Foe san-ede wan lobifasi Gado sa teki refrensi?
„Gado na lobi”. — 1 Joh. 4:8.
1. San sa jepi wi foe froestan na gersi leki fa a gersi dati wan kontrari de ini wi thema?
REFRENSI? Foe wan lobifasi Gado? Fa dati kan? A prakseri taki wan lobifasi Gado e doe wan sani foe teki refrensi no de wan prakseri di de kontra ensrefi? Dati kande gersi so. Ma meki wi loekoe den lobi égifasi di a Mekiman e sori, bikasi dan wi kan froestan fa na rai disi abi foe doe nanga refrensi.
2. Fa wi kan taki dati Gado lobi e pasa ala sani èn san de wantoe foe en lobifasi sorgoe di wi moe de grantangi foe den?
2 Te wi e taki foe a lobi foe Gado, dan wi kan taki dati ala sani de pasa marki. Èn na difrenti fasi a de tjari kon na wi prakseri. Teki foe eksempre na grontapoe di wi e libi a tapoe. A bijbel e taki dati na grontapoe de ’a presenti foe Gado’ gi libisma (Ps. 115:16). Èn fa a de wan wondroe presenti? Prakseri pikinso fa Gado ben sreka a grontapoe disi tapoe wan lobifasi. Gado ben poti en a so wan fasi ini a loktoe dati a kan kisi precies na joisti hoeveelheid waran nanga leti foe na son, èn a ben weri gi en wan moi groen krosi, makandra nanga wan bigi difrenti foe moi bromki nanga someni kloroe. Èn leki wan sori foe Gado lobi a ben sorgoe dati a grontapoe foe wi ben kisi foeroe libi foe meti — meti tapoe 4 foetoe, fowroe nanga fisi — èn a ben gi karoe nanga tra njanjan pasa marki. — Ps. 104:1, 13-15.
3. Fa Gado ben sori lobi ini a Fasi fa a ben meki wi?
3 Ma Gado lobi no ben sori wawan ini den sani di a ben meki gi wi; ma sosrefi toe a ben sori ini a fasi fa a ben meki wi. A ben meki wi foe wi njan switi foe den sani di a ben meki. O boen a psalmsingiman ben tjari disi kon ondro wortoe di a ben taki: „O Jehovah . . . Mi sa prijse joe, bikasi joe ben meki mi tapoe wan froewondroe fasi di e gi frede”! (Ps. 139:1, 14) Ini en boen-ati nanga lobi Gado ben gi wi ai foe si na moifasi foe na grontapoe lontoe wi. A ben gi wi jesi. A ben gi jesi foe wi ben sa njan switi foe difrenti babari leki pokoe nanga libisma sten. A ben gi wi wan noso foe wi kan ari go ini wi na smeri foe njanjan nanga na smeri foe bromki. Èn na kroon tapoe ala sani de na libisma froestan, di nanga en wi kan prakseri-go-prakseri-kon èn di wi ori sani na ede èn di kan tjari den bewégi foe a skin kon akroederi nanga makandra. Wi moe froewondroe troetroe foe den foeroe seti di Jehovah Gado ben poti na wi skin. Foetroe, „Gado na lobi”. — 1 Joh. 4:8.
Gado lobi e kon jepi
4. Fa Gado ben sori en lobi ini a paradijs ini Eden?
4 Di Gado ben meki na fosi libisma, Adam, a ben poti en ini na moi paradijs foe Eden. Fa Adam ben moe kisi prisiri foe den ipi-ipi lobifasi seti foe Gado di ben lontoe en! Bakaten Gado ben meki Eva èn ben tjari en go na Adam. Fa a ben de wan prisiri gi Eva tapoe en fosi libidé foe tai kon wan nanga wan masra èn edeman di ben sa boboi èn tjari en. Makandra den ben kan loekoe na den fesi foe doe Gado wani ini a meki kon moi foe a grontapoe, ini a foeroe foe a grontapoe nanga sma èn tapoe wan lobifasi ori makti tapoe den meti. Fa Gado ben poti wan moi ten a den fesi foe kon.
5. (a) Fa wi fosi tata nanga mama ben sori dati den no de warti foe kisi na lobi foe Gado? (b) Ma fa Gado lobi tog ben go na den bakapikin foe den?
5 Ma a de wan sari sani, dati na ten disi no ben kon gi den. Wan oproeroe jeje ben poeroe ensrefi foe ondro a lobi foe Gado tapoe wan gridifasi, èn meki ensrefi tron Satan na Didibri. A Didibri disi ben tjari Eva, èn nanga jepi foe Eva, a ben tjari Adam so fara foe doe den égi wani. A so fasi aparti foe den Mekiman, den ben waka baka wan gridifasi doe. Nanga dati den ben sori dati den no ben de warti foe kisi a lobi foe den Mekiman. Foe datede nanga reti Gado ben lési strafoe gi den espresi sondari. Ma foe a lobi di a abi gi libisma a ben gi den pasi foe tan ini libi, te leki den ben meki pikin, bikasi noso wi no ben sa de ini libi. Aladi libisma ben kisi sondoe èn dede foe wi fosi tata nanga mama, dan a lobifasi Gado boiti dati ben gi wan fundamenti foe owpoe. — Gen. 3:16-23; Rom. 8:20, 21.
6. Sortoe wortoe ini Eden ben meki wi si Gado lobi èn fa?
6 Na sortoe fasi? We, wantron-wantron di na oproeroe ben bigin, Gado ben meki bekenti dati a ben sa meki wan „Siri”, dati wani taki wan bakapikin, kon. A ben sa seni a Sma disi komoto foe en égi loyaal organisatie foe tja kon a wan kaba ala ogri di Didibri nanga Adam nanga Eva ben meki kon. Ma drape ini Eden na lobifasi Gado ben meki bekenti toe dati a ben sa tjari en refrensi kon tapoe Satan nanga ala trawan, di ben sa meki densrefi de wan pisi foe den bakapikin foe Satan, foedi den ben sa drai baka gi a lobi foe Gado. — Gen. 3:15; Openb. 12:9.
WAN GADO FOE LOBI NANGA REFRENSI
7. Sortoe reden foe prisiri wi abi akroderi nanga Deuteronomium 32:43?
7 Soboen, na Gado foe lobi ben meki bekenti, dati a de sosrefi toe wan Gado foe refrensi. Ma dati a ben sa teki refrensi tapoe en feanti, ben sa de joisti. Foe sanede? Foedi nanga dati a pasi ben sa opo gi ala sma di lobi Gado, foe prisiri densrefi. Ini disi ten wi kan bréti dati Gado ben meki a sa kan gi wi dati wi sa prisiri ini en seti foe tego libi. Loekoe san Gado ben meki Mozes taki ondro krakti foe en jeje: „Prisiri, oen naatsi, nanga en pipel, bikasi a sa teki refrensi foe a broedoe foe en dinari èn a sa teki refrensi tapoe en feanti.” — Deut. 32:43.
8, 9. (a) Sortoe toe sani Gado abi na prakseri foe doe foe en lobi ede? (b) Sortoe wondroe presenti Gado ben gi leki wan sori foe en lobi?
8 Ja, a lobifasi Gado abi ini prakseri foe poti reti na retifasi foe en tiri-makti èn fri den sma di lobi en foe den feanti foe den. Ja, a sa fri wi srefi foe na bigi feanti foe wi, dede, di wi ben kisi foe wi fosi tata nanga mama (Rom. 5:12). Ma fa Gado e doe disi? A bijbel e ferteri wi dati a de doe disi nanga a presenti foe en Manpikin: „Gado na lobi. Nanga dati na lobi foe Gado ben kon na krin ini wi geval, taki Gado ben seni en wan enkri-gebore Manpikin kon na grontapoe, sodati nanga jepi foe en wi ben sa kisi libi. A lobi no de ini disi taki wi ben lobi Gado, ma taki a ben lobi wi èn ben seni en Manpikin leki wan zoen-ofrandi foe wi sondoe.” — 1 Joh. 4:8-10; 1 Kor. 15:25, 26.
9 Gado ben seni foe datede en Manpikin Jezus Kristus foe fri wi foe na dede di wi de na ondro foe na sondoe di wi ben kisi foe Adam. Ja, soleki a bijbel ini 1 Timoteus 2:6 e taki, dan Kristus „ben gi ensrefi leki wan srefi loesoe-prijs gi ala sma” di ben sa poti bribi ini en. Jezus ben kan taki foe datede gi en foetoeboi di ben de leki skapoe, taki: „Mi ben kon, sodati den ben kan abi libi èn ben sa abi en pasa marki”, ja tego libi. — Joh. 10:10.
10. (a) Foe sanede a Gado foe lobi de sosrefi toe wan Gado foe refrensi? (b) Foe sanede a de so prenspari now dati wi sabi èn gi jesi na Gado?
10 Ma a bijbel e ferteri wi foeroe tron dati na „Gado foe lobi” de sosrefi toe wan Gado foe refrensi. Foe sainde? Foedi Gado lobi no man verdrage foe tego ogri (Nah. 1:2; Deut. 32:35, 41). Foe datede meki na apostel Paulus e skrifi foe na „openbaring foe na Masra Jezus, komoto foe hemel nanga en krakti engel, ini wan flamfaja, te a de teki refrensi tapoe den di no sabi Gado èn tapoe den di no e gi jesi na a boen njoensoe foe wi Masra Jezus” (2 Thess. 1:6-9). O prenspari a de foe datede dati wi leri sabi Gado! Fa a de wan tranga fanowdoe sani ini disi broeja grontapoe, pe difrenti religie de, foe waka baka na rai foe na bijbel èn foe soekoe ’na troe Gado èn foe feni en troetroe!’ — Tori foe den Apostel 17:27.
TJARI REFRENSI KON INI BALANS NANGA LOBI
11, 12. (a) Sortoe situatie ben kon na a bigin foe na libisma historia, èn leki wan bakapisi foe dati, dan fa Gado ben moe handri? (b) Fa Gado refrensi ini a ten dati ben de ini balans nanga en lobi?
11 Ma meki wi go na a bigin foe na historia foe libisma. Disi sa jepi wi foe froestan moro boen fa Gado lobi de nanga en refrensi. Tapoe wan lobifasi, Gado ben gi pasi na den bakapikin foe Adam foe meki pikin kon foeroe. Ma trangajesi soema no ben teki na wan boen fasi na lobi dati. Baka so wan 500 jari foe datede, Jehovah ben seni en proféti Henoch foe taki a kroetoe foe Gado gi den ogri soema foe den ogridoe ede èn foe den tergi sani di den ben taki gi Gado (Judas 14, 15). Ete so wan doesoen jari ben pasa, èn a grontapoe dati foe owroeten ben doro na émarki foe oeroedoe nanga dwengi. Foe dat-ede meki a Wortoe foe Gado e taki: „Grontapoe ben kon pori ini ai foe na troe Gado èn grontapoe ben kon foeroe nanga dwengi. Soboen, Gado ben si na grontapoe èn loekoe! a ben pori.” — Gen. 6:11, 12.
12 San Gado ben sa doe now? A ben sa teki refrensi? Ja! Ma srefi ini disi na égifasi foe en ben kon na fesi. Foe sanede wi e taki dati? Ini a ten dati, joe ben abi wan osofamiri di ben gi ensrefi abra na a doe foe Gado wani. Dati ben de na osofamiri foe Noach, a man di bijbel e kari „wan prékiman foe retidoe”. Tapoe wan lobifasi Jehovah meki Noach bow wan ark foe „na ferloesoe foe en osofamiri”. Ne na grontapoe froedoe ben kon, pe ogri sma foe Noach ten ben kisi pori (2 Petr. 2:5; Hebr. 11:7). Na eri grontapoe ben kon krin foe pori dwengi nanga oeroedoe, sodati a ben tron baka wan boen presi pe den famiri foe libisma ben kan kon foeroe baka. — Gen. 6:9, 22; 7:21-23; 8:15-17.
13. Na tjari foe strafoe kon tapoe Sodom nanga Gomorra foe na sé foe Jehovah ben de sondro lobi, èn foe sanede joe e piki so?
13 Ma den sondoe firi di komoto foe Adam ben tan, èn a no ben tan langa ofoe ogri sma ben bigin sori baka den takroe égifasi foe den (Ps. 51:5). Teki foe eksempre den sma foe Sodom nanga Gomorra, di ben libi ini wan district di ben de wan-tron „leki na djari foe Jehovah”. A bijbel e ferteri wi dati ’den man foe Sodom ben takroe èn na wan grofoe fasi ben sondoe na Jehovah’. Den ben de homoseksueel èn den no ben sjen foe gebroiki dwengi foe kan prisiri den lostoe foe den (Gen. 13:10, 13; 19:4-11). Na lobifasi Gado, Jehovah, ben teki na bosroiti foe pori den foto dati. Leki wan bakapisi foe disi, dan na regtvaardiki Abraham nanga en bradapikin Lot no ben abi foe boemoei moro langa nanga den sortoe veragti sma disi. Soleki Genesis 18:25 e taki, dan „na Kroetoeman foe na eri grontapoe” ben doe san de joisti ofoe „reti”. A ben fri Lot nanga en toe oemapikin, ma a ben pori Sodom nanga Gomorra nanga wan alen foe faja, sodati a ben tjari wan kaba kon na a morsoe libi foe na district dati. — Luk. 17:29; Jud. 7.
14, 15. (a) O onnowsel den Kanaänsma ben de? (b) Gado ben handri joisti foe teki refrensi tapoe den?
14 Jari a baka, Jehovah ben doe baka san ben de joisti nanga „reti” gi en pipel Israël. Fa? Foe di a ben seti sani dati den Kanaänsma ben poeroe ini na Pramisi Kondre (Deut. 18:9-12). ’Ma disi no ben de opregti nanga den onowsel Kanaänsma dati?’ wan sma ben sa kan aksi. Onnowsel Kanaänsma? Den ben de fara foe onnowsel. Den Kanaänsma dati ben de wan tegoe sani foe di den ben gi densrefi abra na oeroedoe nanga égi famiri, seksueel dot-libi, doe soetadoe, offer pikin èn doe homoseksualiteit nanga oeroedoe nanga meti. Ini na anbegi foe den falsi Gado foe den, den ben offer foe eksempre den pikin foe den, foe di libilibi den ben trowe den go ini na faja. Sosrefi toe den ben abi oemasma nanga mansma motjo ini den tempel foe den. Foe datede meki Jehovah ben gi en pipel den komando disi: „No doti joesrefi nanga no wan foe den sani disi, bikasi nanga ala den sani disi, den naatsi di mi e seni komoto na joe fesi, ben doti densrefi. Foe datede meki na kondre morsoe, èn mi sa meki a kisi strafoe foe en sondoe, èn na kondre sa balaki den sma di e libi na ini.” — Lev. 18:1-25.
15 Soboen, wi e si baka dati a ben de foe lobi ede gi en égi pipel dati Jehovah ben gi komando foe wai den ogrisma dati poeroe. A morsoe libifasi foe den ben de wan gevaar gi na pipel foe Gado èn ben de akroederi a bijbel „wan tegoe sani na fesi foe Jehovah”. A refrensi foe Gado ben opo kon nanga reti tegen den. — Ps. 106:34-40; Deut. 18:12.
16. Fa a lobi nanga pasensi foe Gado ben sori gi Israël?
16 Fa Gado ben handri na a tra sé nanga na pipel Israël? Jehovah ben sori wan toemsi safoe lobi gi den. Ini Deuteronomium 32:11 nanga 12 Mozes e skrifi foe na safoe lobi disi ini den tra moi wortoe: „Joisti soleki wan aka e wiki en nesi, e tan fré tapoe en pikin, e bradi en fré, e opo den, èn e tjari den tapoe en fré, a so Jehovah ben tan tjari en wawan, èn wan dorosé gado no ben de na en.” Ma a sari! Bika te foe kaba, tokoe dorosé gado ben pasa go ini na anbegi foe Israël. Foe datede meki na Gado di ben meki bekenti dati a ben sa teki refrensi tapoe en feanti, ben moesoe foe teki refrensi tapoe en égi pipel. Ma fa Jehovah ben abi pasensi nanga Israël! Ja, négi-ondro jari langa a ben verdrage a tranga-ede foe den! Ini a eri pisi ten dati, dan Jehovah ini en sari-ati ben langa en anoe gi den. „Mi no abi prisiri” so Jehovah Gado ben taki, „ini a dede foe ogrisma, ma ini disi taki wan ogrisma drai baka gi en pasi èn tan troetroe ini libi. Drai baka, drai baka foe joe ogri pasi, bikasi foe sanede oen sa dede, o oso foe Israël?” — Ezech. 33:11.
17. (a) Sortoe warskow Gado ben gi na Israël? (b) Fa na tjari foe refrensi kon tapoe Israël ben temper nanga en lobi?
17 Alaten baka Gado ben warskow en pipel gi den bakapisi foe na afkodré foe den, na oeroedoe foe den èn na trowe foe onnowsel broedoe. Ma te foe kaba Jehovah ben moesoe foe teki refrensi tapoe Israël foe di a gi pasi dati kownoe Nebukadnezar foe Babylon ben pori na foto Jeruzalem nanga en tempel. Den sma di ben tan na libi ben tjari go na Babylon. Ma sébi-tenti jari na baka Gado ben meki a fadon foe Babylon kon, sodati wan fika-pisi foe Israël di ben abi foeroe warderi ben kan drai go baka na den kondre foe ben kan bigin baka nanga na krin aanbegi. — 2 Kon. 24:3, 4; 2 Kron. 36:12-21; Ezra 1:1-3; Hebr. 12:6.
JEZUS BEN TAKI FOE LOBI NANGA REFRENSI
18. San Jezus ben tjari kon a krin foe (a) Gado lobi èn (b) en refrensi?
18 San Jezus Kristus ben abi foe taki foe na afersi disi foe Gado lobi nanga refrensi? Na a fosi presi a ben taki nanga waran foe na lobi foe en Tata, di a ben taki: „Gado ben lobi na grontapoe (foe libisma) sote, dati a ben gi en wan-enkri-gebore Manpikin, sodati ibrisma di e sori bribi ini en, no ben sa kisi pori, ma ben sa abi tego libi” (Joh. 3:16). Ma a ben draidrai foe taki foe Gado refrensi? Kwet-kweti! A bijbel e taki namkoe, dati Jezus, neleki en Tata, „ben lobi regtvaardiki fasi èn no ben wani si ogri na ai”. Jezus no ben wani si spesroetoe na ai kroektoedoe nanga broedoe-paiman foe den kerki fesiman (Hebr. 1:9; Ps. 11:5, 7). A no ben frede foe taki te a ben taki nanga den djoe kerki fesiman foe en ten. Dri tron ini en bergi-préki a ben kari den „falsi soema” (Matt. 6:2, 5, 16). A ben taki gi den kerki fesiman: „Oen komoto foe oen tata na Didibri” èn na so fasi a ben tai den nanga „a siri foe na sneki” (Joh. 8:44; Gen. 3:15). Moro fara Jezus ben taki soso dri dé bifo den kiri en, wan publiki kroetoe tapoe den djoe tiriman di a ben taki: „Sneki, sneki-broedoe, fa oen sa lon komoto gi na kroetoe foe Gehenna?” — Matt. 23:13-33.
19. (a) Foe sanede na fasi foe Jezus nanga en warskow boskopoe ben de toemsi nanga lobi? (b) Ma fa Jehovah handri joisti?
19 Disi ben wani taki dati Jezus no ben abi lobi? Kwet-kweti, bikasi aladi Jezus ben sabi dati den djoe dati ben de tapoe a punt foe meki na broedoe-paiman foe den kon moro bigi foe di den ben o kiri en, tog a ben taki ini Matteus kapitel 23: „Jeruzalem, Jeruzalem, di e kiri den proféti èn e ston den sma di ben seni go na joe — omeni tron mi ben wani tjari joe pikin kon makandra leki wan oema-fowroe e tjari en pikin kon ondro en fré! Ma oen no ben wani. Loekoe! Oen oso e tan légi-légi na baka” (Matt. 23:37, 38; Tori foe den Apostel 3:13-15). Dri-tenti-nanga-sébi jari na baka, na Romein legre ben foefoeroe Jeruzalem èn a ben pori na tempel. Disi ben de wan rampoe pe wan miljoen wan-ondro-doesoen oproeroesma ben dede! Na a pisi ten dati, dan san den profétis wortoe foe Jezus ben wani taki ben kon na krin. Jehovah nanga reti ben teki refrensi!
20. Sortoe moi sé foe lobi nanga refrensi wi e feni ini Jesaja 61:1, 2?
20 Ondro-ondro jari a fesi, dan Jesaja, wan foe den proféti di leki sma ben taki den kiri ini a owroe Jeruzalem, ben taki den wortoe disi: „Na jeje foe na Masra Jehovah de tapoe mi, bikasi Jehovah ben salfoe mi foe ferteri den safri-ati sma boen njoensoe . . . foe bari tranga na jari foe a boen wani foe a sé foe Jehovah èn na dé foe refrensi foe na sé foe wi Gado; foe trowstoe ala sma di e sari.” — Jes. 61:1, 2.
21. (a) San kan de na reden foe sanede Jezus e kebroiki Jesaja 61:1, 2 afoe? (b) Sortoe aksi e kon na fesi, pe Jesaja 2:2-5 abi foe doe nanga en?
21 Na a bigin foe en grontapoe diniwroko Jezus ben lési a profetitori disi afoe èn a ben tjari en kon na en tapoe leki a Moro Prenspari Salfoewan foe Jehovah (Luk. 4:18-21). Di Jezus ben kebroiki den wortoe dati foe Jesaja, dan a no ben lési so fara, foedi a ben ferteri foe na dé foe Gado refrensi. Foe sanede? A de krin, dati „ini laatsti foe den dé”, soleki Jesaja kapitel 2 e tjari disi kon ondro wortoe, a moro bigi krakti ben sa poti tapoe a meki bekenti foe Gado refrensi. Wi ben doro na ten dati now!
[Faki na tapoe bladzijde 85]
„O foeroe den wroko foe joe de, o Jehovah? Joe ben meki den alamala nanga koni. A grontapoe foeroe nanga san joe ben meki . . . Blesi Jehovah, o mi sili. Prijse Jah!” — Ps. 104:24, 25.