Kownoekondre preikiman e froeteri

„Meki oen leti skèin gi den sma”

NA INI en Bergitaki, Jesus ben taigi den disipel foe en: „Oenoe na a leti foe grontapoe.” A ben go doro foe gi den tranga: „Meki oen leti skèin gi den sma, so taki den kan si den boen wroko foe oenoe èn gi glori na oen Tata di de na hemel.” — Mateus 5:14-16.

Na Italia, sma si den boen wroko foe Jehovah Kotoigi. Foe eksempre, a boen fasi fa den e tjari densrefi te den e go na den alajari kongres foe den, e gi Gado glori, soleki fa a tori di e kon now, e sori.

▪ Jari langa, wan oema na Terni, Italia, ben jepi na oemapikin foe en foe drai wan bar di ben de krosibei foe a stadion na ini a foto dati. A e froeteri: „Mi ben si wan bigi difrenti na mindri den wan di ben kon foe loekoe bal èn den sma di ben kon na den kongres foe Jehovah Kotoigi drape. Den Kotoigi ben weri bescheide krosi, èn den ben de eerlijk èn den ben abi lespekifasi. Nofo tron mi ben aksi misrefi fa sma foe difrenti ras ben kan libi so boen nanga makandra.

Wan dei wan Kotoigi ben stòp mi na strati èn ben aksi mi efoe mi ben sabi a nen foe Gado. Mi no ben sabi, èn foe di mi ben sabi taki Jehovah Kotoigi na boen sma, mi ben feni en boen foe na oema kon fisiti mi. Mi ben abi aksi foe a situwâsi foe den dedewan, di a ben piki nanga jepi foe bijbel. Sondro draidrai, mi ben teki wan bijbelstudie, èn toe wiki baka dati mi ben bigin go na den konmakandra.

Ini a bigin, na oemapikin foe mi ben gens mi, ma a fasi fa mi ben tjari misrefi èn a fasti bosroiti di mi ben abi, ben meki a kenki a fasi foe en. Mi ben bigin studeri neigi moen pasa kaba. Now mi oemapikin nanga en masra e taki boen sani foe den Kotoigi di e kon bai sani na ini a bar foe den. Èn mi, mi ben teki dopoe na wan kongres na ini a stadion disi.”

▪ Baka wan kongres na Roseto degli Abruzzi, wan basi foe wan presi pe sma kan seti tenti, ben taki: „Mi si taki Jehovah Kotoigi de eerlijk srefisrefi na ini ala san den e doe. A wiki di pasa, 40 foe den ben tan na a presi di mi abi foe seti tenti, èn den no ben meki no wan enkri problema. Na presi foe dati den na den wan-enkri sma di e kon èn e froeteri joe efoe den abi ete wan tra sma di e tan nanga den na ini a wagi pe sma kan tan na ini noso a tenti foe den. Gi mi, den na den moro boen klanti di joe kan abi.”

▪ Baka a srefi kongres dati, wan hotelbasi ben taki: „Ala Jehovah Kotoigi na sma di lobi vrede. Den no grofoe, èn den e go sribi froekoe. Den troetroe na sma di abi switifasi, di de eerlijk, èn di abi boen maniri. A ben o moi srefisrefi efoe ala sma ben de leki den. Tra sma e foefoeroe ala sani — vaas, asbaki, srefi toiletpapira nanga soekroe! Noiti ete so wan sani pasa na oenoe. Te den pikin foe oenoe e teki ijscream na ini na ijskasi te neti, dan mi no abi foe go loekoe san den teki. Den e loekoe san den moesoe pai mi èn den e kon pai en wantewante. Mi e froetrow den troetroe. A ben o moi troetroe efoe tra sma ben de so toe! Mi winsi taki ala den sma di e tan ini mi hotel ben de Jehovah Kotoigi.”

Sma sabi Jehovah Kotoigi heri boen na Italia, neleki na foeroe tra presi na grontapoe. Den ’e tan tjari densrefi na wan boen fasi na mindri den nâsi’ èn na so fasi den e gi glori na a troe Gado, di a nen foe en den e tjari. — 1 Petrus 2:12.