Efoe wan famiriman sluit uit . . .
1, 2. (a) San ben de Gado prakseri gi osofamiri nanga famiri tapoe na tori foe bribi? (b) Sortoe bosroiti son famiri ini Korach ten ben moe teki?
BAKA di Adam ben de en wawan foe wan pisi ten, Gado ben taki: „A no boen gi wan man foe de en wawan.” Dan a ben meki Eva èn a ben poti na trow foe libisoema (Gen. 2:18, 21, 22). Baka dati dan foeroe sma ben sa kon na grontapoe. Foe datede meki ibri sma ben sa kisi foeroe famirman. Srefi ofoe son famirman, soleki pikin, no ben e libi krosbé, dan wan fisiti ben kan tjari go na den èn den ben kan abi prisiri nanga makandra. — Gen. 1:28; Job 1:1-5.
2 Gado ben abi ini prakseri dati osofamiri nanga famiri ben sa tjari kon de wán ini na troe anbegi, sodati den kerki bribi no ben sa tjari prati kon. Ma situwasi ben de, pe bribi ben de wan famiri stré. Disi foe eksempre ben de so di Korach, Dathan nanga Abiram ben meki oproeroe. Jehovah ben sori dati a ben wroko nanga Mozes èn Aäron èn no nanga den man dati di meki oproeroe foe den bribi. Dan Mozes taigi na pipel foe komoto foe den tenti foe den oproeroeman. San den pikin nanga den sma di de foe na osofamiri foe Korach, Dathan nanga Abiram, ben sa doe? Den ben sa poti loyaal fasi na den famiri moro hé leki loyaal fasi na Jehovah nanga en gemeente? Na moro bigi pisi foe den krosbé famiri foe den oproeroeman ben poti den famiri moro hé leki Gado. Jehovah ben kiri den famiriman disi makandra nanga den oproeroeman. — Num. 16:16-33.
3. Sortoe koni bosroiti son wan foe den famiri foe Korach ben teki?
3 Ma son manpikin foe Korach ben tan de loyaal na Gado nanga En pipel. Den no ben kiri den makandra nanga den tra sma foe Korach osofamiri èn den famiri foe Dathan nanga Abiram (Num. 26:9-11). Bakapikin foe den Korachietsma di ben tan na libi, bakaten ben blesi srefi nanga spesroetoe tempeldienst èn na bijbel e taki nanga respeki foe den. — 2 Kron. 20:14-19; Ps. 42, 44-49, 84, 85, 87.
4. Na sortoe tra fasi a ben de dati famiri-loyaliteit ben sa de wan tesi ini Israël?
4 Wan srefi bosroiti ben moe teki na mindri na loyaliteit na famiri èn loyaliteit na Gado te wan Israëlsma ben fadon komoto foe bribi. En famiri, di libisma firi nanga famirman fasi e poesoe, ben sa proberi foe kibri en dati a koti poeroe? Ofoe en brada, manpikin ofoe oemapikin srefi ben sa froestan dati loyaliteit na Gado nanga na gemeente ben de na reti èn koni sani? (Loekoe Deuteronomium 13:6-11). Ini na disiten kristen seti foe sani wan sondari no e koti poeroe nanga na dedestrafoe, ma kristensma kan kon tanapoe na fesi foe tesi, foedi wan famirman e kisi tranga leri.
FAMIRMAN KAN MEKI PROBLEMA KON
5, 6. (a) Fa prati fasi ben kan kon leki wan bakapisi foe bribi? (b) Foe sainde kristen no moe poti san den e bribi foe na bijbel a wan sé? (Ps. 109:2-5).
5 Famiribanti nanga lobi mindri famiri kan de toemsi tranga. Disi de natuurlek èn a de akroederi na seti foe Gado (Joh. 16:21). Ma den tranga banti disi kan de wan moeilek tesi gi kristen. Jezus ben tjari kon na krin dati te wan sma tron wan kristen, disi kan abi leki bakapisi dati famirman kan kakafoetoe. Jezus ben taki: „Mi no ben kon foe tjari vréde, ma wan fetowroe. Bikasi mi ben kon foe tjari prati kon mindri wan sma nanga en papa, mindri wan oemapikin nanga en mama èn mindri wan jongoe oema nanga en man-mama. Ja, wan sma feanti sa de en égi osofamiri. Na soema di abi moro bigi lobi gi papa ofoe mama dan leki gi mi, no warti gi mi.” — Matt. 10:34-38.
6 Kristensma no e winsi dati so wan feantifasi de. Èn réde no de foe sainde famirman ben sa kakafoetoe gi den ofoe abi ogri-ati foe den, foedi den de krin, moreel èn opregti dienstknekti foe Gado. Tokoe troe kristen e froestan dati den no kan poti den famiri na fesi foe Gado. Te foe kaba a de san de foe na boen foe ala sma, dati kristen tan getrow na Gado. Baka wan pisi ten den sa kan tjari den famiri foe den so fara kande foe go waka na pasi di e tjari ferloesoe kon. — Rom. 9:1-3; 1 Kor. 7:12-16.
7, 8. Soema abi na fowtoe foe famiriproblema di kon foe uitsluiting?
7 Famirman kan tjari na wan tra fasi toe problema kon gi troe kristen. Disi kan doe kon te wan famirman sluit uit foe na gemeenschap. Soleki ben taki a den artikel a fesi, dan Gado e aksi dati wan sma ini na gemeente di e doe bigi sondoe sondro foe abi beraw, moe sluit uit foe na gemeenschap (1 Kor. 5:11-13). Na libifasi foe na sma di doe ogri ben tjari wan kenki kon ini en matifasi nanga Jehovah èn foe datede nanga famirman di de Jehovah Kotoigi. Gado no e kisi fowtoe foe den bakapisi disi, foedi den markitiki foe en de regtvaardiki èn joisti (Job 34:10, 12). So toe, getrow kristen famirman no abi fowtoe ini na situwasi disi. Neleki Korach, Dathan nanga Abiram a so wan sma di sluit uit foe na gemeenschap e tjari problema kon gi ensrefi nanga en famirman.
8 Ini disi wi moe tjari aparti situwasi kon foe ondrosoekoe. Ini na fosi presi wan kristen de wan pisi foe na srefi osofamiri, pe wan famirman de di sluit uit ofoe di hari ensrefi poeroe. Ini na di foe toe presi na famirman no de ini na osofamiri.
DE INI NA OSOFAMIRI
9. Sortoe situwasi de foe osofamiri-verplekti efoe wan sma trowpatna no de wan kristen ofoe sluit uit foe na gemeenschap?
9 Wan sma ben sa kon tron wan kristen sondro dati trawan ini en osofamiri teki na bribi. Na so foe eksempre wan oema ben sa kan dini Jehovah sondro dati en masra e doe disi. Ma ete a de „wán skin” nanga en masra èn a de verprekti foe lobi en èn foe respeki en (Gen. 2:24; 1 Petr. 3:1-6). Ooktoe a ben sa kan de nanga wan man di ben de wan kristen di ben gi en libi abra, ma di ben sluit uit bakaten. Tokoe disi no e tjari wan kaba kon na a trowbanti foe den; soso dede ofoe wan brokotrow tapoe a gron foe a bijbel kan tjari wan kaba kon na disi. — 1 Kor. 7:39; Matt. 19:9.
10, 11. Sortoe krakti uitsluiting abi tapoe den jeje banti ini a osofamiri?
10 Na so a de toe, ofoe wan famirman, soleki wan papa ofoe mama, wan manpikin ofoe oemapikin, sluit uit ofoe hari ensrefi poeroe, dan den famiribanti ofoe foe égi broedoe e tan. Disi wani taki dan, dati ala sani ini na osofamiri e tan a srefi te wan sma foe a osofamiri sluit uit? Kwetkweti.
11 Wan sma di sluit uit koti poeroe na jeje fasi foe na gemeente; den fosten jeje banti broko krinkrin. Disi de so toe, srefi nanga famirman, nanga den di e libi wantewante ini na oso. Aladi den memre foe na osofamiri e èrkèn den osofamiri-banti, foe datede den no sa abi moro langa jeje demakandra nanga en. — 1 Sam. 28:6; Odo 15:8, 9.
12. Sortoe kenki foe jeje gemeenschap ofoe demakandra ben sa kan kon efoe wan osofamiri sluit uit?
12 Disi sa wani taki kenki ini na jeje demakandra di ben de ini na oso. Foe eksempre, efoe na man ben sluit uit, dan en wefi nanga pikin no sa firi switi te a de hori wan osofamiri-bijbelstudi ofoe e teki fesi ini na lési foe na bijbel èn ini begi. Efoe a wani begi, soleki te den e go njan, a abi na reti foe doe disi ini en égi oso. Ma ini den égi ati den kan begi na Gado (Spr. 28:9; Ps 119:145, 146). Fa a de te wan sma foe na osofamiri di sluit uit wani de te na osofamiri e lési makandra na bijbel ofoe abi wan bijbelstudi? Den trawan ben sa kan meki a de na a studi foe arki ofoe a no e proberi foe leri den ofoe efoe a no e proberi foe prati den bribi foe en nanga den.
13. Fa papa nanga mama sa handri nanga wan pikin ini na oso di sluit uit?
13 Efoe wan pikin di no de bigisma ete sluit uit foe a gemeenschap, dan a no de foe taki dati den papa nanga mama foe en sa sorgoe foe san a abi fanowdoe na skin sé èn kweki en a moreel sé èn gi en tranga leri. Den no sa hori wan bijbelstudi nanga en direkt lijn, pe ai teki prati na en fajafaja. Disi tokoe no wani taki dati den e aksi foe en foe sidon na a osofamiri-studi. Ooktoe den kan poti prakseri tapoe pisi foe na bijbel ofoe pisi foe den kristelek boekoe di abi rai di a abi fanowdoe (Odo 1:8-19; 6:20-22; 29:17; Ef. 6:4). Den kan tjari en go na kristen konmakandra èn meki a sidon na den, ini na howpoe dati a sa teki bijbel rai na ati.
14, 15. San moe doe efoe wan papa ofoe mama ben sa wani drai kon baka ini na osofamiri?
14 Ma fa a de nanga na situwasi te wan krosibé famirman, soleki wan manpikin ofoe wan papa ofoe mama, di no e libi ini a oso, sluit uit èn di ben sa wani drai kon libi baka ini na osofamiri? Na osofamiri kan teki na bosroiti san foe doe èn disi sa anga foe na situwasi.
15 Wan papa ofoe mama di sluit uit ben sa kan kon siki ofoe no kan sorgoe foe ensrefi na moni sé ofoe gi en skin. Den kristen pikin abi wan moreel èn bijbel verprekti foe gi jepi (1 Tim. 5:8). Kande a de fanowdoe foe teki na papa ofoe mama na den oso foe wan pisi ten ofoe foe alaten. Ofoe a ben sa kan de wan boen sani foe seti sani foe sorgoe en tapoe wan presi pe sma di e doe datrawroko de, ma pe den ben sa moe go loekoe na papa ofoe mama. San o doe o anga foe san de na fanowdoe foe na papa ofoe mama, en fasi èn a broko-ede di na osofamiri-edeman abi gi na jeje tanboen foe na osofamiri.
16, 17. (a) Fa papa nanga mama ben sa kan handri tapoe na mogelijkheid dati wan pikin di sluit uit e kon libi baka ini a oso? (b) San wi kan leri ini disi foe na agersi tori foe na lasi manpikin?
16 Disi ben sa kan de so toe nanga wan pikin di ben gwe libi na oso, ma di sluit now uit ofoe a hari ensrefi poeroe. Son tron kristen papa nanga mama ben teki foe, wan pisi ten ini den oso wan pikin di sluit uit, di kon siki na skin sé ofoe na a sé foe en firi. Ma ini ibri aparti geval den papa nanga mama kan wegi kon wegi go den omstandigheden foe na pikin. Na manpikin di sluit uit, ben libi tapoe ensrefi èn a no man foe doe disi moro? Ofoe a wani kon baka moro foeroe foedi disi de wan moro makriki libi gi en? Fa a de nanga en moreel libi nanga en fasi? A ben sa kan tjari „sroedeki” kon ini na osofamiri?
17 Ini na agersitori foe Jezus foe na lasi manpikin, na papa ben go na en manpikin di ben drai kon baka èn a ben teki en. Foedi na papa ben si na sari toestand foe na boi, meki a ben sori broko-ede leki wan papa tapoe wan natuurlek fasi. Ma wi kan si dati na manpikin no ben tjari hoeroe nanga en kon na oso ofoe ben kon nanga na jeje fasi foe go doro nanga wan sondoe libi ini na oso foe en papa. Nono, a ben sori en dipi beraw di ben komoto foe en ati èn a ben de krin dati a ben teki na faste bosroiti foe go libi baka wan krin libi. — Luk. 15:11-32.
FAMIRMAN DI NO E LIBI INI A OSO
18, 19. (a) Fa kristensma moe si demakandra nanga famirman di no de wan pisi foe na osofamiri? (b) Foe sainde na fasi disi fiti? (2 Tim. 2:19).
18 Na a tweede situwasi di wi moe loekoe, de go foe wan famirman, di sluit uit foe na gemeenschap ofoe di ben hari ensrefi poeroe èn di no de krosbé foe na osofamiri ofoe di no e libi ini na oso. So wan sma de ete wan famiri foe banti foe broedoe ofoe foe trow ede èn foe datede wan pikinso fanowdoe kan de foe sorgoe foe fanowdoe famiri-afersi. Tokoe a no de a srefi leki te a de libi ini a srefi oso, pe kontakt nanga takimakandra no ben sa kan poti na wan sé. Wi moe hori boen ini prakseri na komando foe na bijbel foe santa jeje foe „no de moro langa nanga wan sma (soema a kan de toe), di e kari ensrefi wan brada, èn di de wan hoeroeman ofoe wan gridiman . . . èn no njan srefi nanga so wan sma”. — 1 Kor. 5:11.
19 Kristensma di de famiri foe so wan sma di e libi dorosé foe na oso, sa doe moeiti foe datede foe tan farawe foe demakandra di no de fanowdoe èn den sa skotoe srefi zakelek kontakt kon de pikinso nomo. Na redelekheid foe na fasi disi e kon na krin foe tori foe sani di psa pe famirman e loekoe a tori fowtoe: ’Aladi a sluit uit foe a gemeenschap, tokoe wi de famiri, sodati wi kan handri nanga en leki fosten.’ Foe wan presi na tori disi kon:
„Wán sma di ben sluit uit foe a gemeente ben de famiri foe pikinmoro di foe dri pisi foe a gemeente. Ala en famiri ben tan abi demakandra nanga en.”
Èn wan owroeman di den e respeki toemsi e skrifi:
„Ini wi kontren wan toe sma di sluit uit èn di abi wan bigi famiri, e kisi bigi odi te den e kon inisé foe na Koninkrijkszaal. Nanga wan naki tapoe a skowroe èn nanga a seki foe anoe den e tjari den kon ini na zaal (aladi den famiri sabi dati na sma di sluit uit e libi ete wan hoeroe libi). Na bigi broko-ede foe mi e go na den sma di ben sluit uit foe na gemeenschap, di moe si dati Jehovah nanga en pipel no wani si na libifasi foe den na ai èn dati den moe si na fanowdoe troetroe foe abi troetroe beraw. Ma efoe den sma disi di sluit uit e kisi alaten foe na bigi famiri foe den odi, aladi den sabi den doe foe den, fa den sa kisi jepi dan foe tjari wan kenki kon?”
20, 21. Foe sainde wi moe loekoe boen te a de go foe wan sma di sluit uit? (2 Tim. 2:22).
20 Ini na fosi eeuw gemeente ben de pe foeroe sma ben de famiri foe makandra. Ma te wan sma ben sluit uit foe na gemeenschap, ala famirman ben moe tan abi demakandra gewoon nanga en solanga den no ben taki bijbel afersi nanga na sma di sluit uit? Nono, noso na gemeente no ben sa waka troetroe na baka a komando: „Poeroe na sma di doe na ogri foe oen mindri.” — 1 Kor. 5:13.
21 Wi moe broko wi ede toemsi dati na situwasi foe wan sma di sluit uit leki wan sondari no moe poti a wan sé noso loekoe leki wan pikin sani. Soleki den manpikin foe Korach ben sori krin, dan na a fosi presi wi moe de loyaal na Jehovah nanga en theokratis seti foe sani. Wi kan abi na overtoigi dati te wi hori en markitiki hé èn wi wani na demakandra nanga en georganiseerde pipel na presi nanga sma di e doe ogri, dati wi sa abi en kibri nanga blesi. — Ps. 84:10-12.
PRISIRI KONMAKANDRA ÈN FAMIRMAN DI SLUIT UIT
22. Foe sainde meki famiri-konmakandra kan meki spesroetoe problema kon tapoe a tori foe famiri di sluit uit?
22 Normaal a de so dati famirman foeroe tron e miti makandra foe njan, picknick, famiri konmakandra ofoe tra prisiri konmakandra. Ma te wan sma sondro foe abi beraw ben doe sondoe èn ben moesoe sluit uit foe na gemeenschap, dan a kan tjari en kristen famirman kon ini moeilekheid te a de go foe den sortoe konmakandra disi. Aladi den e froestan dati alaten den de famiri foe en ete, tokoe den no wani foe poti Paulus rai na wan sé dati getrow kristen „no moe de moro langa nanga” wan sondari di sluit uit.
23. San ben sa de na situwasi nanga wan famirman di sluit uit èn wan kristen trow?
23 A no abi waarde foe go loekoe wan régel di abi foe doe te famirman de tapoe konmakandra pe wan famirman di sluit uit ben sa kan kon toe. Disi ben sa de wan sani di den sma di de ini na tori moe teki wan bosroiti akroederi na rai foe Paulus (1 Kor. 5:11). Ma tokoe wi moe froestan dati efoe wan sma di sluit uit sa de tapoe wan konmakandra, pe Kotoigi di no de famirman kisi wan kari, disi séker kan abi krakti tapoe san trawan o doe. Kon wi taki foe eksempre dati wan man nanga oema di de kristen meki den trow den ini na Koninkrijkszaal. Efoe wan famirman di sluit uit e kon na a Koninkrijkszaal foe na trow, dan a no de foe taki dati a no kan de ini na trow-ipi, ofoe no kan „gi na bruid foe a gwe” soleki disi de na gwenti ini Angelsaksis kondre. Ma san foe doe efoe wan trowoso ofoe receptie de? Disi kan de wan switi èn prisiri okasi, soleki disi ben de ini Kana, di Jezus ben de drape (Joh. 2:1, 2). Ma na famirman di sluit uit sa kisi pasi foe kon ofoe den sa kari en kon srefi? Efoe a ben sa de drape, dan foeroe kristensma, ofoe den de famiriman ofoe den no de famirman, ben kan teki na bosroiti tapoe na gron foe na rai foe Paulus ini 1 Korente 5:11, dati den no moe de drape foe njan makandra nanga en èn foe demakandra nanga en.
24. Foe sortoe demakandra loyaal kristen kan abi prisiri na ini? (Odo 18:24)
24 Soboen, kristensma son tron kan firi dati den no man foe kari wan famirman di sluit uit foe na gemeenschap ofoe di hari ensrefi poeroe, foe kon na wan konmakandra pe normaal famirman ben sa de toe drape. Tokoe den kristensma kan prisiri densrefi ini na demakandra foe den loyaal memre foe na gemeente, aladi den e hori Jezus wortoe ini prakseri: „Ala sma di doe na wani foe Gado, dati de mi brada nanga sisa nanga mama.” — Mark. 3:35.
25, 26. Fa na situwasi de nanga na beri foe wan famirman di sluit uit?
25 A de wan troe sani dati wan kristen di e gi ensrefi abra na sondoe èn moe sluit uit e lasi foeroe: en boen presi na fesi foe Gado, foe de wan memre foe na prisiri gemeente foe kristen, switi demakandra nanga den brada nanga sisa èn ooktoe foeroe foe na demakandra di a ben abi nanga kristen famirman (1 Petr. 2:17). Na pen di a meki kon kan go doro te srefi baka en dede.
26 Efoe a ben sa dede leki wan sma di sluit uit, dan a seti foe sani foe beri en kan de wan problema. Den kristen famirman foe en ben sa wani sote kande wan lezing hori ini na Koninkrijkszaal, efoe dati de na gwenti di de drape. Ma dati no ben sa fiti gi wan sma di ben sluit uit foe na gemeente. Efoe a ben sori dati a ben abi beraw èn a ben soekoe na pardon foe Gado, foedi foe eksempre a ben tapoe foe doe sondoe èn foedi a ben go na kristen konmakandra, dan wan brada kande ben sa kan tjari en kon akroederi nanga en konsensi foe hori wan lezing ini na zaal foe na berpe ofoe na a grebi. Den sortoe bijbel wortoe di e taki foe na toestand foe den dedewan e de leki wan kotoigi gi sma di no e bribi ofoe e de leki trowstoe gi den famirman. Ma efoe na sma di sluit uit ben tan hori na falsi leri ofoe ben tjari ensrefi tapoe wan ogri fasi, dan srefi so wan lezing no ben sa fiti. — 2 Joh. 9-11.
LERI GI WI ALAMALA
27. Fa wi moe si den kroetoe foe Gado?
27 Wi alamala moe froestan dati na kroetoe foe Jehovah e teri (Odo 29:26). Dati de so foe den ogri takroedoe, bikasi na bijbel e sori dati Gado tegoe gi den sani disi (Odo 6:16-19). Ma disi de so ooktoe foe na kroetoe di a de tjari kon tapoe aparti sma. Na Wortoe foe Jehovah e taki krin; dati „onregtvaardikisma”, den sma di o doe „den wroko foe na skin, no sa kisi en kownoekondre” (1 Kor. 6:9, 10; Gal. 5:19-21). Gi den sortoe sma disi, presi no de ini hemel, èn sosrefi toe den no sa fiti ini na grontapoe kontren foe na Kownoekondre. Foe datede meki ibrisma di wani tan now ini Gado krin gemeente, moe doro na marki foe En. Kwetkweti Gado no sa gi pasi dati „sroedeki” sa tan leki wan pori krakti ondro en santa pipel. — 1 Kor. 5:6-13.
28. Fa na afersi foe na sluit uit foe na gemeenschap kan de wan tesi tapoe wi loyaliteit?
28 Te wan krosbé famirman sluit uit foe na gemeenschap, dan libisma firi, a no de foe taki, kan de wan bigi tesi gi wi. Tokoe wi moe froestan dati te foe kaba wi no sa doe no wan sma boen èn wi no sa prisiri Gado, efoe wi gi pasi dati firi tjari wi so fara foe poti En koni rai nanga tiri na wan sé. Wi moe sori wi froetrow krinkrin ini a volmaakti regtvaardiki fasi foe den pasi foe Gado, èn ooktoe ini en seti foe sani foe sluit sma di e doe ogri èn di no abi beraw uit foe na gemeenschap. Efoe wi e tan loyaal na Gado èn na a gemeente, dan baka wan pisi ten na sma di doe na ogri kande sa leri wan sani foe dati, sa abi beraw èn kon baka ini na gemeente. Ma ofoe disi sa psa ofoe no sa psa, wi kan kisi trowstoe foe san David ben taki na a kaba foe en libi:
„Ala den kroetoe-bosroiti foe Gado de na mi fesi; Èn meki Jehovah pai mi akroederi mi regtvaardiki fasi, akroederi mi krinfasi na en fesi. Na wan sma di de loyaal, joe sa handri ini loyaliteit; na wan tranga man di de sondro fowtoe, joe sa handri na wan sondro fowtoe fasi; na a sma di e hori ensrefi krin, joe sa sori joesrefi krin . . . Èn na pipel di abi sakafasi joe sa ferloesoe.” — 2 Sam. 22:23-28.
[Prenki na tapoe bladzijde 269]
Wan papa ofoe mama di sluit uit moe kisi kande sorgoe ini na oso foe kristen pikin.
[Prenki na tapoe bladzijde 271]
Na lasi manpikin no drai go baka na oso foe go doro nanga en sondoe libi, ma a ben abi beraw. En papa ben teki en baka.