„Gi yesi na Gado” Distrikt Kongres fu Yehovah Kotoigi 2005
1 Fu di Yehovah Gado na wi Gran Leriman, meki a seti wan konmakandra gi wi so taki a kan leri wi den pasi fu en (Yes. 30:20, 21; 54:13). A e du disi nanga yepi fu a getrow èn koni srafu di e seti konmakandra, soleki den alayari distrikt kongres fu wi (Mat. 24:45-47). Wi e firi a srefi fasi leki a psalm skrifiman David, di ben singi: „Na mindri den ipi sma di kon makandra, mi sa blesi Yehovah” (Ps. 26:12). David ben frustan heri bun o warti a de fu kisi leri fu Yehovah èn a ben abi a fasti bosroiti fu kon makandra nanga a pipel fu Gado ala ten.
2 Yu sa de na mindri „den ipi sma di o kon makandra” na a „Gi yesi na Gado” Distrikt Kongres fu Yehovah Kotoigi 2005? Efu dati de so, dan a rai di e kon now sa yepi yu fu sreka na fesi fu man de na a kongres.
3 Sreka sani now fu de ala dei: „Den plan fu a sma di de fayafaya seiker sa abi winimarki” (Odo 21:5). Den wortu disi e sori o prenspari a de fu sreka sani na fesi so taki noti no kan tapu yu fu go na a kongres, a no so? Fu sorgu taki yu no e misi noti fu a yeye nyanyan di e gi krakti baka, dan a ben o koni fu bigin seti ala sani now so taki yu kan de na ala den dri dei. Efu yu musu aksi yu wrokobasi fri ten, dan du dati nownow kaba. Efu yu musu fruteri yu trowpatna di no de na bribi san yu wani du, dan no wakti te na a lasti momenti. Awinsi sortu problema yu e kisi, taki nanga Yehovah fu den, èn abi a frutrow taki nanga yepi fu en „den plan fu yu sa poti steifi” (Odo 16:3). Boiti dati, dan a ben o bun tu fu yepi den bijbelstudie fu yu fu sreka sani na fesi, so taki den kan de na ala pisi fu a programa.
4 Spesrutu yepi: Na apostel Paulus ben taki dati son brada ben de ’wan yepi gi en di ben gi en krakti’ (Kol. 4:7-11). Wán fasi fa den ben e yepi Paulus, ben de taki den ben gi en san a ben abi fanowdu. Te wi e prakseri a kongres, dan fa yu kan de ’wan yepi di e gi trawan krakti’? A kan taki owru preikiman, den swakiwan, den wan di de na ini a furuten diniwroko, nanga trawan, abi yepi fanowdu, soleki wan fasi fu go na a kongres, noso wan presi fu tan. Na a fosi presi, den famiri abi a frantwortu fu sorgu gi den sma disi (1 Tim. 5:4). Ma efu den no man du dati, dan tra brada nanga sisa kan yepi den wan disi (Yak. 1:27). Bukustudie-opziener musu luku suma fu a grupu fu den abi spesrutu yepi fanowdu, so taki den kan de seiker taki den seti sani langa ten bifo a kongres bigin.
5 Soso den preikiman di no abi famiri, noso gemeente fu yepi den nanga wan presi fu tan, kan kisi a papira di nen Kameraanvraagformulier voor bijzondere omstandigheden. A Diniwroko Komte fu a gemeente musu gebroiki den rai na tapu a papira disi, nanga den rai di de na ini a brifi fu 14 december 2004 di seni gi ala skin fu owruman, fu luku efu a preikiman doro den markitiki fu kisi so wan papira. A seti disi na soso gi preikiman di abi wan bun nen èn di abi pikin di e tyari densrefi na wan fasi di fiti.
6 Friwani-wrokoman de fanowdu: Yesus gi wan heri bun eksempre fa wi kan sori sakafasi fu di wi e poti prakseri na san trawan abi fanowdu (Luk. 9:12-17; Yoh. 13:5, 14-16). Den wan di e gi den nen fu wroko na a kongres, e sori taki den abi a srefi denki. Fu sorgu taki den difrenti afdeling fu a kongres abi nofo wrokoman, dan dyonsro a Kongres Komte sa aksi tra brada fu wroko makandra nanga den. A de fanowdu trutru taki owruman de klariklari fu teki frantwortu. Fu di den de klariklari fu gi yepi, meki den de wan moi eksempre gi ala sma na ini a gemeente.—1 Petr. 5:2, 3.
7 Na ini den mun augustus nanga september, Yehovah Gado seti sani nanga yepi fu „a getrow basya”, so taki a pipel fu en kan konmakandra fu kisi rai di sa yepi wi na yeye fasi (Luk. 12:42). Wi musu meki tranga muiti fu sreka sani na fesi so taki wi kan de na ala den dri dei, ma a no sa de fu soso kwetikweti. A „Gi yesi na Gado” Distrikt Kongres fu Yehovah Kotoigi 2005, sa gi wi a fasti bosroiti fu dini Yehovah now, èn fu têgo. Meki wi abi a fasti bosroiti fu gi yesi na a frumane fu a psalm skrifiman di ben taki: „Blesi Gado na mindri fu den grupu fu sma di konmakandra.”—Ps. 68:26.
[Faki na tapu bladzijde 3]
Programa ten:
Freida nanga satra
fu 9.30 mamanten - 5.05 bakadina.
Sonde
fu 9.30 mamanten - 4.10 bakadina.