„Waka nanga Gado” Distrikt Kongres fu Yehovah Kotoigi 2004
1 Fu san ede a distrikt kongres di e hori ala yari, na wan prisiri sani gi yu? Na fu den moi lezing nanga drama ede di „a getrow èn koni srafu” sreka gi wi? (Mat. 24:45-47) Na fu den nyun publikâsi di e gi wi yeye nyanyan na a yoisti ten? Na fu den ondrofenitori di brada nanga sisa e fruteri di e sori fa Bijbel meki den libi kon moro bun? Na fu den boskopu ede di e sori fa a Kownukondre preikiwroko e go na fesi na ini tra kondre? Na fu a demakandra di wi abi nanga tra brada nanga sisa awinsi den owru noso yongu? Iya, wi e luku go na a ten te den kongres fu wi sa hori èn wi de fayafaya fu yere den sani disi, nanga furu tra sani!
2 De drape ala dri dei: Nanga yepi fu Moses, Yehovah ben komanderi: „Tyari a pipel kon na wán . . . so taki den kan arki èn so taki den kan leri” (Deut. 31:12). Yehovah sreka wan spesrutu programa fu gi wi leri ibri dei fu wi kongres, nanga yepi fu a getrow èn koni srafu-grupu. Fu di a e leri wi fa wi kan ’gi wisrefi wini’, meki wi wani de drape fu teki ala den leri (Yes. 48:17). Efu a de fanowdu fu aksi yu wrokobasi fakansi, dan begi Yehovah bifo yu aksi a wrokobasi fu yu. Na a fasi disi yu e sori deki-ati neleki Nehemia (Neh. 1:11; 2:4). A ben o de wan moi sani tu efu yu ben o fruteri den tra memre fu yu osofamiri, di no de na bribi, so esi leki a kan o ten yu sa go na a kongres.
3 Sma di abi spesrutu yepi fanowdu: Na apostel Paulus ben memre den gemeente na ini Galasia fu „du bun gi ala sma, ma spesrutu gi den wan di de na ini a srefi bribi leki wi” (Gal. 6:10). Aladi owru brada nanga sisa, sikisma, papa noso mama di de den wawan, noso den sma di e du furuten diniwroko, no sa aksi yu fu yepi den, toku kande den abi problema fu go na a kongres. Yu man „du bun” gi den èn yepi den? Spesrutu den Kresten famiriman nanga den owruman musu luku fa a de nanga den sortu sma disi.
4 Efu wan preikiman seni wan papira fu aksi sribipresi, dan a Dienstkomte fu a gemeente sa luku a papira bun nanga yepi fu den tirilin di skrifi na tapu a papira. Den musu luku efu den sma disi kan kisi yepi na ini den eigi gemeente. A seti disi de soso gi preikiman di abi wan bun nen, èn gi den pikin fu den sosrefi di e tyari densrefi na wan fasi di fiti. Te den brada di e sreka sribipresi wani sabi moro fu den sma di aksi sribipresi, dan den sa kontakti a sekretarsi fu a gemeente.
5 Na wan konmakandra di a pipel fu Yehovah ben hori sowan 2500 yari pasa kaba, dan Esra nanga den tra Leifisma ben leisi Gado Wortu èn den ben fruklari en gi den sma di ben kon makandra. San ben de a bakapisi? We, Nehemia 8:12 e sori wi taki „a heri pipel ben gowe fu . . . abi bigi prisiri, bika den ben frustan den wortu di sma ben meki den kon sabi”. Wi no e breiti taki a getrow srafu-grupu, neleki Esra nanga den Leifisma, e gebroiki Gado Wortu, taki den e fruklari en, èn taki den e sori wi fa wi musu libi akruderi en? Fu di den e du disi, meki a srafu dati e du leki Yehovah di e sori tru lobi, èn di e broko en ede nanga a pipel fu En. Teki a bosroiti fu no misi nowan-enkri dei fu a „Waka nanga Gado” Distrikt Kongres!
[Faki na tapu bladzijde 3]
Programa ten
Freida nanga satra
9.30 mamanten - 5.10 bakadina
Sonde
9.30 mamanten - 4.05 bakadina