Joe de srekasreka gi a dei foe Jehovah?

„A bigi dei foe Jehovah de krosibei. A de krosibei, èn a e hasti ensrefi foe troe.” — SEFANJA 1:14.

1. Fa den Boekoe foe bijbel e taki foe a dei foe Jehovah?

JEHOVAH en „bigi èn frede dei” sa kon na tapoe a godelowsoe seti foe sani disi heri esi. Den Boekoe foe bijbel e taki foe a dei foe Jehovah leki wan dei foe feti, doengroe, faja-ati, banawtoe, hebi pen, frede, nanga sari. Ma tokoe sma de di sa tan na libi, bika „ibriwan sma di e kari a nen foe Jehovah, sa kisi kibri” (Joèl 2:30-32; Amos 5:18-20). Ija, dan Gado sa pori den feanti foe en èn sa kibri a pipel foe en.

2. Foe san ede wi moesoe abi a firi taki wi moesoe handri sondro draidrai ini a tori foe a dei foe Jehovah?

² Den profeiti foe Gado ben taki dati a dei foe Jehovah ben o abi foe doe nanga wan firi di sma moesoe abi taki den moesoe handri sondro draidrai. Foe eksempre, Sefanja ben skrifi: „A bigi dei foe Jehovah de krosibei. A de krosibei, èn a e hasti ensrefi foe troe” (Sefanja 1:14). A ten taki sma moesoe handri sondro draidrai e kon moro serjoesoe, foe di a Moro Prenspari Sma di Gado sa gebroiki foe tjari kroetoestrafoe kon, a Kownoe Jesus Krestes, de foe ’tai en feti-owroe na en bowtoe èn foe rèi gi na afersi foe waarheid èn foe sakafasi èn foe regtfardikifasi’ (Psalm 45:3, 4). Joe de srekasreka gi a dei dati?

Den ben abi bigi froewakti

3. Sortoe froewakti wan toe krestensma na Tesalonika ben abi, èn foe sortoe toe reide ede den no ben abi leti?

³ Foeroe sma ben abi froewakti ini a tori foe a dei foe Jehovah, di no ben kon troe. Wan toe fositen kresten na Tesalonika ben taki ’a dei foe Jehovah de kaba’! (2 Tesalonikasma 2:2) Ma toe prenspari reide ben de, foe san ede a no ben de krosibei ete. Na apostel Paulus, di ben kari wan foe den, ben taki: „Awansi den e taki: ’Vrede nanga seikerfasi!’, tokoe wantronso wan pori sa kon na den tapoe ini wán momenti” (1 Tesalonikasma 5:1-6). Na ini a „ten [disi] foe a kaba”, wisrefi e wakti a kontroe foe den wortoe dati (Danièl 12:4). Den Tesalonikasma ben misi ete wan tra boeweisi taki a bigi dei foe Jehovah ben doro, bika Paulus ben taigi den: „A no sa kon bifo sma sa fadon komoto na bribi” (2 Tesalonikasma 2:3). Di Paulus ben skrifi den wortoe dati (na wan ten foe 51 G.T.), dan ’a fadon di sma ben fadon komoto’ na a troe krestendom, no ben kon de foe si krinkrin ete. Na ini a ten disi, wi e si disi krin na ini krestenhèit. Ma ala di a froewakti foe den no ben kon troe, tokoe den getrow salfoewan dati na Tesalonika, di ben tan dini Gado getrow te na den dede joeroe, ben kisi pai na ini hemel, te foe kaba (Openbaring 2:10). Wi srefi sa kisi pai efoe wi e tan getrow èn e wakti tapoe a dei foe Jehovah.

4. (a) Nanga sortoe sani a dei foe Jehovah abi foe doe na 2 Tesalonikasma 2:1, 2? (b) Sortoe prakseri den so-kari kerkitata ben abi foe a konbaka foe Krestes èn den tori di abi foe doe nanga dati?

⁴ Bijbel e taki dati „a bigi dei foe Jehovah” abi foe doe nanga „a denoja foe wi Masra Jesus Krestes” (2 Tesalonikasma 2:1, 2). Den so-kari kerkitata ben abi difrenti prakseri foe a konbaka foe Krestes, a denoja foe en, èn a Doesoen Jari Tiri foe en (Openbaring 20:4). Na ini a di foe toe jarihondro G.T., Papias foe Hierapolis ben abi a froewakti taki a gron ben sa gi boen foeroe njanjan na a ten foe a Doesoen Jari Tiri foe Krestes. Justinus Martyr ben taki ibri tron baka foe a denoja foe Jesus èn a ben froewakti taki Jerusalem, di ben sa kon boen baka, ben o de a presi pe A ben o sidon tiri ini a Kownoekondre foe En. Irenaeus foe Lyon ben leri sma taki baka te a Tirimakti foe Rome ben o kisi pori, dan sma ben o si Jesus e kon, a ben o tai Satan, èn tiri na Jerusalem na grontapoe.

5. San son sabiman taki foe Krestes en „di foe Toe Kon” nanga en Doesoen Jari Tiri?

⁵ A historia skrifiman Philip Schaff ben skrifi taki „a moro aparti sortoe sani” na ini a pisi ten bifo a Konmakandra foe Nicea na ini 325 G.T. ben de „a bribi di den ben bribi taki sma ben o si Krestes e tiri nanga glori na grontapoe makandra nanga den santawan di ben o kisi wan opobaka, doesoen jari langa bifo a bigi opobaka èn kroetoe.” A Dictionary of the Bible, di James Hastings skrifi, e taki: „Te now ete Tertullianus, Irenaeus, nanga Hippolytus e froewakti wan esi-esi Kon [foe Jesus Krestes]; ma nanga den Kerkitata foe Aleksandria wi e doro wan njoen fasi foe denki. . . . Foe di Augustinus ben si a Doesoen Jari Tiri a srefi leki a pisi ten foe den Kerki fetiman, dan a di foe Toe Kon skoifi na wan moro lati ten na ini a tamara.”

A dei foe Jehovah nanga a denoja foe Jesus

6. Foe san ede wi no moesoe kon na a bosroiti taki a dei foe Jehovah de fara ete?

⁶ Sma abi fowtoe prakseri di meki taki den lasi-ati, ma no meki wi denki taki a dei foe Jehovah de fara ete. A denoja foe Jesus di wi no kan si nanga ai, di abi foe doe na ini bijbel nanga a dei foe Jehovah, bigin kaba. Foeroe tron A Waktitoren nanga tra poeblikâsi foe Jehovah Kotoigi gi boeweisi foe bijbel taki a denoja foe Krestes ben bigin na ini a jari 1914.a So boen dan, san Jesus ben taki foe a denoja foe en?

7. (a) San na wan toe foe den sani foe a marki foe Jesus en denoja èn a bosroiti foe a seti foe sani? (b) Fa wi kan kisi kibri?

⁷ Sjatoe bifo a dede foe Jesus, den ben teki a denoja foe Jesus leki wan tori foe taki foe en. Baka di den apostel foe en, Petrus, Jakobus, Johanes, nanga Andreas, ben jere en taki na fesi dati a tempel foe Jerusalem ben o kisi pori, den ben aksi: „O ten den sani disi sa de, èn san sa de a marki foe joe denoja èn foe a bosroiti foe a seti foe sani?” (Mateus 24:1-3; Markus 13:3, 4) Leki piki Jesus ben taki na fesi foe feti, angriten, gronseki, nanga tra sani foe „a marki” foe en denoja nanga a bosroiti foe a seti foe sani. A ben taki toe: „A sma di horidoro te na a kaba, na en sa kisi froeloesoe” (Mateus 24:13). Wi sa kisi kibri efoe wi e horidoro getrow te na a kaba foe a libi di wi abi now noso te na a kaba foe a godelowsoe seti foe sani disi.

8. San ben moesoe doe, fosi a kaba foe a djoe seti foe sani, èn san e doe na ini a ten disi?

⁸ Fosi a kaba, wan spesroetoe sani di de toemoesi prenspari foe Jesus en denoja, ben o kon troe. Foe disi a ben taki: „A boen njoensoe disi foe a kownoekondre sa preiki na heri grontapoe pe sma e libi, leki wan kotoigi gi ala nâsi, èn dan a kaba sa kon” (Mateus 24:14). Fosi den Romesma ben pori Jerusalem èn a djoe sistema foe sani ben kon na wan kaba na ini 70 G.T., Paulus ben kan taki dati a boen njoensoe „ben e preiki na ala mekisani di de na ondro hemel” (Kolosesma 1:23). Ma na ini a ten disi, Jehovah Kotoigi e doe wan moro bigi preikiwroko „na heri grontapoe pe sma e libi”. Na ini den jari di no pasa so langa ete, Gado opo a pasi foe gi wan bigi kotoigi na Owstoe-Europa. Nanga drukkerij èn nanga tra gebow na heri grontapoe, na organisâsi foe Jehovah e sreka densrefi foe doe moro wroko, srefi na ini ’presi pe [den] no wroko’ ete (Romesma 15:22, 23). Joe ati e poesoe joe foe meki ala moeiti foe gi kotoigi bifo a kaba e kon? Efoe dati de so, dan Gado kan tranga joe foe abi wan moi prati na a wroko di de foe doe ete. — Filipisma 4:13; 2 Timoteus 4:17.

9. San Jesus ben abi na prakseri, soleki fa dati skrifi na Mateus 24:36?

⁹ A Kownoekondre preikiwroko di den ben taki foe dati na fesi èn tra sani foe a marki foe Jesus en denoja e kon troe nownowde. Foe dati ede, a kaba de krosibei gi a godelowsoe seti foe sani disi. A troe taki Jesus ben taki: „A dei nanga a joeroe dati no wan sma no sabi, no den engel foe hemel, no a Manpikin, ma soso a Tata” (Mateus 24:4-14, 36). Ma a profeititori foe Jesus kan jepi wi foe de srekasreka gi „a dei nanga a joeroe dati”.

Den ben de srekasreka

10. Fa wi sabi taki wi kan tan na ai na jejefasi?

¹⁰ Efoe wi wani pasa a bigi dei foe Jehovah libilibi, dan wi moesoe tan na ai na jejefasi èn tanapoe kánkan gi a boen foe a troe anbegi (1 Korentesma 16:13). Wi sabi taki sma kan horidoro na so wan fasi, bika wan osofamiri di ben dini Gado ben doe dati toe èn den ben pasa a Froedoe di ben pori godelowsoe libisma na ini 2370 b.G.T., libilibi. Di Jesus ben teki a pisi ten dati gersi a denoja foe en, dan a ben taki: „Neleki fa den dei foe Noa ben de, na so a denoja foe a Manpikin foe libisma sa de. Neleki fa den ben doe na ini den dei dati bifo a froedoe, den ben e njan èn den ben e dringi, mansma ben e trow èn oemasma den ben e gi foe trow, te leki a dei taki Noa ben go na ini na ark, èn den no ben poti prakseri na tapoe te leki a froedoe ben kon èn ben figi den alamala poeroe, na so a denoja foe a Manpikin foe libisma sa de.” — Mateus 24:37-39.

11. Na sortoe fasi Noa ben tjari ensrefi ala di ogri ben doe nanga tranga na ini den dei foe en?

¹¹ Neleki wi, Noa nanga en osofamiri ben libi na ini wan ogri grontapoe. Trangajesi engel „manpikin foe a troe Gado” ben teki libisma skin èn den ben teki wefi èn ben kisi den takroenen Nefilim leki pikin — ogriman di sondro tweifri ben meki a situwâsi kon de moro ogri (Genesis 6:1, 2, 4; 1 Petrus 3:19, 20). Ma „Noa ben waka nanga a troe Gado” na ini bribi. A „ben sori foe de sondro fowtoe na mindri den sma foe en ten” — a godelowsoe geslakti foe en ten (Genesis 6:9-11). Te wi e froetrow tapoe Gado na ondro begi, dan wi kan doe a srefi sani na ini na ogri èn godelowsoe grontapoe disi, ala di wi e wakti tapoe a dei foe Jehovah.

12. (a) Sortoe wroko Noa ben doe, boiti a bow di a ben bow wan ark? (b) San sma ben doe tapoe a preiki di Noa ben preiki, èn san ben de den bakapisi gi den?

¹² Sma sabi Noa heri boen leki a sma di ben bow wan ark foe meki sma pasa a Froedoe libilibi. A ben de „wan preikiman foe regtfardikifasi” toe, ma den sma foe en ten „no ben poti prakseri” na tapoe a boskopoe di a ben kisi foe Gado. Den ben njan èn ben dringi, ben trow, ben kweki osofamiri, èn ben go doro nanga den aladei afersi foe a libi te leki a Froedoe ben wai den alamala poeroe (2 Petrus 2:5; Genesis 6:14). Den no ben wani jere foe wan opregti fasi foe taki èn foe tjari densrefi, neleki fa a disiten godelowsoe geslakti e tapoe den jesi gi san Jehovah Kotoigi e taki foe „berow na Gado”, bribi na ini Krestes, regtfardikifasi, èn „a kroetoe di de na pasi” (Tori foe den Apostel 20:20, 21; 24:24, 25). No wan tori no de di kan froeteri wi omeni sma ben libi na grontapoe di Noa ben meki a boskopoe foe Gado bekènti. Ma wán sani de seiker, a nomroe foe sma di ben libi na grontapoe ben kon saka boen foeroe na ini 2370 b.G.T.! A Froedoe ben wai den godelowsoe sma poeroe, èn soso den sma di ben de srekasreka gi san Gado ben doe — Noa nanga den seibi tra sma foe en osofamiri — ben tan na libi. — Genesis 7:19-23; 2 Petrus 3:5, 6.

13. Na tapoe sortoe kroetoe bosroiti Noa ben froetrow dorodoro, èn san a ben doe akroederi a sani disi?

¹³ Gado no ben froeteri Noa foeroe jari na fesi, soifri sortoe dei nanga joeroe a Froedoe ben o kon ma di Noa ben abi 480 jari, dan Jehovah ben gi a komando: „A jeje foe mi no sa handri nanga sma te ten di no skotoe, bika en srefi na libisma skin. Dati meki den dei foe en sa tron wanhondro nanga twenti jari” (Genesis 6:3). Noa ben froetrow a kroetoe bosroiti disi foe Gado dorodoro. Baka di a ben tron 500 jari, a „ben tron papa foe Sem, Kam, nanga Jafet”, èn soleki fa a gwenti foe den dei dati ben de, dan kande 50 noso 60 jari ben pasa fosi den manpikin foe en ben trow. Di Noa ben kisi foe jere taki a ben moesoe bow na ark foe pasa a Froedoe libilibi, dan soleki fa a sori den manpikin dati nanga den wefi foe den ben jepi en nanga a wroko dati. Kande a bow foe na ark ben moksi nanga a diniwroko foe Noa leki „wan preikiman foe regtfardikifasi”, èn dati meki a ben abi foeroe foe doe na ini den lasti 40 te go miti 50 jari bifo a Froedoe ben kon (Genesis 5:32; 6:13-22). Ala den jari dati, en nanga en osofamiri ben handri na ini bribi. Meki wi srefi sori bribi te wi e preiki a boen njoensoe èn e wakti tapoe a dei foe Jehovah. — Hebrewsma 11:7.

14. San Jehovah ben taigi Noa te foe kaba, èn foe san ede?

¹⁴ Di na ark ben doro en kaba, dan a kan taki Noa ben denki taki a Froedoe ben de krosibei, ala di a no ben sabi soifri o ten disi ben o pasa. Te foe kaba Jehovah ben taigi en: „Seibi dei de ete, dan mi sa meki alen fadon kon na grontapoe, fotenti dei nanga fotenti neti langa” (Genesis 7:4). Dati ben gi Noa nanga en osofamiri nofo ten, nomo foe meki ala den difrenti sortoe meti go na ini na ark èn foe densrefi go na inisei bifo a Froedoe ben bigin. Wi no abi foe sabi san na a dei nanga a joeroe taki a pori foe a sistema disi sa bigin; a no wi kisi a wroko foe meki den meti tan na libi, èn libisma di abi a froewakti foe kan pasa libilibi, e kon kaba na ini na agersi ark, a jeje paradijs foe a pipel foe Gado.

„Tan na ai”

15. (a) Fa joe ben sa tjari kon na krin nanga joe eigi wortoe, den wortoe foe Jesus di de foe feni na Mateus 24:40-44? (b) Sortoe bakapisi a abi, efoe wi no sabi soifri a ten di Jesus sa kon foe tjari a kroetoe foe Gado kon?

¹⁵ Jesus ben froeklari foe a denoja foe en: „Dan toe man sa [wroko] na gron: a wan den sa tjari gowe èn a trawan den sa libi na baka; toe oema sa mara [karoe foe a tron blon] na a anoe-miri: a wan den sa tjari gowe èn a trawan den sa libi na baka. Foe dati ede, tan na ai, bika oenoe no sabi sortoe dei oen Masra e kon. Ma sabi wán sani, taki efoe na ososma ben sabi sortoe joeroe a foefoeroeman ben o kon, dan a ben o tan na ai èn a no ben o gi pasi taki sma broko kon na ini en oso. Foe dati ede, oenoe so srefi sori taki oenoe de srekasreka, bika a Manpikin foe libisma e kon na wan joeroe di oenoe no ben prakseri” (Mateus 24:40-44; Lukas 17:34, 35). Foe di wi no sabi soifri o ten Jesus o kon foe tjari a kroetoe foe Gado kon, meki wi moesoe de na ai èn dati e gi wi na okasi ibri dei foe sori taki wi e dini Jehovah sondro taki wi e prakseri wi eigi afersi nomo.

16. San sa pasa nanga sma di den „libi na baka” èn nanga den sma „di den tjari gowe”?

¹⁶ Den sma di den sa „libi na baka” foe kisi pori makandra nanga den godelowsoesma sa de den sma toe di ben kisi sabi, ma di ben meki wan libi pe den e prakseri den eigi afersi nomo, teki den abra. Meki a de so, taki wi de na mindri den sma di den „tjari gowe”, den sma di e gi densrefi dorodoro na ini a dini foe Jehovah èn di troetroe de nanga tangi foe den sani di a e gi den na jejefasi nanga jepi foe „a getrow èn koni srafoe” (Mateus 24:45-47). Meki wi dini Gado te na a kaba nanga „lobi di komoto na wan krin ati èn di komoto na wan boen konsensi èn di komoto na bribi di de sondro hoigrifasi”. — 1 Timoteus 1:5.

A de prenspari foe handri na wan santa fasi

17. (a) San den ben taki na fesi na 2 Petrus 3:10? (b) San na wan toe sani di wi moesoe doe, soleki fa 2 Petrus 3:11 e gi wi na deki-ati?

¹⁷ Na apostel Petrus ben skrifi: „A dei foe Jehovah sa kon leki wan foefoeroeman, pe den hemel sa pasa gowe nanga wan bigi babari, ma den elementi di faja srefisrefi, sa smèlter èn grontapoe nanga den wroko foe en sa bron krinkrin” (2 Petrus 3:10). Den agersi hemel nanga grontapoe no sa man kakafoetoe gi a faja foe a bigi atibron foe Gado. Dati meki Petrus e taki toe: „Now di ala den sani disi sa smèlter, sortoe sma oenoe moesoe de foe tjari oensrefi na wan santa fasi èn foe doe sani di e sori taki oenoe gi oensrefi na ini a dini foe Gado!” (2 Petrus 3:11) Wan toe foe den sani disi di wi moesoe doe, na taki wi moesoe de na den kresten konmakandra alaten, doe boen gi tra sma, èn abi wan boen prati na a preiki di wi e preiki a boen njoensoe. — Mateus 24:14; Hebrewsma 10:24, 25; 13:16.

18. San wi moesoe doe, efoe wi e kweki wan lobi gi grontapoe?

¹⁸ „Foe tjari oensrefi na wan santa fasi èn foe doe sani di e sori taki oenoe gi oensrefi na ini a dini foe Gado”, wani taki dati wi ’no moesoe meki grontapoe flaka wi’ (Jakobus 1:27). Ma san efoe wi e kweki wan lobi gi a grontapoe disi? Kande wan sani hari wi kon na ini wan kefalek posisi na fesi Gado, foe di wi e soekoe ontspanning di no krin noso foe di wi e arki pokoe nanga singi di e horibaka gi a godelowsoe fasi foe a grontapoe disi (2 Korentesma 6:14-18). Efoe dati de so, dan meki wi soekoe a jepi foe Gado na ini begi, so taki wi no sa pasa gowe makandra nanga grontapoe ma sa tanapoe na fesi a Manpikin foe libisma èn a sa feni wi boen (Lukas 21:34-36; 1 Johanes 2:15-17). Efoe wi gi wisrefi abra na Gado kaba, dan seiker wi sa wani meki ala moeiti foe bow èn hori wan waran matifasi nanga en èn na so fasi de srekasreka gi Jehovah en bigi èn frede dei.

19. Foe san ede ipi-ipi Kownoekondre preikiman kan froewakti foe pasa a bosroiti foe na ogri seti foe sani disi libilibi?

¹⁹ Noa nanga en osofamiri di ben dini Gado, pasa a Froedoe di ben pori na owroeten grontapoe, libilibi. Opregti sma ben tan na libi di a kaba foe a djoe seti foe sani ben kon na ini 70 G.T. Foe eksempre, na apostel Johanes ben wroko ete na ini a diniwroko foe Gado na wan sani foe 96-98 G.T., di a ben skrifi a boekoe Openbaring, na Evangelie tori foe en, èn den dri brifi di Gado meki en skrifi den. Foe den doesoendoesoen sma di ben teki a troe bribi tapoe a Pinksterfesa foe 33 G.T., kande foeroe foe den ben pasa a kaba foe a djoe seti foe sani, libilibi (Tori foe den Apostel 1:15; 2:41, 47; 4:4). Na ini a ten disi, ipi-ipi Kownoekondre preikiman kan howpoe foe pasa a kaba foe a disiten godelowsoe seti foe sani disi, libilibi.

20. Foe san ede wi moesoe de fajafaja ’preikiman foe regtfardikifasi’?

²⁰ Now di wi abi na okasi foe go libilibi na ini a njoen grontapoe, dan meki wi de fajafaja ’preikiman foe regtfardikifasi.’ Fa a de wan grani foe dini Gado na ini den lasti dei disi! Èn fa a de wan prisiri foe tjari sma kon na ini a disiten „ark”, a jeje paradijs di a pipel foe Gado e njan boen foe dati! Meki a de so, taki den miljoenmiljoen sma di de na ini en now, tan getrow, tan de na ai na jejefasi, èn de srekasreka gi a bigi dei foe Jehovah. Ma san sa jepi wi alamala foe tan na ai?

[Foetoewortoe]

San joe ben sa piki?

◻ San son sma ben froewakti ini a tori foe a dei foe Jehovah èn a denoja foe Krestes?

◻ Foe san ede wi kan taki dati Noa nanga en osofamiri ben de srekasreka gi a Froedoe?

◻ San sa pasa nanga den sma di e „tan na ai” èn nanga den sma di no e doe dati?

◻ Foe san ede a de prenspari foe handri na wan santa fasi, spesroetoe te wi e kon moro krosibei foe a bigi dei foe Jehovah?