Loyaliteit na „a Kownoekondre foe wi Masra èn foe en Kristus”

„Mi sa abi lobi gi joe, o Jehovah, mi tranga. Nanga wan sma di de loyaal, joe sa handri ini loyaliteit.” — Ps. 18:1, 25.

1. (a) Fa David ben teki Jehovah loyalitet? (b) San David ben erken, srefi di a ben de boen owroe?

JEHOVAH ini en loyaliteit ben de na Soema di ben meki David opo kon èn di ben meki a sdon tapoe na troon abra heri Israël. Dati ben pasa ini na jari 1070 bifo G.T. Na David di ben poti na tapoe na troon, ini waarderi foe na lobi boenfasi foe Jehovah, alaten ben erken Gado leki na Moro Hé Kownoe abra Israël. Spesroetoe foe na Messias, David fara bakaten pikin, Gado ben taki: „Mi, ja mi, ben poti mi kownoe tapoe Sion, mi santa bergi” (Ps. 2:6). Ini erkenning foe a troetroe Tiriman David ben taki: „Poti tog prakseri tapoe na babari foe mi kré foe jepi, o mi Kownoe èn mi Gado, bikasi na joe mi e begi. O Jehovah, ini na mamanten je sa jere mi sten” (Ps. 5:1-3). Di David ben de boen owroe èn ben gi na troon abra na en manpikin Salomo, a ben begi na fesi foe na heri konmakandra foe Israël na Gado èn ben taki: „Foe joe na kownoekondre de, o Jehovah. Joe di e opo joesrefi poti leki ede abra ala sani. Na goedoe èn na glori de foe joe ede, èn joe e tiri abra ala sani.” — 1 Kron. 29:11, 12.

2. (a) Sortoe owroe stré-aksi foe foeroe eeuw wi moe erken ini disi ten? (b) Sortoe aksi pe wi moe teki wan besroiti wi moe piki now?

² Na toemsi prenspari sani dati, di so langa pasa kaba kownoe David ben erken na publiki, wi leki libisma mekisani di no de kownoe, moe erken ook toe sondro sjen. Na sori di Jehovah Gado sori na universele tirimakti ofoe soevereiniteit de na owroe stré-aksi foe ala eeuw, di a bijbel e leri. A de a rechtszaak foe Gado di now moe kisi en troetroe besroiti na fesi foe ala volkoe nanga naatsi. Ini den laatste dé disi na stré-aksi disi sa moe kon loesoe na fesi foe na heri hemel nanga grontapoe. Jehovah sa wini èn kisi reti, san sa bewijsi sondro degedege dati a de na universele soeverein èn tego kownoe. Na aksi di wi alamala moe teki wan besroiti de: Soema sa tan loyaal na a sé foe Jehovah kownoekondre? Na fasi fa wi tanapoe nanga na afersi disi, sa bepaal efoe wi sa kisi tego libi ofoe wi sa ondrofeni tego pori!

3. Sortoe rampoe ben kon ini 607 bifo G.T., ma foe sainde disi no ben de wan bewijsi foe deloyaliteit foe na sé foe Jehovah?

³ Ma Jehovah ben drai baka gi en kownoekondre ini a ten dati ini na jari 607 bifo G.T.? Foe sainde wi e aksi na aksi disi? Foe di ini na jari dati a ben gi pasi dati na kownoekondre foe Babylon ondro Nebukadnezar ben pori Jeruzalem nanga na tempel, sodati na kownoekondre foe den djoe ben poeroe na pasi èn te nanga now no ben kon baka. Dati de troe, ma tokoe Jehovah no ben drai baka tapoe na fasi dati gi en kownoewroko ofoe tirimakti. Foe troe, En ben de na Soema di ben poti taki na foto Jeruzalem ben moe pori. Ma disi no ben de wan doe foe deloyaliteit na a sé foe na agersi, moro lagi kownoekondre abra en pipel di a ben teki. A ben handri soso akroederi na owroe bepaling foe na froebontoe, di a ben sroto nanga Israël èn di ben poti tapoe na owoe froebontoe nanga Abraham. Na a ten foe na rampoe jari 607 bifo G.T. dan Juda nanga na fikapisi foe Israël ben tron sma di ben broko na froebontoe tapoe wan sjen fasi. Soboen Gado ben handri nanga den akroederi den bepaling foe en Wetfroebontoe, di ben sroto tapoe na bergi Sinaï nanga jepi foe Mozes.

Na Kownoe di abi na wettelijk reti

4. Fa den wortoe foe santa jeje ini Ezechiël 21:25-27 e sori dati Jehovah de loyaal?

⁴ Foe taki foe na laatste kownoe foe Juda na Jeruzalem, Gado ben meki en proféti Ezechiël (di ben tjari go kaba na Babylon) ben taki san e kon now ondro krakti foe santa jeje: „Èn foe joe sé, o ogri granman foe Israël di kisi mankeri te foe dede, di na dé foe joe kon ini na ten foe na sondoe foe na kaba, disi na Masra Jehovah ben taki: ’Poeroe na tai-ede èn poeroe na kroon. Disi no sa de na srefi. Meki kon hé srefi san de lagi èn meki kon lagi srefi san de hé. Mi sa meki a tron wan broko ston-ipi, wan broko ston-ipi, wan brokoston-ipi. Ma foe taki foe disi toe, a no sa tron foe nowan sma te leki en kon di abi na wettelijk reti èn mi moe gi en na en.’” — Ezech. 21:25-27.

5. (a) Foe sainde na pori foe na kownoekondre ben sa de soso foe wan pisi ten? (b) Fa moro leki 600 jari na baka disi ben kon troe?

⁵ Akroederi den wortoe dati, na Masra Jehovah Gado ben tan hori alaten ete krakti den Kownoekondre afersi ondro controle. Na pori foe en moro lagi kownoekondre na grontapoe ben sa de soso foe wan pisi ten. Na en faste ten wan sma ben sa kon di ben abi na wettelijk reti tapoe na Messias kownoewroko, èn dan na Masra Jehovah Gado ben sa gi en na en. Te nanga na ten dati, wan sma ben sa moe wakti nanga a gebroiki foe na wettelijk reti tapoe na kownoewroko. Foe di na reti foe na froebontoe ben de ini na famiri foe David, dan na sma di ben sa kon èn di den ben sa gi na kownoewroko, ben moe de wan bakaten pikin foe na getrow kownoe David. A ben de foe taki tangi na a loyaliteit foe David na fesi foe na tego Kownoewroko foe Jehovah, dati na froebontoe disi foe wan tego kownoekondre ben sroto nanga en ini en famirilin (2 Sam. 7:8-16). So wan 6 eeuw na baka, ofoe ini na jari 2 bifo G.T., wan engel foe Gado ben sori en srefi na wan bakaten pikin foe David èn a ben taigi en dati a ben sa tron na mama foe na pramisi erfgenaam foe David. Moro fara na engel taki: „Jehovah Gado sa gi en na troon foe en tata David, èn foe tego a sa tiri leki kownoe tapoe na oso foe Jakob èn na en kownoekondre nowan kaba sa kon.” Den ben sa kari en Jezus. — Luk. 1:32, 33; Matt. 1:18-23.

6. (a) Fa Jezus ben tron na reti erfgenaam foe David kownoekondre? (b) Foe sainde disi ben de moro leki wan grontapoe kownoekondre?

⁶ Foe di Jezus, na Manpikin foe Gado foe hemel, ben gebore ini Bethlehem, na gebortoepresi foe David, a ben tron na natuurlijk erfgenaam foe na pramisi, di ben abi en fundamenti ini na Kownoe-kondre-froebontoe di ben sroto nanga Gado èn en fositen tata David. A ben kisi a wettelijk èn a natuurlijk reti tapoe na Kownoekondre. Ma di Jezus ben teki dopoe èn ben kisi salfoe nanga na santa jeje foe Gado, en hemel Tata, dan na kownoekondre dati ben tron moro leki wan grontapoe tiri tapoe na oso foe Jakob ofoe Israël. Na a okasi dati en hemel Tata ben meki a kon gebore nanga jeje, sodati a ben tron wan jeje Manpikin foe Gado, di hemel libi ben poti na en fesi. Na so fasi a ben kisi salfoe nanga Gado jeje èn na so fasi a ben tron na Messias, wan titel di wani taki Salfoewan. — Tori foe den Apostel 4:27; 10:38; Jes. 61:1-3.

7. (a) Foe sainde Jezus no ben kisi na Messias kownoekondre no direct? (b) Sortoe kownoewroko en salfoe bakaman ben sa erken?

⁷ Foe di na kownoe-kondre ben de now ini hemel, dan Gado no ben gi en di a ben de na grontapoe èn no direct baka di a ben opo go na hemel. Aladi en salfoe discipel na grontapoe ben erken en leki kownoe foe en jeje gemeente, tog na Messias kownoekondre ben sa gi na en pas na a kaba foe san Jezus srefi ben kari „den ten foe den heiden” ofoe „den faste ten foe den naatsi”. — Kol. 1:13; Luk. 21:24; teki gersi Statenvertaling.

8. (a) O langa den „faste ten foe den naatsi” de, èn sortoe sani di ben wani taki foeroe ben marki na kaba foe den? (b) Fa na marki kon moro bigi, èn san de wan spesroetoe sani foe en?

⁸ Den „faste ten” dati ben bigin kaba ini na jari 607 bifo G.T. nanga na fosi pori foe Jeruzalem nanga anoe foe den Babylonsma, èn baka dati na kondre Juda ben libi na baka légi èn sondro sma. Akroederi kapitel fo foe Daniël profétis boekoe dan den „ten” ben sa de 7 ini nomroe èn ala nanga ala 2520 jari. Foe di den ben bigin ini na bigin foe na herfst foe 607 bifo G.T. na pori krinkrin foe Jeruzalem nanga na kondre Juda èn Benjamin, dan soboen den ben sa kon na wan kaba ini na herfst foe 1914 G.T. A wani taki foeroe dati na Fosi Grontapoe-feti ben bigin ini na laatste pisi foe 1914. Na so na profétitaki di Jezus ben taki foe na „marki” di ben sa marki na „besroiti foe na seti foe sani”, ben bigin kon troe. (Matteus, den kapitel 24, 25; Markus kapitel 13, Lukas kapitel 21). Na „marki” di ben taki na fesi foe sensi a ten dati ben kon moro krin èn moro bigi. Jezus ben ferteri san ben de wan pisi foe na „marki” dati di a ben taki: „Èn na boen njoensoe disi foe na kownoekondre sa préki tapoe na heri grontapoe leki wan kotoigi gi ala naatsi èn dan na kaba sa kon.” — Matt. 24:14.

9, 10. (a) Sortoe ten ben doro tapoe na tori foe na stré-aksi foe loyaliteit? (b) Fa deloyaal hemel mekisani ben poeroe na a ten dati, èn san disi ben abi leki bakapisi gi wi grontapoe?

⁹ Ah, ja, dan na ten ben doro foe gi na kownoekondre foe David na a glori Manpikin foe Gado ini hemel, foe di a ben de na wan enkri wan di akroederi na moro hé wet foe Gado ben abi na „wettelijk reti” na tapoe. Disi ben wani taki dati wan feti ben moe feti ini hemel. Foe sainde?

¹⁰ We, bikasi tapoe na pisi ten dati na Messias Kownoe ben bigin foe tiri, na ten ben doro gi en foe trowe komoto foe hemel ala gensman foe na njoen tiri, namkoe Satan na Didibri nanga en ipi demon. Den ben slenger den go na grontapoe, pe na seti foe sani ben de ete di den ben abi na den ondro. Den ogri hemel fetiman disi foe tego ben poeroe foe na hemel foe Gado, pe en loyaal engel e libi. Den oproeroe engel disi di ben trowe poeroe foe hemel, skotoe poti na a birti foe grontapoe, te leki den sa tai èn foe doesoen jari sa sroto ini na peti di no abi gron foe skotoe. Na feti ini hemel èn fa a waka, skrifi ini kapitel twarfoe foe Openbaring. Baka di den oproeroe engel ben poeroe foe hemel, na victori koor foe engel ini hemel ben singi tranga: „Now ben kon na ferloesoe èn na krakti èn na kownoekondre foe wi Gado èn na makti foe en Kristus (Messias), bikasi na kragiman foe wi brada, di e kragi den dé nangi neti na fesi foe wi Gado, ben slenger trowe!” (Openbaring 12:10). San disi ben wani taki gi den sma di e libi dja na grontapoe? A kon foe moro benawtoe gi na heri libisma-lo na grontapoe!

Wan ten foe kroetoe gi den loyaalwan

11, 12. (a) Fa loyaliteit e kon now tapoe tesi? (b) Fa na préki foe na kownoekondre abi foe doe nanga disi? (c) Fa wi kan taki dati wi e libi now ini wan kotiten, èn fa kande seker den sa gebroiki den engel?

¹¹ Na ten disi foe „heloe gi na grontapoe nanga na se, bikasi Didibri ben saka kon na ondro na joe, ala di a abi bigi atibron, foe di a sabi taki dati a abi soso wan sjatoe pisi ten”, de wan ten pe na loyaliteit foe sma e kon tapoe tesi — loyaliteit na a seti foe na Didibri di e go pori ofoe loyaliteit na a kownoekondre foe Gado, di opo now ini hemel èn di de ini anoe foe Jezus Kristus (Openb. 12:12). A de wan ten pe ala sma di taki dati den de discipel foe Kristus, moe kisi kroetoe foe si o fara den de loyaal na a kownoekondre di opo. Den sa meki na boen njoensoe dati foe na kownoekondre bekenti leki faja prékiman „tapoe na heri grontapoe pe libisma e libi . . . leki wan kotoigi gi ala naatsi”? Na ten disi foe overgang wi kan teki gersi toe nanga wan kotiten pe troe kristen e prati foe falsi kristen. A de soleki Jezus ben taki na fesi ini en agersitori foe na alési nanga na takroe wiwiri: „Na koti foe njanjan de wan besroiti foe wan seti foe sani èn den kokotiman de den engel” (Matt. 13:39). Disi kande seker de den srefi engel di na Soevereine Masra Jehovah sa gebroiki foe doe san tnapoe ini Psalm 50:5: „Tjari konmakandra mi loyaalwan, di e sroto mi froebontoe foe srakti-ofrandi (Hebrewtongo: den sma di e koti mi froebontoe).”

13, 14. (a) Fa joe kan kon sabi sortoe „froebontoe” e bedoel ini Psalm 50:5, 16? (b) Na sortoe 2 froebontoe salfoe kristen moe de „loyaal”?

¹³ Na „froebontoe” di den e sori a tapoe ini den vers di kari dja na tapoe (5, 16), no de wan persoonlijk froebontoe di loyaalwan e sroto foe wan persoonlijk srakti-ofrandi foe wan sma. A de moro foeroe wan nationaal froebontoe. Na Wetfroebontoe foe Mozes, di ben sroto nanga na naatsi Israël na a bergi Sinaï ini Arabia, ben gebroiki na wan profétifasi foe agersi na njoen froebontoe, di ben sroto nanga jepi foe na Moro Bigi Mozes, Jezus Kristus, leki mindriman nanga na „santa naatsi” foe na jeje Israël (Jer. 31:31-34). Ini 33 G.T. Jezus ben poti na Avondmaal foe Masra èn a ben taki: „Na beker disi wani taki na njoen froebontoe nanga krakti foe mi broedoe, di sa trowe na gron foe oen ede” (Luk. 22:20). Na njoen froebontoe ben kisi krakti soboen nanga na ofrandi broedoe di ben trowe na gron di Jezus Kristus ben dede. Den „loyaalwan” di ben tjari kon ini na njoen froebontoe, a de tjari kon ini „na froebontoe foe wan kownoekondre” (Luk. 22:28-30; Matt. 26:29; Mark. 14:25; Ps. 116:15). Èn fa a de go moro fara?

¹⁴ Kristensma di e tjari kon ini na „njoen froebontoe foe srakti-ofrandi”, no moe de wawan loyaal na a froebontoe disi, ma ooktoe na a „froebontoe foe wan kownoekondre”. Den de jeje Israëlsma, „na Israël foe Gado”. — Gal. 6:16.

15. Na sortoe fasi jeje Israëlsma moe sori dati den de loyaal?

¹⁵ Ini na „besroiti disi foe na seti foe sani” wan fikapisi foe den jeje Israëlsma disi de ete na grontapoe. Den spesroetoe abi na prekti foe handri akroederi nanga Jezus profétitaki: „Na boen njoensoe disi foe na kownoe-kondre sa préki tapoe na heri grontapoe pe libisma e libi leki wan kotoigi gi ala naatsi” (Matt. 24:14). Efoe den wani de loyaal na a „kownoekondre foe wi Masra (Jehovah) èn foe en Kristus”, dan den no kan poeroe densrefi na ondro na verprekti disi (Openb. 11:15). Den no kan de wan pisi foe na seti foe sani disi di sa go pori, nanga en politiek, en gridi handelsgeest èn en falsi bribi. Salfoe kristen e begi faja na begi di a Masra foe den ben leri den: „Wi Tata ini hemel, joe nen moe de santa. Joe kownoekondre moe kon. Joe wani moe go doro, so leki ini hemel, so toe na grontapoe” (Matt. 6:9, 10). Na presi dati den de actief bezig nanga na politiek foe na prati seti foe sani disi, den moe doe sondro foe seki san den Méstri, na „Kownoe foe den kownoe èn Masra foe den masra” ben taki: „Soekoe fosi na kownoekondre nanga en retidoe èn ala den tra sani joe sa kisi na tapoe” (Openb. 19:16; Matt. 6:33). Soso tapoe na fasi disi den kan sori dati den de den „loyaalwan” di de wan pisi foe na jeje Israël, di „ben sroto wan froebontoe foe wan srakti-ofrandi” nanga Gado, na srakti-ofrandi foe Jezus, na mindriman foe na njoen froebontoe.

Loyale „tra skapoe”

16. Fa den tekst di wi kari dja e sori tapoe wan tra loyaal klasse foe wan bigi nomroe sma?

¹⁶ Now a no moro pikinso loyaliteit e aksi foe na sé foe na klasse foe dopoe sma di gi den srefi abra, di na „bigi moksi groepoe” di ben gwe libi Egypte makandra nanga den Israëlsma e agersi; na „bigi moksi groepoe” di ben de di na Wetfroebontoe ben sroto na a bergi Sinaï (Ex 12:38; Num. 11:4). Den sma disi e akroederi nanga na „bigi ipi” di na apostel Johannes e skrifi foe den ini Openbaring 7:9-17. Ini Jezus agersitori foe den skapoe nanga den bokoboko den de leki den „skapoe” di e doe boen na den jeje brada foe na Kownoe Jezus Kristus sensi a ben bigin foe tiri ini 1914. — Matt. 24:3; 25:31-46.

17. (a) Foe san na „bigi ipi” disi de wan pisi, èn nanga soema den e tron wan ipi? (b) Fa seker den kan „blesi den srefi”? (Gen. 22:15-18)

¹⁷ Den sortoe loyaal sma disi de foe den „tra skapoe” di, soleki Jezus ben taki no de foe „na koi disi (foe Abraham)” pe na „pikin ipi” foe den 144.000 de. Tokoe na „bigi ipi” loyaalwan disi e tron „wan ipi” nanga den „skapoe” ini a „koi” dati foe di den e tjari kon ini na krosbé matifasi nanga den erfgenaam dati foe na kownoekondre foe a hemel Tata foe den (Joh. 10:16; Luk. 12:32). Foe kan tan ini na „wan ipi” dati, makandra nanga den „loyaalwan” di de ini na njoen froebontoe di Jehovah ben sroto nanga den foe Kristus srakti-ofrandi, dan den toe moe sori na loyaliteit foe den na a kownoekondre foe wi Masra Jehovah Gado èn foe en Kristus.

18. (a) San de na paiman now gi den sma di e sori dati den de loyaal? (b) Fa wi kan sori wi waarderi gi Jehovah loyaliteit gi wi?

¹⁸ Ala sma di sori dati den de loyaal, e kisi wan bigi paiman. Ini waarderi gi Jehovah Gado, na hemel Kownoe, kownoe David foe owroeten ben taki gi en: „Nanga wan sma di de loyaal, joe sa handri ini loyaliteit” (Ps. 18:25; 2 Sam. 22:26). David ben taki toe: „Jehovah abi lobi gi geregtigheid, èn a no sa libi den loyaalwan foe en” (Ps. 37:28). Odo 2:8 e gi wi na djaranti: „A sa kibri srefi na pasi foe en loyaalwan.” Ja, foe troe, Jehovah de a hémarki foe loyaliteit, èn en Kristus e waka precies na en baka. Meki wi ini wi waarderi gi na loyaliteit di Gado e sori gi wi nanga jepi foe Kristus, ini na kroetoedé disi sori dati wi no e seki ini wi loyaliteit gi Jehovah èn en kownoekondre di opo ini anoe foe Jezus Kristus, en moro loyaal Manpikin!

FA LOYALITEIT BEN SORI INI-

□ David erkenning foe Jehovah leki Kownoe?

□ Jehovah kroetoe di a sa tjari kon tapoe na ontrow Jeruzalem?

□ A tori dati Gado ben gi na kownoekondre foe David na en Manpikin ini 1914?

□ Na feti ini hemel di na Messias Kownoe ben feti?

□ Na activiteit di na salfoe fikapisi e doe now?

□ Na jepi di na „bigi ipi” e gi na a fikapisi?

[Prenki na tapoe bladzijde 135]

Di Gado loyaal Manpikin ben bigin foe tiri, dan ala engel krakti di no ben de loyaal na a kownoekondre ben hiti poeroe foe hemel

[Prenki na tapoe bladzijde 136]

Loyaliteit na a kownoekondre e aksi dati wan sma de wan faja prékiman gi tra sma