A Distrikt Kongres fu Yehovah Kotoigi na ini 2006
1. Fa na owruten pipel fu Gado ben sori taki den ben e warderi a tru anbegi, èn sortu okasi wi abi tu na ini a ten disi?
1 Wan leisi, Kownu Heskia fu owruten Yuda ben seni boskopuman na ini a heri kondre fu tyari brifi go gi a pipel di ben e taki dati den ben musu kon makandra na ini Yerusalem (2 Kron. 30:6, 13). A fasi fa den sma ben handri, e sori fa den ben e denki fu a tru anbegi (2 Kron. 30:10-12). Na ini augustus nanga september 2006, den disiten futuboi fu Yehovah abi wan srefi sortu okasi tu fu sori taki den abi furu warderi gi a grani di den abi fu kon makandra fu anbegi Yehovah. Wan brifi seni kon na a gemeente fu yu, fu gi yu wan kari fu go na a Distrikt Kongres na ini 2006. Yu o teki a kari disi?
2. San wi kan du nownow kaba efu wi wani kisi wini dorodoro fu a kongres?
2 Seti sani nownow kaba: Efu wi wani kisi wini dorodoro fu a programa di sreka na wan lobi-ati fasi fu gi wi yeye nyanyan, dan wi musu de drape a heri pisi ten te a programa e hori. A de wan koni sani efu nownow kaba yu e seti iniwan sani di de fanowdu, so taki yu nanga yu osofamiri kan de drape ala den dri dei (Odo 21:5). Sobun, kande yu sa musu aksi yu wrokobasi fri ten fu go na a kongres, noso kande yu musu bigin fruteri yu trowpatna di no de na bribi, san yu wani du. A kan tu taki yu musu bigin suku sribipresi, noso yu musu seti sani gi den bijbelstudie fu yu, so taki den kan de drape ibri dei. No wakti te na a lasti momenti fu seti den prenspari sani disi. Na presi fu dati, taki nanga Yehovah fu den sani disi na ini begi, èn abi a frutrow taki „ensrefi sa handri”.—Ps. 37:5.
3. Fu san ede wi sa hori wisrefi na den sani di den brada seti fu yepi wi?
3 Na organisâsi fu Yehovah du furu muiti fu sorgu taki nofo sribipresi de na ini a foto pe a kongres e hori. Efu wi abi warderi gi den brada di wroko tranga fu seti den sani disi sondro fu denki densrefi nomo, efu wi e broko wi ede nanga den tra sma di komoto fu tra presi kon na a kongres, èn efu wi abi lespeki gi a fasi fa sani orga soleki fa Gado wani, dan wi sa du sani soifri soleki fa skrifi na ini na artikel disi.—1 Kor. 13:5; 1 Tes. 5:12, 13; Hebr. 13:17.
4, 5. Sortu seti de gi den wan di abi spesrutu yepi fanowdu?
4 Spesrutu yepi: Odo 3:27 e taki: „No tapu yusrefi fu du bun gi den wan di abi yepi fanowdu, efu a de so taki yu anu abi a makti fu du dati.” Fa yu kan du bun gi trawan, te a abi fu du nanga a kongres? A kan taki owru preikiman, den sikiwan, den wan di e du furuten diniwroko, èn tra sma sosrefi abi yepi fanowdu fu kon na a kongres, noso fu feni wan sribipresi. Na a fosi presi, famiriman abi a frantwortu fu sorgu gi den sma disi (1 Tim. 5:4). Efu den no man, dan tra Kresten brada noso sisa kan yepi den (Gal. 6:10). Bukustudie-opziener musu luku suma fu a grupu fu den abi spesrutu yepi fanowdu, so taki den kan de seiker taki den seti sani langa ten bifo a kongres bigin.
5 Soso den preikiman di no abi famiriman, noso di no de na ini wan gemeente di kan yepi den nanga wan presi fu tan, kan kisi a papira di nen Kameraanvraagformulier voor bijzondere omstandigheden. A Diniwroko Komte fu a gemeente musu gebroiki den rai na tapu a papira disi, nanga den rai di de na ini a brifi fu 14 december 2005 di seni gi ala skin fu owruman, fu luku efu a preikiman doro den markitiki fu kisi so wan papira. A seti disi na soso gi preikiman di abi wan bun nen èn di abi pikin di e tyari densrefi na wan fasi di fiti.
6. San na wan fasi fa wi kan meki sma prisiri te den de na a kongres di e kon?
6 Friwani-wrokoman di de klariklari fu gi densrefi: A no de fu taki dati ala sma di kon na a kongres, sa abi prisiri èn sa nyan bun fu a yeye nyanyan nanga den okasi di den sa kisi fu abi switi demakandra nanga trawan. Wi sa kisi moro prisiri te wi e gi wi nen fu yepi du a wroko di musu du fu meki ala sani waka bun na a kongres (Tori. 20:35). Heri esi, a Kongres Komte sa aksi sma fu yepi nanga a wroko disi. Yu kan gi yu nen fu yepi du a wroko disi?—Ps. 110:3.
7. Sortu sani fu na alayari distrikt kongres yu lobi, èn sortu fasti bosroiti yu musu abi?
7 Di wan boi fu feifi yari go na wan distrikt kongres, dan a taki: „A distrikt kongres na a moro prisiri pisi fu na anbegi di wi e anbegi Yehovah.” A sani disi di a boi taki nanga en heri ati, e yepi wi fu frustan fa a de wan prisiri sani trutru fu go na den alayari distrikt kongres fu wi. A de trutru soleki fa a psalm skrifiman taki: „Wán dei na ini yu fesidyari moro bun leki dusun dei na wan tra presi” (Ps. 84:10). Na ini wan singi, David ben taki dati a e angri fu ’tan na ini na oso fu Yehovah ala den dei fu en libi, fu luku go na Yehovah en tempel nanga tangi na ini en ati’ (Ps. 27:4). David ben breiti srefisrefi fu de wan anbegiman fu Yehovah. Meki wi abi a srefi warderi tu gi a tru anbegi, fu di wi o go ala den dri dei na a distrikt kongres.
[Faki na tapu bladzijde 3]
Programa ten
Freida nanga Satra
9:30 mamanten te 5:05 bakadina.
Sonde
9:30 mamanten te 4:10 bakadina.