Sani Orga èn Seti ’na wan Fasi Di Fiti’
1 Fu wan distrikt kongres kan waka bun, dan wi alamala musu bondru wi krakti kon na wán. Na afdeling fu a kongres di e orga sani, e sreka sani fu kan abi wan bun presi fu kon makandra èn e sorgu so srefi taki sma di abi sribipresi fanowdu e kisi dati. Ibri sma èn so srefi bigi famiri e sreka sani fu kon drape èn fu feni wan sribipresi. Den gemeente e orga ala den friwani wrokoman fu yepi na den furu afdeling di de fanowdu so taki kongres kan hori. Disi e pasa fu kan „meki ala sani feni presi na wan fasi di fiti èn leki fa sani seti”.—1 Kor. 14:40.
2 Te yu e du muiti makandra nanga den wan di e orga a kongres, dan hori na prakseri taki furu mun — son leisi furu yari srefi — de fanowdu fu orga sani. Hondrohondro brada e teki furu ten fu seti sani. Disi wani taki tu dati den musu yuru presi, tyari wroko sani kon makandra èn aksi wrokoman fu yepi. A sreka di den sreka sani na fesi e meki taki wi alamala kisi blesi na yeye fasi. San wi kan du fu yepi?
3 Wroko Makandra Nanga den Wan Di E Sreka den Sribipresi: A prenspari taki wi alamala e wroko makandra nanga den sani di seti gi a kongres. Disi de spesrutu fanowdu te wi e seti sani fu kan feni wan sribipresi. Furu fu wi brada nanga sisa no gudu. Dati meki den musu gebroiki den bunkopu seti fu na afdeling di e sorgu gi sribipresi. Furu muiti meki fu kan feni den moro bun sribipresi di de. Na wan lobi-ati fasi wi musu luku san trawan abi fanowdu èn ’hori ai, no soso fu luku fa a de nanga un eigi afersi, ma so srefi fu luku fa a de nanga trawan’.—Fil. 2:4.
4 Te wi e hori wisrefi ala ten na den tirilin fu a kongres fu kan feni wan sribipresi na ini wan hotel noso na wan brada noso sisa oso, dan ala sma di de na ini a tori o kisi wini. Te wi no e hori wisrefi na den bodoi disi dan dati e meki taki problema, di no de fanowdu, e kon. Fa so? Te wi e wroko makandra nanga den rai disi, dan na afdeling di e sorgu gi sribipresi noso den hotel, sabi na fesi omeni kamra den abi fu hori èn so srefi omeni sma o kon sribi drape. Disi e yepi den fu sreka sani. Efu furu wi no e kon sribi moro noso efu wi e sreka tra sani, dan dati e tyari problema kon gi den sma fu a hotel èn so srefi gi wi brada nanga sisa di kande ben wani gi wi wan sribipresi. Dan na ini a ten di e kon, kande den brada nanga sisa noso den sma fu a hotel, sa sreka sani fu hori moro mendri sribipresi gi den kongres fu wi, fu di den e denki taki wi no sa hori wi wortu. A moro betre trutru taki wi e hori wi wortu èn taki wi „Iya wani taki Iya”!—Mat. 5:37.
5 Prakseri den Bun Bakapisi Disi: Baka wan kongres, wan man di e drai wan presi pe sma kan go sribi ben taki: „Mi si taki Yehovah Kotoigi eerlijk srefisrefi na ini ala san den e du. A wiki di pasa mi ben abi 40 fu den na a kampu fu mi, èn den no ben tyari no wan-enkri problema kon. Fu taki en leti, den sma disi nomo e kon fruteri yu te den abi ete wan sma di e tan na ini a kampu noso a tenti fu den. Mi fu mi sei si taki den na den moro bun sma di kan yuru wan sribipresi na yu.” O moi a ben o de efu ala den sma di e yuru sribipresi gi wi, ben kan abi so wan moi ondrofeni! Dati ben o gi wan tumusi moi kotoigi trutru!
6 Wan man di e sreka sani gi wan grupu fu hotel ben taki wan leisi: „Mi no kan memre taki oiti mi kisi so wan bigi grupu sma di ben du soifri soleki fa den e bribi soleki fa Yehovah Kotoigi e du dati. Wi howpu taki unu o kon baka.” Den wortu disi e sori taki a bun fasi fa wi e tyari wisrefi no e gi wi wawan deki-ati, ma so srefi den furu sma na ini a grontapu di e luku fa wi e du sani.
7 Wan Tu Prenspari Fasi fa Wi Kan Wroko Makandra: Wan tu makriki sani de di wi kan du fu wroko makandra nanga a kongres seti fu sreka sribipresi gi sma. (1) No aksi fu hori moro kamra leki san yu wani gebroiki. (2) Seni a moni di den aksi na fesi, fu kan hori wan kamra fu a hotel gi yu. (3) No gebroiki den nyan-nyan seti na mamanten gi fisitiman na wan fasi di no fiti. (4) Hori na prakseri taki a fiti dati den sma di abi a hotel e fruwakti fu wi taki wi e hori wisrefi na den tirilin fu den.
8 Leki dinari fu Yehovah Gado, wi abi na okasi fu sori taki wi abi den eigifasi fu en na ini ala san wi e du. Disi wani taki tu dati wi e sreka sani gi a kongres èn taki wi e go na a kongres pe Gado nen de ini a tori. Hori na prakseri taki ’a no de wan Gado fu bruya, ma fu vrede’ (1 Kor 14:33). Fu dati ede, meki wi abi a fasti bosroiti fu sori ala sma di e luku fa wi e du sani taki wi abi na eigifasi disi fu Yehovah di den kan si na — a fasi fa wi e tyari wisrefi te wi e sreka sani fu kon na a „Leriman fu Gado Wortu” Distrikt Kongres. Meki a de so, taki opregti sma di e luku fa wi e du sani e kon frustan taki na ipi sma di Yehovah tyari kon makandra, orga ’na wan fasi di fiti èn na wan fasi di seti’.—Ps. 68:26.