A teki foe refensi na wan fowtoe sani?
Na tapoe wan oto-pasi na ini den Verenigde Staten, wan oto no ben go so esi na seisei foe meki wan tra oto pasa. Na man di ben rèi na di foe toe oto ben teki refensi, foe di a ben soetoe na tapoe a wagi di ben tanteri en, so taki a ben kiri wan sma ini a oto di no ben doe noti.
Wan tini oemapikin ben moesoe gi en ròl ini wan skorokomediprei na wan tra oemapikin. A ben teki refensi, foe di a ben froeteri na boi di ben de a freiri foe a oemapikin, taki a oemapikin ben e go nanga wan boi foe wan tra skoro. Na so fasi a ben pori na matifasi di na oemapikin ben abi nanga a boi di ben de en freiri.
FOEROE sma abi na firi taki den abi na reti foe teki refensi te den denki taki sma doe den wan sani. Na wan ofoe tra fasi, den e waka baka na odo: „No kisi atibron, doe en wan sani baka”. Na ini a ten disi, lobi gi a sma na joe sei e go na baka srefisrefi èn na jeje foe teki refensi e sori ensrefi moromoro. — Mateus 24:12.
Ma fa joe e si na teki di wan sma e teki refensi? Efoe joe e bribi ini bijbel, dan kande joe e firi taki ini a gron foe a tori, teki refensi na wan fowtoe sani. Ma foe di wi e libi ini wan ogri grontapoe, dan joe e firi kande taki a gi foe pardon, san de na tra sei foe a teki foe refensi, foeroetron no de ini akroederi nanga a troetroe libi. Fa joe ben sa doe te wan sma ben bedrigi joe noso ben ròs joe poeroe sani na joe skin? Joe wani foe teki refensi efoe wan sma no e spiti na joe bowtoe noso e wisiwasi joe na fesi trawan? Joe lobi teki refensi noso joe lobi gi pardon?
Wan jejefasi foe teki refensi e doe ogri
A no de foe taki, dati difrenti de ini a serjoesoefasi foe wan ogri. Ma moro foeroe sma di wani foe teki refensi tapoe wan sma, den no ben ròs poeroe sani na den skin noso ben naki den na wan ogri fasi. Den „ogri” di wi ben taki foe den na a bigin foe na artikel disi, pikinmoro no ben wani taki noti, ala di den ben sori so bigi na ini a prakseri foe den sma di ben bosroiti foe doe a trawan wan sani baka.
Bijbel e taki, dati wi no moesoe kweki wan fasi foe lobi teki refensi. Odo 24:29 e gi na rai: „No taki: ’Neleki fa en ben doe nanga mi, na so mi e go doe nanga en toe.’” Foe san-ede? Bika, so wan fasi foe denki e doe sma ogri na emotioneel èn jeje fasi. Den prakseri foe teki refensi e poeroe a vrede foe jeje èn e hendri wan gesontoe fasi foe taki-go-taki-kon. Poti prakseri tapoe a njoensoe disi: „Na ini wan presi pe den e poti oto, toe gronman ben soetoe makandra kiri komoto foe na pickup foe den èn na so fasi den ben koti wan trobi foe fotenti jari langa, di ben bigin di den ben de pikin-nengre.” Go prakseri, den heri libi langa a denki foe den toe man disi ben vergiftig nanga jepi foe wan pori jeje foe lobi foe teki refensi! — Odo 14:29, 30.
Wan tra reide foe no kweki wan jeje di lobi foe teki refensi de, taki sma di e meki fowtoe — srefi sma di e meki serjoesoe fowtoe — kan kenki. Wan dei, na apostel Paulus foe eksempel, ’ben feni na kiri di den ben kiri [na disipel Stefanus] boen’ èn ’ben bro tapoe-skreki nanga kiri kontrari den disipel foe Masra’. Ma a ben kenki. Jari a baka, na apostel Petrus — di a fesi dati, Paulus ben tjari a libi foe en kon ini kefar — ben kari Paulus „wi lobi brada Paulus” (Tori foe den Apostel 8:1; 9:1; 2 Petrus 3:15). Kresten ben kan proeberi foe teki refensi tapoe Paulus, spesroetoe di a ben wakti na ini Damaskus ala di a ben breni (Tori foe den Apostel 9:3-15). Fa dati ben sa de wan fowtoe di ben o tjari sari kon!
Foe dati-ede Paulus ben kan gi boen rai na ini Romesma 12:20: „Efoe a feanti foe oenoe abi angri, gi en njanjan; efoe watra e kiri en, gi en foe dringi”. Foe san-ede? Bika efoe wi e teki refensi tapoe wan feanti, wi no e safoe, ma e tranga en fasi foe denki èn na so fasi e meki a feantifasi a mindri wi nanga en kon moro tranga. Ma efoe wi e doe boen na a sma di meki wi mandi noso di hati wi firi, wi kan safoe en fasi èn meki wan fositen feanti tron wan mati.
Foe erken wi eigi swakifasi, e jepi wi toe foe wini na bita-atifasi di e meki taki wi e angri foe teki refensi. Na psalm singiman ben aksi: „Efoe a ben de den fowtoe di joe e loekoe, O Jah, O Jehovah, soema ben sa kan tan tanapoe?” (Psalm 130:3) Wi alamala ben hati trawan firi noso ben doe den wan sani. Wi no ben breiti di den no ben proeberi foe doe wi wan sani baka? Wi no moesoe handri dan nanga a srefi fasi foe dwengi wisrefi? Jesus ben gi leki rai: „Ala sani, foe dati-ede, di joe wani sma moesoe doe gi joe, joe moesoe doe gi den toe.” — Mateus 7:12.
A de troe, taki bijbel e taki: „No wani si san takroe na ai” (Psalm 97:10; Amos 5:15). Ma a no e taigi wi foe no wani si na sma di e doe takroe na ai. Foe taki en leti, Jesus ben gi wi na komando: „Tan lobi oen feanti èn begi gi den sma di e froefolgoe oenoe” (Mateus 5:44). Efoe wi pai kroektoedoe nanga kroektoedoe, dan wi e teki na jeje foe na ogridoeman. Na odo foe fositen e taki: „No taki: ’Mi wani pai ogri baka!’ Howpoe tapoe Jehovah, èn a sa kibri joe” (Odo 20:22). Fa disi de wan koni fasi foe tjari joesrefi! O moro betre a de foe sori taki wi na winiman, foe di wi e kakafoetoe gi na tesi foe waka baka ogridoeman. — Johanes 16:33; Romesma 12:17, 21.
Gi strafoe — Soema moesoe doe dati?
A no de foe taki, dati wan toe doe de moro serjoesoe leki persoonlijk afrontoe noso a hati di den e hati wan sma en firi. San efoe wi na a sma di den doe ogri? A no de foe taki, dati wi abi na firi taki na ini a nen foe retidoe, wan sani moesoe doe. Ma san? Ini son libimakandra a no ben de wan ongewoon sani foe sma handri sani densrefi èn foe teki refensi. Ma den sortoe libimakandra disi nofotron ben kon na den kaba ini wan teki refensi pe foeroe broedoe ben fadon. Na ini a ten disi, no den wet foe Gado èn ini foeroe kefal, no den wet foe libisma e gi sma pasi foe densrefi teki refensi foe ogridoe ede, èn nanga reti. Den sortoe persoonlijk ogridoe disi, e tjari soso moro ogridoe kon.
Wan sma di den doe wan ogri, moesoe sidon dan èn teki na ogri nomo sondro foe doe wan sani? Disi no abi foe de so. Te sma e doe wi ogri noso e pori sani foe wi, dan wi kan go na den sma di abi makti foe jepi wi. Kande joe wani kari skowtoe kon. Efoe a de na wrokope, go na a basi. Efoe a de na skoro, kande joe wani go na a edeman foe skoro. Dati na wan reide foe san-ede den de drape — foe meki gerègtighèit de. Bijbel e froeteri wi taki lanti de „Gado dinari, wan sma di e teki refensi foe tjari atibron kon tapoe den sma di e doe ogri” (Romesma 13:4). Gerègtighèit e aksi taki lanti e sori en makti, foe tapoe ogridoe, èn foe strafoe den ogridoeman.
A de troe, taki sontron gerègtighèit no e kon so esi. Wan skrifiman, di ben weri nanga grontapoe, ben taki: „Gerègtighèit de neleki wan loko di pikinmoro ala ten de lati.” Ija, sontron troetroe a loko noiti e doro. Sma di e doe onregtfardiki sani abi kande so foeroe makti, taki den sma di abi na makti foe doe wan sani nanga den, no kan basi den. Tokoe, a koni fasi foe handri na foe dwengi joesrefi. Bijbel e taki: „Wan sma sondro froestan e libi en heri jeje foe doe san a wani, ma na sma di koni, e hori en bedari te na a lasti momenti”. — Odo 29:11.
Teki refensi — Soema moesoe doe dati?
Dwengi wisrefi foe no teki refensi sa tjari na so fasi wini kon gi wi, èn wi kan wakti safri, foe di wi sabi taki efoe retidoe moesoe feni presi, dan Gado sa doe en na a joisti ten. Jehovah sabi taki a doe di sma e doe ogri nomo, sondro foe trawan doe wan sani foe tapoe en, e tjari onregtfardikifasi kon (Preikiman 8:11). A no sa gi pasi taki den ogri-atisma, di ati kon tranga srefisrefi, kwinsi na libisma famiri foe têgo. Dati meki na apostel Paulus ben gi wi na rai: „No teki refensi gi joesrefi, lobiwan, ma gi na atibron pasi, bika Boekoe taki: ’Refensi na foe mi; mi sa pai, Jehovah e taki’” (Romesma 12:19). Ija, bijbel e taki foe wan dei foe teki refensi foe a sei foe na Mekiman.
[Faki na tapoe bladzijde 4]
Foe tèmper den firi foe teki refensi, prakseri taki
□ Gado e broko-ede nanga retidoe
□ foe kweki wan fasi foe lobi foe teki refensi abi takroe bakapisi
□ foe de nanga switifasi nofotron e meki problema nanga trawan kon moro mendri
□ wi ben kisi pardon foe foeroe foe wi eigi fowtoe
□ sma di e meki fowtoe kan kenki
□ wi e wini grontapoe foe di wi e kakafoetoe gi den pasi foe en