Soema sa prijse a kownoe?
„Mi sa é joe, o mi Gado, a Kownoe, èn mi wani blesi joe nen te ten di no abi marki, ja, foe tego. Na eri dé mi wani blesi joe, èn mi wani prijse joe nen te ten di no abi marki, ja, foe tego.” — Ps. 145:1, 2.
1. Nanga sortoe wortoe kownoe David ben prijse Jehovah leki en kownoe èn foe san-ede?
KOWNOE David ben skrifi wortoe foe prijse gi en hemel Kownoe, Jehovah Gado. Son sma sa feni en kande wan sani di no de a gwenti dati wan grontapoe kownoe taki so krakti foe na boen foe wan sma di de leki kownoe moro é leki en. Ma David ben abi boen rede foe doe so. Den sani di a ben taki ben kon foedi a ben abi waarderi gi na Kownoe dati, Jehovah. David ben abi na fesi a Kownoe disi wan safrifasi di de foe koni (Jak. 3:13). David ben de wan loyaal anbegiman foe Jehovah èn a ben abi wan wondroe krosbé matifasi nanga na „Masra foe den kownoe” disi. — Dan. 2:47.
2, 3. (a) San de wantoe eksempre foe David wortoe foe waarderi gi Jehovah? (b) San de wantoe foe den sani di David ben taki foe Jehovah nanga en kownoewroko ini 1 Kronieken?
2 Foe den foeroe sani di David taki ini den Boekoe, wi kan si san ben meki a waarderi a Kownoe, Jehovah Gado, so foeroe. Ini Psalm 19 David e sori waarderi gi Jehovah leki Mekiman, leki a Sma di e gi wèt, èn leki Loesoeman. Psalm 24 e ferteri dati Jehovah de na Sma di abi grontapoe èn di de na glori Kownoe, a Maktiwan. Ini Psalm 103:19 David e tjari waarderi kon a fesi gi na Kownoewroko foe Jehovah, nanga den wortoe: „Jehovah srefi ben poti en troon boen stéfi ini hemel; èn tapoe ala sani den kownoewroko foe en ben ori makti.” Dan David e kari èngel nanga libisma foe blesi èn prijse Jehovah. A tangi-singi foe David ini 1 Kronieken 16:8-36 e poti krakti tapoe David waarderi gi Jehovah.
3 Na a kaba foe a tiri foe David, a ben sori na a eri pipel den firi di a ben abi en eri libi langa. A ben bari tranga: „Blesi joe moe de, o Jehovah, a Gado foe wi tata Israël, foe ten di no abi marki, ja, te ten di no abi marki. Foe joe Jehovah de na grani nanga na makti nanga na glori nanga na toemsi boenfasi, nanga na wartifasi; bikasi ala sani ini na hemel nanga na a grontapoe de foe joe. Foe joe a Kownoekondre de, o Jehovah, Joe di e poti joesrefi toe é tapoe ala sani. Den goedoe nanga na glori de foe joe ede, èn joe e tiri tapoe ala sani; èn ini joe anoe de krakti nanga powa, èn ini joe anoe de a makti foe meki sani kon bigi èn foe gi krakti na ala sma. Èn now, o wi Gado, wi e taki joe tangi èn wi e prijse joe glori nen. — 1 Kron. 29:10-13.
NA STRÉ-AKSI FOE A KOWNOEWROKO
4. San ben psa ini Samuël ten, sodati Israël ben kisi wan libisma kownoe, èn fa den naatsi di ben lontoe Israël ben de leki wan trapoe gi den?
4 Sjatoe bifo David ben gebore, dan na kownoewroko foe Jehovah ben de wan sani foe stré ini Israël. Disi ben pasa na a kaba foe na kroetoemanwroko foe Samuël, soleki e kon a krin ini 1 Samuël 8:4-20. Ma san ben bewégi a froebontoe-pipel foe Jehovah foe ben wani abi wan kownoe, di ben sa tiri den, sodati den ben trowe Jehovah? Den ben taigi Samuël dati den ben wani de leki ala tra pipel. Nanga mofo foe Samuël Jehovah ben warskow den foe na prijs di den ben sa moe pai te den ben wani de leki den naatsi foe poti wan libisma kownoe a den tapoe. Den ben de moro boen nanga Jehovah leki den kownoe. — Loekoe sosrefi toe Deuteronomium 4:7.
5. Fa na kownoewroko ben de ini Gideon ten wan stré-aksi?
5 A stré-aksi ben de wantron ini a naatsi Israël kaba di Jehovah ben meki a pipel wini den Midianietsma ondro na komando foe Gideon. „Bakaten den man foe Israël ben taigi Gideon: ’De masra foe wi, joe soleki joe manpikin nanga joe pikinpikin, bikasi joe ben loesoe wi poeroe foe na anoe foe Midian.’ Ma Gideon taigi den: ’Mi no sa de masra foe oenoe, sosrefi toe mi manpikin no sa de masra foe oenoe. Jehovah sa de masra foe oenoe’” (Kroetoeman 8:22, 23). Tapoe wan loyaal fasi Gideon ben poti na aksi foe den man foe Israël na wan sé èn a ben poti krakti tapoe na kownoewroko foe Jehovah. Ma sjatoe baka a dede foe Gideon, dan wan foe en manpikin, di ben nen Abimelech, ben kiri pikinmoro ala en brada èn a ben opo ensrefi poti leki kownoe, ma a tiri foe en ben de foe wan sjatoe ten èn a ben feni wan ongolokoe kaba (Kroetoeman 9). A historia disi ala sma ini Israël ben sabi eri boen. A de sori fa na kownoewroko foe Jehovah ini den ondro-ondro jari di pasa ben de wan stré-aksi. Boiti dati, ibri sma ben de ini na okasi ini a eri ten disi foe bewijsi en loyaliteit na Jehovah leki Kownoe.
6. San moro owroe historia e sori ete foe a kownoewroko, èn san Jehovah ben taki fa ala disi sa waka?
6 A Wortoe foe Gado e sori dati den sma foe den grontapoe naatsi foe sensi owroeten ben abi kownoe a den tapoe. Soleki e kon na krin ini Genesis 10:8-12, dan sjatoe baka na Froedoe kownoekondre di libisma e tiri ben orga, di ben de kontra Jehovah. Disi ben pasa ondro na krakti foe Satan na Didibri, na fosiwan di ben tjalansi na retifasi foe a tirimakti foe Jehovah, foedi a meki oproeroe nanga Jehovah èn proeberi foe ari tra mekisani komoto foe na anbegi foe Jehovah. Jehovah ben gi na ogriwan ten, sodati a kan proeberi foe meki na tjalansi foe en kon troe. A ben tjari kon sosrefi toe na krin fa na afersi sa waka. — Gen.3:15.
A GRANFASI FOE JEHOVAH E MEKI PRIJSE KON
7. (a) Sortoe rol Jehovah jeje ben pré ini na libi foe David? (b) A sortoe fasi Psalm 145 de spesroetoe?
7 Samuël ben de a sma di salfoe David leki fa Jehovah ben sori. „Foe sensi a dé dati na jeje foe Jehovah ben wroko tapoe David” (1 Sam. 16:12, 13). David de wan toemsi moi eksempre foe na fasi fa Jehovah jeje e wroko tapoe en loyaalwan. Gado jeje ben troesoe David foe skrifi foeroe psalm, pe a de prijse Jehovah (2 Sam. 23:2). Wan foe den moro moi fasi foe prijse de ini Psalm 145. Ini a psalm disi Jehovah boen-fasi, granfasi, makti, regtvaardikifasi, tegofasi, dangrafasi nanga sari-atifasi e kisi blesi, prijse nanga grani. A respeki di djoe leriman abi gi na psalm disi, e kon na krin ini disi dati dri tron ini wan dé a de kon ini na liturgie foe den. Ini Hebrew-tongo a boekoe Psalm nen Tehillim, san wani taki „prijse-singi”. Psalm 145 de na wan enkri psalm nanga na tapoesé-skrifi „Wan prijsesingi”, na moro eenvoudig fasi foe a wortoe disi.
8. San de ini na besroiti foe prijse Jehovah nen foe tego?
8 Den fosi vers foe na psalm disi e lon abra foe prisiri nanga waarderi:
„Mi sa é joe, o mi Gado, a Kownoe, èn mi wani blesi joe nen te ten di no abi marki, ja, foe tego. Na eri dé mi wani blesi joe, èn mi wani prijse joe nen te ten di no abi marki, ja, foe tego” (Ps. 145:1, 2).
Ini algemeen, bijbelcommentator e taki dati David bosroiti foe blesi Gado nen „te ten di no abi marki, ja, foe tego”, moe froestan na a fasi dati solanga David ben libi. Ma David bosroiti no wani taki wan tra sani toe? Foe kan prijse Gado nen foe tego, dan wan sma moe libi foe tego. David no ben abi na owpoe ini na ten di e kon foe libi foe tego? Ini a ten disi den sma di de wan pisi foe na „bigi ipi”, „tra skapoe” abi séker leki klasse a srefi owpoe foe kan blesi èn prijse Jehovah nen foe tego. Bikasi den no e froewakti foe dede noiti, ma foe tan libi foe tego na grontapoe. — Zef. 2:3; Joh. 11:26; Openb. 7:14-17; 21:4.
9. San wi kan taki foe wan froestan dorodoro foe den wroko foe Jehovah?
9 A prijse-singi foe David e go moro fara nanga den wortoe:
„Jehovah de bigi èn foe prijse toemsi, èn en granifasi de wan dangra sani” (Ps. 145:3).
Den bewijsi foe na granfasi foe Jehovah de foe si nanga ai foe gi na eri libisma-famiri foe sensi a ten di sani meki (Rom. 1:20). Ma ete pikinso sma ben tron prijseman foe Jehovah troetroe, aladi den e njan boen foe en granfasi nanga meki-wroko. Jehovah nanga den wroko di a ben doe de so bigi, dati srefi te nanga a dé foe tide libisma ben kan meki soso wan bigin foe feni a roetoe foe wantoe dangra sani di a ben meki. A famiri-edeman Job ben abi ne leki David so wan waarderi bikasi a ben taki foe Gado leki „A Sma di e doe bigi èn dangra sani, wondroe sani sondro nomroe” (Job 5:9; 9:10; 26:14.) Èn baka di na apostel Paulus ben taki foe Gado gran prakseri, a ben firi ensrefi verplekti foe bari taki: „O na dipi foe Gado goedoe, nanga koni nanga sabi! Fa den kroetoe foe en de wan dangra sani èn den pasi foe en no de foe feni!” — Rom. 11:33, 34.
10. Fa wan „famiri-lo” ben ferteri wan tra „famiri-lo” foe den makti wroko foe Gado?
10 „Famiri-lo, baka famiri-lo sa prijse joe wroko, èn foe joe makti wroko den sa ferteri” (Ps. 145:4).
Ja, famiri-lo ben kon èn ben go, èn son wan foe den ben ferteri foe Jehovah makti. Ma wi no kan taki toe dati na salfoe fika-pisi de wan „famiri-lo” di ben prijse Jehovah wroko gi wan tra „famiri-lo”, na „bigi ipi” „tra skapoe”, sodati den disi foe den sé kan ferteri tra sma foe den makti wroko foe Jehovah? Foe troe! Foedi wi ben loekoe Gado Wortoe finifini, dan wi ben kon sabi den gran nanga makti wroko disi foe Jehovah, alwasi wi de now foe a jeje „famiri-lo” ofoe foe a grontapoe „famiri-lo”. Fa a de wan grani foe ferteri trawan foe disi! (Loekoe leki wan eksempre foe a taki foe Jehovah makti wroko na fasi fa David e doe disi ini Psalm 68.)
11. Fa wi e sori taki wi e broko wi ede nanga Jehovah wartifasi nanga en wroko?
11 „A glori moifasi foe joe wartifasi èn den afersi foe joe wondroewroko, nanga dati mi wani broko mi ede” (Ps. 145:5).
Foe kan prijse wi Mekiman na a joisti fasi, dan wi moe go denki foe en glori persoon nanga en wondroewroko èn broko wi ede nanga disi (Matt. 12:34). Fa joe e sori taki joe e broko ede nanga dati? Joe e teki joesrefi ten foe kisi nanga jepi foe studi sabi foe sani di Gado ben taki ini en wortoe? Te joe e doe disi, joe e go prakseri dipi foe dati èn joe e meki san a wani taki go dipi ini joe, sodati den e tan wroko tapoe joe? Fa wi kan taki boen foe Jehovah Gado ofoe blesi en efoe wi no abi na overtoigi te ini a moro dipi pisi foe wi sili èn abi troetroe lobi gi Jehovah? Te wi e waarderi na moifasi nanga wartifasi foe Jehovah, dan wi e kisi jepi nanga faja èn nanga wan faste wani èn nanga wan positief jejefasi foe taki foe na bigi Kownoe.
12. Foe san-ede a boen foe denki èn taki foe den sani foe Jehovah di e gi frede?
12 „Èn den sa taki foe na tranga foe den sani foe joe di e gi frede; èn foe taki foe na granfasi foe joe, dati mi wani meki bekenti” (Ps. 145:6).
Ai, wi abi foeroe moro foe ferteri ete. Nanga jepi foe den bladzijde foe den Santa Boekoe dan foeroe sani di e gi frede e kon na krin, di e sori fa Jehovah e sori en makti foe na boen foe en getrow dienstknegti èn foe na ogri foe den sma di e meki densrefi de feanti foe en. Foeroe foe den makti wroko ini na ten di pasa de leki profétis prenki èn de fanowdoe leri foe na disiten libisma-lo. Ja, „ala sani di ben skrifi fositen, ben skrifi foe leri wi, sodati nanga jepi foe wi oridoro èn nanga jepi foe den trowstoe foe den Boekoe wi ben sa abi owpoe” (Rom. 15:4). Foe di wan sma e taki ini publiki foe den sani dati, a de doe wan dienst nanga wan lobi-doe gi trawan. Nanga dati den e kon sabi na sani di Jehovah abi ini prakseri foe na ten di e kon. Den sma di e taki foe dati e njan boen densrefi foe dati, soleki dati ben de nanga a waktiman di Ezechiël 3:17-19 e skrifi foe en. Na „bigi benawtoe” di e kon krosibé sa de wan sori moro fara foe na granfasi di Jehovah e doe en prakseri di a meki bekenti. Meki foe dat’ede wi taki foe en, solanga Jehovah opo na pasi foe dati ini na seti foe sani disi. Wi kan doe disi na a fasi di Jezus Kristus ben meki Gado warskow èn kroetoe-boskopoe bekenti. — Matt. 10:28-30; Luk. 19:41-44.
13, 14. (a) Foe san-ede meki na boenfasi foe Jehovah moe meki bekenti? (b) Sortoe rede wi abi foe bari tranga foe prisiri?
13 „Foe a taki foe a foeroe foe joe boenfasi den sa lon abra pasa marki, èn foe joe regtvaardiki fasi ede, den sa bari tranga nanga prisiri” (Ps. 145:7).
Wi no moe ferteri na grontapoe soso foe Jehovah bigi makti, ma sosrefi toe foe en boenfasi nanga en regtvaardiki fasi. Ini a eri historia Jehovah ben sori boenfasi gi en dienstknegti. Alaten te den ben dini en ini getrowfasi, den ben kisi blesi pasa marki. Te nanga na dé foe tide na boenfasi foe Jehovah ben de bigi toemsi gi den sma di lobi en, sodati den ben de leki wan bigi, watra fonten nanga foeroe watra di alaten lon abra foe wortoe foe waarderi. Den sortoe prijse disi e meki dati foeroe trawan e kon so fara foe ondrofeni na boenfasi foe Jehovah pasa marki. Te joe e taki foeroe tron foe wan sani, dan joe sa ori den ini prakseri. Disi de wan troetroe blesi, bikasi nanga disi wi e kisi jepi foe no lasi wi waarderi noiti gi na fasi di Jehovah e handri nanga en pipel. A de wan toemsi boen sani foe taki ala tron na publiki foe na boenfasi foe Jehovah.
14 Wi no abi now rede foe bari tranga nanga prisiri? Foe di wi komoto foe Adam meki wi alamala de sondari èn wi kisi kroetoe foe dede (Rom. 5:12). Ma akroederi nanga en regtvaardiki fasi èn en geregtigheid, meki Jehovah sori bigi lobi foe di a sorgoe dati a libisma-famiri ben kan komoto foe den moeilijkheid. Disi ben kan nanga jepi foe na loesoe-ofrandi foe Jezus Kristus. Nanga jepi foe en skrifi Wortoe wi kon sabi den regtvaardiki pasi nanga doe foe Jehovah gi en grontapoe pikin. A de wan toemsi prisiri sani foe sabi den sani disi èn a de troetroe wan rede foe bari tranga nanga prisiri foe Jehovah ede. Wi abi boen rede foe waka baka a eksempre foe kownoe David, di ben bari tranga: „Foe mi sé, mi ben foertrow na joe lobi boenfasi; meki mi ati prisiri ini joe ferloesoe. Mi wani singi gi Jehovah, bikasi a ben handri nanga mi na wan fasi di tjari pai kon.” — Ps. 13:5, 6.
15. Sortoe eksempre wi abi foe Jehovah sari-ati, pasensi nanga lobi?
15 „Jehovah abi boen-ati nanga sari-ati, a no e kisi atibron esi èn bigi ini lobi boenfasi. Jehovah de boen gi alasma, èn en sari-ati de tapoe ala en wroko” (Ps. 145:8, 9).
Sensi na fosi bigin foe na libisma historia Jehovah ben sori en wondroe égifasi gi na libisma-famiri te a ben doe en prakseri foe loesoe wantoe sma foe a libisma-famiri (1 Petr. 3:20). David sosrefi toe ben ondrofeni troetroe Jehovah sari-ati èn a ben abi ala rede foe prijse Jehovah. O boen Jezus e memre wi na Jehovah lobi, soleki e kon na krin ini en wortoe ini Johannes 3:16, 17! Waarderi gi disi no moe tjari wi foe taki wawan foe Jehovah, ma moe troesoe wi sosrefi toe foe lobi tra sma. Na apostel Johannes ben taki foe disi na so fasi: „Nanga disi na lobi foe Gado ben kon na krin ini wi, dati Gado ben seni en wan enkri Manpikin go na grontapoe, sodati nanga jepi foe en wi ben sa kisi libi. Na lobi no de ini disi, taki wi ben lobi Gado, ma dati en ben lobi wi èn ben seni en Manpikin kon leki wan zoen-ofrandi foe wi sondoe. Oen lobiwan, efoe Gado ben lobi wi a so fasi, dan wi de verplekti foe lobi makandra sosrefi toe.” — 1 Joh. 4:9-11.
16-18. (a) Foe doe san, wi e kisi tranga, solanga a ten e gi pasi foe doe dati? (b) San Jehovah sari-ati wani taki gi wi? (c) Sortoe firi foe waarderi foe Paulus wi e doe boen foe waka na den baka?
16 Te wi si fa na disiten famiri-lo ben tjari ensrefi nanga Jehovah èn wi e lési o ogri nanga takroe den sma ben de ini den ondro-ondro jari di pasa, dan wi kan taki troetroe, dati Jehovah no e kisi atibron esesi. Fa wi moe de grantangi dati wi kisi pasi foe kon de te nanga na ten disi, pe Jehovah e sori te now ete pasensi! Wan froestan foe san Petrus wortoe ini 2 Petrus 3:9 nanga 15 wani taki moe tjari oenoe so fara foe abi dipi waarderi gi Jehovah bigi sari-ati nanga lobi boen-fasi: „Jehovah abi pasensi nanga oenoe, foedi a no wani taki wan sma go pori, ma wani taki ala sma kon kisi berouw. Boiti dati, loekoe na pasensi foe wi Masra leki ferloesoe.”
17 Wi sabi taki a seti foe sani ondro Satan moesoe go ini pori, èn foe dat-ede meki wi wani taki tranga nanga ala sma foe teki na pasensi foe Gado leki wan ernstig sani èn doe den fanowdoe stap foe kisi loesoe bifo a lati (Zef. 2:3; Openb. 18:4). O kolokoe wi de, taki wi ben teki den stap disi di e tjari loesoe kon! Ma leki bakapikin foe Adam di komoto foe en skin, wi de ondro swakifasi foe a skin èn wi e meki fowtoe, leki David nanga trawan di ben doe disi. Nanga disi ini prakseri Jezus ben leri wi foe begi: „Gi wi pardon foe den fowtoe foe wi soleki wi ben gi pardon na den sma di ben meki fowtoe na wi. Èn no tjari wi go ini tesi, ma poeroe wi foe na ogriwan.” — Matt. 6:12, 13.
18 Na sani di Jehovah ben seti nanga jepi foe Jezus Kristus, ben wani taki gi wi alamala someni. Meki wi tan waarderi Jehovah lobi boenfasi èn sari-ati èn ala sani di a ben doe gi wi èn e doe ete. Na apostel Paulus ben abi so wan waarderi, bikasi a ben taki: „Mi de Kristus Jezus, wi Masra, di ben gi mi krakti, grantangi, bikasi a ben feni mi getrow foe gi mi wan diniwroko. Getrow a wortoe de èn a waarti foe wi teki, taki Kristus ben kon ini grontapoe foe loesoe sondari. Foe den mi de a moro prenspari wan. Tokoe a rede ben de foe san-ede sari-ati ben sori gi mi, taki Kristus Jezus nanga jepi foe mi, leki a moro prenspari geval, ben sa sori ala en langa-pasensi leki wan eksempre gi den di ben sa poti den bribi tapoe en, sodati den kisi tego libi. Na Kownoe foe tego now, di no pori, di no de foe si, na wan enkri Gado, moe abi grani nanga glori tego alaten. Amen” (1 Tim. 1:12, 15-17). A de di wi de grantangi, moe poesoe wi moro ete foe prijse Jehovah, aladi wi e taki alaten foe en kownoewroko.