Lon go na Gado Kownoekondre!
1. San wi kan taki ini Paulus brifi gi den Hebrewsma foe na tori foe eskép?
NA APOSTEL Paulus ini en brifi gi den Hebrewsma ben abi wantoe prenspari sani foe taki foe na tori foe eskép. A de taki foe toe sani: sani di wan sma moe ori èn sani di wan sma moe wai pasi gi den. Foe gi krakti na den sani di a de taki, a de teki alaten pisi foe den Hebrew Boekoe, di den lésiman ini en ten — djoe di ben tron kristensma — ben sabi eri boen.
2. Fa Paulus ben teki gersi Gado Manpikin nanga den èngel, èn disi e meki wi kon tapoe sortoe bosroiti?
2 Ini na fosi kapitel foe Hebreeër Paulus e meki kon boen na fesi dati na positie foe Gado Manpikin de moro é leki di foe èngel. Moro fara na apostel e taki: „Foe dat’ede meki a de fanowdoe dati wi (kristensma) poti moto prakseri leki wi gwenti na den sani di wi ben jere, sodati wi noiti sa drifi gwe. Bika efoe a wortoe di ben taki nanga mofo foe èngel, ben de fasti. . . . fa wi sa eskép dan efoe wi ben afrontoe so wan bigi ferloesoe, di foe na fosi tron ben meki bekenti nanga jepi foe wi Masra (Jezus Kristus) . . .?” — Hebr. 2:1-4.
3. (a) Na owpoe foe ferloesoe nanga jepi foe Kristus Jezus de moro boen leki sortoe tra owpoe, èn na sortoe fasi? (b) San tai nanga na „moro boen owpoe” disi? (c) San de fanowdoe efoe wi abi wan hemel ofoe wan grontapoe howpoe?
3 Na owpoe foe ferloesoe di ben gi nanga jepi foe Jezus Kristus, de moro boen èn moro bigi dan san ben gi na a bergi Sinaï nanga jepi foe na Wet di „ben tjari kon nanga mofo foe èngel” (Gal. 3:19). Na owpoe dati de moro boen, bikasi a abi leki fondamenti wan „moro betre froebontoe . . . di meki fasti na a wet nanga moro betre pramisi,” wan moro betre ofrandi (di ben tjari „wantron èn foe alaten”, sodati a de gi wan „moro betre owpoe”) èn wan moro boen priesterwroko, di e akroederi nanga di foe Melchizedek (Hebr. 7:15-25; 8:6; 9:23-28). A moro betre owpoe disi e go makandra nanga wan moro bigi frantwortoe. A de foe dat’ede fanowdoe dati wi poti boen prakseri èn loekoe boen dati ini no wan fasi wi lobi drai-drai, „sodati noiti wi drifi gwe”. Èn aladi dja e sori na wan ferloesoe foe kisi libi ini hemel, tog densrefi frantwortoe de tapoe den sma di abi na owpoe foe kisi libi na grontapoe ondro Gado kownoekondre.
4. San a wani taki foe drifi gwe, èn fa disi ben sa abi foe doe nanga kristen sma?
4 A de aksi foeroe moeiti foe kon so fara dati wan sma drifi gwe? Nono, dati e go foe ensrefi. Efoe wi de tapoe wan liba, kande ini wan boto, ofoe wi e swen ini a watra, dan a watra e tjari wi kewoon gwe. A srefi de so toe ini na troetroe libi. Efoe wi leki kristen, e bigin foe drifi gwe, dan wi e go nanga sortoe krakti toe di de tapoe wi pasi, efoe a de foe dorosé ofoe a de leki wan bakapisi foe inisé firi di wi kisi abra. Na waarderi foe wi gi jeje sani e bigin go na baka. Foedi disi kan go safri safri, meki wi moe loekoe boen. Noso wi no ben sa „ori stéfi moro na troetroe libi” èn wi ben sa de ini gevaar foe lasi a libi krinkrin (1 Tim. 6:19). Soleki fa Paulus ben tjari kon na krin, dan fa wi ben sa lon komoto te foe kaba foe den ogri bakapisi efoe na mi-no-ke fasi disi no kenki?
5. Tapoe sortoe kefalek toestand foe na ati den tra wortoe foe Paulus gi den Hebrew kristen e sori wi?
5 Nanga den tra wortoe di na apostel e taki moro fara gi den Hebrew kristen, wi e kisi foe si ete wan kefalek fasi. A skrifi: „Loekoe boen, brada, dati ini nowan foe oenoe oiti wan takroe ati gro di no e bribi, foedi a de ari ensrefi poeroe foe na libi Gado, ma tan warskow makandra ibri dé, solanga wi kan taki „tide”, sodati nowan sma foe oenoe ati kon tranga nanga na bidrigi krakti foe sondoe.” — Hebr. 3:12, 13.
6. (a) San a wani taki foe „ari joesrefi poeroe foe wan sma”? (b) Leki wan bakapisi foe san wan sma ben sa „ari ensrefi poeroe foe na libi Gado”, èn fa wi kan wai komoto foe dati?
6 Foe meki wan bigin foe drifi gwe, e go foe ensrefi; ma te wi bigin foe „ari wisrefi foe wan sma”, dan disi wani taki, dati ini disi wi e doe definitief stap. Wansi wi ben sa de ete ini na demakandra foe wan sma foe proeberi ete foe tan abi en boen-ati, dan tog wi kan bigin foe drifi baka ofoe foe bigin foe ari wisrefi poeroe foe en, foedi wi e waka go na baka. Leki wan bakapisi foe san, meki wan sma ben sa „ari ensrefi poeroe foe na libi Gado”? Na piki de: Leki wan mankeri foe bribi. Soleki na eri tori e sori, dan Paulus no e taki foe wan swaki bribi leki wan bakapisi foe sabi di no nofo ofoe a no abi foe wan joisti froestan foe sani. A de teki skrifi na warskow moro foeroe: „No tranga oen ati”. Den Israëlsma na skinfasi ben doe dati ini na sabana, aladi den ben „si” Jehovah wroko drape „fotenti jari langa” èn den ben njan boen alaten foe den wondroe seti nanga kibri foe en (Hebr. 3:7-11). Foe dat’ede meki ini disi ten ala troe kristen moe jepi èn gi makandra tranga alaten sodati den sa wai komoto foe no waka go na baka, foedi den „ati ben kon tranga nanga na bidrigi krakti foe sondoe”. Wi moe warskow makandra foe ori wi bribi na libi. Fa? Nanga wroko foe bribi. Ori ini prakseri dati Abraham ondro wan ebi tesi ben handri èn gi jesi ini bribi èn a so fasi „ben nen ’Jehovah mati’”. Wi, leki kotoigi foe Jehovah ini disi ten, ben sa kan tan oridoro „Efoe na foertrow di wi ben abi ini a bigin, wi ori stéfi”. — Hebr. 3:13, 14; Jak. 2:21-26.
7. Fa Paulus e sori na a kaba foe en brifi gi den Hebrewsma, dati na frantwortoe di de tapoe kristen, de moro bigi leki di ben de na den Israëlsma a skinfasi?
7 Na a bigin foe en brifi gi den Hebrewsma, Paulus e kebroiki densrefi bewijsi leki ini Hebr. 2:1-4. A de sori tapoe den moro bigi frantwortoe di de tapoe kristen, te joe teki disi gersi nanga den frantwortoe foe den Israëlsma ini owroeten na skinfasi. A de kebroiki wan moro krakti groepoe foe wortoe: „Bika efoe den no ben eskép, di ben aksi pardon na en di ben gi wan warskow foe Gado na grontapoe, dan moro pikinso ete wi (sa eskép) efoe wi drai baka gi en di e taki komoto foe hemel”. — Hebr. 12:25.
8, 9. (a) San de ini a tori te wi drai baka gi wan sma, èn sortoe bakapisi disi kan tjari kon ini jeje afersi? (b) Fa èn foe san-ede wi moe teki den warskow disi na ati? (c) San sa psa efoe wi teki tranga-leri foe Gado?
8 Drai baka gi wan sma, wani taki, baka te joe prakseri boen, joe e drai joe baka gi en èn disi e sori foeroetron tapoe a trowe foe a sma. Disi ben de na fasi èn na waka nanga libi foe den Israëlsma na skinfasi leki wan naatsi, te leki na ten foe Maleachi, di Jehovah ben taigi den: „Sensi den ten foe oen fositenpapa oen ben drifi komoto foe den wet foe mi èn oen no ben ori den” (Mal. 3:7). Èn san a sa tjari gi wan jeje Israëlsma leki wan salfoe kristen te a waka baka den ogri fasi disi? Wan bigi gevaar de di a de go de wan foe den sma di Paulus skrifi foe den: „A no kan moro foe meki den sma kisi berouw, di foe wan èn foe alaten ben si na leti . . . ma di ben fadon komoto” (Hebr. 6:4-6). A no de foe taki, soso Jehovah Gado nanga Jezus Kristus kan taki efoe wan sma doro na marki dati a no kan moro foe tjari en kon kisi berouw.
9 Wi moe teki den warskow disi na ati. Mankeri foe bribi kan bigin kon te wi gi pasi dati wi no e bada nanga jeje sani èn wi e sori wan mi-no-ke-fasi. Pikinmoro sondro wi e si wi e drifi gwe. Wan fowtoe stap ofoe fasi e tjari makriki go na wan trawan, te leki wi go toemsi fara èn si dati wi wai go so fara dati kon-boen-baka no man moro. Bifo disi pasa, dan Jehovah sa poti wi ondro wan sortoe tranga-leri, di Paulus e taki foe en ini a srefi brifi disi èn efoe wi kebroiki wi froestan, sa teki na srefi rai dati. Paulus skrifi gi den Hebrew kristen dati: „Oen ben frigiti kwetkweti na warskow di ben kon na oenoe leki manpikin: ’Mi manpikin, no loekoe na tranga-leri di e kon foe Jehovah no leki wan soso sani èn no fadon te a de poti joe a pasi; bika na sma di Jehovah lobi, a de gi en tranga leri, ja, a de krawasi ibri wan di a de teki leki en manpikin.’ . . . Nowan enkri tranga-leri kande gersi na a momenti srefi leki a de wan prisiri sani, ma wan sari sani; tog a de tjari bakaten gi den sma di oefen nanga dati wan vrédefasi froktoe kon, namkoe regtvaardiki fasi.” — Hebr. 12:6-11
10. Foe san-ede wi no moe si wi jeje brada ofoe wisrefi noiti negatief ofoe pessimistisch?
10 Ini san taki na fesi, wi no moe prakseri dati Paulus ben si en jeje brada negatief ofoe pessimistisch. Srefi baka di na apostel ben taigi den Hebrew kristen dati den „ben kon lesi foe jere sani” èn „den ben abi merki fanowdoe, èn no tranga njanjan” — èn baka di a ben gi wan warskow foe den sma di e fadon èn kan tjari kon kisi berouw baka — a taki: „Wansi wi e taki sosrefi toe so, lobiwan, tog wi abi na overtoigi ini a tori foe oenoe foe moro betre sani èn sani di e go makandra nanga ferloesoe.” Paulus e gi moro fara na toemsi boen dekati foe „waka baka den di e kisi den pramisi nanga jepi foe bribi nanga pasensi”. — Hebr. 5:11, 12; 6:4-6, 9-12.
ESKÉP FOE BABYLON
11. Ini sortoe profétitori Gado jeje ben gi Daniël tranga foe taki a fesi foe eskép gi Gado pipel?
11 Wan fondament sani na ibri eskép de, dati wan sma moe lon komoto foe wan ogri presi ofoe situwasi èn moe doe disi nanga wan firi dati a de tranga fanowdoe. A de fanowdoe now foe handri na so wan fasi? Ja foe troe. Na proféti Daniël ben kisi tranga nanga Gado jeje foe skrifi den wortoe di ben abi foe doe wantronwantron nanga na moeiliki situwasi, di kristen de now na ini. A skrifi namkoe: „Ini na pisiten dati Michaël sa opo tanapoe, na bigi granman, di e opo doe wan sani foe na boen foe den manpikin foe joe pipel. Èn troetroe wan ten foe benawtoe sa kon di soleki no ben kon sensi wan naatsi ben opo tanapoe te leki na ten dati. Èn ini na ten dati na pipel foe joe sa eskép, ibri sma di den feni en nen skrifi ini na boekoe” (Dan. 12:1). Ja, na pipel foe Daniël — foe troe Gado pipel — ben sa feni eskép. Fa disi de wan wondroe djaranti!
12. Oten Jezus ben poti prakseri tapoe na profétitori foe Daniël? (b) Oten èn foe na boen foe soema Michaël ben opo tanapoe èn a ben sori en makti?
12 Aladi Jezus ben sori tapoe na bigi èn moro prenspari kon-troe ini wi ten — a ten foe a kaba” — foe en bigi profétitori di skrifi ini Matteus 24, a ben poti prakseri tapoe den wortoe dati. A taki: „Dan so wan bigi benawtoe sa de leki sensi na bigin foe grontapoe te leki now no ben kon èn sosrefi no sa kon moro ete” (Dan. 12:4; Matt. 24:21). Sensi 1914 Jezus de na hemel granman, Michaël, di opo tanapoe èn di ben sori en makti foe a boen foe Gado pipel ini disi ten. Èn soema na den? No Israëlsma na skinfasi, ma na fikapisi foe den jeje Israëlsma, di „na besnij foe den de foe na ati, nanga jepi foe jeje, èn no nanga jepi foe wan skrifi papira”. — Rom. 2:29.
13. Sensi oten na fikapisi foe jeje Israëlsma ben kisi na warskow foe eskép foe Babylon na Bigiwan, èn ini sortoe fasi den ben de bifo na ten dati?
13 Spesroetoe sensi 1919 G.T. na getrow fikapisi disi di ben kon krin ben poti prakseri tapoe na kari: „Lon dan komoto foe na kondre foe na nordsé . . . É drape, Sion! Eskép oenoe di e libi na a oemapikin foe Babylon” (Zach. 2:6, 7; Jer. 51:45). Bifo na datum dati èn ini na ten foe na Fosi Grontapoefeti na fikapisi disi ben de ini katibo foe Babylon na Bigiwan, a grontapoe-kondre foe falsi religie.
14. (a) Soema de den sma „di nen ben feni skrifi ini na boekoe”? (b) Trawan e eskép toe foe na pori, èn efoe ja, soema den de dan?
14 Soleki den ben taigi Daniël, dan ibri sma foe na fikapisi disi, „nen ben feni skrifi ini na boekoe”. Den de wan pisi foe „na gemeente foe den fosi gebore-wan, di nen skrifi ini hemel” (Hebr. 12:23; loekoe sosrefi toe Maleachi 3:16). Boiti den sma disi di e eskép na pori foe den ogri-sma, joe abi sosrefi toe wan „bigi ipi” di no de foe na jeje Israël, di te joe teki den gersi nanga jeje Israël de „dorosésma”. Tog den toe „lobi na nen foe Jehovah” èn den tron loyaal dienstknegti foe en. Nanga sortoe froewakti? Jehovah e taki foe disi: „Den toe wi wani tjari go na mi santa bergi èn sreka prisiri gi den ini mi oso foe begi.” Den memre disi foe na „bigi ipi” e doe santa dienst gi Gado ini en tempel. Den e pasa libilibi na bigi benawtoe” èn „den e tjari go na fonten foe watra foe libi”. — Jes. 56:6, 7; Openb. 7:9-17.
15. Sortoe laatste warskow e gi foe lon komoto foe Babylon na Bigiwan?
15 Foe poti krakti tapoe den profétitori na fesi, dan wi e go now na a laatste profétis boekoe foe na bijbel, di skrifi gi na pipel foe Gado ini disi ten. A de gi wan laatste warskow foe Babylon na Bigiwan, na falsi religie dati, nanga den wortoe: „Komoto foe en, mi pipel, efoe joe no wani teki prati ini den sondoe foe en, èn efoe den no wani kisi afoe foe den tanteri foe en. Bikasi den sondoe foe den ben é go te na hemel, èn Gado ben memre en ongeregtigheid. . . . Wan dé den tanteri foe en sa kon . . . èn a sa bron krinkrin nanga faja, bikasi Jehovah Gado, di ben kroetoe en, de tranga.” — Openb. 18:4-8.
16. (a) Foe san-ede meki wi kan taki dati ten de ete foe eskép a pori foe Babylon a Bigiwan? (b) Fa den kan teri joe na den sma mindri di Gado e kari „mi pipel”?
16 Ten de alaten ete foe eskép! Na warskow foe lon gwe e bari krakti nanga krin. A de wan tranga fanowdoe boskopoe di Jehovah Kotoigi e meki bekenti. A tron disi a no soso wan oso de e bron. Ma moro foeroe wan eri „foto” sa go bron. Te na faja dati bigin leti, dan a sa de lati foe lon komoto. Den sma di de ini den ati Babylonsma, sa tan wégri foe teki na warskow na ati. Ma trawan abi te now ete na okasi foe sori dati den wani dini Jehovah Gado nanga den eri ati èn den wani poti densrefi loyaal na a sé foe en kownoekondre ondro Kristus Jezus. Soboen, den abi te now ete na ten foe sori dati a ben sa fiti foe teri den na mindri den sma di Gado e kari „mi pipel”. Den e kisi na kari foe tron „tra skapoe”, di de wan pisi foe „a wan ipi ondro wan herder” (Joh. 10:16). Kolokoe dati den kan teri joe toe leki wan sma foe Gado pipel, nanga jepi foe joe dienst na Gado nanga joe eri ati èn foedi joe sori dati joe de loyaal na en kownoekondre.
LON GO NA GADO FOTO — SION
17. Sortoe sani Jehovah seti gi den sma di e eskép?
17 Soleki kon kaba na krin, dan a no e go wawan foe eskép foe wan presi ofoe situwasi, pe wan sma de ini gevaar. A de go toe foe feni wan presi foe sekerfasi èn foe kisi jepi nanga dati foe doro dati. „Na sma di e sorgoe foe eskép” ben sorgoe foe dati? A ben warskow en pipel foe lon komoto foe a „foto” di de leti na pasi foe kisi pori nanga faja, èn meki den drai lontoe nomo ini wan sabana moro fara? Loekoe sortoe piki e gi ini en Wortoe: „A moe pasa dati ibri sma di e kari na nen foe Jehovah, sa lon komoto boen; bikasi tapoe na bergi Sion nanga ini Jeruzalem den sma di eskép sa de, joisti leki fa Jehovah ben taki, èn a mindri den sma di tan a libi, di Jehovah e kari.” — Joël 2:32.
18. Fa na owroe mamafoto foe Israël abi wan disiten model?
18 Soboen, na bijbel e taki foe toe foto — na wan di wi moe lon komoto foe en èn na trawan, pe wi nanga foeroe tra sma kan feni kibri. Na owroe mamafoto foe Israël, di foeroetron nen Sion ofoe Jeruzalem, de wan agersi fasi foe a „hemel Jeruzalem”, Gado hemel kownoekondre, di na fikapisi foe na „getrow nanga koni srafoe” di Jezus ben taki foe den ini Matteus 24:45-47 e teki presi foe en na grontapoe (Hebr. 12:22). Jehovah ben gi foeroe foe en getrow dienstknegti tranga nanga en jeje foe taki wortoe, di ala sma di e lon go na a kownoekondre, e kisi tranga èn kan tjari densrefi nanga dati.
19, 20. Sortoe tiri nanga dekati ben gi nanga jepi foe (a) ini Jesaja 2:2-4 èn (b) ini Jesaja 26:1-4?
19 Jesaja ben de wan foe den getrow dienstknegti disi, èn a ben taki a fesi foe wan toemsi prisiri ten, nanga den wortoe: „Foeroe volkoe sa go troetroe èn taki: ’Kon, èn meki wi go na a bergi foe Jehovah . . . èn en sa leri wi foe en pasi, èn séker wi sa waka den pasi foe en.’ Bikasi foe Sion na wet sa komoto, èn a wortoe foe Jehovah foe Jeruzalem.” Ondro na wet nanga na wortoe dati den ben sa leri foe libi nanga makandra ini vréde èn den no sa „leri feti moro”. — Jes. 2:2-4; loekoe sosrefi toe Zefanja 2:3.
20 Bakaten ini en profétitori Jesaja ben kisi Gado jeje foe gi moro fini tori foe na fasi fa disi ben sa pasa: „Na a dé dati a singi disi sa singi ini na kondre Juda: ’Wi abi wan tranga foto. Ferloesoe a de poti leki skotoe èn fesi-skotoe. Opo den portoe, sodati den regtvaardiki naatsi, di e ori wan getrow waka nanga libi, kan waka go na ini. Na firi di abi wan boen fondamenti, joe sa kibri ini vréde alaten, bikasi wan sma e kisi tranga foe poti foertrow tapoe joe. Foetrow na Jehovah alaten, bikasi ini Jah Jehovah de na Stonbergi foe ten di no abi marki.’” — Jes. 26:1-4.
21. Fa Jesaja 61:4-11 e skrifi foe wan jeje paradijs di e kari joe foe kon?
21 Na a kaba foe Jesaja profétitori èn aladi a ben bradi en loekoe foe si na eri kondre di ben de foe Sion, dan a de skrifi ini moi wortoe foe na kon-boen jeje paradijs, pe ala den sma di eskép feni prisiri wroko foe „bow baka den boen owroe presi di ben pori”. No wawan a ben de so dati den jeje Israëlsma ben sa teki fesi ini disi, ma a de taki dati „fremde sma . . . sa tanapoe troetroe èn loekoe joe ipi meti, èn den dorosé-sma sa de joe gronman nanga joe froktoe-djari-man”. Den sortoe profétitori disi e ferteri nanga tranga sten dati den sma di eskép no sa kisi ferloesoe tapoe a laatste momenti, ma dati wan fri dorodoro sa kon. Foe dat’ede meki wi kan moksi wisrefi nanga prisiri na a fikapisi foe Jehovah getrow, salfoe „srafoe” èn makandra nanga den e taki den wortoe disi foe prijse: „Sondro mankeri mi sa prisiri pasa marki ini Jehovah. Mi sili sa prisiri ini mi Gado. — Jes. 61:4-11.
22. (a) Sortoe sani foe eskép ben seti tapoe wan persoonlek kontren? (b) San wi moe doe foe kisi winimarki foe disi?
22 Aladi joe sa agri nanga wi dati san wi loekoe te now de troe foe na pipel foe Gado leki wán man, tog joe sa aksi joe srefi kande fa a abi krakti tapoe joesrefi? Joe abi fanowdoe foe eskèp foe wan ofoe moro égi problema? Soema no abi den? Na owroe odo de troe dati a libi, te joe taki en na libisma fasi, de wan soso sjatoe waka foe na bébi-bedi go na grebi. Eskép no de foe katibo foe sondoe nanga na dede? A de wan moi sani dati bijbel kari a dede nanga a sondoe kownoe, di ala toe moe wini (Rom. 5:14; 6:12). Di na apostel Paulus ben skrifi gi kompe kristen, a ben tjari kon na krin fa na pasi foe eskép e opo. Disi ben pasa „tapoe na gron foe na ferloesoe nanga jepi foe na loesoe-prijs di Kristus Jezus ben pai”. Bikasi Gado ben poti en leki zoen-ofrandi nanga jepi foe bribi ini en broedoe” (Rom. 3:24, 25). Ja, nanga na sori foe bribi ini a zoen-ofrandi dati, wi kan kon ini Gado boen-ati. A de troe dati wi de te now ete onvolmaakti èn aladé wi e aksi foe pardon foe wi sondoe. Ma wi no abi fanowdoe èn no moesoe gi pasi a wi sondoe firi ini wi libi. Paulus skrifi: „No meki sondoe tiri leki kownoe ini oen skin di o dede. . . . Bikasi na sondoe no mag tan basi a joe tapoe.” Foe jepi wi ini disi, meki Gado sorgoe foe en Wortoe, en getrow dienstknegti èn en santa jeje. — Rom. 6:12-14; 8:11; Jak. 5:14, 15.
23. Sortoe froewakti di de na wi fesi èn ondro na kownoewroko foe soema?
23 Meki wi prakseri na a moi froewakti na wi fesi te „den tranga ten disi di moeiliki foe pasa” de na wi baka èn Satan „seti foe sani” figi gwe krinkrin! (2 Tim. 3:1; 2 Kor. 4:4). Na sondoe nanga na dede no sa tiri moro langa leki kownoe. Na presi foe dati wan eskép dorodoro sa kon èn a libisma-famiri sa prisiri ensrefi krinkrin ini fri di e tan. Te Kristus mede-erfgenaam kisi den hemel paiman, dan „na mekisani srefi toe (na libisma-famiri) sa meki fri foe na katibo foe pori èn abi na glori fri foe den pikin foe Gado”. Kristus Jezus „moesoe foe tiri leki kownoe te ala Gado feanti poti ondro en foetoe. Leki laatste feanti dede e poeroe na pasi”. Fa wan prisiri de a wi fesi gi ala loyaalsma di eskép — gi den sma di e lon go na Gado kownoekondre! Ala prijse nanga tangi moe de foe Jehovah. „Na Sma di na wan bigi fasi e gi eskép”. — Rom. 8:19-21; 1 Kor. 15:25, 26.