Na Kownoekondre nanga na opobaka howpoe

„Mi e komanderi joe na fesi foe Gado nanga Kristus Jezus, di sa kroetoe den libiwan nanga den dedewan, èn na a kon sori foe en srefi èn en kownoekondre.” — 2 Timoteus 4:1.

1. Foe san ede na opobakahowpoe de so prenspari, te joe loekoe na nomroe foe sma di ben libi oiti, ma sortoe aksi e kon na ini wi?

DEN schatting foe na nomroe sma di ben libi oiti na grontapoe e kenki foe 14 miljard go miti 20 miljard. Wansi sortoe cijfer de joisti, toe sani de séker: (1) Jehovah Gado sabi precies omeni sma ben libi oiti, èn a ben abi na makti foe tjari ibriwan sma kon na libi, di a wani foe doe disi gi en; (2) na disiten bigi nomroe foe so wan 4,4 miljard sma, a de krin, de soso wan pikin pisi foe na totaal nomroe sma di ben libi oiti. Na besroiti di wi no kan lon komoto foe en de: a moro bigi pisi foe den sma dede èn e anga foe wan opobaka foe libi ini na ten di e kon. Ma foe san ede den ben dede? Èn sortoe howpoe de dati den sa libi oiti baka?

2. San Petrus e ferteri foe na opobaka foe Kristus èn sortoe positsi a de teki tapoe a tori foe na howpoe tapoe wan opobaka?

² Ini na jari 36 G.T. na apostel Petrus ben ferklari: „Mi e si foe troe dati Gado no e teki partij, ma ini ibri naatsi na sma di e frede en èn di e wroko regtvaardiki fasi, a de teki. . . . Gado ben wiki en (Jezus Kristus) na a dé di foe meki dri èn a ben gi en dati a ben sori ensrefi, no na a heri pipel, ma na kotoigi di Gado sori a fesi kaba, na wi, baka di a ben opo komoto foe dede, ben njan èn dringi nanga en. A ben komanderi wi ook toe foe préki gi na pipel èn foe gi wan finifini kotoigi dati na Sma disi de a sma di Gado ben poti leki kroetoeman foe den libiwan èn den dedewan. Foe en ala proféti e kotoigi dati ibriwan sma di e poti bribi ini en, e kisi pardon foe sondoe nanga jepi foe en nen.” — Tori foe den Apostel 10:34-43.

3. (a) Foe san ede meki someni miljard soema dede? (b) Tjari kon na krin fa a dede èn opobaka foe Kristus de na fundamenti howpoe foe na opobaka?

³ Ja, dati foeroe miljardmiljard dedesma de ini na grebi, de wan bakapisi foe sondoe, di den kisi abra foe na fosi, libisma Adam. A de wan troe tori dati „nanga jepi foe wán sma na sondoe ben kon ini grontapoe èn nanga jepi foe na sondoe na dede, èn na so fasi na dede ben panja go na ala sma . . . Nanga na sondoe foe na wan sma na dede ben rigeri leki kownoe” (Rom. 5:12, 17). Ma Kristus ben dede èn „ben kon na libi ini na jeje” (1 Petr. 3:18). Nanga a poti bribi ini en broedoe di ben fadon, dan „ibriwan” foe „den libiwan èn den dedewan ben sa kisi pardon foe sondoe” nanga na kon fri foe na takroe rigeri foe kownoe Dede. Foe kisi disi, dan na moro bigi pisi foe libisma sa abi wan opobaka fanowdoe. Foe datede meki Paulus e skrifi: „Foe di a dede de nanga jepi foe wan sma (Adam), na so toe na opobaka foe den dede sma de nanga jepi foe wan sma (Jezus)” (1 Kor. 15:21). Kristus ben taki dati disi de so di a ben ferklari gi Martha: „Mi de na opobaka èn na libi. Na soema di e poti bribi ini mi, sa kon na libi, wansi a dede” (Joh. 11:25). Na dede foe Kristus èn opobaka de na fundamenti foe na opobaka-howpoe.

Na „fosi opobaka”

4, 5. (a) San Johannes ben skrifi foe na „fosi opobaka”, èn sortoe makti nanga positsi den sma e kisi di e teki prati ini disi opobaka? (b) San Jezus ben taki gi den erfoe getrow apostel foe na positsi di e kon?

⁴ Na bijbel e sori dati Kristus no de na wan enkri wan di sa kroetoe „den libisma èn den dedewan”. Di na apostel Johannes ben skrifi wan visioen foe santa jeje, a ben taki: „Mi ben si troon, èn joe ben abi den di ben go sidon na tapoe, èn den ben kisi makti foe kroetoe. Ja, mi ben si den sili foe den di den ben kiri nanga na anbégi foe na kotoigi ede di den ben gi foe Jezus èn foe na taki foe Gado, èn den di no ben wani anbegi na wilde meti (Satan politiek organisaatsi), no en prenki èn di no ben kisi na marki tapoe den fesi-ede èn tapoe na anoe foe den. Èn den ben kon na libi èn ben tiri leki kownoe nanga na Kristus, doesoen jari langa. Kolokoe èn santa ibriwan sma de di abi prati na a fosi opobaka; tapoe den disi na di foe toe dede no abi makti, ma den sa de priester foe Gado èn foe na Kristus èn sa tiri den doesoen jari makandra nanga en leki kownoe.” — Openbaring 20:4, 6.

⁵ Den erfoe apostel ben de na mindri den fosi wan foe den kownoe èn kroetoeman disi foe a ten di e kon, di leki getrow kotoigi foe Jezus nanga en Tata, Jehovah, ben dede. Ini Lukas 22:28-30 Jezus e taki foe den leki sma di makandra nanga en e sidon tapoe troon „foe kroetoe den 12 lo foe Israël (den lo di no ben de priester, èn di e agersi na tra pisi foe na libisma-famiri)”.

6. Omeni mede-kroetoeman sa assisteri Kristus te a de kroetoe den libiwan nanga den dedewan, èn sortoe kenki den e ondrofeni te den e kisi opobaka?

⁶ Tra tekst e sori dati na aparti grani disi foe de mede-kownoe nanga kroetoeman nanga Kristus ini en kownoekondre, de soso gi wan „pikin ipi” foe 144.000 getrow kristen di „den bai poeroe foe grontapoe”, „na mindri foe den libisma” (Luk. 12:32; Openb. 14:1-4). Den disi e libi na normaal, natuurlijke howpoe foe libi foe tego na grontapoe foe „de wán nanga en (Kristus) foe gersi en ini en opobaka” (Rom. 6:5). Paulus ben skrifi ook toe ete foe den sortoe sma disi: „So a de toe nanga na opobaka foe den dedewan. A de sai ini pori fasi, den e kisi opobaka foe no pori moro . . . Den e sai leki wan skin foe meti, a de kisi opobaka leki wan skin foe jeje . . . Skin nanga broedoe no kan kisi Gado kownoekondre . . . Na sani disi di e dede moe weri san di no e dede.” — 1 Kor. 15:42-53.

7. San wan wortoeboekoe e verklari foe no dede moro, èn san Paulus èn Petrus ben skrifi foe na hemel howpoe?

⁷ Na wan moi sani foe si dati ini na New International Dictionary of New Testament Theology (Na njoen internationale foe Njoen testament theologisch wortoeboekoe) e sori na no-bijbel prakseri taki ibri wan sma abi wan sili di no e dede. Ini disi den e taki: „Foe no dede moro no de na disiten goedoe foe ala sma, ma wan sani di kristen e kisi ini a ten di e kon. Leki fa 1 Kor. 15:42, 52 taki dan wi kan taki pas foe wan opobaka-kenki dati bribiwan e weri na krosi foe no dede moro . . . Foe no dede moro no de sondro wan opobaka na fesi.” Na prijs foe no dede moro foe troe no de gi na kristen, ma na soso gi den sma di e teki prati ini „na froeka opobaka foe dede”. Gi den disi „wan goedoe di no e pori, sondro flaka, sondro foe flaw ben . . . kibri ini hemel”. — Loekoe Romeini 8:20-22; Filippi 3:10, 11; 1 Petrus 1:3, 4.

Na ten foe na „fosi opobaka”

8. (a) Leki fa den Boekoe taki, dan oten na „fosi opobaka” ben sa feni presi? (b) Tjari kon na krin san 1 Thessalonika 4:14-17 èn 1 Korinte 15:51, 52 wani taki?

⁸ Ini den Boekoe na „fosi opobaka” disi e tjari kon akroederi nanga Kristus „de-noja” (Griki: parousia) (1 Kor. 15:23). Na apostel Paulus e skrifi: „Masra srefi sa saka komoto foe hemel nanga wan komanderi kari, nanga na sten foe wan gran-engel èn nanga Gado trompeti, èn den di de ini dede ini wanfasi nanga Kristus (foe sensi na konbaka foe Kristus na a jeje tempel ini 1918) sa opobaka fosi.” Moro fara Paulus e taki dati den salfoe kristen „di de na libi te na a de-noja (parousia) foe Masra” èn di foe datede, dede ini a ten foe na parousia, wantronwantron sa kisi opobaka èn „sa hari go ini den wolkoe go miti Masra ini na loktoe” (1 Thess. 4:14-17). Den no abi foe „sribi” ini a grebi foe wakti tapoe na opobaka. Te den e dede, dan den „e kisi wan kenki . . . ini wan momenti, ini wan pingi foe wan ai”. — 1 Kor. 15:51, 52.

9. (a) Oten Kristus de-noja di joe no kan si ben bigin? (b) San ben sa psa ini a ten foe en de-noja, èn foe san-ede wi kan kari salfoe kristen di e dede ini a ten foe Kristus de-noja, „kolokoe”?

⁹ Den sani di ben psa leki wan kontroe foe bijbel profétitori, e sori dati Kristus de-noja ofoe parousia ben bigin ini a toemsi prenspari jari 1914 (Matt. 24:3, 7-14). Ne na „kownoekondre foe na grontapoe . . . tron na kownoekondre foe wi Masra (Jehovah) èn foe en Kristus”. Baka na sani disi di ben seki grontapoe, dan na „fasti ten foe kroetoe den dedewan” ben doro. Na kroetoe nanga na pai foe den sma di ben de warti, ben bigin foe sensi na kon foe Kristus na a tempel, di a ben meki den sma di ben kisi wan boen kroetoe, teki prati ini na „fosi opobaka” (Openb. 11:15-18). Den salfoe kristen di e dede ini getrowfasi baka na opo foe Gado kownoekondre, den e kari „kolokoe”. Foe san ede? Foe di den e kisi wan opobaka wantronso, sodati den man wantewante foe teki den njoen wroko foe den makandra nanga Kristus Jezus ini hemel. — Openb. 14:13.

10. Foe sortoe reden meki na opobaka foe den 144.000 e kari na „fosi opobaka”?

¹⁰ Na opobaka foe na heri nomroe foe 144.000 salfoe kristen di kisi kari foe tiri ini hemel makandra nanga Kristus, nanga reti e kari na „fosi opobaka”. Disi de so, foe di ini ten a de waka a fesi na opobaka foe libi na grontapoe foe na libisma famiri ini algemeen, sodati joe kan taki foe den 144.000 dati den e tron „fosiwan gi Gado èn gi na Lam” (Openb. 14:1, 4; Jak. 1:18). Nanga disi den e kisi wan prenspari positsi, foe di nowan sma foe den tra sma kan „tjari kon ini volmaakti fasi aparti foe” den 144.000 priester, kownoe, kroetoeman (Hebr. 11:40b; Openb. 22:1, 2). Boiti dati, a opobaka foe den moro hé leki ibri grontapoe opobaka, foe di den 144.000 e kisi opobaka „ini a srefi fasi foe (Kristus) opobaka” foe wan libi di no e pori èn dede leki manpikin foe Gado. — Rom. 6:5.

Na grontapoe opobaka

11. Sortoe tra opobaka e kari ini Openbaring kapitel 20?

¹¹ Efoe wan „fosi opobaka” de, dan a wan logisch sani dati wan bakaten opobaka moe de. Di na apostel Johannes ben skrifi san sa psa ini na ten foe na doesoen jari kroetoedé di ben kari a fesi ini na srefi kapitel, a ben taki:

„Èn mi ben si den dedewan, den bigiwan èn den pikinwan, tanapoe na fesi na troon, èn boekoelolo ben opo. Ma wan tra boekoelolo ben opo; a de na lolo foe libi. Èn den dedewan ben kisi kroetoe tapoe na gron foe den sani di ben skrifi ini den boekoelolo, akroederi den doe foe den.” — Openb. 20:12.

12, 13. (a) Foe san ede a no de wan logisch sani foe taki dati den trawan foe den dedewan sa kisi opobaka pas baka na millennium? (b) San foe datede wani taki den wortoe „kon na libi” di Openbaring 20:5 e gebroiki? (c) Fa sa bepaal soema te foe kaba sa skrifi ini na „lolo foe libi”?

¹² Den „dedewan” disi de den srefi wan leki „den trawan foe den dedewan”, di e kari ini vers féfi foe na srefi kapitel èn foe soema den e taki dati „den no ben kon na libi te leki den doesoen jari ben kon na wan kaba”. Disi no kan wani taki dati pas baka na doesoen jari kroetoedé den e kisi opobaka, bikasi den soema di e teki prati ini na „fosi opobaka”, den ben gi „makti foe kroetoe” èn den sa de „priester” di sa tiri „doesoen jari” nanga Kristus „leki kownoe” (Openb. 20:4-6). Efoe den „trawan foe den dede wan” e kisi opobaka pas na a kaba foe na millennium, dan tapoe soema den sma di e teki prati ini „na fosi opobaka” ben sa moe hori kroetoe èn ben sa moe tiri leki kownoe èn foe na boen foe soema den ben sa moe handri leki priester?

¹³ Foe datede meki den wortoe „kon na libi” moe abi foe doe nanga na situwasi na a kaba foe na doesoen jari kroetoedé. Dati den sma disi „e kon na libi”, wani taki dati te foe kaba den e kisi libisma volmaakti fasi. Den sa de ini a srefi volmaakti toestand leki Adam nanga Eva ini na djari foe Eden. Fa Jehovah sa bepaal dan, soema nen sa skrifi ini „na lolo foe libi”? Disi sa pasa nanga jepi foe na kriboi tesi di libisma e kon na ondro (Openb. 20:7-10, 15). Den sma di ini na kriboi ten e sori dati den de getrow na Gado, Jehovah srefi sa „verklari den regtvaardiki” èn sa go ini na „glori fri foe den pikin foe Gado” (Rom. 8:21). Den sa kisi na djaranti foe Gado foe tego libi, kontrari Adam, di ben fadon ondro na tesi, sodati den cherub di Gado ben seni ben stop en foe feni pasi go na a „bon foe libi”. — Gen. 2:9; 3:22-24.

14. Na sortoe fasi na opobaka foe sma na grontapoe ini na millennium sa de wan moro betre opobaka?

¹⁴ Foe di ala den „trawan foe den dede wan” di ben kisi opobaka ini na ten foe Kristus doesoen jari tiri, sa ben abi na okasi foe sori dati den de warti na grani dati den nen de tan skrifi tapoe Jehovah „lolo foe libi” èn dati foe tego den kan libi ondro Gado kownoekondre, meki dati na opobaka foe den e opo moro betre okasi leki san den wan toe soema ben kisi di ini bijbel ten ben kisi opobaka ma di ben dede baka (1 Kon. 17:17-24; 2 Kon. 4:17-37; 13:20, 21; Matt. 9:18, 23-26; Luk. 7:11-15; Joh. 11:38-44; Tori foe den Apostel 9:36-41; 20:7-12). Man nanga oema foe owroeten ben tan getrow te na dede na Jehovah foe kisi wan „more betre opobaka” ondro na kownoe kondre, ofoe na „foto”, foe na Messias. — Hebr. 11:10, 13, 14, 35.

Opobaka nanga kroetoe

15, 16. (a) Wi moe frede na kroetoedé? Tjari disi kon na krin? (b) Soema sa hori kroetoe èn tapoe a gron foe san?

¹⁵ Wi ben si dati den „trawan foe den dedewan” ini na ten foe na millennium ben kisi opobaka foe „ben kisi kroetoe, akroederi den doe foe den” di den ben doe dan (Openbaring 20:12). Na gro-skin prakseri foe wan dé foe kroetoe pe ibriwan soema di oiti ben libi ben sa moe gi frantwortoe foe en fosten sondoe, no abi en fundamenti tapoe na bijbel. Na context e sori dati lolo foe Gado ofoe wetboekoe sa opo èn dati den dede sma di opo baka sa kisi kroetoe „tapoe na gron foe den sani di skrifi ini den boekoelolo”, „akroederi den doe foe den”, dati wani taki akroederi na gi jesi ofoe tranga jesi foe den na den sortoe komando disi foe Gado.

¹⁶ Soema sa hori na kroetoe? Na apostel Paulus ben skrifi dati Kristus Jezus „sa kroetoe den libiwan nanga den dedewan”, ala di na a srefi ten a ben taki foe na „sori ensrefi foe Kristus èn en kownoekondre” (2 Tim. 4:1). Makandra nanga Kristus sa sidon tapoe „troon” 144.000 mede-kroetoeman ini en doesoen jari kownoekondre (Luk. 22:28-30; Openbaring 20:4, 6). Paulus ben skrifi: „Oen no sabi dati den santawan sa kroetoe na grontapoe?” — 1 Kor. 6:2.

17, 18. (a) Wan difrenti de na mindri Johannes 5:29 èn Openbaring 20:12? Gi bodoi foe disi. (b) Na sortoe fasi son sma sa „kon na doro foe wan opobaka foe kroetoe”?

¹⁷ Jezus ben sori na a sani di sa pasa ini na ten foe en doesoen jari tiri, di ben sa de ook toe wan doesoen jari kroetoedé. A ben taki foe disi: „Bikasi na Tata no e kroetoe nowan sma kwetkweti, ma a ben poti na heri kroetoe ini anoe foe na Manpikin. . . . No froewondroe foe dati, bikasi na joeroe e kon pe ala den sma di de ini den memre grebi sa jere en sten èn sa kon na doro, den di ben doe boen sani foe wan opobaka foe libi, den di ben doe veragti sani foe wan opobaka foe kroetoe.” — Joh. 5:22-29.

¹⁸ Disi de kontrari san Openbaring 20:12 e taki, pe wi e lési dati den dedewan „e kisi „kroetoe tapoe na gron foe den sani di ben skrifi ini den boekoelolo”, den boekoelolo di sa opo pas ini na ten foe na millennium? Kwetkweti. Jezus wortoe ini Johannes kapitel 5 wi moe froestan ini na leti foe en bakaten Openbaring na Johannes (Openb. 1:1). „Den di ben doe boen sani” èn „den di ben doe veragti sani” sa de na mindri „den dedewan” di ibriwan aparti „sa kisi kroetoe akroederi na doe foe den” di den e doe baka na opobaka foe den (Openbaring 20:13). Di Jezus ben poti na „opobaka foe libi” na abra sé foe na „opobaka foe kroetoe” (Griki: anastasis kriseoos), dan a ben sori tapoe na kabapisi foe den sortoe opobaka disi. Ini Thayer’s Greek-English Lexicon dan anastasis kriseoos e definieer leki wan opobaka, di „wan srafoe e waka na en baka”. Na sma no e kisi opobaka foe kisi strafoe automatisch, ma wan strafoe sa waka baka en opobaka efoe a wégri foe doe den sani „di skrifi ini den boekoelolo”, nanga leki bakapisi dati en nen no „e skrifi ini na boekoe foe libi”. Dan a sa dede na dede di e meki toe” sondro howpoe tapoe wan opobaka ini na ten di e kon. — Openb. 20:14, 15; 21:8.

19 èn voetnoot. (a) Fa Johannes 5:29 vertaal ini wan Fransi bijbelvertaling, èn pas oten a sa kon na krin dati wan sma ben kisi wan „opobaka foe libi” ofoe wan „opobaka foe kroetoe”? (b) Den „regtvaardiki wan” èn den „onregtvaardiki wan” di Tori foe den Apostel 24:15 e kari e kon na doro foe respectievelijk wan „opobaka foe libi” èn wan „opo-baka foe kroetoe”? Gi bodoi foe disi.

¹⁹ A wan moi sani foe si dati Johannes 5:29 e vertaal ini na Fransi Traduction oecuménique de la Bible (foe na anoe foe wan groepoe foe lomsoe nanga anitri sabiman): „Den sma di ben handri boen, sa kon na doro gi na opobaka di e tjari go na libi; den sma di ben doe ogri, gi na opobaka di e tjari go na kroetoe.” Pas te na bakapisi foe na opobaka foe wan sma e kon na krin, sa de bekenti ofoe en opobaka ben de wan „opobaka foe libi” ofoe wan „opobaka foe kroetoe”.a

20. (a) Soema sa moe dringi a „watra foe libi”, èn foe san ede? (b) Sortoe aksi wi sa ondrosoekoe ini na tra artikel?

²⁰ Ala toe groepoe, den dedesma di e opobaka èn na „bigi ipi” di e pasa libilibi na „bigi benawtoe” di e kon, sa moe dringi na „watra foe libi”, dati wani taki, den sa moe meki grantangi gebroiki foe Kristus ferloesoe-ofrandi èn ala tra seti di Jehovah e seti foe fri na libisma-famiri foe sondoe nanga na dede (Openbaring 7:9, 10, 14, 17; 22:1, 2). Den seti disi Kristus nanga en 144.000 priester, mede-kroetoeman sa gi. Ma ala dedesma sa kon baka foe kisi kroetoe, nanga den sma toe di e dede ini na „bigi benawtoe” di e kon? Ini na tra artikel wi sa go moro fara tapoe disi.

[Sani di skrifi na den marki ondrosé foe a bladzijde]

WAN TOE AKSI FOE LOEKOE SAN WI BEN LERI

□ Na sortoe fasi Kristus de „na opobaka nanga na libi”?

□ Soema e teki prati ini na „fosi opobaka” èn ini sortoe wroko den sa assisteri na Kownoe Jezus Kristus?

□ Foe san ede den wortoe „fosi opobaka” fiti?

□ Fa den „trawan foe den dedewan” „e kon na libi” baka na millennium, èn na sortoe fasi na opobaka foe den de moro hé leki di foe den sma foe bijbel ten di ben opobaka foe libi na grontapoe?

□ Tapoe na gron foe san den sma di e kisi opobaka, e kisi kroetoe, èn san den sa abi fanowdoe foe kon fri foe sondoe nanga dede?

[Prenki na tapoe bladzijde 147]

A bijbel e sori dati foeroe sma sa kisi wan opobaka kon na libi na grontapoe