Fa wi sa lon komoto?
„Tan nanga ai, begi alaten dati oenoe sa man foe lon komoto foe ala den sani disi di sa go pasa troetroe, èn tanapoe na fesi foe na Manpikin foe libisma.” — Lukas 21:36.
1. Foe sanede meki na kari foe lon-komoto de alaten wan kefalek sani èn fa wi kan gersi disi?
LON KOMOTO! Dati de alaten wan kefalek wortoe. Wi e gebroiki en soso te wan troetroe gevaar de èn esesi wan sani moe doe. A so a ben sa kan pasa, dati baka di wi ben go na wan kristen konmakandra ini wan koninkrijkszaal foe Jehovah Kotoigi ini na presi pe wi e libi, wi ben moe lon gwe foe na wan ofoe tra rede. Ma ini disi wi no ben sa taki dati wi no ben sa soekoe foe lon komoto, efoe wi no ben sa si wantron wantron smoko opo kon na tapoesé. Ofoe loekoe pikinso wan tra eksempre: Wi e si wan oso nanga foeroe sodro e bron èn wi e lon go na a presi foe na rampoe. Drape, tapoe wan foe den moro é sodro, wi e si a fesi wan opo fensre wan oema tanapoe ini dede-skreki nanga wan pikin ini en anoe! A de toemsi é foe kan djompo èn a ben sa de a teki foe wan tjans foe meki na pikin fadon. Sortoe owpoe de? A de so dati, ofoe brandweerman moe kren go miti den nanga wan trapoe, ofoe den moe meki gebroiki foe na brandtrapoe.
2. Sortoe sani de ini lon-komoto?
2 Efoe joe loekoe en boen, dan alaten wan toe fasi de na wan eskép-tori. Den prenspari sani disi e kon na fesi: (1) Wan presi ofoe wan kefalek situwasi pe wi moe lon komoto foe en nanga a firi dati a de tranga fanowdoe, (2) Na fanowdoe foe wan presi foe lon go kibri, èn foe sekerfasi èn (3) na fanowdoe foe poti prakseri tapoe den rai foe wan sma di e si na moeiliki situwasi pe wi de na ini, di kan gi wan veilig presi èn di wani jepi wi foe kon drape. So wan sma de toemsi prenspari.
„A SMA DI E SORGOE FOE MI ESKÉP”
3. (a) Na tapoesé-skrifi foe Psalm 18 kan memre wi na san? (b) Sortoe sani e kisi krakti ini Psalm 18:1-6?
3 Jehovah Gado de na Sma di no abi en speri ini na sorgoe foe lon komoto. De so boen foe opo loekoe Psalm 18 èn loekoe dati na tapoesé-skrifi e ferteri dati David ben meki a psalm disi „Na a dé di Jehovah ben fri en foe na mindri-anoe foe ala en feanti èn foe na anoe foe Saul”. Soso na kari foe na nen foe na fosi kownoe foe Israël, Saul, kan memre wi boen fa David ben moe abi na firi dati a ben tanapoe ai ini ai nanga na dede. We, dri tron na kownoe ben proeberi foe soetoe David fasi na a skowtoe nanga en lansri! (1 Sam. 18:11; 19:10). Baka dati, someni jari baka makandra a ben onti David èn lon na en baka sondro foe abi sari-ati (1 Sam. 26:20). Nanga disi ini prakseri wi kan froestan eri boen den dipi firi di David ben taki den biginwortoe foe Psalm 18, pe wi e lési: „Mi sa abi lobi gi joe, o Jehovah, mi tranga. Jehovah de mi let’opoe stonbergi nanga mi fortresi èn na Sma di e sorgoe foe mi eskép, Mi Gado de mi stonbergi. Na en mi sa lon go, mi skild nanga mi toetoe foe ferloesoe, mi boen é presi. Na Sma di moe kisi prijse, Jehovah, mi sa kari, èn mi sa kisi ferloesoe foe mi feanti. Den tité foe dede ben lontoe mi; sosrefi toe den froedoe foe boen-foe-noti man ben tan skreki mi . . . Ini mi nowtoe mi ben tan kari Jehovah, èn na mi Gado mi tan bari foe jepi mi, èn mi ègi jepi-babari na en fesi ben kon now ini en jesi.” — Vers 1-6.
4. Sortoe bigi nen Jehovah e kisi, èn fa Psalm 18 e sori dati a joisti?
4 Fa wan bigi nen di e gi trowstoe ben gi a Jehovah nanga dati — „Na Sma di e sorgoe foe mi eskép”. Èn Jehovah ben bewijsi dati a de disi troetroe? Ja, bikasi baka di David ben skrifi foe den makti wroko foe Jehovah, a ben go moro fara foe taki: „A ben ferloesoe mi foe mi tranga feanti, èn foe den sma di no wani si mi na ai; foedi den de moro tranga leki mi. Den tan poti densrefi kontra mi tapoe na dé foe ongolokoe, ma Jehovah ben de mi jepi. Èn a ben tjari mi baka-dati go na wan bigi presi; a ferloesoe mi, foedi a ben feni prisiri ini mi.” — Ps. 18:17-19.
5, 6. (a) Fa Jehovah pipel e kisi jepi ini Psalm 37 foe foertrow ini en leki „Na Sma di e sorgoe foe eskép”? (b) Fa Psalm 70 e tjari krin wan firi dati sani de tranga fanowdoe?
5 Ini den Psalm, David ben teki foeroetron na thema disi ini den. Ini fo foe den Psalm, a de kari Jehovah „Na Sma di e sorgoe foe eskép” (Ps. 18:2; 40:17; 70:5; 144:2). Te wi leki Jehovah Kotoigi e taki nanga tra sma foe den toemsi moi égifasi foe Jehovah nanga en prakseri, dan foeroetron wi e sori tapoe pisi foe Psalm 37. Ma loekoe pikinso a toemsi bigi bosroiti foe na Psalm disi: „Na ferloesoe foe den regtvaardiki sma komoto foe Jehovah; en de den fortresi ini ten foe nowtoe. Èn Jehovah sa jepi den èn sorgoe foe den e eskép. A sa meki den eskép foe den ogri sma èn loesoe den, foedi den ben soekoe kibri na en” (vers 39, 40). Fa den wortoe disi moe de wan krakti dekati gi Jehovah pipel foe foertrow ini en!
6 Psalm 70 e tjari a wan libi fasi a firi dati sani de tranga fanowdoe. Di David ben de ini wan djam, a ben begi tranga: „Kon esi tog, o Gado, foe loesoe mi, o Jehovah, leki mi jepi. . . . Mi de mofina èn pôti. O Gado, handri tog esesi gi mi. Joe de mi jepi nanga na Sma di e sorgoe foe mi eskép.” — Ps. 70:1, 5.
7. Nanga sortoe fasi wi kan begi a Jehovah na wan fasi di fiti te wi abi jepi tranga fanowdoe?
7 Joe ben firi joesrefi wanten so? A de wan sani di e gi wi trowstoe èn di e tranga wi bribi foe sabi dati wi, leki dienstknegti foe Jehovah, kan abi na foertrow „dati a sa handri esesi gi wi”. A sabi san wi abi fanowdoe èn a sabi foe sorgoe foe disi. Wi lobifasi hemel Tata de troetroe „na Sma di e sorgoe foe eskép”, èn joisti te wi abi dati fanowdoe. Sontron wi e froestan, leki David, dati den égi fowtoe foe wi ben tjari wi kon ini wan djam. Ma soleki David, sosrefi toe wi kan go na Jehovah ini opregtifasi, èn kande nanga wan „broko geest”, ini na foertrow dati a sa jere wi begi. Leki David wi kan begi: „Poti srefi ini mi wan soifri ati, o Gado, èn poti ini mi wan njoen èn fasti geest.” — Ps. 51:10, 17.
8. Sortoe prati Jezus Kristus abi na ini, dati wi kisi „jepi na a joisti ten”?
8 Ete wan sani di wi moe ori a prakseri, de, dati wi Gado ben gi wan Épriester, di „kan abi sari-ati nanga wi swakifasi” èn di nanga jepi foe en „wi kan go na a troon foe no-ferdini-boenfasi, sodati wi kan kisi sari-ati èn wi kan feni no-ferdini-boen-ati na a joisti ten”. Wi kan de troetroe grantangi foe na Épriester di e firi gi wi, Jezus Kristus, di kan fri wi, ondro na tiri foe na Tata ofoe di kan sori na pasi foe komoto foe jeje katibo. — Hebr. 2:15; 4:15, 16.
9. (a) Soso na sortoe okasi Jezus ben taki foe eskép? (b) Sortoe toe sani de prenspari te wi e soekoe eskép?
9 Akroederi nanga den evangelie-tori, dan soso wán tron Jezus Kristus, na Moro Bigi David ben taki foe „eskép”. Di a ben taki foe na „bosroiti foe na seti foe sani”, a ben gi en discipel tranga: „Tan nanga ai, begi alaten dati oenoe sa man foe lon komoto (eskép) foe ala den sani disi di sa go pasa troetroe, èn tanapoe na fesi foe na Manpikin foe libisma.” (Luk. 21:36; Matt. 24:31). Ma bifo wi go loekoe finifini na tekst disi, wi sa go loekoe wantoe moi eskép-tori di skrifi ini den Hebrew Boekoe èn poti na a srefi ten prakseri na wan foe den prenspari leri di wi moe leri èn di wi moe tja kon tapoe wisrefi. Efoe wi de ini gevaar, dan sondro poeroe wan sani, dan bepaalde prenspari stap moe doe èn bepaalde sani moe poti a wan sé foe feni troetroe eskép. Wi sa si disi te wi e loekoe historia sani di psa.
ESKÉP FOE NA SONDOE-FROEDOE
10, 11. Foe san eskép ben anga ini a tori foe Noach nanga en osofamiri, ma oten eskép kan de wan sani di man?
10 A fosi tori di wi sa loekoe, de troetroe kefalek moi, bikasi a abi foe doe nanga wan pori foe ogrisma na a eri grontapoe. Ma wán sma ben sa kan feni eskép? Ori na ini prakseri dati na a ten dati Jehovah ben taigi Noach: „Foe mi sé, loekoe, mi e tjari na bigi froedoe foe watra kon tapoe na grontapoe foe pori ala skin pe wan libi-krakti de na ini, foe ondro na hemel. Ala sani di de na grontapoe, sa bro na laatste bro” (Gen. 6:17). Ma Jehovah ben gi Noach kaba finifini den komando foe na bow foe wan ark. Baka di Gado ben gi warskow foe wan grontapoe froedoe, dan a ben gi Noach rai san en nanga en famiri moe doe, sodati den, makandra nanga bepaalde tra libi sani, ben kan tan ini libi èn ben kan eskép foe na froedoe no ben swari den go ini pori.
11 Foe san eskép ben anga? Disi e kon na krin ini den wortoe: „Ne Noach ben doe ala sani di Gado ben komanderi en. Joisti so a ben doe” (Gen. 6:22). Gi den sortoe sma disi eskép no ben de, foedi den no ben erken na kefalek situwasi èn no ben poti prakseri na den rai foe ben kan eskép di „Na Sma di e sorgoe foe eskép” ben gi nanga jepi foe Noach.
12. Leki fa 1 Petrus 3:20 taki, dan fa den „aiti sili” ini Noach ten ben feni eskép?
12 Ini na tori disi dan ete wan punt de wan spesroetoe wan. Fa den „aiti sili” dati ben feni eskép? Loekoe boen sortoe piki na apostel Petrus e gi. Den ben „tjari eri boen pasa na watra” (1 Petr. 3:20). Den ben de leti mindri na situwasi èn den no kisi loesoe foe en foedi den ben teki poeroe foe na grontapoe foe meki foe eksempre wan reis go na moenkenki. Soleki wi sa si, dan so wan srefi sani kan pasa nanga sma di e dini Jehovah ini disi ten.
NA ESKÉP FOE LOT FOE SODOM
13. Fa a doe kon taki Lot go libi ini Sodom?
13 Meki wi go loekoe moro fara na eskép foe Lot foe Sodom. Loekoe baka san ben psa. Foedi nofo grasi-gron no ben de gi ala meti foe Abraham nanga Lot, meki Abraham ben gi Lot na okasi foe bosroiti sortoe sé a ben wani go. „Ne Lot ben teki na eri Jordaandistrict foe ensrefi, èn Lot ben poeroe en kampoe go poti na Oostoesé. Te foe kaba a ben poti en tenti krosibé foe Sodom. Èn den man foe Sodom ben takroe èn den ben de bigi sondari na Jehovah.” Lot séker ben moe sabi na takroe nen foe den sma di ben libi ini Sodom. Ma na district dati ben boen foe kon moro goedoe, bikasi a „eri kontren ben abi foeroe watra . . . ben de leki na djari foe Jehovah”. — Gen. 13:5-13.
14. Sortoe tranga fanowdoe warskow ben gi èn fa (a) Lot pikinman? (b) Lot srefi na 2 okasi? (c) Lot wefi? ben teki en?
14 Baka wan pisi ten, dan toe èngel, di ben teki libisma skin leki mansma, kon na Sodom foe ferteri Lot foe na bosroiti foe Jehovah „foe pori na foto”. Wantronwantron Lot ben warskow den pikinman foe en. Ma den ben erken na kefalek situwasi èn na fanowdoe foe lon gwe esi, wan foe den moro prenspari sani na ibri eskép di waka boen? Nono, „ma ini den ai foe en pikinman (Lot), ben gersi wan sma di e meki spotoe” (Gen. 19:12-14). Di débroko „den èngel ben gi Lot faja” foe handri wantronwantron. Fa a ben doe nanga na rai disi? „A tan draidrai”. „Tapoe na gron foe Jehovah sari-ati gi en” meki den èngel tjari esesi Lot, en wefi nanga en toe oemapikin go dorosé foe na foto. Moro fara den ben kisi dekati nanga den wortoe: „Eskép foe joe sili ede! No loekoe na joe baka. . . . Eskép go na a bergi-kondre, sodati joe no figi poeroe!” Fa Lot doe now agen? „Ne Lot taki gi den: ’Nono, grantangi Jehovah! . . . Loekoe tog, na foto disi de krosibé foe lon go drape èn a pikin. Grantangi, meki mi lon go janasé — a no de wan pikin foto nomo? — èn mi sili sa tan na libi.’” Tapoe na gron foe Jehovah sari-ati-fasi meki a ben arki na begi foe Lot èn a eskép go na a foto Zoar. Ma fa a ben go nanga Lot wefi? Foe espresi a ben poti komando na wan sé. „En oema na en baka ben drai loekoe na baka, èn a ben tron wan sowtoe-postoe.” — Gen. 19:15-26.
15. (a) A ben didon a Lot srefi dati a ben eskép na pori? (b) Sortoe aksi ben kan kon na wi leki wan bakapisi foe na eskép foe Lot?
15 San wi e leri foe ala den sani disi? A ben didon krinkrin na Lot dati a ben man foe eskép? Nono, bika den tranga faja begi foe Abraham foe sari-ati ben jepi toe (Gen. 18:20-23). A so a ben pasa toe dati „di Gado pori den foto foe na District, Gado ben prakseri Abraham, sodati a doe sani foe seni Lot gwe komoto foe a mindri foe a drai-ondro-kon-a-tapoe (foe den foto)” (Gen. 19:29). Boiti dati, Gado ben fri Lot, foedi en, leki wan regtvaardiki man, a no wan fasi ben firi boen nanga na ogri waka nanga libi foe den „kroektoedoe sma” di a ben libi a den mindri (2 Petr. 2:7). Ete Lot no ben meki esi foe lon komoto foe Sodom, pe a ben abi wan toe belang. A ben moe kisi dekati èn na en anoe srefi den ben moe ori en (Gen.19:10). Te wi e prakseri na eskép foe Lot, dan wi ben sa doe boen foe aksi wisrefi: Wi kan taki troetroe dati wi no e firi boen makandra nanga den ogri, èn kroektoedoe sma? Èn foe na eskép foe wi ede, wi de klari foe poti moro krakti tapoe jeje afersi dan leki winimarki foe goedoe di wi e prakseri? — Matt. 6:33.
16. Sortoe toe sé wi e si ini a fasi fa Lot nanga Abraham ben teki rai?
16 Loekoe, leki a tra sé foe na drai-drai foe Lot foe lon gwe esesi, san pasa di „Gado tesi Abraham” èn ben komanderi en foe pristeri en lobi manpikin Isaak leki wan bron-ofrandi. A de troe dati na punt foe eskép no ben de ini disi. Ma fa Abraham ben doe? A drai-drai? Ofoe a ben begi foe tjari wan tra ofrandi? Nono! „Abraham ben opo mamanten froekoe” èn wantronwantron a bigin nanga en dri dé waka, nanga Isaak na en sé. A ben doro srefi na punt dati „a teki na slagti-nefi foe kiri en manpikin”, di Gado kon a den mindri, sodati Isaak ben tan na libi. — Gen. 22:1-14.
17. (a) Sortoe leri wi moe teki na ati te wi e prakseri den sani di wi ben taki djonsro? (b) Sortoe wortoe foe Jezus e jepi wi, leki en foetoeboi, foe waarderi na joisti fasi wi positie ini na disiten seti foe sani?
17 Djaso wan leri de di wi kan teki na ati. Meki wi sorgoe dati a no soso tapoe wan passief fasi wi e waka baka wan regtvaardiki waka nanga libi, èn de tevréde nomo foe lon komoto gi takroe waka nanga libi. Wi no moe drai-drai noiti èn proberi o krosbé wi kan tan na a lanki foe na ogri seti foe sani disi, aladi wi e proberi foe kisi ala winimarki foe goedoe èn foe abi someni „Prisiri” leki wi kan. Dati den foetoeboi foe Kristus no ben moe sori grontapoe fasi, ben kon na krin di Kristus ini begi ben taigi Gado: „Mi ben gi den joe wortoe, ma na grontapoe no ben wani si den na ai, foedi den no de wan pisi foe grontapoe, soleki mi no de wan pisi foe grontapoe.” — Joh. 17:14.
FA WI E MAN FOE ESKÉP BOEN
18. Fa Jezus ben tjari den tori foe Noach nanga Lot kon krosibé foe makandra, èn den abi foe doe nanga wi ini disi ten?
18 Na wan séker okasi Jezus ben tjari den tori foe san ben pasa ini den dé foe Noach nanga Lot kon krosibé nanga makandra èn a ben taki dati den sani di ben pasa ben e sori na profétis fasi na a kon „foe den dé foe Libisma Pikin”. Aladi den ben kon troe ini na famiri-lo foe Jezus ten, tog den e kon troe moro bigi ini wi ten, ini „disi ten foe na kaba” (Luk. 17:26-33; Dan. 12:1-4). Ini „den dé foe Lot”, so a bijbel e taki, den sma no wawan ben njan èn dringi, ma den ben bai sani, ben seri sani, ben prani èn ben bow toe. Fa disi e akroederi boen nanga wi ten, pe a de so makriki foe den aladé afersi foe libi kan teki wan sma krinkrin abra! Ja, a takroe druk leki wan bakapisi foe den sortoe sani leki diri foe sani, nationalisme, makandra nanga den firi, foe „doe san wan sma lostoe ensrefi” èn foe kon na fesi ini na grontapoe, de moro bigi leki ini wan ten.
19. Fa Jezus ben taki na fesi ini en prenspari profétitori dati wan kefalek situwasi ben sa kon moro takroe, èn sortoe warskow a ben gi baka dati?
19 Meki wi poti wi prakseri now tapoe Jezus prenspari profétitori, pe skrifi fa den sani di ben sa pasa ini wi ten, ben sa kon moro ogri, nanga leki bakapisi wan toemsi kefalek situwasi, pe eskép ben sa de wan tranga fanowdoe sani. A taki dati „broeja èn skreki foe den naatsi” ben sa de, „aladi den sma e kon weri foe frede nanga froewakti foe den sani di e kon tapoe na grontapoe pe libisma e libi na tapoe”. Disi ben sa doro en émarki ini na „bigi benawtoe”, pe den „hemel nanga grontapoe” foe Satan sa poeroe na pasi (Luk. 21:10-33; Matt. 24:21; 2 Petr. 3:7). Baka dati na warskow e kon di fiti gi a ten disi toemsi: „Ma poti prakseri na oensrefi, dati oen ati noiti kon ebi nanga njan èn dringi pasa marki nanga sorgoe foe na libi, èn na dé dati kon wantronwantron, ini wan momenti tapoe oen leki wan trapoe. Bika a sa kon tapoe ala sma di e libi tapoe na eri grontapoe. Tan foe dat’ede nanga ai, begi alaten dati oenoe sa man foe lon komoto (eskép) foe ala den sani disi di sa go pasa troetroe, èn tanapoe na fesi foe na Manpikin foe libisma.” — Luk. 21:34-36.
20. (a) Fa Noach ben waka alaten nanga na troe Gado? (b) San wi moe doe so srefi toe finifini?
20 Fa wi ben sa feni eskép foe dati ede? No, foedi den poeroe wi komoto foe na toneel foe actie. Na presi foe dati, wi moe waka baka na eksempre foe Noach di ben gi jesi soifri ini na bow èn dan meki gebroiki makandra nanga en famiri foe na seti dati foe Gado, na ark. Ini ala den moeiliki jari dati, a ben tan teki wan boen positie na fesi foe Jehovah. „Noach ben waka nanga na troe Gado” (Gen. 6:9). Ne leki Noach, na so wi moe froestan dati wan tranga fanowdoe situwasi de, pe wi moe lon komoto na ini nanga na firi dati a de tranga fanowdoe. Boiti dati, ne leki na man dati foe bribi, na so wi moe loekoe finifini dati wi gi jesi „Na a Sma di e sorgoe foe eskép” èn teki den komando foe Gado ini disi ten di foeroe nanga gevaar. Na a wan sé wi moe wai pasi gi na lobi foe prisiri, foedi wi no o gi wisrefi toemsi abra na a prisiri foe wi lostoe èn sosrefi toe, foe no go boekoedoen ondro den sorgoe foe na aladé libi, nanga wan fasi foe sribi nanga drai-drai leki bakapisi. Na so fasi wi ben sa lasi te na dé kon leki wan wantenwanten trapoe. Na a tra sé wi moe de alaten nanga ai, èn de na ai na jeje fasi, aladi, we go a Gado nanga opregti begi. Ini wi froestan degedege no moe de na sortoe sé wi de — na a sé foe Gado kownoekondre ondro en Kownoe, Kristus Jezus. — Matt. 6:31-34.
21. Fa wi e kisi dekati foe tan teki alaten wan boen positie?
21 A de wan tranga fanowdoe sani dati te nanga na kaba foe na moeiliki ten disi wi doe moeiti foe tan teki wan boen positie na fesi foe na Manpikin foe libisma, Jezus Kristus. Disi kan de wan moeiliki sani gi wi, ma efoe wi de nanga ai èn e gi jesi, dan a no sa de moro moeiliki leki wi kan tjari. Na apostel Paulus e gi wi na djaranti: „Gado de getrow èn a no sa gi pasi dati joe kisi tesi moro leki joe kan tjari, ma nanga na tesi a sa sorgoe sosrefi toe foe a pasi foe komoto (no spesroetoe foe eskép a situwasi, ma), sodati joe kan tjari den.” Soboen, wi moe kweki oridoro, sodati wi kan wini den kori nanga tesi foe kan tan „tanapoe” ini disi „kaba foe na seti foe sani” èn foe kan tan getrow. — 1 Kor. 10:11-13; Matt. 24:3.
22. Pe wi moe go foe kisi tiri foe kan eskép èn foe sanede?
22 Moro de foe taki leki piki tapoe den aksi: Fa wi sa man foe eskép? Troetroe, èn meki wi ondrosoekoe ini disi moro fara a Wortoe foe wi Gado, Jehovah, di sabi wi nowtoe èn sa sorgoe gi wi te wi soekoe en tiri nanga sakafasi. — 1 Petr. 5:6, 7.