A moeiliki joeroe e kon krosibé!
1. (a) Foe san ede den plan foe njofi libisma moesoe foe fadon? (b) Sortoe prakseri foe Gado moesoe kon troe heri esi?
ALADI krin warskow nanga na bigi fadon foe libisma tiri de ini den hondro-hondro jari di pasa, tokoe onvolmaakti, njofi sma e tan poesoe den plan foe den go doro tapoe wan asranti fasi. Ma den no sa kan doe disi moro langa. Wi no moe degedege noiti wan momenti ofoe na Gado èn Tata foe wi Masra Jezus Kristus man foe doe en prakseri di a ben meki bekenti nanga mofo foe en proféti: „Èn ini den dé foe den kownoe (di e tiri ini ’na ten foe na kaba’) na Gado foe hemel sa opo wan kownoekondre di noiti sa go ini pori. Èn na kownoekondre srefi no sa tjari go abra na wan tra pipel. A sa masi ala den kownoekondre disi èn tjari den kon a wan kaba, èn en srefi sa tan te ten di no abi marki.” — Dan. 2:44; 12:9.
2. (a) Fa Jezus ben agersi na situwasi di na libisma-famiri tanapoe na en fesi? (b) Sortoe warskow ben gi, èn nanga sortoe bakapisi?
2 Jezus ben gi wi ete wan bedoi foe na krosibé foe na moeiliki joeroe. A ben sori tapoe den toestand di ben de ini den dé foe Noach na grontapoe èn a ben memre en bakaman dati den sma ini na ten dati ben go krinkrin ini den égi pikin plan èn ini na libi foe wan normaal libi, soleki den ben kari disi kande. Jezus ben taki: „Bikasi soleki den ben de ini den dé dati bifo na froedoe, den ben njan èn dringi, mansma ben trow èn oemasma den ben gi foe trow, te leki na dé di Noach ben go ini na ark, èn den no ben poti prakseri na tapoe te leki na froedoe ben kon èn ben figi den alamala poeroe, na so na de-noja foe na Manpikin foe libisma sa de” (Matt. 24:37-39). Na boskopoe di na regtvaardiki Noach ben meki bekenti wantoe tintron jari baka makandra, ben warskow den sma dati (2 Petr. 2:5). Ma fa na moro bigi pisi foe den sma ben teki na warskow? Jezus ben taki: „Den no ben poti prakseri a tapoe.” Den no ben abi belangstellng gi Noach nanga en boskopoe. Èn so a ben pasa dati „soso Noach nanga den di ben de nanga en ben pasa libilibi”, aiti sili ala nanga ala. — Gen. 7:23.
Joe sa poti prakseri tapoe na warskow?
3. Fa den sma e teki now na warskow?
3 Wi kan taki opregti dati wi no ben kisi na warskow? Na situwasi ini wi ten de a srefi leki ini na libisma-lo foe Noach ten. Loekoe pikinso fa na moro bigi pisi foe libisma no e loekoe na wan ai ofoe e spotoe na boskopoe di Jehovah Kotoigi e tjari now. Foeroe sma e meki den égi broko-ede nanga plan foe a ten di e kon teki den abra krinkrin. Gado nanga en prakseri di a abi nanga libisma nanga na grontapoe no e kon ini den denki srefi. Foeroe sma e taki dati den de kristen èn den de ini wan ofoe tra kerki groepoe, ma dati de foe den égi gemak èn foe di a de gi den wan respeki fesi ini na modern maatschappij. Eenvoudig den no „e poti prakseri” tapoe na warskow èn foe datede den moe teki den bakapisi. Ma fa a de nanga joe? Joe sa de so froestandiki foe poti prakseri tapoe den marki foe den ten?
4. Fa Paulus nanga Petrus ben taki na fesi foe na situwasi foe disi ten?
4 Sondro degedege, joe ben si fa grontapoe-tirimakti nanga kownoekondre ben panja ini pispisi, fa kerki nanga politiek bewégi broko tron kroektoesé, retisé nanga centrum-partij èn fa foeroe foe den wani go den égi pasi, ofoe disi de joisti ofoe fowtoe. Ala den sani disi no e sori tapoe den „laatste dé” di na apostel Paulus ben taki a fesi: „Ma sabi disi, dati ini den laatste dé, moeiliki ten sa doro, di tranga foe pasa. Bikasi den sma sa lobi densrefi nomo, lobi na moni, sa de asranti, abi hémemre, gongosaman, no gi jesi na papa nanga mama, sondro tangi, deloyaal, no abi wan reti lobi, no de klari foe meki no wan kroederi, e taki ogri, sondro foe dwengi densrefi, krasi, sondro lobi foe boen sani, toriman, no ke foe noti, abi bigi-memre, nanga moro lobi gi prisiri leki lobi gi Gado” (2 Tim. 3:1-4). Te wi poti na kontroe foe na profétitori disi moksi nanga ala tra sani di Jezus taki na fesi, dan seker den marki foe den ten wani taki foeroe sani. Wi de troetroe ini den „laatste dé” dati, èn mankeri foe tranga-leri de ala sé foe si — tapoe den skoro, ini zaak, ini wroko-kontren èn ini a maatschappij ini algemeen. — Teki gersi 2 Petrus 3:3-7.
5. (a) Sortoe aksi wi moe loekoe now? (b) Fa wi froewakti de tra fasi leki di foe sma foe na grontapoe disi?
5 San joe sa doe now, now di ambisi sma nanga tiriman foe naatsi e sori sosrefi toe dati den de onredelek èn dati den no man foe tjari kon akroederi ala den kontra sani di den e taki, sodati nanga tranga-ede den e poesoe den égi plan foe den go doro foe kenki na grontapoe? Te wi loekoe den marki foe den ten, dan san de na moro boen fasi foe libi èn waka di joe moe teki seker? Joe sa de moro froestandiki èn moro redelek leki den prenspari man foe a grontapoe disi? Den e si a ofrandi dede foe Jezus Kristus leki wan sani di no de prenspari srefsrefi. Den e wégri foe teki na troe tori dati a no ben dede wawan, sodati wi alamala ben sa kan kisi libi, ma sosrefi toe foe meki en glori kownoekondre kan kon, sodati a sa pori na makti foe a gado foe disi grontapoe, Satan na Didibri (Hebr. 2:14). Ma joe kan sori bribi ini den seker pramisi foe na Mekiman. Joe kan loekoe na a toemsi boen bakapisi di Jehovah e djaranti na ibriwan sma di e poti froetrow na en. —Ps. 37:3, 4, 28, 29, 39, 40.
Wan tranga fanowdoe kari gi safri-ati-wan
6. Sortoe tranga fanowdoe kari de now foe jere, èn foe san-ede?
6 Gi joe nanga ala den sma di e lési den marki foe den ten, na a mofo foe na proféti foe Jehovah Gado na tranga fanowdoe kari e kon: ’Soekoe Jehovah, ala oen safri-ati-wan foe na grontapoe, di ben doe en kroetoe besroiti, bifo kon na oen tapoe na faja atibron foe Jehovah, bifo kon na oen tapoe na dé foe Jehovah atibron. Soekoe regtvaardiki fasi, soekoe safri-ati fasi. Kande joe sa feni kibri tapoe na dé foe Jehovah atibron’ (Zef. 2:2, 3). Disi e sori krin, dati Jehovah ben sa gi na okasi na sma di lobi vréde èn regtvaardiki fasi foe kisi ferloesoe komoto foe wan seti foe sani di e go ini pori.
7. Sortoe aksi wi kan piki nanga ja foe na boen foe wi?
7 Na presi dati joe de nanga tranga-ede, aladi joe e si ala den marki disi (soleki den politiek nanga kerki tiriman), joe de nanga safri-ati, gridi foe leri, èn klari foe jere nanga lostoe na den seti foe Gado foe joe ègi tanboen? Joe e proberi foe libi akroederi nanga den bijbel markitiki foe regtvaardiki fasi, dati wani taki, Jehovah „kroetoe besroiti”? Joe e sari dipi foe den sani di joe e si èn jere e psa na grontapoe, ja, srefi ini joe égi kontren? Tra fasi leki satisfaksi sma di no e broko-ede nanga san e psa nanga tra sma, solanga den e kisi san den wani foe a libi, joe ati e bewégi joe dipi te joe e si na tranga libi, nanga kwinsi nanga angri foe miljoen-miljoen sma di e libi ondro den toestand disi? Efoe joe kan piki ja, tapoe den aksi disi, dan kande seker joe sa de na mindri den sma di akroederi Jehovah pramisi sa kisi kibri tapoe na dé foe en atibron. — Jes. 26:20, 21; Ezech. 9:4-7.
8. Fa wi kan soekoe ’safri-atifasi èn regtvaardiki fasi’?
8 Efoe joe de wan safri-ati sma, di e arki nanga prisiri na a leri foe Gado, san joe moe doe dan foe „soekoe sari-ati fasi nanga regtvaardiki fasi”? A kan de dati na aksi disi de ini joe prakseri. Jezus, di en srefi ben de nanga safri-ati èn saka fasi, e kari wi foe sori dati wi de troetroe en discipel. Dati sa aksi dati joe ondrosoekoe na eksempre di a ben gi èn sortoe wroko a ben doe di a ben de na grontapoe, èn moro fara joe sa moe feti foe waka na en baka. Loekoe dati alaten a ben doe san boen èn dati noiti srefi a ben doe en gensman ogri (Tori foe den Apostel 10:38). A kownoekondre foe Gado ben de foeroe tron na thema foe en leri, èn foe en agersitori èn foe en begi (Matt. 4:17; Luk. 8:1). Noti a ben abi gemeen nanga den politiek kownoekondre foe disi grontapoe (Joh. 18:36). A ben sori dati a ben abi wan bribi di no e seki ini Gado makti foe meki kontroe ala pramisi di a ben pramisi en dienstknekti na grontapoe. Jezus ben sori dati a no ben agri nanga den sma di ben taki dati den e dini Gado, ala di na a srefi ten den ben leri leri di a skrifi Wortoe foe Gado, na bijbel, no e tanapoe na baka (Mark. 7:5-8). Joe de klari foe waka na en baka ini ala den afersi disi?
9. Sortoe toemsi moi eksempre Jezus ben gi wi?
9 Na no wan fasi Jezus ben handri onafhankelijk foe en hemel Tata. A ben verklari srefi: „Na Manpikin no kan doe no wan sani foe ensrefi, ma soso san a de si na Tata e doe. Bikasi ala san Dati e doe, na dati a Manpikin e doe sosrefi toe” (Joh. 5:19; 7:16-18). Sosrefi toe a ben taki: „A sma di ben seni mi, de nanga mi; a no ben libi mi gi misrefi, foe di mi e doe alaten den sani di e prisiri en” (Joh. 8:29). A no ben sori no wan fasi foe tjari en libi na en égi fasi, soso foe prisiri en égi lostoe nanga ambisi. A ben poti na wan sé na grontapoe-makti nanga prenspari fasi di Satan na Didibri ben pristeri en (Luk. 4:5-8). Joe sa teki na eksempre foe Jezus tapoe wan boen fasi èn waka na en baka foe kisi na boen-ati nanga blesi foe Jehovah Gado?
Pe joe kan feni jepi
10. (a) Sortoe spesroetoe jepi Gado ben gi, èn fa wi kan gebroiki disi? (b) San den wortoe foe Johannes 17:3 wani taki gi wi?
10 Den taktik foe na gran-bidrigiman de so fini èn bidrigi, dati joe no kan de ini joe égi krakti wan bakaman foe Jezus! Foe kan si winimarki ini disi, dan joe abi ala jepi fanowdoe di Gado ben gi. A moro boen jepisani di a ben gi de na bijbel (2 Tim. 3:16, 17). Soleki joe sabi, wan sma no kan sabi san tanapoe ini a bijbel te eenvoudig ibri wiki a go jere wan sjatoe préki èn teki prati na difrenti kerki gwenti nanga ceremonie. Joe sa moe teki wan bijbel-cursus, èn no wawan joe, ma joe osofamiri toe. Prakseri dati na bijbel de na wan enkri boekoe di kan bewijsi dati na Mekiman foe hemel nanga grontapoe de en Auteur (Skrifiman). Nowan tra boekoe ofoe studi-jepi kan gi en respeki sma di e teki leri na sani di Jezus ben taki, namkoe: „Disi wani taki tego libi, dati den e teki alaten ini den sabi foe joe, na wan enkri troe Gado, èn foe en di joe ben seni kon, Jezus Kristus” (Joh. 17:3). Joe abi man nanga oema nanga wan boen bijbelsabi di de klari foe jepi joe sondro wan verprekti. Joe moe aksi Jehovah Kotoigi nomo, èn joe sa kisi na jepi di joe abi fanowdoe foe meki wan bigin.
11, 12. (a) Sortoe pramisi Jehovah e gi na den sma di e stoeka en Wortoe nanga safri-ati-fasi? (b) Fa wi kan sorgoe dati wi nen skrifi ini Gado memre-boekoe?
11 Fa a de wan toemsi moi pramisi di Gado e gi na den sma di e denki foe den praktische winimarki di a abi foe stoeka na sani di Gado nanga Jezus Kristus ben tjari kon na krin foe densrefi èn foe taki nanga makandra foe den sani disi. Loekoe fa wan foe den proféti foe Jehovah foe owroeten ben taki disi: „Ini a ten dati (te Jehovah e aksi frantwortoe foe en asranti feanti, di ben prakseri dati den ben sa kan go doro nanga ogridoe) den sma di ben frede Jehovah ben taki nanga makandra, ibriwan nanga en kompe, èn Jehovah ben tan poti prakseri èn jere. Èn wan memreboekoe ben bigin foe skrifi na en fesi foe den sma di e frede Jehovah èn den sma di e denki na en nen.” — Mal. 3:16.
12 Disi wani taki moro leki a libi foe wan boen, respeki libi akroederi den markitiki foe na grontapoe. A wani taki foe kisi wan soifri sabi foe Gado prakseri di a abi nanga libisma èn foe sabi san a de froewakti foe wi, èn dan foe gi wi libi foe dini en èn foe doe en wani ini ala pisi foe wi libi. Fa trafasi wi ben kan froewakti dati Jehovah sa skrifi wi nen ini en memreboekoe? Fa a ben sa kan poti prakseri na wi foe a boen foe wi efoe wi misi foe sori respeki frede gi en Wortoe èn nen èn misi foe taki foe disi nanga wi medesma na ibri okasi? — Rom. 10:10.
13. (a) Sortoe rai foe Jezus nanga Paulus wi kan gebroiki ini wi libi? (b) Fa wi kan sori dati wi de „koni”?
13 A kan de dati wan bisnisman, wan skoro-pikin ofoe wan druk oso-oema kon na a besroiti dati en abi en so druk foe gi ten na so wan stoeka. Ma a boen foe prakseri na a switifasi warskow di Jezus ben gi tapoe a tori foe onzekerheid foe plan, ambisi èn srefi a libi srefi: „Sortoe boen a sa abi gi wan sma ofoe a wini na heri grontapoe, ma a lasi en sili (ofoe libi)?” (Matt. 16:26). Moro fara wi abi sosrefi toe den wortoe foe na apostel Paulus, di tapoe wan aparti fasi wi kan gebroiki den tapoe den tranga fanowdoe ten disi, now di den marki foe wan krosbé kaba foe wan ogri seti foe sani e lontoe wi: „Loekoe foe datede boen, fa joe e waka, no leki donman, ma leki koniman, bai gi joesrefi na joisti ten, foe di den dé de ogri . . . tan (foe datede) foe si san na wani foe Jehovah de” (Ef. 5:15-17). Te wi loekoe na rampoe di Jehovah sa tjari kon heri esi tapoe na heri ogri grontapoe disi, dan a boen foe poti prakseri tapoe na rai di a ben gi nanga mofo foe en proféti: „Soekoe Jehovah aladi a de foe feni.” „Disi Jehovah ben taki . . . : ’Soekoe mi, èn tan libi.’” — Jes. 55:6; Amos 5:4.
14. (a) Sortoe fowtoe foeroe sma e meki, èn foe san ede? (b) Sortoe gosontoe rai wi e feni ini Jakobus 4:13-16 ini disi?
14 Son sma e njan boen foe wan boen gosontoe èn abi foeroe krakti, na froestan èn skin fasi èn leki bakapisi dati kande den no e froestan krin na anga di den anga na a Mekiman. Foe dat-ede meki den abi na firi foe meki bigi plan gi na ten di e kon èn e denki pikinso foe a presi foe Gado ini den libi. Den e poti den ai tapoe goedoe ofoe tapoe na grani di den abi na mindri libisma ofoe tapoe wan makriki èn sondro-sorgoe owroe dé. Ini ala den prakseri nanga plan foe den den e poti Gado na dorosé. Nanga koni na bijbel-skrifiman di abi santa jeje e warskow: „We now, joe di e taki: ’Tide ofoe tamara wi sa go na a foto disi èn tan wan jari drape, èn wi sa doe bisnis èn meki wini’, ala di joe no sabi san joe libi sa de tamara. Bikasi joe de wan smoko, di e kon wan momenti èn dan e gwe (so sjatoe joe libi de). Na presi foe dati, joe ben sa moe taki: ’Efoe Jehovah wani, wi sa libi èn sosrefi toe doe disi ofoe dati.’ Ma now joe e gafa foe joe asranti meki-bigi. Ala den sortoe gafa disi de ogri.” — Jak. 4:13-16.
15. Sortoe tranga fanowdoe wi moe erken tapoe a tori foe den marki foe den ten?
15 Sortoe disiten positsi joe abi foe datede toe ini na libi, wan tranga fanowdoe reden de foe moksi joesrefi na den moro leki 2 miljoen sma tapoe na heri grontapoe, di komoto foe foeroe naatsi èn tongo, èn di den sabi na a heri grontapoe leki bijbelstudent èn prékiman foe a boskopoe di skrifi ini a bijbel, èn di den herken alape foe di den e gi kotoigi foe Jehovah nen èn kownoekondre. — Jes. 42:10, 12; Matt. 24:14.
Sortoe toemsi prenspari rai ibriwan foe den tekst di e kon now e gi wi ini disi ten?
[Prenki na tapoe bladzijde 189]
A de so dati joe nen ben skrifi ini a memre boekoe foe Jehovah, foe di na dé foe regtvaardiki en Nen de kon krosibé?