Abi faja gi „na wroko foe Masra”
„Kon de stanfaste, sondro foe seki, abi alaten foeroe foe doe ini a wroko foe na Masra.” — 1 Korinte 15:58.
1. Foe san-ede meki na opobaka-howpoe moesoe wani taki troetroe wan sani gi wi?
NA HOWPOE foe na opobaka moe de alaten wan bigi tranga gi ibriwan foe wi. Wi alamala abi foe doe nanga na dede leki feanti direkt ofoe indirekt. Te lobiwan foe wi dede, dan wi kan go prakseri dipi foe den toemsi bigi prakseri foe Jehovah, sodati „wi no e (kré) leki den tra sma, di no abi howpoe”. Wi kan abi na bribi dati den dedewan sa opo baka, soleki Jezus ben opo baka foe dede (1 Thess. 4:13, 14). Ooktoe wi abi na séker froewakti dati, efoe wi srefi dede, Jehovah sa prakseri wi ini na opobaka, efoe wi ben hori wisrefi getrow na a gi di wi ben gi wisrefi abra. — Joh. 5:28, 29; 6:40.
2. Fa wi moe si na libi te joe loekoe Pred. 9:11?
2 Te den „laatste dé” disi e doro esesi na laatste pisi foe den, dan foeroe foe wi e howpoe foe tan na libi te na „bigi benawtoe” kon sondro foe wi abi foe dede oiti (Matt. 24:21; 2 Tim. 3:1). Ma neleki a de nanga den gaw-wan, den trangawan, den koniwan nanga den froestandikiwan, dan „ten nanga onfroewakti sani di kan pasa e miti den alamala”. Wan onfroewakti siki, wan ongolokoe ofoe wan rampoe kan miti wi. Fa a de ini disi wan moi sani te wi ben gi wi srefi ini na dienst foe Gado nanga wi heri ati, sili, froestan nanga krakti! Bikasi dan wi kan de séker foe en boen-ati èn froewakti foe kisi wan opobaka. Boiti dati, a hori tranga foe wi getrowfasi ben sa de wan dekati nanga blesi gi tra sma di ben loekoe na wi èn di ben arki na wi, sodati densrefi kan kisi ferloesoe ini na howpoe foe na opobaka. — Pred. 9:11; Mark. 12:30; 1 Tim. 4:15, 16.
DEN KON TRANGA NANGA NA HOWPOE FOE NA OPOBAKA
3. (a) Wi moe poti wi ai tapoe sortoe marki èn sainde? (b) Na sortoe fasi na opobaka-howpoe moe de wan fonten foe krakti gi kristensma?
3 Na apostel Paulus ben ferklari: „Efoe ini na libi disi wawan wi ben poti howpoe ini Kristus, dan foe ala sma wi de moro foe sari.” Na bribi foe wi ben sa de wan soso sani èn wi préki ooktoe. Ma wi ai ben poti faste tapoe na seker marki foe libi ini Jehovah njoen ordening — ofoe wi sa kisi en foe di wi sa pasa Har-mágeddon libilibi, ofoe, soleki a sa de gi son sma, foedi wi sa kisi wan froekoe opobaka foe dede. Paulus ben taki ini en ten nanga kristen di ben kisi salfoe nanga Gado jeje èn foe soema den ben froewakti dati den ben ondrofeni wan dopoe ini na dede, soleki Jezus ben ondrofeni disi ini a ten foe dri nanga afoe jari te nanga na dedestrafoe foe en tapoe na Calvarie-bergi. Foe datede meki Paulus e aksi na aksi: „Efoe den dede sma no e kisi opobaka kwetkweti, dan foe san-ede den e kisi dopoe ooktoe nanga na marki foe de den sortoe sma dati?” Ja, na howpoe foe na opobaka ben de wan fonten foe krakti gi den kristen dati èn ben meki den horidoro ini foeroe tesi; a kan tranga kristen ini disi ten ooktoe, ofoe den abi na howpoe now foe libi foe tego ini na hemel kownoekondre ofoe — soleki a de nanga na moro bigi pisi foe den libisma — foe libi ini na grontapoe kontren foe na kownoekondre dati. — 1 Kor. 15:13-19, 29.
4. Foe sortoe réde wi moe loekoe boen foe no kon flaka nanga na epicuristische filosofie?
4 Aladi Paulus e skrifi foe a situwasi ini en ten, a de go moro fara foe taki: „Foe san-ede wi toe de ibri joeroe ini gevaar? Ala dé mi e si na dede. Disi mi e djaranti oen, brada, foe na toemsi bigi prisiri di mi abi ini Kristus Jezus, wi Masra, foe oen. Efoe, leki libisma, mi ben feti na Efese nanga boesi meti, sortoe boen dati de gi mi? Efoe den dedesma no e kisi opobaka, ’meki wi njan èn dringi, bikasi tamara wi e dede’.” Aladi Paulus ben meki na „boen njoensoe” bekenti di de lontoe na Kristus di opobaka foe dede, a ben ondrofeni foeroe gevaar nanga ferfolgoe ma ini ala den pina disi a ben abi na kibri èn blesi foe Gado. Efoe na opobaka ben sa de soso wan prépré sani, dan ala disi ben sa de foe soso. Efoe disi ben de so, dan leki den epicurische filosoof nanga den bakaman foe den, dan Paulus nanga den brada foe en ini Korinte ben sa kan gi den srefi abra na ala sortoe prisiri. — 1 Kor. 15:30-32.
5. (a) O troe na opobaka-howpoe moe de gi wi? (b) Sortoe toemsi moi eksempre wi abi ini disi ten te wi poti na kownoekondre leki a marki foe wi?
5 Ma na howpoe foe na opobaka nanga na Messias kownoekondre de wan troetroe sani. Den tai ini Gado tego prakseri. Soleki na howpoe disi ben jepi kristensma ini den ten foe den apostel, na so a de jepi den now. Na disiten historia foe Jehovah Kotoigi e kon moi nanga na eksempre foe doesoen-doesoen kristen di sondro frede ben tanapoe fesi na fesi nanga na dede, nanga na sabi dati a getrowfasi foe den ben gi den na djaranti foe wan froekoe opobaka, efoe ini den „njoen hemel” ofoe tapoe na „njoen grontapoe”. Prakseri den hondro hondro Kotoigi di den ben koti den ede poeroe, soetoe den kiri ofoe naki den kiri ofoe di ben dede foe angri ede ini den strafoe-kampoe foe Hitler. No langa pasa kaba foeroe Kotoigi ini bepaalde socialistische kondre èn ini ontwikkelingskondre ben hori doro ini gevaar nanga ferfolgoe. Ma alaten den ben poti den froetrow ini Gado Kownoekondre di e kon. Disi ben de na marki foe den, efoe den ben sa kisi en now, foe di den pasa libilibi na „bigi benawtoe” ofoe foe di den ben sa kisi wan opobaka. Wi alamala moe poti now na kownoekondre disi leki na marki na wi fesi. — Openbaring 21:1-4.
6. Sortoe eksempre foe Afrika de wan dekati gi opziener foe gi densrefi sondro frede, srefi efoe den moe lasi den libi?
6 Teki foe eksempre na Afrikan kondre Zimbabwe, di ben prati foeroe jari baka makandra nanga den feti foe borgroe nanga makandra. Jehovah Kotoigi ben de aparti foe na neutraliteit foe den ede èn foe na prékiwroko foe na kownoekondre di den no stop ini na pisi ten dati foe tranga dwengi (Joh. 17:6). Spesroetoe gi den opziener di e waka lontoe a ben de toemsi gevaarlek foe tan tjari fisiti go na den gemeente foe bow den. Ma den tan go doro nanga disi èn ben tjari nanga disi den libi kon ini gevaar. Te den getrow brada disi ben e waka foe na wan gemeente go na a trawan, dan sontron den ben kisi den. Den ben gi den nen dati den ben de spion nanga vreemde sma ini na kontren èn den ben tapoe skreki gi den dati den o kiri den. Den ben kiri wan kring-opziener, aladi den ben poti en dedeskin na sé en fiets leki wan warskow gi sma di e psa. Ma ete a ben de so, dati tra kringopziener ben go doro nanga den dienst, te leki na kon foe moro vréde ten ben tjari lekti kon foe na vorm disi foe gevaar. Efoe oiti wi ben sa kon ini den srefi omstandigheden disi, meki wi tan doe wi „santa dienst” gi Gado ooktoe sondro frede! — Luk. 12:4-7; Rom. 12:1, 2.
7. Fa den brada nanga sisa foe wi ini El Salvador ben kisi blesi, foedi den ben hori fasti na a howpoe foe den?
7 Na a momenti disi wan srefi moeiliki ten de ini El Salvador, pe ini na heri kondre wan feti foe borgroe de nanga makandra. Ooktoe ini na kondre disi, Jehovah Kotoigi de strikt neutraal nanga na ogridoe. Tokoe son wan foe den lasi den libi ini feti nanga gon. Ma getrow owroeman ben go doro foe dini gemeente nanga geïsoleerde groepoe foe gi den tranga èn dekati (Teki gersi Jesaja 32:1, 2). Son wan foe den eskép foe dede tapoe wan aparti fasi, ma den teki na fasti besroiti foe go gewoon doro nanga na leri èn herderwroko foe den, awansi alaten na libi foe den de ini gevaar (1 Petr. 5:1-4). Den gemeente e hori den konmakandra foe den bifo na avondklok bigin, èn Jehovah ben blesi den foeroe nanga wan 22 procent kon moro foeroe foe na nomroe foe prékiman ini 1981. Den 8242 Kownoekondre-prékiman ben hori na a kaba foe na dienstjari 13.948 oso-bijbelstudi na njoen sma. Fa tapoe wan wondroe fasi na Gado foe wi e blesi ala den di sondro frede e go na fesi, ala di ini ibri joeroe den de ini gevaar!
8, 9. (a) Fa son wan ini goedoe kondre ben kisi kori? (b) Fa wi moe doe èn foe san-ede?
8 Ma son wan ini moro goedoe èn a gersi leki den de „boen” kondre ben kisi kori foe waka baka wan libifasi di de gevaarlek ini jeje fasi. Den denki dati den kan abi krosbé matifasi nanga na grontapoe èn dati den kan gi den srefi abra na epicurische prisiri ma na a srefi ten kan tan tanapoe nanga wán foetoe ini Gado organisaatsi. Kande na onfroestandiki demakandra nanga sma di fadon komoto na bribi abi wan takroe krakti tapoe den, sodati na waarderi foe na grani foe den foe geregeld faja kownoekondredienst kon flaw. Fa a de wan don sani! Paulus e taki krin gi ala den sortoe sma disi: „No kori oensrefi. Takroe demakandra e pori boen gwenti.” Boen theocratisch gwenti tapoe a kontren foe go na konmakandra èn dienst gi Gado makriki e go na wan sé gi den prisiri foe wan tranga-ede grontapoe. Na loekoe tapoe na njoen seti foe Gado e kon de frafra èn nanga dati ooktoe na opobaka-howpoe. Den sortoe sani disi ben pasa ooktoe nanga Hymenéus, Alexander nanga Filétus ini Paulus ten. Èn a de wan sari sani dati disi e psa ooktoe nanga son wan ini disi ten. — 1 Kor. 15:33; 1 Tim. 1:18-20; 2 Tim. 2:15-19.
9 A de wan sjen sani te wan sma tapoe na lati joeroe disi e go abra foe no hori baka moro langa nanga en heri ati gi Jehovah organisaatsi nanga na dienst di disi e doe. Na disi ten seti foe na grontapoe de na a lanki foe wan peti di no abi gron. Soso te wi „tanapoe ini na boen njoensoe èn hori tranga na en, wi e kisi ferloesoe”. A de fanowdoe srefi-srefi dati wi tan gro ini sabi foe Gado. Paulus e taki foe datede nanga reti gi den sma di ini disi e misi foe doe wan sani: „Kon wiki èn kon na oen froestan tapoe wan regtvaardiki fasi èn no doe sondoe, bikasi son sma de sondro sabi foe Gado. Mi e taki foe bewégi oen foe kisi sjen.” — 1 Kor. 15:1, 2, 34.
„KON DE STANFASTE”
10. (a) Fa Paulus èn na disi ten „srafoe”-klasse tanapoe nanga den „lobi brada” foe den? (b) Fa wi jaritekst foe 1982 abi foe doe nanga dati?
10 Paulus e besroiti en takimakandra foe poti krakti gi na opobaka-howpoe tapoe wan waran, èn switi fasi. A de taki: „Foe datede, mi lobi brada.” Nanga ala prisiri a wani dati en jeje brada doro a marki foe den. Na a srefi fasi toe na „getrow èn koni srafoe” ini disi ten, e broko en ede tranga nanga na jeje tanboen foe den miljoen miljoen sma tapoe na heri grontapoe di abi belangstelling gi a kownoekondre foe Jehovah di opo pas. Na „srafoe” wani sote dati ala sma foe na „bigi ipi” keur boen foe libi ini na grontapoe kontren foe na kownoekondre. Den kan „komoto foe na bigi benawtoe” te den „wasi den krosi” èn e dini Gado (Mattéus 24:45-47; Openbaring 7:9, 14). Fa na marki disi kan doro? Te den e teki fajafaja prati na a wroko foe wi Masra Jezus Kristus. Paulus e sori disi ini den tra wortoe, di de na jaritekst foe Jehovah Kotoigi ini 1982:
„Kon de stanfaste, sondro foe seki, abi alaten foeroe foe doe ini a wroko foe na Masra.” — 1 Kor. 15:58.
11. San a wani taki, foe kon de stanfaste?
11 Na égifasi foe tan stanfaste de troetroe fanowdoe gi den sma di wani kisi libi ini Jehovah njoen seti. Tan stanfaste wani taki sondro foe kenki, abi wan faste besroiti, sondro foe degedege. Dati de na sortoe foe bribi di wi moe abi, wan séker froewakti foe den sani di no de foe si nanga ai èn di didon ini a ten di e kon, ma di de net so troe gi wi leki den ben de dja troetroe èn disi e doe kon foe a stoeka foe wi foe den Boekoe. — Hebr. 11:1.
12. Sortoe réde wi abi foe de sondro degedege ini wi dienst?
12 Wi sabi dati na Messias kownoekondre de krosbé èn ben opo ini 1914 ini hemel. Wi ben si na „marki” foe Kristus „denoja” ini kownoekondre glori ini den djoegoedjoegoe jari di ben psa na grontapoe ini den „laatste dé” disi. Wi ben si fa engel e tjari na wroko, di a pipel foe Gado e doe te, nanga na faja foe na zendingwroko, den e préki „tapoe na heri grontapoe”, èn di leki wan baka pisi foe dati e meki dati letterlek miljoen miljoen sma e poti prakseri na a „boen njoensoe”. Den foeroe vorm foe druk foe na sé foe Satan grontapoe, sondro degedege, sa kon moro foeroe, ma disi de wan réde foe degedege ini wi „santa dienst”, wi diri dienst gi na Soeverein foe wi libi, Jehovah Gado? Kwetkweti! — Matt. 24:3-14; 25:31-34; Openb. 7:15; 14:6, 7.
„NO SEKI”
13. (. . . ?)
13 Paulus e gi wi dekati ooktoe foe „no seki”. A fasi foe no seki de krosbé foe a fasi foe de stanfaste. A wani taki dati wi no moe gi pasi noiti dati wi degedege ini wi getrowfasi te wi e doe Gado komando. Disi ben de na fasi foe Job, di leki wan boen eksempre ben kibri en getrowfasi èn di ben taki foe en Gado nanga Kroetoeman: „Baka di a ben tesi mi, dan mi ben kon na . . . doro leki soso gowtoe.” Wi kan sori so wan froetrow? Disi kan efoe neleki Job wi kan taki foe Jehovah: „Mi ben hori en pasi, èn no e beni komoto. Mi no e drifi komoto foe na komando foe en mofo-boeba. Mi kibri den . . . wortoe foe en mofo leki wan goedoe, ja moro leki san ben skrifi gi mi” (Job 23:10-12). Wi sa kon de stanfaste èn sondro foe seki tan ini na waarheid, efoe, neleki Job, wi sa go moro fara ete leki san tanapoe tapoe a programma foe wi geregelde konmakandra, foedi wi o diki dipi ini den boekoe foe a Wachttoren-genootschap foe kisi moro jeje leti foe na disi ten gebroiki foe a Wortoe foe Gado.
14. (a) Fa Na Wachttoren ben go a fesi foe gi sma jeje leti, èn nanga sortoe bakapisi? (b) Sortoe warskow a ben meki sma jere èn fa foeroe sma ben teki disi tapoe wan boen fasi?
14 Moro leki wan hondro jari kaba, na tijdschrift Na Wachttoren — Boskopoeman foe Jehovah kownoekondre, ben go na fesi foe bow wan patron foe waarheid foe Jezus ferloesoeprijs, na opobakahowpoe èn a kon foe na kownoekondre foe Gado. Nanga jepi foe en bladzijde Na Wachttoren ben sorgoe dati na bijbel ben kon na libi ini na froestan èn ati foe miljoen miljoen opregti sma. A ben jepi den sma disi foe si den fowtoe sani di e leri ini den bribi foe na kristenheid èn ooktoe ini na heri grontapoe-makti foe falsi bribi — „Babylon na Bigiwan”. A ben poti prakseri tapoe na bigi jeje fadon foe „Babylon na Bigiwan” èn a ben meki sma jere na profétis komando foe na engel: „Komoto foe en, mi pipel, efoe joe no wani teki prati ini en sondoe, èn efoe joe no wani kisi wan pisi foe en tanteri” (Openb. 17:1, 5, 15, 18; 18:2, 4). Foeroe smi ben kisi jepi foe doe disi troetoe, èn den ben tron loyaal jepiman foe Jehovah Messias kownoekondre.
15, 16. (a) San son sma no e froestan? (b) Soema de na „srafoe” dati foe Mattéus 24:46? (c) Oten èn fa tapoe a tori foe a „srafoe” a ben kon na krin dati Gado soso wán kanari ai gebroiki foe panja waarheid?
15 Ma alaten sma ben de, di, na presi dati den ben tan sondro foe seki ini den loyaal jepi foe na Kownoekondre, wani drifi go baka na den leri èn pasi foe na falsi bribi. Den no e froestan, dati na Méstri, Kristus Jezus, e gebroiki na salfoe groepoe bakaman foe en na grontapoe leki wan „getrow èn koni srafoe” foe foe prati jeje njanjan. — Matt. 24:45-47.
16 A ben de foe a fosi tron ini 1895 dati son mati foe Zion’s Watch Tower ben gi na rai dati na tijdschrift disi sma moe kon sabi dati a de wán nanga na „srafoe” dati — na „dienstknekti dati”. (Matt. 24:46, Statenvertaling). Feanti ben opo èn kakafoetoe tranga gi a prakseri disi foe den mati disi, sodati The Watch Tower foe 1 oktober 1909 ben abi disi foe taki:
„Den mati foe wi e hori tranga dati na tekst disi e sori dati na Masra no ben sa gebroiki na a kaba foe na evangelium-ten foeroe kanari foe na panja foe na waarheid, ma wán kanari . . . den e taki dati den alamala ben kisi na sabi di den abi now direkt foe den boekoe foe na Watch Tower Bible and Tract Society ofoe indirekt foe den sma di ben kisi na jeje leti foe den nanga jepi foe na kanari disi. Foe datede meki den e prisiri leki „kompe-dienstknekti” foe wroko makandra na a wroko foe a Genootschap, ini na overtoigi dati nanga dati den e waka baka na tiri foe na Voorzienigheid foe Gado, èn ooktoe den komando foe na Wortoe foe Gado.”
17. (a) Fa son sma ben proberi foe sma lasi froetrow ini na waarheid fosten èn ini disi ten? (b) Foe san-ede a moe de wan prisiri sani dati wi e tan „sondro foe seki” nanga na „srafoe”?
17 Dan, te ai sori moro fara tapoe den feanti dati, The Watch Tower ben taki:
„Den e proberi foe drai na froestan foe den sma di ben kisi jeje leti foe go a wan tra sé foe di den e taki, . . . dati „ibriwan sma” moe diki kon na tapoe den djamanti foe na waarheid foe Gado èn dati den boekoe foe a Genootschap ben gi den soso wan bigin foe a sani di den now moe go a fesi a ini, sodati den leri foe a Genootschap te foe kaba sa kon fara na baka. Den deloyaal „kompe-dienstknekti” ben gi rai moro fara dati na gevaar de, dati wan sma sa anbegi na Genootschap èn foe no doe disi a de fanowdoe foe skopoe na Genootschap ofoe drai bika gi en. Den e taki, meki wi doe en sondro den boekoe foe na Genootschap!”
Dati ben skrifi 72 jari psa kaba, èn te na dé foe tide wantoe sma de ete di ben sa wani foe broko na froetrow foe sma ini na heri patron foe waarheid di Jehovah ben bow safrisafri èn a ben gebroiki na wan enkri kanari. Fa a moe gi wi prisiri dati wi „no seki” makandra nanga na „getrow srafoe” foe a Méstri, te wi e si na leti e kon moro krin! — Kol. 1:21-23.
„ABI ALATEN FOEROE FOE DOE INI NA WROKO FOE MASRA”
18. (a) San de a recept foe tan gosontoe na jeje fasi, èn fa Odo e sori dati? (b) San de wan toe fasi foe „abi foeroe foe doe ini a wroko foe na Masra”?
18 Ja, „abi foeroe foe doe”, no ini na doe „foe san wan sma en srefi wani”, ma ini na wroko foe na Masra Jezus Kristus. Dati de na recept foe tan de gosontoe na jeje fasi. Lesi na jeje fasi kan meki wan sma go degedege. A kan tjari pori kon soleki Odo 19:15 e sori: „Lesi e meki wan sma fadon go ini dipi sribi, èn wan mi-no-ke sili e tan nanga angri.” Ini a tori foe jeje lesi dorodoro dan jeje angri nanga dede de na bakapisi. Meki wi tan abi foeroe foe doe datede foe di wi e go alaten oso foe oso foe préki, (ooktoe ini kontren pe sma no wani arki), foe gi kotoigi na ibri okasi, foe meki gobaka na sma di gersi skapoe èn hori geregelde bijbelstudi na den nanga jepi foe wan foe den boekoe foe na Genootschap. Son wan foe wi kan doe srefi dienst ini na wroko foe na Masra Jezus, di ben de foe troe na „pionier” foe wi bribi, kande leki „pionier” ofoe foeroe-ten Kownoekondre-prékiman. — Hebr. 12:2, Moffatt; Jes. 6:8, 10.
19. Sortoe geest wi alamala kan sori, ma son sma ben sa kan abi wan moro bigi prati na a wroko?
19 Efoe wi e wroko ofoe no e wroko leki pionier, wi alamala kan doe wi „santa dienst” nanga prisiri èn nanga wan troe pioniergeest. Disi kan meki dati ten foe ten foeroe foe wi go ini na „jepipionierdienst”, èn efoe na prisiri di wi e kisi foe disi, kan gi son wan foe wi tranga foe tron gewone pionier, o fa moro bigi a prati foe wi sa de na „a wroko foe na Masra”! — Rom. 12:1, 2.
20. (a) Foe soema wi kan de kompe-wrokoman? (b) Nanga sortoe sekerfasi wi moe go na fesi na a sé foe na marki? (c) Sortoe wortoe foe Paulus wi moe meki kon de foe wi te foe kaba, èn foe san-ede?
20 A wroko disi foe a Masra Jezus, di wi moe waka ini en foetoestap, de ooktoe „a wroko foe Jehovah” (1 Kor. 16:10; Joh. 5:17). Fa wi abi wan bigi grani ini na „besroiti foe na seti foe sani” foe kan de kompe-wrokoman foe na Soeverein Masra Jehovah, na Masra Jezus Kristus nanga den engel ini hemel (1 Kor. 3:9; Matt. 25:31-33; 28:19, 20). Wi sabi namkoe dati na wroko foe wi no de foe soso ini wanfasi nanga na Masra. Efoe wi sa kon ini na Njoen Seti nanga jepi foe wan opobaka ofoe foe di wi pasa libilibi na „bigi benawtoe”, meki wi kan taki den wortoe foe na getrow apostel Paulus ini 1 Korinte 15:57: „Grantangi foe Gado, bikasi a ben gi wi wini nanga jepi foe wi Masra Jezus Kristus!” Ja, A de gi wi na victori tapoe na dede, sodati wi e tjari go na den moro bigi blesi foe tego libil
Joe e froestan na prenspari fasi foe den punt di e kon now?
◼ Foe san-ede a de fanowdoe foe hori na opobakahowpoe na libi alaten?
◼ Sortoe dekati na opobakahowpoe e gi a wi brada nanga sisa di ala dé moe tanapoe na fesi foe dede?
◼ Foe san-ede sma di abi demakandra nanga sma di e degedege ofoe sma di fadon komoto na bribi, moe „bewégi foe kisi sjen”?
◼ Foe san-ede na fasi foe stanfaste de fanowdoe foe kan kisi Jehovah Njoen Seti?
◼ O prenspari na ferklari de di ben taki foe wán kanari ini „The Watch Tower” moro leki 70 jari pasa kaba?
◼ Fa pionierwroko ofoe tra sortoe wroko foe „abi foeroe foe doe nanga na wroko foe na Masra” kan dini leki wan kibri?
[Prenki na tapoe bladzijde 115]
Son opziener di no frede, de „ibri joeroe ini gevaar” te den e doe den dienst foe den
[Prenki na tapoe bladzijde 116]
Boen gwenti tapoe a tori foe go na konmakandra èn velddienst e jepi wi foe tan faja gi Gado kownoekondre