grontapoe. Foedi Jehovah ben meki wi nanga na fanowdoe foe anbegi, meki a ben tjari ensrefi nanga en prakseri kon na krin gi libisma tapoe wan boen-ati-fasi, èn den sma di gi densrefi abra na Jehovah Gado èn di abi wan prati na en anbegi nanga dienst, ben ondrofeni Jehovah boen-ati-fasi moro-moro krin. Ala den sortoe ondrofeni disi ben meki wi de toemsi korostoe, èn wi kan abi a foertrow taki Jehovah sa go doro foe gi en jeje na en dienstknegti èn taki noiti a sa stop foe meki den bere foeroe nanga warskow, tiri nanga jeje jepi, srefi ini den laatste dé disi. — Ps. 119:129.
8. Fa Jehovah e sori loyaalfasi?
8 Foedi wi de loyaal na Jehovah, meki a de loyaal na wi. Ja,
„Jehovah de regtvaardiki ini ala en pasi èn loyaal ini ala en wroko” (Ps. 145:17).
Foedi wi tron dienstknegti foe Jehovah di gi densrefi abra nanga loyaal jepiman foe en kownoekondrewroko, dan alaten wi kan foertrow na Gado. A de handri regtvaardiki nanga boen na a sé foe en dienstknegti. En wondroe égifasi no e kenki. Soboen, te wi ben teki na anbegi nanga dienst foe Jehovah na wi tapoe wantron, dan wi kan de séker taki a no sa libi wi. A de troetroe „loyaal ini ala en wroko”. Disi de soboen ete wan boen rede foe ferteri tra sma foe Jehovah nanga en moi égifasi èn kari den foe moksi densrefi nanga wi foedi den sa libi wan libi di den gi abra èn di den e prijse Jehovah loyaal nanga dati. — Teki gersi Psalm 107.
9. O prenspari bribi de ini a kari foe Jehovah, èn fa wi moe kari Jehovah?
9 Foe dat’ede foe prijse Jehovah wi kan meki den wortoe disi bekenti:
„Jehovah de krosibé foe ala sma di e kari en, ala sma di e kari en ini waarheid” (Ps. 145:18).
A de wan prenspari sani foe kari Jehovah. A moe doe nanga wan troetroe bribi (Rom. 10:10-15). Na psalmsingiman e poti krakti a tapoe o krosibé Jehovah de gi den sma di e kari en na a joisti fasi, san wani taki taki den moe sori bribi ini en (Hebr. 11:6). Èn a kari disi foe Jehovah no e pasa a kibrifasi, ma a de nanga reti wan meki bekenti na publiki foe sma jere, taki wi e poti bribi ini Jehovah èn wi e foertrow na en. Paulus e poti krakti tapoe a fanowdoe foe meki a „boen njoensoe” bekenti foe boen sani èn foe préki foe a boen foe tra sma. A prijse-babari gi Jehovah foe a mofo foe den sma di e kari en, e kon moro tranga te alaten moro bigi groepoe getrow prékiman foe na „boen njoensoe” e ferteri tra sma foe Jehovah. Nanga a meki di den e meki den kon bekenti nanga Jehovah èn en glori èn en granfasi, sosrefi toe en kownoewroko, dan den prijseman e sorgoe taki a bribi foe den sma disi gro, sodati densrefi toe kan moksi densrefi na den ini a kari foe a nen foe Jehovah èn sa kon krosibé foe en. A pasi foe ferloesoe opo gi ala sma di wani waka sote a pasi disi, bikasi wan difrenti no de foe ras, kloroe ofoe nationaliteit èn den sma di e poti bribi ini Jehovah èn e kari en ini troefasi, no sa kisi sjen ini den froewakti. Fa a de wan bigi sani foe a sé foe Jehovah, dati a de gi wi pasi foe kon ini wan krosibé matifasi na en! Disi de spesroetoe so ini den moeiliki laatste dé disi, now di a de kon krin leki wanten dati wi moe foertrow tapoe Jehovah, na Gado foe ferloesoe dorodoro.
10. Foe san-ede Jehovah sa doe akroederi na lostoe foe den sma di e frede en?
10 „A sa doe akroederi na lostoe foe den di e frede en, èn a jepi-babari foe den a sa jere, èn a sa ferloesoe den” (Ps. 145:19).
Den sma di e frede Jehovah troetroe e gi densrefi abra na en èn den e abi na lostoe foe doe en wani. Te wi e proeberi foe doe en wani, dan wi abi ala rede foe foertrow tapoe Jehovah leki na fonten foe wi jepi nanga ferloesoe. „Èn disi de a foertrow di wi abi na en, taki, wansi san wi e aksi akroederi en wani, a de jere wi. Èn efoe wi sabi taki a de jere wi foe san wi e aksi toe, dan wi sabi taki wi sa abi den sani di wi ben aksi, foedi wi ben aksi den foe en” (1 Joh. 5:14, 15). Wi e froestan dati a de Jehovah wani taki ini disi wi meki a boen njoensoe foe a Kownoekondre bekenti èn dini en soifri. Wi moe abi na lostoe foe ferteri sma foe a bigi stré-aksi foe a sé foe Jehovah soevereiniteit ini na universum, wansi wi e miti ini disi foeroe gens. Ala sortoe sma e kisi na so fasi na okasi foe teki Jehovah boskopoe èn poti bribi ini en, aladi den e kon sabi en pasensi nanga libisma èn nanga en winsi dati a libisma-famiri kon kisi berow èn kisi ferloesoe.
11. Fa Jehovah e jere a „jepi-babari” foe en dienstknegti?
11 Soboen, a de a faja lostoe foe wi dati a kownoekondre-wroko disi doe. Wi no e doe a wroko wi wawan. Wi de dienstknegti foe Jehovah èn wi e wroko nanga en makandra. Ini den moeiliki „laatste dé” disi wi moesoe kari en foe jepi, èn te a émarki foe a stré-aksi doro èn „Gog foe a kondre Magog” meki en ros, soleki ben taki a fesi ini Ezechiël 38 nanga 39, dan wi sa moe foertrow na Jehovah èn sa moe kari en foe a kibri èn ferloesoe wi. Kownoe David ben kisi ferloesoe na wan aparti fasi di en feanti ben fervolgoe en. Kristus Jezus ben moe gi en libi foe a prakseri foe Jehovah ede, ma Jehovah ben opo en komoto foe dede. Soboen, Jehovah man foe kakafoetoe gi ibri sortoe foe druk ofoe gens di den feanti foe na waarheid ben sa kan tjari kon na wi tapoe, aladi a kan jere srefi wan jepi-babari foe en dienstknegti di kande sa feni na dede èn di nanga jepi foe na opobaka sa moe kisi ferloesoe.
12. Foe san-ede wi no abi foe de nanga frede te den ogri sma sa kisi pori?
12 Soboen, a de tan troe taki
„Jehovah (e kibri) ala sma di lobi en, ma ala ogrisma a sa pori” (Ps. 145:20).
Foedi wi doro a émarki foe ogridoe èn a „bigi benawtoe” kan bigin ibri momenti, a de wan blesi foe kan foertrow tapoe wortoe di e meki joe korostoe, taki Jehovah e kibri ala sma di lobi en (Matt. 24:21). A ten doro taki den ogri sma sa kisi pori, èn den moe kisi warskow foe dati. Ma Jehovah dienstknegti leki groepoe sa pasa libilibi na „bigi benawtoe” di sa tjari kon tapoe den ogri sma èn na a fasi dati ondrofeni na ferloesoe foe Jehovah na a sé foe den. Jehovah lobi den sma troetroe di de loyaal na en èn a no sa frigiti den ini a ten foe en bigi atibron tapoe den ogri sma. A de monjo ini a bijbel foe eksempre di e sori taki joisti te Jehovah ben tjari strafoe kon tapoe den ogri sma, a ben doe makti wroko foedi a ben kibri èn fri en pipel ini a ten dati. Ja, wi e loekoe faja-faja na a ten di den ogri sma sa kisi pori èn den sma di gens na kownoewroko foe Jehovah, sa poeroe na plei.
13. (a) Fa Jehovah ben kibri en disten dienstknegti? (b) San Jehovah ben pramisi na den sma di lobi en?
13 Ini a eri pisi ten disi foe den „laatste dé” Jehovah dienstknegti ben kari en foe kisi jepi èn den ben sori den lobi gi en. Jehovah ben kibri en dienstknegti pasa foeroe moeilijkheid, spesroetoe ini a ten foe a di foe Toe Grontapoefeti, di a wroko ben tapoe ini difrenti pisi foe na grontapoe èn doesoen-doesoen Kotoigi ben de ini strafoe-kampoe nanga strafoe-oso. Sosrefi toe ini foeroe pisi foe grontapoe sakasaka-sma ben doe ogri na den. Ma a meki bekenti foe a boen njoensoe foe a Kownoekondre ben go doro èn Jehovah ben de boen gi en dienstknegti, aladi a ben meki moro foeroe sma kon èn a ben gi trowstoe foedi a meki den nomroe foe den ini a eri grontapoe kon moro foeroe. A de Jehovah prakseri taki a Kownoekondre-tiri ini anoe foe Kristus Jezus panja go na a eri grontapoe. Sma na ondro a kownoekondre sa libi a grontapoe, foedi a „bigi ipi” „tra skapoe” sa pasa na benawtoe èn den foeroe sma di sa komoto foe den grebi nanga jepi foe wan opobaka, sa moksi densrefi nanga den. Soboen, na pori foe den ogri sma no sa wani taki rampoe gi Jehovah dienstknegti. Jehovah sa piki na lobi di en dienstknegti ben sori gi en foedi a sa kibri den èn foedi a sa sori den en lobi, sari-ati nanga boenfasi. Èn ini en lobi a ben pramisi en skapoe wan moi grontapoe paradijs pe den sa prisiri densrefi ini tego libi (Luk. 23:43). Na poti reti foe Jehovah universele kownoewroko sa wani taki soso blesi gi den sma di lobi Jehovah, èn sa de wan okasi foe warderi Jehovah moro te den jari e pasa gwe. Fa a sa de wan wondroe sani foe libi ini a ten di a laatste vers foe Psalm 150 e kon troe, te „ala sani di abi bro” e prijse Jehovah èn ala ogri sma sa komoto a pasi! — Vers 6.
14. Foe sortoe blesi foe Jehovah wi kan taki?
14 Prakseri baka den foeroe blesi di wi ben kisi foe Jehovah. Loekoe fa a ben meki wi njan wi bere foeroe nanga boen jeje njanjan. Warderi moro leki wanten na bigi grani di a ben gi wi foe de now en dienstknegti, èn sosrefi toe den wondroe froewakti foe a ten di e kon. Foedi a froewakti de foe pasa libilibi Armageddon, dan nanga prisiri wi kan loekoe na a ten foe na opobaka èn a moi wroko foe ferteri èn leri den sma di komoto foe den grebi. Gi foeroe foe den a sa de na fosi tron di den o kisi sabi foe na Bigi kownoe Jehovah. Den sa moe sabi na sortoe soema den moe de grantangi taki den de baka ini libi. Soema sa ferteri den disi? Ibriwan foe wi no sa prisiri foe kan doe disi? Ja, foe troe wi e loekoe na fesi foe prijse Jehovah foe tego.
15. Sortoe grani wi abi foe a sé foe Gado kownoewroko?
15 Ma san de foe taki foe disiten? San joe e doe nanga na bigi stré-aksi foe na sé foe Jehovah? Joe de a mindri den loyaalwan di e foertrow Jehovah, èn ibri dé njoen baka e taki foe na moifasi foe en kownoewroko? Meki a de so taki ibriwan foe wi de wan loyaal jepiman foe Jehovah kownoewroko, di kon na fesi, foedi a ben poti en Manpikin, Jezus Kristus na Moro Bigi David, tapoe a troon èn meki a de so taki ini wi bosroiti foe prijse Jehovah na publiki, de nanga wi eri ati leki kownoe David di taki:
„Mi mofo sa taki foe a prijse foe Jehovah; èn ala skin blesi en santa nen te ten di no abi marki, ja foe tego.” — Ps. 145:21.