Pasa libilibi ofoe pori te na „bigi benawtoe” loesoe kon
„Den disi sa go ini na tego koti poeroe, ma den regtvaardiki wan ini na tego libi.” — Matt. 25:46.
1, 2. Sortoe prakseri son sma ben tjari kon na fesi, èn foe san ede disi de gefarlek èn wi moe lon komoto na pasi foe disi?
NA PRAKSERI dati bepaalde sma e kisi pori . . . foe tego, de wan tegoe sani gi son sma. Disi de na prakseri foe den universalisten di e bribi dati te foe kaba ibriwan sma sa kisi ferloesoe. Ini na eeuw di meki dri G.T. kaba na kerki skrifiman Origenes ben pré nanga na prakseri foe wan ferloesoe gi ala sma. Sondro foe go so fara, son wan ini disi ten di taki dati den de kristen, e ferteri na prakseri dati kande ala sma sa opobaka komoto foe dede, makandra nanga ala sma di ben dede ini na „bigi benawtoe”. — Matt. 24:21, 22.
2 Sondro foe froestan disi, den sma di abi na prakseri disi, e kon kefarlek krosibé na a leri foe na kristenheid foe wan „algemene opobaka”. Den kerki e leri dati den dede skin foe ALA dedesma sa opo baka foe kon wan makandra ini hemel ofoe ini na „hel” nanga den respectieve sili foe den. Ma na bijbel no e leri so wan „algemene opobaka”, soleki na kristenheid e froestan èn ook toe dati no ALA dedesma, srefi den ogri sma, sa opobaka ofoe sa kon baka na libi.
No ala dedesma sa opobaka
3. Fa Jezus ben sori dati no ala sma sa kisi opobaka foe dede?
3 Jezus ben ferteri dati no ibri wan sma sa opobaka. Disi e kon na krin ini en piki tapoe wan triki-aksi foe den Sadducéman, di ben bribi dati nowan sma no ben sa opobaka. A ben taki foe den sma di de „warti foe kisi na seti foe sani dati èn na opobaka foe dede” (Luk. 20:35). En wortoe e sori dati a no alamala sa sori dati den warti foe kisi opobaka ini Gado pramisi njoen seti foe sani.
4. Akroederi Openbaring kapitel 20, dan foe pe den dedewan sa kon na doro, ma sortoe agersi presi no e gi den dedewan foe en abra?
4 Ini Openbaring kapitel 20, pe den e taki foe na opobaka foe den „trawan foe den dedewan”, di no e teki prati ini na „fosi opobaka”, na bijbel e taki dati na „se” èn „hades” ben gi den dedewan di ben de na ini den. A no de taki dati den dedewan ben kon na doro foe na „se foe faja” ofoe foe na „dede di foe toe”, ini wan tra presi „Gehenna” (Hebrew tongo: Gei Hinnom) den kari en (Luk. 12:5). Soleki na wortoe „se” e sori tapoe wan collectieve watra grebi foe den sma di ben dede tapoe se di noiti moro den feni den dede skin foe beri ini gron, na so na Griki wortoe hades no abi foe doe nanga wan aparti grebi ma moro foeroe tapoe na gemeenschappelijke grontapoe grebi foe libisma. A de kon akroederi nanga na wortoe „sjeool” di wi e feni ini den Hebrew Boekoe. Jezus ben verklari: „Mi ben de wan dedesma, ma loekoe! mi e libi te foe tego, èn mi abi den sroto foe na dede èn Hades” (Openb. 1:18) Ini a ten foe en doesoen jari tiri a sa gebroiki den „sroto disi” foe fri den sma foe na dede „di de warti foe kisi na seti foe sani dati nanga na opobaka”.
5. San „Gehenna” de wan agersi fasi foe en?
5 Na a tra sé, no wan presi ini den Boekoe e taki dati Kristus abi den sroto foe Gehenna. A ben taki so foe Gehenna: „No frede den di e kiri na skin, ma no kan kiri na sili; ma frede moro foeroe en (Jehovah) di kan pori èn sili èn skin ini Gehenna” (Matt. 10:28). Professor Oscar Cullman e skrifi ini en boekoe „Immortalité de l’âme ou résurretion des morts?”: „Psuchè (sili) no abi dja foe doe nanga na Griki prakseri foe sili, ma moe vertaal moro foeroe nanga ’libi’ . . . W.G. Kümmel e skrifi foe datede nanga reti: Matt. 10:28 ’no o proberi foe poti krakti tapoe a no dede moro foe na sili, ma e poti krakti tapoe na troe tori dati soso Gado no kan pori wawan na grontapoe, ma ook toe na hemel libi.’” Ja, Gehenna de wan agersi fasi foe totale pori krin-krin, pe wan opobaka no kan kon moro. Ini na New Bible Commentary (tweede uitgave, bladzijde 786) den e kari Gehenna leki „wan skrifi foe na ’dede di e meki toe’”. — Openb. 21:8.
6. Sori nanga jepi foe na bijbel dati son sma bifo na doesoen jari kroetoedé e go na Gehenna èn foe datede no abi na howpoe foe kisi wan opobaka?
6 We now, na bijbel e sori definitief dati son sma e kon ini na agersi Gehenna bifo a bigin foe a 1000 jari kroetoedé. Jezus ben taki gi den méstri foe wet nanga den Fariséman di no ben abi beraw dati den nanga den heiden proseliet sma foe den ben de „wrokosani foe Gehenna” (Matt. 23:15, 33-35; loekoe toe Johannes 9:39-41; 15:22-24). Efoe srefi wan proselietsma foe den Fariséman ben tron wan wrokosani foe Gehenna „toe tron so moro ogri leki den srefi”, omeni moro dan Judas Iskariot de, di ben sroto wan toemsi takroe zaak nanga den foe tori Gado Manpikin (Joh. 17:12). Na so fasi a de dati sma di no abi beraw èn di fadon komoto foe bribi, no e go na Sjeool ofoe Hades, ma na Gehenna (Hebr. 6:4-8; 2 Petr. 2:1). A srefi sani de so toe gi kristen di gi densrefi abra èn di e horidoro ini espresi sondoe of gi den sma „di e drai baka” (Hebr. 10:26-31, 38, 39). Disi de soso eksempre foe sori dati son sma srefi ini „a seti foe sani disi” ben doe na sondoe di pardon no e gi foe dati, srefi no ini na seti foe sani „di e kon” (Matt. 12:31, 32; teki gersi 1 Johannes 5:16). Foe datede meki den no sa kisi wan opobaka.
Den kroetoe foe Jehovah de definitief
7. San e bewijsi moro fara, dati srefi ini na disiten seti foe sani Jehovah e tjari wan definitief kroetoe kon tapoe son sma?
7 Soso kaba te wi loekoe na troe tori di Jezus ben taki dati „na taki ogri foe na jeje” no sa kisi pardon no „ini disi seti foe sani no ini na di e kon”, moe overtoigi ala sma di e degedege foe na tori, dati Jehovah srefi ini na „seti foe sani disi” e tjari wan definitief kroetoe kon tapoe son sma. Den sortoe sma disi e doe na „tego sondoe”. Foe tego den no sa kisi pardon (Mark. 3:28, 29). Foe san ede den ben sa moe kisi opobaka foe dede?
8. (a) Fa wi moe sori na srefi fasi leki Jehovah? (b) Foe san ede wi moe abi froetrow ini Jehovah èn en Manpikin leki kroetoeman, èn sortoe eksempre e sori dati Gado kroetoe de definitief?
8 Leki warti kotoigi foe wi Gado Jehovah, a no de foe taki, wi no e go na alape na den sma foe tapoe skreki gi den nanga na pori. Wi e si sani a srefi fasi leki Jehovah. Den e taki foe en dati a abi „pasensi” foe di „a no wani dati wan sma go pori, ma a wani dati ala sma kisi beraw” (2 Petr. 3:9). Na a tra sé wi no moe meki wi firi pré wi basi, èn kande sondro wi sabi, e feni fowtoe tapoe na fasi fa Jehovah e doe sani. Jehovah de wan volmaakti Kroetoeman (Deut. 32:4). A srefi de so gi Kristus Jezus (Joh. 5:30). Te wan zaak tjari go na onvolmaakti libisma kroetoeman èn na heri proces e waka psa go doro, foe na lagi kroetoe te go na a moro hé kroetoe ini na kondre, dan libisma abi na prakseri dati a reti kisi en stan, sodati foe go moro hé foe soekoe reti no kan moro. Foe san ede wi ben sa de ini degedege nanga den kroetoe foe Jehovah èn degedege ofoe den de definitief? — Ps. 119:75.
9. Fa Matteus 10:28 e sori dati Jehovah kroetoe de definitief?
9 Ala di Jehovah sori tapoe wan wondroe fasi dati a „abi pasensi”, foe di „a wani dati ala sma kisi beraw”, a sabi dati no ala sma sa abi beraw. Foe dat ede meki Jezus ben warskow foe abi frede gi „en di kan pori sili (libi) èn skin ini Gehenna”. Ini wan theologisch wortoeboekoe den e gi commentaar a tapoe na a fasi disi: „Matt. 10:28 no e leri na potentiële no-dede moro foe na sili, ma na kroetoe foe Gado di no kan kenki gi den sma di no abi beraw” (New International Dictionary of New Testament Theology).
10. San Jezus ben verklari foe den „foeroe sma” èn den „pikinso sma” èn san na Griki wortoe wani taki, di vertaal nanga „pori”?
10 Ini en bergi-préki Jezus ben verklari: „Go ini na naw doro; bikasi bradi èn opo na pasi de di e go na a pori (Griki: apoleia), èn foeroe sma de di e go na ini dati; ma naw na doro de èn smara na pasi di e go na a libi; èn pikinso sma de di e feni en” (Matt. 7:13, 14). Akroederi na bedoi di den Griki wortoeboekoe e gi foe apoleia, dan a wortoe disi wani taki „pori”, „tego pori” (Arndt & Gingrich) ofoe „definitieve pori, no soso na pori foe na de na skin fasi” (Theological Dictionary of the New Testament). Foe datede meki no wan gron de ini bijbel foe na prakseri nanga firi dati sma di e libi now èn di tanapoe let a fesi na moro bigi „benawtoe” sensi na bigin foe na grontapoe, abi wan tra sé foe kan teki leki libi ofoe pori. — Matt. 24:21, 22.
Pasa libilibi ofoe pori
11. (a) San den wortoe „dé foe Jehovah” wani taki? (b) Sortoe „bigi dé foe Jehovah” de ete na wi fesi, èn san sa psa dan?
11 „Na bigi dé foe Jehovah de krosibé” (Zef. 1:14). Den wortoe dati noiti ben de so wan skreki sani ete. A de troe dati tra speciaal ten ben de ini na historia pe Jehovah ben tjari en kroetoe kon èn ben gi grani na en santa nen, èn ibri wan foe den ten disi ben de wan „dé foe Jehovah” na wan pikin fasi. Na ontrow Jeruzalem, Babylon nanga Egypte ben ondrofeni den sortoe „dé” dati (Jes. 2:1, 6-17; 13:1-6; Jer. 46:1-10). Ma na moro bigi „dé foe Jehovah” didon ete na wi fesi. A de na „dé” di Jehovah sa tjari na strafoe foe en kroetoe kon tapoe na kristenheid, na tra pisi foe Satan grontapoe-makti foe falsi bribi èn en heri ogri seti foe sani. A de „wan dé foe ati bron, wan dé foe benawtoe èn foe broeja skreki, wan dé foe bigi winti èn foe pori.” Na profétitori e go moro fara: „Èn mi wani tjari benawtoe kon tapoe na libisma-famiri . . . na Jehovah den ben sondoe . . . No den solfroe, no den gowtoe foe den sa kan fri den tapoe na dé foe Jehovah atibron; ma nanga na faja foe en na heri grontapoe sa njan gwe, foe di a ben gi ala sma foe na grontapoe na wan pori, ja wan takroe wan’ . . . Bifo kon na oen tapoe na faja atibron foe Jehovah, bifo kon na oen tapoe na dé foe Jehovah ati-bron, soekoe Jehovah, ala oen safri-ati-wan foe grontapoe, di e doe en kroetoe besroiti. Soekoe regtvaardiki fasi, soekoe safri-ati fasi. Kande den sa kibri oen tapoe na dé foe Jehovah atibron.” — Zef. 1:15-2:3.
12. (. . . ?)
12 Srefi foeroe foe den bijbelondrosoekoeman ini na kristenheid e erken dati na profétitori disi no wawan ben abi foe doe nanga Juda, ma ben abi foe doe nanga wan profétitori foe „wan universeel kroetoe na a heri grontapoe” (Keil-Delitzsch), „na kaba foe wan pisi ten foe sondoe” (Traduction oecuménique), „’a dé’ di na universeel kroetoe sa tjari kon tapoe ala ogridoe èn na atibron foe Jehovah sa kanti tapoe ala sma di no sabi Gado èn di no e gi jesi na a evangelium foe wi Masra Jezus Kristus”. — New Bible Commentary, tweede uitgave.
13. (a) Leki fa Paulus taki, dan oten na „dé foe Jehovah” sa doro? (b) Soema de na „soema foe kroektoedoe”, èn sortoe kroetoe e wakti na agersi „soema” dati?
13 Na apostel Paulus ben tjari na „dé foe Jehovah” kon akroederi nanga a „de-noja foe wi Masra Jezus Kristus” (2 Thess. 2:1, 2). Baka di a taki foe „a fadon komoto foe bribi”, di ben abi leki bakapisi dati te foe kaba na „soema foe na kroektoedoe” ben doe kon — na disiten klasse foe fesiman foe den kerki foe na kristenheid — Paulus ben taki moro fara: „Dan na kroektoedoe sma sa kon na krin, di na Masra Jezus sa poeroe na pasi nanga na jeje foe en mofo èn di sa kon na wan kaba nanga na sori en srefi foe en de-noja” (2 Thess. 2:3, 8). Den fesiman foe kerki di fadon komoto foe bribi sa poeroe na pasi te na a bigin foe na „bigi benawtoe” (Openb. 17:1-5, 16, 17). Na klasse dati ooktoe den e kari „na manpikin foe na pori (apoleia)”, san wani taki, dati soleki na model foe en ini Jezus ten, a de na pasi foe go na a „tego pori” ini Gehenna. — 2 Thess. 2:3; Matt. 25:33.
14. Foe san ede meki foeroe trawan sa „lasi gwe”, èn na fesi foe sortoe sé foe teki na heri libisma famiri tanapoe foe dat ede?
14 Ma fa a de nanga ala sma di ben waka baka den kerki-fesiman nanga na ’onregtvaardiki bidrigi foe den’? Na apostel Paulus e taki foe den dati: „den e lasi gwe (letterlek: „e pori den srefi”), leki wan paiman foe di den no ben teki na lobi foe waarheid, sodati den ben sa kisi ferloesoe. Foe datede meki Gado e meki wan wroko foe sondoe kon na den, sodati den e go poti bribi ini na lé, sodati den alamala e kisi kroetoe foe di den no ben bribi na waarheid ma den ben abi prisiri ini onregtvaardiki fasi” (2 Thess. 2:10-12) Now, ini disi ten na grontapoe de wan swampoe foe ogridoe, hoeroedoe nanga pori fasi. Na moro bigi pisi foe libisma abi ’prisiri nanga onregtvaardiki fasi’ èn den ’no teki na lobi foe na waarheid, sodati den ben sa kisi ferloesoe’. (Teki gersi Ezechiël 9:4-7) Foe datede meki den sa „kisi kroetoe” èn lasi gwe leki „wan paiman”. Ini na „bigi benawtoe” di e kon na sé di moe teki de krin. A de ofoe pasa libilibi ofoe pori.
Lon go na a Kownoekondre foe pasa libilibi
15. Fa na agersitori foe den „skapoe” nanga den „bokoboko” e sori na sé di ala naatsi foe a libisma-famiri de na fesi foe en?
15 Ja, „na bigi dé foe Jehovah kon krosibé. A de krosibé èn a de feti foe kon toemsi” (Zef. 1:14). Wi e libi ini wan ten foe kroetoe pe „ala naatsi” kon makandra na fesi foe Kristus Jezus. Den sma foe ala den naatsi dati e prati ini 2 klasse, den „skapoe” èn den „bokoboko”. Na kabapisi e verteri krin: ’Tego libi’ gi den „skapoe” èn „tego koti poeroe” gi den „bokoboko”. — Matt. 25:31-33, 46.
16, 17. (a) Fa e kon na krin ini 2 Thessalonika 1:6-9 dati Jehovah kroetoe de definitief ini na „bigi benawtoe”? (b) Soema boiti den vervolgoeman foe Gado pipel, sa kisi pori moro ete èn foe san ede?
16 Te a de sori agen o denitief na kroetoe foe Jehovah de, dan Paulus e skrifi: „A de foe a sé foe Gado regtvaardiki . . . foe pai baka benawtoe na den sma di e meki benawtoe kon gi oen, ma na oenoe di e kisi benawtoe, verlekti makandra nanga wi na a kon na krin (apokalupsis) foe na Masra Jezus komoto foe na hemel nanga en krakti engel, ini wan faja vlam, te a de teki refrensi tapoe den di no sabi Gado èn tapoe den di no e gi jesi na a boen njoensoe foe wi Masra Jezus. Den disi sa kisi strafoe foe kroetoe foe tego pori.” — 2 Thess. 1:6-9.
17 Poti prakseri dati na „strafoe foe kroetoe foe tego pori” no e gi wawan na „den di e meki benawtoe kon” gi Gado pipel, ma ook toe na den „di no sabi Gado” èn na „den di no e gi jesi na a boen njoensoe”. Ini en brifi gi den Romeinsma Paulus e bedoi foe san ede den sma „di no sabi Gado” no kan „krin densrefi” èn foe san ede den sa kisi kroetoe (Rom. 1:18-20; 2:5-16). Na ’engel di e fré ini na mindri foe hemel’, di Openbaring kapitel 14 e taki foe en, e kari ala sma „di e libi tapoe na grontapoe” foe ’frede Gado èn foe gi en grani, foe di na joeroe foe na kroetoe foe na anoe foe en doro’. Foe dat meki den sma e kisi tranga ’foe anbegi Na Sma di ben meki na hemel nanga na grontapoe nanga na se nanga den watra-fonten’. Den sma di no e doe disi èn ala sma di e poti bribi ini Satan politiek „wilde meti” na presi dati den erken Gado Messias kownoekondre, makandra nanga na „meti” dati den e pori ini „na bigi winpers baki foe na atibron foe Gado”. — Openb. 14:6, 7, 9, 10, 14-20; 19:11-21.
18. (a) San den sma di wani tan so te na libi, moe doe now? (b) Soema na bijbel e kari leki sma di o pasa libilibi na „bigi benawtoe”, èn sortoe froewakti den abi na den fesi?
18 Ala sma di abi na howpoe foe „kisi kibri tapoe na dé foe Jehovah atibron” moe „soekoe regtvaardiki fasi nanga safri-ati-fasi” èn „doe Jehovah kroetoe besroiti” na presi foe feni fowtoe na disi (Zef. 2:2, 3). Ala sma di abi na howpoe foe na Kroetoeman di Jehovah poti si en leki „skapoe” nanga na howpoe foe feni kibri ini na „bigi benawtoe”, moe sori dati den de „regtvaardiki sma”, foe di den o jepi fajafaja èn o hori baka gi Kristus salfoe „brada”, „na getrow èn koni srafoe”-klasse (Matt. 25:33, 40, 46; 24:45-47). Den wan enkriwan di na bijbel e gi na howpoe foe pasa libilibi na „bigi benawtoe”, de „Kristus brada”, ofoe „den di den ben verkisi”, nanga na „bigi ipi”, „skapoe” di ’sondro foe tapoe e doe santa dienst gi Gado’ èn di e taki alaten, sodati ala sma kan jere disi: „Ferloesoe wi abi foe taki tangi na wi Gado, di sidon tapoe na troon, èn na a Lam.” Leki dopoe discipel di komoto na mindri foe den „sma foe ala naatsi”, na Lam, Kristus Jezus e tjari den sma go na wè di de wan pisi foe na „bigi ipi”; a de tjari den go na fonten foe watra foe libi di noiti sa dré. „En Gado sa figi ala watra poeroe na den ai”. — Matt. 24:21, 22; 25:34; 28:19, 20; Openb. 7:9-17.
AKSI FOE LOEKOE SAN WI BEN LERI
□ San den kerki foe na kristenheid e bedoel nanga na „algemene opobaka” foe den dedewan, ma na leri disi de foe na bijbel?
□ Sortoe tekst e sori dati a no ala dede sma sa kisi wan opobaka?
□ San na „Gehenna”?
□ San e sori dati Jehovah srefi ini na disiten seti foe sani e lési wan definitief kroetoe gi son sma?
□ San sa psa tapoe na „dé foe Jehovah”, èn den di sa kisi na dedestrafoe sa kisi wan opobaka?
□ San wan sma moe doe foe pasa libilibi na bigi benawtoe, èn sortoe wroko foe dat ede de moro tranga fanowdoe leki oiti wan ten?
[Prenki na tapoe bladzijde 152]
Judas, „a manpikin foe a pori”, sa de a mindri den sma di no e kisi opobaka